Il-laqgħa bdiet bil-kant tat-Talba tal-Moviment.

Imbagħad inqara l-Vanġelu tal-Ħadd – Matt 25: 1-13 – Il-Parabbola tal-Għaxar Xebbiet. Ħafna drabi l-Vanġelu jibda bil-kliem “dak iż-żmien”. Kif nisimgħu din l-espressjoni norbtuha ma’ xi ħaġa tal-passat. Pero’ “dak iż-żmien” jista’ jkun illum ukoll, għaliex il-Vanġelu hu universali. Il-Vanġelu mhux miktub għall-insara ta’ dak iż-żmien biss, imma għandu tifsira għal kulħadd – għal issa u għaż-żmien li ġej.

X’inhu ż-żmien li ġej? Ma nafux, imma l-Parabbola turina ċar x’se jiġri fiż-żmien li ġej. Għaliex Bin il-Bniedem għad jiġi għalina u għal kulħadd mingħajr ma jkun mistenni, kif naraw fil-Parabbola.

Hawnhekk insibu kelma mportanti – “ishru” – ibqgħu dejjem imqajjmin, jiġifieri lesti, bħax-xbejbiet għaqlin tal-Parabbola.

Ġesu’ jibda r-rakkont hekk – “Is-saltna tas-smewwiet tixbah…” Meta jirrakkonta xi ħaġa, Ġesu’ jrid dejjem iwassalna lejn dak li hu l-veru għan tagħna – dak li jrid jiġri wara t-tmiem. L-għaxar xebbiet kollha kienu qed jistennew il-miġja tal-għarus. U kienu lesti li jistennew anke sad-dlam. Imma ħamsa kienu għaqlin, u ħamsa kienu boloh. L-għaqlin ħasbu ‘l quddiem għal li jista’ jinqala’. U allura ħadu magħhom iktar żejt. U l-boloh ma ħasbux, ma tawx kas. U l-għarus iddawwar ma ġie. Ma nafux għaliex – ma qalx x’ħin se jasal. Hawn niftakru wkoll fi kliem Ġesu’: “Li kieku s-sid jaf x’ħin se jiġi l-ħalliel ….”

Aħna rridu nkunu dejjem lesti. L-imsiebaħ tal-għaxar xebbiet baqgħu mixgħula sakemm baqa’ żejt fihom. Imma ż-żejt beda’ jonqos, allura kien hemm il-ħtieġa li jimlewhom.

X’inhu ż-żejt għalina bħala nsara? Huma l-azzjonijiet tajba tagħna – dak kollu li nagħmlu biex nibqgħu dejjem nikkonvertu – inħarsu ‘l quddiem lejn l-għan veru tagħna – il-ħajja ta’ dejjem.

X’ħin qorob l-għarus naraw ir-reazzjoni tax-xbejbiet. Il-boloh indunaw li ma kellomx biex iżommu d-dawl ħaj – il-festa ħajja. Allura talbu lill-għaqlin biex ituhom minn tagħhom. L-għaqlin qalulhom li jekk jagħmlu hekk ma jkunx hemm biżżejjed għal kulħadd. Qalulhom biex jaħsbu għal rashom. Dawn aċċettaw il-parir u marru jfittxu. L-għarus wasal x’ħin kienu għadhom ma ġewx lura. Dawk li kellhom id-dawl jixgħel daħlu għall-festa. Meta waslu l-boloh, semgħu tweġiba li jekk naħsbu daqsxejn fuqha tkexkixna – “Jien ma nafkomx”. Maqtugħin mill-festa minħabba l-bluha, għax ma ħasbux minn qabel. Hawnhekk Ġesu’ jrid itina tagħlima sempliċi: “Ishru, għax ma tafux la l-jum u lanqas is-siegħa” – għandna dejjem inkunu lesti.

Fi kliem ieħor, il-ħajja nisranija tagħna m’għandix tkun superfiċjali. Għandna nħarsu ‘hin minn dak li jidher – mhedijin wisq b’dak li naraw. Allura rridu nibqgħu nfittxu l-ħin kollu xi jrid Alla minna – anke fl-iktar affarijiet żgħar. Hekk inkunu qegħdin naħsbu biex matul ħajjitna nibnu l-ħażna taż-żejt – bħal ma kellhom l-għaqlin.

