Il-laqgħa nbdiet bill nqara l-Vanġelu tal-Ħadd 31 ta’ Mejju; Il-Festa tat-Trinità – Sena B: Mattew 28: 16-20. Wara ġie diskuss l-istess vanġelu. Ntqal li dan il-Vanġelu qed itina episodju li fih jispikka d-dubju. Wara tlett snin li Ġesù qatta mal-appostli, huma baqgħu jiddubitaw. Pero fid-dubju nagħrfu lilna nfusna… kultant id-dubju jsaħħaħna. Aħma niddubitaw u l-Mulej jiġri warajna. Meta bdew jiddubitaw, il-Mulej tahom iktar responsabilità u qallhom: “… agħmlu dixxipli mill-ġnus kollha, u għammduhom fl-isem tal-Missier u ta’ l-Iben u ta’ l-Ispirtu s-Santu…” (Mt:28:19). Il-Magħmudija hija fil-fatt dik il-ħaġa li tqarribna lejn Alla: lejn it-Trinità.

U x’hini it-Trinità? Din hi għaqda ta’ Mħabba! Anke l-lingwaġġ li tuża l-iskrittura jsaħħaħ dan l-argument għaliex l-iskrittura tirreferi għal-missier u għal-iben; jiġġiefieri relazzjoni ta’ intimità: “Dan hu Ibni l-għażiż” (Mt:17:5).

F’dan il-Vanġelu tal-festa tat- Trinità, Ġesù jgħid lill-appostli wkoll:  “…u għallmuhom iħarsu dak kollu li ordnajtilkom jien (Mt:28:19); jiġġiffieri tahom missjoni li jxandru dak li xandar hu: l-Imħabba. Din hija l-missjoni li Ġesù jagħti lilna wkoll: dik li nxandru l-imħabba permezz ta’ ħajjitna.

Anke il-Papa Franġisku ukoll qed ikellimna il-ħin kollu dwar l-imħabba. Il-messaġġ tat-Trinità dan hu: messaġġ tal-Imħabba. U Kristu irridna nxandru dan; il-Missier l-Iben u l-Ispirtu s-Santu: l-Imħabba!

U meta nitkellmu dwar l-imħabba ma nistgħux ma niftakrux fil-passaġġ mill-ewwel ittra ta’ San Pawl lill-Korintin, Kapitlu 13, Versi 1 sa 8 u 13.

Li kont nitkellem bl-ilsna tal-bnedmin u tal-anġli bla ma kelli l-imħabba kont inkun qisni strument tar-ram iżarżar jew platti jċekċku.  U kieku kelli d-don tal-profezija u kont naf il-misteri kollha tal-għerf kollu, kieku kelli l-fidi tiegħi sħiħa li tqanqal il-muntanji, imma ma kellix imħabba, jien ma kont inkun xejn. U kieku kelli nqassam ġidi kollu fil-karità u nagħti ġismi għall-ħruq, bla ma jkolli mħabba, xejn ma jkun jiswieli ta’ ġid. L-imħabba taf tistabar u tħenn; l-imħabba mhijiex għajjura, ma tintefaħx biha nifishama , ma titkabbarx fuq l-oħrajn; ma tagħmilx dak li mhux xieraq; ma tfittixx dak li hu tagħha, xejn ma tinkorla; ma żżommx f’qalbha għad-deni, ma tifraħx bl-inġustizzja, imma tifraħ bil-verità: kollox tagħder, kollox temmen, kollox tittama, kollox tissaporti. L-imħabba tintemm qatt, jgħibu l-profeziji, jisktu l-ilsna, jgħib l-għerf. Issa hawn fidi, tama u mħabba, it-tlieta jibqgħu, il-kbira fosthom hija l-imħabba.

San Girgor il-Kbir kien għamel din il-katekeżi dwar dan l-Innu tal-Imħabba:

L-Imħabba taf tħenn

– Għaliex tpatti b’ġid liema bħalu kull deni li tirċievi

L-Imħabba mhijiex għajjura

– Għaliex ma tixtieq xejn mill-ġid tad-dinja u għalhekk ma’ tgħirx għal min jirnexxilu jiksbu.

L-Imħabba ma tintefaħx biha nfisha

– Għaliex tant tixtieq il-premju ta’ għemil ir-ruħ li ma jimpurtaha xejn mill-ġid tad-dinja.

L-Imħabba ma’ titkabbarx fuq l-oħrajn

– Għaliex mehdija biss bl-imħabba t’Alla u tal-proxxmu u ma tagħtix kas ta’ ebda ħaġa li mhix sewwa.

L-Imħabba ma tagħmilx dak li mhux xieraq

– Għaliex hi kuntenta b’dak li hu tagħha u ma tixtieq bl-ebda mod dak li hu ta’ ħaddieħor, li hu barra minnha.

L-Imħabba ma tfittixx dak li hu tagħha

– Għaliex kull ma għandha li jintemm tqisu mhux tagħha u tqis tagħha dak biss li taf li se jibqa’ għal dejjem.

L-Imħabba xejn ma tinkorla

– Għaliex għalkemm imġarrba u mħabbta ma żżomx f’qalbha ħsibijiet ta’ tpattija u ta’ vendetta waqt li tistenna premju aqwa u akbar wara l-ħafna taħbit li minnu tgħaddi

L-Imħabba ma żżomx f’qalbha għad-deni

– Għaliex imsaħħa bl-imħabba għas-safa, teqred mill-għeruq kull mibegħda minn qalbha u ma tħalli xejn li hu mniġġes jissawwar f’qalbha.

L-Imħabba ma tifraħx bl-inġustizzja

– Għaliex għandha biss ħerqa kbira ta’ mħabba għall-bnedmin kollha u ma tafx bid-deni tal-għedewwa tagħha.

L-Imħabba tifraħ bil-verità

– Għaliex tħobb lill-oħrajn bħala nfisha u tifraħ b’dak li hu tajjeb fl-oħrajn daqskemm tifraħ bil-mixi ‘l quddiem tagħha stess.

Il-Laqgħa spiċċat bit-talba tal-Missierna.

Fil-laqgħa ta’ Prayer Café, tat-22 ta’ Mejju 2015,  wara li ħadna kikkra kafe flimkien, trattajna l-qari tal-quddiesa ta’ nhar il-Ħadd 25 ta’ Mejju; it-tmien Ħadd tal-Għid jew Għid il-Ħamsin. It-tema ewlenija kif mistenni f’Pentecoste, kienet fuq l-Ispirtu s-Santu.

Fil-ħajja spiss nħossuna sfiduċjati , iżolati u b’qalbna maqtugħa minn dawk ta’ madwarna. Ngħaddu minn mumenti ta’ dlam u qtiegħ il-qalb. Pero il-Mulej daħal fil-ħajja tagħna bħala bniedem –Ġesu- u għaraf l-umanita fraġli tagħna. Bħala ġrajja llum se nħarsu lejn il-ġrajja li seħħet wara t-tlugħ ta’ Ġesu fis-sema, meta kif kien wegħedna Hu bagħat l-Ispirtu s-Santu, d-Difensur tagħna fuq id-dixxipli u Marija li kienu msakkrin f’kamra isolati weħidhom.  Xogħol  l-Ispirtu S-Santu huwa li jsaħħaħna u jagħtina skop fl-egħmil tagħna.

Hawn inqara l-evanġelju ta’ nhar il-Ħadd li ġej mehud minn Ġw 15, 26-27; 16, 12-15 u wara kullħadd ġie mistieden jgħid il-kelma jew frazi li laqtithom mill-vanġelu.

Din is-silta tinsab f’nofs minn dak li hu magħruf bħala d-diskors tat-tluq ta’ Ġesu li nsibuh fl-evanġelju ta’ San Ġwann minn Kap 13 sa Kap 17. Nħeġġukom taqrawhom dawn il-ġrajjiet.

