Id-Diskors tal-Muntanja.

Il-laqgħa bdiet b’talba u mbagħad inqara l-Vanġelu minn San Mattew, kapitlu 5, versi 1 – 12 – il-Beatitudnijiet.  Wara, kulħadd ġie mistieden biex isemmi kelma jew frażi li tkun laqtitu mis-silta.

Dan il-Vanġelu, imsejjaħ tal-Beatitudnijiet, jagħmel parti mid-Diskors tal-Muntanja (Mattew kap 5 – 7).  Dan huwa l-magna karta ta’ Ġesu’, speċi ta’ mission statement tiegħu – x’kien jaħseb, x’kellu f’qalbu, x’kienu l-prinċipji tiegħu.    Prattikament huma l-linji gwida ta’ dak kollu li jagħmel bniedem nisrani.

Ġesu huwa Mose’ il-ġdid.  Mose’ tela’ fuq il-muntanja u ġab il-twavel tal-Liġi, li l-Lhud kienu jsegwu b’reqqa kbira.  Ġesu’, fid-diskors tal-muntanja, jipperfezzjona u jġedded il-Liġi.  Flok sensiela ta’ liġijiet, dan id-diskors jiġbor it-tagħlim kollu ta’ Ġesu’.  Huwa attitudni ġdida tan-nisrani.  Ġesu’ qed jgħidilna biex inkunu ferħanin.  Kull sentenza tibda bil-kelma “henjin”.

Imbagħad ġiet irrakkuntata l-ġrajja ta’ missjunarju li mar il-missjoni biex jiftaħ sptar.  Meta bdew ġejjin il-pazjenti, kien hemm tlieta li, meta ġew f’kuntatt mal-missjunarju, iddeċidew li jitgħammdu.  Xi ġimgħat wara, l-missjunarju mar fil-villaġġ ta’ wieħed minnhom u sab li dan kien għadu jipprattika r-reliġjon pagana.  Meta staqsieh għaliex kien qed jagħmel hekk, dan qallu li hu nisrani meta jkun l-isptar, imma fil-villaġġ jieħu kontroll alla tagħhom.  Forsi aħna ħafna drabi mhux hekk nagħmlu?  Qalbna marbuta wisq mal-postijiet.  Aħna nsara meta mmorru l-quddies, meta nattendu għal-laqgħat, imma mbagħad meta nkunu fuq ix-xogħol, fil-hajja miżżewwġa?  Donnu l-ħajja tagħna nisranija maqsuma f’dawn il-ħafna kompartimenti.  Dawn il-beatutnijiet jgħinuna biex ħajjitna ma tkunx hekk, imma jgħaqqdu flimkien il-ħajja tagħna ta’ kuljum mal-ħajja spiritwali.  Juruna kif ngħixu ħajjitna, x’inhi l-kuntentizza vera.

Wara din l-introduzzjoni, reġa’ nqara il-Vanġelu u bdiet id-diskussjoni fuqu.

“Ġesu’ tala’ fuq il-muntanja, qagħad bilqiegħda, u resqu lejh id-dixxipli tiegħu”.  Ġesu’ mar fil-beraħ, f’post pubbliku, biex juri li kulħadd kien mistieden.  Wieħed kitteb Franċiż, Gilbert Cesbron, qal hekk dwar dan it-tagħlim ta’ Ġesu’:  “Għalija dan huwa l-iktar kitba mportanti fl-istorja tal-umanita’.  Huwa ndirizzat għall-bnedmin kollha, dawk li jemmnu u dawk li le, u wara għoxrin seklu huwa l-uniku dawl li jiddi f’tant dlamijiet ta’ vjolenza, biża’ u solitudni li fih tinsab id-dinja minħabba s-suppervja u l-egoiżmu.”

Għal min irid jibda jaqra l-Bibbja, id-Diskors tal-Muntanja hu l-post idejali minn fejn jibda, għax jitkellem dwar dak kollu li jagħmilna bnedmin.  Dan id-diskors jgħodd għal kulħadd.  Kieku kulħadd iħenn, iġib il-paċi, kieku d-dinja tkun ferm aħjar milli hi.

Wara bdiet diskussjoni fuq il-frażi “Ħenjin il-foqra fl-ispirtu”.  Aħna mdorrijin li d-dar hija tiegħi, dik il-biċċa art hija tiegħi, imma dawn il-foqra x’saltna għandhom?  Għandhom is-saltna t’Alla, li tiġi meta aħna ma nkunux marbutin ma’ dak li għandna, mal-prinċipji tagħna, mas-suppervja u l-kburija.  Ma rridux insiru allat tagħna nfusna.  Irridu nintelqu f’idejn Alla u s-Saltna tingħatalna minn issa.

“Ħenjin dawk li jġibu l-paċi”  Xi tfisser il-paċi nisranija?  Hi dik li tibda minn dawk ta’ madwarek.  Id-differenza bejn paċi ta’ żewġ pajjiżi li kienu fi gwerra u l-paċi nisranija hi li l-ewwel waħda hi paċi ta’ konvenjenza, filwaqt li l-paċi nisranija hi dik tal-qalb.

Imbagħad saret riflessjoni fuq post fejn hemm il-paċi – iċ-ċimiterju.  Il-mejtin ma jiġġieldux.  Ma rridx inkun mejjet ħaj.  Għandna ħafna mudelli: Gandhi, il-papiet, il-martri.  Dawn ġabu l-paċi għax kienu ħajjin.  Jekk ma nifhmux xi tfisser il-paċi ta’ Kristu ma nistgħux niżirgħuha f’dawk ta’ madwarna u f’kull mument ta’ ħajjitna – fid-divertiment, fil-familja, fuq ix-xogħol.  Jekk moħħni biss biex intaqqtaq, nipponta sebgħi, nikkritika, inkun mejjet ħaj.  Il-paċi ma tfissirx li għalik xejn mhu xejn, li ma tiftaħx ħalqek, imma li titkellem permezz tal-għajnuna tal-Ispirtu s-Santu li twettaq ir-rieda t’Alla f’kull minuta.  Din hi l-veru paċi tal-qalb, minkejja d-diffikultajiet li jista’ jkollok.

“Ħenjin intom li jippersegwitawkom”  F’dawn il-mumenti, minħabba l-idejat tiegħek, ħaddieħor jista’ jwaqqek għaċ-ċajt, għax ma tużax ċertu kliem, għax tpoġġi l-familja qabel il-flus, għax għandek prinċijpji nsara, għax tieħu x-xogħol bis-serjeta’ u ma tiskartax, għax tattendi laqgħat, għax toqgħod attent x’tara fuq l-internet, għax taħfer.  F’dawn il-mumenti tkun ippersegwitat minħabba l-prinċijpji nsara.

Għal min irid imaqdar, dawn il-Beatutnijiet jidher li fihom ħafna kontradizzjonijiet – kif tkun fqir u jkollok saltna, kif tkun bil-ġuħ u mxabba’?  Jaqrahom min jaqrahom, jekk dak li jkun jipprova jagħmilhom tiegħu, xorta se jħossu kuntent, għax jitkellmu fuq dak li jagħmel persuna bniedem.  Kieku d-dinja tkun perfetta!  Jekk trid tgħix tajjeb u timxi fuqhom, ikollok il-kuntentizza vera.

Aħna nitkellmu dwar min jippersegwitana, imma rridu noqogħdu attenti li ma nkunux aħna li nippersegwitaw li ħaddieħor – meta niġġudikaw, inqassqsu, nisirqu minn fuq ix-xogħol, nagħtu eżempju ħażin lit-tfal, innikktu bil-kliem vojt, inħarrxu lil ħaddieħor b’għemilna, intellfu l-paċi, indafflu fellus f’ras dak li jkun.  Aħna bħala nsara għandna responsabbilta’ kbira.

Imbagħad issemma’ il-Ġublew tal-Ħniena.  L-enfasi hi fuq il-ħniena li ġġib il-maħfra.  Fil-parabbola tal-Iben il-Ħali, il-missier ħafer lill-ibnu li għamillu nsult pubbliku.  Li titlob għal min għamillek id-deni mhix faċli.  Imma hemm issib il-vera paċi tal-qalb.

X’inhu dak li jagħmel persuna ħienja?  Issemma’ l-papa Ġwanni Pawlu 1 – il-papa tat-tbissima.  Dan qal “It-tama t’Alla tagħti s-serenita’ tal-qalb għaliex il-pjan ikun dak ta’ Alla għalina u mhux bil-kontra.”  Irridu nagħmlu tagħna dak li hu ta’ Ġesu’.  Jekk nimxu fuq dan id-diskors tal-muntanja jkollna aktar ħeġġa biex nagħmlu affarijiet li forsi waħedna ma nagħmluhomx.

