Fil-bidu tat-taħdita tiegħu, il-kelliem qal li jixtieq li r-riżultat ta’ din il-laqgħa jkun li nisimgħu tajjeb il-Kelma t’Alla. Jekk tisma’ din il-kelma sew, din ser tolqtok żgur. Ħafna drabi l-Kelma t’Alla nisimgħuha u ttir mar-riħ, bħall-parabbola taż-żerriegħa. Il-Kelma t’Alla trid tagħmel il-frott, għax hija ħajja. Il-Kelma t’Alla trid tkun akkumpanjata mill-fidi. Il-Kelma t’Alla ddawwalna fiċ-ċirkustanzi kollha tal-ħajja tagħna.

Il-Parabbola tal-Iben il-Ħali nsibuha f’kapitlu 15 ta’ San Luqa. Qabilha hemm il-Parabbola tar-Ragħaj li jitlef nagħaġa, u l-oħra tal-mara li tilfet drakma. Dawn il-Parabboli, Ġesu’ qalhom għax kien attakkat mill-Fariżej. Dawn kienu jimxu eżatt mal-Liġi, imma ħafna drabi għemilhom kien differenti ħafna minn dak li kienu jemmnu fih. Kristu qal “Agħmlu dak li  jgħidulkom tagħmlu, imma tagħmlux bħalhom.” Waħda mill-akkużi tagħhom kienet li Ġesu’ kien jagħmilha ma’ kulħadd – pubblikani, midinbin. Saħansitra kien jiekol għandhom. Għalhekk qalilhom din il-parabbola.

Ħafna drabi aħna, fil-ħajja, nħarsu mit-tieqa ‘l barra – niġġudikaw, nitkellmu fuq l-oħrajn. Inħarsu barra minna nfusna. Aħna rridu nħarsu lejn il-mera – il-mera tgħidlek min int.

L-iktar li jispikkaw f’din il-parabbola huma l-maħfra, il-ħniena u l-imħabba. Hawnhekk inqrat il-Parabbola tal-Iben il-Ħali. Din hi waħda mill-isbaħ parabboli. Hemm xi 36 parabboli kbar u oħrajn qosra – 52 b’kollox. L-iktar li naraw f’din il-parabbola hi l-figura tal-missier – tilef lill-ibnu u reġa’ laqgħu għandu. Fil-fatt din il-parabbola ġieli tissejjaħ il-Parabbola tal-Missier Ħanin.

Hawn bdiet l-ispjega tal-parabbola. Proprjament, il-missier ma setgħax jiddisponi mill-wirt qabel mewtu. Dak iż-żmien, l-iben il-kbir kien jieħu żewġ terzi tal-wirt. Iż-żgħir suppost li ma setgħax jiddisponi mill-wirt qabel ma jmut missieru. Meta l-parabbola tgħidilna li sarr kollox, probabli li biegħ li kellu biex ikollu l-flus f’idejh. X’aktarx li dan l-iben ma kienx miżżewweġ, u għażel li jmur f’pajjiż barra l-Palestina, fejn ma kienx hemm dawk ir-regolamenti reliġjużi – biex ikun liberu.

Meta spiċċaw il-flus u l-ħbieb, kellu jmur jirgħa l-qżieqes – l-iktar xogħol degradanti. Din hi ħafna drabi l-istorja tagħna – l-istorja tal-midneb. Nagħżlu li nitilqu minn dar Missierna. Dan hu l-iżball tal-lum – tlifna l-qalb. Aħjar ma jkollok xejn u jkollok l-imħabba, s-sempliċita’ u l-mogħdrija.

Meta ra l-iżball tiegħu, l-iben reġa’ lura għand missieru. Tant kien niedem – hu kien jaf li issa m’għandu dritt għal xejn – li qal “immur għand missieri mqar bħala lavrant”. Imma meta wasal, il-missier ġera biex jiltaqa’ miegħu, għannqu u biesu – is-sinjal tal-maħfra. Missieru ma staqsieh xejn, imma tah tlett affarijiet: l-isbaħ libsa, li tfisser il-ġieh li hu ried li jerġa jagħtih, sinjal ta’ distinzzjoni għolja. Libsa ġdida tfisser ħajja ġdida – l-iben hu l-mistieden tal-unur, reġa’ ġie mpoġġi fl-istess grad li kellu qabel; iċ-ċurkett, li kien ifisser awtorita’ fil-familja li l-missier kein reġa’ tah; is-sandli, li jfisser il-ħelsien, il-liberta’. Mhux dan biss, imma għamillu festa kbira – l-għoġol imsemmen.

Fl-aħħar jiġi l-iben il-kbir. Meta ra x’kien ġara’, m’aċċettax li jidħol – baqa’ barra. Meta jkellem il-missieru ma jgħidlux “hija” imma “dak ibnek”. Tant kien irrabjat li beda jakkuża liż-żgħir b’dak li kien għamel. It-tnejn naqsu – iż-żgħir telaq minn dar missieru u għex ħajja mtajjra, u l-kbir m’għarafx jirrikonċilja ruħu, la ma’ ħuh, u lanqas ma’ missieru.

It-tagħlima prinċipali ta’ din il-parabbola hi l-maħfra. Mhix ħaġa faċli. Taħfer għax tkun dgħajjef? Fil-Missierna ngħidu ” aħfrilna dnubietna kif aħna naħfru lil min hu ħati għalina”. Mhux aħjar taħfer u tagħder milli tikkundanna? Billi tikkundanna x’ser tieħu? F’San Mattew insibu sentenza: ” Jekk intom taħfru lil ħutkom, Missierkom li hu fis-smewwiet jaħfer lilkom ukoll, imma jekk ma taħfrux lil ħutkom, lanqas Missierkom ma jaħfrilkom”. – kliem iebes! Għaliex taħfer? Kristu ħafer sal-aħħar. Il-maħfra ġġib ir-rikonċiljazzjoni u l-paċi tal-qalb.

Il-Missier fil-parabbola hu Alla, li jieħu ħsiebna u jfittixna, għax Hu ma jrid lil ħadd jintilef. Alla jgħinna biex inħobbu u naħfru iktar. Alla ma jridx distinzzjoni. Alla jaħfer lil kulħadd – jibgħat ix-xemx u x-xita fuq it-tajbin u fuq dawk li m’humiex. “Jien ma ġejtx għal min hu b’saħħtu, imma għal morda biex infejjaqhom”.

F’dawn iż-żewġt aħwa nsibu li wieħed kien ma’ missieru, telaq u reġa’ lura, filwaqt li l-kbir, għalkemm kien dejjem ma’ missieru, fl-aħħar qisu nfired minnu. Din il-parabbola ma fihiex konkużżjoni – ma tgħidilniex jekk kienx hemm rikonċiljazzjoni. Aħna nafu li Alla hu mħabba, Alla hu ħanin u jaħfrilna. Ħafna drabi aħna nippruvaw insibu l-kuntentizza f’affarijiet oħra, anke jekk forsi jistgħu jkunu tajbin. Ma rridux pero’ li dan il-ġid isir il-programm ta’ ħajjitna, u lil Alla ntuh biċċa żgħira, jekk intuh! Illum il-bniedem jgħix mingħajr Alla. Lanqas għadu fil-vokabularju ta’ ħafna nies. Meta l-bniedem jitbiegħed minn Alla, jinżel fil-miżerja.

Din il-parabbola turina li Alla, lil kulħadd, xi ħin jew ieħor, jagħtih iċ-ċans li jinduna bl-iżball tiegħu. Nindunaw li nistgħu nersqu viċin Tiegħu. Lil ibnu, il-missier mhux biss ma staqsieh xejn, imma laqgħu u reġa’ tah il-post li kellu qabel. Għamillu festa kbira. Din hi l-imħabba t’Alla, għalhekk iġiegħlek taħfer.

L-iben iż-żgħir gerfex u ħawwad, imma nidem. Il-kbir baqa’ iebes. Mhux biss ma rrispettax lil ħuh, iżda lanqas lil missieru.

Aħna lkoll għandna npoġġu lilna nfusna f’din il-parabbola. Nitolbu lil Mulej biex inkunu nies ta’ ħniena u maħfra. Il-Papa Franġisku dejjem iħeġġeġ fuq il-ħniena. Nippruvaw dejjen li nagħmlu paċi m’Alla u mal-oħrajn.

Il-Vanġelu ta’ San Luqa jissejjaħ ukoll il-Vanġelu tal-Ħniena, għax għandu ħafna rakkonti ta’ maħfra u ħniena, bħal l-istorja ta’ Żakkew.

Li titlob maħfra trid ċertu umilta’. Santu Wistin jgħid “Ħobb, u tista’ tagħmel kollox”

Min veru jħobb, jaħfer.

 

Il-laqgħa għalqet bit-talba tal-Missierna.

Il-laqgħa bdiet bil-qari tal-Vanġelu, Mattew 28: 16-20, u t-Tieni Lezzjoni, Rumani 8: 14-17.

