Sena B: L-Ewwel Ħadd tar-Randan: Evanġeju ta’ San Mark 13, 33-37.

It-laqgħa tal-lejla bdiet bit-Talba tal-Moviment Kerygma sabiex l-Ispirtu s-Santu idawwal lil dawk preżenti, dak l-Ispirtu li mingħajru aħna lanqas aħna kapaċi nduru lejn Alla u nesprimu dak kollu li qed inħossu u dak li għandna bżonn.

It-tema li l-Moviment Kerygma għal dan l-Avvent hija: “Ħajti Hi Avvent”. X’itfisser il-Kelma Avvent? Preparazzjoni u stennija għall-miġja ta’ Ġesú. Hawnhekk dawk preżenti ġew mistoqsija għal liema miġja ta’ Ġesú qegħdin nirreferu. Ħafna rrispondew li l-Avvent għandu jirreferi għall-miġja ta’ Ġesú fil-ħajja tagħna. Din il-miġja ta’ Ġesú fil-ħajja tagħna spiss noħduha for granted. Tajjeb li kuljum f’dan iż-żmien tal-Avvent nistaqsu: “Fhiex inhi qalbi għall-miġja ta’ Ġesú?

L-Avvent huwa wkoll bħar-Randan żmien penitenzjali. Għandna nippreparaw ukoll fih permezz ta’ sawm li jwassalna għall-konverżjoni. Għandu jkun proċess kontinwu ta’ konverżjoni.

L-evanġelju tal-Ħadd li ġej, l-ewwel Ħadd minn erbgħa tar-Randan tas-Sena B nużaw l-evanġelju ta’ San Mark li dejjem jgħinna niskopru min hu dan Ġesú. F’dan l-ewwel Ħadd tar-Randan l-evanġelju jpoġġina fl-istennija għall-miġja ta’ Ġesú. Hekk kif inpoġġu ħarsitna fuq il-Milied li kienet l-ewwel miġja ta’ Ġesú fid-dinja; il-Knisja qed tistedinna biex nippreparaw ruħna  għat-tieni miġja ta’ Ġesú. Fit-tieni u t-tielet Ħadd niltaqgħu mal-figura ta’ San Ġwann il-Battista, il-prekursur li jippuntana lejn min hu Ġesú. Fir-raba’ Ħadd għandna l-figura ta’ Marija li se ġġibilna u twasslilna lil Ġesú.

Fil-laqgħa ġie moqri l-ewwel qari mill-Ktieb tal-Profeta Iżaija 63, 16b-17.19b; 64, 2-7 kif ukoll inqara l-Evanġelju minn San Mark 13, 33-37.

In-nies preżenti ġew mistoqsija x’jaħsbu li huma l-kliem imporanti ta’ dan l-evanġelju? Dawk preżenti semmew l-aktar il-kelma ‘ishru’. Tishar tfisser li tgħasses, tkun attent, taħdem aktar mis-soltu. Ġesú jgħidilna biex nishru ma jmurx jiġi s-sid u jsibna reqdin. Ġesú mhux l-ewwel darba li tkellem fuq is-sahra bħal pereżempju meta talab lill-appostli qrib tiegħu biex jibqgħu miegħu fil-Ġnien tal-Ġetsemani. Is-sahra għalhekk hija l-kelma mportanti f’dan l-evanġelju.  Betlem u l-art Lhudija kienu ilhom jistennew lill-Iben t’Alla imma twieled u ma ndunawx bih. Fil-Bibbja nsibu diversi referenzi għal dan l-irqad li jtellef is-sahra. Issemmew l-istejjer ta’ Sansun fost oħrajn, li qatgħulu xagħru waqt li kien rieqed. Dan l-irqad spiritwali itellef mill-ħajja u l-ħeġġa tagħna bħala nsara, itellef mill-imħabba li għandu jkollna fil-ħajja tagħna. Issemmiet l-Eżortazzjoni Appostolika “Ferħ tal-Evanġelju” tal-Papa Franġisku li fiha l-Papa jsemmi l-attiviżmu li forsi ninħakmu minnu meta nkunu nattendu f’xi grupp li jorganizza diversi attivitajiet. Importanti li l-attivitajiet li nkunu fihom għandu jkollhom l-iskop ta’ evanġelizzazzjoni li nwasslu lil Ġesú lil xulxin permezz tal-esperjenza komunitarja.

Aħna għalhekk irridu nishru sabiex nevanġelizzaw u nwasslu lil Ġesú ġewwa fina u lill-oħrajn. It-talb u l-formazzjoni, fosthom il-qari u l-meditazzjoni tal-Kelma t’Alla huwa essenzjali fil-ħajja tagħna. Nistgħu nagħmlu ħafna affarijiet imma mportanti li nkunu flimkien u bi skop wieħed. Inġieb l-eżempju ta’ arloġġ li jiddependi mhux biss mill-preċiżjoni ta’ kull rota/ingranaġġ li għandu imma wkoll jiddependi mill-qafas li jżomm dawn ir-roti kolha flimkien. Dan il-qafas li jżommna flimkien huwa t-talb u l-formazzjoni.