Fil-vanġelu tal-llum Ġesu jitkellem fuq il-konsegwenzi inevitabbli tan-nisrani li jimxi wara Ġesu fil-fidi u l-imħabba. Waħda minnhom hi li min jimxi wara Ġesu se jiġi ppersegwitat. “id-dinja għad tobgħodkom” Infatti nafu minn esperjenzi tagħna stess li meta tiprova timxi tajjeb jibdew jinqalgħu ħafna affarijiet…iżda Ġesu tana wkoll il-garanzija tad-Difensur li jtina l-konsolazzjoni u l-faraġ li jkollna bżonn fiċ-ċirkustanzi ta’ ħajjitna, l-Ispirtu s-Santu.

L-Ispirtu s-Santu huwa it-tielet persuna tat-Trinita Mqaddsa – forsi ma nagħtuhx l-importanza li jistħoqqlu – huwa l-mutur li jaħdem bejn Alla u Ġesu biex iwasslilna l-messaġġ t’Alla – huwa HU li jnebbaħna, jiftħilna għajnejna bħalma għamel lid-dixxipli ta’ Emmaws. Nebbaħhom li dik il-persuna quddiemhom kienet Ġesu – fetħilhom għajnejhom waqt l-qsim tal-ħobż. Dan il-miraklu jseħħ quddiemna kuljum waqt kull quddiesa, qabel il-konsagrazzjoni l-qassis ibierek il-ħobż u l-inbid u jitlob il-miġja tal-Ispirtu s-Santu.

 L-Ispirtu s-Santu jnebbħek il-messaġġ int u taqra l-Bibbja. Hemm ħafna mumenti f’ħajjitna li jiġi l-Ispirtu s-Santu ġewwa fina. L-ewwel darba li ġie fuqna kien fil-magħmudija, li tibdilna, u tħalli l-marka tagħha fina, mbagħad jerġa jiġi fuqna waqt il-Griżma tal-Isqof b’qawwa akbar, fejn nirċievu d-doni tal-Ispirtu s-Santu.

Hawn inqrat is-silta mill-Ktieb tal-Atti tal-Appostli : Atti 2:1-11

Bil-qawwa tal-Ispirtu s-Santu Pietru, magħruf bħala sajjied, il-ġurnata ta’ wara din il-ġrajja kien ikkonverta 3,OOO ruħ bid-diskors tiegħu!

Din il-ġrajja seħħet fil-Festa tal-Ġimgħat u tal-Ħsad. Kienet festa li fiha jiġi offrut ‘l Alla l-frott tal-ħsad. Ġiet tissejjaħ tal-ġimgħat għaliex kienu jingħaddu 7 ġimgħat mill-Għid, 50 jum wara (Lev 23:15. Dewt 16:9). Għalkemm għall-bidu kienet festa agrikola biż-żmien saret ukoll spiritwali u solenni. F’dan iż-żmien il-poplu kien jagħmel penitenza u ma setgħux jiġu ċċelebrati żwiġijiet solenni.

Kienet waħda mit-tliet festi ta’ pellegrinaġġ (Għid-festa tal-ażżmi; Festa tal-ġimgħat u Festa tal-Għerejjex). Fiha kienu jiġu ħafna nies Ġerusalemm għalhekk kien ikun żmien ta’ ħafna nies miġbura flimkien.

Kellhom l-obbligu li jġibu magħhom żewġ ħobżiet moħmija bil-ħmira bħala radd il-ħajr ‘l Alla għall-għixien li jagħti lill-poplu. Dan il-ħobż ma kienx jinħema imma kien jiġi mogħti lis-saċerdoti.

Għall-Knisja tagħna din il-festa hija meqjusa mportanti ħafna għaliex hija t-tifkira tal-inżul tal-Ispirtu s-Santu u x-xandir tal-bxara t-tajba (KERYGMA) lill-ġnus kollha li kienu telgħu Ġerusalemm proprju għal din il-festa solenni (Atti 2,1-11).T irreferi għat-twettieq tal-wegħda ta’ Ġesù u hija simbolu tal-għaqda u l-universalità tal-Knisja.  Silta għal qalb l-membri tal-Moviment Kerygma għax minn din is-silta ittieħed l-isem u l-iskop tal-Moviment tagħna. : )

 Fil-jum ta’ Pentekoste, San Pietru, bniedem li kien magħruf bħala sajjied, ppriedka lil-Lhud f’Ġerusalemm u f’dak il-jum, jekk noqogħdu għal dak li naqraw fl-Atti tal-Appostli, mhux inqas minn 3,000 ruħ ħadu l-magħmudija!

Minn hawn tibda l-ħidma missjunarja tal-Knisja. “Intom tkunu xhieda tiegħi f’Ġerusalemm, fil-Lhudija kollha u fis-Samarija u sa truf l-art.” (Atti 1,8)

Biex nidħlu aktar fl-atmosfera tal-ambjent ta’ din il-ġrajja, ntwera l-video:

• Video 1: L-Inżul tal-Ispirtu s-Santu fuq l-appostli:

Ftit wara dan l-episodju fil-bibbja nsibu d-diskors ta’ San Pietru fejn kien qal;  “ le dawn mhumiex fis-sakra kif qed taħsbu intom, għadhom id-disgħa ta’ filgħodu”. Dan l-atteġġament niltaqgħu miegħu anke llum meta nibdew nitkellmu fuq Ġesu jew nuru li nimxu warajh bilkemm ma jkunux iridu jgħidu li tlaqna jew jiprovaw iwaqqgħuna għaċ-ċajt. Pero meta nkunu qed ngħaddu messaġġ ta’ ĠESU rridu nibqgħu għaddejjin u ma naqtgħux qalbna u hawn jidħol l-Ispirtu s-Santu – Hu jagħtina dik il-qawwa biex nkomplu nxandru anke f’mumenti li nkunu qed naqtgħu qalbna.

Wara ħarisna mill-qrib lejn it-talba tal-Moviment tagħna: it-Talba tal-Moviment Kerygma/Talba lill-Ispirtu s-Santu.

1)     Spirtu s-Santu nitolbuk tinżel fina,

2)     biex turina xi trid minna,

3)     sabiex b’għemilna u ħidmietna nwasslu l-bxara t-tajba fl-ambjent ta’ madwarna.

4)     Dawwlilna moħħna biex nagħrfu nimpenjaw ruħna bħala nsara fis-soċjetà.

5)     Bierek il-ħidma tagħna, ibqa’ magħna, sabiex aħna nkunu strumenti tal-bxara t-tajba.

Mistoqsijiet:

Min hu l-Ispirtu s-Santu għalina?

X’naħsbu li huwa xogħlu u l-effetti tiegħu?

L-Ispirtu s-Santu jagħmilna ġisem wieħed, grupp wieħed, Knisja waħda. Kemm nagħrfu din il-qawwa ta’ grupp, ta’ Moviment li tinsab fina?

Xi tfisser il-kelma Kerygma u fejn seħħet fil-ġrajja tal-lum?

Xi tfisser li tkun xhud ta’ xi ħadd? Għal min qegħdin inkunu xhieda aħna u x’inhu l-Messaġġ li qegħdin inwasslu?

X’inhuma d-doni tal-Ispirtu s-Santu?

Xhieda

Vers 27 jgħid: “U intom ukoll tixhdu, għax intom kontu miegħi sa mill-bidu.”

Għaliex insibuha daqshekk diffiċli biex nixhdu l-fidi tagħna quddiem l-oħrajn? Nista’ nibqa’ sieket u ma nxandarx?

Li tagħti xhieda jitlob minna li nkunu konvinti minn dak li qed nagħmlu u nagħtu l-provi tat-twemmin tagħna. Irridu nkunu konvinti.

Waħda mill-membri qalet li hi jolqotha l-vers “b’egħmilna u ħidmitna” ix-xhieda tagħna tkun aktar qawwija meta nagħmlu dak li nemmnu milli niprietkaw biss b’ħafna kliem.

Oħra semmiet li għandna nsejħu lill-Ispirtu jqawwina kontinwament għax aħna bħala bnedmin, aħna dgħajfa ,u għalhekk hemm bżonn li nerġgħu nitqawwew wara xi waqgħa biex nerġgħu nqumu.

Aħna strumenti tal-bxara t-tajba u hekk hu aħna strumenti t’Alla – strument waħdu ma jdoqqx, aħna rridu nkunu l-istrumenti t’Alla biex inwasslu l-messaġġ tiegħu.