Il-festa tat-Trinita’ tiġi l-Ħadd ta’ wara Pentekoste, u tagħlaq iż-żmien tal-Għid. Fil-Pentekoste naraw il-bidu tal-mandatt li Ġesu’ ta lill-appostli – il-bidu tal-Knisja. Dawn kienu għexu Miegħu għal tlett snin. Qalilhom biex imorru l-Galileja, biex itihom din il-missjoni li jgħammdu u jgħallmu. Imma xi wħud xorta ddubitaw.

Dan nagħmluh aħna wkoll. Il-Papa jgħidilna kontinwament. Il-fidi tagħna ma tistgħax tkun il-fidi tal-Fariżej – kollox fil-kaxxa tiegħu u int issalva biss jekk taf x’tista’ tagħmel u x’ma tistgħax.

L-ikbar misteru li minnu joħorġu l-misteri kollha hu t-Trinita’ – il-misteru ewlieni tal-fidi u l-ħajja nisranija. Il-ġrajja kollha tas-salvazzjoni mhix ħlief il-ġrajja tat-triq u l-mezzi li bihom Alla waħdu u veru huwa l-Missier, l-Iben u l-Ispirtu – it-tlieta ħaġa waħda.

Alla wera Lilu Nnifsu lill-bnedmin, u wara li reġgħu lura minn dnubiethom, ħafrilhom u reġa’ għaqqadhom mill-ġdid Miegħu permezz ta’ Kristu. L-Ħadd li għadda ċċelebrajna l-miġja tal-Ispirtu s-Santu. X’kienet l-iktar ħaġa mportanti li ħadu l-appostli? Telaq minnhom il-biża’, kif naraw meta Pietru u Ġwanni tressqu quddiem is-Sinedriju. Tahom qawwa u kuraġġ, li suppost ikollna aħna wkoll.

Il-kelma “misteru” bil-Grieg tfisser “tibqa’ sieket”. Quddiem misteru bħal dan ma nistgħu nagħmlu xejn ħlief nikkuntemplaw u ninsew is-suppervja tagħna li rridu nifhmu kollox. Irridu nifhmu kollox xjentifikament. Il-Papa, fl-eżortazzjoni appostolika “Ifirħu u Tennew” isemmi żewġ ereżiji marbuta mat-Trinita’. L-Injostiċi kienu jiġġudikaw lill-oħrajn jekk humiex tajbin jew ħżiena minn dak li kienu jafu. L-istess bħal Fariżej. L-Appostli kienu minn kategoriji differenti, imma Ġesu’ bihom inqeda’ – “Missier inroddlok ħajr li dawn il-ħwejjeġ urejthom liċ-ċkejknin u mhux lil min hu għaref.”

Ħafna drabi l-għerf iwaqqana’ fi żball fundamentali – “self-sufficiency”. Nippretendi li, għax naf ħafna, fija nnifsi għandi biżżejjed – komplut. Fid-dinja ħadd ma jista’ jkun komplut, lanqas il-Papa. Dawn in-nies li jaħsbu li għanhom soluzzjoni għal kollox, ma jemmnux jekk ma jistgħux jifhmu xjentifikament. Din hi l-ħidma sottili tax-xitan.

Aħna nemmnu għax qalilna Ġesu’. “Lili ngħatat is-setgħa kollha fis-sema u fl-art”. U din is-setgħa għaddieha lid-dixxipli, u b’hekk lilna lkoll. Il-Konċilju Vatikan 2 lilna tana l-missjoni li nilħqu lill-oħrajn fl-ambjent tagħna tal-familja, tax-xogħol, tad-divertiment. Meta Ġesu’ ordnalhom imorru l-Galileja, huma marru, għalkemm xi wħud iddubitaw. Qalilhom “Agħallmu lill-ġnus kollha u agħmduhom fl-Isem tal-Missier, u tal-Iben u tal-Ispirtu”. Il-messaġġ li ġab mingħand il-Missier, Ġesu’ jgħaddieh lill-Knisja Tiegħu

Naraw fl-Appostli ubbidjenza u dubbju – id-dubbju tagħna lkoll. Il-fidi ġġiegħlek tistaqsi. Pero’, għalkemm aħna, kuntrarju għall-Appostli, ma rajnihx, għandna il-Kelma Tiegħu – l-Iskrittura, specjalment il-Vanġelu. U fuq kollox għandna l-Ewkarisitja. Il-Kelma ta’ Ġesu’ hi biżżejjed. Imma meta kien hemm dubbji kbar, Hu wera’ Lilu Nnifsu permess ta’ ġrajjiet straordinarji, bħal ma ġara’ f’Orvieto. M’għandniex bżonn dawn il-mirakli biex nemmnu, imma dawn isaħħulna l-fidi tagħna. Ikomplu jżiedu mal-misteri li nistagħġbu bihom.

Ħafna drabi ma nifhmux biżżejjed x’inhi l-Quddiesa – it-twettiq mill-ġdid tas-Sagrifiċċju. Jekk nifhmu ftit iktar x’inhu dan il-misteru, ikollna inqas dubbji. Qabel ma telaq’ Ġesu’ qalilhom “Jien magħkom sal-aħħar”. Fl-istorja naraw ħafna moviment kbar – Rumani, Griegi, etċ. Kollha ntemmu. Issa għaddew iktar minn elfejn sena u l-Knisja għadha ma spiċċatx, għax Kristu ma jerġgħax lura minn Kelmtu. U biex nifhmu xi jrid jgħidilna, tana l-Ispirtu Tiegħu. Permezz ta’ Kristu aħna nistgħu ngħidu “Abba Missier”.

L-Ispirtu jneħħi l-biża’ li nesprimu l-fidi tagħna mingħajr ħabi, speċjalment fl-ambjent tal-lum, li jeħodha kontrina, jidħaq bina u jirridikulana. Kemm għandna kuraġġ nistqarru bil-miftuħ il-fidi tagħna? Irridu niddefendu l-fidi tagħna, mhux bl-aggressjoni, imma bl-imħabba. Kemm aħna lesti li nagħtu r-raġuni tagħna għaliex nemmnu?

Il-misteru kbir tat-Trinta’, li hi l-pedament tal-fidi tagħna, hu l-għaqda kbira ta’ bejniethom – ħaġa waħda. Il-Knisja twaqqfet minn Kristu, mhux b’xi metodu uman. Alla hu komunjoni – il-Missier, l-Iben u l-Ispirtu magħqudin flimkien bl-imħabba. Infatti l-infern hu l-firda minn din l-imħabba t’Alla għall-eternita’.

Alla għadnu paċenzja kbira. Jistenniena, jiġri warajna. Din il-paċenzja nsibuha bit-talb, billi naċċettaw xi falliment. M’għandniex nippretendu li kulħadd ikun l-istess. Meta l-Ispirtu niżel fina u tana l-kariżmi, dawn kulħadd iħaddimhom skond ma jilluminah l-Ispirtu. Irridu nkunu ħaġa waħda fid-differenzi.

Meta’ Ġesu’ qal “Agħmdu …” ma ninsewx li l-Magħmudija hi siġill li ma jista’ jitneħħa qatt. U dan iqiegħed fuqna responsabbilta’ bħala dixxipli ta’ Kristu. Il-Magħmudija hi vokazzjoni – li nimxi wara Ġesu’ u nagħti servizz lill-komunita’. Dan irridu ngħixuh f’dinja egoista – il-globalizzazjoni tal-indifferenza. Naraw il-populiżmu, fejn il-politika titmexxa minn dak li jridu n-nies. Roberto Benigni qal “L-għażla ma tistgħax titħalla f’idejn il-poplu, għax kull meta l-poplu jagħżel, jagħżel lil Barabba.”

Bħala nsara, għandna dover kbir li ma nħallu lil ħadd imexxina minn imnieħirna. Nispiċċaw nibilgħu kollox. Il-mezzi tal-komunikazzjoni jsiru l-Vanġelu tagħna. L-Ispirtu t’Alla jingħata lill-komunita’ li jemmnu biex itina enerġija ġdida. Il-Knisja trid tkun “sptar fil-kamp tal-battalja, li ma tibqgħax magħluqa fiċ-ċertezzi tagħha..” L-Ispirtu jtina l-kuraġġ biex nitkellmu, jtina l-inkarigu li nieħdu ħsieb il-laħam miġrugħ tal-ħajja – riżultat ta’ nġustizzja, rebgħa, gwerer, vjolenza, mibgħeda … L-Ispirtu jtina l-qawwa biex nikkonfrontaw dan kollu bl-imħabba. Irridu nkunu proattivi – noħroġ biex infittex u nsib.

Alla ħalaqna għax iħobbna, anke jekk nitbiegħdu Minnu. L-għażla jħallieha f’idejna. Biex aħna ngħixu ferħanin, għandna bżonn nużaw daqsxejn iktar umoriżmu. In-nisrani veru ma jistgħax ma jitbissimx, anke fl-iktar mumenti diffiċli tal-ħajja. Tbissima tfisser paċi tal-qalb, tgħinna niftakru li anke jekk qegħdin inbatu, qed naqsmu ma’ Kristu t-tbatija li għadda minna minħabba fina.