Meta nishru għandna noqogħdu attenti minn dawk l-affarijiet li forsi żgħar imma li jidħlu fin fin fil-ħajja tagħna; bħall-indifferenza u l-passivitá. Dawn huma l-affarijiet li jħalluna reqdin. Tishar tfisser li ma tħallix għal għada dak li għandek tagħmel. Importanti li nħossu li Alla diġá qiegħed magħna, aħna rridu nagħmlu sforz biex inħossu l-preżenza tiegħu fostna. Fl-ewwel qari nsibu: “Alla jħabrek għal min jittama fih.” Li aħna naċċettaw ir-rieda t’Alla f’ħajjitna permezz tal-umiltá iwassal lil Alla biex iħabrek għalina, li jagħtina grazzja, għajnuna speċjali. Meta aħna naċċettaw lilu fina, huwa jagħtina l-fidi li hija rigal mingħandu għalina biex ibiddel għall-aħjar il-ħajja tagħna.

Irridu nagħtu ċ-ċans lil Alla sabiex jagħmel dak li għandu jagħmel magħna. Il-paċenzja u l-perseverenza huma mportanti fil-ħajja tagħna sabiex nishru b’mod li jqawwina u jressaqna lejn Ġesú u lejn l-oħrajn.

Lejn l-aħħar tal-laqgħa issemma d-Dikors tal-Papa Franġisku lill-Parteċipanti ta’ Laqgħa organizzata mill-Kunsill Pontifiċju għall-Promozzjoni tal-Evanġelizzazzjoni Ġdida. Nixtiequ għalhekk nikkwotaw parti minnu li titkellem dwar l-imporanza li nżommu quddiem għajnejna l-iskop tal-attivitajiet u l-laqgħat kollha li aħna nagħmlu fil-ħajja tagħna speċjalment anke bħala Moviment reliġjuż:

“nitlobkom, ejjew ma niġrux wara l-ilħna tas-sireni li jsejħulna biex nagħmlu mill-pastorali serje ta’ inizjattivi mxerrda, bla ma jirnexxielna nagħrfu l-essenzjal ta’ l-impenn ta’ evanġelizzazzjoni.  Xi kultant donna aktar imħabbtin biex inkattru l-attivitajiet milli biex inkunu attenti għall-persuni u għal-laqgħa tagħhom ma’ Alla.  Pastorali li m’għandhiex din l-attenzjoni tibda ftit ftit issir sterili.  Ma ninsewx nagħmlu bħalma għamel Ġesù mad-dixxipli tiegħu: wara li dawn marru fl-irħula biex iwasslu l-bxara tal-Vanġelu, reġgħu lura kuntenti bis-suċċessi tagħhom; imma Ġesù sejħilhom għalihom waħidhom, f’post maqtugħ min-nies biex joqgħod ftit waħdu magħhom (ara Mk 6:31).  Pastorali mingħajr talb u kontemplazzjoni qatt ma tista’ tilħaq il-qalb tal-persuni.  Tieqaf mal-qoxra mingħajr ma tħalli ż-żerriegħa tal-Kelma ta’ Alla tagħmel l-għeruq, tnibbet, tikber u tagħti l-frott (ara Mt 13:1-23).

Jien naf li lkoll kemm intom taħdmu ħafna, u għalhekk nixtieq inħallilkom l-aħħar kelma importanti:  sabar.  Sabar u perseveranza.  Il-Verb ta’ Alla daħal fis-“sabar” fil-mument ta’ l-Inkarnazzjoni, u hekk baqa’, sal-mewt fuq is-Salib.  Sabar u perseveranza.  M’għandniex il-“bakketta maġika” għal kollox, imma għandna l-fiduċja fil-Mulej li sseħibna u ma titlaqna qatt waħidna.  Fid-diffikultajiet kif ukoll fil-qtigħ il-qalb li huma preżenti mhux ftit fil-ħidma pastorali tagħna, għandna bżonn li qatt ma tonqosna l-fiduċja fil-Mulej u fit-talb li jweżinha.” (Papa Franġisku: Awla Pawlu VI. Il-Ġimgħa 19 ta’ Settembru 2014)

Nuru l-imħabba tagħna lejn Ġesu billi nħobbu u nservu lil ta’ madwarna.

F’din il-laqgħa Prayer Cafè ġie diskuss il-vanġelu ta’ Kristu Re; L-34 Ħadd ta’ Sena A. F’dan il-vanġelu nsibu l-istorja tan-nagħaġ u l-mogħoż. Naraw kif ragħaj jirritorna bħala mħallef biex jifred il-merħla tiegħu f’żewġ gruppi – nagħaġ fuq naħa u mogħoż fuq in-naħa l-oħra. Grupp minnhom jiġu premjati filwaqt li l-ieħor hu mehud l-bogħod mir-ragħaj biex jiġi kkastigat.