Wara nqara passaġġ mill-Atti tal-Appostli Kap 3.

Jista’ jkun li l-egoiżmu tagħna ma jħalliniex naċċettaw il-fatt li għandna bżonn l-għajnuna tal-Ispirtu s-Santu li jiggwidana? San Pietru meta fejjaq lill-magħtub tat-tempju (Atti 3, 1-10) qal lill-magħtub: “Fidda u deheb ma għandix; imma dak li għandi se nagħtihulek: fl-isem ta’ Ġesù Kristu ta’ Nazaret, imxi!”

Mela ifejjaq huwa Alla biss. L-Ispirtu s-Santu jgħallem u jħarreġ lid-dixxiplu biex f’ismu jagħmel il-mirakli.

Video 2:

San Pietru jfejjaq il-magħtub bil-qawwa ta’ Ġesù ta’ Nazaret

Video li juri kif ntqal fil-bidu tal-laqgħa meta twassal l-messaġġ ta’ Ġesu stenna l-persekuzzjoni infatti l-video jispiċċa bid-dixxipli jintefgħu l-ħabs. Iżda kif stqarr Pietru fil-video “We have a duty to speak..” hekk ukoll aħna – ma nistgħux nieqfu nxandru.

Din il-persekuzzjoni hi attwali fid-dinja tal-llum, fil-ħarġa ta’ Xandar il-Kelma nsibu li fis-sena 2013 ġew maqtula 135,000 nsara minħabba l-fidi tagħhom. Bħalissa hemm 150 miljun nsara mhedda madwar id-dinja kollha.

Il-laqgħa ngħalqet bil-qari tas-Sekwenza u bit-talba tal-Missierna.

Prayer Café 15 ta’ Mejju 2015: Lapsi

Il-laqgħa bdiet bħas-soltu bit-talba tal-Moviment.  Wara inqrat is-silta meħuda mill-għeluq tal-Evanġelju ta’ San Mark li tirrakkonta fid-dettal kif Ġesù tal-missjoni lill-Appostli qabel ittella’ fis-sema.  Il-festa magħrufa bħala Lapsi.

Inqrat is-silta ukoll mill-għeluq tal-Evanġelju ta’ San Luqa li tirrakkonta l-istess ġrajja għalkemm iktar fil-qosor u bla dettalji żejda.  Dawn huma l-uniċi żewġ evanġelisti li jirrakontawlna din il-ġrajja.  Dan ifisser li l-Mulej tela’ s-sema u ġie kollox fi tmiemu?

Iżda filwaqt li ż-żewġt Evanġelji jagħlqu b’din il-ġrajja, fl-Atti tal-Appostli insibu l-istess ġrajja – x’aktarx miktub ukoll mill-istess id tal-evanġelisti – propju fil-bidu u b’aktar dettall.  Ġesù qalilhom ukoll “meta jiġi fuqkom l-Ispirtu s-Santu, intom tirċievu l-qawwa u tkunu xhieda tiegħi f’Ġerusalem, fil-Lhudija kollha u s-Samrija u sa truf l-art”. Tissemma ukoll kif “żewġt irġiel lebsin l-abjad jgħidu lill-Appostli “Irġiel tal-Galilija, x’intom tħarsu lejn is-sema?  Dan Ġesù, li kien meħud minn magħkom lejn is-sema, għad jerġa’ jiġi kif rajtuh sejjer”.  Ġesù jwiegħed li ħa jibgħat Spirtu difensur u b’hekk turi li hemm kontinwazzjoni tal-preżenza ta’ Ġesù fostna u mhux spiċċa kollox mat-tlugħ fis-sema.

 Tana missjoni biex inxandru l-Kelma t’Alla.  Fil-fatt dan hu l-għan tal-Movement Kerŷgma!  Illum naraw l-bżonn tal-impenn anke tal-lajċi fi ħdan il-Knisja fin-nuqqas ta’ vokazzjonijiet.  Ma jiswa xejn li jkollok eluf kbar ta’ saċerdoti u ma jkollokx lajċi jew viċi versa li jkollok ħafna lajċi u ma jkollokx min jamministra s-Sagramenti.  Mhux il-kwantità imma l-kwalità tgħodd.  Kull wieħed u waħda minna għandu l-missjoni biex iwassal l-Bxara it-tajba sat-tarf tad-dinja.  Ma jfissirx li rridu nitilqu fl-artijiet imbegħda għax din il-missjoni tista’ tagħmilha fl-ambjent ta’ madwarna: fid-dar, fil-familja, fl-uffiċju, fil-fabbrika, mal-ħbieb: inkunu fejn inkunu.  Illum aktar minn qatt qabel għandna bżonn tal-evanġeliżżazzjoni.

Illum il-Knisja għandha influwenza anke fuq il-kultura. F’sempliċi reklam tal-kafè naraw rappreżentazzjoni tal-Ġenna b’San Pietru mal-Anġli mixjin fuq is-sħab!  Ma nistgħux naqbdu u nwarrbu r-reliġjon minn fostna.  Żball li forsi d-dinja ta’ llum qed tipprova tagħmel: twarrab elfejn sena ta’ storja, tagħlim u kultura!

Aħna lkoll nagħmlu parti mill-knisja u l-knisja ikollha xi ħaġa nieqsa mingħajrna.  Aħna għandna missjoni x’nagħmlu f’din id-dinja. Issa jew nagħmluha sew jew ħa naħarbu minn dan ix-xogħol li ħallielna Ġesù.

Hawn infetħet id-diskussjoni.  Ġew diskussi diversi temi rrelatati ma’ dan il-Vanġelu: l-Ġenna u l-Ġenna tal-Art. Fil-verità il-Ġenna mhux post fiżiku imma fejn titgawda l-glorja ta’ dejjem.

Meta qamet il-mistoqsija jekk min mhux mgħammed u ma jemminx hux diġa’ kkundannat skont m’hemm fl-istess Evanġelju, intqal li aħna liberi. Alla jagħtina ċans li nidinbu imma  jagħtina ċans ukoll li nirrikonċiljaw bis-Sagrament tal-qrar. Hu jaf li aħna dgħajfin u naqgħu. Anke l-Papa jqerr darba kull ħmistax! Tana l-għodda biex insalvaw!

Anke nies ta’ reliġjonijiet oħra: jekk dawn jimxu sewwa fir-reliġjon tagħħom, jistgħu jsalvaw ukoll!  Kristu stess qal li ‘għandi nagħaġ oħra li mhumiex minn dan il-maqjel’  Alla sal-aħħar sekonda jibqa’ jagħtina ċ-ċans li nsalvaw! Ma ninsewx li l-ħalliel t-tajjeb li ġie mwiegħed l-Ġenna fl-aħħar mumenti ta’ ħajtu.

Il-laqgħa ntemmet billi nqrat storja u bit-talba tal-Missierna.

Il-laqgħa Prayer Café tal-Ġimgħa 8 ta’ Mejju, bdiet b’talba ċkejkna u spontanja; fejn aħna inħallu l-Ispirtu jaħdem fina, imexxina u jqanqalna, għax fejn tnejn jew tlieta jkunu hemm, hemm jien inkun f’nofshom.  Segwita minn mistoqsija elimentari li kienu jsaqsuha fil-Katekiżmu.

Fejn jinsab Alla?

B’mod umoristiku, il-membri preżenti wieġbu dak li konna ngħidu meta konna żgħar.

Alla jinsab fis-sema, fl-art u kullimkien.

Wara dan inqara l-vanġelu tal-Ħadd li ġej skont San Ġwann (15: 9-17).

Intqal li dan l-aħħar kellna proċess, fejn ġimgħa ilu kellna vanġelu tar-Ragħaj it-tajjeb – in-nagħaġ jagħrfu leħnu u hu jagħrafhom minn leħinhom.  Li kieku kellu jgħaddi xi ħadd prominenti u jgħajjatlek b’ismek, kont tieħu gost.  Ġesù, li Hu aqwa minn kull idolu, jafna b’isimna.  Fil-vanġelu ta’ qabel, kien hemm id-dielja: ‘Min jibqa’ fija u jiena fih..’  Illum reġa’ qalilna ħaġa oħra.