Biex aħna naħżnu dan iż-żejt, ma nistgħux niddependu minn ħaddieħor – nippretendu li ħaddieħor itina dak li nistgħu nagħmlu aħna. Kull bniedem hu responsabbli tal-azzjonijiet tiegħu. Aħna mdorrijin f’soċjeta’ fejn insibu d-difetti ta’ ħaddieħor biex niġġustifikaw l-iżball tagħna. Naħsbu li b’daqshekk ħlisna minn xi ħaġa fuq il-kuxjenza tagħna. L-iżball ta’ ħaddieħor qatt ma jiġġustifika l-iżball tagħna.

Il-boloh issa ndunaw li l-għaqlin kienu ħasbu minn qabel. Dawn l-għaxra kienu kollha magħżulin – mistednin. Il-boloh baqgħu jittamaw li l-għarus jasal f’xi ħin li l-imsiebaħ tagħhom ikunu għadhom mixgħulin. Għalhekk ma ħasbux minn qabel. Minflok ma ħadu l-inizzjattiva biex jirranġaw is-sitwazzjoni, riedu li l-oħrajn isolvulhom dil-problema. L-umilta’ tidher li ma kenitx waħda mill-karatteristiċi tagħhom – solvili l-problema int!

Kemm ngħabbu fuq ħaddieħor! Nippretendu li ħaddieħor isolvi l-problemi tagħna. Niippretendu li ħaddieħor għandu jinbidel biex jogħġob lilna. L-umilta’ tfisser li jien nagħraf in-nuqqasijiet tiegħi. Nammetti li għamilt żball. Kemm hi diffiċli, speċjalment f’din il-kultura li qed ngħixu fiha! Il-boloh, flok ma ddispjaċihom tal-iżball li kienu għamlu, riedu jaħtfu ż-żejt ta’ ħaddieħor. Ma tawx kas li setgħu jdaħħlu lill-għaqlin fi sqaq, għaliex kieku tawhom miż-żejt tagħhom, mhux ħamsa kienu jispiċċaw barra, imma għaxra.

Papa Franġisku, f’omelija li għamel dil il-ġimgħa, qal li ma nistgħux aħna, bħala nsara, nirkbu fuq dahar xulxin. Irid ikollna atteġġjament ta’ fraternita’. Nistgħu ngħidu wkoll li dawn il-boloh ma kellhomx rispett jew imħabba lejn il-ħamsa l-oħra, għax ma mpurtahomx li setgħu idaħħluhom fl-inkwiet. Il-ġenn tas-soċjeta’ moderna hi li ma tqisx ir-riskju li jista’ jgħaddi ħaddieħor meta bniedem jaħseb biss għal rasu.

F’parabbola oħra tal-festa tat-tieġ insibu li wieħed ma kienx liebes għall-festa – u dan spiċċa barra wkoll. Dawn il-boloh baqgħu barra mill-festa għax f’ħajjithom ma stinkawx biex idawwluha – wisq inqas ma dawwlu lil ħaddieħor.

F’din il-parabbola Ġesu’ jtina żewġ twissijiet importanti. L-ewwel waħda li rridu nkunu dejjem lesti biex niltaqgħu Miegħu, għax ħadd ma jaf il-futur. Ħaġa li tgħina biex inħarsu lejn il-futur huma n-Novissmi. Bil-ħsieb li aħna lkoll irridu nitilqgħu minn hawn, nistgħu nifhmu aħjar dak li dejjem jisħaq fuqu l-Papa Franġisku – l-imħabba. Meta aħna naslu f’punt il-mewt, jispiċċaw magħha żewġ virtujiet – il-fidi u t-tama. Tibqa’ biss l-imħabba – l-imħabba tal-Missier li tana s-salvazzjoni.

It-tieni twissija li jtina Ġesu’ hi li hemm affarijiet li aħna ma nistgħux nissellfu mingħand ħaddieħor, bħal ma hi r-relazzjoni u l-fedelta’ tiegħi lejn Alla. Ħafna qegħdin jibżgħu iġorru l-piż li jridu jagħtu eżempju tajjeb. Ġesu’ qal: “Agħmlu dak illi jgħidulkom, imma tagħmlux bħalhom”.

