Għall-iktar informazzjoni u ħinijiet tal-ftuħ, għafas hawn!

Infetħet u ġiet imbierka ir-raba’ edizzjoni tal-“Mejda Tkellimna”: wirja li tinkludi mejda tal-Appostli u il-Qabar ta’ Kristu.  Dan seħħ nhar il-Ġimgħa 28 ta’ Marzu 2015. Din il-wirja se tiftaħ kuljum sa nhar il-Ġimgħa l-Kbira, it-3 ta’ April 2015. Għall-ħinijiet tal-ftuħ u aktar informazzjoni għafas hawn!

     Fil-bidu tal-laqgħa inqara il-Vanġelu tal-Ħadd li ġej, li hu l-Ħames Ħadd tar-Randan, mill-Evanġelju ta’ San Ġwann 12:20-33. Wara, il-Vanġelu ġie spjegat biċċa biċċa.

    Fil-bidu tal-Vanġelu jissemmew il-Griegi. Meta qiegħed jirreferi għall-Griegi, l-evanġelista qiegħed jirreferi għall-pagani; dawk li ma kienux Lhud. Dawn marru jfittxu lill-Ġesù għax probabbli semgħu biH. Dawn staqsew lil Filipu:  “Sinjur, nixtiequ naraw lil Ġesù.”

     L-ewwel riflessjoni minn din il-parti hi li l-fatt li ssemmew il-Griegi – għax dan ifisser li Ġesù ġie għal kulħadd u mhux għal-Lhud biss.

    Jekk xi ħadd qiegħed ifittex lil Ġesù, se jarah fina? Xi kultant meta nies ikunu jafu li aħna Nsara impenjati jiġu għandna bħalma l-Griegi marru għand Filippu. Dawk li jiġu għandna x’se jsibu? Hemm min josserva lilna l-Insara biex jara ngħixux skont dak li ngħidu li aħna – Insara. Fil-fatt, kultant tisma frażijiet bħal: “Basta jmorru jitqarbnu” u espressjonijiet bħal dawn. Xi kultant veru li aħna bħala nsara ma nġibux ruħna skont it-tagħlim ta’ Kristu; u dan anke fl-affarijiet ta’ kuljum, bħal meta xi ħadd ikollu bżonn l-għajnuna tagħna, anke f’affarijiet żgħar u aħna ma ntuhielux; jew meta ngħidu fuq in-nies minn wara darhom. Jekk aħna Nsara suppost min jiġi jfittex lil Ġesù, għandu jsibu fina, imma kultant aħna ma nwettqux dak li nippriedkaw u b’hekk min ifittex ma jkunx jista jara lil Ġesù fina. Dan bħal meta Ghandi qal: “I like your Christ, I do not like your Christians. Your Christians are so unlike your Christ.”  Dan ifisser li Ghandi ma riedx jikkonverti għal nisrani għax ma kienx jara eżempju tajjeb fl-Insara. Jekk xi ħadd ikollu ċans jikkonverti, jista’ jkun li aħna ntellfuh minn dan minħabba l-eżempju tagħna.

     Filippu mar jgħid lil Indrì dwar il-Griegi , u flimkien marru jgħidu lil Ġesù. Ġesù qalilhom:  “Waslet is-siegħa li fiha Bin il-bniedem ikun igglorifikat.   Tassew tassew ngħidilkom, jekk il-ħabba tal-qamħ ma taqax fl-art u tmut, hi tibqa’ weħidha; imma jekk tmut, tagħmel ħafna frott.” [Ġw:12:23-24]

     Għalkemm l-appostli probabbli ma fehmu xejn, Ġesù kien qiegħed jitkellem dwaru nniffsu u fl-istess ħin kien qed jippreparahom, għax kien jaf li dak li emmnu fih kien ser jikrolla quddiemhom.

Wara Ġesù jgħid:  “Min iħobb lil ħajtu jitlifha; imma min jobgħod lil ħajtu f’din id-dinja jħarisha għall-ħajja ta’ dejjem.” [Ġw:12:25]

     Hawnhekk Ġesù (u l-Knisja llum) ma kienx qiegħed jgħid li għandna narmu ħajjitna u m’għandniex nieħdu ħsiebha. Anzi, aħna obbligati li nieħdu ħsieb ħajjitna, però min-naħa l-oħra m’għandniex nħossuna qisna ankrati ma’ din id-dinja.  Waqt li ngħożżu ħajjitna rridu nifmhu li dak li nagħmlu m’għandniex nagħmluh għal din il-ħajja imma għall-ħajja li jmiss.