Allura x’inhu dan il-proċess?

Huwa proċess ta’ intimita’.  L-intimita’, Ġesù qed itiha ċertu dimensjoni, bdieha l-ġimgħa l-oħra.  Ġesù qed jitkellem bi kliem sempliċi, kultant taħsbu qed idur mal-lewża, imma mhuwiex.  Imma qed jgħaqqad dan il-proċess ta’ intimita’ – aħna, Hu u l-Missier.

Il-ġimgħa l-oħra, ippreżentalna, li aħna il-fergħa, Hu iz-zokk u l-Missier il-bidwi.  Aħna ma nistgħux  nagħmlu frott jekk ninqataw minn maz-zokk.

Hawnhekk ingħatat spejgazzjoni verament li tolqot lil kullħadd:

Meta taqsam iz-zokk, joħroġ il-ħalib; qed niċċelebraw il-maternita’, il-ġmiel tal-intimita’ tal-omm mat-tarbija, l-ewwel fiha u mbagħad treddaw.  U l-missier huwa l-bidwi, li jdur, jnaqqi u kultant jisbor.  Probabbli d-dielja tgħidlu “ahh” x’ħin jiżborha, imma mingħajr iż-żabra ma jsirx il-frott.  Din hija ir-realta’.

Bil-Vanġelu tal-Ħadd li ġej, din titkompla, “Kif ħabbni Missieri, hekk ħabbejtkom jiena”.  “Ibqgħu fl-imħabba tiegħi.”  Nerġgħu insibu l-intimita’.  It-tgħanniqa li Ġesù jrid jagħti lilek illum.  Din insibuha ukoll fil-logo li saret għas-sena tal-ħniena li għadu kemm niehda l-Papa,  bit-tema, “ħennu bħalma hu ħanin Missieri”

X’ifisser dan?

Li bħalma Ġesù dejjem qal li “min ra lili ra l-Missieri, għax jien u Hu ħaġa waħda”, hekk ukoll qed jistieden lilna biex inkunu intimi miegħu – Hu fina u aħna fiH.

Għaliex dan?

Għax b’din l-intimita’, Ġesù qed itina l-ferħ ġewwieni.  Irridu nisperjenzawH.

 

Biex aħna nibqgħu f’dan il-ferħ, irridu inħobbu lil xulxin.

Meta fil-bidu ġie mistoqsi, “Fejn Hu Alla?” aktarx ħadd ma ħaseb li Alla Hu fina.

Alla Jinsab Fija?

“Qalbna ma jsib qatt kwiet jekk ma tistrieħx fik” – Santu Wistin.

Dak hu il-ferħ.

 

Il-parti l-oħra tal-Vanġelu titratta fuq il-ħbiberija.  Is-servjent mhux ħa tgħidlu kollox, imma ħabib/a intimu tgħidlu kollox.  Dak kollox li l-Missier qal lil Ġesù, Hu qalu lilna.

‘Mhux intom għażiltu lili, imma jien għażilt lilkom, u ħtartkom biex tmorru tagħmlu l-frott u l-frott tagħkom jibqa’’

Aħsbu sew fuq din is-sentenza.  Għax INT mintix qiegħed hawn għalxejn.  Mhux int għażilt li tattendi l-laqgħa imma Ġesù għażlek, Hu li jafek b’ismek, għajjatlek.  Għajjatlek biex tagħmel il-frott.  Iva int.  Il-frott nistgħu nagħmluh jekk nibqgħu imwaħħlin miegħu.

Tkunx attiv fil-komunita’ mingħajr ma tagħmel il-frott.

Tkunx attiv fil-ħajja tiegħek, mingħajr ma tagħmel il-frott.

Ħafna drabi lil Ġesù ndaħħluh fl-aġenda tagħna.  Niftakru f’dik is-silta fejn Ġesù qal, “ħalli kulma titlob lill-Missier f’ismi, huwa jagħtihulkom”, imma rridu nkunu mwaħħlin fiH.  Trid tkun parallel ma’ Ġesù.

Il-Mulej għażilna:  għaliex? Kulħadd irid jwieġeb hu għalih innifsu.  Għażilna biex kulħadd jagħmel il-frott u dan jista’ jsir jekk aħna nħobbu lil xulxin.  Hekk biss nistgħu nibqgħ magħqudin miegħu u hekk biss il-ferħ tagħna jista’ jkun sħiħ.

‘Mhux intom għażiltu lili, imma jien għażilt lilkom’

Dan il-Vanġelu jmur tajjeb ma’ Jum l-Omm.  Dan għaliex jum l-omm huwa vjaġġ ta’ imħabba matul ħajjitna u mhux ta’ ġurnata.  Ġesù tana lil ommu fuq is-salib fejn miet għalina.  Omm hija dik li tagħti mħabbitha ‘Dan hu l-kmandament tiegħi: li tħobbu lil xulxin kif ħabbejtkom jien.’

IL-Laqgħa PRAYER CAFE ta’ l-1 ta’ Mejju bdiet bil-qari tal-vanġelu tal-Ħadd li jmiss meħud minn San Ġwann 15:1-8. Dawn huma xi punti li ntqalu waqt il-laqgħa.  Il-vanġelu ta’ San Ġwann nqisuh bħala l-vanġelu tal-imħabba u hu mibdi bi stil naqra tqil, b’mod astratt, “ Fil-bidu kien il-Verb…” Imma mbagħad insibu li il-Verb misterjuz sar bniedem u sar vizibli, sar xi ħadd li d-dixxipli raw u semgħu.

Filqat li l-ġimgħa l-oħra Ġesu ġie msejjah mhux biss ragħaj iżda r-Ragħaj it-Tajjeb, fil-vanġelu ta’ din il-ġimgħa nsibu lil Ġesu jxebbah lilu nnifsu ma dielja; anzi ma Dielja Vera. Ix-xbieha tad-dielja turi t-tip ta’ relazzjoni li kien hemm bejn id-dixxipli u Ġesu. Il-friegħi ma jistgħu jagħmlu xejn weħidhom; iżda hemm bżonn li jibqgħu magħqudin maz-zokk prinċipali. Filwaqt li nagħġa tista’ taħrab u titlaq minn fejn ir-ragħaj tagħha, il-fergħa trid tibqa’ mwaħħla maż-żokk biex tagħti l-frott. L-għaqda li hemm bejn iż-żokk u l-friegħi mhix bħal żewġ ħwejjeġ marbutin jew imwaħħlin flimkien. Hija rabta minn ġewwa, parti mill-istess ħajja. Hekk trid tkun ir-relazzjoni tagħna ma Ġesu. Irridu nkunu ħaġa waħda miegħu.

Il-verb “tibqa’ ” ġie użat ħafna drabi f’dan il-qari tal-lum. “Ibqgħu fija, jiena nibqa’ fikom…Kif il-fergħa ma tistax tagħmel frott minnha nnfisha jekk ma tibqax fid-dielja, hekk anqas intom jekk ma tibqgħux fija. …Min jibqa’ fija u jiena fih, dan jagħmel ħafna frott, ….Jekk wieħed ma jibqax fija, jintrema barra bħal fergħa u jinxef…Jekk tibqgħu fija u kliemi jibqa’ fikom…Mela rridu niddeċidu rridux nimxu ma Ġesu ; u jekk iva rridu nżommu mal-kmandamenti  tiegħu u nagħmlu dak li joġgħob lilu. Jeħtieġ li nħobbu lil xulxin fl-egħmil mhux biss bil-kliem.

