Il-Premju Żagħżugħ tas-Sena 2013 organizzat mill-Moviment Kerŷgma din is-sena intrebaħ miż-żagħżugħ Bernard Borg.  Ir-rebbieħ tal-premju, li huwa sponsorjat minn APS Bank, ġie mħabbar mid-Direttur Ġenerali tal-Moviment Kerŷgma, Fr. Charles Fenech OP.  Rikonoxximent Speċjali ngħata wkoll lil Christopher Barbara minn Santa Lucija għax xogħol volontarju li jagħmel biex itejjeb il-ħajja tan-nies bid-dijabete.

Il-preżentazzjoni tat-trofew saret mill-Eċċellenża Tiegħu Dr George Abela, President ta’ Malta fi tmien ta’ quddiesa li saret fil-Knisja ta’ San Duminku r-Rabat il-Ġimgħa, 31 ta’ Jannar 2014.  Preżenti wkoll għal din iċ-ċerimonja kien hemm in-Nutar Joseph Abela, Ċermen tal-Bord tal-Għażla, il-Prof. Emanuel P. Delia, Ċermen tal-APS Bank u Mrs Tania Borg, Presidenta tal-Moviment Kerŷgma apparti mistednin oħra.

Bernard Borg huwa student universitarju ta’ 25 sena minn Birkirkara.  Bernard ilu snin involut fil-qasam taL-volontarjat u għal dawn l-aħħar 7 snin kien f’kuntatt u ħidma kontinwa mas-sorijiet ta’ Madre Teresa f’Malta.  Infatti, huwa għex diversi esperjenzi mas-sorijiet.  Din is-sena, Bernard iddiskuta mar-“Regional” u s-“Superjura” tas-sorijiet ta’ Madre Teresa biex jitwaqqaf Grupp ta’ Co-Workers f’Malta.  Co-workers huwa grupp li waqfet Madre Teresa stess fejn isejjaħ żgħażagħ biex jidħlu f’impenn ta’ ħajja mill-qrib tas-sorijiet.  Diġà hemm numru sabiħ ta’ żgħażagħ li ngħaqdu ma’ dan il-grupp u b’din l-inizjattiva ta’ Bernard iż-żgħażagħ vountiera Maltin jistgħu jgawdu mill-qrib l-esperjenza spiritwali mas-sorijiet ta’ Madre Teresa.

Bernard ħa inizzjattiva oħra u reġa ta l-ħajja lil grupp li kien ta’ kull xahar ittella’ serata ta’ divertiment għall-familji u anzjani li magħhom jaħdmu s-sorijiet ta’ Madre Teresa.  Permezz ta’ dawn l-attivitajiet soċjali nies fil-komunità qed ikollhom ħin ta’ divertiment maż-żgħażagħ voluntiera u b’hekk tinħoloq atmosfera ta’ ħbiberija.

Esperjenza oħra ta’ Bernard hija Viva s-Sajf tat-Tfal fejn għal dawn l-aħħar 5 snin flimkien ma’ grupp ta’ voluntiera oħra organizzaw għal ħames ġimgħat Skola Sajf għat-tfal li jaħdmu magħhom s-sorijiet ta’ Madre Teresa.  Matul dawn il-ħames ġimgħat il-voluntiera jgħixu f’dar tas-sorijiet, fejn jippreparw l-attivitajiet għat-tfal, jinbnew bħala komunità; u jikbru fl-ispiritwalità tas-sorijiet b’ħin ta’ talb, quddiesa u adorazzjoni kuljum.  Din is-sena, Bernard kien personalment responsabbli għal din l-attività fejn flimkien ma’ żgħażagħ oħra organizzaw numru ta’ attivitajiet ta’ fundraising, pjanar ta’ trasport, loġistiċi tal-iskola, ikel għat-tfal u ħafna affarijiet oħra ta’ preparamenti li teħtieġ attività bħal din.

F’dan l-istess sajf, Bernard mar ukoll l-Ethiopia fejn għal 5 ġimgħat ħadem mas-sorijiet ta’ Madre Teresa u organizzazzjonijiet oħra u b’hekk kompla jibni l-esperjenzi li għex Malta mal-istess sorijiet.  Waqt li kien fl-Ethiopia huwa kien jgħin fil-Home of the Dying u f’attivitajiet mat-tfal orfni, jqassam ikel lil foqra, fi sptar tas-sorijiet, fi skola Sajf tat-tfal, u xogħol ta’ manutenzjoni kemm fl-isptar kif ukoll fl-iskola.