Fl-aħħar saret riferenza għall-festa tal-qaddisin kollha u tal-erwieħ li mxew fuq dawn il-linji gwida tal-beatutnijiet.  Filwaqt li l-kmandamenti jgħidulna x’mgħandniex nagħmlu, il-beatutdinijet jiggwidawna dwar x’għandna nagħmlu.

Il-laqgħa ntemmet bil-kwotazzjoni ta’ C.S. Lewis: “The stamp of the saint is that he can waive his own rights and obey the Lord Jesus.”

Evanġelju ta’ San Mark 10,46-52.

Bħalissa qegħdin naqraw mill-evanġelju ta’ San Mark Kapitlu 10 fejn Ġesù flimkien mad-dixxipli tiegħu qiegħed miexi lejn Ġerusalemm. Fl-evanġelju tal-lum tissemma l-belt ta’ Ġeriko. It-triq minn Ġeriko għal Ġerusalemm kienet prattikament deżert tal-blat u d-distanza kienet li persuna b’saħħitha tieħu xi tmien sigħat biex timxiha. Mhux faċli għalhekk timmaġina lil Ġesù għaddej minn dan l-ambjent ostili jipprietka u jfejjaq. Fl-evanġelju ta’ San Mark dan huwa l-aħħar miraklu qabel ma jidħol Ġerusalemm; il-fejqan tal-għama ta’ Ġeriko. Interessanti li fl-evanġelju ta’ San Mark biss insibu l-isem ta’ dan l-għama; kien jismu Bartimew.

Ġesù ma kienx qiegħed waħdu fit-triq imma kien hemm kotra kbira ta’ nies miexja, kulħadd miexi lejn Ġerusalemm. Fost din il-kotra kbira ta’ nies, anonimi; kien hemm wieħed tallab għama jismu Bartimew. X’kellu speċjali dan l-isem? Kellu isem u kien qiegħed mal-ġemb tat-triq. Meta  sema’ li kien ġej Ġesù beda jgħajjat u jgħid: “Ġesù Bin David ikollok ħniena minni.” Dan ir-raġel kien probabbli li sema’ fuq Ġesù. Ħafna bdew isikktuh imma hu aktar beda jgħajjat sakemm ġibed l-attenzjoni ta’ Ġesù. Ġesù waqaf u staqsieh xi jrid. Interessanti li kif Ġesù staqsieh xi jrid in-nies ta’ madwaru ma baqgħux jgħajjtu miegħu imma bdew jgħidulu biex jagħmel il-qalb. Din tiġri kemm-il darba fil-ħajja tagħna meta pereżempju niġġudikaw lil xi ħadd fuq l-ewwel impressjoni imbagħad wara kelma ta’ xi ħadd inbiddlu l-ideja tagħna fuq dik il-persuna. Ġesù reġa staqsieh xi jrid u wara li l-għama qallu li jixtieq jerġa jara. Ġesù qallu: “Mur, il-fidi tiegħek fejqitek.” Interessanti li din il-persuna baqgħet miexja wara Ġesù.

Nistgħu naqsmu dan il-miraklu fi tliet stadji:

• L-Għajta. Nistgħu niddeskrivuha bħala fittaġni u wiċċ tost għaliex l-għama kien qiegħed jissikka lil Ġesù sabiex ifejqu. Però dan l-evanġelju juri r-realtà tagħna llum għaliex juri t-talb tagħna xi jfisser. It-talb ifisser dak kollu li aħna nagħmlu u ngħidu. Dan l-għama ried il-fejqan u nsista ma’ Ġesù għal dan il-fejqan. Nistaqsu lilna nfusna: Jiena u inti kemm għandna ħin biex nitolbu? Triq iddaħħalha it-talb bħala parti minn ħajtek. Kemm qed nittratta ħin kuljum biex nitlob? Kulħadd jista’ jsib ħin biex jitlob jew jaqra xi ħaġa spiritwali. Ir-relazzjoni tal-għajta tagħna ma’ Ġesù trid tinbena ftit ftit. Meta jkun hemm xi ħaġa li Ġesù jkun jaf li mhix għall-ġid tiegħu, huwa se jagħtini anke sinjali għaliex mhux se jagħtihieli. Il-problema hija n-nuċċali tal-fidi tagħna. Xi kultant il-fidi tagħna hija bħal meta jittappan in-nuċċali tagħna u ma nibqgħu naraw xejn.

“Il-fidi tiegħek fejqitek.” Din is-sentenza hija qawwija, il-fidi mhix faċli. Hemm bżonn li l-fidi nrawwmuha ġewwa fina, anke meta ngħaddu minn żminijiet li m’għandix aptit nitlob. Tinsiex li meta tipprova tagħmel xi ħaġa tajba ħa ssib mill-ewwel xi ħadd li jipprova jkissrek; mill-ewwel u bil-fatti.

Fil-folla ta’ quddiem Ġesù kulħadd kellu l-bżonnijiet, però kien wieħed li kellu l-kuraġġ jgħajjat jgħajjat għall-għajnuna. Kien jaf li hu xi ħadd speċjali għaliex qallu Bin David, u anke sejjaħlu Rabbuni, mgħallem. Irridu nifhmu li dan ir-raġel għamel il-pass importanti li staqsa lil Ġesù. Għandna l-kuraġġ li niffittaw lil Ġesù f’fidi? Bartimew kellu l-fidi li tgħajjat u taġixxi. Ma rridux noqogħdu b’idejna marbuta. Ġesù qiegħed hemm għalina imma aħna rridu nagħmlu l-parti tagħna.

Nirriflettu wkoll li aħna rridu wkoll ngħinu lil min jitlobna l-għajnuna jew naraw li għandhom bżonn.

Nitolbu wkoll lill-Mulej li jdawwarna b’nies li jgħinuna ninbidlu. Ma nistennewx li nbiddlu lil dawk ta’ madwarna biex jiġu jaqblu magħna imma mportanti wkoll li naraw kif nistgħu ninbidlu aħna sabiex aktar naqblu ma’ dawk ta’ madwarna.

Il-fatt li dan ir-raġel talab l-għajnuna turi wkoll l-umiltà tiegħu.

• Il-Fejqan. Minħabba li Ġesù huwa mimli ħniena, huwa fejjqu. Meta dan ir-raġel ra li hemm il-grazzja lesta għalih, huwa neħħa l-mantar minn fuqu u ġera lejn Ġesù.

Kull darba li nirċievu l-Ewkaristija, aħna qegħdin nirċievu lil Ġesù fina. Kemm għandna fidi f’dan Ġesù li jkun preżenti fina? Ejjew naħsbu kemm l-Ewkaristija hija xi ħaġa kbira. Għaliex immorru l-quddiesa ġimgħa wara ġimgħa u nibqgħu l-istess?

• Il-Gratitudni. Dan l-għama imfejjaq beda jara u beda jimxi wara Ġesù fit-triq. Wara li fieq huwa rringrazzja lil Ġesù u baqa’ miexi warajh. Irridu nkunu grati meta naqilgħu xi ħaġa li nkunu tlabna u anke meta naqilgħu l-affarijiet tajba li forsi ma nkunux tlabna għalihom. Ejjew napprezzaw l-affarijiet li għandna li forsi niħduhom ‘for granted’ bħad-dawl elettriku, l-ilma, id-dar fejn noqogħdu, il-familja, il-karozza, l-iskola u l-edukazzjoni eċċ.

Tajjeb li nagħmlu ma’ ħaddieħor it-tajjeb li aħna stess inkunu qlajna. B’hekk inkunu qegħdin inħaddmu l-fidi tagħna; b’affarijiet tanġibbli. Il-ġesti żgħar tal-ħajja tagħna huma mera tal-ħajja  u l-fidi tagħna.

Kwotazzjoni: Ġesù qatt ma ddejjaq li jkun mal-marid:

“Aħjar Knisja mweġġa’ u maħmuġa għax toħroġ fit-toroq milli Knisja magħluqa.” Papa Franġisku

Fil-laqgħa tas-16 t’Ottubru ta’ Prayer Café trattajna l-vanġelu mid-disgħa u għoxrin Ħadd ta’ Matul s-sena B mehud mill-vanġelu ta’ San Mark 10:35-45, vanġelu li jitratta kif min imexxi għandu jkun lest li jaqdi u jservi lil oħrajn.Wara l-qari tal-vanġelu nqasmu diversi punti dwar it-tifsira ta’ dan il-vanġelu. Dawn huma xi uħud minnhom.

Santu Wistin kien jgħid “ Alla li ħalqek mingħajr permess tiegħek irid l-għajnuna tiegħek biex isalvak”. Ħadd ma talab biex jitwieled imma jekk rridu nsalvaw irridu nikkoperaw mal-messaġġ li tana l-Alla permezz Kristu. Qegħdin ngħixu f’soċjeta fejn naħsbu li huwa dritt ta’ kull individwu li jagħmel dak li jrid – pero jekk se nagħmlu l-ħażin se nħallsu għalih irridu jew le.

