Il-laqgħa Prayer Cafe tal-21 t’Ottubru bdiet bit-Talba tal-Moviment u ndaqqet kanzunetta dwar l-umilta:

Wara nqraw l-Ewwel qari tal-Ħadd li jmiss mill-Ktieb ta’ Bin Sirak 35:12-14 u l-Evanġelju mehud minn San Luqa 18:9-14.

Din il-parabola qalilna s-sur Joe Scerri xbajna nisimgħuha u tidhra pero meta tapprafondixxi fuqha tinduna kemm hi parabola profonda. Hi tirrigwarda żewġ personaġġi – il-Farizew u l-Pubblikan. Importanti li nindunaw lil min kien qiegħed jindirizza Ġesu hu u jirrakonta din il-parabola. Kieku kien fiż-żmien ta’ llum il-Fariżew jirraprezenta lill-Patri, lis-Soru, lill-Katekist, lilek li int membru f’xi għaqda reliġjuza bħal Kerŷgma, inti li qiegħed tmexxi l-laqgħat, inti li qiegħed fil-mixja Katekumenali, inti li int Karizmatiku, inti li tgħin fil-paroċċa, inti li tanima fil-quddies, inti li ma tinqalax minn mar-Radju żżebbeġ ir-rużarju, inti li ma tfallix quddiesa waħda l-Ħadd, inti li tara li ma tiksirx l-ebda regola u li tobdi l-preċetti kollha tal-Knisja, inti li ssum meta hemm l-obbligu tas-sawm u tħares kollox kif suppost. Dak kien il-Farizew ta’ żmien Ġesu.

Il-Pubblikan mbagħad mingħajr ma niġġudikaw, fi żmienna jirraprezenta nies kriminali, nies li ma jimpurtahom minn xejn, nies li għalkemm mhumiex ħżiena imma berdin… u hekk jibdew ħerġin l-aġġettivi li aħna nużaw biex niddistingwu t-tajbin mill-ħżiena.

Infatti l-Evanġelju jibda “ F’dak iż-żmien: Kien hemm xi wħud li waħħlu f’rashom li huma nies ġusti, u kienu jmaqdru lill-oħrajn.” Mela Ġesu hawn qiegħed jattakka lill-Fariżew u anke lil dawk li jippretendu li huma nies tajba llum. U jkollna nammettu li fina lkoll hemm xi naqra Fariżew u xi naqra mill-karateristiċi tal-Pubblikan.

“Żewġt irġiel, wieħed Fariżew u l-ieħor publikan, telgħu fit-Tempju biex jitolbu.” tgħidilna l-parabola; mela dawn it-tnejn kellhom ċerta intimita u rispett lejn Alla. San Luqa kien evanġelist brillanti kif ‘ ipinġi’ d-deskrizzjoni.  Filwaqt li nsibu li l-Fariżew mar bil-wieqfa qrib l-artal… il-Publikan qagħad il-bogħod mill-artal… It-talb tagħhom ukoll kien differenti; il-Fariżew hu u jitlob beda juri li hu kien iħares il-preċetti kollha imma għaxxaqa għax hemm quddiem l-artal jikkritika lill-Publikan li bħalu kien ġie jitlob! Fil-preġudizzju tiegħu lanqas biss jagħti kas is-sbuħija tat-Talba tal- Publikan. Talba li għalkemm qasir fejn tal-Fariżew imma kienet talba ħierġa mill-qalb niedma.. il-Publikan nsibu fl-Evanġelju “ lanqas biss ried jerfa’ għajnejh lejn is-sema imma beda jħabbat fuq sidru u jgħid: ‘ O Alla, ħenn għalija l-midneb.’ ’’

X’inhi l-UMILTA? Fid-diska li għamilna fil-bidu tal-laqgħa kantaw “more about you, less about me”; mela tkun umli meta tpoġġi l-bżonnijiet ta’ l-oħrajn qabel tiegħek, meta ma tkunx kburi bik nnifsek; hi virtu, fiha saħħa spiritwali, b’umilta tkun lest li taħfer lil min għamillek id-deni. Is-sur Joe Scerri tenna li lilu l-iktar risposta li ogħġbitu għal din il-mistoqsija kienet minn tfajjel ta’ tnax-il-sena li rrisponda…  “ L-umilta hi li jiena naċċetta r-rieda t’Alla.”  Anke fit-talba tal-Missierna nistqarru “Ikun dak li trid Inti” Mhix ħaġa faċli fil-ħajja ta’ kuljum… ma nies qribek li jagħmlulek ħajtek diffiċli kuljum, ma nies fuq ix-xogħol li jagħmlu minn kollox biex jagħmluk miserabli, imma jekk jiena norbot ir-rieda tiegħi ma dik t’Alla nerbaħ. Bis-suppervja u l-imrar l-qalb tingħalaq. San Ġorġ Preca kien jgħid: “ Il-Bene non fa chiasso; e il chiasso non fa bene.” – It-tajjeb ma jagħmilx storbju u l-istorbju ma jagħmilx ġid.