Din is-sena għamel ukoll diversi esperjenzi f’ħidma kontinwa għal ħaddieħor.  Daqs sena ilu ngħaqad mall-grupp S.T.A.N.D. (Striving Towards Ability Not Disability).  Dan il-grupp jagħti lil żgħażagħ b’diżabilità opportunità ta’ esperjenza soċjali u spiritwali fil-komunità.  Bernard ħadem b’ħafna inizjattiva u enerġija u integra mill-ewwel mal-membri ta’ dan il-grupp, kemm persuni b’diżabiltà, ġenituri kif ukoll helpers.  Hu ġie nnominat u elett mill-membri tal-grupp biex ikun parti mill-eżekuttiv fejn r-rwol tiegħu hu ta’ fundraising activities organiser.

Bernard qed jistudja Social Work fl-Università u kien jagħmel parti mill-organizzazzjoni universitarja Studenti Ħarsien Soċjali li qegħda fi ħdan l-istess kors tiegħu.  Fil-preżent Bernard huwa wkoll f’esperjenza fil-Marsa Open Centre.  Bernard jieħu ħafna inizjattiva u l-ħidma ntensa tiegħu hija fis-skiet u tkun dejjem għall-ġid ta’ ħaddiehor.

Iż-żgħażagħ nominati għal dan il-Premju kienu: Antonella Bajada mill-Munxar, Christopher Barbara minn Sta. Lucia, Bernard Borg minn Birkirkara, Rebecca Cini minn Ħal-Balzan, Louis Cutajar mill-Fgura, Amanda Galea minn St Venera, Matthew Gellel mill-Birgu, Ryan Magro mill-Qrendi, Joseph Mizzi mill-Gharb, Elisa Saliba Saliba mill-Floriana u Saralina Savo mill-Pieta’.

Dan it-trofew jingħata kull sena f’ġieħ il-mejjet Dr Rudolph Saliba li kien l-ewwel president tal-Moviment Kerŷgma.  Il-President Abela, feraħ lil dan iż-żagħżugħ u lin-nominati l-oħra u emfażiżża kif dan ix-xogħol voluntarju mhux biss ma gerfxilhomx l-istudji u x-xogħol tagħhom iżda fil-fatt kabbrilhom il-karattru tagħhom.  Huwa qal li numru minnhom użaw il-ħin u l-ħilijiet tagħhom mhux biss biex jgħinu lil familji u ħbieb tagħhom lokalment iżda wessgħu ċ-ċirku tal-għijnuna tagħhom l-hinn minn pajjiżna mingħajr ebda preġudizzji.  Dawn iż-żgħażagħ komplew juru kemm il-poplu Malti hu poplu ġeneruż.

Qabel iċ-ċerimonja tal-Premju Żagħżugħ tas-Sena ingħata wkoll Ċertifikat ta’ Mertu mill-President ta’ Malta lil Gianluca Bezzina għal xhieda li ta lis-soċjetà u lid-dinja ta’ żgħożija nisranija mibnija fuq valuri.

Ritratti: Robert Soler

Il-Premju Żagħżugħ tas-Sena se jingħata lil wieħed/waħda mill-11-il żagħżugħ u żagħżugħa li ġew innominati għal dan il-premju prestiġjuż. L-għan tal-premju hu li jingħata ġieħ u għarfien lil żagħżugħ/a li bl-għemil, bil-karattru, bl-attivita’ u bl-eżempju, din il-persuna tkun xhieda Nisranija għal sħabha ż-żgħażagħ.

IL-MISSIERNA

Nimmeditawha, Nifhmuha, Ngħixuha

Minn Fr. Charles Fenech O.P. – Direttur Moviment Kerygma

Prayer Cafe il-bieraħ ħa xgħejra differenti minn dik tas-soltu. Iltqajna f’laqgħa waħda l-adulti flimkien mal-adoloxxenti. Fr. Charles għamel spejgażżjoni ta x’inhi verament it-talba tal-Missierna.  Waqt din il-laqgħa niżżilt ftit punti li laqtuni u li ħa nkun qed naqsam magħkom.

l-ewwel parti:

Il-Missierna hija l-forma ta’ kif wieħed għandu jitlob.  Araw ftit kif: 

Missierna li inti fis-smewwiet,

Jitqaddes Ismek

It-talba tibda b’tifħir lil Alla.  Hekk għandha tibda kull talba li nagħmlu.  Ma nħarsux lejn Ġesu’biss għax irridu xi ħaġa… Imma b’tifħir lil Alla.

