Liturgy

Weekly Liturgy and Reflections

ĦAREĠ JIŻRA’… – Il-ħmistax-il Ħadd matul is-sena A – 12 ta’ Lulju 2020

July 5, 2020

Il-15-il Ħadd Matul is-Sena

ĦAREĠ JIŻRA’…

Isaija 55, 10-11;  Salm 64; Rumani 8,18-23; Mattew 13, 1-23

Il-Vanġelu

Dakinhar Ġesù ħareġ mid-dar, mar f’xatt il-baħar u qagħad bilqiegħda hemm. U nġabru madwaru folol hekk kbar ta’ nies li kellu jitla’ fuq dgħajsa u jinżel bilqiegħda fiha; in-nies qagħdu lkoll wieqfa fuq ix-xatt, u hu beda jkellimhom fuq bosta ħwejjeġ bil-parabboli.

U qalilhom : “Darba wieħed bidwi ħareġ jiżra’. Huwa u jiżra’, xi żerrigħat waqgħu mal-mogħdija; ġew l-għasafar u naqqruhom. Oħrajn waqgħu f’art kollha blat, fejn ma kienx hemm wisq ħamrija, u malajr nibtu, għax il-ħamrija ma kinitx fonda; iżda mbagħad telgħet ix-xemx, u nħarqu u nixfu, għax ma kellhomx għeruq. Oħrajn waqgħu qalb ix-xewk, u x-xewk kiber magħhom u ħonoqhom. Imma oħrajn waqgħu f’art tajba, u għamlu l-frott, min mija, min sittin, u min tletin. Min għandu widnejn, ħa jisma’! “

Resqu lejh id-dixxipli u staqsewh: “Għaliex tkellimhom bil-parabboli?” Hu weġibhom: “Għax lilkom ingħata li tagħrfu l-misteri tas-Saltna tas-Smewwiet; iżda lilhom dan ma kienx mogħti. Għax kull min għandu, jingħatalu, u jkollu żżejjed ukoll; iżda min ma għandux, jitteħidlu saħansitra dak li għandu. Jien għalhekk inkellimhom bil-parabboli; għax iħarsu kemm iħarsu ma jarawx, u jisimgħu kemm jisimgħu ma jifhmux.  U hekk isseħħ fihom il-profezija ta’ Isaija li tgħid,

‘Tisimgħu kemm tisimgħu ma tifhmux,

u tħarsu kemm tħarsu ma tarawx.

Għax il-qalb ta’ dan il-poplu twebbset:

kienu tqal biex jisimgħu b’widnejhom,

u għalqu għajnejhom li ma

jmorrux jaraw b’għajnejhom,

u jisimgħu b’widnejhom,

u jifhmu b’moħħhom,

u hekk ibidlu ħajjithom

u jiena nfejjaqhom.’

“Intom, iżda, henjin għajnejkom, għax qegħdin jaraw; henjin widnejkom, għax qegħdin jisimgħu. Tassew, ngħidilkom, li bosta profeti u nies ġusti xtaqu jaraw dak li qegħdin taraw intom u ma rawhx, u jisimgħu dak li qegħdin tisimgħu intom u ma semgħuhx!

“Mela isimgħuha intom il-parabbola ta’ dak li ħareġ jiżra’. Kull min jisma’ l-kelma tas-Saltna u ma jifhimhiex, jersaq il-ħażin u jisraqlu dak li jkun inżera’ f’qalbu: dan huwa dak li nżera’ mal-mogħdija. Dak li nżera’ f’art kollha blat huwa dak li jisma’ l-kelma u jilqagħha minnufih bil-ferħ; imma għeruq ma jkollux fih innifsu, u għalhekk ftit idum; mbagħad jiġi fuqu l-għawġ, jew isib min iħabbtu minħabba l-kelma, u malajr jitfixkel. Dak li nżera’ qalb ix-xewk huwa dak li jisma’ l-kelma iżda l-inkwiet żejjed għall-ħwejjeġ tad-dinja u l-ġibda għall-ġid ta’ l-art joħonqulu l-kelma, li għalhekk ma tagħmilx frott. Dak imbagħad li nżera’ f’art tajba huwa dak li jisma’ l-kelma u jifhimha; u tassew hu jagħmel il-frott; dan jagħmel mija, dak sittin, u l-ieħor tletin.”

Il-Ħsieb

Il-Mulej illum jagħmlilna sfida:  “Min għandu widnejh ħa jisma’.”  Hija sfida iebsa iżda reali.  Ħafna drabi aħna ma rridux nisimgħu ’l-Mulej jew nagħmlu ta’ bir-ruħna li ma smajnihx għax ma rridux min jindaħlilna fit-tip u l-mod ta’ ħajja li qed ngħixu.  XEWK U FROTT huma ż-żewġ realtajiet tal-ħajja tagħna.  Frott u Xewk li jfissru mumenti sbieħ u oħrajn inqas sbieħ iżda li l-Mulej iridna ngħixuhom fid-dawl tal-kelma tiegħu.  Huwa Hu l-bidwi li jiżra’, huwa Hu li jsaqqi, huwa Hu li jaħsad.  Hemm bżonn li qalbna tkun qalb fertili għall-kelma tiegħu.

Ħajjitna tagħmel sens jekk nisimgħu l-kelma ta’ Alla u nħarsuha.  Dak biss jista’ jkun ta’ ġid u ta’ sens għall-ħajja tagħna.  Ma naħlux ħin niskandalizzaw irwieħna b’dak u bl-ieħor jekk wara kollox aħna stess m’aħniex ta’ eżempju tajjeb għal dawk ta’ madwarna.  Il-Kelma tal-Mulej hija ċara llum dwar dan.  Hemm bżonn li naċċettaw il-kelma ta’ Alla u nifhmuha sew.