     Ġesù jkompli: “Jekk xi ħadd irid jaqdini, hu għandu jimxi warajja; u fejn inkun jien, hemm ukoll ikun il-qaddej tiegħi.” [Ġw:12:26]

     Il-qadi dejjem kien parti mportanti mill-missjoni ta’ Ġesù (eż: il-ħasil tas-saqajn f’Ħamis ix-xirka). Darba saċerdot qal li wieħed mill-aħjar modi biex tmur il-ġenna hu li tkun mizżewweġ u jkollok familja. Dan għaliex meta wieħed jgħix sew il-ħajja miżżewġa, hu (jew hi) jagħti ħajtu għall-mara (jew għar-raġel) u imbagħad għat-tfal.  Għalhekk inti tkun qiegħed tmewwet il-bżonnijiet tiegħek (u allura lilek innifsek) biex tpoġġi l-bżonnijiet ta’ ħaddieħor qabel tiegħek. Bl-istess mod Ġesù qiegħed jgħid li aħna għandna nagħtu lilna nfusna għall-bżonnijiet tal-oħrajn u għalhekk “immutu” għalina nfusna.

     Ġesù jgħid ukoll: “Min jaqdi lili, il-Missier jagħtih ġieħ” [Ġw:12:26].

Jekk tifli dawn il-kliem naraw li hawnhekk Ġesù qiegħed jgħid xi ħaġa li tal-għaġeb:  li Alla jagħti gieħ lilna u mhux aħna nagħtu gieħ lilu; dejjem jekk ngħixu skont dak li qiegħed jgħid Hu.

     Fil-vers li jmiss Ġesù jgħid: “Issa qiegħed inħoss ruħi mħawwda. U x’naqbad ngħid?” [Ġw:12:27].

     Huwa mument ieħor fejn Ġesù ħassu mħawwad. Ma kienx jaf x’se jaqbad jgħid. Jekk anke Ġesù ħassu mħawwad u ma kienx jaf x’se jaqbad jgħid, kemm iktar aħna fiċ-ċokon tagħna kultant nitħawdu.

     Aħna kultant ma nafux nitolbu mingħajr kliem. Fuq ir-radju ġieli tisma’ nies jgħidu “itlobli” għal xi ħadd viċin, “biex forsi, jaħasra, Alla jismagħni”. Dan juri li aħna ma nifhmux li Alla jismagħna dejjem. Dik hi l-fidi: li nintelqu kompletament f’idejn Alla.

Hawnhekk ingħadet storja ta’ grupp seminaristi li qalulhom biex ma jomgħodux chewing gum waqt li jitolbu. Seminarista minnhom saqsa jekk jistgħux jitolbu waqt li jkunu qed jomgħodu ċ-chewing gum, u r-risposta kienet fl-affermattiv. Dan jurina li l-ħajja tagħna tista’ tkun talba sħiħa, dejjem jekk qalbna u moħħna jkunu mal-Mulej.

Hemm ħafna modi kif nitobu. Anke Ġesù talab ħafna. Fit-tieni qari ta’ nhar il-Ħadd [Lhud:5:7-9] nsibu: “Meta kien jgħix fuq din l-art, Kristu offra talb u suppliki b’leħen għoli u bid-dmugħ lil dak li seta’ jsalvah mill-mewt.” Supplika tfisser titkarrab, u dan ifisser li Ġesù ma talabx biss, imma għamel iktar: tkarrab lil Alla, lil Missieru.

Il-Vanġelu jkompli: “U x’naqbad ngħid? Missier, eħlisni minn din is-siegħa? Imma jien għalhekk ġejt: għal din is-siegħa” [Ġw:12:27].

     Din torbotna mat-tema tat-tbatija. Ħafna drabi aħna nitolbu fiż-żmien tal-prova, fiż-żmien tat-tbatija. Fil-ħajja tagħna ikollna mumenti differenti: mumenti ta’ tbatija u oħrajn ta’ ferħ. Bħal Kristu ma nagħmlux ħażin li nitobu fil-mumenti tat-tbatija, iżda irridu nirsistu u naħdmu biex ħajjitna kollha tkun talba, anke l-mumenti ta’ ferħ u mhux meta nbatu biss. Ġesù kien jaf minn xiex se jgħaddi u li ma setax jeħles minn dak li kien se jiġrilu, imma xorta tfixkel u tħawwad, u talab lill-Missier. Fil-mumenti ta’ prova f’ħajjitna, aħna għandna nagħmlu l-istess anke jekk nafu li xorta rridu ngħaddu mit-tbatija. Ġesù jgħid “x’se naqbad ngħid?”. Kien mitluf.