Xinhu l-Preġudizzju? Ġesu dejjem jisħaqq fuq dan il-punt. Il-Preġudizzju hu għamad. Meta ġabulu lil mara l-midimba (li kienu qabdu fil-fatt tal-adulterju) Ġesu lanqas uża kelma waħda, imma beda jħażżeż fl-art… hawn minn jgħid li kien kiteb id-dnubiet ta’ min kien ġie jakkużaha… xi ħaġa missitilhom qalbhom għax minn dik il-furja kollha telqu wieħed wieħed; ħadd ma baqa hemm. Fil-parabola ta’ llum infatti insibu li kien il-Publikan li mar lura d-dar iġġustifikat.

Xi tfisser li tkun iġġustifikat? Li tħossok iġġustifikat, bħal Publikan fl-istorja ta’ llum,  tfisser li tħossok mnaddaf, maħfur, tħossok fil-paċi. Il-ġustifikazzjoni mhix xi ħaġa li nakkwistaw b’idejna. Il-ġustifikazzjoni ġabilna Ġesu kif jinterpreta tajjeb San Pawl fit-tieni ittra lil Korintin: “Dak li ma kienx jaf x’inhu dnub, Alla għamlu dnub għalina sabiex aħna nsiru fih ġustizzja t’Alla.” (2 Kor 5:21) . Ix-xena fuq il-kalvarju ma kienitx xi waħda romantika kif kultant inpenġuha..ma kienitx xi ħaġa sabiħa… anzi Ġesu ġie mislub fuq salib bħala kriminal bejn żewġ ħallelin. Huwa ġie mislub mhux għax kien kriminal imma minnħabba t-twemmin tiegħu. San Pawl jgħidilna li s-salib hu skandlu għal Lhud u bluha għal pagani. ( L-istess kif aħna ngħidu ‘Imġienen’ għal fundamentalisti li jtajru ruħhom f’isem ir-reliġjon tagħhom!) Ġesu fuq is-salib kien mgħadud bħala kriminal – Alla nnifsu – Dak stess li pprevena li ommu tiċċappas bid-dnub – sar dnub għalina fuq is-salib. Jekk nieqfu nimmeditaw dan il-fatt l-umilta toħroġ weħidha.

Fl-ittra ta’ San Pawl lir-Rumani (San Pawl nnifsu kien Fariżew qabel) javżana li mhux il-liġi – ir-reliġjon ssalvana. Ir-Reliġjon għandha tkun għajnuna għal ħajjitna, imma fl-ewwel post għandu jiġi l-qadi; l-għixien tal-fidi. Fl-ewwel ittra lil Korintin nsibu “ Jekk jiena nxandar l-Evanġelju ma għandix biex niftaħar; jiena obbligat nagħmlu dan. Ħażin għalija jekk ma nxandarx l-Evanġelju” (1 Kor 9:16). Aħna b’egħmilna rridu nkunu d-dawl għal dawk ta’ madwarna.

Il-Konċilju Vatikan 2 kien Konċilju kbir u għadna qegħdin niżvolġuh. Qabel dan il-Konċilju konna nbeżżgħu ħafna b’Alla tal-Ħaqq – Alla tal-Kastig. Imma wara li ħareġ dan il-Konċilju bdejna aktar nippriedkaw fuq Alla tal-Imħabba. Hu veru li bil-mewta ta’ Ġesu fuq is-salib kull dnub ġie maħfur. Imma llum morna f’estrem li lil Alla ġibnieh ‘baħbuh’. Naħsbu li kollox se jgħaddi. Ma nistgħux nippretendu li għax mmorru l-quddies tal-Ħadd sirna mistiedna VIP fil-ġenna! L-Indiema mid-dnub trid tkun waħda sinċiera. Lil dik il-mara il-midimba li ġabu quddiem Ġesu biex jiġġustifika, Ġesu qalilha li għax nidmet, nħafrulha dnubietha. Din insibuha anke fil-parabola tal-lum. Tista’ tobdi l-preċetti kollha imma dawn mhux se jiġġustifikawk; jiġġustifikak Ġesu; aħna lkoll midimba u għalhekk m’għandniex dritt li niġġudikaw lil Ħadd.