Il-Kelma

Fl-ewwel qari mill-Ktieb ta’ Isaija għandna lill-Profeta jħeġġeġ lil-Lhud fl-eżilju biex ifittxu lil Alla u jafdaw fih minħabba li l-kelma tiegħu għandha qawwa kbira.  Fis-Salm 64 għandna l-messaġġ li ż-żerriegħa hija l-Kelma ta’ Alla li jekk taqa’ f’art tajba tagħmel ħafna frott.  Fl-Ittra lir-Rumani għandna lil San Pawl jurina li meta dineb, il-bniedem kaxkar miegħu fil-ħażin il-ħolqien stess, b’mod li meta feda l-bniedem dan sar jaċċetta, jifhem u jgħix din il-kelma.

Il-Ħajja
  1. Kemm tassew għandek għal qalbek il-kelma ta’ Alla? Kemm tassew taf dwarha?
  2. Kemm tassew din il-kelma qed tipprova tgħaddiha fl-għajxien tal-ħajja tiegħek ta’ kuljum?
  3. Kemm tassew qed tapprezza li permezz ta’ din il-kelma qed jasallek il-messaġġ ta’ salvazzjoni lilek u lill-ħolqien kollu?
  4. Il-Kelma ta’ Alla għadha l-fanal li permezz tagħha qed nara fejn nimxi?
  5. Kemm qegħdin ngħinu lil xulxin biex nagħmlu l-frott fil-ħajja tagħna?
Id-Djalogu

Mulej, agħmel li naċċetta l-kelma tiegħek u ngħixha jum wara jum.

read more

FEJN SEJJER?- L-erbatax-il Ħadd matul is-sena A – 5 ta’ Lulju 2020

July 5, 2020

L-14 Ħadd Matul is-Sena

FEJN SEJJER?  QED JGĦIDLEK BIEX TMUR GĦANDU…

Żakkarija 9,9-10; Salm 144;  Rumani 8, 9.11-13; Mattew 11,25-30

Il-Vanġelu

F’dak iż-żmien Ġesù qabad u qal: “Nfaħħrek, Missier, Sid is-sema u l-art, għax inti dawn il-ħwejjeġ ħbejthom lil min għandu l-għerf u d-dehen u wrejthom liċ-ċkejknin. Iva, Missier, għax lilek hekk għoġbok.

“Kollox kien mogħti lili minn Missieri, u ħadd ma jagħraf lill-Iben jekk mhux il-Missier, kif ħadd ma jagħraf lill-Missier jekk mhux l-Iben u dak li lilu l-Iben irid jgħarrafhulu.

“Ejjew għandi, intom ilkoll li tinsabu mħabbtin u mtaqqlin, u jiena nserraħkom. Ħudu fuqkom il-madmad tiegħi u tgħallmu minni, għaliex jiena ta’ qalb ħelwa u umli, u intom issibu l-mistrieħ għal ruħkom. Għax il-madmad tiegħi ħelu u t-toqol tiegħi ħafif.”

 

Il-Ħsieb
Ejjew għandi, u jiena nserraħkom
F’liema direzzjoni sejjer fil-ħajja tiegħek?  Dejjem teqred… dejjem tgerger aktar ma jgħaddi ż-żmien?  Il-Mulej illum qed jagħmillek stedina li hija sfida kontra l-kurrent tal-ħajja.  Illum tfittex soluzzjoni kullimkien barra għandu.  Tipprova ssib mistrieħ f’kull rokna tad-dinja u ma tersaqx lejn il-qalb tiegħu.  Imma kemm ser indumu nagħmlu farsa mill-ħajja tagħna?  Kemm ser indumu nkunu boloh?  Qed jistedinna u ndawru wi   ċċna?

Fl-ewwel qari tal-lum għandna lil Żakkarija jeħodha kontra l-poplu Lhudi li wara l-eżilju kien qed jimmaġina xi ħaġa glorjuża… iżda Żakkarija jwiegħed li ġej Sultan Ġust li miegħu tasal il-ġustizzja.  Kemm-il darba aħna wkoll għamilna bħall-poplu Lhudi.  Min jaf x’immaġinajna li lest jagħmel magħna ħwejjeġ kbar u lanqas biss nindunaw.

Meta naqra l-Vanġelu tal-lum nifakar f’Santa Katerina ta’ Siena li għax intelqet f’idejn il-Mulej għamlet ħwejjeġ kbar u saħansitra l-Papa Pawlu VI għamilha Duttur tal-Knisja… u din kienet mara sempliċi u illitterata.

 

Il-Kelma

L-ewwel qari huwa meħud mill-Ktieb tal-Profeta Żakkarija fejn għandna l-poplu Lhudi li jirritorna mill-eżilju mingħajr setgħa politika.  Huwa poplu sbandat iżda Żakkarija jwiegħed Sultan ġust u umli.  Fis-Salm Responsorjali, meħud minn Salm 144, għandna tifħir lill-Mulej li huwa ta’ qalb ħelwa u umli.  It-tieni qari huwa meħud mill-Ittra ta’ San Pawl lir-Rumani fejn għandna twissija ta’ l-Appostlu biex ngħixu fid-dawl tar-rieda t’Alla u mhux skond il-ġibdiet tal-ġisem.  Fil-Vanġelu Ġesù jfaħħar lil min hu ta’ qalbu ċkejkna kif ukoll jistieden lil dawk li għandhom bżonn l-għajnuna tiegħu biex imorru għandu.

 

Il-Ħajja
  1. Kemm tassew qed tafda ħajtek KOLLHA f’idejn Ġesù?
  2. Kemm għandek kuntatt miegħu?
  3. Kemm tassew qed tgħix mhux skond il-ġibdiet tal-ġisem? Kapaċi tikkontrolla lilek innifsek?
  4. Ġesù jfaħħar l-umiltà.  Inti inkluż?

 

Id-Djalogu

Mulej, għallimni niġi għandek.