    Bħala nsara aħna nistgħu nitolbu bi tlett modi:

1. Talb tal-kliem
2. Talb ta’ Meditazzjoni (bħall-Lectio divina)
3. Talb ta’ Kontemplazzjoni (bħal meta nikkontemplaw in-natura jew is-salib)

     Meta tikkontempla tkun qiegħed taħseb dwar pereżempju meta tara xena sabiħa (bħax-xemx nieżla). Dan kulħadd jista jagħmlu, però aħna li nafu u nemmnu li dik ħoloqha Alla nistgħu naħsbu dwarha bħala ħolqien ta’ Alla u nħallu lil Alla jkellimna permezz tagħha.

Ġesù dawn ipprattikom kollha: talab bil-kliem, talab bil-meditazzjoni (40 jum fid-deżert) u kien jikkontempla ukoll (il-kobor t’Alla).

Aħna kultant ma nħallux lilna nfusna nikkontemplaw għax nibdew naħsbu f’kollox barra f’dak li nkunu rridu naħsbu fuqu.

     Ġesù qal “X’se naqbad ngħid?”. Bl-istess mod meta aħna nkunu qegħdin nisimgħu lil xi ħadd ikellimna dwar il-problema tiegħu, nibdew naħsbu “X’se naqbad ngħid?”. F’mumenti bħal dawn m’għandna ngħidu xejn imma għandna nitgħallmu nisimgħu lil dak li jkun. Aħjar ma ngħidu xejn milli ngħidu ħmerija. Dejjem għandna niftakkru li Ġesù ukoll qal: “X’se naqbad ngħid?”. U jekk noffru t-talb tagħna, għandna nżommu l-kelma tagħna.

     Ġesù jgħid ukoll: “Missier, agħti glorja lil ismek” [Ġw:12:28].

     Hawnhekk naraw ukoll li f’mumenti diffiċli Ġesù dar lejn Alla u gglorifikah. X’kuntrast mad-dagħa, li ġieli jingħad għal kull ħaġa ta’ xejn!  Din hija xi ħaġa kerha ħafna u sfortunatament kultant nisimgħu anke tfal jidgħu.  Dan huwa kuntrast kbir ma’ dak li għamel Ġesu fejn fl-iktar mument diffiċli tiegħu, flok seħet dak li kellu jgħaddi  minnu bħalma nagħmlu aħna, igglorifika l-isem t’Alla.

Il-laqgħa spiċċat bit-talba tal-Missierna.  Il-laqgħa li jmiss ser tkun nhar il-Ġimgħa 10 ta’ April. 

Il-laqgħa Prayer Cafe ta’ lbierah 13 ta’ Marzu bdejniha  billi tlabna lill-Ispirtu s-Santu bit-Talba tal-Moviment Kerygma, u  tlabnih jinżel fuqna u jħeġġiġna biex b’egħmilna u ħidmietna nkomplu nxandru l-Kelma t’Alla. Wara nqara l-vanġelu tal-Ħadd li ġej mehud minn Ġwanni 3:14-21. Dawn huma xi punti u riflessjonijiet li qsamna flimkien waqt il-laqgħa dwar dan il-qari.

Fil-vanġelu tal-Ħadd  li ġej naraw lil Kristu bħala ’l Mose l-ġdid. “Kif Mose refa’ s-serp fid-deżert, hekk jeħtieġ li jkun merfugħ Bin il-bniedem” Fl-Ezodu nsibu li waqt li l-Lhud kienu fi triqthom fid-deżert  lejn l-art mwegħda, daru għalihom is-sriep u Mose staqsa lil Alla x’setgħa jagħmel biex isalva lil min jiġi migdum. Alla kien qallu jdewweb ram forma ta’ serp fuq zokk u kull min jiġi migdum u jħares ’l fuq lejn dan is-serp kien ifieq. Filwaqt li Mose kien il-mexxej tal-poplu Lhudi fi triqthom lejn l-art mwegħda, Kristu hu l-mexxej tagħna l-fidili tal-prezent u l-futur. KRISTU ġie maqtul u mdendel fuq is-salib. Aħna llum ukoll niġu migduma mis-sriep – Is-sriep tal-llum huma d-dnubiet li d-dinja tridna nwettqu u biex nevitawhom jew biex insalvaw minnhom irridu nħarsu lejn Kristu mdendel fuq is-salib bħalma l-Lhud kienu jħarsu lejn l-forma tas-Serp magħmul mir-ram.