Aħna parti minn proċess – għandna responsabilita wkoll fil-knisja. Nistgħu nkunu nafu l-Bibbja kollha iżda qatt ma nkunu esperjenzajna lil Ġesu. Aħna parti minn komunita’, mela l-imġieba tagħna se tħalli effett fuq dawk ta’ madwarna. Bl-imġieba tagħna se nħallu l-friegħi  ta’ madwarna jħaddru jew se noqtluhom bl-indifferenza – bin-negattivita! Kultant niltaqgħu ma’ persuni li nħossuhom jixorbuna bin-negattivita tagħhom. Ma nistgħux ngħaddu l-ferħ tal-vanġelu jekk noqgħodu dejjem bil-geddum. Għandna nuru l-ferħ fil-knejjes tagħna  b’kant ta’ ferħ u billi nilqgħu lill xulxin.  Irridu nifhmu li dak li nagħmlu se jirrifletti fuq il-komunita. Ma nistgħux ngħidu li aħna n-nisrani u nitkellmu baxx. Ma nistgħux ngħidu li aħna nsara u naħlu ħina fuq ix-xogħol.  Rridu nagħmlu kollox għal imħabba t’Alla bl-imħabba t’Alla. Mother Theresa kienet tħobb tgħid “ Always do small things with great love.” Hija aktar diffiċli li tħobb lil dawk ta’ madwarek milli titfa’ idejk fil-but u tagħti karita lil min hu l-bogħod minnek bħal nies fil-bżonn fl-Afrika u f’Nepal.  Papa Franġisku dejjem iħeġġiġna biex inkunu konxji tal-bżonnijiet ta’ dawk ta’ madwarna, ta’ dawk l-aktar viċin tagħna.

B’egħmilna u kliemna rridu nkunu xhieda ta’ dak li nemmnu.

Fl-Aħħar Ikla li għamel mal-Appostli, Ġesù qalilhom: “Mhux intom għażiltu lili, imma jien għażilt lilkom” (Ġw 15,16),  u dan ifakkar lil kulħadd, u mhux biss lis-saċerdoti, li kull vokazzjoni hi dejjem inizjattiva t’Alla. Aktar lura fl-istess kapitlu 16 vers 18 nsibu: “Jekk id-dinja tobgħodkom, kunu afu li lili bagħditni qabel ma bagħdet lilkom.” .. “ Jekk ippersegwitaw lili, għad jippersegwitaw lilkom ukoll..” Li tkun xhud ta’ Kristu mhix faċli. Irridu nkunu konvinti minn dak li nemmnu u anke meta nkunu għaddejin minn problemi fil-ħajja rridu nħallu lil Ġesu jmexxina – bħalma Ġesu mexxa d-dgħajsa tal-appostli fil-maltempata, aħna rridu nafdaw fil-Mulej u nħallu togħma tajba fejn inkunu tkun xi tkun is-sitwazzjoni. Li tkun nisrani fil-ġurnata tal-llum qed tfisser li tkun saħansitra martri ..refugjati nsara ġew magħżula minn aħwa Musulmani u minnħabba twemminhom ġew mitfugħ il-baħar .Il-grupp estremist Isis qatlu nsara oħra billi qatgħulhom  rashom barra.

Nħossu li l-Ġordan hu post sagru? Hawn kien għix Sidna Ġesu Kristu. Qassis mill-Ġordan Father Nabil Haddad qal: “Kif jistgħu l-Musulmani jemmnu li din (il-Gordan) hi l-art Mqaddsa jekk ma jaraw lil ħadd hawn? Nixtieq li nkun kburi bl-ammont ta’ turisti li jiġu jzuru dan il-post sagru.”

Ix-xhieda tagħna bħala nsara trid tibda mill-familja tagħna stess. L-imħabba lejn it-tfal mhux bir-rigali nuruha iżda billi nħobbuhom u nikkoreġuhom bl-imħabba. Li tkun nisrani mhux li tmur l-quddiesa tal-Ħadd biss – iżda nuruh bil-mod kif nitkellmu d-dar, ix-xogħol, u kull fejn inkunu. Irridu nkunu friegħi li jħaddru kull fejn inkunu.

Ssemma ukoll li l-1 ta’ Mejju hi ukoll il-Festa ta’ San Ġuzepp Ħaddiem. Fl-1899, il-Papa Ljun XIII, kien talab lill-ħaddiema jżommu ’l San Ġużepp bħala protettur u l-Mudell tagħhom. Hu xtaqhom ifittxu li jtejbu mhux biss l-affarijiet materjali iżda wkoll dawk spiritwali. San Ġużepp ġie magħżul biex ikun il-Patrun tal-Ħaddiema, mhux biss għax kien jaqla’ l-ħobża ta’ kuljum bix-xogħol ta’ idejh u bl-għaraq ta’ xbinu, iżda wkoll għax fl-istess waqt kellu jieħu ħsieb, u jmantni lil Ġesu u l-Madonna. Il-ħaddiem għandu jimita lil San Ġużepp, mhux biss li jaħdem bl-onesta, iżda wkoll li jrabbi l-familja tiegħu skond il-qalb t’Alla, u jieħu x-xogħol bħala mezz ta’ salvazzjoni.

Il-Laqgħa nngħalqet bit-talba tal-Missierna u bi stedina għal attivitajiet li se jittelgħu mill-Moviment Kerygma fl-okkazzjoni tal-Jum l-Omm. Għal aktar informazzjoni agħfas hawn.

 

Fil-bidu nqara l-Vanġelu tar-raba’ Ħadd tal-Għid, mill-evanġelju ta’ San Ġwann kapitlu 10, versi 11 sa 18, il-Vanġelu tar-Ragħaj it-Tajjeb.

Fil-bidu ntqal li interessanti wieħed ikun jaf li kienet drawwa tal-Lhud fi żmien Kristu li meta ikolhom nagħaġa jew ħaruf li jitbiegħed kontinwament mill-merħla, ir-ragħaj kien jiksrilha sieq minnhom u jġorrha hu kull fejn jieħu l-merħla, sakemm din terġa’ tfiq.

Din is-silta hi stedina biex niftakru fir-Ragħajja… fil-vokazzjonijiet. Aħna lkoll għandna vokazzjoni. F’dan il-Vanġelu għandna diskors mqanqal ta’ Ġesù, fejn Hu qed jagħmel polemika mal-mexxeja tal-Lhud. Dan għaliex ir-ragħaj it-tajjeb huwa dak li jiġbor il-merħla u jista’ jasal li jagħti ħajtu għaliha. Min-naħa l-oħra, min hu mikri; ir-ragħaj li jmexxi n-nagħaġ li m’humiex tiegħu, dak li qed jagħmel, qed jagħmlu għall-interess tiegħu nnifsu; hu merċenarju. Ir-ragħaj veru, jaħdem għax iħobb. Għall-kuntrarju tal-merċenarju, dan ma jfittix l-interessi tiegħu anke jekk ikollu jissagrifika ħafna – saħansitra l-istess ħajtu.  Il-lupu li jaħtaf u jferrex in-nagħaġ huwa d-dnub.

Fil-Ktieb ta’ Eżekjel insibu:

‘Hekk jgħid Sidi l-Mulej: Ħażin għalikom ir-rgħajja ta’ Iżrael li jirgħu lilhom infushom!’ [Eżek:34:2]

Min jirgħa lilu nnifsu? Min huwa self-centered u jieħu ħsieb l-interessi tiegħu nnifsu biss. Ġesù għamel il-kontra. Ġie fid-dinja u ta lilu nnifsu, biex jiġbor f’ġemgħa waħda, l-ulied ta’ Alla li kienu mxerdin.

Hawnhekk ma nistgħux ma nsemmux l-indifferenza, li ħafna drabi jsemmi il-Papa Franġisku, lejn it-traġedja li qiegħda sseħħ fil-Mediterran. L-isqof Scicluna ukoll semma dan meta fl-Omelija fil-Festa ta’ San Publiju (19/04/2015) qal li inutli li fil-festi noqogħdu nżeffnu l-istatwi imbagħad naraw dik il-mibgħeda kollha fil-medja soċjali. F’dan il-kuntest il-kliem ta’ Eżekjel jagħmel ħafna sens:

“ma’ wiċċ l-art kollha xterdet il-merħla tiegħi, u ma hemm ħadd min jistaqsi għaliha, ma hemm ħadd min ifittixha.” [Eżek:34:6]

Imma Alla l-Missier impurtah; tant impurtah li bagħat lil Ibnu.

Il-Papa Franġisku qal “Dawn huma rġiel u nisa bħalna, ħutna li qed ifittxu ħajja aħjar, bil-ġuħ, ippersegwitati, miġrugħin, vittmi tal-gwerrer; qed ifittxu ħajja aħjar.  Kienu qed ifittxu l-feliċità…” (Diskors Regina Coeli  19/4/2015)

…U minflok sabu l-qabar.