Jitqaddes Ismek

Din hija importanti li wieħed jifhimha.  Meta jkun hemm ambjent ta’ dagħa fid-dar , fuq il-post tax-xogħol eċċ IKUN HEMM AMBJENT TA’ SAĦTA.  U allura viċi versa.  Meta ikun hemm ambjent ta’ talb, IKUN HEMM AMBJENT TA’ BARKA.

Tiġi saltnatek,

Ikun li trid int,

Kif fis-sema hekkda fl-art.

Aħna meta nitolbu, irridu nafdaw f’Alla u nkunu pożittivi fit-talb tagħna.  Irridu nintelqu  f’idejH b’fidi soda u mhux dubjuża.  Irridu nkunu ċerti minn dak li qed nitolbu u mhux kif irridu aħna.  Irridu nkunu dixxipli u ma niibżgħux ngħidu li aħna nsara.

It-Tieni parti:

Hawnhekk nkomplu naraw il-forma ta’ kif aħna għandna nitolbu. Kif ukoll ħarsa lejn il-passat, preżent u futur. 

Ħobżna ta’ kuljum agħtina llum,

U hawnhekk nibdew inressqu t-talbiet tagħna.  Ta’ kuljum irridu nsibu ħin fil-ġurnata fejn nieqfu u nitolbu.  Fejn nidħlu f’intimita’  mal-Mulej u hawnhekk, verament inkunu qed ninħallu mill-għoqiedi tagħna  – meta ngħatu spazju lill-Mulej fit-talb, fis-skiet.

aħfrilna dnubietna bħalma

naħfru lil min hu ħati għalina,

U min mhux mibneb? Il-knisja hi mibnija fuq il-midinbin, la darba aħna għandna mal-art.  Għax il-knisja mhix tal-anġli; dawk qegħdin biex jipproteġuna.  Il-knisja mhix tal-qaddisin – dawk qegħdin hemm biex jispirawna.  Iżda la darba aħna lkoll midinba, ma nistgħux inżommu f’qalbna l-weġgħat, il-ħsarat, il-gideb, il-ġlied eċċ li wieħed għamlilna.  Aħna umani għalhekk mhux la kemm taqbad u taħfer u tinsa.  GĦALHEKK IRRIDU NITOLBU!  Biex kontinwament nitolbu maħfra u nġeddu l-maħfra tagħna ma’ ħaddieħor. Ma nistgħux nitolbu maħfra mbagħad ma naħfrux lil ħaddieħor. Ma tistax tkun nisrani tajjeb jekk ma taħfirx.

 U la ddaħħalniex fit-tiġrib,

Iżda eħlisna mid-deni.

Nitolbu lill-Mulej biex jevitalna li nidħlu fl-inkwiet. Kullħadd ikollu t-toqol tiegħu.  Itlob l-Ispirtu s-Santu biex jgħinek u jekk int temmen, isir il-miraklu miegħek.  Il-Mulej qed ikellmek bil-fatti.  Tiitaqa’ ma xi ħadd u jgħidlek xi ħaġa.  Tiftaħ il-Bibbja u taqra dak li jrid Alla.

Amen.

Nemmnu f’dak kollu li ngħidu.  Anki meta s-saċerdot itina l-ostja, ngħidu Ammen  li tinstema.   Irridu nemmnu f’kull ma’ nitolbu

Mela kif irridu nitolbu lill-Mulej?

Ibda t-talb tiegħek b’tifħir lil Alla.

Afda fit-talb tiegħek.

Itlob biex tagħmel dak li jrid Alla minnek.

Aħfer u itlob maħfra.

Itlob għall-għajnuna.

Amen: Emmen.

Tħobb tkanta? Jekk iva idħol fil-kor tat-tfal Christour! Għall aktar informazzjoni ibgħat email lill-Moviment Kerŷgma fuq: info@kerygma.org.mt; jew ċempel 21459942. Nittamaw li narawk tagħmel parti minn dan il-kor!