Din il-parabola tal-lum u tal-ġimgħa l-oħra magħqudin flimkien għax it-tnejn huma fuq it-talb. Il-ġimgħa l-oħra tkellimna fuq il-PERSEVERANZA tat-talb u din il-ġimgħa qegħdin nitkellmu fuq id-DISPOŻŻIZZJONI tal-qalb tagħna aħna u nitolbu.

Jekk qalbi mimlija biha nnifsi, m’hemmx spazju għal grazzja t’Alla. Nista’ nkun l-ikbar ‘qaddis’ . Il-preċetti biss mhux se jwassluk għal qdusija – din tiġi bl-opri tajba. Billi tgħin lil min għandu bżonn.

Ktieb li rrakomanda s-sur Joe Scerri li naqrawh huwa “IL-Mixja tal-Pellegrin”. Fih niltaqgħu ma’ bniedem- ma pelegrin – li jivjaġġa jfittex it-talba perfetta. U din kienet tal-Publikan tal-istorja ta’ llum. ‘Mulej Ġesu jkollok ħniena minn għax jien midneb.’ Talba li meta tingħad b’sinċerita ġġiblek il-paċi, il-ġustifikazzjoni.

Il-laqgħa spiċċat bit-talba tal-Missierna u  bi kwotazzjoni dwar l-umilta ta’ Madre Teresa : “Jekk inti umli, xejn ma jibdlek..la foħrija ..lanqas ebda għajn, għaliex inti taf min inti”

Il-laqgħa bdiet bl-Ewwel Qari u l-Evanġelju tal-Ħadd, 16 t’Ottubru.

F’dan il-Vanġelu, joħorġu żewġ elementi: it-talb insistenti, u l-attenzjoni li bħala nsara nagħtu lil min hu dgħajjef.

“Urini l-għemil tiegħek biex nagħraf kemm hi sħiħa u b’saħħitha l-fidi tiegħek.”  Il-fidi mingħajr azzjoni hi fidi mejta; hi fidi tal-apparenza.

Il-Vanġelu tal-Ħadd li ġej jagħtina element li hu ħafna għal qalb San Luqa: il-talb. Din hi t-tieni okkażżjoni fejn Ġesu’ jgħallimna kif għandna nitolbu.  Din id-darba Luqa jżid l-element tal-insistenza.  Irridu nistennew lil Mulej jgħaraf Hu, mhux aħna, il-waqt li jtina dak li qegħdin nitolbu.

Ħafna drabi naħsbu fit-talb bħala krib – għandi bżonn xi ħaġa u nitlob għalija.  Pero’ hemm erba’ għamliet differenti ta’ talb: talb ta’ tifħir, talb ta’ ringrazzjament, talb ta’ petizzjoni u talb ta’ interċessjoni.  Ħafna drabi t-talb tagħna jkun ta’ tip wieħed: agħtini għax għandi bżonn.

It-talb ta’ tifħir donnu l-iktar li jfixkilna.  Ġesu’ kien jitlob permezz tas-salmi, li fihom ħafna tifħir, per eżemju, salmi 8, 65, 76, 100, 111, 150.  Il-Lhud kienu jużawhom spiss.  Bihom aħna nitgħallmu kif nagħmlu talb ta’ tifħir.

Il-Vanġelu tal-Ħadd jibda “F’dak iż-żmien, Ġesu’ qal parabbola lid-dixxipli Tiegħu biex jurihom li għandhom dejjem jitolbu bla ma jintelqu (b’insistenza).”  Din kienet karatteristika tal-insara tal-bidu.  Insibuha fl-ittri ta’ San Pawl.  F’din il-parabbola għandna żewġ persunaġġi: l-imħallef u l-armla.  F’din tal-aħħar jidħol il-kunċett tal-għajnuna lil min hu fil-bżonn.  L-armla tirrappreżenta lil min m’għandux leħen.  Fil-messaġġ għal Jum l-Emigranti, il-Papa saħaq fuq id-difiża tat-tfal, speċjalment dawk li jaħarbu minn pajjiżhom minħabba persekuzzjoni u gwerer.  Ħafna drabi dawn jiġu sfruttati b’diversi modi.