Dino Boffo, li kien direttur tal-istazzjon TV2000 kien qal li: “il-Mediterran sar il-qabar tal-falliment tal-globilazzazjoni”. Dan għaliex il-globalizzazjoni qarbet u rikbet fuq xulxin il-kulturi u globalizzat ukoll l-Indifferenza, kif qal il-Papa meta mar Lampedusa.

Dan il-Vanġelu għandu jkun mudell għal dak li qed immexxi; għall-kap. U sfortunatament ħafna drabi mhux nimxu fuq dan il-Mudell ta’ Kristu imma qigħdin nimxu fuq il-Mudell ta’ Kajjin: “U l-Mulej qal lil Kajjin: “Fejn hu ħuk Abel?” U hu wieġbu: “Ma nafx. Jaqaw jien għassies ta’ ħija” [Ġen:4:9] ; Dan hu l-Mudell tal-indifferenza. Hu din hi l-attitudni li ħafna drabi nieħdu aħna.

Is-soluzzjoni ta’ dan huwa dak li qed jipproponi Ġesù: il-liberta’ tal-imħabba u tal-qadi!

Jew se nkunu rgħajja bħalma jridna l-Mulej, jew le. Ma Alla hemmx triq tan-nofs. Ir-ragħaj it-tajjeb huwa wieħed: Ġesù; jew nixbħu lilu jew nintilfu. U nistgħu naslu biex nixbħu lil Ġesù, bl-għajnuna tal-Ispirtu s-Santu biss.  L-Ispirtu s-Santu jista’ jgħinna biex naħsbu kif kien jaħseb Ġesù. U għalhekk irridu nitolbuh jgħinna.

Għalhekk tajjeb li nitolbu:

1. għalina nfusna biex ngħixu ħajjitna fuq il-mudell ta’ Ġesù.
2. biex ir-rgħajja tagħna – l-isqfijiet u s-saċerdoti – ikunu jixbħu l-veru Ragħaj it-Tajjeb: Ġesù.
3. għall-vokazzjonijiet; biex aktar żgħażagħ ikollhom il-kuraġġ.

Il-Papa Franġisku, waqt l-omelija ta’ Ħadd il-Palm (29/3/15), qal li l-umilta’ ma tiġix mingħajr umiljazzjoni. Meta Kristu ħasel saqajn l-appostli, umilja ruħu u ħabb sal-aħħar!  Hekk ukoll għamel fuq is-salib. Jekk naraw dan f’dawl nisrani, aħna naċċettaw l-umiljazzjoni għax nkunu qegħdin nixbħu lil Kristu. Inħobbu u Naqdu.

Evanġelju tat-Tielet Ħadd tal-Għid.

Il-Kelliem beda biex jgħid li l-evanġelju tal-lum huwa ċċentrat dwar suġġett għal qalbu u għal qalb ħafna nies; l-ikel. Id-dixxipli proprju għarfu lil Ġesù fil-qsim tal-ħobż. Ġesù kien filfatt qiegħed miexi mad-dixxipli ta’ Emmaws u għamel tabirruħu li se jibqa’ sejjer. Huma però talbuh biex jibqa’ jiekol magħhom. Wara li għarfuh fil-qsim tal-ħobż reggħu marru lura Ġerusalemm għand id-dixxipli biex jgħidulhom li l-Mulej qam. Din kienet aħbar straordinarja li qatt ma nstemgħet. Ġesù kien qajjem nies mill-mewt bħal Lazzru u l-armla ta’ Najm, però ħadd ma kien qam mill-imwiet waħdu.

Issa llum reġa’ dehrilhom u biex jurihom  li ma kienx fantażma talabhom għal xi ħaġa x’jiekol biex jurihom li l-iħirsa ma jiklux imma hu, Ġesù li qam mill-mewt iva.

Riflessjoni oħra dwar it-tema tal-ikel fl-evanġelji kienet li l-Ewkaristija wkoll waqt ikla ġiet imwaqqfa.

Għaliex Ġesù kien jagħżel dawn il-mumenti hekk importanti proprju ta’ ikla? Aħna bħala soċjetà għandna d-drawwa li biex nitkellmu bejnietna nistiednu lil xulxin għall-ikel jew biex niltaqgħu flimkien nagħmlu dan waqt xi ikla. L-ikel bħal joffri ambjent ta’ ħbiberija, qsim ta’ ferħ u esperjenzi. Huwa mument fejn dak li huwa tiegħi qiegħed inpoġġieh fin-nofs biex naqsmu ma’ ħaddieħor. Kristu ħallielna lilu nnifsu waqt l-Ikla tal-Għid li kien qiegħed jagħmel mal-appostli.

Aħna ħafna drabi nkunu mistiedna għall-pranzu, għall-ikla mal-Mulej. Il-Quddiesa hija l-istedina li għamlilna Ġesù elfejn sena ilu. Issa jiddependi minna jekk nużawx din l-istedina biex nerġgħu niltaqgħu ma’ Ġesù reali jew le. Għandna nemmnu li se niltaqgħu ma’ Ġesù ħaj u f’ambjent ta’ festa u qsim mal-oħrajn. Ġesù huwa dak li hemm quddiemna waqt l-ikla. Min ikun hemm quddiemna huwa mportanti waqt ikla. Fl-ewkaristija hemm Ġesù quddiemna preżenti quddiemna.

Jista’ jkun li hawn quddies li ma tistax issejjaħlu festa però għall-grazzja t’Alla wieħed jista’ jfittex quddiesa hu li jsibha adattata għalih. Ejja nieħdu ċ-ċans li niltaqgħu ma’ dan Ġesù l-ħabib tagħna u miegħu naqsmu dawk l-affarijiet sbieħ li qegħdin jiġrulna u anke n-niket li forsi għaddejja minnu. Ġesù huwa dak il-ħabib li ma jittradina qatt. Irridu l-fidi, imqar daqs żerriegħa tal-mustarda u b’din il-fidi nistgħu żgur nagħmlu affarijiet kbar.

Issemma wkoll il-punt li meta forsi t-tqarbin isir rutina fil-ħajja tagħna, importanti li nerġgħu inħossu t-togħma ta’ dan Ġesù fl-Ewkaristija. Inkunu qegħdin nitilfu s-sens ta’ grazzja għaliex m’aħniex napprezzaw biżżejjed dan id-don li qegħdin nirċievu. Diversi nies qalu li dan ma jfissirx tieqaf mill-quddiesa għaliex b’hekk tkun qiegħed titlef minn dan is-sens ta’ ħbiberija u mħabba li nkunu ksibna ma’ Ġesù.

Il-laqgħa għalqet bil-punt li l-Ewkaristija tiftħilna  għajnejna għal dawk li hemm madwarna. Id-dixxipli ta’ Emmaws meta kielu ma’ Ġesù, raw b’mod reali dak li hemm madwarhom. Alla jrid ikun fl-ewwel post tal-ħajja tagħna, qabel ir-rutina. It-tbatija verament li tressaqna lejn Alla; imma meta jiena nirċievi l-Ewkaristija, inħoss qalbi tħabbat f’sidri għal dawk li għandhom bżonn xi ħaġa, xi tip ta’ għajnuna? Spiss quddiem traġedji li qegħdin iseħħu madwarana bħall-persekuzzjonijiet tal-insara qiegħed ikun hawn xhieda inkredibbli. U inti x’lest li tagħmel? Aħna qed ngħixu reliġjon ta’ fsied u tradizzjonijiet? Fuq ix-xogħol, fil-familja, ma’ persuni b’diżabilità x’qegħdin nagħmlu? Il-fidi tagħna għandna tkun l-evanġelju tal-ferħ.