Fr. Charles Fenech beda l-laqgħa Prayer Café tal-ġimgħa 17 ta’ Jannar, billi għamel  ħsieb ċkejken fuq Fr Ugo Cremona , patri u teologu kbir Dumnikan li miet nhar l-Erbgħa 16 ta’ Jannar. Kien bniedem ġgant tal-Ispiritwalità, li baqa’ sa l-aħħar jagħti  s-servizz tiegħu fuq l-artal minkejja li kien muġugħ. Kien bniedem ta’ sapport kemm b’mod fiżiku u anke spiritwali. Kien bniedem li jaf lil Ġesù u għalhekk Fr Ugo kien jitrasmetti fiduċja ma kull min jitkellem miegħu. U hawn Fr. Charles ħeġġigna biex nżommuh fit-talb tagħna.

Wara li nqara l-vanġelu tal-Ħadd li ġej Fr. Charles qasam dawn il-ħsibijiet:

Ġwanni li kien jaf lil jgħalaq il-vanġelu billi jgħid: ‘Dan rajtu b’għajnejja u xhedt, “Dan hu l-Iben t’Alla.”’ Aħna ħafna drabi nenfazzizaw li nagħtu xhieda, dan kompla Fr Charles irridu ngħamluh – f’affarijiet żgħar ta’ kuljum billi naraw lil Ġesù f’dawk l eqreb tagħna-f’martna/f’żewġna/f’uliedna/f’ommna… anke f’affarijiet żgħar bħal ngħinu fil-faċċendi tad-dar billi naraw u nħossu l-preżenza ta’ Ġesù f’dawk ta’ madwarna.

Kemm nagħtu xhieda ta’ x’aħna sal-mewt? Statistika li ħarġet mill-Vatikan tistqarr li fl-2012; 118,000 il-persuna ġew maqtula sempliċiment għax stqarru li kienu nsara. Fl-2013 nqatlu 105,000; 48,000  minnhom fis-Syria – fejn qegħed issir ‘wipeout’ tal-insara. Iħabbtu l-bieb, jistaqsu intix nisrani u jekk twieġeb iva jisparawlek. U dawn jagħżlu li jagħtu xhieda tal-fidi tagħhom u jieħdu l-mewt. Kemm int lest li tagħmlu dan? Jew inġibu mitt skuża – għax għandi l-familja, għax għandi x-xogħol… Ix-xhieda tagħna, tar-Reliġjon tagħna kif qegħda tkun? Hija waħda ta’ low cost kif isejħilha Papa Franġisku – immorru l-quddies il-Ħadd skond l-aptit, jew għax inħossu li rridu immorru bilfors? Kemm nħossu li rridu nxandru lil Ġesù u nħajjru aktar nies jersqu lejh? Kemm nħossu li għandna nħajru lil Mulej jagħmel mirakli fuq ċerti nies li birdu? Fr. Charles kompla jgħidilna li għandna nibdew minn dawk l-eqreb tagħna. Jekk għandek ir-raġel jew il-mara li birdet mir-Reliġjon, jew uliedek adolexxenti, itlob biex l-Ispirtu s-Santu jdawwlek b’kelma fil-mument ġust biex terġa tressaqhom lejn Ġesù. Kemm nemmnu li nafu lil Gesu mhux kemm nafu fuq Gesu? Dan hu l-messaġġ tal-vanġelu tal-Ħadd li ġej.