Fil-vanġelu ta’ nhar il-Ħadd nsibu: “ min irid ikun kbir fostkom, għandu jkun qaddej tagħkom, u min irid ikun l-ewwel fostkom, għandu joqgħod ilsir ta’ kulħadd.” Paradoss fis-soċjeta tal-llum. Kif nikmanda u nkun skjav? Skond il-vanġelu il-kap għandu biss dmir wieħed ..li jaqdi u jiffaliċita l-ħajja ta’ l-oħrajn. Aħna lkoll skjavi- skjavi tad-dnub u ĠESU biex isalvana “sar skjav tal-iskjavi kollha.” Hu li ma kellu l-ebda ħtija kif jgħidilna San Pawl. Dan jurina kif meta naħsbu f’ħaddieħor biss nistgħu nsalvaw. Il-kontra li tgħidilna s-soċjeta moderna – l-ewwel jien, it-tieni jien, it-tielet jien u li jibqa’ għalija ukoll. Kunċett mxandar bil-mezzi tal-komunikazzjoni.

Fl-enċiklika tiegħu “Laudato Si”  Papa Franġisku jissuġġerilna nibdlu l-istil ta’ ħajjitna biex inħallu d-dinja aħjar milli sibnieha għal dawk ta’ warajna. Din hi sfida kbira fil-ħajja ta’ kuljum.

Il-Knisja llum ma għadx għandha l-kollaborazzjoni tal-Istati. Qabel l-Istati ma kienux jaddu liġijiet kontra l-morali jew kontra l-liġi tan-natura. Imma llum ħafna mill-politikanti jaddu l-liġijiet biex jaħsbu għal rashom … jaħsbu biex ma jitilfux il-poter u hekk nsibu li bl-iskuza tad-drittijiet tal-minoranzi dejjem jaddu liġijiet li jiddefendu l-minoranzi.  Aħna wkoll bħala nsara kattoliċi kif kien itenni Mons Pawlu Cremona u anke issa Mons Scicluna sirna minoranza. Allura aħna ma għandniex drittijiet? Qegħdin ngħamlu ħilitna biex ninstemgħu? Kardinal Sarah, Afrikan u president tal-pontifiċju tad-dutrina tal-fidi waqt is-Sinodu li għaddej qal li bħalma fis-seklu li għadda kien hemm il-faxxizmu issa erġajna għaddejjin minn krizijiet oħra imma taħt forma oħra.

Għadna nuru li aħna nsara f’kwalunke sitwazzjoni? Kemm aħna lesti li nsofru biex inwasslu lil Kristu lil oħrajn?  Papa Franġisku qiegħed jagħmel ħiltu biex jiġbed lura dawk li huma ‘l barra mill-knisja. Anke Papa Benedittu XVI kien waqqaf grupp bl-isem “Il-bitħa tal-Ġentili” fejn kien jinħoloq djalogu għal dawk li kienu jħossuhom fid-dubju fuq it-twemmin tagħhom u li jkunu għadhom qed ifittxu l-verita.

Qaddisa ta’ żmienna – Mother Theresa – kienet għaddiet minn mumenti ta’ tbatija ukoll. Kienu l-perseveranza ,l-konvinzjoni u d-determinazzjoni tagħha li wasluha biex tippersevera ssaqsi lil Isqof biex jagħtiha permess twaqqaf is-soċjeta tagħha. Soċjeta li tgħin lil min hu fil-bżonn…mingħajr ,ma tħares la lejn kulur ,la lejn twemmin u lanqas politika.

Il-poter hija tentazzjoni għal kulħadd u x-xitan jattakana biex nagħmlu kompromessi. Aħna nsara konvinti? Jew qisna l-Farizej …minn barra nidhru li qed nosservaw il-liġi t’Alla imma mbagħad nqabblu fejn jaqblilna? Il-poter għandu l-ħila li jamina…jixtrina…Din hi l-ġlieda f’ħajjitna.

Fil-Vanġelu ta’ San Mark naraw li Ġesu jħabbar għat-tielet darba l-passjoni tiegħu.  Id-dixxipli ma fehmuhx.  anzi, ulied Żebedew u d-dixxipli l – oħra bdew ifittxu l-glorja.  Ġesu jurihom xi tfisser tmexxi.  Tagħmel sens biss jekk isservi.

Ġakbu u Ġwanni, ulied Żebedew, resqu lejh u qalulu: “Mgħallem, dak li se nitolbuk irriduk tagħtihulna.” It-talb tagħna kif inhu arroganti bħal ta’ dawn iż-żewġ dixxipli “irriduk tagħtihulna.” ? Llum ukoll nsibu min jistenna Gratifikazjoni Immedjata. Iż-żmien kif iħares lejh il-Mulej hu differenti minn kif inħarsu lejh aħna. Fil-ktieb ta’ Ġob nsibu : “ Nilqgħu t-tajjeb minn għand Alla allura t-tbatija ma nilqgħuhiex? ” Fl-omelija tas-16 t’Ottubru Papa Franġisku qal li t-talb hu l-qofol ta’ kollox. Meta nitolbu importanti li nkunu miftuhin għal Ispirtu biex dan idawwalna u naċċettaw ir-rieda t’Alla f’ħajjitna. Weħidna ma naslux.

Is-servizz li jitkellem fuqu Kristu huwa s-solidarjeta – solidarjeta mal-proxxmu – il-kmandamenti kollha jinġabru f’wieħed. “Ħobb lil Alla u lil għajrek bħalek innifsek.” Irridu nkunu solidarji ma kulħadd u ma nħarsux lejn l-uċuh jew twemmin. Biex naslu għal dan għandna bżonn tlett ingredjenti (i) Perseveranza (ii) Determinazzjoni (iii) Umilta (doza kbira ta’ Umilta).

Quote:

Tiżżewwiġx persuna li tista’ tgħix magħha imma persuna li ma tistax tgħix mingħajrha.

Il-laqgħa nngħalqet bit-talba tal-Missierna.

Nistednuk u nħeġġuk tingħaqad magħna  nhar il-Ġimgħa 23 Ottubru għal laqgħa oħra ta’ Prayer Cafe biex nkomplu nikbru fil-fidi tagħna.

It-Tmienja u Għoxrin Ħadd tas-Sena

Inqrat is-silta mill-Vanġelu ta’ San Mark, Kapitlu 10, versi 17 – 30, fejn l-evanġelista jgħidilna li mar fuq Ġesu’ wieħed jgħaġġel, niżel għarkobbtejh quddiemu u qallu: “Mgħallem tajjeb, x’għandi nagħmel biex nikseb il-ħajja ta’ dejjem?”  Interessanti l-fatt li fil-bidu tar-rakkont ma jissemmiex li dan kien raġel għani. Dan insibuh fl-aħħar tas-silta.

Ġesu, qabel ma tah risposta, staqsieh: “Għaliex qiegħed issejjaħli tajjeb?  Ħadd ma hu tajjeb ħlief Alla biss.”  Il-fatt li r-raġel indirizzah bħala mgħallem tajjeb turi li dan irrikonoxxa l-qawwa ta’ Ġesu’, li fit-tweġiba tiegħu stqarr id-divinita’ tiegħu.

Imbagħad kompla jgħidlu “Inti l-kmandamenti tafhom…”  L-istess bħal ma nafuhom aħna, imma ħafna drabi naħsbu li għax aħna ma noqtlux, ma nisirqux, allura hekk biżżejjed. Ma nidħlux fid-dettalji.  Kemm-il darba nistgħu noqtlu bi kliemna!  Kemm-il darba ngħiru u nixtiequ dak ta’ ħaddieħor!

U r-raġel wieġeb: “Mgħallem, jien dan kollu ili nħarsu minn żgħożiti.”  Wieġeb b’ċerta konvinzjoni li la darba kien jobdi l-kmandamenti u jħallas id-deċmi, allura kollox sew.

Imbagħad Ġesu’ xeħet fuqu ħarsa ta’ mħabba u qallu: “Ħaġa waħda tonqsok: mur, bigh li għandek, agħtih lill-fqar, u jkollok teżor fis-sema; imbagħad ejja u imxi warajja.  Imma għal dan il-kliem ir-raġel qarras wiċċu u telaq b’qalbu sewda, għaliex kellu bosta ġid.”  Ta’ min isemmi li għall-poplu Lhudi fi żmien Ġesu’, li tkun sinjur kien meqjus bħala privileġġ, għax hekk kienu jistgħu jgħinu lill-fqar u jħallsu d-deċmi.  Mhux bilfors li dan ir-raġel ħass weġgħa għax qalbu kienet marbuta wisq mal-ġid, imma għax ħaseb li jekk jagħmel hekk mhux se jkun jista’ jkompli jgħin.