Fl-eżorċitazzjoni “Ifirħu u Thennew”, il-Papa Franġisku jagħtina mezz ta’ kif nistgħu nkunu qaddisin avolja fil-kuntest ta’ ħajja li hi kontrina l-ħin kollu. Il-qaddis kapaċi jgħix fil-ferħ u b’sens ta’ umoriżmu. Mingħajr ma jitlef ir-realiżmu, kapaċi jdawwar lill-oħrajn bi spirtu pożittiv u mimli tama.

NIFTAKRU LI AĦNA MIMLIJIN BIL-GRAZZJA TAL-ISPIRTU S-SANTU.

Il-laqgħa ntemmet bit-talba tal-Missierna.

Il-laqgħa bdiet bil-qari tal-Vanġelu skond San Ġwann: 15 v 1-8 – il-Vanġelu tad-Dielja u l-Friegħi. Meta Ġesu’ jgħid: “Jien id-dielja u intom il-friegħi”, qed jitkellem fuq prinċijpju fundamentali – id-dipendenza tagħna f’Alla.

Id-dnub tal-bniedem hu dejjem wieħed – is-suppervja. Aktar ma bniedem hu konxju mid-dnub tiegħu, akbar hu d-dnub – insult lil Alla. Alla ħalaqna xbieha Tiegħu. Mela jekk jien nagħmel ħsara lili nnifsi jew lil ħaddieħor, jien qed nagħmel insult lil Alla.

Il-bniedem illum donnu sar supperv iktar minn qabel. Qed jieħu f’idejh dak li jidhirlu li għandu jgħix u dak li jidhirlu għandu jmut. Il-morali tgħid li ĦADD m’għandu dritt fuq il-ħajja. U l-maturita’ tagħna ma tfissirx li għandna nkunu arroganti, imma li d-deċiżżjonijiet li nieħdu ikunu konxi li huma mnaqqxin fin-natura stess tal-bniedem li Alla jagħti mal-ħolqien ta’ kull persuna.

Dan id-deni li nagħmlu lilna nfusna jew lil oħrajn ħafna drabi nagħmluh f’isem il-liberta’. Il-liberta’ mhix li tagħmel li trid. Il-liberta’ għandha r-regoli – dak li hu dritt tiegħi jieqaf fil-mument li jien nirfes il-kallu ta’ ħaddieħor. Min qed jippressa jew min jgħaddi ċertu liġijiet ċivili jaf li hemm xi ħaġa li qed tmur kontra n-natura, kontra Alla. Għalhekk għandu bżonn xi ħaġa biex hu jserraħ il-kuxjenza tiegħu billi jkun hemm liġi li tiddefendih – il-liġi ċivili li qed teħodha kontra l-liġi naturali, kontr’Alla.

F’dan il kuntest kollu rridu niftakru li l-ħniena t’Alla hi dejjem ikbar mill-ħtijiet tagħna. Għalhekk, biex ma nsirux zkuk niexfa, għandna bżonn il-qawwa tal-Ispirtu s-Santu, li lkoll irċevejnieha u kkonfermajnieha.

San Ġwann qed jinsisti li aħna nkunu marbutin mad-dielja. Aħna li aħna għax twelidna f’kuntest partikolari. Allura dak li qatt ma sema’ b’Ġesu’ jew trabba f’ambjent li kien ‘il bogħod minnu, dment li hu qalbu tajba, jien ma nistgħax niġġudika x’ser jiġri minnu. Pero’ jien li twelid f’ambjent ta’ fidi, jekk jien nirrifjuta, il-ħtija tiegħi tkun ikbar. Il-Knisja hi aħna lkoll – ilkoll midinbin. L-iktar importanti hu li tammetti li dnibt, u titlob maħfra.

Dan kollu jidħol fil-kuntest tal-valuri. Għandna valuri pożittivi, u valuri negattivi. Irridu naraw liema valuri l-iktar li qed jiddominaw illum. Salm 63 jgħid:

Isma, o Alla leħen it-tnehid tiegħi;
mill-biża’ tal-għadu ħarisli ħajti.
Aħbini mill-konfoffa tal-ħżiena,
mit-tixwix ta’ dawk li jagħmlu l-ħażen,
dawk li jsinnu bħal sejf ilsienhom,
jitfgħu kliem iebes bħal vleġeġ,
biex mill-moħba jolqtu ‘l min hu bla ħtija,
jotqtuh għal għarrieda, bla biża’ ta’ xejn.

Moħħhom sħiħ fil-ħsieb ħażin tagħhom,
jiftiehmu kif jonsbu bil-moħbi,
u jgħidu: “Min se jarana?”

Min irid jgħix ta’ nisrani ma jistgħax ikollu ħajja komda. Ix-xitan jattakka lil min qed jipprova jgħix ħajja tajba. Dawk li jagħmlu l-ħażen jaħsbu li ħadd mhu se jarahom, għax ħsiebhom hu marbut ma’ din id-dinja. Imma l-ġust jifrah fil-Mulej u jistkenn Fih. Din hija l-fidi u t-tama tagħna. Aħna lkoll nistgħu nkunu profeti u missjunarji. Se nsibu min jidħak bina. Irridu nimxu kontra l-kurrent.

F’dan il-Vanġelu Ġesu’ jibqa’ jagħmel enfasi fuq il-fatt li rridu nibqgħu Miegħu, ma ninqatgħux miz-zokk, biex nagħmlu l-frott. Gesu’ lill-appostli qallhom li d-dinja għad tobgħodhom kif bagħdet Lilu qabel. Issa aħna llum, x’qed inħallu l-iktar jinfluwenzana? Ma nistgħux ngħixu ħajja nisranija tas-supermarket – nieħu li jogħġobni u li ma jogħġobniex inħallih hemm. Din mhix ħajja nisranija, imma ħajja ta’ kompromessi.

Kif qal Ġesu’, il-ġenna u l-infern jibdew minn din id-dinja. Jekk qed inbati minħabba l-fidi tiegħi, nista’ nqis li qiegħed l-infern, jew nista’ nqis li jien qed nipprepara ruħi b’mod tajjeb biex imbagħad ingawdi fil-ġenna. Infatti Ġesu’ qiegħed il-ħin kollu jitlob u jinterċedi għalina għax qed jistenna li aħna niltaqgħu Miegħu. Il-ġenna hi l-laqgħa mal-Mulej. Il-mod kif aħna naffrontaw id-diffikultajiet fil-ħajja tagħna jiddetermina hiex infern jew ġenna.

Id-dielja hu Ġesu’, u aħna rridu nibqgħu marbutin magħha. Pero’ kemm aħna konvinti minn dan? Il-konverżjoni tagħna hi li kuljum aħna rridu nagħmlu dak il-pass ċkejken ‘il quddiem illi nkomplu nikkonvinċu ruħna li ħajjitna hi marbuta Miegħu.

Naraw fil-Vanġelu l-konflitt kontinwu bejn Ġesu’ u l-mexxejja tal-Lhud. Dawn ma riedux jaċċettawh għaliex huma poġġew lilhom infushom fiċ-ċentru. Ma riedux jemmnu li Ġesu’ hu ċ-ċentru. Allura qatt m’aċċettawh u spiċċaw biex qatluh. Jekk aħna rridu nkunu magħqudin ma’ Ġesu’, ma nistgħux inpoġġu lilna nfusna fiċ-ċentru. Irridu nħallu Lilu jkun iċ-ċentru tagħna.

Il-Vanġelu jgħidilna li l-Missier jiżbor, inaddaf. It-tindif isir bil-penitenza, billi niċċaħdu, imma l-iktar bis-sagramenti. Kif qed nersqu lejn il-Qrar? Aħna mmorru f’riġlejn Ġesu’, ngħidulu li dnibna, li ndimna, u nwegħduh li ma nerġawx. Kull darba li nqerru supppost li ħajjitna tagħmel dak il-pass ċkejken il-quddiem li lilna jżommna marbutin maz-zokk biex nagħmlu l-frott. Aħna rridu nisimgħu l-kelma ta’ Ġesu’ u nxandruha bl-eżempju. Il-missjoni tagħna hi li nibqgħu fil-Mulej u Hu fina. Irridu nobdu l-kmandamenti mingħajr kompromessi.

L-ikbar kmandament hu l-imħabba. Din kienet ir-rivoluzzjoni ta’ Ġesu’: “Ħobbu lil xulxin kif ħabbjetkom Jien”, “aħrilhom għax ma jafux x’inhuma jagħmlu”, “ħobbu li dawk li jobgħodukom.” Jekk irridu nimxu wara Ġesu’ rridu nimtlew bl-imħabba bħal Tiegħu. Jekk ma tħobbx, tinxef u tinħaraq.