Interessanti ninotaw kemm huma differenti il-mogħoż minn nagħaġ. Għalkemm simili fl apparenza u l-ħoss li jagħmlu, l-imġiba tagħhom hi differenti ħafna. Il-mogħoż huma bhejjem indipendenti, kapaċi jgħixu weħidhom għax jieklu kulma jiġi taħt ħalqhom. Saħansitra anke lit-tfal tagħhom jieklu jekk ikunu bil-ġuħ! U waqt l-ikel jimbuttaw iż-żgħar tagħhom bil-munqar biex jieklu huma l-ewwel. Minn naħa l-oħra n-nagħaġ huma dipendenti ħafna fuq ir-ragħaj tagħhom. Kontu tafu li jekk nagħġa taqa’ fuq dahra ma tqumx lura fuq saqajha weħidha? Jekk merħla nagħaġ tibża minn xi ħaġa jagħmlu sagħtejn iduru f’ċirku – jaħbtu ma ħitan jew ċnut iżda mbagħad jekk jgħajtilhom ir-ragħaj tagħhom jikkalmaw u jimxu warajh kull fejn jeħodhom. Jafdawh b’għajnejhom magħluqa. Aħna wkoll mqabblin ma nagħaġ f’diversi partijiet tal-Bibbja .

Hawnhekk nqara il-Vanġelu: Vanġelu ta` San Mattew Kapitlu25: Versi 31-46.

Il vanġelu tal llum huwa l-konklużjoni ta’ diskors twil li nsibuh f’Mattew Kapitlu 24 sa kapitlu 25, diskors li Ġesù għamel lid-dixxipli tiegħu weħidhom fuq l-għolja taż-Żebbuġ (Mt 24,3).Fih  Ġesù jibda billi jħabbar żewġ ġrajjiet kbar: il-qerda ta’ Ġerusalemm (li seħħet fis-sena 70 WK) u t-tmiem tad-dinja (Mt 24,30-31). – Imbagħad Ġesù jitkellem fuq il-bżonn li wieħed jishar (ma jorqodx, ma jitgħażżinx), biex din il-miġja ta’ Bin il-bniedem ma ssibux għal għarrieda (Mt 24,44). Bħala eżempju jsemmi żewġ fatti mill-ħajja ta’ kuljum: Is-Siġra tat-Tin (Mt 24,32-35) u l-Qaddej Fidil u Għaqli (Mt 24,45-51); u wkoll żewġ parabboli: tal-Għaxar Xebbiet (Mt 25,1-13) u tat-Talenti (Mt 25,14-30).Mbagħad nsibu l-vanġelu tal-llum fejn Ġesu jitkellem dwar tmiem id-dinja bil-miġja ta’ Bin il-bniedem akkompanjat mill-anġli u mill-ġudizzju finali tat-tajbin u l-ħżiena.

L-evanġelju tal-lum għandu “l-imħabba tal-aħwa” bħala l-qalba tat-tagħlima li jrid iwasslilna Ġesù. It-test nistgħu niġbruh fi tliet punti:

1. Hawn naraw li Ġesù, Bin il-bniedem, hu s-Sultan, ir-Ragħaj u l-Imħallef (v. 31-33).Niftakru li fl-antik, is-sultan kien dejjem meqjus bħala l-aqwa mħallef.

Meta jiġi Bin il-bniedem fil-glorja tiegħu u bl-anġli kollha miegħu, mbagħad joqgħod fuq it-tron glorjuż tiegħu.  U quddiemu jinġabru l-ġnus kollha, u hu jifridhom minn xulxin, bħalma r-ragħaj jifred in-nagħaġ mill-mogħoż: in-nagħaġ iqegħedhom fuq il-lemin tiegħu u l-mogħoż fuq ix-xellug

2. Naraw ukoll l-identifikazzjoni ta’ Ġesù ma’ ħutu, mad-dixxipli tiegħu: dak li jagħmlu lilhom, jagħmluh lilu, u l-kuntlarju (v. 35-40, 42-45).

Għax jien kont bil-ġuħ u tmajtuni, kont bil-għatx u sqejtuni, kont barrani u lqajtuni, kont għeri u libbistuni, kont marid u ġejtu tarawni, kont fil-ħabs u ġejtu żżuruni.’ Mbagħad iweġbuh il-ġusti, ‘Mulej’, jgħidulu, ‘meta rajnik bil-ġuħ u tmajnik, jew bil-għatx u sqejnik ? Meta rajnik barrani u lqajniek, jew għeri u libbisniek? Meta rajnik marid jew fil-ħabs u ġejna nżuruk?’ U s-Sultan iweġibhom u jgħid, ‘Tassew, ngħidilkom, kull ma għamiltu ma’ wieħed mill-iżgħar fost dawn ħuti, għamiltuh miegħi.’ Għax jien kont bil-ġuħ u ma tmajtunix, kont bil-għatx u ma sqejtunix, kont barrani u ma lqajtunix, kont għeri u ma libbistunix, kont marid u fil-ħabs u ma ġejtux iżżuruni! Mbagħad huma wkoll iweġbuh, ‘Mulej,’ jgħidulu, ‘meta rajniek bil-ġuħ, jew bil-għatx, jew barrani, jew għeri, jew marid, jew fil-ħabs, u aħna ma waqafniex miegħek?’ Iweġibhom imbagħad u jgħidilhom, ‘Tassew, ngħidilkom, dak li ma għamiltux ma’ wieħed minn dawk iż-żgħar, anqas miegħi ma għamiltuh.’