L-armla tissemma’ darbtejn oħra fil-Vanġelu: fil-qawmien tat-tifel tal-armla ta’ Najm, u l-offerta li tat l-armla fit-tempju.  Ir-romol u l-foqra huma l-iktar nies privileġġjati fil-Vanġelu.  Il-Papa jgħid li min m’għandux leħen għandu drittijiet daqsna, imma dawn qed jiġu injorati minħabba l-globalizzazjoni tal-indifferenza.  Jien qiegħed ngħix hekk?  Dak li nagħmlu biex inserrħu l-kuxjenza, minflok bil-vera mħabba? Il-fidi tagħna superfiċjali?

L-imħallef tal-parabbola kien korrott, u din il-korruzzjoni tant infirxet li saħansitra l-Ġnus Magħquda qed iħejju programm biex jiġġieldulha.  Dħalna f’mentalita’ fejn “grazzi” mhix biżżejjed – nistennew xi ħaġa oħra lura.  Aħseb u ara kemm se nsibuha diffiċli biex inpattu bit-tajjeb għal azzjoni ħażina kontrina!

In-nisrani jrid ikollu l-paċenzja li jistenna lil Alla jtih dak li qed jitlob fil-ħin li Alla jemmen li hu ta’ ġid għalih.  Irid ikollna l-fiduċja li nħallu f’idejH.  Irid ikollna għeruq sodi fit-tama.

Ħajjitna tista’ tkun talba?  Filgħodu noffri l-ġurnata kollha u kull azzjoni u deċiżżjoni noħodha fid-dawl ta’ Kristu.  U jekk niżbalja jkolli l-kuraġġ li nammetti.  Il-Vanġelu ta’ San Luqa hu l-Vanġelu tat-talb.  Kemm-il darba jsemmi lil Ġesu’ jitlob.  It-talb hu marbut intimament mal-ħajja.  Ġesu’ ried ikun fidil għal proġett li kellu l-Missier ghaliH.  Alla għandu proġett għalina wkoll.  It-talb jirrikjedi mumenti ta’ silenzju.  Jien nista’ nkun il-ħin kollu fil-”kamra ta’ ġewwa”?  Ħajti nista’ nagħmilha talba kontinwa billi nfittex li nagħmel ir-rieda tal-Missier.

Salm 121 hu salm ta’ radd il-ħajr u espressjoni ta’ fiduċja.  “Nerfa’ għajnejja lejn l-għoljiet mnejn se tiġini l-għajnuna.”  Alla qiegħed magħna l-ħin kollu.  Il-poplu Lhudi kien ikanta dan is-salm waqt li kien ikun tiela’ lejn it-tempju, biex jiffoka fuqu biss u mhux fuq it-tempji tal-allat foloz.  Aħna wkoll għandna dawn “it-tempji foloz”.  It-talb isaħħaħna biex ngħelbu dawn it-tentazzjonijiet.  Il-Mulej iħarisna u jindukralna ruħna.

Il-Vanġelu jispiċċa bil-kliem “Se nsib fidi meta’ nerġa niġi?”  It-talb itina enerġija spiritwali – iċ-ċertezza li aħna qegħdin hawn pellegrinaġġ.  Is-salvazzjoni tiġi permezz tal-fidi u din tidher mill-mod kif nitolbu.  Alla hu l-bidu ta’ kollox, allura rridu nduru lejH mingħajr kundizzjoni.  Alla jħobbna b’imħabba infinita.  Hu għandu l-għerf kollu.  Jaf x’neħtieġu qabel ma nitolbuH.  Hu jaf dak li għandna bżonn.  Irridu nintelqu għal kollox f’idejH u naċċettaw ir-rieda Tiegħu.

Il-laqgħa għalqet bil-kwotazzjoni “A river cuts through a rock not because of its power but its persistence.” – “Ix-xmara ma tqattax il-blat għax hi b’saħħitha imma għax hi perseveranti.”

 

Il-Moviment Kerygma jorganizza l-“Premju Żagħżugħ tas-Sena” bil-għan li joħroġ fil-beraħ l-impenn taż-żgħażagħ b’mod nisrani fis-soċjetà Maltija.

Il-Premju hu miftuħ għal dawk iż-żgħażagħ kollha li juru sens kbir ta’ impenn fil-ħajja nisranija tagħhom ta’ kuljum.