Kif inħares lejja nnifsi f’dan il-kuntest? Jien qaddej jew ħabib ta’ Ġesu’? Irrid inkun it-tnejn. Il-ħabib niftaħ qalbi miegħu. Imma rridu wkoll inkunu qaddejja tal-oħrajn għax fihom naraw lil Kristu.

Irridu ngħixu l-Vanġelu billi nisimgħu, naqraw, u nxandru, iktar milli bil-kliem, bl-eżempju.

Il-laqgħa bdiet bit-Talba tal-Moviment.

Dak li qed jiġri fl-Ewropa, qed jolqot lilna wkoll. Dak li ġara elfejn sena ilu qed jiġri llum.

Waqt  li l-Lhud kienu qed jiċċelebraw l-Għid, sallbu lill-Messija li kienu ilhom tant jistennew. Ħajjithom kienet ibbażata fuq din l-istennija. Imma meta ġie, sallbuh. U naraw l-Appostli jitħawdu, jibżgħu u jinqaflu ġewwa.

F’dak li qed jiġri llum, hemm min qed jipprova jniżżel in-nisrani fil-katakombi, qed jgħid lin-nisrani “Int relegat. Taħseb x’taħseb, żommu għalik”

Elfejn sena ilu l-Appostli ħarġu miċ-Ċenaklu u bdew ixandru l-Kelma t’Alla, għax quddiem Alla, il-verita’ biss tgħodd. Ġesu’ qal “Min jiċħad Lili quddiem il-Missier, Jiena niċħdu.” Sentenza iebsa!

Is-sitwazzjoni li ħassew l-Appostli dak iż-żmien, jista’ jkun li qed inħossuha aħna wkoll. In-nies qed jonqsu mill-knisja. Elfejn sena ilu ġara hekk ukoll. L-Appostli qalu lil Ġesu’ “Qed jitilqu”. U Hu qalilhom “Tridux tmorru intom ukoll?” L-istess statistika tal-lum hi l-istess ta’ dak iż-żmien.

It-tagħlim ta’ Ġesu’ huwa ħafif, imma tqil biex tipprattikah. Illum indunajna li l-isteering ta’ dak li nemmnu aħna jista’ jdur. Aħna mhux id-dover tagħna li niġġudikaw lil ħaddieħor, imma aħna obbligati li nimxu fuq it-tagħlim nisrani. Sfidi ħa jkollna, bħal ma kellhom l-Appostli. Kien hemm minnhom min ċeda, u llum ukoll jiġri l-istess. Inċedu għall-pressjoni ta’ żmienna.

Qed ngħixu żmien il-Għid, li għandu jkun is-sena kollha, għax aħna l-poplu tal-Qawmien. Bejn it-tebut u l-Qawmien hemm “Tumas” – jien! Tumas ried jara l-affarijiet konkreti. Ġesu’ wrieh il-feriti. Dawk huma l-feriti tal-Knisja llum. Dawk li qed immissu llum. Għalhekk qed ngħixu bħal ma għexu l-appostli dak iż-żmien. Dawk ma waqfux mal-mewt ta’ Ġesu’, għax Hu tahom l-Ispirtu s-Santu, l-istess bħalma ta lilna fil-Magħmudija u fil-Griżma, l-istess Spirtu li ħadu l-Appostli elfejn sena ilu.

Jekk inħarsu lejn il-kmandamenti, dawn huma l-pilastri li jmexxu kull sistema legali fil-pajjiż – la toqtolx, la tisraqx, etc. Dawn kollha huma legalizzati. Fil-kmandamenti m’hemm xejn li jeħodha kontra l-ebda stat. Kull stat demokratiku jimxi fuq dawn il-pilastri. Pero’ llum qegħdin f’sitwazzjoni fejn hemm min qed iħoss li għandu jiftah. Il-piż ta’ dan hu jrid iġorru. Aħna, bħala nsara, il-piż tagħna hu li nimxu fuq il-prinċipji tagħna.

L-Appostli tħawdu, imma fl-aħħar, meta għarfu lil Ġesu’, ħarġu minn hemm u spiċċaw martri. Ġuda ppretenda xi ħaġa differenti minn Ġesu’, mill-Knisja. Aħna m’għandniex infittxu lil Alla fl-affarijiet ta’ din id-dinja. Aħna għandna nkunu dak il-poplu li nemmnu li għandna l-Ispirtu s-Santu fina. Aħna rridu nagħmlu d-differenza. Għax fl-aħħar mill-aħħar, ruħna rridu nsalvaw, u dik ta’ min aħna responsabbli – iż-żgħar – għax l-Evanġelizzazzjoni minn hemm trid tibda. Din hi l-missjoni tagħna.

Jekk aħna ħa noqogħdu għall-pressjoni, bħal ma kellhom l-Appostli dak iż-żmien, ħa nispiċċaw ninżlu fil-katakombi – li tkun nisrani żommu għalik! Id-differenza li rridu nagħmlu aħna hi li ngħixu ħajja differenti fid-dawl tal-Iispirtu s-Santu. It-tagħlim tagħna nġibuh mill-Kelma t’Alla.

L-Appostli m’emmnux mill-ewwel li Ġesu’ kien qam. Infatti Hu talabhom ħuta u kielha quddiemhom, għax ħasbuh xi fantażma. Illum li tippreżenta xi ħadd li jqum mill-mewt mhix faċli, meta kollox jiġi ppruvat bix-xjenza.

L-ewwel Appostli taw xhieda. Ħarġu mill-biża’. Qatlulhom lil Ġwanni u lil Ġesu’ għax dejjqithom il-verita’. Ġesu’ kien avżhom “Għad titħawwdu”.

Aħna rridu nkunu l-insara llum. Ma nistgħux inkunu nsara tat-tradizzjonijiet. Qed inkunu konkreti? Parir nisimgħuh? L-Evanġelizzazzjoni trid tkun bil-mod kif ngħixu aħna. Irridu nżommu sħiħ mat-twemmin tagħna. Ġesu’ ssallab għall-imħabba li jħallina fil-liberta’. U qegħdin insallbuh aħna llum. Ġesu’ ħa dan kollu fuqu biex jagħtina l-maħfra.

Aħna, bix-xhieda tagħna, rridu nagħmlu d-differenza, jiġri x’jiġri. Aħna nafu li d-dagħa, l-abort huwa dnub. Għandi nitkellem fejn għandi nitkellem, bir-rispett u l-imħabba. Għandi d-dritt u l-obbligu li nsemma leħni. Kulħadd irid iġorr il-piż tiegħu.

Hawnhekk sar intervent fuq il-moviment Kerygma. Dan twaqqaf tletin sena ilu biex jiġbor in-nies għal impenn nisrani fis-soċjeta, permess ta’ talb u formazzjoni. Hemm bżonn iktar minn qabel li nevanġelizzaw. Hu x-xogħol ta’ kulħadd. Imma din tibda billi niffurmaw u ninfurmaw irwieħna biex niffurmaw lil ħaddieħor. Qed tiġi diskussa l-liġi dwar l-IVF. Nafu x’inhi? Nafu x’inhu l-iffriżar tal-embrijuni? Jekk int m’intix infurmat sew, ser tibla’ kollox, tifhem u ma tifhimx! Irridu nkunu nsara konvinti – favur il-ħajja. Imma kemm jien infurmat biex nikkomunika – mal-familjari, fuq il-post tax-xogħol, għand tal-ħanut, mall-ħbieb?

Irid ikollna impenn kristjan fis-soċjeta’. Irridu formazzjoni reliġjuża qawwija – anke medika , soċjali, etċ – għalina u għall-oħrajn. U din tibda mid-dar. Meta tkisser il-valuri nsara, tkisser is-soċjeta’ – bħal boomerang tiġi lura fuqek, fuq il-familja, fuq is-soċjeta’, fuq il-pajjiż. Meta aħna naħsbu li sirna allat, it-tisbita tkun għall-infern. Niftakru li ruħna għandha prezz infinit – il-prezz li ħallas għalih Ġesu’!

Għalhekk għandna nibdew mill-familja, għax hemm jiġu miżrugħa l-valuri. Id-dar hi l-ewwel knisja.

Ġesu’ qal “Ikun l-Ispirtu tal-Mulej li jitkellem permezz tagħkom”

Il-laqgħa għalqet bit-talba tal-Missierna.

     Il-laqgħa Prayer Cafè tal-Ġimgħa 13 ta’ Novembru 2015, iffukat fuq il-Vanġelu tat-33 Ħadd ta’ matul is-sena B.

     Dan il-vanġelu huwa test li sa ftit żmien ilu kien jintuża f’waħda mill-erbgħa priedki (min-ħamsa) li kienu jsiru waqt l-eserċizzi tar-Randan. Dawn kienu jiffukaw fuq in-Novissimi: Mewt, Ġudizzji, Infern u Ġenna.