Hawn issemma kif waqt vista lill- anzjani mixħutin f’qiegħ ta’ sodda, ssib min jgħidlek “Għandi ’l Alla għandi kollox” . Mhix frazi faċli biex ngħidu b’konvinzjoni u twemmin meta tkun għaddej minn tbatija. Iżda meta nħarsu u nimmeditaw (speċjalment f’dan iż-żmien tar-Randan) lejn Ġesu-Bin il-bniedem stess  msallab; kif nistgħu nistennew li aħna ma jkollniex biċċa minn dan is-salib?  Ġie tradut Hu – Bin Alla! Jekk tradew lil Iben Alla nista’ nippretendi li jien ma niġix traduta ukoll?  Dan il-ħsieb nirreferu għalih f’ħafna mumenti f’ħajjitna, meta niġu traduti minn ħbieb, minn kollegi tax-xogħol, saħansitra minn żwieġna/martna – mumenti iebsa – u f’mumenti bħal dawn nistgħu niddispraw jekk ma nħarsux lejn Kristu msallab fuq s-Salib . Fl-ittra ta’ San Pawl lill-Fillipin naqraw hekk:“Ġesù li għad li kellu n-natura ta’ Alla, ma qagħadx ifittex tiegħu li hu daqs Alla, iżda xejjen lilu  nnifsu billi ħa n-natura ta’ lsir; sar jixbah lill-bnedmin, u deher minn barra bħala bniedem; ċekken lilu nnifsu, billi obda sal-mewt, anzi sal-mewt tas-salib.”

Ta’ bnedmin li aħna ninġibdu minn dak li toffrilna d-dinja. Fid-dinja tal-llum aħna bbumbardjati bir-riklami – mit-TV , revisti, gazzetti ..u dawn ma joffrulniex il-fidi iżda jiġġeneraw id-dnub; għalhekk irridu nduru lejn Ġesu msallab sabiex neħilsu mid-dnub. Aħna m’aħniex maħluqin għad-dnub iżda Alla ħalaqna biex ingawdu miegħu iżda din ir-relazzjoni tkissret bid-dnub. Għadda ż-żmien u ġie Kristu fid-dinja u tagħna l-possibilta li nerġgħu nibnu l-ħbiberija miegħu. Il-ħsieb li aħna rridu nsalvaw irid ikun dejjem fuq moħħna.

Per ezempju biex immorru minn post għal ieħor nistgħu ngħaddu minn diversi direzzjonijiet – aħna fil-ħajjitna wkoll kulħadd għandu triqtu xi jwettaq – l-vokazzjoni tiegħu x’jgħix – min ta’ miżżewweġ, min ta’ għażeb/xebba, min ta’ reliġjuz , hawn anke min jagħzel jibqa’ d-dar jieħu ħsieb l-ġenituri. Ilkoll għandna l-mixja tagħna biex naslu għal punt komuni dik tas-salvazzjoni.  U dan nistgħu nagħmluh billi Ġesu Kristu miet għalina u reġa’ fetħilna l-bibien tal-ġenna. HEMM irridu naslu. Għal hemm nħlaqna. BISS it-toroq se jkun fihom is-slaleb. U hawn ukoll irridu ndawru l-ħarsa tagħna lejn Ġesu msallab. Kieku Ġesu miet mewta komda kieku t-tbatija titlef mis-sinjinifikat tagħha.

Hawn membru fakkarna fi storja li ġġib lil kulħadd iġorr salib. Wieħed raġel beda jitlob ’l Alla biex iċċekkinlu s-salib tiegħu u hekk sar għal tlett darbiet talab li jitnaqqaslu s-salib u kull darba jiċkien. Iżda mbagħad ġara li waslu f’punt li riedu jaqbzu minn irdum għal ieħor u filwaqt li dawk li baqgħu jġorru s-salib tagħhom uzaw is-salib tagħhom bħala pont dak li kien ċkienlu s-salib sab li s-salib tiegħu kien ċċekken wisq biex jasal għan naħa l-oħra u hekk kellu jieqaf milli jkompli triqtu. Għandna niftakru li Alla ma jagħtiniex aktar milli nifilħu. Il-knisja tgħallimna ukoll  li t-tbatija ta’ din il-ħajja tippurifikana u tnaqqsilna ż-żmien tagħna fil-purgatorju.