 

read more

San Pietru u San Pawl Appostlu – 29 ta’ Ġunju 2020

June 28, 2020

L-Evanġelju 

Stqarrija tal-fidi minn Pietru u l-primat tiegħu

(Mk 8, 27-30; Lq 9, 18-21)

 

Meta wasal fl-inħawi ta’ Ċesarija ta’ Filippu, Ġesù staqsa  lid-dixxipli tiegħu u qalilhom: “Min jgħidu n-nies li hu Bin il-bniedem?” U huma weġbuh: “Xi wħud, Ġwanni l-Battista; oħrajn, Elija; u oħrajn, Ġeremija jew wieħed mill-profeti.” Imma intom min tgħidu li jien?” staqsiehom. U qabeż Xmun Pietru u qallu: “Inti l-Messija, Bin Alla l-ħaj.” U Ġesù wieġbu u qallu: “Hieni int, Xmun bin Ġona, għax mhux bniedem tad-demm u l-laħam uriek dan, imma Missieri li hu fis-smewwiet. U jiena ngħidlek: Inti Pietru, u fuq din il-blata jiena nibni l-Knisja tiegħi, u s-setgħat ta’ l-infern ma jegħlbuhiex. Jiena nagħtik l-imfietaħ tas-Saltna tas-Smewwiet, u kull ma torbot fuq l-art ikun marbut fis-smewwiet, u kull ma tħoll fuq l-art ikun maħlul fis-smewwiet.”

 

read more

MIXJA WARA KRISTU: TELFA U GĦOTJA – It-13 il Ħadd Matul is-Sena A – 27 ta’ Ġunju 2020

June 27, 2020

It-13 il Ħadd Matul is-Sena

MIXJA WARA KRISTU: TELFA U GĦOTJA

Slaten 34:8-11, 14-16; Salm 88; Rumani 6: 3-4, 8-11; Mattew 10:37-42

Il-Vanġelu

Qari mill-Evanġelju skont San Mattew

F’dak iż-żmien, Ġesù qal lill-appostli tiegħu: “Min iħobb lil missieru jew lil ommu iżjed minni ma jistħoqqlux li jkun miegħi; min iħobb lil ibnu jew lil bintu iżjed minni ma jistħoqqlux li jkun tiegħi. U min ma jerfax salibu u jimxi warajja ma jistħoqqlux li jkun miegħi. Min isib lil ħajtu, jitlifha; u min jitlef lil ħajtu minħabba fija jsibha. Min jilqa’ lilkom jilqa’ lili, u min jilqa’ lili jkun jilqa’ lil dak li bagħatni. Min jilqa’ profeta għax hu profeta, ħlas ta’ profeta jieħu; u min jilqa’ bniedem ġust għax hu ġust, ħlas ta’ wieħed ġust jieħu. U kull min jagħti mqar tazza ilma frisk lil xi ħadd minn dawn l-iżgħar għax hu dixxiplu, tassew ngħidilkom li ma jitlifx il-ħlas tiegħu.”

Il-Kelma tal-Mulej. Tifħir lilek Kristu

 

Il-Ħsieb

     Il-mixja tagħna wara Kristu hija avventura…. avventura b’riskji kbar, riskji ta’ fidi, riskji ta’ ferħ, riskji ta’ ħajja.  Anki llum għadna nisimgħu nies li jmutu għall-fidi tagħhom.  Kellna l-każijiet ta’ Popieluszko fil-Polonja, l-Isqof Romero f’El Salvador, Don Pino Puglisi fi Sqallija, is-seba’ trappisti fl-Alġerija, nies li lkoll kienu qed iservu fuq id-direzzjoni tal-Mulej u ġew maqtula.  Min jaf kemm oħrajn imutu mingħajr

lanqas toħroġ aħbarhom!  Il-mixja wara Kristu hija telfa mhux biss tal-ħajja.  F’xi każijiet iżda, anki għal għajnejn id-dinja hija telfa.  Imma fil-mument tat-telfa toħroġ fil-beraħ l-għotja li nkunu tajna lill-Mulej.  Il-liturġija tal-lum tesprimi proprju dan… kemm tassew ilkoll kemm aħna qegħdin ningħataw bis-serjeta’ lill-Mulej?  Kemm tassew qed inħobbu lill-Mulej aktar mill-affarijiet għeżież u intimi tagħna?  Kemm tassew qed nagħtu tazza ilma friska lil dawk li huma fil-bżonn.  Kemm tassew qed niċkienu aħna biex jikber Alla fil-proxxmu?

 

Il-Kelma

L-Ewwel Qari tal-lum huwa meħud mit-Tieni Ktieb tas-Slaten.  Għandna lil Eliżew il-profeta jkompli l-missjoni ta’ Elija u jpatti lill-mara ta’ Sunem għall-mod kif laqgħet il-Profeta ta’ Alla.  Fis-Salm Responsorjali tal-lum, meħud minn Salm 88, għandna tifħir obbligu ta’ għana għat-tjieba tal-Mulej.  Fit-Tieni Qari tal-lum mill-Ittra ta’ San Pawl lir-Rumani, għandna r-rakkont kif aħna bil-magħmudija indfinna mal-Mulej biex ngħixu miegħu u nqumu.  Huwa wkoll eżempju għall-mod kif kull azzjoni tagħna trid tkun telfa biex wara jkun hemm rebħa.  Fil-Vanġelu tal-lum, meħud minn San Mattew, insibu lil Ġesu’ jwissi li jeħtieġ li nħobbu lil Alla fuq kollox u b’hekk ninqatgħu mill-affarijiet tad-dinja.  Hemm bżonn li nħarsu ftit madwarna u ngħinu tassew lill-fqir u l-batut għax fih naraw il-preżenza kontinwa ta’ Ġesu’.