     Illum, qiegħdin ngħixu f’kultura stramba; kultura tal-mewt li ma tridx taċċetta l-mewt. Ngħixu f’kultura li ma tridx il-mewt imma fl-istess ħin ngħixu f’soċjeta li trid tiddeċiedi min jgħix u min le. Dan il-Vanġelu ma jitkellimx b’ewfemiżmi: meta niddeskrivu xi ħaġa li hija kerha ħafna bi kliem inqas ikraħ. Per eżempju: meta xi ħadd imut ngħidu ħalliena. Nagħmlu dan għax nibżgħu mil-mewt. Dan huwa vanġelu appokalittiku li jitkellem dwar l-affarijiet li se jiġru fl-aħħar b’mod espliċitu. Vanġelu li jitkellem dwar dak li se jiġri fl-aħħar tal-ħajja. Jitkellem dwar traġedji kbar: ix-xemx tiddallam; il-kwiekeb jaqgħu; dan il-kliem ma għandux ibbeżgħana imma għandu jtina t-tama. Veru li qed ngħixu f’dinja fraġli; li se tispiċċa bħalma se nispiċċaw aħna. Iżda r-risposta itihilna l-vanġelu stess:

Mbagħad jaraw lil Bin il-bniedem ġej fis-sħab b’qawwa kbira u bi glorja.

Din hija risposta li għandha ttina t-tama!

     Aħna għandna ħabta nintrabtu mal-affarijiet li jleqqu; nagħmluhom l-idoli tagħna. Anke aħna li nemmnu ġieli nagħmlu dan. Kultant anke d-drawwiet li mdorrijin bihom kuljum, nagħmluhom idoli tagħna. Ninsew li aħna qiegħdin hawhekk passaġġ u norbtu ruħna ma dawn l-affarijiet tad-dinja. Dawn l-affarijeit kollha se jispiċċaw… imma aħna li nemmnu nafu li l-mewt tfisser bidu ta xi ħaġa ġdida. Għalina l-insara l-mewt tagħna għandha tfisser it-twelid tagħna.

     Il-vanġelu issemmi ħwejjeġ appokalitiċi. Iżda fuq livell iktar personali aħna nistgħu nesperjenzaw katastrofi permezz ta disgrazzji, mewt, traditamenti etc. Hawnhekk ukoll għandna jkollna t-tama. Permezz tas-sigra tat-tin Ġesù jtina tagħlima… għandna nagħrfu s-sinjali u nifmhu li waqt traġedja hemm id-dawl fit-tarf; Hemm it-tama; Hemm Alla fit-tarf; B’idejh miftuħa biex jilqagħna bl-imħabba u t-tenerezza.

     Barra minn hekk aħna bħala nsara għandna missjoni. Din hi l-missjoni li nwasslu t-tama lill-ħaddieħor: nevanġelizzaw lil-kulħadd, għax kulħadd qed jipprova jsalva. Ħafna drabi minflok inwasslu t-tama aħna nippruvaw nagħtu ħaqq u ġudizzji. Mingħajr ma nafu u naħsbu, niġudikaw lil ta’ madwarna. Pero Alla biss jista jiġudika. Alla se jiġudikana lkoll fl-aħħar u aħna ningħataw il-ħaqq: l-infern jew il-ġenna. U jekk nimxu fuq it-tagħlim ta’ Ġesù; fuq il-beatitudnijiet; ma għandniex għalfejn ninkwetaw. Alla huwa ħanin imma ma nistgħux nagħmlu li rridu imma rridu nagħmlu ħilitna biex ngħixu fit-tajjeb.

Dan il-vanġelu itina żewġ ingredjenti biex jgħinna nagħmlu dan:

1. it-Tama biex jgħinnha ma nitlfuhiex anke fl-agħar mumenti.
2. il-Fidi biex nemmnu f’dak li qal Kristu u mhux dak li jgħidu l-profeti foloz.

Għalhekk irridu nġorru s-slaleb tagħna bil-fidi f’Alla u bit-tama li se jasal żmien aħjar.

Il-Laqgħa spiċċat billi qrajna s-salm li se jinqara fil-quddiesa ta3-33 Ħadd (sena B):

Ħarisni Mulej, għax għandek nistkenn
Mulej, inti s-sehem ta’ wirti u ta’ xortija
Inti żżomm f’idejk xortija.
Dejjem quddiemi żammejt ‘il-Mulej,
Għax bih f’leminti ma nitħarrek qatt.

Tifraħ għalhekk qalbi u tithenna ruħi,
U ġismi jistrieħ bil-kwiet.
Għax int ma tħallix lil ruħi fl-imwiet,
Ma tħallix il-maħbub tiegħek jara t-taħsir.

Inti turini t-triq tal-ħajja,
Hemm il-milja tal-ferħ quddiemek,
Hemm għaxqa għal dejjem f’lemintek.

Imbagħad inqrat din il-kwotazzjoni:

“Kont bil-ġuħ u tmajtuni, kont bil-għatx u sqejtuni, kont barrani u lqajtuni, kont għeri u libbistuni, kont marid u ġejtu tarawni, kont fil-ħabs u ġejtu żżuruni”

Mattew 25:35-36

Fil-laqgħa tas-16 t’Ottubru ta’ Prayer Café trattajna l-vanġelu mid-disgħa u għoxrin Ħadd ta’ Matul s-sena B mehud mill-vanġelu ta’ San Mark 10:35-45, vanġelu li jitratta kif min imexxi għandu jkun lest li jaqdi u jservi lil oħrajn.Wara l-qari tal-vanġelu nqasmu diversi punti dwar it-tifsira ta’ dan il-vanġelu. Dawn huma xi uħud minnhom.

Santu Wistin kien jgħid “ Alla li ħalqek mingħajr permess tiegħek irid l-għajnuna tiegħek biex isalvak”. Ħadd ma talab biex jitwieled imma jekk rridu nsalvaw irridu nikkoperaw mal-messaġġ li tana l-Alla permezz Kristu. Qegħdin ngħixu f’soċjeta fejn naħsbu li huwa dritt ta’ kull individwu li jagħmel dak li jrid – pero jekk se nagħmlu l-ħażin se nħallsu għalih irridu jew le.

Fil-vanġelu ta’ nhar il-Ħadd nsibu: “ min irid ikun kbir fostkom, għandu jkun qaddej tagħkom, u min irid ikun l-ewwel fostkom, għandu joqgħod ilsir ta’ kulħadd.” Paradoss fis-soċjeta tal-llum. Kif nikmanda u nkun skjav? Skond il-vanġelu il-kap għandu biss dmir wieħed ..li jaqdi u jiffaliċita l-ħajja ta’ l-oħrajn. Aħna lkoll skjavi- skjavi tad-dnub u ĠESU biex isalvana “sar skjav tal-iskjavi kollha.” Hu li ma kellu l-ebda ħtija kif jgħidilna San Pawl. Dan jurina kif meta naħsbu f’ħaddieħor biss nistgħu nsalvaw. Il-kontra li tgħidilna s-soċjeta moderna – l-ewwel jien, it-tieni jien, it-tielet jien u li jibqa’ għalija ukoll. Kunċett mxandar bil-mezzi tal-komunikazzjoni.

Fl-enċiklika tiegħu “Laudato Si”  Papa Franġisku jissuġġerilna nibdlu l-istil ta’ ħajjitna biex inħallu d-dinja aħjar milli sibnieha għal dawk ta’ warajna. Din hi sfida kbira fil-ħajja ta’ kuljum.

Il-Knisja llum ma għadx għandha l-kollaborazzjoni tal-Istati. Qabel l-Istati ma kienux jaddu liġijiet kontra l-morali jew kontra l-liġi tan-natura. Imma llum ħafna mill-politikanti jaddu l-liġijiet biex jaħsbu għal rashom … jaħsbu biex ma jitilfux il-poter u hekk nsibu li bl-iskuza tad-drittijiet tal-minoranzi dejjem jaddu liġijiet li jiddefendu l-minoranzi.  Aħna wkoll bħala nsara kattoliċi kif kien itenni Mons Pawlu Cremona u anke issa Mons Scicluna sirna minoranza. Allura aħna ma għandniex drittijiet? Qegħdin ngħamlu ħilitna biex ninstemgħu? Kardinal Sarah, Afrikan u president tal-pontifiċju tad-dutrina tal-fidi waqt is-Sinodu li għaddej qal li bħalma fis-seklu li għadda kien hemm il-faxxizmu issa erġajna għaddejjin minn krizijiet oħra imma taħt forma oħra.

Għadna nuru li aħna nsara f’kwalunke sitwazzjoni? Kemm aħna lesti li nsofru biex inwasslu lil Kristu lil oħrajn?  Papa Franġisku qiegħed jagħmel ħiltu biex jiġbed lura dawk li huma ‘l barra mill-knisja. Anke Papa Benedittu XVI kien waqqaf grupp bl-isem “Il-bitħa tal-Ġentili” fejn kien jinħoloq djalogu għal dawk li kienu jħossuhom fid-dubju fuq it-twemmin tagħhom u li jkunu għadhom qed ifittxu l-verita.