3. Is-saltna li jirtu l-ġusti mhix f’din l-art iżda fil-glorja tal-Missier. Hemm ħajja oħra wara din tal-art li fiha t-tajbin jieħdu l-premju u l-ħżiena l-kastiġ (v. 34.46).

Mbagħad is-Sultan jgħid lil dawk ta’ fuq il-lemin tiegħu, ‘Ejjew, mberkin minn Missieri, ħudu b’wirt tagħkom is-Saltna li tħejjiet għalikom sa  mill-ħolqien tad-dinja. U dawn imorru fit-tbatija ta’ dejjem u l-ġusti fil-ħajja ta’ dejjem.

Il-ġudizzju finali ta’ Ġesù se jkun skond kif aħna nimxu mal-proxxmu tagħna:

– Jekk inħobbu u ngħinu lill ta’ madwarna, Ġesù se jgħidilna: “Ejjew, imberkin minn Missieri, ħudu b’wirt tagħkom is-Saltna li tħejjiet għalikom sa mill-ħolqien tad-dinja.”

Hawnhekk intwera dan il-video:

Fuq xhiex se jkun il-ġudizzju finali? Kollha kemm aħna se niġu ġġudikati fuq l-imħabba / il-ħniena li nuru lejn dawk li niltaqgħu magħhom. L-opri tal-ħniena li Ġesù jsemmi f’dan id-diskors huma prinċipalment erba’:

1. titma’ lil min hu bil-ġuħ u bil-għatx
2. tilqa’ lil min hu barrani
3. tlibbes lil min hu għeri
4. iżżur lil min hu marid u fil-ħabs

U rridu nwettquhom f’kull ħin f’ħajjitna fil- familja, x- xogħol, fl- edukazzjoni, fl-sport, eċċ.

Hawnhekk infetħet id-diskussjoni. Dawn huma xi punti li ħarġu minnha:

• Dan il-Vanġelu iffakkarna fil-vanġelu tal-Ħadd li għada (Il-parabola tat-talenti) għax it-talent irridu nużawhom biex ngħinu lill-Ħaddieħor (min hu bil-ġuħ, bil-għatx u l-bqija).
• Tlibbes tfisser tagħti d-dinjita’
• Kull ma nagħmlu nagħmluh ghandna nagħmluh b’ imħabba.
• Kapaċi nilmaħ il-wiċċ ta’ Kristu f’dawk il-persuni li jagħmluli d-deni; f’dawk il-persuni li lejhom inħoss ċerta antipatija? Kapaċi ngħin persuna li għamlitli d-deni?
  • Bit talb nistgħu naslu nagħmlu dan.
• Ngħinu lill-proxxmu mhux biss għax jinsab fil-bżonn imma għax naraw lill-Ġesu fih.
• Kultant għandna bżonn naħsbu fit-tajjeb li ma għamlniex mhux fit-tajjeb li għamilna.

 

Ġurnata flimkien ma’ Ġesu

Nhar il-Ħadd 30 ta’Novembru huwa l-EWWEL ĦADD TAL-AVVENT. Il-Moviment Kerŷgma qed joffri l-possibilità li nkomplu nikbru flimkien permezz ta’ ġurnata ta’ spiritwalità. L-attivitajiet matul il-ġurnata jinkludu mumenti ta’ talb, esperjenza, workshops, videos, kif ukoll Quddiesa. Se jkun hemm attivitajiet differenti għall-adulti, adolexxenti u tfal.

Dawk li se jattendu huma mitluba jimlew il-formola u jħalluha fis-segreterija tal-Moviment Kerŷgma. Il-prezz hu ta’ €10 għall-adulti u €5 għat-tfal bejn il-5 u s-16-il sena. Il-prezz jinkludi coffee break u one course meal, deżerta u tazza softdrink. Id-data tal-għeluq hi t-Tlieta 25 ta’ Novembru 2014.

Għal-aktar informazzjoni agħfas hawn!

Biex tniżżel il-formola agħfas hawn!

Il-laqgħa tal-Prayer Café bdiet bit-talba tal-Moviment.  Ġie mbagħad spjegat kif din il-parabbola (storja mhux veru, imma b’tagħlima warajha li Ġesù jinqeda biha biex iwassal il-messaġġ tiegħu) hija faċli biex tiftiehem, imma fiha ħafna ħsieb meta wieħed jsaqsi lilu nnifsu: ‘x’nagħmlu aħna bit-talenti tagħna?’