Is-slaleb li niltaqgħu magħhom jistgħu jkunu  l-mezz li aħna nersqu lejn il-Mulej. U għalhekk il-Knisja ma taqbilx mal-EUTANASIA.

Il-Laqgħa spiċċat permezz ta quote:

“It is Better to light a candle than curse the darkness”

Peter Benenson

Kristu ġie biex jagħtina d-dawl iżda aħna nagħżlu li nibqgħu fid-dlam għalhekk meta jiġu mumenti ta’ dlam fuqna iridu nagħmlu sforz ħalli ma nibqgħux fid-dlam – fil-qtiegħ il-qalb – iżda nixgħelu dik ix-xemgħa żgħira – li terġa tagħtina t-tama u nagħmlu l-qalb.

Wara intalbet it-Talba tal-Missierna.

Filwaqt li nirringrazzjak li għoġbok taqra dan il-blog, nistiednek biex ġimgħa oħra tkun prezenti magħna fil-laqgħa PRAYER CAFE fiċ-centru tal-Moviment Kerygma, Kunvent  tad-Dumnikana, r-Rabat fis-7 ta’ filgħaxija wara l-quddiesa tas-6.30pm. Narawk!

Ir-Randan hu żmien ta’ tiġdid għall-Knisja, għall-komunitajiet u għall-persuni individwali.  Sa mill-bidu tiegħu l-Moviment Kerŷgma kien iżomm dan iż-żmien tar-Randan bħala żmien ta’ grazzja fejn wieħed jista’ jġedded il-konverżjoni personali u jikber aktar fil-fidi u fl-imħabba lejn Alla.

Din is-sena l-Moviment Kerŷgma ippropona din l-Esperjenza Ġesù bit-tema “Mgħallem Tajjeb X’Għandi Nagħmel Jien, Biex Nikseb il-Ħajja ta’ Dejjem?” fejn ta l-opportunità lil kulħadd: adulti, żgħażagħ, adolexxenti u tfal u familji sħaħ biex jiltaqgħu u jqattgħu tlett ijiem ġewwa s-Seminarju tal-Virtù bejn is-6 u 8 ta’ Marzu 2015.

Il-programm kien imżewwaq b’mumenti ta’ talb u quddies immexxija minn Fr Reno Muscat, Dumnikan, adorazzjoni Taizè, Via Crucis, filmat b’tema reliġjuża, eċċ.  Din is-sena flok il-priedki tas-soltu minn saċerdot kien hemm innovazzjoni fejn saru tlett Forums li fihom ġie diskuss id-diskors tal-Papa Franġisku għar-Randan 2015.  B’hekk il-protagonisti kienu l-parteċipanti nnifishom fejn xtarru dan id-diskors li kien ibbażat ħafna fuq l-indifferenza globalizzata li teżisti llum.

Dawn huma ftit mill-kummenti ta’ uħud li attendew:

……..”Attendejt dawn it-tlett ijiem biex ninqata’ mir-rutina ta’ kuljum u nirrifletti fuq il-kelma t’Alla f’ħajti.  Il-Forums għoġbuni għax taw l-opportunità lil kulħadd jesprimi ruħu dwar il-messaġġ tal-Papa Franġisku.”

……..”Laqatni ħafna s-sens ta’ għaqda u s-sempliċità.  Kollox kien organizzat tajjeb sa lanqas dettal.  Il-leaders kienu ‘caring’ ħafna u b’hekk kullħadd ħassu milqugħ.  Apparti mill-quddies, mumenti ta’ talb u Taizè, inħoss li Alla kellimni bl-esperjenza tan-nies li konna waqt il-Forums.  Li tisma’ nies lajċi jitkellmu u jaqsmu magħna l-esperjenzi tagħhom għeni ħafna.”

……….”Hassejt li għandi nattendi għax almenu tlett ijiem fis-sena nagħtihom kompletament lil Ġesù.  Laqatni ħafna l-passaġġ tal-Papa għax meta tixtarru fih ħafna x’titgħallem.  L-programm kien kollu tajjeb.”

………..”Biex tkun esperjenza li qatt ma għamilt qabel u biex nesperjenza iżjed lil Ġesù.  Li laqatni ħafna f’dan l-irtir huwa l-imħabba u l-għajnuna għal xulxin mill-membri tal-Kerŷgma.”

L-Adorazzjoni Taize’

Mument waqt il-quddiesa