 

Il-Ħajja

  1. Illum huwa Ħadd ta’ riflessjoni. Kemm tassew aħna Nsara li qed nitilfu kontinwament biex jidher Ġesu’ fl-għemil tagħna?  Jew għadna ma fhimna xejn?
  2. Kemm tassew kapaċi nħarsu madwarna u ninqatgħu mir-realta’ tagħna biex ngħixu l-Vanġelu?
  3. Qatt tajt tazza ilma friska fil-ħajja tiegħek lil xi ħadd fil bżonn?

 

Id-Djalogu

Mulej, għinni nikber kuljum

fl-imħabba vera lejk.

read more

XANDRU MINN FUQ IL-BJUT – It-12-il Ħadd Matul is-Sena A – 21 ta’ Ġunju 2020

June 16, 2020

It-12- il Ħadd Matul is-Sena

TIBŻGĦUX, XANDRU MINN FUQ IL-BJUT

Ġeremija 20: 10-13; Salm 68; Rumani 5:12-15; Mattew 10: 26-33

Il-Vanġelu

“Għalhekk la tibżgħux minnhom. Għax xejn ma hu mgħotti li ma jinkixifx, u xejn ma hu moħbi li ma jsirx magħruf. Dak li jien ngħidilkom fid-dlam għiduh fid-dawl, u dak li ngħidilkom f’widnejkom xandruh minn fuq il-bjut. U tibżgħux minn dawk li joqtlu l-ġisem bla ma jistgħu joqtlu r-ruħ; imma aktar ibżgħu minn dak li jista’ jeqred kemm ir-ruħ u kemm il-ġisem fl-infern. Żewġ għasafar tal-bejt mhux b’ħabba jinbiegħu? U b’danakollu anqas wieħed minnhom ma jaqa’ fl-art mingħajr ir-rieda ta’ missierkom. Intom imbagħad sa x-xagħar ta’ raskom kollu hu magħdud. Mela xejn la tibżgħu; intom aqwa minn ħafna għasafar tal-bejt.

“Kull min jistqarr quddiem il-bnedmin li hu miegħi, jien ukoll nistqarr li jiena miegħu quddiem Missieri li hu fis-smewwiet. Iżda min jiċħad lili quddiem il-bnedmin, jien ukoll niċħad lilu quddiem Missieri li hu fis-smewwiet

 

Il-Ħsieb

     Hemm bżonn li aħna, bħala Knisja, inkunu fuq l-attakk.  Ħafna drabi tinduna li l-Insara, speċjalment f’pajjiżna, huma wisq fuq id-difiża.  Huma wisq spettaturi.  Hemm bżonn li nagħtu xhieda aħjar lid-dinja li qegħdin ngħixu fiha.  Mhux niftaħru bit-tajjeb iżda jeħtieġ li t-tajjeb jidher.  Titkexkex meta tisma’ li madwar 200 ruħ imutu martri għall-fidi tagħhom fid-dinja tal-lum, xi ħaġa li l-media dejjem taħbi.  Titkexkex meta bħalissa joħorġu fil- beraħ stejjer ta’ nsara li fil-pajjiżi tal-Lvant ta’ l-Ewropa kellhom jitfarrku psikoloġikament, mill-Gvernijiet Dittatorjali Komunisti, biex juru twemminhom.  U aħna, fil-kumdita’ ta’ gżiritna, nistħu nuru u ngħidu li aħna nsara.  Araw il-ħafna kompromessi li nagħmlu mat-turisti li jiġu jżuruna.  Hemm bżonn li nxandru minn fuq il-bjut mingħajr biża’.  Hemm bżonn li lkoll nuru l-fidi tagħna fl-għajxien ta’ kuljum.

 

Il-Kelma

Fl-ewwel silta tal-kelma li għandna llum, meħuda mill-Ktieb tal-Profeta Ġeremija, għandna lill-istess profeta li jħossu qalbu maqtugħa għax ħbiebu stess daru għalih.  Iżda Ġeremija jagħmel kuraġġ meta jiftakar li Alla huwa miegħu.  Salm 68 itenni li jekk aħna nkunu mġarrbin irridu dejjem induru lejn il-Mulej.  Fit-Tieni Qari tal-lum, meħud mill-Ittra lill-Korintin, S.Pawl jagħmel kuntrast bejn Kristu u Adam u jtenni li lkoll kemm aħna għandna naraw x’għamel tassew Kristu għal ħajjitna.  Fil-Vanġelu tal-lum, meħud minn San Mattew, Ġesu’ jwissi lill-Appostli mit-tiġrib li kellhom jgħaddu minnu.  Iqawwilhom qalbhom u jtenni biex ma nistħux nuru min Hu quddiem il-bnedmin.

 

Il-Ħajja

  1. Kif qed tagħti xhieda ta’ Kristu kuljum? Jew qed tistħi?
  2. Ġesu’ ġie mġarrab. Aħna l-Insara se nkunu mġarrba minn tant tfixkil?  Hemm bżonn li ma nibżgħux, għax il-Mulej magħna dejjem.
  3. Xi kultant ma narawx ħlief il-kuntrarju madwarna, anki minn dawk li huma viċin tagħna. Titħawwadx.  Taqtax qalbek, il-Mulej miegħek.
  4. Hemm bżonn li ma nibżgħux. Hemm bżonn li nagħtu xhieda ta’ Kristu fl-ambjent fejn ngħixu mingħajr l-ebda mistħija.

