Il-Premju Żagħżugħ tas-Sena 2013 organizzat mill-Moviment Kerŷgma din is-sena intrebaħ miż-żagħżugħ Bernard Borg.  Ir-rebbieħ tal-premju, li huwa sponsorjat minn APS Bank, ġie mħabbar mid-Direttur Ġenerali tal-Moviment Kerŷgma, Fr. Charles Fenech OP.  Rikonoxximent Speċjali ngħata wkoll lil Christopher Barbara minn Santa Lucija għax xogħol volontarju li jagħmel biex itejjeb il-ħajja tan-nies bid-dijabete.

Il-preżentazzjoni tat-trofew saret mill-Eċċellenża Tiegħu Dr George Abela, President ta’ Malta fi tmien ta’ quddiesa li saret fil-Knisja ta’ San Duminku r-Rabat il-Ġimgħa, 31 ta’ Jannar 2014.  Preżenti wkoll għal din iċ-ċerimonja kien hemm in-Nutar Joseph Abela, Ċermen tal-Bord tal-Għażla, il-Prof. Emanuel P. Delia, Ċermen tal-APS Bank u Mrs Tania Borg, Presidenta tal-Moviment Kerŷgma apparti mistednin oħra.

Bernard Borg huwa student universitarju ta’ 25 sena minn Birkirkara.  Bernard ilu snin involut fil-qasam taL-volontarjat u għal dawn l-aħħar 7 snin kien f’kuntatt u ħidma kontinwa mas-sorijiet ta’ Madre Teresa f’Malta.  Infatti, huwa għex diversi esperjenzi mas-sorijiet.  Din is-sena, Bernard iddiskuta mar-“Regional” u s-“Superjura” tas-sorijiet ta’ Madre Teresa biex jitwaqqaf Grupp ta’ Co-Workers f’Malta.  Co-workers huwa grupp li waqfet Madre Teresa stess fejn isejjaħ żgħażagħ biex jidħlu f’impenn ta’ ħajja mill-qrib tas-sorijiet.  Diġà hemm numru sabiħ ta’ żgħażagħ li ngħaqdu ma’ dan il-grupp u b’din l-inizjattiva ta’ Bernard iż-żgħażagħ vountiera Maltin jistgħu jgawdu mill-qrib l-esperjenza spiritwali mas-sorijiet ta’ Madre Teresa.

Bernard ħa inizzjattiva oħra u reġa ta l-ħajja lil grupp li kien ta’ kull xahar ittella’ serata ta’ divertiment għall-familji u anzjani li magħhom jaħdmu s-sorijiet ta’ Madre Teresa.  Permezz ta’ dawn l-attivitajiet soċjali nies fil-komunità qed ikollhom ħin ta’ divertiment maż-żgħażagħ voluntiera u b’hekk tinħoloq atmosfera ta’ ħbiberija.

Esperjenza oħra ta’ Bernard hija Viva s-Sajf tat-Tfal fejn għal dawn l-aħħar 5 snin flimkien ma’ grupp ta’ voluntiera oħra organizzaw għal ħames ġimgħat Skola Sajf għat-tfal li jaħdmu magħhom s-sorijiet ta’ Madre Teresa.  Matul dawn il-ħames ġimgħat il-voluntiera jgħixu f’dar tas-sorijiet, fejn jippreparw l-attivitajiet għat-tfal, jinbnew bħala komunità; u jikbru fl-ispiritwalità tas-sorijiet b’ħin ta’ talb, quddiesa u adorazzjoni kuljum.  Din is-sena, Bernard kien personalment responsabbli għal din l-attività fejn flimkien ma’ żgħażagħ oħra organizzaw numru ta’ attivitajiet ta’ fundraising, pjanar ta’ trasport, loġistiċi tal-iskola, ikel għat-tfal u ħafna affarijiet oħra ta’ preparamenti li teħtieġ attività bħal din.

F’dan l-istess sajf, Bernard mar ukoll l-Ethiopia fejn għal 5 ġimgħat ħadem mas-sorijiet ta’ Madre Teresa u organizzazzjonijiet oħra u b’hekk kompla jibni l-esperjenzi li għex Malta mal-istess sorijiet.  Waqt li kien fl-Ethiopia huwa kien jgħin fil-Home of the Dying u f’attivitajiet mat-tfal orfni, jqassam ikel lil foqra, fi sptar tas-sorijiet, fi skola Sajf tat-tfal, u xogħol ta’ manutenzjoni kemm fl-isptar kif ukoll fl-iskola.