Wara li nqara l-Vanġelu, wieħed seta’ jaqra dik il-biċċa li l-aktar laqtitu biex b’hekk għaddejna għall-ewwel ħsieb u komplejna nitgħallmu minn xulxin.

Il-kelma Talent, fil-kuntest tal-vanġelu tfisser somma ta’ flus.  Jingħad li din setgħat kienet ammont sostanzjali ta’ deheb jew il-paga li r-Rumani kienu jagħtu f’sena u talent wieħed kien jfisser paga ta’ għoxrin sena.  Maż-żmien din il-kelma inbiddlet f’talent li tfisser li kapaċita’ tal-bniedem kif nagħfuha llum.

Waqt il-laqgħa kienu ħafna li ddiskutew diversi mistoqsijiet relatati mal-Vanġelu bħal:

• Konxju li Alla qasam il-ġid tiegħu magħna? X’jista’ jkun dan il-ġid li Alla tana?
  • Il-fidi hija dik ir-rigal li Alla tagħna flimkien mad-doni.
  • Don li tagħraf tħobb… tħobb lill dawk tal-familja, kollegi… Imħabba li tagħraf tagħti ftit ħin biex tisma’ lil ħaddieħor li jkun jixtieq jiftah qalbu miegħek.. Alla tana ġid li nħobbu lil ħaddiehor u dan kif rajna nistgħu nuzawh tajjeb.

• Iżda kif nisgħu nuzaw dawn it-talenti ma’ nies li m’għandniex grazzja magħhom?
  • Issemmiet il-paċenzja; li tkun kapaċi jżomm lura milli tgħid kelma li tista’ tweġġa’. Dan huwa talent kbir li huwa skars.
  • Li ma tpattix lura. Wieħed jagħmel il-parti tiegħu li jagħmel dak il-pass biex jersaq hu/hi lejn il-persuna.  Minkejja li dik il-persuna ma tagħmilx l-istess.

Riflessjonijiet:

• Inti kapaċi tkabbar it-talent tal-imħabba tiegħek lejn il-proxxmu?
• Id-doni/rigali li Alla tana huma t-talenti li wieħed irid iħaddem? X’jiġri jekk inti ma tħaddimx dawn it-talenti? Min ibati: aħna jew dawk ta’ madwarna?
• Dawn it-talenti/doni Alla tahomna b’xejn, imħabba… smigħ… tpinġi… tkanta eċċ. Iżda taħsbu li Alla jagħtina skont kemm nifilħu?

Nitolbu lil Alla biex il-missjoni – il-vokazzjoni – it-talenti – id-doni li Alla tana nwettquhom kif Alla jrid.  M’għandix naqtgħu qalbna.  M’għandix inħallu f’idejn ħaddieħor.  Kulħadd għandu l-kapaċitajiet tiegħu.  Ħadd m’għandu jgħid li ma hu kapaċi għal xejn għax inkunu qed inħallu l-biża t’Alla taħkimna u faċilment mbagħad jiġrilna bħal dak li ħeba l-talenti tiegħu għax beża’ minn sidu.  Imma għandna nibnu l-kuraġġ u l-fidi bit-talb biex it-talenti li Alla għażel għalina u tahomna b’xejn, nużawhom.  Aktar ma nużawhom aktar inkabbruhom.  Mhux kulħadd ikollu l-istess talenti u mhux kulħadd ikollu l-istess ammont ta’ talenti.  Min tah ħamsa, min tah tnejn u min tah wieħed.  Aħna llkoll għandna missjoni li nimxu skont it-talenti tagħna biex meta niġu quddiem Alla, nuru li aħna kbirna fit-talenti tagħna.

Fl-aħħar intwera vidjow qasir iżda b’messaġġ kbir fuq it-tema tal-Vanġelu:

Talents from Munn Brothers on Vimeo.

L-aħħar preparamenti għall-wirja  “Il-Presepju fil-Kunvent” għaddejin ġmielhom. “Il-Presepju fil-Kunvent” hija wirja ta’ presepji li ġew mibnija waqt il-korsijiet ta’ bini tal-presepji li ġew organizzati mill-Moviment Kerŷgma fix-xhur tas-sajf. Bħalissa qed issiru l-aħħar irtokki fuq dawn il-presepji (ara ir-ritratti hawn taħt) u dan ix-xogħol ser jilħaq il-qofol tiegħu waqt din il-wirja li ser issir bejn is-6 u l-14 ta’ Diċembru, fiċ-Ċentru Kulturali Kerŷgma. Waqt din il-wirja ser ikun hemm kafeterija fejn minbarra li jieħu kafe, wieħed jista jixtri u jduq ikel tradizzjonali tal-Milied. Barra min hekk ser wieħed ser ikun jista jixtri ponsjetti u kotba. Dan kollu żgur li se jgħin lill-dawk li jattendu biex iħossu l-ispirtu tal-Milied.