 

Id-Djalogu

Fil-kobor ta’ tjubitek

Weġibni o Alla.

read more

IL-ĠISEM TIEGĦU GĦALINA – Il-Festa tal-Ġisem u d-Demm ta’ Kristu – Sena A – 14 ta’ Ġunju 2020

June 13, 2020

Il-Festa tal-Ġisem u d-Demm ta’ Kristu

IL-ĠISEM TIEGĦU GĦALINA

Dewtoronomju 8, 2-3; 14b-16a; Salm 147; Korintin 10: 16-17; Ġwanni 6 : 51-58

 

Il-Vanġelu

F’dak iż-żmien, Ġesù qal lin-nies:  “Jiena hu l-Ħobż il-ħaj, li niżel mis-sema. Jekk xi ħadd jiekol minn dan il-ħobż jgħix għal dejjem. U l-ħobż li jiena nagħti huwa ġismi għall-ħajja tad-dinja.” Fuq hekk il-Lhud tlewmu bejniethom, u bdew jgħidu: «Kif jista’ dan jagħtina ġismu biex nikluh?” Ġesù mela qalilhom: “Tassew, tassew ngħidilkom, jekk ma tiklux il-ġisem ta’ Bin il-bniedem u ma tixorbux demmu, ma jkollkomx il-ħajja fikom. Min jiekol ġismi u jixrob demmi għandu l-ħajja ta’ dejjem, u jiena nqajmu mill-imwiet fl-aħħar jum. Għax ġismi huwa tassew ikel, u demmi hu tassew xorb. Min jiekol ġismi u jixrob demmi jibqa’ fija u jiena fih. Bħalma bagħatni l-Missier, li hu ħaj, u jiena ngħix b’Missieri, hekk ukoll min jiekol lili, hu wkoll jgħix bija. Dan huwa l-ħobż li niżel mis-sema; m’huwiex bħal dak li kielu missirjietkom u mietu; min jiekol dan il-ħobż jgħix għal dejjem.”

Il-Ħsieb

min jiekol dan il-ħobż jgħix għal dejjem
Il-Mulej tela’ fis-sema, bagħtilna l-Ispirtu s-Santu, enfasizza l-preżenza qawwija tat-Trinità Qaddisa u llum iħallilna Ġismu u Demmu għalina biex nikbru fil-fiduċja u fl-għajxien tal-fidi tagħna.  Kemm għandna llum għaliex ngħidulu grazzi lill-Mulej!  Kemm tassew ma nafux napprezzaw il-ġid kbir, l-għajnuna bl-abbundanza li jagħtina l-Mulej kuljum.  Ħallielna ġismu u demmu.  X’seta’ jħallilna aktar sabiex ikun ċert li ma naqgħux, li se jibqa’ magħna dejjem sa l-aħħar taż-żminijiet?  Kemm tassew inkunu grati lejn il-Ħallieq meta nagħmlu ġimgħat, xhur u xi kultant snin ma nersqu biex nirċievu l-EWKARISTIJA – il-Ġisem u d-Demm ħaj ta’ Kristu għalina. Min jaf kemm-il darba ersaqna għat-tqarbin b’indifferenza.  Ġesù ħallielna Ġismu u Demmu biex iħeġġiġna b’nar ta’ mħabba u aħna nitilgħu għax hekk drajna, nersqu lejn l-artal mingħajr l-ebda sens ta’ dak li ser nirċievu, noħorġu mill-knisja u jibqa’ kollox l-istess.

Il-Kelma

Fl-Ewwel Qari tal-lum, meħud mill-Ktieb tad-Dewteronomju, Mosè jfakkar fl-opri kbar li wettaq magħhom Alla fid-deżert, l-ilma li ħareġ mill-blat kif ukoll il-manna li temagħhom.  Huwa għalhekk importanti li lkoll kemm huma jagħrfu l-kobor t’Alla għalihom.  Fis-Salm 147 għandna lis-Salmista jkanta innu ta’ tifħir quddiem l-għeġubijiet li Alla għamel mal-poplu tiegħu.  Fit-Tieni Qari tal-lum San Pawl, fl-Ittra lill-Korintin, juri l-unità li toħroġ mill-Ewkaristija.  “La l-ħobża hi waħda, aħna li aħna ħafna, aħna ġisem wieħed.  “Fil-Vanġelu tal-lum, meħud minn San Ġwann, Ġesù jitkellem ċar li hu l-ħobż tal-ħajja.

Il-Ħajja

1.  Ġesù jrid jagħtina ġismu u demmu biex nibqgħu ħajjin.  Għaliex nibqgħu nagħżlu l-mewt?

2.  Il-Mulej idawwalna u jgħinna fil-mixi tagħna permezz ta’ l-Ewkaristija.  Kemm qed niffrekwentaw u nifhmu dak li nirċievu?

3.  Kemm qed inferrgħu l-imrar tagħna quddiem Ġesù fl-Ewkaristija Mqaddsa?

4.  Jekk trid bidla sħiħa u għajnuna kbira fil-ħajja tiegħek trid tersaq aktar u tifhem l-Ewkaristija.

Id-Djalogu

Mulej tiegħi u Alla tiegħi.

read more

IT-TRINITÀ QADDISA – Ħadd fuq Għid il-Ħamsin – Sena A – 7 ta’ Ġunju 2020

May 30, 2020

Il-Ħadd fuq Għid il-Ħamsin

IT-TRINITÀ QADDISA

Eżodu 34: 4b-6,8-9; Danjel 3: 52-56; 2 Korintin 13:11-13; Ġwanni 3:16-18

Il-Vanġelu

Għax Alla hekk ħabb lid-dinja li ta lil Ibnu l-waħdieni, biex kull min jemmen fih ma jintilifx, iżda jkollu l-ħajja ta’ dejjem. Għax Alla ma bagħatx lil Ibnu fid-dinja biex jagħmel ħaqq mid-dinja, imma biex id-dinja ssalva permezz tiegħu. Min jemmen fih ma jkunx ikkundannat; iżda min ma jemminx huwa ġa kkundannat, għax ma emminx fl-isem ta’ l-Iben il-waħdieni ta’ Alla.