Din is-sena għamel ukoll diversi esperjenzi f’ħidma kontinwa għal ħaddieħor.  Daqs sena ilu ngħaqad mall-grupp S.T.A.N.D. (Striving Towards Ability Not Disability).  Dan il-grupp jagħti lil żgħażagħ b’diżabilità opportunità ta’ esperjenza soċjali u spiritwali fil-komunità.  Bernard ħadem b’ħafna inizjattiva u enerġija u integra mill-ewwel mal-membri ta’ dan il-grupp, kemm persuni b’diżabiltà, ġenituri kif ukoll helpers.  Hu ġie nnominat u elett mill-membri tal-grupp biex ikun parti mill-eżekuttiv fejn r-rwol tiegħu hu ta’ fundraising activities organiser.

Bernard qed jistudja Social Work fl-Università u kien jagħmel parti mill-organizzazzjoni universitarja Studenti Ħarsien Soċjali li qegħda fi ħdan l-istess kors tiegħu.  Fil-preżent Bernard huwa wkoll f’esperjenza fil-Marsa Open Centre.  Bernard jieħu ħafna inizjattiva u l-ħidma ntensa tiegħu hija fis-skiet u tkun dejjem għall-ġid ta’ ħaddiehor.

Iż-żgħażagħ nominati għal dan il-Premju kienu: Antonella Bajada mill-Munxar, Christopher Barbara minn Sta. Lucia, Bernard Borg minn Birkirkara, Rebecca Cini minn Ħal-Balzan, Louis Cutajar mill-Fgura, Amanda Galea minn St Venera, Matthew Gellel mill-Birgu, Ryan Magro mill-Qrendi, Joseph Mizzi mill-Gharb, Elisa Saliba Saliba mill-Floriana u Saralina Savo mill-Pieta’.

Dan it-trofew jingħata kull sena f’ġieħ il-mejjet Dr Rudolph Saliba li kien l-ewwel president tal-Moviment Kerŷgma.  Il-President Abela, feraħ lil dan iż-żagħżugħ u lin-nominati l-oħra u emfażiżża kif dan ix-xogħol voluntarju mhux biss ma gerfxilhomx l-istudji u x-xogħol tagħhom iżda fil-fatt kabbrilhom il-karattru tagħhom.  Huwa qal li numru minnhom użaw il-ħin u l-ħilijiet tagħhom mhux biss biex jgħinu lil familji u ħbieb tagħhom lokalment iżda wessgħu ċ-ċirku tal-għijnuna tagħhom l-hinn minn pajjiżna mingħajr ebda preġudizzji.  Dawn iż-żgħażagħ komplew juru kemm il-poplu Malti hu poplu ġeneruż.

Qabel iċ-ċerimonja tal-Premju Żagħżugħ tas-Sena ingħata wkoll Ċertifikat ta’ Mertu mill-President ta’ Malta lil Gianluca Bezzina għal xhieda li ta lis-soċjetà u lid-dinja ta’ żgħożija nisranija mibnija fuq valuri.

Ritratti: Robert Soler

Il-Premju Żagħżugħ tas-Sena se jingħata lil wieħed/waħda mill-11-il żagħżugħ u żagħżugħa li ġew innominati għal dan il-premju prestiġjuż. L-għan tal-premju hu li jingħata ġieħ u għarfien lil żagħżugħ/a li bl-għemil, bil-karattru, bl-attivita’ u bl-eżempju, din il-persuna tkun xhieda Nisranija għal sħabha ż-żgħażagħ.

Tħobb tkanta? Jekk iva idħol fil-kor tat-tfal Christour! Għall aktar informazzjoni ibgħat email lill-Moviment Kerŷgma fuq: info@kerygma.org.mt; jew ċempel 21459942. Nittamaw li narawk tagħmel parti minn dan il-kor!

Il-lotterija tal-Milied 2013, organizzat mill-Moviment Kerŷgma telgħet il-Ħadd 15 ta’ Diċembru fis-7.30pm fil-preżenza ta’ uffiċċjal tal-Lotteries & Gaming Authority, membri tal-Eżekuttiv, membri oħra tal-Moviment Kerŷgma, kif ukoll quddiem persuni li kienu qed iżuru l-wirja tal-Presepji f’dak il-ħin. Il-Premijiet ta’ din il-lotterija kienu dawn:

L-ewwel Premju:  Weekend break b&b Kempinski Hotel, San Lawrenz, Gozo – Rebbieħ: V.A. Rizzo

It-tieni Premju: €100 Vowċer f’Inbejjed – Attard & Co. Ltd – Rebbieħ: J. Camenzuli

It-tielet Premju: Ġekketta Uffiċjali tal-Ferrari – Rebbieħ: Sr. S. Bezzina

Ir-raba’ Premju: Siġra taż-żebbuġ grazzi għall-Manuel Ciantar – Rebbieħ: T. Curmi

Il-ħames premju: €50 vowċer – Medina Restaurant, Mdina – Rebbieħ: C. Cassar

Ir-rebbieħa ta’ din il-lotterija ġew ikkuntattjati.

