Staġun wara ieħor il-Moviment Kerŷgma joħlom u jaħdem fuq kif lit-tfal u żgħażagħ tagħna jagħtihom formazzjoni u valuri sodi, siewja għall-ħajja.  F’dan il-proġett “You’ve Got Talent“, il-Moviment Kerŷgma qiegħed isejjaħ żgħażagħ ta’ bejn it-13 u 19-il sena, li mhux neċessarjamnet diġà jafu li għandhom talent, imma li nwegħduhom li magħna żgur ser jiskopru t-talent tagħhom. 

     Qed ngħidu ukoll li hemm elf ewro x’jintrebħu.  Dawn l-elf ewro qegħdin hemm għal dawk li juru impenn fil-laqgħat u l-attivitajiet li nħejju, kif ukoll li juru li fil-mixja tagħhom magħna kibru u li kienu eżemplari fil-grupp.

     Mela allura kemm jekk int żagħżugħ mimli talenti kif ukoll jekk int żagħżugħ li tħoss li ma għandek xejn x’toffri, aħna għandna post għalik u nwegħduk li m’intix ser toħroġ b’idek vojta.

     Ibagħtu r-reġistrazzjoni tagħkom bil-posta sa l-24 ta’ Ottubru 2015.  Il-formoli tal-applikazzjoni jinkisbu mill-Moviment Kerŷgma, Misraħ San-Duminku Rabat jew jistgħu jiġu downloaded minn hawn. u ejjew iltaqgħu magħna għall-ewwel laqgħa l-Ġimgħa 30 ta’ Ottubru fis-7.00pm ġewwa ċ-Ċentru Kulturali Kerŷgma, ir-Rabat

Niżżel il-formola minn hawn.

Il-laqgħa inbdiet bit-talba tal-moviment.  Wara inqrat is-silta tal-Evanġelju tal-Ħadd 7 ta’ Ġunju.   Din hija meħuda mill-Evanġelju ta’ San Mark (14, 12-16. 22-26).

Nistgħu ngħidu li r-rakkont huwa maqsum fi tnejn: l-ewwel parti fejn Ġesù jibgħat lid-dixxipli tiegħu  ifittxu l-kamra fejn kienu sejrin jagħmlu l-Ikla tal-Għid u t-tieni parti fejn twaqqaf is-Sagrament tal-Ewkaristija. Dan sabiex titfakkar il-Festa tal-Ġisem Imqaddes ta’ Ġesù magħrufa bħala Corpus Christi.

Fl-ewwel parti Ġesù ikellem lid-dixxipli bħalma jkellem lilna kuljum kontinwament. Il-problema hi li xi kultant aħna nifhmuh skont l-burdata li ninzertaw fiha. Huwa jkellimna permezz tal-istorja u tan-natura u fuq kollox permezz tal-Bibbja.  Il-Papa Franġisku, meta jsib l-okkażjoni, qed iqassam kopji żgħar tal-Bibbja biex tinżamm fuq dak li jkun ħalli x’ħin isib ċans jaqra xi silta minnha.  Il-Bibbja hija t-triq tagħna.  Permezz tagħha aħna irridu insibu t-triq biex inħejju l-post fejn ser nagħmlu l-ikla tal-Għid tagħna.  Dan nagħmluh kif għamlu d-dixxipli: obdew l-ordnijiet ta’ Ġesù għax sabu eżatt dak li qalilhom. Qabel kollox irridu nkunu nafu xi jfisser verament l-Għid.   L-Għid tal-Lhud ifisser il-jum tal-ħelsien mill-jasar tal-Eġittu.  Għalina jfisser il-ħelsien mir-rabta tad-dnub u mir-rabtiet tagħna ma’ din id-dinja.

Dan huwa diffiċli speċjalment aħna li ngħixu f’kuntest soċjali ta’ kumdita’ meta nqabblu ruħna ma’ pajjiżi fejn hemm faqar u miżerji kbar.  U kultant naħsbu li mingħajr Alla aħna nistgħu ngħixu.  Aħna kontinwament naħsbu ħafna f’din il-ħajja li tispiċċa u naħsbu ħafna anqas fil-ħajja li ma tispiċċax!