 

Il-Ħsieb

Fit-tlugħ tiegħu fis-sema l-Mulej wegħidna li mhux se jħallina orfni.  U fil-fatt, fil-festa tal-lum naraw kemm tassew il-Mulej ma ħalliniex waħedna.  Il-preżenza ħajja u attiva tat-Tliet Persuni tat-Trinità Mqaddsa turina lilna lkoll li l-Mulej irid iħares kull waqt tal-ħajja tagħna għaliex iridilna l-ġid.  Huwa għal dan il-għan li l-Missier, l-Iben u l-Ispirtu s-Santu jaħdmu fina.  Għalhekk aħna mmarkati bis-sinjal tat-Trinità Qaddisa.  Għalhekk meta nroddu s-Salib inkunu qed nitolbu l-intervent kontinwu tat-Trinità Qaddisa fuq l-għemejjel tagħna.  Alla hekk ħabbna li bagħat lil Ibnu.  Dan l-Iben wettaq il-missjoni tiegħu u wiegħed Difensur fl-Ispirtu s-Santu.  Hija din il-qawwa tat-Trinità Qaddisa fl-istorja ta’ l-umanità u fl-istorja personali ta’ kuljum tagħna lkoll li tqawwilna l-fidi tagħna u tneħħi minna kull sens ta’ biża’.

Il-Kelma

Fl-Ewwel Qari tal-lum, meħud mill-Ktieb ta’ l-Eżodu, għandna lill-poplu Lhudi li beda jadura l-għoġol tad-deheb.  Xeba’ minn Alla.  Abbuża minn Alla.  Mosè jitla’ fuq il-muntanja biex jikseb u jwettaq mill-ġdid il-Patt bejn Alla u l-poplu Lhudi.  Jingħata l-Kmandamenti.

Fis-Salm Responsorjali li ntennu llum, mill-Ktieb tal-Profeta Danjel, għandna innu ta’ radd il-ħajr għax il-Mulej għoġbu jgħarraf l-Isem Qaddis Tiegħu lilna lkoll.  Fil-Vanġelu tal-lum, meħud minn San Ġwann, Ġesù jtenni li Alla bagħat lil Ibnu fid-dinja biex bih hija ssalva.

Il-Ħajja

1.  Kemm tassew qed naduraw ALLA WIEĦED fil-ħajja tagħna?  Jew aħna wkoll għandna l-għoġol tad-deheb li qegħdin naduraw?

2.  Kemm tassew inħossu l-preżenza ħajja tat-TRINITÀ QADDISA FINA LKOLL, il-preżenza tal-MISSIER, L-IBEN u l-ISPIRT S-SANTU?

3.  Kemm qed inkunu ulied denji tal-Missier li nroddu ħajr bis-serjetà għall-ħidma u l-għajnuna kontinwa li jagħtuna permezz tal-Missier, l-Iben u l-Ispirtu s-Santu?

4.  Huwa tajjeb li naraw it-tip ta’ għażliet li qed nagħmlu kuljum fil-ħajja tagħna.  Kemm minn dawn huma mdawlin mill-għerf li tana Alla?

Id-Djalogu

Glorja lill-Missier,

lill-Iben u lill-Ispirtu s-Santu.

read more

NEĦĦU L-BIŻA’ – Għid il-Ħamsin – Sena A – 31 ta’ Mejju 2020

May 29, 2020

Għid il-Ħamsin

NEĦĦU L-BIŻA’

Atti 2: 1-11, Salm 103; 1 Korintin 12:3-7, 12-13; Ġwanni 20:19-23

Il-Vanġelu

Dak in-nhar fil-għaxija, fl-ewwel jum tal-ġimgħa, meta d-dixxipli kienu flimkien imbeżżgħa mil-Lhud, bil-bibien magħluqa, ġie Ġesù u qagħad f’nofshom; u qalilhom: “Is-sliem għalikom!”  Kif qal hekk, uriehom idejh u ġenbu. Id-dixxipli ferħu meta raw lill-Mulej. Mbagħad Ġesù tenna jgħidilhom: “Is-sliem għalikom! Kif il-Missier bagħat lili, hekk jien nibgħat lilkom.”  Kif qal hekk, nefaħ fuqhom u qalilhom: “Ħudu l-Ispirtu  s-Santu.  Dawk li taħfrulhom dnubiethom ikunu maħfura, u dawk li żżommuhomlhom ikunu miżmuma.”

Il-Ħsieb

Is-sliem għalikom!
Kemm-il darba fil-ħajja tagħna ngħaddu minn perjodu ta’ dwejjaq, qtigħ il-qalb, naħsbu li qegħdin waħedna, maqtugħin għal rasna, ma nafux x’se nagħmlu bl-għażliet tal-ħajja ta’ kuljum.  Aktar ma nimxu fil-progress aktar il-bniedem jidher li qed jinfixel u jitfixkel.  Huwa għalhekk li l-ġest tal-lum ta’ l-inżul ta’ l-Ispirtu s-Santu fuq l-Appostli, fuq il-Knisja u fuqna lkoll, għandu sinifikat ferm speċjali, sinifikat li bil-fatti Kristu ħallielna difensur li lest li jdawwalna kull ħin.  U propju fil-mixja li l-bniedem tal-lum qiegħed jagħmel fil-kultura tal-mewt u tad-dlamijiet, id-DIFENSUR, L-ISPIRTU TAL-MULEJ huwa dak li għandu jdawwal l-imħuħ u l-qlub tagħna lkoll fl-għażliet żgħar u kbar li nwettqu kuljum, għażliet li jridu jkunu mdawlin mill-Ispirtu tal-Mulej biex nifhmu l-kelma u r-rieda tiegħu.