 Il-Presepju fil-Kunvent

Mis-Sibt 6, sal-Ħadd 14 ta’ Diċembru

Fiċ-Ċentru Kulturali Kerŷgma, Kunvent San Duminku, ir-Rabat

6 – 8, 13 – 14 December: mit-08:00 sat- 20:00

9 -12 December: mid-09:00 sal-12:00, mill-17:00 sat-20:00

 

Il-laqgħa Prayer Cafè tal-lum, il-Ġimgħa, 7 ta’ Novembru 2014 bdiet b’talba. Imbagħad saru xi ħsibijiet:

Il-Konsagrazzjoni tal-Bażilika tal-Lateran:

• Illum il-Qari jieħu post il-Qari tat-32 Ħadd matul is-Sena u huwa ddedikat għat-tifkira tal-Konsagrazzjoni tal-Bażilika tal-Lateran li tinsab Ruma. F’din il-knisja il-Papa għandu l-katedra tiegħu bħala Isqof ta’ Ruma u ragħaj tal-Knisja kollha.

Id-Dmir u l-attitudni tagħna lejn il-Papa u l-awtoritá tal-Knisja:

• Bħala membri tal-Knisja, id-dmir tagħna huwa li nuru fedeltá sħiħa għat-tagħlim li l-Papa jxandrilna biex iwettaqna fil-fidi ta’ Kristu. Mhux il-mument biss li nħarsu lejh bħala mexxej iżda wkolla bħala gwida spiritwali.

• Kemm-il darba nisimgħu min jikkritika u juri ċertu dissens fil-Knisja. Dan ħafna drabi ma jkunx ġej minn diskussjoni għaqlija (bħal filkaż ta’ kummissjonijiet pastorali, sinodi, laqgħat ta’ evalwazzjoni eċċ.) imma jkun ġej minn sens ta’ suppervja għaliex l-iskop huwa ta’ ħsara.

• Illum għalhekk huwa l-mument fejn aħna niddikjaraw l-għaqda tagħna mal-Papa u nkunu qalb waħda miegħu u Ġebel Ħaj tal-Knisja fis-soċjetá tagħna.

 

Hawnekk nqara l-Evanġelju tal-Ħadd li ġej id-9 ta’ Novembru: San Ġwann Kapitlu 2, Versi 13-23.

Wara l-qari tal-Evanġelju saru xi ħsibijiet dwar din is-silta:

X’risposta jkollu kieku wieħed jistaqsi għaliex inbniet xi knisja partikulari?

• Ċertament li r-risposta trid tkun li din ġiet mibnija biex tkun id-Dar ta’ Alla. Mhix sempliċiment post ta’ laqgħat jew auditorium jew xi post fejn isiru l-kunċerti u d-drama.

• Din id-Dar għandha skop wieħed: Biex issaħħaħ ir-relazzjoni TAGĦNA ma’ Alla. Il-knisja hija post tal-komunitá ta’ Alla. Hemm niltaqgħu bħala grupp f’post qaddis li fih inkunu fil-preżenza speċjali ta’ Alla.

• Dik il-fjamma żgħira tixgħel quddiem it-tabernaklu hija sinjal li Alla qiegħed jgħix verament hemmhekk. Dan mhux sinjal imma preżenza reali ta’ Ġesú fostna. Per Eżempju: F’ċertu knejjes ortodossi, bħala sinjal ta’ rispett joħorġu mil-knisja mexjin b’lura biex ma jagħtux darhom lejn dak li hu mportanti għalihom. Aħna kultant ma nurux dan it-tip ta’ rispett lejn id-dar ta’ Alla u Alla nnifsu li sippost nemmnu li jinsab fiha.

• F’dan l-Evanġelju li smajna, Ġesú jimtela’ b’rabja qaddisa meta daħal fit-Tempju ta’ Ġerusalemm u sab li aktar kien jixraq li dan il-lok ikun imsejjaħ suq milli tempju ta’ Alla.

• X’jistgħu ikunu dawn l-affarijiet li kieku Ġesú jiġi f’xi knisja illum ma jkunx jixtieq li jara?

 

Papa Franġisku fit-22 ta’ Novembru 2013 fil-kappella ta’ Santa Marta qal li: “It-tempju jeżisti biex tadura lil Alla. U proprju għalhekk huwa punt ta’ riferiment tal-komunitá, magħmula minn persuni li huma huma stess tempju spiritwali fejn jgħammar l-Ispirtu s-Santu.”