Ġesu’ mbagħad dar fuq id-dixxipli tiegħu u qalhom: “Kemm hi iebsa għall-għonja li jidħlu fis-Saltna ta’ Alla…..”  L-għonja mhux bilfors tfisser dawk li għandhom bosta ġid.   Jistgħu jkunu s-suppervi, dawk li jħossuhom fuq kulħadd, li qalbhom marbuta mas-setgħa, li jgħaffġu l-oħrajn basta jilħqu huma.

Meta Ġesu’ qal lid-dixxipli tiegħu li eħfef li ġemel jgħaddi minn għajn ta’ labra milli wieħed għani jidħol fis-Saltna ta’ Alla, dawn staġgħbu wisq aktar, u bdew jgħidu wieħed lill-ieħor: “Mela min jista’ jsalva?”  Hawnhekk Ġesu’ jassigurhom li għal Alla kollox jista’ jkun.  Alla hu ħanin u jaqra fil-qlub.  Għal Alla xejn ma hu moħbi, la fis-sema u lanqas fl-art.

Fl-aħħar qabeż Pietru u qallu: “Tajjeb! Aħna ħallejna kollox u ġejna warajk”  U Ġesu’  jwieġbu u jgħidlu li l-ħlas għad ikun għal mitt darba iżjed, sa minn din id-dinja stess.  Imma ma dan kollu jżid il-kelma “persekuzzjonijiet”!  Meta nisimgħu din il-kelma ħafna drabi naħsbu fil-martri ta’ l-ewwel żminijiet tal-Knisja, imma r-realta’ hi li llum hawn ħafna nies li qed jiġu ppersegwitati u maqtula minħabba t-twemmin tagħhom.  Għandna napprezzaw il-liberta’ li nistgħu nitkellmu fil-miftuħ, u għalhekk għandna d-dmir li ma nibqgħux ħalqna magħluq u li ma nibżgħux nitkellmu fuq it-twemmin tagħna.  Il-persekuzzjonijiet huma wkoll “l-għaliex?” fil-ħajja tagħna: għaliex qed jiġri hekk meta tant nipprova nagħmel tajjeb? Għaliex, għaliex…Dan huwa mezz biex iressaqna lejn il-qdusija.

Nerġgħu nagħmlu riflessjoni fuq il-frażi “mur bigh kollox”  Fil-prattika dan mhux possibli.  Ma nistgħux nittraskuraw id-dmirijiet tagħna lejn il-familja, imma nistgħu naraw x’għandna bżonn tassew.  Kulħadd għandu r-realta’ tiegħu. Irridu nagħmlu għażliet u naraw x’nistgħu innaqqsu.  Jekk inħarsu lejn il-Papa, għandna ezempju ċar ta’ dan.  Qed jospita familji refuġjati fil-Vatikan, juża karozza komuni, ipprovda showers u hairdressers għan-nies bla dar.

Fl-aħħar tal-laqgħa saret riferenza għas-Sinodu fuq il-Familja.  Bħal issa l-membri qed jitqassmu fi gruppi skond il-lingwa.  Qed juru biss opinjonijiet u x’jixtiequ li jiġi diskuss.  Malta hi rrappreżentata mill-Isqof Mario Grech.  Qed jieħdu sehem 370 ruħ.  270 minn dawn huma isqfijiet u l-oħrajn awdituri, fosthom sorijiet u familji.  Hemm rappreżentanti mill-Kattoliċi Orjentali, u mill-Knejjes Ortodossi bħala osservaturi.  Kien hemm min ried li t-titlu tas-Sinodu jkun “Il-Ħajja taż-Żwieġ lejn il-Familja”, iżda l-Papa ma xtaqx hekk għax ried li jintlaħqu l-familji kollha.  Il-Knisja trid tkun miftuħa għal kulħadd.  Alla ma jikkundannax u ma jagħmilx tabelli.  Kulħadd hwa inkluż.

Fl-aħħar tal-laqgħa nqrat kwotazzjoni ta’ C.S.Lewis: “True humility is not thinking less of yourself.  It is thinking of yourself less”

Is-sebgħa u għoxrin Ħadd matul is-sena

“Dak li għaqqad Alla, ma għandux jifirdu l-bniedem”

Inqrat is-silta mill-Evanġelju skont San Mark (Mk 10, 2-16).  Dan il-Vanġelu jittratta fuq is-suġġett tad-divorzju.  Jurina kemm Ġesù ma kienx jimxi mal-kurrent imma kien jemmen fl-ugwaljanza bejn il-mara u r-raġel.  Dan ir-rakkont ġara fil-Ġudea u dak iż-żmien jekk mara tinqabad f’adulterju kienet tiġi mħaġġra. Fit-tieni vers, bħas-soltu, il-Fariżej jippruvaw jonsbu lil Ġesù billi staqsewh jekk raġel jistax jitlaq lil martu u mhux viċi versa għax l-irġiel kienu dominanti. Ġesù rrispondihom b’mistoqsija oħra: “X’ordnalkom Mose?” u jfakkarhom x’kien il-pjan oriġinali t’Alla, li “t-tnejn isiru ġisem wieħed” meta jiżżewwġu.  Mela dak li għaqqad Alla m’għandux jifirdu il-bniedem.   Mela Alla ried li ż-żwieġ ikun komunita’ ta’ imħabba u bħala persuni indaqs u mhux f’pika bejniethom.  Alla ried li din tkun xbieha ħajja tal-imħabba tiegħu, personali u sħiħa.

Il-Vanġelu jkompli li meta marru lura d-dar d-dixxipli komplew jiddiskutu fuq id-divorzju. Anke d-dixxipli sabuha diffiċli biex jifhmu l-Ġesù.  Infatti qalulu  “Mela ladarba din hi l-kundizzjoni tar-raġel mal-mara, ma jaqbilx li wieħed jiżżewweġ.” Għax huma riedu li r-raġel dejjem ikun minn fuq! Iżda Hu qalilhom: “Mhux kulħadd jifhimha din il-ħaġa, imma dawk li lilhom jingħata, jifhmuha..

Ġesù uriehom ukoll li bil-miġja tiegħu l-bidla mill-qiegħ fil-qlub tal-bnedmin setgħet isseħħ.  Bi Kristu, l-bnedmin setgħu jibdew iħobbu bħal Alla.  Għal dawk li jingħaqdu ma’ Kristu, iż-żwieġ sar Sagrament, jiġifieri sinjal li jurihom lil Kristu fosthom u jagħtihom il-ħajja u l-imħabba tiegħu. Dan ifisser li mhux x’ħin tiddejjaq fiż-żwieġ taqbad u titlaq għax iż-żwieġ huwa Sagrament. Dan ma jeħlisniex mill-iżbalji, mid-difetti fil-karattru, mill-inkwiet, il-mard u d-dwejjaq. F’ċirkostanzi diffiċli bħal dawn l-akbar prova hi li nħobbu xorta waħda lil xulxin bħal Kristu bħalma nsibu fl-ittra ta’ San Pietru (2:23-24) “meta għajjru lil Ġesù ma weġibx bit-tgħajjir, meta bata ma heddidx”. Jekk il-miżżewġin jagħrfu jħobbu bħalu, b’dan il-mod, huma jaraw iż-żwieġ tagħhom jissaħħaħ, kif iwegħdu fir-rit taż-żwieġ “fir-risq tajjeb u l-ħażin, fil-mard u fis-saħħa”.

Il-Papa Franġisku, fit 2 t’April tas-sena l-oħra qal hekk “biex tagħmlu paċi m’hemmx bżonn iċċemplu lill-Ġnus Magħquda biex jiġu huma d-dar ħalli tagħmlu paċi.  Biżżejjed ġest ċkejken, żegħila, tislima!  U nkomplu l-għada!  U għada nibdew mill-ġdid.  U din hi l-ħajja, hekk irridu mmexxuha ’l quddiem, nimxu ’l quddiem bil-kuraġġ li rridu ngħixuha flimkien.  Tliet kelmiet li għandna ngħiduhom dejjem fid-dar tagħna huma: jekk jogħġbok, grazzi, skużani”.  It-tliet kelmiet maġiċi, jgħid il-Papa.

B’dawn it-tliet kelmiet, bit-talb tar-raġel u l-mara għal xulxin, billi nagħmlu paċi dejjem qabel tintemm il-ġurnata, iż-żwieġ jimxi ’l quddiem.

F’udjenza ġenerali  oħra li saret f’ April ta’ din is-sena il-Papa Franġisku jħeġġiġna biex ma nibżgħux nistiednu lil Ġesù għall-festa tat-tieġ. “Ma nibżgħux nistednuh fid-dar tagħna, biex ikun magħna u jħares il-familja tagħna.” Eku mill-kliem qawwi tal-qaddis Papa Ġwanni Pawlu II li kien qal: “Spalancate le porte a Cristo”. Iftħu l-bibien ta’ qlubkom beraħ għal Kristu!