Prayer Café 10 t’April 2015

Fil-bidu tal-laqgħa nqara l-Evanġelu ta’ nhar il-Ħadd li ġej – it-tieni Ħadd tal-Għid.  Is-silta hija meħuda minn San Ġwann fejn tittratta meta Ġesù deher lill-Appostli li kienu magħluqin għax kienu mbeżża’. Hu nefaħ fuqhom u imliehom bl-Ispirtu s-Santu.  L-ewwel darba Tumas ma kienx magħhom u ma ridx jemmen.  It-tieni darba Tumas kien magħhom u wara li ra l-pjagi qallu: “Mulej tiegħi u Alla tiegħi!” U Ġesù wieġbu “Emmint għax rajtni! Henjin dawk li ma rawx u emmnu.”

Mhux Tumas biss ma emminx.  Meta l-Anġlu qal lin-nisa, li marru biex jidilku l-ġisem ta’ Ġesù li Hu kien qam,  l-Appostli ma emmnuhomx lanqas. Pietru kien mar hu stess biex jara b’għajnejh biex emmen!  Il-frażi henjin dawk li ma rawx u emmnu tgħodd għalina lkoll.  Din il-fidi sopranaturali għandha tgħinna nżommu l-paċi f’qalbna anke meta jkollna l-kumplikazzjonijiet fil-ħajja tagħna.  Ġesù  ikun f’nofsna speċjalment meta inkunu miġburin flimkien. Hu stess kien qalilna li fejn tnejn jew tlieta jiltaqgħu f’Ismu, Hu ikun f’nofsna.  Mela jekk Alla hu magħna min jista’ jkun kontra tagħna?  Mela għaliex nibżgħu, għaliex nitħawwdu, għaliex niddubitaw? Għaliex it-twemmin tagħna huwa fqir?

Min jaf kemm-il darba nagħlqu l-bibien tagħna bħall-Appostli.  Nagħlqu qalbna. Nagħlqu moħħna.  Ninqatgħu mill-bnedmin.  L-Appostli, għalkemm Ġesù kien ippreparhom li Hu kien ser imut u jqum mill-imwiet, xorta ma emmnux u kien imwerwrin.  Aħseb u ara kemm hu iżjed diffiċli għalina li nemmnu.  Il-Qawmien ta’ Ġesù jgħina ngħixu fiċ-ċirkostanzi li nkunu fihom.

Għandna nħallu lill-Mulej jaħdem f’ħajjitna.  Jagħtina Hu s-saħħa, l-kelma u l-għerf.  Kull ma jrid hu l-kelma tagħna li nservuH.  Għandna nemmnu li Alla jista’ jagħmel ħwejjeġ kbar bina, basta nħalluH!  Kulħadd huwa msejjaħ biex jaħdem fost dawk ta’ madwaru.

Fl-aħħar inqrat silta mill-ktieb tal-Papa Franġisku, “Il-Ferħ tal-Vanġelu” bl-isem ta’ “Id-don ta’ Ġesù lill-poplu tiegħu”:

“Fuq is-salib, waqt li Ġesù kien qed ibati f’ġismu l-laqgħa drammatika bejn id-dnub tad-dinja u l-ħniena t’Alla, seta’ jilmaħ biswit riġlejh il-preżenza kollha faraġ ta’ Ommu u d-dixxiplu l maħbub.  F’dak il-waqt kruċjali, qabel stqarr b’mitmuma l-ħidma li l-Missier kien fdalu f’idejh, Ġesù qal lil Marija: “Mara, hawn hu ibnek”.  Imbagħad qal lid-dixxiplu l-maħbub: “Hawn hi ommok”.  Dawn il-kelmiet ta’ Ġesù fuq l-għatba tal-mewt l-ewwelnett ma jesprimux xi tħassib mimli ħniena għal ommu, imma pjuttost huma formula ta’ rivelazzjoni li tikxef il-misteru ta’ missjoni speċjali ta’ fidwa.  Ġesù ħallielna lil ommu biex tkun omm tagħna.  Kien biss wara li għamel dan li Ġesù seta’ jħoss li “kollox mitmum”.  F’riġlejn is-salib, fis-siegħa l-kbira tal-ħolqien ġdid, Kristu jibgħatna għand Marija.  Jibgħatna għandHa għax ma jridx li nimxu mingħajr omm u l-poplu f’dik ix-xbieha ta’ omm jaqra l-misteri kollha tal-Vanġelu.  Il-Mulej ma jridx li l-Knisja tiegħu tkun nieqsa mill-ikona femminili.  Hi, li nisslitu b’fidi hekk kbira, tissieħeb ukoll “mal-bqija ta’ nisilha, ma’ dawk li jħarsu l-preċetti ta’ Alla u li għandhom ix-xiehda ta’ Ġesù”.  Ir-rabta intima bejn Marija u kull fidil, li, f’xejriet diversi inisslu lil Kristu, ġiet imfissra bi kliem mill-isbaħ mill-Beatu Iżakk tal-Istilla: “ Fl-Iskrittura mnebbħa minn Alla, dak li b’mod ġenerali nifhmu, għall-Knisja, verġni u omm, nifhmuh b’mod ġenerali għall Verġni Marija.  Bl-istess mod nistgħu ngħidu li kull ruħ fidila hi għarusa tal-Verb ta’ Alla, omm ta’ Kristu, bint u oħt, verġni u omm għammiela.  Kristu baqa’ għal disa’ xhur f’ġuf Marija, jibqa’ fit-tabernaklu tal-fidi tal-Knisja sat-temma tas-sekli; u, fl-għarfien u fl-imħabba tar-ruħ fidila, għal dejjem ta’ dejjem.”

     Fil-bidu tal-laqgħa inqara il-Vanġelu tal-Ħadd li ġej, li hu l-Ħames Ħadd tar-Randan, mill-Evanġelju ta’ San Ġwann 12:20-33. Wara, il-Vanġelu ġie spjegat biċċa biċċa.

    Fil-bidu tal-Vanġelu jissemmew il-Griegi. Meta qiegħed jirreferi għall-Griegi, l-evanġelista qiegħed jirreferi għall-pagani; dawk li ma kienux Lhud. Dawn marru jfittxu lill-Ġesù għax probabbli semgħu biH. Dawn staqsew lil Filipu:  “Sinjur, nixtiequ naraw lil Ġesù.”

     L-ewwel riflessjoni minn din il-parti hi li l-fatt li ssemmew il-Griegi – għax dan ifisser li Ġesù ġie għal kulħadd u mhux għal-Lhud biss.

    Jekk xi ħadd qiegħed ifittex lil Ġesù, se jarah fina? Xi kultant meta nies ikunu jafu li aħna Nsara impenjati jiġu għandna bħalma l-Griegi marru għand Filippu. Dawk li jiġu għandna x’se jsibu? Hemm min josserva lilna l-Insara biex jara ngħixux skont dak li ngħidu li aħna – Insara. Fil-fatt, kultant tisma frażijiet bħal: “Basta jmorru jitqarbnu” u espressjonijiet bħal dawn. Xi kultant veru li aħna bħala nsara ma nġibux ruħna skont it-tagħlim ta’ Kristu; u dan anke fl-affarijiet ta’ kuljum, bħal meta xi ħadd ikollu bżonn l-għajnuna tagħna, anke f’affarijiet żgħar u aħna ma ntuhielux; jew meta ngħidu fuq in-nies minn wara darhom. Jekk aħna Nsara suppost min jiġi jfittex lil Ġesù, għandu jsibu fina, imma kultant aħna ma nwettqux dak li nippriedkaw u b’hekk min ifittex ma jkunx jista jara lil Ġesù fina. Dan bħal meta Ghandi qal: “I like your Christ, I do not like your Christians. Your Christians are so unlike your Christ.”  Dan ifisser li Ghandi ma riedx jikkonverti għal nisrani għax ma kienx jara eżempju tajjeb fl-Insara. Jekk xi ħadd ikollu ċans jikkonverti, jista’ jkun li aħna ntellfuh minn dan minħabba l-eżempju tagħna.

     Filippu mar jgħid lil Indrì dwar il-Griegi , u flimkien marru jgħidu lil Ġesù. Ġesù qalilhom:  “Waslet is-siegħa li fiha Bin il-bniedem ikun igglorifikat.   Tassew tassew ngħidilkom, jekk il-ħabba tal-qamħ ma taqax fl-art u tmut, hi tibqa’ weħidha; imma jekk tmut, tagħmel ħafna frott.” [Ġw:12:23-24]

     Għalkemm l-appostli probabbli ma fehmu xejn, Ġesù kien qiegħed jitkellem dwaru nniffsu u fl-istess ħin kien qed jippreparahom, għax kien jaf li dak li emmnu fih kien ser jikrolla quddiemhom.