Għandna dmirijiet iebsin – ma nistgħux inġorruhom weħidna. L-Ispirtu s-Santu hu dak li jgħina. Irridu nħallulu l-ispazju biex jidħol fina. Ħadd ma jista’ jgħid “iva” lil Ġesu’ minflokna. Dik “iva” hi personali. Kollha qed nistennew lil Ġesu’, imma mhux kulħadd lest għal din il-miġja.

Kemm ingergru għax dak li nitolbu rridu li Alla jtinulna fil-pront! Allura niddejqu nistennew u nagħmlu ta’ rasna. Meta Alla jippruvana b’dan il-mod għandu loġika għalina li hi l-maqlub ta’ dik tagħna. Jekk kemm-il darba Alla jissodisfana mill-ewwel, nistgħu nitilfu l-entużjażmu. Minflok ma nibdew naħżnu ż-żejt nidraw ħajja komda. Din hi l-bruda! San Ġwann fil-Ktieb tal-Apokalissi jgħid: “ Aħjar li kont sħun jew kiesaħ għax il-biered jien nobsqu minn ħalqi”.

Sakemm wasal l-għarus, ix-xebbiet kollha ħadhom in-ngħas – bid-differenza li, għalkemm kienu reqdin, l-għaqlin kellhom iż-żejt maħżun. Aħna rridu ntejbu ħajjitna billi naqraw, nisimgħu u nimmeditaw fuq il-Kelma t’Alla. Irrid inkun dispost għaliha. Hemm ukoll it-talb – talb ta’ tifħir, talb ta’ ringrazzjament. Noffru dak kollu li nagħmlu matul il-ġurnata lil Alla.

Hekk kull deċiżżjoni li nagħmlu tkun f’dan id-dawl – dan hu ż-żejt fil-kus – li nagħmlu atti ta’ karita’, biex il-musbieħ tagħna jkun dejjem mixgħul u b’hekk indawwlu lil ħaddieħor.

Dawn huma kollha l-ingredjenti biex x’ħin naslu fil-punt tal-mewt ma jkollnix għalfejn nibżgħu. Allura t-talba tagħna għandha tkun: “Mulej kattar fija l-fidi, Mulej   kattar fija l-imħabba biex meta ddoqqli s-siegħa lili ma tħallinix barra mill-festa”

 

 

 

 

Il-laqgħa bdiet bit-Talba tal-Moviment u l-Manifikat.

Ħafna minna jsejjħu x-xahar ta’ Novembu ix-xahar tal-mejtin. Hu xahar ta’ swied il-qalb għal ħafna. Imma x-xahar jibda b’alternattiva posittiva għal Haloween – All Saints Party – il-Festa tal-Qaddisin Kollha. Niċċelebraw il-ħajja għax dawk li m’għadhomx magħna issa bdew ħajja ġdida.

Diġa’ bdejna naraw minn issa ħwienet bl-affarijiet tal-Milied. Aħna qegħdin nagħmlu ċelebrazzjoni – l-erwieħ ta’ ħutna qegħdin f’ċelebrazzjoni  – fi twelid ġdid. Dan it-twelid hu dak li nixtiequ aħna. Li twelidna ma kellnix kontroll fuqu, pero’ fejn sejrin nafu, u fuq dan irridu naħdmu.

Matul dan ix-xahar, flok ma nsewwdu qalbna, għandna nagħmlu riflessjonijiet. Veru li Novembru jġibilna memorji tal-mejtin tagħna. Anke Ġesu’ beka għall-mewt ta’ Lazzru. Aħna rridu nħarsu bl-ideja tal-ferħ li dawn komplew fil-ħajja – twieldu għal ħajja ġdida.

Ix-xahar ta’ Novembru nużawh bħala riflessjoni ta’ feJn nixtiequ li naslu. Dan hu żmien sabiħ, għax għalkemm illum il-morali qed jinżel, qed joħroġ il-kattoliku propju. Veru li n-numru tan-nies li jmorru l-knisja qed jonqos, imma qed imorru nies li huma vera. Billi jkollok knisja mimlija minn nies li ma jimpurthomx, x’jiswa?