Kompla jgħidilna biex ma nibżgħux nistiednu wkoll lil Ommu Marija. Fi kliem Papa Franġisku, l-Insara, meta jiżżewġu “fil-Mulej”, jinbidlu f’sinjal effikaċi tal-imħabba ta’ Alla.  L-Insara ma jiżżewġux biss għalihom infushom: jiżżewġu fil-Mulej għall-ġid tal-komunità kollha, tas-soċjetà kollha kemm hi.

Fl-aħħar tal-Vanġelu, Ġesù jgħid lit-tfal biex jersqu lejH.  F’dak iż-żmien, it-tfal kienu meqjusa l-inqas importanti fis-soċjetà Lhudija.  Iżda Ġesu jgħid “Tassew ngħidilkom, li min is-Saltna ta’ Alla ma jilqagħhiex b’qalb ta’ tifel ċkejken, ma jidħolx fiha ”. Irridu nemmnu fih u naċċettawh  bl-istess innoċenza tat-tfal.

Mid-diskussjoni tqajjmu xi punti interessanti:

Fuq it-tema taż-żwieġ, ġie mfakkar li dan ix-xahar ser ikun hemm is-Sinodu Straordinarju tal-Isqfijiet fuq il-familja.  Irridu noqgħodu attenti ħafna mill-midja minħabba t-tgħawwiġ u t-taħwid tal-fatti. Il-Papa, hu u ġej lura mill-Amerika kien mistoqsi mill-ġurnalisti rigward iż-żwieġ u d-divorzju. Hu kien ċar fir-risposta tiegħu: Iż-żwieġ huwa indissolibbli.

Niftakru li aħna ma nistgħux niġġudikaw, fuq ebda persuna, tkun xi tkun il-pożizzjoni tagħha: miżżewġa, divorzjata, omosesswali.  Alla biss jista’ jiġġudika, aħna nistgħu biss nitolbu għal dik il-persuna.

Anke rigward it-tfal tagħna.  Il-Mulej jrid li l-ġenituri jrabbu t-tfal sewwa.  Jekk dawn meta jikbru, jġibu ruħhom ħażin, il-ġenituri ma jaħtux.  Alla jiġġudika lit-tfal u mhux il-ġenituri, għax huma għandhom il-kuxjenza tagħhom.

Fl-aħħar inqrat kwotazzjoni li qalha l-Papa Franġisku fl-Udjenza Ġenerali fid 29 t’April ta’ din is-sena: “L-insara ma jiżżewġux biss għalihom infushom, jiżżewwġu fil-Mulej għal ġid tal-komunita’ kollha, tas-soċjetà kollha kemm hi”.

     Fl-ewwel laqgħa Prayer Cafè wara l-waqfa tas-sajf, ġie diskuss il-Vanġelu tas-26 Ħadd tas-Sena B (27 ta’ Settembru). Dan il-vanġelu għandu żewġ temi. L-ewwel jitkellem dwar it-tolleranza lejn dawk li avolja m’humiex id-dixxipli tiegħu, jagħmlu l-ġid f’ismu. Imbagħad Ġesù jitkellem dwar kundizzjonijiet li għandna nosservaw jekk irridu nidħlu fis-Saltna t’Alla.

     Dan huwa vanġelu attwali ħafna.  Ċerti nies fil-Knisja jew fi gruppi fi ħdan il-Knisja, iħarsu lejn dawk ġodda fil-grupp / knisja bħala xi ħaġa inqas, iktar il-bogħod minn Alla. Fil-Knisja ssib nies li huma nvoluti u ma jieħdux gost li xi ħadd ġdid jinvolvi ruħu. Din it-tip t’attitudni tagħmel il-ħsara u tbiegħed in-nies minn Kristu. Leader għandu jmexxi billi jservi. Il-Mulej għandu missjoni għal kulħadd u m’għandniex inkunu aħna li ntellfu lil xi ħadd mill-missjoni tiegħu. Aħna għandna nuru ospitalità lejn kulħadd – ikun min ikun. Jekk f’għajnejja bniedem ma jkunx sew, jien bħala nisrani għandi nilqgħu xorta u mhux nitkaża bih. Wara kollox, aħna kollha midinbin, taħt sema waħda. F’dan il-vanġelu Ġesù qed jgħidilna li aħna għandna naċċettaw it-tajjeb li ġej minn ħaddieħor, jiġi minn fejn jiġi, u jkun min jkun. It-tajjeb kollu tad-dinja mhux ġej biss minna l-kattoliċi.

     Aħna għandna nkunu ċerti li bl-azzjonijiet tagħna nqarrbu n-nies lejn Alla u mhux nbegħduhom minnu. Għalhekk importanti li ma niġġudikawx għax meta niġġudikaw, inbegħdu n-nies minn Alla. Aħna għandna nkunu nies li nibnu mhux li niġġudikaw, għax kif qal Ġesù “min mhux kontra tagħna, huwa magħna”. Fl-istess ħin għandu jkollna iktar sens ta’ komunità, għax meta nkunu komunità nkunu nistgħu nagħtu s-sapport lil xulxin.  Fl-isess ħin, ma nistax ngħin lil min hu magħna biss. M’għandiex inħares lejn l-uċuh imma lejn il-qlub.

     Fit-tieni parti ta’ dan il-Vanġelu, naraw li rridu noqgħodu attenti kif nġibu ruħna u x’ngħidu, għax nistgħu nagħtu “skandlu” u nagħmlu ħsara lil dawk li qed jarawna jew jisimgħuna u nbegħduhom minn Alla.

Mill-Katekiżmu tal-Knisja Kattolika:

“L-iskandlu hu atteġġjament jew imġiba li twassal lil ħaddieħor biex jagħmel dak li hu ħażin. Min jiskandalizza, ikun iġarrab l-għajru. Ihedded il-virtù u t-tjieba. Jista’ jwassal lil ħuh għall-mewt spiritwali, għall-mewt tar-ruħ. L-iskandlu hu ħtija serja jekk b’għemil jew nuqqas ta’ għemil iwassal lil xi ħadd ieħor biex jagħmel xi dnub gravi.”

“L-iskandlu jista’ jingħata ukoll mil-liġi jew mill-istituzzjonijiet, jew mill-moda jew mill-opinjoni pubblika. Huma għalhekk ħatja ta’ skandlu dawk li jagħmlu liġijiet jew jibnu strutturi soċjali li jwasslu biex ibaxxu l-imġiba morali tan-nies, jew iħassru l-ħajja reliġjuża,”

San Luqa Kap 17 Vers 1:

“Darba lid-dixxipli tiegħu qalilhom: “Ma jistax ikun li ma jingħatawx skandli; imma ħażin għalih min ikun ħtija tagħhom!”

     Għalhekk irridu noqgħodu attenti li ma nkunux aħna li nagħtu skandlu. Aħjar kelma nieqsa milli żejda. Bil-ħsieb jew mingħajr ħsieb, nistgħu nkunu ta’ skandlu għall-oħrajn. Għalhekk irridu nqaċċtu minn ġewwa fina u minn madwarna, dak kollu li jfixkilna. Għandna nitbeghdu minn xi ħaġa li nafu li tista’ twaqqana, jew xi darba waqqgħatna fid-dnub.

     Biex nagħmlu dan għandna bżonn, u għandna nitolbu lill-Ispirtu s-Santu, biex jgħinna nagħrfu t-tajjeb mill-ħażin. Kieku aħna l-Insara nagħtu kas iktar tal-Vanġelu u nimxu skont dak li hemm fih, kieku d-dinja hija ħafna aħjar minn dik li hi llum.

Tajjeb ukoll li nżommu f’moħħna dan il-vers mill-Ittra lill-Lhud, Kapitlu 12, Versi 1 u 2:

“Ejjew inwarrbu minna kull xkiel u kull dnub li malajr ifixkilna, u b’qalbna qawwija nibqgħu niġru t-triq tal-prova li għandna quddiemna; nżommu għajnejna merfugħa lejn Ġesù, li minnu tibda u fih tintemm il-fidi tagħna”

It-Tnax –il Ħadd matul is-Sena. Evanġelju ta’ San Mark 4, 35-41.

Kemm-il darba aħna jiġrilna bħall-appostli li Ġesù jkun qiegħed ħdejna imma aħna jidhrilna li mhux qiegħed jagħti kasna. Għalkemm nemmnu li qiegħed hemm aħna nimtlew bil-beżgħat tagħna. L-Appostli kienu jafuh ħafna imma xorta waħda iddubitaw mill-Messija, minn Ġesù. Ġesù però dar fuqhom u staqsiehom għaliex qegħdin jibżgħu.