Tistgħu tinnomminaw xi żagħżugħ jew żagħżugħa li taħsbu li jikkwalifikaw u jimmerithom jkunu nnominati għal dan il-premju prestiġjuż.  Tistgħu tinnominaw aktar minn persuna waħda, billi tibgħatu applikazzjoni separata. Kopja tar-regolamenti u l-applikazzjoni tista tniżżilhom minn hawn:

Niżżel l-applikazzjoni.

Niżżel ir-regolamenti.

L-applikazzjonijiet  u d-dokumenti relattivi għall-Premju Żagħżugħ tas-Sena 2015 għandhom jaslu fl-uffiċċju tal-Moviment Kerygma sa mhux aktar tard mill-Ġimgħa 11 ta’ Novembru 2016 fl-12.00pm.

 

 

Il-Laqgħa Prayer Cafe, ta nhar il-Ġimgħa 7  t’Ottubru ġiet immexxija minn żewġ rapprezentanti mill-Agenzija Sedqa; Ms Glorianne Galea u Ms Stacey Grima.

Kienet laqgħa fejn tqajjmu l-mistoqsijiet bħal:

• Għalfejn wieħed jieħu jew jipprova d-drogi, anke meta jkun jaf bid-deni li din se tikkaġunalu?
• X’tipi ta’ Droga qegħdin niltaqgħu magħhom?
• X’karatteristiċi nistgħu naraw f’persuna biex nindunaw li din qegħda tieħu d-droga?

Minn video b’nies jagħtu xhieda ta’ kif / għaliex waqgħu fil-vizzju tad-drogi, ħareġ li dan jagħmluh:

• Biex isiru parti minn grupp.
• Għal gost u biex jirrilassaw.
• Biex jaħarbu mir-realta li jkunu fiha.
• Biex jesperimentaw xi ħaġa ġdida.
• Biex iħossuhom adulti.
• Issib min jeħodha biex jirribella.

Ssib min jieħu d-droga minn darba sa darbtejn biex jipprovha u jieqaf jeħodha. Imbagħad issib min jibda jeħodha aktar frekwenti biex tgħinu jibdel il-burdata. U hawn se jibda l-inkwiet għax qegħed issir dipendenti fuqha. Issib ukollmin sar  dipendenti fuqha. (Addicted ) Meta tqum u torqod taħseb biss  kif se  ġġib id-droga. Meta tasal f’dan l-istat  wieħed jkollu bżonn għajnuna professjonali biex joħroġ minnha.

Jezistu ħafna tipi ta’ drogi u l-effetti li jħallu huma diversi. Dwar dan għandna ntellgħu aktar informazzjoni aktar tard fuq din is-site.

Ngħalaq billi nistedinkom tiġu għal laqgħa li jmiss. Il-Laqgħat issir kull nhar ta’ Ġimgħa fis-19:15.

 

Il-Quddiesa

Fil-laqgħa tal-lum ingħatat ħarsa u spjega tal-Liturġija, b’mod speċjali il-quddiesa u t-taqsim tagħha.

Bil-kelma liturġija nifhmu ‘azzjoni/ħidma kollettiva tal-ġisem mistiku ta’ Kristu’; li huwa wara kollox aħna lkoll. Għalhekk l-enfasi hija fuq il-miġemgħa li hemm miġbura fil-knisja għal-liturġija. Bniedem waħdu ma jagħmilx liturġija imma jrid ikun hemm ġemgħa ta’ fidili miġbura f’isem Ġesu. Hemmhekk tkun qed timmanifesta ruħha dik il-wegħda li għamel Kristu meta qal: “Fejn hemm tnejn jew tlieta miġbura f’ismi, hemm inkun jiena f’nofshom.”

Il-qofol tal-liturġija hija il-quddiesa. San Piju ta’ Pietrelcina kien jgħid illi kieku n-nies jifhmu xi tfisser il-quddiesa, żgur li kienu jkunu jiffullaw wara l-bieb tal-knisja biex jieħdu sehem fil-quddiesa.

Il-Knisja ssejħilna sabiex nhar ta’ Ħadd aħna ninġabru l-knisja sabiex niċċelebraw il-liturġija. Tiġi weħidha l-mistoqsija: “Min qiegħed imur, qiegħed imur b’konvinzjoni jew inkella biex ma jagħmilx dnub?” Il-quddiesa hija ikla, hija l-‘agape’ li fiha kienu jaqsmu l-ikel bejniethom l-insara tal-bidu. Benedittu XVI kien jgħid li: “meta aħna nitilgħu nirċievu l-Ewkaristija, aħna nsiru ħaġa waħda.” Fina lkoll ikun ġie Ġesu individwalment imma b’mod sħiħ.