Il-Papa spjega kif skont l-istorja tat-Tempju t’Alla:

1. Tibda bl-Arka tal-Patt li l-poplu Lhudi kien iġorr miegħu. Din tissemma’ fil-Ktieb tal-Eżodu u kien fiha t-twavel tal-liġi, il-bastun ta’ Aron, kontenitur bil-manna kif ukoll it-Torah, il-liġi ta’ Alla. (Ara Eżodu 37) Din kienet il-preżenza ta’ Alla fost il-poplu magħżul tiegħu.
2. Salamun iddeċieda li jibni Tempju, bini ddedikat lil Alla li ridt tmur hemmhekk biex inti tqim lil Alla.
3. Dan sar tempju ħaj: Ġesú Kristu; li permezz tiegħu aħna ningħaqdu kompletament ma’ Alla bħala ġebel ħaj ta’ dan it-tempju li huwa l-Knisja.
4. Kollox ikompli anke wara l-mewt f’Ġerusalemm tas-sema fil-glorja ta’ Alla.

F’dan id-diskors il-Papa qal ukoll li fit-tempju ta’ Alla tmur biex:

1. Titlob 
2. Tfaħħar lil Alla
3. Tiżżi ħajr
4. Tadura (fuq kollox biex tadura: il-Papa jinsisti li l-adorazzjoni hija mportanti aktar minn kull innu liturġiku) It-tempju jżid il-Papa għandu jkun post ta’ talb, u mhux ta’ xi ħaġa oħra.

 

It-Tieni Qari: Aħna wkoll it-Tempju ta’ Alla – fina jgħammar l-Ispirtu s-Santu

Wara din id-diskussjoni dwar l-evanġelju nqara it-tieni qari ta’ nhar il-Ħadd li ġej (1Kor 3, 9-11.16-17) u tkellimna dwaru.

• Kull wieħed/waħda minna huwa t-tempju ta’ l-Ispirtu Qaddis t’Alla. Fina tgħammar it-Trinitá bil-grazzja tagħha. Kull wieħed/waħda minna huwa tempju ħaj fejn jgħix Alla. Fil-fatt jekk jinqered il-bini tat-tempju (il-knisja tal-ġebel) l-iktar ħaġa mportanti tibqa ħajja; Aħna: il-Knisja t’Alla tibqa soda.

• Kemm dawk li jħarsu lejna, jew jisimgħuna jitkellmu huma konxji li għandhom quddiemhom tempju ħaj fejn jgħammar Alla ġewwa fih? Kemm qegħdin jaraw ħwejjeġ qaddisa mwettqa minna jew kemm qegħdin jisimgħu ħwejjeġ qaddisa mingħandna?

• Ta’ min jara x’inhu jseħħ fit-tempju tagħna; jekk dak li nagħmlu jaqbilx ma’ dak li nemmnu u nistqarru. Għandna nieqfu u neżaminaw lilna nfusna biex naraw jekk aħniex verament it-Tempju ta’ Alla.

• “Jekk xi ħadd iħobbni jżomm kelmti, u Missieri u jiena niġu ngħammru għandu.”(Ġw 14,23)

• Il-Papa Franġisku saħaq li għandna nippurifikaw ruħna permezz:
  1. Tat-talb
  2. Tas-sagrament tar-Rikonċiljazzjoni
  3. Bl-Ewkaristija

• Wieħed mill-modi ta’ kif nistgħu nagħmlu eżami tal-kuxjenza huwa billi naraw kemm qegħdin nimxu mal-Beatitudnijiet. (Lq 6, 20-26)

 

Il-laqgħa spiċċat bit-talb fejn nqara is-Salm responsorjali ta’ nhar il-Ħadd li ġej:

Salm 45

Rit: Tifraħ il-belt ta’ Alla!

Kenn u qawwa hu Alla għalina;

għajnuna kbira sibnieh fid-dwejjaq.

Għalhekk ma nibżgħux jekk l-art titriegħed,

jew jiġġarrfu l-muntanji f ’nofs il-baħar.

Hemm xmara li s-swieqi tagħha

jferrħu l-belt ta’ Alla,

il-għamara qaddisa tal-Għoli.

F’nofsha hemm Alla, ma titħarrikx,

jgħinha Alla mat-tbexbix tal-għodwa.

Il-Mulej tal-eżerċti magħna

fortizza għalina Alla ta’ Ġakobb.

Ejjew, araw x’għamel Alla,

il-għaġeb li għamel fuq l-art.

 

Talba ta’ l-Għeluq: 

O Missier, inti tajtna lil Ibnek Ġesú bhala t-tempju l-ġdid ta’ dan il-patt il-ġdid bejnietna. Dan it-tempju mhux mibni b’idejn umani imma mill-Ispirtu s-Santu. Filwaqt li nilqgħu bil-fidi l-Kelma tiegħu, agħmel li aħna nistgħu ngħixu f’dan it-tempju permezz ta’ Ġesú Kristu u b’hekk inkunu nistgħu nagħtuk qima fl-Ispirtu u l-veritá. Iftaħ għajnejna ghall-bżonnijiet ta’ ħutna li huma wkoll membri ta’ dan il-Ġisem ta’ Kristu sabiex filwaqt li nservuhom inkunu qegħdin nagħtu qima lilek. Nitolbuk dan permezz ta’ Kristu Ġesú sidna. Ammen.