Il-biżà hija ingredjent mill-ħajja tagħna, minn meta konna żgħar kellna ħafna beżgħat li biż-żmien inbidlu u mhux spiċċaw. Ilkoll kemm aħna ngħaddu minnhom u konxji wkoll li hemm il-Mulej lest biex jgħinna, però xorta waħda niddubitaw. Min-naħa l-oħra importanti li jkollna ftit riskju u sens ta’ avventura fil-ħajja tagħna. F’parti oħra tal-Evanġelju Ġesù jgħidilna: “Ejjew għandi inti li tinsabu mtaqqlin u mħabbtin u jiena nserraħkom.” X’inhi dik il-ħaġa li ttaqqalna u tħabbatna? Huma l-problemi tal-ħajja.

Kull ma nagħmlu fih il-problemi u r-riskju. F’dawn iċ-ċickustanzi rridu nemmnu, nemmnu bħalma jemmnu t-tfal; mingħajr ma jistaqsu għaliex. Il-fidi tagħna hija misteru imma rrid nafda u nemmen li l-Mulej qiegħed hemm lest biex jgħinni. Hu jaf x’inhu jiġri imma qiegħed jistenniena biex nitolbuh l-għajnuna. San Tumas kien qal li ħajjitna qisha bħal meta aħna qegħdin mexjin ma’ muntanja imma Alla qiegħed fil-quċċata u minn hemm jista’ jara t-triq li aħna qegħdin naqbdu. Aħna ma nistgħux inkunu ċerti mit-triq tagħna għaliex m’aħniex naraw eżatt x’hemm wara l-kantuniera imma Alla qiegħed jara kollox minn fuq.

Il-Mulej qiegħed mimdud fid-dgħajsa tagħna imma huwa jimpurtah minna.

Interessanti wkoll li naraw il-fidi qawwija tal-appostli f’dan Alla li huma kienu jgħixu miegħu. Huma kienu jafu li huwa Alla magħmul bniedem li kien kapaċi jwaqqaf it-tempesta. It-tempesti tal-ħajja tagħna huwa Alla li kapaċi jwaqqafhom. Dun Ġorġ Preca kien jgħid biex inkunu ‘ħbieb mal-Mulej’. Is-sagrament tal-Qrar, tar-Rikonċiljazzjoni jagħmel proprju dan, jerġa’ jħabbibna mal-Mulej. Bil-qrar nistgħu niksbu mill-ġdid din il-ħbiberija tagħna ma’ Alla. Ġesù fil-mirakli li għamel bħal tat-tifla li kienet mietet qal lil missierha sabiex jemmen u l-mirakli seħħ. Ġesù dejjem qal li l-fidi tagħna tfejjaqna. Ġesù jgħidilna li mingħajru ma nistgħu nagħmlu xejn.

In-nuqqas ta’ fidi jidher meta Ġesù deher wara l-qawmien lill-appostli. Pietru meta kien qiegħed jara lil Ġesù baqa’ f’wiċċ l-ilma imma meta ddubita beda nieżel. Tumas ukoll ried imiss b’idejh u jpoġġi jdejh fuq il-marki tal-imsiemer u fil-kustat. Dan in-nuqqas ta’ fidi tant weġġa’ lil Ġesù li  meta reġa’ deher ġimgħa wara reġa staqsa għal Tumas sabiex ikabbar fih il-fidi.

Ġesù qiegħed jgħidilna: “Jiena Hu, afdaw fija.” Ma jfissirx li l-problemi se nsolvuhom kollha jew b’mod sħiħ imma l-fatt li npoġġuhom f’riġlejn il-Mulej se jgħinna naffrontawhom.

Il-laqgħa nbdiet bill nqara l-Vanġelu tal-Ħadd 31 ta’ Mejju; Il-Festa tat-Trinità – Sena B: Mattew 28: 16-20. Wara ġie diskuss l-istess vanġelu. Ntqal li dan il-Vanġelu qed itina episodju li fih jispikka d-dubju. Wara tlett snin li Ġesù qatta mal-appostli, huma baqgħu jiddubitaw. Pero fid-dubju nagħrfu lilna nfusna… kultant id-dubju jsaħħaħna. Aħma niddubitaw u l-Mulej jiġri warajna. Meta bdew jiddubitaw, il-Mulej tahom iktar responsabilità u qallhom: “… agħmlu dixxipli mill-ġnus kollha, u għammduhom fl-isem tal-Missier u ta’ l-Iben u ta’ l-Ispirtu s-Santu…” (Mt:28:19). Il-Magħmudija hija fil-fatt dik il-ħaġa li tqarribna lejn Alla: lejn it-Trinità.

U x’hini it-Trinità? Din hi għaqda ta’ Mħabba! Anke l-lingwaġġ li tuża l-iskrittura jsaħħaħ dan l-argument għaliex l-iskrittura tirreferi għal-missier u għal-iben; jiġġiefieri relazzjoni ta’ intimità: “Dan hu Ibni l-għażiż” (Mt:17:5).

F’dan il-Vanġelu tal-festa tat- Trinità, Ġesù jgħid lill-appostli wkoll:  “…u għallmuhom iħarsu dak kollu li ordnajtilkom jien (Mt:28:19); jiġġiffieri tahom missjoni li jxandru dak li xandar hu: l-Imħabba. Din hija l-missjoni li Ġesù jagħti lilna wkoll: dik li nxandru l-imħabba permezz ta’ ħajjitna.

Anke il-Papa Franġisku ukoll qed ikellimna il-ħin kollu dwar l-imħabba. Il-messaġġ tat-Trinità dan hu: messaġġ tal-Imħabba. U Kristu irridna nxandru dan; il-Missier l-Iben u l-Ispirtu s-Santu: l-Imħabba!

U meta nitkellmu dwar l-imħabba ma nistgħux ma niftakrux fil-passaġġ mill-ewwel ittra ta’ San Pawl lill-Korintin, Kapitlu 13, Versi 1 sa 8 u 13.

Li kont nitkellem bl-ilsna tal-bnedmin u tal-anġli bla ma kelli l-imħabba kont inkun qisni strument tar-ram iżarżar jew platti jċekċku.  U kieku kelli d-don tal-profezija u kont naf il-misteri kollha tal-għerf kollu, kieku kelli l-fidi tiegħi sħiħa li tqanqal il-muntanji, imma ma kellix imħabba, jien ma kont inkun xejn. U kieku kelli nqassam ġidi kollu fil-karità u nagħti ġismi għall-ħruq, bla ma jkolli mħabba, xejn ma jkun jiswieli ta’ ġid. L-imħabba taf tistabar u tħenn; l-imħabba mhijiex għajjura, ma tintefaħx biha nifishama , ma titkabbarx fuq l-oħrajn; ma tagħmilx dak li mhux xieraq; ma tfittixx dak li hu tagħha, xejn ma tinkorla; ma żżommx f’qalbha għad-deni, ma tifraħx bl-inġustizzja, imma tifraħ bil-verità: kollox tagħder, kollox temmen, kollox tittama, kollox tissaporti. L-imħabba tintemm qatt, jgħibu l-profeziji, jisktu l-ilsna, jgħib l-għerf. Issa hawn fidi, tama u mħabba, it-tlieta jibqgħu, il-kbira fosthom hija l-imħabba.

San Girgor il-Kbir kien għamel din il-katekeżi dwar dan l-Innu tal-Imħabba:

L-Imħabba taf tħenn

– Għaliex tpatti b’ġid liema bħalu kull deni li tirċievi

L-Imħabba mhijiex għajjura

– Għaliex ma tixtieq xejn mill-ġid tad-dinja u għalhekk ma’ tgħirx għal min jirnexxilu jiksbu.

L-Imħabba ma tintefaħx biha nfisha

– Għaliex tant tixtieq il-premju ta’ għemil ir-ruħ li ma jimpurtaha xejn mill-ġid tad-dinja.

L-Imħabba ma’ titkabbarx fuq l-oħrajn

– Għaliex mehdija biss bl-imħabba t’Alla u tal-proxxmu u ma tagħtix kas ta’ ebda ħaġa li mhix sewwa.

L-Imħabba ma tagħmilx dak li mhux xieraq

– Għaliex hi kuntenta b’dak li hu tagħha u ma tixtieq bl-ebda mod dak li hu ta’ ħaddieħor, li hu barra minnha.

L-Imħabba ma tfittixx dak li hu tagħha

– Għaliex kull ma għandha li jintemm tqisu mhux tagħha u tqis tagħha dak biss li taf li se jibqa’ għal dejjem.

L-Imħabba xejn ma tinkorla

– Għaliex għalkemm imġarrba u mħabbta ma żżomx f’qalbha ħsibijiet ta’ tpattija u ta’ vendetta waqt li tistenna premju aqwa u akbar wara l-ħafna taħbit li minnu tgħaddi

L-Imħabba ma żżomx f’qalbha għad-deni

– Għaliex imsaħħa bl-imħabba għas-safa, teqred mill-għeruq kull mibegħda minn qalbha u ma tħalli xejn li hu mniġġes jissawwar f’qalbha.