Il-Papa Franġisku jgħidilna biex ninħallu mill-idolatrija.  Din hija kull ħaġa li aħna nagħtuha iktar importanza minn dak li hu spiritwali. Il-Papa stess qal li l-idolatrija ġġiegħelna ndgħajjfu d-dinjita’ nisranija tagħna. Qed nagħtu wisq każ ta’ kif nidhru quddiem il-bnedmin imma ma nagħtux każ kif nidhru quddiem Alla.  Qed ngħixu f’dinja ta’ konsumiżmu kbir. Irridu nitgħallmu nużaw l-affarijiet li għanda bil-qies u mingħajr ħela biex anke nibżgħu għall-ambjent tagħna.  Jekk aħna nċedu għall-idolatrija, il-Papa Franġisku jgħid li aħna nsiru nsara medjokri, bierda, bla sugu u pagani.

F’din is-silta nsibu l-unika darba, mill-Evanġelji kollha,  fejn Ġesù isejjaħ lilu nnifsu bħala mgħallem u għalhekk huwa importanti li nimxu fuq dak li jgħidilna Kristu.

L-Ewkaristija tagħmilna lkoll ħaġa waħda.  Kif jgħid Benedittu Sittax, kull meta aħna nersqu biex nirċievu lil Kristu fl-Ewkarsitija, nirċievu lil Kristu sħiħ u dak il-ħin Kristu qed jagħmilna ħaġa waħda.

Il-laqgħat ikomplu nhar il-Ġimgħa 19 ta’ Ġunju fis-sebgħa ta’ filgħaxija.

“Din hi tabilħaqq ir-rieda ta’ Missieri: li kull min jara lill-Iben u jemmen fih, ikollu l-ħajja ta’ dejjem.”(Ġw 6, 40)

L-evanġelju li tlabna permezz tiegħu waqt il-laqgħa bi preparazzjoni għall-Jum tal-Għid tal-Imwiet kien meħud mill-Evanġelju ta’ San Ġwann Kapitlu 6, Vrus minn 37 sa 40.

Li nara lill-Iben ifisser li nkun iltqajt mal-persuna ta’ Ġesú, tgħallimt fuqu, min kien, x’kien jagħmel u x’kien it-tagħlim tiegħu. Peró dan mhux biżżejjed għaliex hemm bżonn il-fidi.

Li nemmen ifisser li jkolli fiduċja f’dan Ġesú li miegħu inkun iltqajt. Fiduċja tfisser li temmen, tagħmel u tħossok parti minn dak kollu li l-Mulej Ġesú jgħallimna jew jitlob minna. Meta inti temmen tkun għalhekk qiegħed tirċievi mingħand Ġesú il-ħajja ta’ dejjem. Il-Ħajja ta’ dejjem diġá bdiet minn din id-dinja.

X’inhi l-mewt?

Nafu li l-mewt iġġiegħel lin-nies isofru, jibku u jaqtgħu qalbhom fost diversi emozzjonijiet oħra. Imma hija hekk biss?

Il-mewt hija passaġġ mill-ħajja eterna li diġá bdiet; għall-kumplament tal-ħajja tagħna magħqudin ma’ Alla. L-ewwel pellegrinaġġ ta’ ħajjitna aħna nagħmluh hawnhekk fuq din l-art. Il-mewt hija għalhekk il-kontinwazzjoni ta’ dan il-pellegrinaġġ li jwassalna biex ningħaqdu mal-Mulej Ġesú fil-ġenna fejn kif qalilna San Pawl hemm jistenniena: “dak li għajn qatt ma rat u widna qatt ma semgħet, u dak li qatt ma tnissel f’qalb il-bniedem, dak li Alla lesta għal dawk li jħobbuh.”(1Kor 2, 9)

Il-Knisja tistedinna biex darba f’sena niftakru f’dawk li diġá għaddej minn dan il-passaġġ. Hemm rabta Spiritwali kbira bejn il-membri tal-Knisja fuq din l-art u dawk fis-sema. Aħna lkoll obbligati li bħalma ngħinu lill-proxxmu tagħna li jinsab madwarna fiżikament, hekk ukoll ngħinu bit-talb lil dawk li qegħdin diġá fil-ħajja l-oħra. B’hekk il-mewt issir rebħa u bidla  li rebaħ Kristu permezz tal-mewt u l-qawmien tiegħu.