Biex nkunu nafu lil Ġesù rridu nħallu spazju għalih. Kemm inqattgħu ħin nitolbu anke ftit minuti kuljum? Jew ħajjitna mimlija daqs bajda dejjem b’xi skuża lesta… issa għax għandi x-xogħol tad-dar… anke min hu waħdu llum ħajtu mimlija daqs bajda… anke s-saċerdoti u r-reliġjużi għandhom ħajjithom mimlija; Anke t-talb u l-quddiesa jistgħu jsiru parti mir-rutina – kemm qegħdin nħallu ħin ta’ intimita ma Ġesù? Inti trid verament tara lil Ġesù bħala l-mera ta’ ħajtek? Skond l-eta tiegħek trid tkun lest li toffri sagrifiċċji ta’ veru għal Ġesù mhux għalik. Forsi tgħiduli, kompla Fr Charles, li nrabbi t-tfal, li nieħu ħsieb lit-tfal tat-tfal, li nieħu ħsieb lil kbar, dawn mhumiex sagrifiċċji? Mela mhumiex, IMMA qiegħed tagħti 100% tiegħek lil Ġesù? Inti qiegħed titkellem ċar u ma tibqax ddur mal-problemi. Ġwanni f’dan il-vanġelu qegħed jgħidilna: ‘Dan rajtu b’għajnejja u xhedt: “Dan hu l-Iben t’Alla.” ’ Forsi din hi l-problema tagħna l-insara li mmorru l-quddies kuljum – mingħalina li nafu lil Ġesù iżda m’għandniex rapport miegħu. Li jkollok rapport miegħu jfisser li meta jkellmek taġġixxi anke fi rqaqat żgħar. Papa Franġisku jenfasizza li m’għandniex naħlu. Għandu jkollna ‘management’ tajjeb kemm tal-flus u kif ukoll tal-ħin. Jekk ġa għandek ġakketta tal-firma qabel tmur tixtri oħra, ara tinqediex b’dak li għandek..din hi l-fidi..mhux jien x’irrid – iżda nħares lejn ta’ madwari għax faċli li nrattbu l-kuxjenza tagħna.

Waħda mill-affarijiet li qegħda tiġi diskussa anke fit-teoloġija hi jekk ċ-ċittadini li jemmnu għandhomx jibdew jiġi ntaxxati. Waħda mill-pajjiżi li ġa tagħmel dan hija l-Ġermanja. L-gvern jissusidja x-xogħolijiet ta’ tiswija fil-knejjes kemm Luterani u kif ukoll Insara u dawk li jemmnu jiġu ntaxxati xi ħaġa żgħira. Għal l-ewwel kien hemm rejazzjoni kbira saħansitra kien hemm min mar għand il-kappilan u staqsa biex jinqata’ mir-registru tal-magħmudija! U dan biex ma jħallasx taxxa żgħira! (Filwaqt li għandna pajjizi oħra kif diġa għidna fejn n-nisrani qiegħed imut biex ma jiċħadx il-fidi tiegħu!)

Għalhekk il-Papa Franġisku jinsisti li l-fidi tagħna trid tkun high cost u mhux low cost. Il-Fidi mhix li tmur il-quddies issaħħan il-bank, ir-reliġjon u l-fidi tagħna ma titkejjilx minn kemm nagħmel dnubiet jew le, għalkemm dan ma jfissirx li meta tagħmel d-dnub m’intix teħodha kontra Alla,  imma l-ewwel pass tagħna jrid ikun kemm qegħdin nibnu relazzjoni intima ma’ Ġesù. Kemm qed nużaw il-quddies u laqgħat li mmorru biex nibnu relazzjoni biex insiru nafu lil Ġesù b’mod intimu? Dan irid ikun it-training tagħna.

Fr Charles kompla billi fakkar profezija tal-Papa Ġwanni Pawlu II, meta kien qal  “familja li ma tilobx flimkien b’xi mod jew ieħor titfarrak” u dan qegħdin narawh llum.

Il-laqgħa tkompliet b’diskussjoni fuq jekk aħniex nagħmlu r-rieda t’Alla. Qegħdin nagħtu xhieda li aħna nsara? Meta naraw inġustizzja qegħdin nitkellmu? Nħossuna ħatja jekk naraw inġustizzja u ma nitkellmux?

Avviż: Ġimgħa 24 ta’ Jannar fis-7.00 ta’ filgħaxija se jsir seminar fuq it-Talba tal-Missierna miftuh għal kulħadd fiċ-ċentru tal-KERYGMA, jitmexxa minn Fr Charles Fenech o.p.

Waqt il-‘Prayer Cafe’  minn Fr. Charles Fenech  10 ta’ Jannar 2014

Il-Festa tal-Magħmudija tal-Mulej.