Il-Kelma

Fl-Ewwel Qari tal-lum, meħud mill-Ktieb ta’ l-Atti ta’ l-Appostli, għandna l-ewwel ir-rakkont ta’ l-inżul ta’ l-Ispirtu s-Santu fuq l-Appostli u wara naraw nies minn diversi nazzjonijiet jifhmu l-preokkupazzjoni tal-kelma magħmula mill-Appostli.  Fis-Salm Responsorjali tal-lum, Salm 103, għandna innu li juri kif, permezz ta’ l-Ispirtu s-Santu, Alla beda jġedded kollox.  Fit-Tieni Qari mill-Ewwel Ittra ta’ San Pawl lill-Korintin għandna r-rakkont ta’ San Pawl li juri kif il-ħidma ta’ l-Ispirtu s-Santu tgħaqqad il-Knisja u l-ħidma tal-membri kollha tal-Knisja.  Fil-Vanġelu tal-lum minn San Ġwann għandna lil Ġesù li jagħti huwa nnifsu l-Ispirtu fuq l-Appostli.

Il-Ħajja
  1. Mhux talli Ġesù ma fdaniex waħedna, talli ħallielna Difensur kontinwu magħna.  Possibbli għadna ma ndunajniex?
  2. Kemm-il darba ħassejna lill-Ispirtu tal-Mulej qed idawwal id-deċiżjonijiet tagħna?
  3. Il-Mulej jonfoħ kontinwament l-Ispirtu tiegħu fuqna.  Kemm qed nużaw dan l-Ispirtu biex indandnuh?
  4. Aħna ħafna membri iżda ġisem WIEĦED.  Kemm tassew qed nagħtu xhieda ta’ dan bħala Nsara anki fl-istess Knisja Maltija?
  5. L-Ispirtu jneħħi l-biża’ mill-Appostli.  Kapaċi aħna wkoll noħorġu bla biża’ nxandru l-Mulej fil-postijiet tax-xogħol, fid-djar u fis-soċjetà tagħna?
Id-Djalogu

Ejja, Spirtu s-Santu,

neħħi minna l-biża’

ħalli nxandru bla waqfien

il-qawwa ta’ Alla f’ħajjitna u fis-soċjetà tagħna.

 

read more

F’IDEJKOM – Tlugħ il-Mulej fis-Sema – Sena A – 24 ta’ Mejju 2020

May 16, 2020

Tlugħ il-Mulej fis-Sema

F’IDEJKOM

Atti 1:1-11, Salm 46; Efesin 1:17-23; Mattew 28: 16-20

 

Il-Vanġelu

Ġesù jagħti l-missjoni lill-appostli

Tlugħ il-Mulej fis-sema – Pietro Perugino

Il-ħdax-il dixxiplu telqu lejn il-Galilija u marru fuq il-muntanja fejn kien ordnalhom Ġesù.  Kif rawh, nxteħtu quddiemu, għalkemm xi wħud iddubitaw. Ġesù resaq ikellimhom u qalilhom: “Lili ngħatat kull setgħa fis-sema u fl-art. Morru, mela, agħmlu dixxipli mill-ġnus kollha, u għammduhom fl-isem tal-Missieru ta’ l-Iben u ta’ l-Ispirtu  s-Santu, u għallmuhom iħarsu dak kollu li ordnajtilkom jien.  U ara, jiena magħkom dejjem, sa l-aħħar taż-żmien.”

 

Il-Ħsieb

U ara, jiena magħkom dejjem, sa l-aħħar taż-żmien.
Il-Mulej tela’ fis-sema.  Ħalliena waħedna?  Le, iżda qed jafda aktar fina dak li Huwa ġie biex jgħallem fuq din l-art.  Ħalla f’idejna mhux biss biex naċċettaw jew le l-fidi tagħna iżda wkoll biex inwasslu din l-aħbar tajba ta’ salvazzjoni lill-ġnus.  Mhux talli mhux ser iħallina orfni, talli l-Mulej jwiegħed solennement li huwa magħna dejjem sa l-aħħar taż-żminijiet.  Għaliex allura nibżgħu?  Għaliex jonqsilna l-kuraġġ?  Għaliex naħsbu li ninsabu waħedna; xi kultant ngħidu li anki Alla nsiena?  Hija l-opra ta’ satana  li jipprova joħloq fil-bniedem sfiduċja totali fih innifsu u fil-qawwa li jagħtina l-Mulej fis-Sagramenti.

Huwa Ħadd fejn irridu nirriflettu kemm aħna kuraġġużi fix-xandir tal-fidi tagħna.  Kemm tassew aħna lesti nimpenjaw ruħna fis-soċjetaÏ biex inxandru din l-aħbar it-tajba kullimkien?  Nibdew mill-ambjent tal-familja tagħna, tax-xogħol, studju, divertiment; kull ħin hu mument tajjeb biex inxandru l-fidi tagħna.

Il-Kelma

L-Ewwel qari tal-lum, meħud mill-Atti ta’ l-Appostli, jirrakkonta t-tlugħ tal-Mulej fis-sema u juri r-responsabbiltaÏ tad-dixxipli li jridu jagħtu xhieda tiegħu sa truf l-art.  Fis-Salm Responsorjali tal-lum, għandna stedina biex nuru l-ferħ tagħna li Kristu tela’ fis-sema biex joqgħod fuq il-lemin tal-Missier.  Fl-Ittra lill-Efesin għandna naraw lil San Pawl juri lill-Insara  b’liema ġieħ ġie gglorifikat Sidna Ġesù Kristu permezz tal-Missier.  Naraw kemm tassew is-salvazzjoni tad-dinja hija opra kontinwa tat-TrinitaÏ.  Fil-Vanġelu għandna t-tlugħ ta’ Ġesù fis-sema iżda wkoll il-kmand ta’ Ġesù lid-dixxipli biex imorru jħabbru u jgħallmu.

Il-Ħajja
  1. Aħna l-Insara ma nistgħux nibqgħu reqdin.  Hemm bżonn li nqumu min-ngħas.  M’aħniex waħedna.  Ġesù bagħatna nxandru. X’qegħdin nagħmlu biex nuruh li fhimna xi jrid minna?
  2. Ma nistgħux inxandru jekk qabel ma nkunux nies li kontinwament  nitgħallmu u nikbru fil-Kelma ta’ Alla.
  3. Qatt ma għandna nibżgħu li aħna waħedna.  Il-Mulej magħna sa l-aħħar taż-żminijiet.
  4. Kuraġġ!  Hemm bżonn li nxammru l-kmiem u nidħlu naħdmu fl-għalqa tal-Mulej.
Id-Djalogu

Għinni, Mulej,

biex inxandar il-Bxara t-Tajba mal-Ġnus.