Aħna qegħdin naħdmu għall-futur. Aħna nistgħu nikkontrollaw il-futur, mhux bil-fortune tellers, imma billi nippreparaw ruħna sew. Għalkemm il-ħsieb tan-nies li telqu qabilna jġibilna dieqa, dawn ħallew ukoll togħma tajba warajhom. Dawn in-nies huma dawl għall-futur tagħna. Irridu nsaqsu lilna nnfusna: Fejn ser nitlaq jien? Nistgħu nitolbu minn issa sakemm għandna f’din id-dinja, imma meta mmorru minn hawn irid ikun it-talb ta’ ħaddieħor għalina. Għalhekk għandna naħsbu fl-erwieħ tal-purgatorju. Għandna nitolbu għalihom u anke nitolbu lilhom biex huma jitolbu għalina.

Hawnhekk inqara’ s-salm 23 – Il-Mulej hu r-Ragħaj tiegħi – is-salm tal-isperanza. Dan jgħodd għal dawk li telqu qabilna, u għalina li għadna hawn. Jitkellem dwar episodju li jiġru fil-ħajja tagħna – it-toqol, il-wied mudlam …

Illum qed jippruvah ibelgħuhilna li l-eternita’ hi mezz ta’ kontroll tal-Knisja, pero’, bl-intelliġenza kollha tagħhom, dawn in-nies qed jiddegradaw ruħhom li jġibu lilhom innfushom juq livell ta’ annimal. Kif jista’ jkun li l-bniedem jispiċċa bħal qattus?

Is-Salm 23 jgħodd ħafna għal kull żmien. Ma rridux naqtgħu qalbna. – it-triq nafuha, u l-futur nafuh, mhux bil-qari tax-xorti, imma permezz tal-imħabba t’Alla.

Meta nħobbu, aħna kultant nippruvaw nikkontrollaw li dak li jkun. Alla mhux hekk. Tant għandu mħabba perfetta għalina li ħalliena liberi li nagħżluH jew le. Ħallas il-kont, imma ħallina liberi li, jekk irridu, ngħidulu grazzi.

Novembru hu xahar ta’ preparazzjoni, ta’ “awaremess”. Għalkemm aħna naraw il-mewt bħala nġusta, pero’ hija ġusta, għax Alla ma jagħmel xejn inġust. Aħna nagħmluha nġusta l-ħajja. Nieħdu l-faqar – dan hu tort tar-rebgħa u t-tqassim inġust tal-ġid.

Iktar milli noqogħdu nibżgħu minn dan il-xahar tal-mejtin – wara kollox anke Ġesu’ beża’ quddiem il-mewt – aħna bħalu rridu nirbħu billi nħarsu lejn il-Missier u ngħidulu: “Ikun li trid Int”

It-talb tagħna m’għandux ikun mekkanizzat. Għandna t-talba tal-Missierna – “aħfrilna bħal m’aħna naħfru”. Irridu nkunu nafu x’qed nitolbu. Ngħidulu “ikun li trid Int”, imma f’qalbna nżidu “imma x’ħin u kif irrid jien”. Bħal ma qal Ġesu’ li aħna nafu nagħtu t-tajjeb lil uliedna, aħseb u ara Alla jaf meta għandu jtina dak li neħtieġu. Għandna nitolbu b’fiduċja.

Issa kif qed inħarsu lejn l-eternita’? Ħafna drabi qed ninponu fuqna piżijiet ġodda – piżijiet li ħafna drabi jbegħduna minn Alla. L-inċidenza li nitilfu ruħna hi meta aħna nitgħabbew b’piżijiet ta’ din id-dinja. Il-ħajja hi bħal biċċa metall. Jekk titlaqa’ fil-ħamrija ssaddad. Pero’, jekk tgħin ruħha, jekk tiċċaqlaq ftit, hemm Alla li Hu l-kalamita li jiġbidha lejH. Jekk aħna norbtu qalbna ma’ din id-dinja, aħna nissaddu. Id-dinja tieklok!

Sfidi dejjem kellna. Dan ix-xahar irrid nara jekk jien hux ippreparat tajjeb għal din l-eternita’ li qed nimxi lejha. Illum għandna ħafna għajnuniet. Kif aħna nieħdu ħsieb saħħitna, hekk għandna nieħdu ħsieb ruħna. Din il-ħajja tagħna għad trid tittrasforma ruħha. Dal ġisem tagħna qed itaqqalna minħabba d-dnub. Aħna nemmnu li Alla għad iqajjem dan il-ġisem tagħna.