Wara Ġesù jgħid:  “Min iħobb lil ħajtu jitlifha; imma min jobgħod lil ħajtu f’din id-dinja jħarisha għall-ħajja ta’ dejjem.” [Ġw:12:25]

     Hawnhekk Ġesù (u l-Knisja llum) ma kienx qiegħed jgħid li għandna narmu ħajjitna u m’għandniex nieħdu ħsiebha. Anzi, aħna obbligati li nieħdu ħsieb ħajjitna, però min-naħa l-oħra m’għandniex nħossuna qisna ankrati ma’ din id-dinja.  Waqt li ngħożżu ħajjitna rridu nifmhu li dak li nagħmlu m’għandniex nagħmluh għal din il-ħajja imma għall-ħajja li jmiss.

     Ġesù jkompli: “Jekk xi ħadd irid jaqdini, hu għandu jimxi warajja; u fejn inkun jien, hemm ukoll ikun il-qaddej tiegħi.” [Ġw:12:26]

     Il-qadi dejjem kien parti mportanti mill-missjoni ta’ Ġesù (eż: il-ħasil tas-saqajn f’Ħamis ix-xirka). Darba saċerdot qal li wieħed mill-aħjar modi biex tmur il-ġenna hu li tkun mizżewweġ u jkollok familja. Dan għaliex meta wieħed jgħix sew il-ħajja miżżewġa, hu (jew hi) jagħti ħajtu għall-mara (jew għar-raġel) u imbagħad għat-tfal.  Għalhekk inti tkun qiegħed tmewwet il-bżonnijiet tiegħek (u allura lilek innifsek) biex tpoġġi l-bżonnijiet ta’ ħaddieħor qabel tiegħek. Bl-istess mod Ġesù qiegħed jgħid li aħna għandna nagħtu lilna nfusna għall-bżonnijiet tal-oħrajn u għalhekk “immutu” għalina nfusna.

     Ġesù jgħid ukoll: “Min jaqdi lili, il-Missier jagħtih ġieħ” [Ġw:12:26].

Jekk tifli dawn il-kliem naraw li hawnhekk Ġesù qiegħed jgħid xi ħaġa li tal-għaġeb:  li Alla jagħti gieħ lilna u mhux aħna nagħtu gieħ lilu; dejjem jekk ngħixu skont dak li qiegħed jgħid Hu.

     Fil-vers li jmiss Ġesù jgħid: “Issa qiegħed inħoss ruħi mħawwda. U x’naqbad ngħid?” [Ġw:12:27].

     Huwa mument ieħor fejn Ġesù ħassu mħawwad. Ma kienx jaf x’se jaqbad jgħid. Jekk anke Ġesù ħassu mħawwad u ma kienx jaf x’se jaqbad jgħid, kemm iktar aħna fiċ-ċokon tagħna kultant nitħawdu.

     Aħna kultant ma nafux nitolbu mingħajr kliem. Fuq ir-radju ġieli tisma’ nies jgħidu “itlobli” għal xi ħadd viċin, “biex forsi, jaħasra, Alla jismagħni”. Dan juri li aħna ma nifhmux li Alla jismagħna dejjem. Dik hi l-fidi: li nintelqu kompletament f’idejn Alla.

 

Hawnhekk ingħadet storja ta’ grupp seminaristi li qalulhom biex ma jomgħodux chewing gum waqt li jitolbu. Seminarista minnhom saqsa jekk jistgħux jitolbu waqt li jkunu qed jomgħodu ċ-chewing gum, u r-risposta kienet fl-affermattiv. Dan jurina li l-ħajja tagħna tista’ tkun talba sħiħa, dejjem jekk qalbna u moħħna jkunu mal-Mulej.

Hemm ħafna modi kif nitobu. Anke Ġesù talab ħafna. Fit-tieni qari ta’ nhar il-Ħadd [Lhud:5:7-9] nsibu: “Meta kien jgħix fuq din l-art, Kristu offra talb u suppliki b’leħen għoli u bid-dmugħ lil dak li seta’ jsalvah mill-mewt.” Supplika tfisser titkarrab, u dan ifisser li Ġesù ma talabx biss, imma għamel iktar: tkarrab lil Alla, lil Missieru.

Il-Vanġelu jkompli: “U x’naqbad ngħid? Missier, eħlisni minn din is-siegħa? Imma jien għalhekk ġejt: għal din is-siegħa” [Ġw:12:27].

     Din torbotna mat-tema tat-tbatija. Ħafna drabi aħna nitolbu fiż-żmien tal-prova, fiż-żmien tat-tbatija. Fil-ħajja tagħna ikollna mumenti differenti: mumenti ta’ tbatija u oħrajn ta’ ferħ. Bħal Kristu ma nagħmlux ħażin li nitobu fil-mumenti tat-tbatija, iżda irridu nirsistu u naħdmu biex ħajjitna kollha tkun talba, anke l-mumenti ta’ ferħ u mhux meta nbatu biss. Ġesù kien jaf minn xiex se jgħaddi u li ma setax jeħles minn dak li kien se jiġrilu, imma xorta tfixkel u tħawwad, u talab lill-Missier. Fil-mumenti ta’ prova f’ħajjitna, aħna għandna nagħmlu l-istess anke jekk nafu li xorta rridu ngħaddu mit-tbatija. Ġesù jgħid “x’se naqbad ngħid?”. Kien mitluf.

    Bħala nsara aħna nistgħu nitolbu bi tlett modi:

1. Talb tal-kliem
2. Talb ta’ Meditazzjoni (bħall-Lectio divina)
3. Talb ta’ Kontemplazzjoni (bħal meta nikkontemplaw in-natura jew is-salib)

     Meta tikkontempla tkun qiegħed taħseb dwar pereżempju meta tara xena sabiħa (bħax-xemx nieżla). Dan kulħadd jista jagħmlu, però aħna li nafu u nemmnu li dik ħoloqha Alla nistgħu naħsbu dwarha bħala ħolqien ta’ Alla u nħallu lil Alla jkellimna permezz tagħha.

Ġesù dawn ipprattikom kollha: talab bil-kliem, talab bil-meditazzjoni (40 jum fid-deżert) u kien jikkontempla ukoll (il-kobor t’Alla).

Aħna kultant ma nħallux lilna nfusna nikkontemplaw għax nibdew naħsbu f’kollox barra f’dak li nkunu rridu naħsbu fuqu.

     Ġesù qal “X’se naqbad ngħid?”. Bl-istess mod meta aħna nkunu qegħdin nisimgħu lil xi ħadd ikellimna dwar il-problema tiegħu, nibdew naħsbu “X’se naqbad ngħid?”. F’mumenti bħal dawn m’għandna ngħidu xejn imma għandna nitgħallmu nisimgħu lil dak li jkun. Aħjar ma ngħidu xejn milli ngħidu ħmerija. Dejjem għandna niftakkru li Ġesù ukoll qal: “X’se naqbad ngħid?”. U jekk noffru t-talb tagħna, għandna nżommu l-kelma tagħna.

     Ġesù jgħid ukoll: “Missier, agħti glorja lil ismek” [Ġw:12:28].

     Hawnhekk naraw ukoll li f’mumenti diffiċli Ġesù dar lejn Alla u gglorifikah. X’kuntrast mad-dagħa, li ġieli jingħad għal kull ħaġa ta’ xejn!  Din hija xi ħaġa kerha ħafna u sfortunatament kultant nisimgħu anke tfal jidgħu.  Dan huwa kuntrast kbir ma’ dak li għamel Ġesu fejn fl-iktar mument diffiċli tiegħu, flok seħet dak li kellu jgħaddi  minnu bħalma nagħmlu aħna, igglorifika l-isem t’Alla.

Il-laqgħa spiċċat bit-talba tal-Missierna.  Il-laqgħa li jmiss ser tkun nhar il-Ġimgħa 10 ta’ April.