Il-wirja “Il-Presepju fil-Kunvent” li qegħda tiġi organizzata mill-Moviment Kerŷgma, fiċ-Ċentru Kulturali Kerŷgma, għadha miftuħa. Wieħed jista’ jżur din il-wirja kuljum, sa nhar il-Ħadd 15 ta’ Diċembru. Il-wirja tiftaħ f’dawn il-ħinijiet:

Il-Ġimgħa 13 ta’ Diċembru, is-Sibt 14 ta’ Diċembru u l-Ħadd 15 ta’ Diċembru: mit-08.00 sat-20.00.

Dawn huma iktar ritratti ta’ din il-wirja:

Fetħet il-wirja “Il-Presepju fil-Kunvent” li qegħda tiġi organizzata mill-Moviment Kerŷgma, fiċ-Ċentru Kulturali Kerŷgma. Qieħed jista’ jżur din il-wirja kuljum, sa nhar il-Ħadd 15 ta’ Diċembru. Il-wirja tiftaħ f’dawn il-ħinijiet:

Sibtijiet u Ħdud kif ukoll il-Ġimgħa 13 ta’ Diċembru: Mit-8.00am sat-8.00pm.
Il-ġranet l-oħra mid-9.00am sal-12.00pm u mill-5.00pm sat-8.00pm

Dawn huma ftit ritratti meħudin waqt il-ftuħ ta’ din il-wirja:

Għafas hawn għal iktar informazzjoni dwar din il-wirja!

Wieħed ser ikun jista jsegwi iktar informazzjoni dwar Il-Presepju fil-Kunvent nhar it-Tnejn, 9 ta’ Diċembru fuq il-programm Kaskata Kulturali, ippreżentat minn Joyce Grech u li ser jixxandar fuq Radju RTK, 103FM, fit-3.05 ta’ wara nofsinhar. Sarah u Antoine Barbara, li huma l-moħħ wara l-kors ta’ bini ta’ presepji u l-wirja tal-presepji mibnija waqt l-istess kors, kienu mistiedna waqt il-programm u intervistati minn Ms Grech dwar din il-wirja, li ser tittella fiċ-Ċentru Kulturali  Kerŷgma, fil-Kunvent tal-Patrijiet Dumnikani, fir-Rabat.

L-intervista sħiħa tistgħu tisimgħuha hawn:

Segwu il-programm KASKATA KULTURALI kull nhar ta’ Tnejn u Ħamis fit 3.05pm,kull nhar ta’ Tnejn u nhar ta’ Ħamis fit-3.05pm, li jkollu ripetizzjoni fl-istess ġurnata fl-10.25pm.

Għafas hawn għal iktar informazzjoni dwar il-wirja.

Il-familja kollha kienet mistiedna biex titlaq kollox u tiddedika ġurnata għall-Mulej fil-bidu tas-sena Liturġika – fl-ewwel Ħadd tal-Avvent. L-adulti u l-adolexxenti kellhom programm wieħed fejn it-tema kienet “Fil-Knisja ta’ Kristu m’hemmx lok għall-part-timers”. Matul dan l-irtir ġiet ippreżentata wkoll il-figura ta’ Madre Tereża u kienu mistiedna tlett żgħażagħ volontiera li qasmu l-esperjenzi tagħhom mas-sorijiet ta’ Madre Tereża kemm f’Malta kif ukoll barra minn Malta, bħal Peru u l-Ethopia. Bro Ben Deguara li għamel ħames ġimgħat esperjenza mas-sorijiet ta’ Madre Tereża f’Malta wkoll tkellem fuq l-esperjenza tiegħu. It-tfal kellhom programm li ġie ppreparat apposta għalihom. B’kollox attendew madwar 100 ruħ.

Il-Preparazzjonijiet għall-wirja ta’ Presepji: Il-Presepju fil-Kunvent għaddejjin ġmielhom. Iktar dettalji dwar din il-wirja hawn: Il-Presepju fil-Kunvent

Il-Moviment Kerŷgma għen u ta’ sehmu fiċ-ċelebrazzjoni tal-Provinċja Dumnikana, immexxiha minn Patri Francis Micallef O.P., Provinċjal, u li fiha ġiet iċċelebrata il-Familja Dumnikana. Din iċ-ċelebrazzjoni seħħet nhar il-Ħamis 7 ta’ Novembru 2013 ġewwa l-Knisja tad-Dumnikani fil-Birgu, iddedikata  lill-Lunzjata. Din iċ-ċelebrazzjoni, li ssir kull sena, tiġbor flimkien id-diversi għaqdiet u komunitajiet fi ħdan il-Provinċja Dumnikana Maltija, San Piju V. Il-Moviment Kerŷgma ta sehmu fil-liturġija, speċjalment bil-kant u d-daqq mill-kor tal-kbar tal-Moviment Kerŷgma.

Ritratti: Alfred Debattista