Dawn huma ftit ħsibijiet, qabel ma x-xahar li ġej, bit-tlellix tiegħu, jaljenana għal festa tal-Milied. Illum, sfortunatament, il-festi tagħna l-kattoliċi qed jiġu fgati bil-kummerċjalita’. Kif qed inħarsu lejn il-festa tat-twelid ta’ Ġesu’? Ħafna drabi għejja u nfiq ta’ flus. Aħna qed nibżgħu nwasslu l-messaġġ ta’ Ġesu’ ċar u tond. Ġesu’ ma kellux kompromessi. Irridu nkunu bħalu – l-iswed iswed u l-abjad abjad. Aħna rridu nibdew minna stess u mill-familji tagħna, mhux imbagħad nippuntaw subajna lejn il-Knisja.

Per eżempju, it-tfal li ħadu sehem fl-All Saints Party, xorta ħadu gost. Min qed jinfluwenza liż-żgħażagħ permezz tal-Haloween, qed jipprova jagħtihom kultura tal-mewt.

Bil-mod il-mod daħlu ċertu leġiżlazzjonijiet, bħal dik tad-divorzju …

X’inhi l-bagalja li qed inħejji għall-eternita’? Quddiem ċertu sitwazzjonijiet, bħall-abort, irridu nkunu iebsin, għax hemm il-ħajja fin-nofs. Id-dinja qed tagħmlilna dal ħafna parametri u tlellix u finalment niblugħha s-sunnara! Irridu noqgħodu attenti li ma nqgħux f’din in-nassa. Niftakru dejjem f’salm 23: “Il-Mulej hu r-Ragħaj tiegħi”.

 

FEJN MA NASLUX AĦNA, JASAL ALLA!

 

IT-TLETIN ĦADD TA’ MATUL IS-SENA  – taħdita mis-sur Joe Huber – il-Ġimgħa 27 t’Ottubru.

Il-laqgħa bdiet bit-Talba tal-Moviment u l-Manifikat. Imbagħad inqara l-Vanġelu tal-Ħadd – Mattew 22, v 34-40 – liema hu l-ikbar kmandament?

Il-Papa Franġisku jgħid li jekk irridu l-għaqda bejn il-knejjes, inutli noqogħdu nistennew it-teoloġi jaqblu bejniethom, għax tispiċċa d-dinja u nkunu għadna ma wasalniex. Fi żmien Ġesu’, l-istorja ma kenitx differenti. L-istess Lhud bejniethom kellhom ħafna diskussjonijiet u nuqqas ta’ qbil. Biżżejjed ngħidu li waqt li l-Fariżej kienu jemmnu f’ħajj’oħra, is-Saduċej ma kenux. U l-Vanġelu tal-Ħadd jibda minn dan il-punt. Is-silta li hemm qabel dan il-Vanġelu hija diskussjoni bejn Ġesu’ u s-Saduċej rigward il-mara li tormol u tiżżewweġ seba’ darbiet, mart min tkun fil-ħajja ta’ wara. Ġesu’ saddilhom ħalqhom: “Fil-ħajja l-oħra la jżewwġu u lanqas jiżżewwġu”.

Il-piki ma jonqsu qatt – issa jmis lill-Fariżej biex jippruvaw jonsbu lil Ġesu’. Rajna fil-Vanġelu tal-Ħadd li għadda l-kwistjoni tal-ħlas tat-taxxa lil Ċesari. Issa jridu jagħmlulu mistoqsija oħra: “Liema hu l-ikbar kmandament?”

Din kienet diskussjoni taħraq bejniethom. Huma kellhom 613-il regola: 248 x’għandek tagħmel u 365 x’mgħandekx tagħmel. Immaġinaw il-poplu bilfors irid jiftakar dawn l-irqaqat! Kienu konvinti li jekk josservaw dawn ir-regoli bir-reqqa kienu se jsalvaw.

It-tweġiba jagħtihilna Ġesu’. Aħna ma nistgħux insalvaw lilna nfusna. Il-bniedem isalva biss bil-grazzja t’Alla – bil-ħniena u l-mogħdrija t’Alla. Għalhekk Alla bagħtilna lil Ibnu biex isalvana bil-mewt u l-qawmien Tiegħu.

Għall-Fariżej, il-kmandamenti kollha kienu tal-istess valur, imma Ġesu’ wriehom li hemm kmandament wieħed – l-imħabba – ħobb lil Alla tiegħek u ħobb lill-proxxmu tiegħek. Jekk inħarsu dawn sew, il-bqija jiġi waħdu. Fit-test tal-Vanġelu hemm żewġ kelmiet importanti: kollha u kollu – imħabba totali.