Fil-mewt aħna l-bnedmin insibu s-sliem etern għaliex ningħaqdu għal dejjem ma’ dan Alla li ħalaqna. Il-Mulej mhux ser jitlaq lil dawk li fil-ħajja tagħhom għamlu l-għażla tiegħu.

“Mhux biex nagħmel ir-rieda tiegħi imma r-rieda ta’ min bagħatni.”(Ġw 6, 38)

Aħna r-rieda ta’ min qegħdin nagħmlu? Tagħna, ta’ min jinfluwenzana, tas-suq kummerċjali/reklami, xi grupp li nappartjeni għalih jew forsi ta’ min għandu prinċipji u valuri differenti minn dawk Kattoliċi? Tajjeb li nirriflettu għaliex ngħidu ċertu affarijiet jew kif inġibu ruħna quddiem ċerti valuri jew sitwazzjonijiet.

“Ir-rieda ta’ min bagħatni hija din: li jiena ma nitlef xejn minn dak kollu li tani.” (Ġw 6, 39)

Hawnhekk Ġesú qed jurina kemm aħna mportanti għalih bħala bnedmin li aħna xbiha ta’ Alla. Issemmew waqt il-laqgħa parabboli bħal tan-nagħga l-mitlufa u tal-Iben il-Ħali fejn naraw kemm huma mportanti l-persuni għal Ġesú. Il-persuni li għal Ġesú huma mportanti mhumiex biss il-ġusti u dawk ta’ subgħajhom dritt imma wkoll il-midimba.

Ġie moqri wkoll l-ewwel Qari fejn insibu l-faraġ fil-Mulej li huwa d-Difensur tagħna: “Jien naf li d-difensur tiegħi ħaj, u fl-aħħar fuq it-trab iqum. U wara li jintemm ġildi, mingħajr laħmi nara ‘l Alla. Lilu narah b’ħabib tiegħi.”(Ġob 19, 25-26)

Il-laqgħa intemmet bil-Qari ta’ Salm 22 fejn insibu l-istqarrija li “l-Mulej huwa r-Ragħaj u s-Salvazzjoni tiegħi; minn min għandi nibża’? Il-Mulej hu l-kenn tiegħi, quddiem min għandi nitwerwer?”(Salm 26, 1)

Nemmen li kieku aħna m’għandniex fidi fix-xogħol volontarjat tagħna kieku m’aħnix hawn.

Li jkollok il-fidi, hija li temmen mingħajr ma tifhem. Il-fidi, bejnietna hija hekk ukoll; li jkollna fiduċja f’xulxin minkejja li mhux dejjem nifhmu lil xulxin. Kull ħsieb li jista’ jfixkilna milli nafdaw lil xulxin jkun ġej mix-xitan. Fidi Spiritwali hija li aħna jkollna fidi fix-xogħol ta’ Alla għalkemm mhux dejjem nifmuh.

Filwaqt li l-moħħ huwa aktar b’saħħtu mill-ġisem, L-Ispirtu huwa aktar b’saħħtu mill-moħħ.  La darba temmen dan, tkabbar dan it-twemmin fik. Kull diffikulta li nintaqaw magħha hija opportunita’ biex inkabbru l-fidi tagħna.

Talba

Mulej Ġesu’ nizzel fina L-Ispirtu tiegħek biex bħalma għamilt mad-dixxipli tagħmlu magħna.  Itfa fina l-qawwa tal-Ispirtu s-Santu biex nintlew b’fidi qawwija ħalli bħala komunita’ nxandru l-kelma tiegħek.  Użana Mulej u mlina bil-fidi soda biex qatt ma nitilfu kull opportunita’ biex nevanġelizzaw jew niddubitaw mill-fidi tagħna.

Ammen

Post ta’ Joanne Ciantar

Wieħed jista jsib il-liturġija ta’ dawn il-jiem fuq il-website: www.cakmalta.org. Għafas il-links hawn taħt biex tmur dirett fuq il-liturġija tal-jum li għandek bżonn:

It-Tifkira Solenni Tal-Ikla Tal-Mulej – Sena A 17 ta’ April 2014

Il-Ġimgħa l-Kbira – Sena A 18 ta’ April 2014

Sibt il-Għid – Sena A 19 ta’ April 2014

Waqt il-‘Prayer Cafe’  minn Fr. Charles Fenech  10 ta’ Jannar 2014

Il-Festa tal-Magħmudija tal-Mulej.