Qaddisa ta’ żmienna – Mother Theresa – kienet għaddiet minn mumenti ta’ tbatija ukoll. Kienu l-perseveranza ,l-konvinzjoni u d-determinazzjoni tagħha li wasluha biex tippersevera ssaqsi lil Isqof biex jagħtiha permess twaqqaf is-soċjeta tagħha. Soċjeta li tgħin lil min hu fil-bżonn…mingħajr ,ma tħares la lejn kulur ,la lejn twemmin u lanqas politika.

Il-poter hija tentazzjoni għal kulħadd u x-xitan jattakana biex nagħmlu kompromessi. Aħna nsara konvinti? Jew qisna l-Farizej …minn barra nidhru li qed nosservaw il-liġi t’Alla imma mbagħad nqabblu fejn jaqblilna? Il-poter għandu l-ħila li jamina…jixtrina…Din hi l-ġlieda f’ħajjitna.

Fil-Vanġelu ta’ San Mark naraw li Ġesu jħabbar għat-tielet darba l-passjoni tiegħu.  Id-dixxipli ma fehmuhx.  anzi, ulied Żebedew u d-dixxipli l – oħra bdew ifittxu l-glorja.  Ġesu jurihom xi tfisser tmexxi.  Tagħmel sens biss jekk isservi.

Ġakbu u Ġwanni, ulied Żebedew, resqu lejh u qalulu: “Mgħallem, dak li se nitolbuk irriduk tagħtihulna.” It-talb tagħna kif inhu arroganti bħal ta’ dawn iż-żewġ dixxipli “irriduk tagħtihulna.” ? Llum ukoll nsibu min jistenna Gratifikazjoni Immedjata. Iż-żmien kif iħares lejh il-Mulej hu differenti minn kif inħarsu lejh aħna. Fil-ktieb ta’ Ġob nsibu : “ Nilqgħu t-tajjeb minn għand Alla allura t-tbatija ma nilqgħuhiex? ” Fl-omelija tas-16 t’Ottubru Papa Franġisku qal li t-talb hu l-qofol ta’ kollox. Meta nitolbu importanti li nkunu miftuhin għal Ispirtu biex dan idawwalna u naċċettaw ir-rieda t’Alla f’ħajjitna. Weħidna ma naslux.

Is-servizz li jitkellem fuqu Kristu huwa s-solidarjeta – solidarjeta mal-proxxmu – il-kmandamenti kollha jinġabru f’wieħed. “Ħobb lil Alla u lil għajrek bħalek innifsek.” Irridu nkunu solidarji ma kulħadd u ma nħarsux lejn l-uċuh jew twemmin. Biex naslu għal dan għandna bżonn tlett ingredjenti (i) Perseveranza (ii) Determinazzjoni (iii) Umilta (doza kbira ta’ Umilta).

Quote:

Tiżżewwiġx persuna li tista’ tgħix magħha imma persuna li ma tistax tgħix mingħajrha.

Il-laqgħa nngħalqet bit-talba tal-Missierna.

Nistednuk u nħeġġuk tingħaqad magħna  nhar il-Ġimgħa 23 Ottubru għal laqgħa oħra ta’ Prayer Cafe biex nkomplu nikbru fil-fidi tagħna.

It-Tmienja u Għoxrin Ħadd tas-Sena

Inqrat is-silta mill-Vanġelu ta’ San Mark, Kapitlu 10, versi 17 – 30, fejn l-evanġelista jgħidilna li mar fuq Ġesu’ wieħed jgħaġġel, niżel għarkobbtejh quddiemu u qallu: “Mgħallem tajjeb, x’għandi nagħmel biex nikseb il-ħajja ta’ dejjem?”  Interessanti l-fatt li fil-bidu tar-rakkont ma jissemmiex li dan kien raġel għani. Dan insibuh fl-aħħar tas-silta.

Ġesu, qabel ma tah risposta, staqsieh: “Għaliex qiegħed issejjaħli tajjeb?  Ħadd ma hu tajjeb ħlief Alla biss.”  Il-fatt li r-raġel indirizzah bħala mgħallem tajjeb turi li dan irrikonoxxa l-qawwa ta’ Ġesu’, li fit-tweġiba tiegħu stqarr id-divinita’ tiegħu.

Imbagħad kompla jgħidlu “Inti l-kmandamenti tafhom…”  L-istess bħal ma nafuhom aħna, imma ħafna drabi naħsbu li għax aħna ma noqtlux, ma nisirqux, allura hekk biżżejjed. Ma nidħlux fid-dettalji.  Kemm-il darba nistgħu noqtlu bi kliemna!  Kemm-il darba ngħiru u nixtiequ dak ta’ ħaddieħor!

U r-raġel wieġeb: “Mgħallem, jien dan kollu ili nħarsu minn żgħożiti.”  Wieġeb b’ċerta konvinzjoni li la darba kien jobdi l-kmandamenti u jħallas id-deċmi, allura kollox sew.

Imbagħad Ġesu’ xeħet fuqu ħarsa ta’ mħabba u qallu: “Ħaġa waħda tonqsok: mur, bigh li għandek, agħtih lill-fqar, u jkollok teżor fis-sema; imbagħad ejja u imxi warajja.  Imma għal dan il-kliem ir-raġel qarras wiċċu u telaq b’qalbu sewda, għaliex kellu bosta ġid.”  Ta’ min isemmi li għall-poplu Lhudi fi żmien Ġesu’, li tkun sinjur kien meqjus bħala privileġġ, għax hekk kienu jistgħu jgħinu lill-fqar u jħallsu d-deċmi.  Mhux bilfors li dan ir-raġel ħass weġgħa għax qalbu kienet marbuta wisq mal-ġid, imma għax ħaseb li jekk jagħmel hekk mhux se jkun jista’ jkompli jgħin.

Ġesu’ mbagħad dar fuq id-dixxipli tiegħu u qalhom: “Kemm hi iebsa għall-għonja li jidħlu fis-Saltna ta’ Alla…..”  L-għonja mhux bilfors tfisser dawk li għandhom bosta ġid.   Jistgħu jkunu s-suppervi, dawk li jħossuhom fuq kulħadd, li qalbhom marbuta mas-setgħa, li jgħaffġu l-oħrajn basta jilħqu huma.

Meta Ġesu’ qal lid-dixxipli tiegħu li eħfef li ġemel jgħaddi minn għajn ta’ labra milli wieħed għani jidħol fis-Saltna ta’ Alla, dawn staġgħbu wisq aktar, u bdew jgħidu wieħed lill-ieħor: “Mela min jista’ jsalva?”  Hawnhekk Ġesu’ jassigurhom li għal Alla kollox jista’ jkun.  Alla hu ħanin u jaqra fil-qlub.  Għal Alla xejn ma hu moħbi, la fis-sema u lanqas fl-art.

Fl-aħħar qabeż Pietru u qallu: “Tajjeb! Aħna ħallejna kollox u ġejna warajk”  U Ġesu’  jwieġbu u jgħidlu li l-ħlas għad ikun għal mitt darba iżjed, sa minn din id-dinja stess.  Imma ma dan kollu jżid il-kelma “persekuzzjonijiet”!  Meta nisimgħu din il-kelma ħafna drabi naħsbu fil-martri ta’ l-ewwel żminijiet tal-Knisja, imma r-realta’ hi li llum hawn ħafna nies li qed jiġu ppersegwitati u maqtula minħabba t-twemmin tagħhom.  Għandna napprezzaw il-liberta’ li nistgħu nitkellmu fil-miftuħ, u għalhekk għandna d-dmir li ma nibqgħux ħalqna magħluq u li ma nibżgħux nitkellmu fuq it-twemmin tagħna.  Il-persekuzzjonijiet huma wkoll “l-għaliex?” fil-ħajja tagħna: għaliex qed jiġri hekk meta tant nipprova nagħmel tajjeb? Għaliex, għaliex…Dan huwa mezz biex iressaqna lejn il-qdusija.

Nerġgħu nagħmlu riflessjoni fuq il-frażi “mur bigh kollox”  Fil-prattika dan mhux possibli.  Ma nistgħux nittraskuraw id-dmirijiet tagħna lejn il-familja, imma nistgħu naraw x’għandna bżonn tassew.  Kulħadd għandu r-realta’ tiegħu. Irridu nagħmlu għażliet u naraw x’nistgħu innaqqsu.  Jekk inħarsu lejn il-Papa, għandna ezempju ċar ta’ dan.  Qed jospita familji refuġjati fil-Vatikan, juża karozza komuni, ipprovda showers u hairdressers għan-nies bla dar.