“Din hi tabilħaqq ir-rieda ta’ Missieri: li kull min jara lill-Iben u jemmen fih, ikollu l-ħajja ta’ dejjem.”(Ġw 6, 40)

 

L-evanġelju li tlabna permezz tiegħu waqt il-laqgħa bi preparazzjoni għall-Jum tal-Għid tal-Imwiet kien meħud mill-Evanġelju ta’ San Ġwann Kapitlu 6, Vrus minn 37 sa 40.

Li nara lill-Iben ifisser li nkun iltqajt mal-persuna ta’ Ġesú, tgħallimt fuqu, min kien, x’kien jagħmel u x’kien it-tagħlim tiegħu. Peró dan mhux biżżejjed għaliex hemm bżonn il-fidi.

Li nemmen ifisser li jkolli fiduċja f’dan Ġesú li miegħu inkun iltqajt. Fiduċja tfisser li temmen, tagħmel u tħossok parti minn dak kollu li l-Mulej Ġesú jgħallimna jew jitlob minna. Meta inti temmen tkun għalhekk qiegħed tirċievi mingħand Ġesú il-ħajja ta’ dejjem. Il-Ħajja ta’ dejjem diġá bdiet minn din id-dinja.

 

X’inhi l-mewt?

Nafu li l-mewt iġġiegħel lin-nies isofru, jibku u jaqtgħu qalbhom fost diversi emozzjonijiet oħra. Imma hija hekk biss?

Il-mewt hija passaġġ mill-ħajja eterna li diġá bdiet; għall-kumplament tal-ħajja tagħna magħqudin ma’ Alla. L-ewwel pellegrinaġġ ta’ ħajjitna aħna nagħmluh hawnhekk fuq din l-art. Il-mewt hija għalhekk il-kontinwazzjoni ta’ dan il-pellegrinaġġ li jwassalna biex ningħaqdu mal-Mulej Ġesú fil-ġenna fejn kif qalilna San Pawl hemm jistenniena: “dak li għajn qatt ma rat u widna qatt ma semgħet, u dak li qatt ma tnissel f’qalb il-bniedem, dak li Alla lesta għal dawk li jħobbuh.”(1Kor 2, 9)

Il-Knisja tistedinna biex darba f’sena niftakru f’dawk li diġá għaddej minn dan il-passaġġ. Hemm rabta Spiritwali kbira bejn il-membri tal-Knisja fuq din l-art u dawk fis-sema. Aħna lkoll obbligati li bħalma ngħinu lill-proxxmu tagħna li jinsab madwarna fiżikament, hekk ukoll ngħinu bit-talb lil dawk li qegħdin diġá fil-ħajja l-oħra. B’hekk il-mewt issir rebħa u bidla  li rebaħ Kristu permezz tal-mewt u l-qawmien tiegħu.

Fil-mewt aħna l-bnedmin insibu s-sliem etern għaliex ningħaqdu għal dejjem ma’ dan Alla li ħalaqna. Il-Mulej mhux ser jitlaq lil dawk li fil-ħajja tagħhom għamlu l-għażla tiegħu.

“Mhux biex nagħmel ir-rieda tiegħi imma r-rieda ta’ min bagħatni.”(Ġw 6, 38)

Aħna r-rieda ta’ min qegħdin nagħmlu? Tagħna, ta’ min jinfluwenzana, tas-suq kummerċjali/reklami, xi grupp li nappartjeni għalih jew forsi ta’ min għandu prinċipji u valuri differenti minn dawk Kattoliċi? Tajjeb li nirriflettu għaliex ngħidu ċertu affarijiet jew kif inġibu ruħna quddiem ċerti valuri jew sitwazzjonijiet.

 

“Ir-rieda ta’ min bagħatni hija din: li jiena ma nitlef xejn minn dak kollu li tani.” (Ġw 6, 39)

Hawnhekk Ġesú qed jurina kemm aħna mportanti għalih bħala bnedmin li aħna xbiha ta’ Alla. Issemmew waqt il-laqgħa parabboli bħal tan-nagħga l-mitlufa u tal-Iben il-Ħali fejn naraw kemm huma mportanti l-persuni għal Ġesú. Il-persuni li għal Ġesú huma mportanti mhumiex biss il-ġusti u dawk ta’ subgħajhom dritt imma wkoll il-midimba.

Ġie moqri wkoll l-ewwel Qari fejn insibu l-faraġ fil-Mulej li huwa d-Difensur tagħna: “Jien naf li d-difensur tiegħi ħaj, u fl-aħħar fuq it-trab iqum. U wara li jintemm ġildi, mingħajr laħmi nara ‘l Alla. Lilu narah b’ħabib tiegħi.”(Ġob 19, 25-26)

Il-laqgħa intemmet bil-Qari ta’ Salm 22 fejn insibu l-istqarrija li “l-Mulej huwa r-Ragħaj u s-Salvazzjoni tiegħi; minn min għandi nibża’? Il-Mulej hu l-kenn tiegħi, quddiem min għandi nitwerwer?”(Salm 26, 1)