L-Imħabba ma tifraħx bl-inġustizzja

– Għaliex għandha biss ħerqa kbira ta’ mħabba għall-bnedmin kollha u ma tafx bid-deni tal-għedewwa tagħha.

L-Imħabba tifraħ bil-verità

– Għaliex tħobb lill-oħrajn bħala nfisha u tifraħ b’dak li hu tajjeb fl-oħrajn daqskemm tifraħ bil-mixi ‘l quddiem tagħha stess.

Il-Laqgħa spiċċat bit-talba tal-Missierna.

Fil-laqgħa ta’ Prayer Café, tat-22 ta’ Mejju 2015,  wara li ħadna kikkra kafe flimkien, trattajna l-qari tal-quddiesa ta’ nhar il-Ħadd 25 ta’ Mejju; it-tmien Ħadd tal-Għid jew Għid il-Ħamsin. It-tema ewlenija kif mistenni f’Pentecoste, kienet fuq l-Ispirtu s-Santu.

Fil-ħajja spiss nħossuna sfiduċjati , iżolati u b’qalbna maqtugħa minn dawk ta’ madwarna. Ngħaddu minn mumenti ta’ dlam u qtiegħ il-qalb. Pero il-Mulej daħal fil-ħajja tagħna bħala bniedem –Ġesu- u għaraf l-umanita fraġli tagħna. Bħala ġrajja llum se nħarsu lejn il-ġrajja li seħħet wara t-tlugħ ta’ Ġesu fis-sema, meta kif kien wegħedna Hu bagħat l-Ispirtu s-Santu, d-Difensur tagħna fuq id-dixxipli u Marija li kienu msakkrin f’kamra isolati weħidhom.  Xogħol  l-Ispirtu S-Santu huwa li jsaħħaħna u jagħtina skop fl-egħmil tagħna.

Hawn inqara l-evanġelju ta’ nhar il-Ħadd li ġej mehud minn Ġw 15, 26-27; 16, 12-15 u wara kullħadd ġie mistieden jgħid il-kelma jew frazi li laqtithom mill-vanġelu.

Din is-silta tinsab f’nofs minn dak li hu magħruf bħala d-diskors tat-tluq ta’ Ġesu li nsibuh fl-evanġelju ta’ San Ġwann minn Kap 13 sa Kap 17. Nħeġġukom taqrawhom dawn il-ġrajjiet.

Fil-vanġelu tal-llum Ġesu jitkellem fuq il-konsegwenzi inevitabbli tan-nisrani li jimxi wara Ġesu fil-fidi u l-imħabba. Waħda minnhom hi li min jimxi wara Ġesu se jiġi ppersegwitat. “id-dinja għad tobgħodkom” Infatti nafu minn esperjenzi tagħna stess li meta tiprova timxi tajjeb jibdew jinqalgħu ħafna affarijiet…iżda Ġesu tana wkoll il-garanzija tad-Difensur li jtina l-konsolazzjoni u l-faraġ li jkollna bżonn fiċ-ċirkustanzi ta’ ħajjitna, l-Ispirtu s-Santu.

L-Ispirtu s-Santu huwa it-tielet persuna tat-Trinita Mqaddsa – forsi ma nagħtuhx l-importanza li jistħoqqlu – huwa l-mutur li jaħdem bejn Alla u Ġesu biex iwasslilna l-messaġġ t’Alla – huwa HU li jnebbaħna, jiftħilna għajnejna bħalma għamel lid-dixxipli ta’ Emmaws. Nebbaħhom li dik il-persuna quddiemhom kienet Ġesu – fetħilhom għajnejhom waqt l-qsim tal-ħobż. Dan il-miraklu jseħħ quddiemna kuljum waqt kull quddiesa, qabel il-konsagrazzjoni l-qassis ibierek il-ħobż u l-inbid u jitlob il-miġja tal-Ispirtu s-Santu.

 L-Ispirtu s-Santu jnebbħek il-messaġġ int u taqra l-Bibbja. Hemm ħafna mumenti f’ħajjitna li jiġi l-Ispirtu s-Santu ġewwa fina. L-ewwel darba li ġie fuqna kien fil-magħmudija, li tibdilna, u tħalli l-marka tagħha fina, mbagħad jerġa jiġi fuqna waqt il-Griżma tal-Isqof b’qawwa akbar, fejn nirċievu d-doni tal-Ispirtu s-Santu.

Hawn inqrat is-silta mill-Ktieb tal-Atti tal-Appostli : Atti 2:1-11

Bil-qawwa tal-Ispirtu s-Santu Pietru, magħruf bħala sajjied, il-ġurnata ta’ wara din il-ġrajja kien ikkonverta 3,OOO ruħ bid-diskors tiegħu!

Din il-ġrajja seħħet fil-Festa tal-Ġimgħat u tal-Ħsad. Kienet festa li fiha jiġi offrut ‘l Alla l-frott tal-ħsad. Ġiet tissejjaħ tal-ġimgħat għaliex kienu jingħaddu 7 ġimgħat mill-Għid, 50 jum wara (Lev 23:15. Dewt 16:9). Għalkemm għall-bidu kienet festa agrikola biż-żmien saret ukoll spiritwali u solenni. F’dan iż-żmien il-poplu kien jagħmel penitenza u ma setgħux jiġu ċċelebrati żwiġijiet solenni.

Kienet waħda mit-tliet festi ta’ pellegrinaġġ (Għid-festa tal-ażżmi; Festa tal-ġimgħat u Festa tal-Għerejjex). Fiha kienu jiġu ħafna nies Ġerusalemm għalhekk kien ikun żmien ta’ ħafna nies miġbura flimkien.

Kellhom l-obbligu li jġibu magħhom żewġ ħobżiet moħmija bil-ħmira bħala radd il-ħajr ‘l Alla għall-għixien li jagħti lill-poplu. Dan il-ħobż ma kienx jinħema imma kien jiġi mogħti lis-saċerdoti.

Għall-Knisja tagħna din il-festa hija meqjusa mportanti ħafna għaliex hija t-tifkira tal-inżul tal-Ispirtu s-Santu u x-xandir tal-bxara t-tajba (KERYGMA) lill-ġnus kollha li kienu telgħu Ġerusalemm proprju għal din il-festa solenni (Atti 2,1-11).T irreferi għat-twettieq tal-wegħda ta’ Ġesù u hija simbolu tal-għaqda u l-universalità tal-Knisja.  Silta għal qalb l-membri tal-Moviment Kerygma għax minn din is-silta ittieħed l-isem u l-iskop tal-Moviment tagħna. : )

 Fil-jum ta’ Pentekoste, San Pietru, bniedem li kien magħruf bħala sajjied, ppriedka lil-Lhud f’Ġerusalemm u f’dak il-jum, jekk noqogħdu għal dak li naqraw fl-Atti tal-Appostli, mhux inqas minn 3,000 ruħ ħadu l-magħmudija!

Minn hawn tibda l-ħidma missjunarja tal-Knisja. “Intom tkunu xhieda tiegħi f’Ġerusalemm, fil-Lhudija kollha u fis-Samarija u sa truf l-art.” (Atti 1,8)

Biex nidħlu aktar fl-atmosfera tal-ambjent ta’ din il-ġrajja, ntwera l-video:

• Video 1: L-Inżul tal-Ispirtu s-Santu fuq l-appostli:

Ftit wara dan l-episodju fil-bibbja nsibu d-diskors ta’ San Pietru fejn kien qal;  “ le dawn mhumiex fis-sakra kif qed taħsbu intom, għadhom id-disgħa ta’ filgħodu”. Dan l-atteġġament niltaqgħu miegħu anke llum meta nibdew nitkellmu fuq Ġesu jew nuru li nimxu warajh bilkemm ma jkunux iridu jgħidu li tlaqna jew jiprovaw iwaqqgħuna għaċ-ċajt. Pero meta nkunu qed ngħaddu messaġġ ta’ ĠESU rridu nibqgħu għaddejjin u ma naqtgħux qalbna u hawn jidħol l-Ispirtu s-Santu – Hu jagħtina dik il-qawwa biex nkomplu nxandru anke f’mumenti li nkunu qed naqtgħu qalbna.

Wara ħarisna mill-qrib lejn it-talba tal-Moviment tagħna: it-Talba tal-Moviment Kerygma/Talba lill-Ispirtu s-Santu.

1)     Spirtu s-Santu nitolbuk tinżel fina,

2)     biex turina xi trid minna,

3)     sabiex b’għemilna u ħidmietna nwasslu l-bxara t-tajba fl-ambjent ta’ madwarna.

4)     Dawwlilna moħħna biex nagħrfu nimpenjaw ruħna bħala nsara fis-soċjetà.