It-taqsim tal-Quddiesa:

Fil-bidu tal-quddiesa nsibu l-introduzzjoni li hija kant filwaqt li s-saċerdot u l-purċissjoni mal-ministranti tasal fuq l-artal. Is-saċerdot hawnhekk irodd is-salib. Il-miġemgħa għandha biss tgħid l-Ammen wara l-formola li jgħid is-saċerdot. Is-saċerdot qiegħed jagħti l-barka fuq il-miġemgħa u l-Ammen hija l-affirmazzjoni ta’ dik il-barka.

Wara din il-parti isir l-att penitenzjali illi jħejjina sabiex bil-parteċipazzjoni tagħna nieħdu l-akbar frott spiritwali possibli mill-quddiesa. Il-formola li tintuża f’dan il-ħin, tal-confiteor, tista’ tiġi varjata għaliex jeżisti verżjonijiet differenti li jistgħu jintużaw. Wara r-riforma tal-liturġija ġiet miżjuda l-frażi “u billi ħallejt dmirijieti.” Bħala nisrani hawnhekk nirrikonoxxu n-nuqqasijiet tagħna u npoġġuhom bħala midimbin quddiem Alla. Imbagħad is-saċerdot jgħid il-formola tal-assoluzzjoni.

Wara nsibu t-talba tal-bidu, il-kolletta. Din it-talba dejjem maqsuma f’erba’ partijiet. Dawn huma l-invokazzjoni, wara tissemma xi ħaġa storika  li ġrat fl-istorja tas-salvazzjoni, imbagħad parti fejn nitolbu għal xi ħaġa partikolari(xerred fuqna perezempju) u fl-aħħar il-konklużjoni trinitarja, id-Dossoloġija, fejn jidħlu il-Missier, l-Iben u l-Ispirtu s-Santu. Il-kolletta tkun tiġbor fiha l-ħsieb ġeneriku tal-qari li jkun ser jinstema’.

Wara jkun imiss għall-parti tal-qari mill-Kelma t’Alla. Tajjeb li ngħidu li l-qari jagħmlu l-lettur; għalhekk m’għandniex inħallu l-karti li jkun hemm disponibbli ttellifna.

Wara l-qari jkun hemm l-ispjega fejn is-saċerdot itina fil-prattika dak li fisser il-qari sabiex aħna nkunu nistgħu nagħmluh tagħna u nwettquh fil-ħajja tagħna.

Wara din il-parti jkun hemm il-parti tat-talbiet universali tal-komunita. Irridu nkunu aktar prattiċi u naħsbu fil-Knisja universali u fil-gruppi li jagħmlu parti mill-parroċċa tagħna. Hawnhekk tajjeb ukoll li jkun hemm mument ta’ silenzju ħalli nkunu nistgħu nagħmlu tagħna dan it-talb li jkun qiegħed jingħad.

Fil-parti Ewkaristika hija l-aktar parti mportanti tal-fidi tagħna. Din tibda permezz tal-prefazju, tal-istedina “Il-Mulej magħkom.” Imbagħad tibda t-talba Ewkaristika. Jeżistu tlettax-il talba ewkaristika li s-saċerdot jista’ jagħżel skont l-udjenza preżenti jew xi żmien jew avvenimenti partikulari.

Din il-parti ewkaristija tintemm bl-Ammen, filwaqt li wara tibda l-parti tal-komunjoni, tat-tqarbin. Din tibda bil-Missierna fejn dejjem għandna nużaw il-formola, it-talba kif għallimielna Ġesu u kif insibuha fl-Evanġelju. Fil-laqgħa ingħad li jekk titkanta, il-Missierna għandha ssir bil-formola u l-kliem eżatt li għamel Kristu stess u mhux xi verżjoni li tagħmel sens mużikali jew poetiku biss.

Wara tingħata l-paċi lil xulxin li huwa sinjali li aħna qed inwettqu dak li wegħdna lil xulxin fil-Missierna.

Wara jsir it-tqarbin fejn nirċievu ġewwa fina lil Ġesu Ewkaristija.

Wara t-tqarbin, fl-aħħar tal-quddiesa, is-saċerdot iberikna bis-sinjal tas-salib u s-saċersot jgħid: “morru fil-paċi ta’ Kristu.” Dan il-paċi ta’ Kristu għandna nġorruh magħna fil-ħajja tagħna u ma’ kull min niltaqgħu miegħu billi nwasslu l-Kelma t’Alla lil ħaddieħor.