Illum qed nimlew l-ispazju tagħna bil-preokupazzjonijiet tal-ħajja u spazju għal Ġesu’ m’għandniex.  Materjal biex naħdmu hemm kemm wieħed irid.  Bħal  meta naqraw kotba reliġjużi, nisimgħu Radju Marija, infittxu fuq l-internet…  Pero’ mhux dawn biss,  anke min isegwi l-internet jew min għandu radju diġitali, jista’ jisma’ il-Kelma tal-Papa Franġisku KULJUM fuq ir-radju Vatikan.  Li nistgħu nisimgħu l-Omeliji tal-Papa kuljum hija xi ħaġa ġdida – qabel wieħed kien jisma’ biss xi omelija tal-Papa jew fil-Milied u  l-Għid jew f’xi okkażżjonijiet solenni.  Il-Papa jitkellem b’mod li jifhmu kulħadd.  Għalhekk ninsabu iffurtunati li min jrid jħalli l-Mulej jidħol fih, hemm kull mezz.  M’għandniex skużi!

Importanti li nħarsu lejn il-magħmudija tagħna għax ħafna minna l-Insara ma nagħtux kas li aħna Nsara.

Dawn huma xi wħud mill-frażijiet li uża l-Papa waqt l-omeliji tiegħu.  Kompla jgħid,  kif jista’ jkun li bl-inżul tal-Ispirtu s-Santu fuq l-Appostli, fuq il-knisja u fuq kull wieħed minna, jkollna knisja ta’ nies li jemmnu imma l-fidi tagħhom hija mejta.  Aħna nofsna ħajjin u nofsna mejtin.  Dan qalu l-Papa’ illum.

Atejiżmu Kristjan?         Min huma dawn?

Kull min jgħid li hu Kristjan imma ma  jemminx huwa dak il-bniedem li jaf meta twieled imma l-anqas joħlom biex ikun jaf meta tgħammed.  Huwa dak li jmur il-knisja u ma jemminx.  Nofs il-knisja hija iffurmata minn nies nofshom mejtin.  L-importanti mhux li l-bankijiet tal-knisja ikunu mimlijin, imma li nkunu konvinti minn dak li qed nisimgħu.  Mhux il-kwantità mma l-kwalità.  Il-knisja kienet aktar b’saħħitha meta kienet fil-minoranza; il-knisja tal-bidu, tal-persekuzzjonijiet, tal-martri, fejn in nies kienu ta’ kwalità.  Bil-kontra ta’ meta l-knisja kienet marbuta mal-gvernijiet, fejn kien hemm kwantità tan-nies imma ukoll ħafna skandli.

Għalhekk tajjeb li wieħed jagħmel sforz u jkun nisrani ta’ kwalita’ u mhux ta’ numru.  Dan billi nagħtu spażju fil-ħajja tagħna lil Ġesu’.  Ma niċċelebrawx biss il-ġurnata ta’ għeluq snina , imma d-data tal-magħmudija.  Min minkom tafu d-data tal-magħmudija tagħkom?

Wara li Ġesu’ tgħammed instama’ leħen jgħid: “Dan hu Ibni l-għażiż; fih sibt il-għaxqa tiegħi.”            Ġesu’  jista’ jgħid l-istess fuqna?  Kemm minna naħsbu f’Ġesu’ matul il-ġurnata?  Forsi aħna nsemmuh l-isem ta’ Alla ta’ spiss; għax kif inxelfu subgħajna jeħel Alla magħna.  Kif tiġri xi ħaġa ħażina jeħel Alla mall-ewwel,  jekk ma ngħidux bil-kliem, naħsbu f’moħħna.  U fl-istess ħin ninsew in-nar ta’ imħabba li daħal fina fil-magħmudija.

Aħna qegħdin nagħtu x-xhieda tagħna ta’ Nsara?

Jekk l-aġenda tiegħek hija kompletament differenti minn dik ta’ nisrani, allura hemm xi ħaġa li mhux sejra sew fl-għejxin tal-fidi tiegħek.  Għalhekk importanti li tiftakar meta tgħammidt, għax m’hijiex biss data imma hija ukoll mixja.  Importanti li nħallu lill-Mulej jmexxina Hu fit-triq tagħna.  Huwa għandu l-modi, il-mumenti ta’ sorprizi ta’ kif imexxina fit-triq tagħna.  Uża kull meżż biex tagħti spażju lil Alla, taqtax qalbek, Il-Mulej qiegħed miegħek, ħallih jidħol f’ħajtek imbagħad imexxik Hu.  Aħna wkoll dixxipli.