5)     Bierek il-ħidma tagħna, ibqa’ magħna, sabiex aħna nkunu strumenti tal-bxara t-tajba.

Mistoqsijiet:

Min hu l-Ispirtu s-Santu għalina?

X’naħsbu li huwa xogħlu u l-effetti tiegħu?

L-Ispirtu s-Santu jagħmilna ġisem wieħed, grupp wieħed, Knisja waħda. Kemm nagħrfu din il-qawwa ta’ grupp, ta’ Moviment li tinsab fina?

Xi tfisser il-kelma Kerygma u fejn seħħet fil-ġrajja tal-lum?

Xi tfisser li tkun xhud ta’ xi ħadd? Għal min qegħdin inkunu xhieda aħna u x’inhu l-Messaġġ li qegħdin inwasslu?

X’inhuma d-doni tal-Ispirtu s-Santu?

Xhieda

Vers 27 jgħid: “U intom ukoll tixhdu, għax intom kontu miegħi sa mill-bidu.”

Għaliex insibuha daqshekk diffiċli biex nixhdu l-fidi tagħna quddiem l-oħrajn? Nista’ nibqa’ sieket u ma nxandarx?

Li tagħti xhieda jitlob minna li nkunu konvinti minn dak li qed nagħmlu u nagħtu l-provi tat-twemmin tagħna. Irridu nkunu konvinti.

Waħda mill-membri qalet li hi jolqotha l-vers “b’egħmilna u ħidmitna” ix-xhieda tagħna tkun aktar qawwija meta nagħmlu dak li nemmnu milli niprietkaw biss b’ħafna kliem.

Oħra semmiet li għandna nsejħu lill-Ispirtu jqawwina kontinwament għax aħna bħala bnedmin, aħna dgħajfa ,u għalhekk hemm bżonn li nerġgħu nitqawwew wara xi waqgħa biex nerġgħu nqumu.

Aħna strumenti tal-bxara t-tajba u hekk hu aħna strumenti t’Alla – strument waħdu ma jdoqqx, aħna rridu nkunu l-istrumenti t’Alla biex inwasslu l-messaġġ tiegħu.

Wara nqara passaġġ mill-Atti tal-Appostli Kap 3.

Jista’ jkun li l-egoiżmu tagħna ma jħalliniex naċċettaw il-fatt li għandna bżonn l-għajnuna tal-Ispirtu s-Santu li jiggwidana? San Pietru meta fejjaq lill-magħtub tat-tempju (Atti 3, 1-10) qal lill-magħtub: “Fidda u deheb ma għandix; imma dak li għandi se nagħtihulek: fl-isem ta’ Ġesù Kristu ta’ Nazaret, imxi!”

Mela ifejjaq huwa Alla biss. L-Ispirtu s-Santu jgħallem u jħarreġ lid-dixxiplu biex f’ismu jagħmel il-mirakli.

Video 2:

San Pietru jfejjaq il-magħtub bil-qawwa ta’ Ġesù ta’ Nazaret

Video li juri kif ntqal fil-bidu tal-laqgħa meta twassal l-messaġġ ta’ Ġesu stenna l-persekuzzjoni infatti l-video jispiċċa bid-dixxipli jintefgħu l-ħabs. Iżda kif stqarr Pietru fil-video “We have a duty to speak..” hekk ukoll aħna – ma nistgħux nieqfu nxandru.

Din il-persekuzzjoni hi attwali fid-dinja tal-llum, fil-ħarġa ta’ Xandar il-Kelma nsibu li fis-sena 2013 ġew maqtula 135,000 nsara minħabba l-fidi tagħhom. Bħalissa hemm 150 miljun nsara mhedda madwar id-dinja kollha.

Il-laqgħa ngħalqet bil-qari tas-Sekwenza u bit-talba tal-Missierna.

Prayer Café 15 ta’ Mejju 2015: Lapsi

Il-laqgħa bdiet bħas-soltu bit-talba tal-Moviment.  Wara inqrat is-silta meħuda mill-għeluq tal-Evanġelju ta’ San Mark li tirrakkonta fid-dettal kif Ġesù tal-missjoni lill-Appostli qabel ittella’ fis-sema.  Il-festa magħrufa bħala Lapsi.

Inqrat is-silta ukoll mill-għeluq tal-Evanġelju ta’ San Luqa li tirrakkonta l-istess ġrajja għalkemm iktar fil-qosor u bla dettalji żejda.  Dawn huma l-uniċi żewġ evanġelisti li jirrakontawlna din il-ġrajja.  Dan ifisser li l-Mulej tela’ s-sema u ġie kollox fi tmiemu?

Iżda filwaqt li ż-żewġt Evanġelji jagħlqu b’din il-ġrajja, fl-Atti tal-Appostli insibu l-istess ġrajja – x’aktarx miktub ukoll mill-istess id tal-evanġelisti – propju fil-bidu u b’aktar dettall.  Ġesù qalilhom ukoll “meta jiġi fuqkom l-Ispirtu s-Santu, intom tirċievu l-qawwa u tkunu xhieda tiegħi f’Ġerusalem, fil-Lhudija kollha u s-Samrija u sa truf l-art”. Tissemma ukoll kif “żewġt irġiel lebsin l-abjad jgħidu lill-Appostli “Irġiel tal-Galilija, x’intom tħarsu lejn is-sema?  Dan Ġesù, li kien meħud minn magħkom lejn is-sema, għad jerġa’ jiġi kif rajtuh sejjer”.  Ġesù jwiegħed li ħa jibgħat Spirtu difensur u b’hekk turi li hemm kontinwazzjoni tal-preżenza ta’ Ġesù fostna u mhux spiċċa kollox mat-tlugħ fis-sema.

 Tana missjoni biex inxandru l-Kelma t’Alla.  Fil-fatt dan hu l-għan tal-Movement Kerŷgma!  Illum naraw l-bżonn tal-impenn anke tal-lajċi fi ħdan il-Knisja fin-nuqqas ta’ vokazzjonijiet.  Ma jiswa xejn li jkollok eluf kbar ta’ saċerdoti u ma jkollokx lajċi jew viċi versa li jkollok ħafna lajċi u ma jkollokx min jamministra s-Sagramenti.  Mhux il-kwantità imma l-kwalità tgħodd.  Kull wieħed u waħda minna għandu l-missjoni biex iwassal l-Bxara it-tajba sat-tarf tad-dinja.  Ma jfissirx li rridu nitilqu fl-artijiet imbegħda għax din il-missjoni tista’ tagħmilha fl-ambjent ta’ madwarna: fid-dar, fil-familja, fl-uffiċju, fil-fabbrika, mal-ħbieb: inkunu fejn inkunu.  Illum aktar minn qatt qabel għandna bżonn tal-evanġeliżżazzjoni.

Illum il-Knisja għandha influwenza anke fuq il-kultura. F’sempliċi reklam tal-kafè naraw rappreżentazzjoni tal-Ġenna b’San Pietru mal-Anġli mixjin fuq is-sħab!  Ma nistgħux naqbdu u nwarrbu r-reliġjon minn fostna.  Żball li forsi d-dinja ta’ llum qed tipprova tagħmel: twarrab elfejn sena ta’ storja, tagħlim u kultura!

Aħna lkoll nagħmlu parti mill-knisja u l-knisja ikollha xi ħaġa nieqsa mingħajrna.  Aħna għandna missjoni x’nagħmlu f’din id-dinja. Issa jew nagħmluha sew jew ħa naħarbu minn dan ix-xogħol li ħallielna Ġesù.

Hawn infetħet id-diskussjoni.  Ġew diskussi diversi temi rrelatati ma’ dan il-Vanġelu: l-Ġenna u l-Ġenna tal-Art. Fil-verità il-Ġenna mhux post fiżiku imma fejn titgawda l-glorja ta’ dejjem.

Meta qamet il-mistoqsija jekk min mhux mgħammed u ma jemminx hux diġa’ kkundannat skont m’hemm fl-istess Evanġelju, intqal li aħna liberi. Alla jagħtina ċans li nidinbu imma  jagħtina ċans ukoll li nirrikonċiljaw bis-Sagrament tal-qrar. Hu jaf li aħna dgħajfin u naqgħu. Anke l-Papa jqerr darba kull ħmistax! Tana l-għodda biex insalvaw!

Anke nies ta’ reliġjonijiet oħra: jekk dawn jimxu sewwa fir-reliġjon tagħħom, jistgħu jsalvaw ukoll!  Kristu stess qal li ‘għandi nagħaġ oħra li mhumiex minn dan il-maqjel’  Alla sal-aħħar sekonda jibqa’ jagħtina ċ-ċans li nsalvaw! Ma ninsewx li l-ħalliel t-tajjeb li ġie mwiegħed l-Ġenna fl-aħħar mumenti ta’ ħajtu.

Il-laqgħa ntemmet billi nqrat storja u bit-talba tal-Missierna.