Fl-aħħar tal-laqgħa saret riferenza għas-Sinodu fuq il-Familja.  Bħal issa l-membri qed jitqassmu fi gruppi skond il-lingwa.  Qed juru biss opinjonijiet u x’jixtiequ li jiġi diskuss.  Malta hi rrappreżentata mill-Isqof Mario Grech.  Qed jieħdu sehem 370 ruħ.  270 minn dawn huma isqfijiet u l-oħrajn awdituri, fosthom sorijiet u familji.  Hemm rappreżentanti mill-Kattoliċi Orjentali, u mill-Knejjes Ortodossi bħala osservaturi.  Kien hemm min ried li t-titlu tas-Sinodu jkun “Il-Ħajja taż-Żwieġ lejn il-Familja”, iżda l-Papa ma xtaqx hekk għax ried li jintlaħqu l-familji kollha.  Il-Knisja trid tkun miftuħa għal kulħadd.  Alla ma jikkundannax u ma jagħmilx tabelli.  Kulħadd hwa inkluż.

Fl-aħħar tal-laqgħa nqrat kwotazzjoni ta’ C.S.Lewis: “True humility is not thinking less of yourself.  It is thinking of yourself less”

Is-sebgħa u għoxrin Ħadd matul is-sena

“Dak li għaqqad Alla, ma għandux jifirdu l-bniedem”

Inqrat is-silta mill-Evanġelju skont San Mark (Mk 10, 2-16).  Dan il-Vanġelu jittratta fuq is-suġġett tad-divorzju.  Jurina kemm Ġesù ma kienx jimxi mal-kurrent imma kien jemmen fl-ugwaljanza bejn il-mara u r-raġel.  Dan ir-rakkont ġara fil-Ġudea u dak iż-żmien jekk mara tinqabad f’adulterju kienet tiġi mħaġġra. Fit-tieni vers, bħas-soltu, il-Fariżej jippruvaw jonsbu lil Ġesù billi staqsewh jekk raġel jistax jitlaq lil martu u mhux viċi versa għax l-irġiel kienu dominanti. Ġesù rrispondihom b’mistoqsija oħra: “X’ordnalkom Mose?” u jfakkarhom x’kien il-pjan oriġinali t’Alla, li “t-tnejn isiru ġisem wieħed” meta jiżżewwġu.  Mela dak li għaqqad Alla m’għandux jifirdu il-bniedem.   Mela Alla ried li ż-żwieġ ikun komunita’ ta’ imħabba u bħala persuni indaqs u mhux f’pika bejniethom.  Alla ried li din tkun xbieha ħajja tal-imħabba tiegħu, personali u sħiħa.

Il-Vanġelu jkompli li meta marru lura d-dar d-dixxipli komplew jiddiskutu fuq id-divorzju. Anke d-dixxipli sabuha diffiċli biex jifhmu l-Ġesù.  Infatti qalulu  “Mela ladarba din hi l-kundizzjoni tar-raġel mal-mara, ma jaqbilx li wieħed jiżżewweġ.” Għax huma riedu li r-raġel dejjem ikun minn fuq! Iżda Hu qalilhom: “Mhux kulħadd jifhimha din il-ħaġa, imma dawk li lilhom jingħata, jifhmuha..

Ġesù uriehom ukoll li bil-miġja tiegħu l-bidla mill-qiegħ fil-qlub tal-bnedmin setgħet isseħħ.  Bi Kristu, l-bnedmin setgħu jibdew iħobbu bħal Alla.  Għal dawk li jingħaqdu ma’ Kristu, iż-żwieġ sar Sagrament, jiġifieri sinjal li jurihom lil Kristu fosthom u jagħtihom il-ħajja u l-imħabba tiegħu. Dan ifisser li mhux x’ħin tiddejjaq fiż-żwieġ taqbad u titlaq għax iż-żwieġ huwa Sagrament. Dan ma jeħlisniex mill-iżbalji, mid-difetti fil-karattru, mill-inkwiet, il-mard u d-dwejjaq. F’ċirkostanzi diffiċli bħal dawn l-akbar prova hi li nħobbu xorta waħda lil xulxin bħal Kristu bħalma nsibu fl-ittra ta’ San Pietru (2:23-24) “meta għajjru lil Ġesù ma weġibx bit-tgħajjir, meta bata ma heddidx”. Jekk il-miżżewġin jagħrfu jħobbu bħalu, b’dan il-mod, huma jaraw iż-żwieġ tagħhom jissaħħaħ, kif iwegħdu fir-rit taż-żwieġ “fir-risq tajjeb u l-ħażin, fil-mard u fis-saħħa”.

Il-Papa Franġisku, fit 2 t’April tas-sena l-oħra qal hekk “biex tagħmlu paċi m’hemmx bżonn iċċemplu lill-Ġnus Magħquda biex jiġu huma d-dar ħalli tagħmlu paċi.  Biżżejjed ġest ċkejken, żegħila, tislima!  U nkomplu l-għada!  U għada nibdew mill-ġdid.  U din hi l-ħajja, hekk irridu mmexxuha ’l quddiem, nimxu ’l quddiem bil-kuraġġ li rridu ngħixuha flimkien.  Tliet kelmiet li għandna ngħiduhom dejjem fid-dar tagħna huma: jekk jogħġbok, grazzi, skużani”.  It-tliet kelmiet maġiċi, jgħid il-Papa.

B’dawn it-tliet kelmiet, bit-talb tar-raġel u l-mara għal xulxin, billi nagħmlu paċi dejjem qabel tintemm il-ġurnata, iż-żwieġ jimxi ’l quddiem.

F’udjenza ġenerali  oħra li saret f’ April ta’ din is-sena il-Papa Franġisku jħeġġiġna biex ma nibżgħux nistiednu lil Ġesù għall-festa tat-tieġ. “Ma nibżgħux nistednuh fid-dar tagħna, biex ikun magħna u jħares il-familja tagħna.” Eku mill-kliem qawwi tal-qaddis Papa Ġwanni Pawlu II li kien qal: “Spalancate le porte a Cristo”. Iftħu l-bibien ta’ qlubkom beraħ għal Kristu!

Kompla jgħidilna biex ma nibżgħux nistiednu wkoll lil Ommu Marija. Fi kliem Papa Franġisku, l-Insara, meta jiżżewġu “fil-Mulej”, jinbidlu f’sinjal effikaċi tal-imħabba ta’ Alla.  L-Insara ma jiżżewġux biss għalihom infushom: jiżżewġu fil-Mulej għall-ġid tal-komunità kollha, tas-soċjetà kollha kemm hi.

Fl-aħħar tal-Vanġelu, Ġesù jgħid lit-tfal biex jersqu lejH.  F’dak iż-żmien, it-tfal kienu meqjusa l-inqas importanti fis-soċjetà Lhudija.  Iżda Ġesu jgħid “Tassew ngħidilkom, li min is-Saltna ta’ Alla ma jilqagħhiex b’qalb ta’ tifel ċkejken, ma jidħolx fiha ”. Irridu nemmnu fih u naċċettawh  bl-istess innoċenza tat-tfal.

Mid-diskussjoni tqajjmu xi punti interessanti:

Fuq it-tema taż-żwieġ, ġie mfakkar li dan ix-xahar ser ikun hemm is-Sinodu Straordinarju tal-Isqfijiet fuq il-familja.  Irridu noqgħodu attenti ħafna mill-midja minħabba t-tgħawwiġ u t-taħwid tal-fatti. Il-Papa, hu u ġej lura mill-Amerika kien mistoqsi mill-ġurnalisti rigward iż-żwieġ u d-divorzju. Hu kien ċar fir-risposta tiegħu: Iż-żwieġ huwa indissolibbli.

Niftakru li aħna ma nistgħux niġġudikaw, fuq ebda persuna, tkun xi tkun il-pożizzjoni tagħha: miżżewġa, divorzjata, omosesswali.  Alla biss jista’ jiġġudika, aħna nistgħu biss nitolbu għal dik il-persuna.

Anke rigward it-tfal tagħna.  Il-Mulej jrid li l-ġenituri jrabbu t-tfal sewwa.  Jekk dawn meta jikbru, jġibu ruħhom ħażin, il-ġenituri ma jaħtux.  Alla jiġġudika lit-tfal u mhux il-ġenituri, għax huma għandhom il-kuxjenza tagħhom.

Fl-aħħar inqrat kwotazzjoni li qalha l-Papa Franġisku fl-Udjenza Ġenerali fid 29 t’April ta’ din is-sena: “L-insara ma jiżżewġux biss għalihom infushom, jiżżewwġu fil-Mulej għal ġid tal-komunita’ kollha, tas-soċjetà kollha kemm hi”.

     Fl-ewwel laqgħa Prayer Cafè wara l-waqfa tas-sajf, ġie diskuss il-Vanġelu tas-26 Ħadd tas-Sena B (27 ta’ Settembru). Dan il-vanġelu għandu żewġ temi. L-ewwel jitkellem dwar it-tolleranza lejn dawk li avolja m’humiex id-dixxipli tiegħu, jagħmlu l-ġid f’ismu. Imbagħad Ġesù jitkellem dwar kundizzjonijiet li għandna nosservaw jekk irridu nidħlu fis-Saltna t’Alla.