Għinni biex ma nibżax u ma naqtax qalbi.

read more

JEKK TĦOBBUNI… – Is-6 Ħadd tal-Għid – Sena A – 17 ta’ Mejju 2020

May 16, 2020

Is-6 Ħadd ta’ l-Għid

JEKK TĦOBBUNI….

Atti 8: 5-8,14-17; Salm 65;  1 Pietru 3,15-18; Ġwanni 14:15-21

Il-Vanġelu

Ġesù jwiegħed l-Ispirtu s-Santu

“Jekk tħobbuni, ħarsu l-kmandamenti tiegħi. U jiena nitlob lill-Missier, u hu jagħtikom Difensur ieħor biex jibqa’ magħkom għal dejjem, l-Ispirtu tal-verità, li d-dinja ma tistax tirċevih, għax hija la tarah u lanqas tagħrfu. Iżda intom tagħrfuh, għaliex jgħammar magħkom, u huwa fikom. Ma nħallikomx iltiema. Nerġa’ niġi għandkom. Ftit ieħor, u d-dinja ma taranix aktar. Iżda intom għad tarawni, għax jiena ngħix, u intom ukoll għad tgħixu. F’dak il-jum intom tagħrfu li jiena f’Missieri, u intom fija u jiena fikom. Min iżomm il-kmandamenti tiegħi u jħarishom, dak hu li jħobbni; u min iħobb lili, iħobbu wkoll il-Missier, u jiena wkoll inħobbu u nurih lili nnifsi.”

 

Il-Ħsieb

Il-Kliem tal-Mulej huwa ċar.  Kemm hawn minna li aħna konvinti li aħna ta’ Kristu, li ngħidu li lesti nagħmlu kollox għalih?  Il-Mulej jitkellem ċar meta joffri proposta tiegħu għal dawk li jgħidu li jħobbuh.  Min iħobbni jħares il-KMANDAMENTI TIEGĦI.  Ma tistax tgħid li jiena ta’ Kristu, li jiena nħobb lil Kristu imma…

“U jiena nitlob lill-Missier.”  M’aħniex weħidna.  Il-Mulej huwa magħna u qiegħed jitlob lill-Missier għalina jekk aħna nagħtu xhieda tiegħu.  Għal dan il-għan hemm bżonn li aħna, minkejja d-dgħufija tagħna, irridu nafdawh, nirreċiprokaw il-fiduċja li tana.  Huwa għalhekk li l-kristjaneżmu huwa dejjem diffiċli li tgħixu ġurnata wara oħra.  Huwa għalhekk li f’dawn il-Vanġeli tal-Ħdud ta’ l-Għid, il-Mulej, filwaqt li jiftħilna għajnejna, jimliena bil-kuraġġ vojt ta’ ħafna kliem fieragħ, iżda kuraġġ li jinbena proprju fuq il-ħtieġa li ngħixu jum wara jum il-kristjaneżmu tagħna…

Ġesù jtenni li qatt m’hu se jħallina ltiema, qatt ma aħna waħedna, m’ għandniex minn xiex nibżgħu.  Hemm bżonn li l-Mulej jiftħilna l-qalb imbeżżgħa tagħna biex bil-kuraġġ inħabbru l-qawmien tiegħu li jidher fl-għajxien ta’ ħajjitna.

Il-Kelma

Fl-Ewwel Qari tal-lum, meħud mill-Ktieb ta’ l-Atti ta’ l-Appostli, għandna l-evanġelizazzjoni ta’ Filippu fis-Samarija.  Filippu jħabbar u jwettaq l-għemejjel ta’ fejqan li jsiru bis-saħħa ta’ dak Kristu li qam mill-imwiet.  Fis-Salm Responsorjali għandna għanja ta’ tifħir lill-Mulej li tana l-Ispirtu s-Santu biex isaħħaħ fina l-fidi u l-għajxien ta’ l-istess fidi.  Fit-Tieni Qari tal-lum, meħud mill-Ewwel Ittra ta’ San Pietru, għandna t-twissijiet kif l-Insara għandhom iġibu ruħhom quddiem il-persekuzzjonijiet.  San Pietru jenfasizza li hemm bżonn li l-Insara jkollhom tagħlim sod biex ikunu kapaċi mhux biss iwieġbu iżda wkoll jissaħħu fil-fidi.

Fil-Vanġelu tal-lum, meħud minn San Ġwann, għandna r-rakkont li fih Ġesù jkompli jsaħħaħ id-dixxipli tiegħu u jtennilhom li, min iħobbu, għandu juri tassew li huwa miegħu bil-fatti.

Il-Ħajja

1.  Hemm bżonn li nkunu nafu aħjar it-tagħlim tal-fidi tagħna.  Hemm bżonn li nkunu tassew familjari mal-Katekiżmu tal-Knisja Kattolika li huwa wieħed.

2.  Irridu ngħixu b’konvinzjoni l-fidi tagħna.  M’ għandniex nibilgħu dak li nisimgħu jew naqraw.  Għandna nirrifjutawh jekk ma jaqbilx mat-tagħlim tagħna.  Għandna r-responsabbiltaÏ li niftħu għajnejn ħutna li għadhom jibilgħu kollox.

3.  Hemm bżonn li l-Insara b’kuraġġ joħorġu aktar fil-beraħ fis-soċjeta tagħna.  Ma nibżgħux minn persekuzzjonijiet li jistgħu jiġu minn kullimkien, anki mill-media.

read more