Aħna lkoll t’Alla. Aħna ċittadini tas-sema pajjiżna. Kull m’aħna u kull m’għandna ġej minn Alla. Iżda nafu li l-progress tela’ għal rasna. Naħsbu li nistgħu ngħixu mingħajr Alla. Meta twieldet il-modernita’, il-foqra ma baqgħux jidhru bħala Kristu, imma bħala oġġetti ta’ karita’. Illum is-soċjeta u l-imħabba għamilnihom kummerċ. Sirna nemmnu li Alla ddgħajjef, allura dak il-vojt li qed inħossu mingħajru rridu nimlewh malajr kemm jista’ jkun. Kien hemm ateju li qal: “Jien ma kontx nemmen f’Alla, sakemm sibt li Alla kont jien”.

B’dawn l-atteġġjamenti ma nistgħux inħobbu kif għallimna Ġesu’. Ġesu’ laħaq il-milja tal-imħabba meta ssallab għalina. Din hi propju il-Liġi l-Ġdida li ġab Ġesu’ – il-perfezzjoni tal-Liġi. Fil-Liġi ta’ Mose’, it-tpattija kienet iġġustifikata. Imma Ġesu’ qalilna li t-tpattija hi dejjem ħażina. Hi l-imħabba li tagħti sens lill-Liġi.

Ninnutaw il-mod kif il-Fariżew indirizza lil Ġesu’ – “Mgħallem”. Indirizzah b’mod sarkastiku. Huma studjaw il-Liġi, imma Ġesu’ għalihom kien biss bin mastrudaxxa. Kienu qegħdin jippruvaw jonsbuh. Dan is-sens ta’ superjorita’ fih innifsu diġa’ qed jonqos mill-imħabba.

L-imħabba hi l-iktar kelma wżata u abbużata. L-imħabba ma tfissirx biss tqanqil sentimentali. Tista’ tfisser rispett, kumpassjoni, simpatija, ħniena, mogħdrija, għożża … L-imħabba t’Alla ssir konkreta meta aħna nħobbu lill-proxxmu. Dan qed nagħmluh? Jew lill-proxxmu tagħna qed naqsmuh f’kategoriji differenti, skond il-kulur tal-ġilda, reliġjon, etċ. L-imħabba fuq kollox tfisser fiduċja – fija nnifsi u f’min qed inħobb. Imma llum sirna kkonċentrati wisq fuqna nfusna – kulħadd bl-aġenda tiegħu u ma jimpurtahx mill-bqija. Allura qed inħabbtu wiċċna mall-problema tat-tradimenti. Jekk jien inħobb tassew, nasal biex inkun Ġuda? Jien kif inħobb? Nara lil Alla f’kull bniedem – hu min hu? Inħobb skond is-sitwazzjoni? Inhobb biex nieħu xi ħaġa lura?

Illum il-kapriċċi qed jissejħu drittijiet. Jekk isiru liġijiet li jkissru l-familja, allura bilfors if-faqar jiżdied. Kemm qed inħobb lil min jagħmilli l-ħsara? Iebsa, imma din hi proprju il-Liġi l-Ġdida – il-perfezzjoni li ġabilna Ġesu’. Irrid nibda minni nnifsi, nagħmel eżami tal-kuxjenza. Kieku kelli nidher issa quddiem il-Mulej, kif se niġġustifika lili nnifsi?

Jekk irrid nifhem kif inħobb verament, għandi qabel kollox nidħol fil-misteru tal-imħabba t’Alla – l-imħabba li għandu għalija personalment. Allura jekk nifhem dan, imbagħad ikun faċli li nistqarr din l-imħabba bil-mod kif jien nittratta mall-proxxmu.

L-imħabba hi sinċiera. Għalhekk l-ikbar għadu tal-imħabba hu sseksik u tqassis. L-imħabba tfisser li aħna bħala nsara nagħmlu ħilitna biex nibnu s-saltna t’Alla minn din l-art. Irrid inħobb lill-proxxmu bħali nnifsi. Irrid insib ħin għalih. Fuq is-salib Ġesu’ tant ħabbna li tneżża minn kollox għalina.

 ĦOBB SAKEMM TWEĠĠA’