     Dan huwa vanġelu attwali ħafna.  Ċerti nies fil-Knisja jew fi gruppi fi ħdan il-Knisja, iħarsu lejn dawk ġodda fil-grupp / knisja bħala xi ħaġa inqas, iktar il-bogħod minn Alla. Fil-Knisja ssib nies li huma nvoluti u ma jieħdux gost li xi ħadd ġdid jinvolvi ruħu. Din it-tip t’attitudni tagħmel il-ħsara u tbiegħed in-nies minn Kristu. Leader għandu jmexxi billi jservi. Il-Mulej għandu missjoni għal kulħadd u m’għandniex inkunu aħna li ntellfu lil xi ħadd mill-missjoni tiegħu. Aħna għandna nuru ospitalità lejn kulħadd – ikun min ikun. Jekk f’għajnejja bniedem ma jkunx sew, jien bħala nisrani għandi nilqgħu xorta u mhux nitkaża bih. Wara kollox, aħna kollha midinbin, taħt sema waħda. F’dan il-vanġelu Ġesù qed jgħidilna li aħna għandna naċċettaw it-tajjeb li ġej minn ħaddieħor, jiġi minn fejn jiġi, u jkun min jkun. It-tajjeb kollu tad-dinja mhux ġej biss minna l-kattoliċi.

     Aħna għandna nkunu ċerti li bl-azzjonijiet tagħna nqarrbu n-nies lejn Alla u mhux nbegħduhom minnu. Għalhekk importanti li ma niġġudikawx għax meta niġġudikaw, inbegħdu n-nies minn Alla. Aħna għandna nkunu nies li nibnu mhux li niġġudikaw, għax kif qal Ġesù “min mhux kontra tagħna, huwa magħna”. Fl-istess ħin għandu jkollna iktar sens ta’ komunità, għax meta nkunu komunità nkunu nistgħu nagħtu s-sapport lil xulxin.  Fl-isess ħin, ma nistax ngħin lil min hu magħna biss. M’għandiex inħares lejn l-uċuh imma lejn il-qlub.

     Fit-tieni parti ta’ dan il-Vanġelu, naraw li rridu noqgħodu attenti kif nġibu ruħna u x’ngħidu, għax nistgħu nagħtu “skandlu” u nagħmlu ħsara lil dawk li qed jarawna jew jisimgħuna u nbegħduhom minn Alla.

Mill-Katekiżmu tal-Knisja Kattolika:

“L-iskandlu hu atteġġjament jew imġiba li twassal lil ħaddieħor biex jagħmel dak li hu ħażin. Min jiskandalizza, ikun iġarrab l-għajru. Ihedded il-virtù u t-tjieba. Jista’ jwassal lil ħuh għall-mewt spiritwali, għall-mewt tar-ruħ. L-iskandlu hu ħtija serja jekk b’għemil jew nuqqas ta’ għemil iwassal lil xi ħadd ieħor biex jagħmel xi dnub gravi.”

“L-iskandlu jista’ jingħata ukoll mil-liġi jew mill-istituzzjonijiet, jew mill-moda jew mill-opinjoni pubblika. Huma għalhekk ħatja ta’ skandlu dawk li jagħmlu liġijiet jew jibnu strutturi soċjali li jwasslu biex ibaxxu l-imġiba morali tan-nies, jew iħassru l-ħajja reliġjuża,”

San Luqa Kap 17 Vers 1:

“Darba lid-dixxipli tiegħu qalilhom: “Ma jistax ikun li ma jingħatawx skandli; imma ħażin għalih min ikun ħtija tagħhom!”

     Għalhekk irridu noqgħodu attenti li ma nkunux aħna li nagħtu skandlu. Aħjar kelma nieqsa milli żejda. Bil-ħsieb jew mingħajr ħsieb, nistgħu nkunu ta’ skandlu għall-oħrajn. Għalhekk irridu nqaċċtu minn ġewwa fina u minn madwarna, dak kollu li jfixkilna. Għandna nitbeghdu minn xi ħaġa li nafu li tista’ twaqqana, jew xi darba waqqgħatna fid-dnub.

     Biex nagħmlu dan għandna bżonn, u għandna nitolbu lill-Ispirtu s-Santu, biex jgħinna nagħrfu t-tajjeb mill-ħażin. Kieku aħna l-Insara nagħtu kas iktar tal-Vanġelu u nimxu skont dak li hemm fih, kieku d-dinja hija ħafna aħjar minn dik li hi llum.

Tajjeb ukoll li nżommu f’moħħna dan il-vers mill-Ittra lill-Lhud, Kapitlu 12, Versi 1 u 2:

“Ejjew inwarrbu minna kull xkiel u kull dnub li malajr ifixkilna, u b’qalbna qawwija nibqgħu niġru t-triq tal-prova li għandna quddiemna; nżommu għajnejna merfugħa lejn Ġesù, li minnu tibda u fih tintemm il-fidi tagħna”

It-Tnax –il Ħadd matul is-Sena. Evanġelju ta’ San Mark 4, 35-41.

Kemm-il darba aħna jiġrilna bħall-appostli li Ġesù jkun qiegħed ħdejna imma aħna jidhrilna li mhux qiegħed jagħti kasna. Għalkemm nemmnu li qiegħed hemm aħna nimtlew bil-beżgħat tagħna. L-Appostli kienu jafuh ħafna imma xorta waħda iddubitaw mill-Messija, minn Ġesù. Ġesù però dar fuqhom u staqsiehom għaliex qegħdin jibżgħu.

Il-biżà hija ingredjent mill-ħajja tagħna, minn meta konna żgħar kellna ħafna beżgħat li biż-żmien inbidlu u mhux spiċċaw. Ilkoll kemm aħna ngħaddu minnhom u konxji wkoll li hemm il-Mulej lest biex jgħinna, però xorta waħda niddubitaw. Min-naħa l-oħra importanti li jkollna ftit riskju u sens ta’ avventura fil-ħajja tagħna. F’parti oħra tal-Evanġelju Ġesù jgħidilna: “Ejjew għandi inti li tinsabu mtaqqlin u mħabbtin u jiena nserraħkom.” X’inhi dik il-ħaġa li ttaqqalna u tħabbatna? Huma l-problemi tal-ħajja.

Kull ma nagħmlu fih il-problemi u r-riskju. F’dawn iċ-ċickustanzi rridu nemmnu, nemmnu bħalma jemmnu t-tfal; mingħajr ma jistaqsu għaliex. Il-fidi tagħna hija misteru imma rrid nafda u nemmen li l-Mulej qiegħed hemm lest biex jgħinni. Hu jaf x’inhu jiġri imma qiegħed jistenniena biex nitolbuh l-għajnuna. San Tumas kien qal li ħajjitna qisha bħal meta aħna qegħdin mexjin ma’ muntanja imma Alla qiegħed fil-quċċata u minn hemm jista’ jara t-triq li aħna qegħdin naqbdu. Aħna ma nistgħux inkunu ċerti mit-triq tagħna għaliex m’aħniex naraw eżatt x’hemm wara l-kantuniera imma Alla qiegħed jara kollox minn fuq.

Il-Mulej qiegħed mimdud fid-dgħajsa tagħna imma huwa jimpurtah minna.

Interessanti wkoll li naraw il-fidi qawwija tal-appostli f’dan Alla li huma kienu jgħixu miegħu. Huma kienu jafu li huwa Alla magħmul bniedem li kien kapaċi jwaqqaf it-tempesta. It-tempesti tal-ħajja tagħna huwa Alla li kapaċi jwaqqafhom. Dun Ġorġ Preca kien jgħid biex inkunu ‘ħbieb mal-Mulej’. Is-sagrament tal-Qrar, tar-Rikonċiljazzjoni jagħmel proprju dan, jerġa’ jħabbibna mal-Mulej. Bil-qrar nistgħu niksbu mill-ġdid din il-ħbiberija tagħna ma’ Alla. Ġesù fil-mirakli li għamel bħal tat-tifla li kienet mietet qal lil missierha sabiex jemmen u l-mirakli seħħ. Ġesù dejjem qal li l-fidi tagħna tfejjaqna. Ġesù jgħidilna li mingħajru ma nistgħu nagħmlu xejn.

In-nuqqas ta’ fidi jidher meta Ġesù deher wara l-qawmien lill-appostli. Pietru meta kien qiegħed jara lil Ġesù baqa’ f’wiċċ l-ilma imma meta ddubita beda nieżel. Tumas ukoll ried imiss b’idejh u jpoġġi jdejh fuq il-marki tal-imsiemer u fil-kustat. Dan in-nuqqas ta’ fidi tant weġġa’ lil Ġesù li  meta reġa’ deher ġimgħa wara reġa staqsa għal Tumas sabiex ikabbar fih il-fidi.

Ġesù qiegħed jgħidilna: “Jiena Hu, afdaw fija.” Ma jfissirx li l-problemi se nsolvuhom kollha jew b’mod sħiħ imma l-fatt li npoġġuhom f’riġlejn il-Mulej se jgħinna naffrontawhom.