Illum qed nimlew l-ispazju tagħna bil-preokupazzjonijiet tal-ħajja u spazju għal Ġesu’ m’għandniex.  Materjal biex naħdmu hemm kemm wieħed irid.  Bħal  meta naqraw kotba reliġjużi, nisimgħu Radju Marija, infittxu fuq l-internet…  Pero’ mhux dawn biss,  anke min isegwi l-internet jew min għandu radju diġitali, jista’ jisma’ il-Kelma tal-Papa Franġisku KULJUM fuq ir-radju Vatikan.  Li nistgħu nisimgħu l-Omeliji tal-Papa kuljum hija xi ħaġa ġdida – qabel wieħed kien jisma’ biss xi omelija tal-Papa jew fil-Milied u  l-Għid jew f’xi okkażżjonijiet solenni.  Il-Papa jitkellem b’mod li jifhmu kulħadd.  Għalhekk ninsabu iffurtunati li min jrid jħalli l-Mulej jidħol fih, hemm kull mezz.  M’għandniex skużi!

Importanti li nħarsu lejn il-magħmudija tagħna għax ħafna minna l-Insara ma nagħtux kas li aħna Nsara.

Dawn huma xi wħud mill-frażijiet li uża l-Papa waqt l-omeliji tiegħu.  Kompla jgħid,  kif jista’ jkun li bl-inżul tal-Ispirtu s-Santu fuq l-Appostli, fuq il-knisja u fuq kull wieħed minna, jkollna knisja ta’ nies li jemmnu imma l-fidi tagħhom hija mejta.  Aħna nofsna ħajjin u nofsna mejtin.  Dan qalu l-Papa’ illum.

Atejiżmu Kristjan?         Min huma dawn?

Kull min jgħid li hu Kristjan imma ma  jemminx huwa dak il-bniedem li jaf meta twieled imma l-anqas joħlom biex ikun jaf meta tgħammed.  Huwa dak li jmur il-knisja u ma jemminx.  Nofs il-knisja hija iffurmata minn nies nofshom mejtin.  L-importanti mhux li l-bankijiet tal-knisja ikunu mimlijin, imma li nkunu konvinti minn dak li qed nisimgħu.  Mhux il-kwantità mma l-kwalità.  Il-knisja kienet aktar b’saħħitha meta kienet fil-minoranza; il-knisja tal-bidu, tal-persekuzzjonijiet, tal-martri, fejn in nies kienu ta’ kwalità.  Bil-kontra ta’ meta l-knisja kienet marbuta mal-gvernijiet, fejn kien hemm kwantità tan-nies imma ukoll ħafna skandli.

Għalhekk tajjeb li wieħed jagħmel sforz u jkun nisrani ta’ kwalita’ u mhux ta’ numru.  Dan billi nagħtu spażju fil-ħajja tagħna lil Ġesu’.  Ma niċċelebrawx biss il-ġurnata ta’ għeluq snina , imma d-data tal-magħmudija.  Min minkom tafu d-data tal-magħmudija tagħkom?

Wara li Ġesu’ tgħammed instama’ leħen jgħid: “Dan hu Ibni l-għażiż; fih sibt il-għaxqa tiegħi.”            Ġesu’  jista’ jgħid l-istess fuqna?  Kemm minna naħsbu f’Ġesu’ matul il-ġurnata?  Forsi aħna nsemmuh l-isem ta’ Alla ta’ spiss; għax kif inxelfu subgħajna jeħel Alla magħna.  Kif tiġri xi ħaġa ħażina jeħel Alla mall-ewwel,  jekk ma ngħidux bil-kliem, naħsbu f’moħħna.  U fl-istess ħin ninsew in-nar ta’ imħabba li daħal fina fil-magħmudija.

Aħna qegħdin nagħtu x-xhieda tagħna ta’ Nsara?

Jekk l-aġenda tiegħek hija kompletament differenti minn dik ta’ nisrani, allura hemm xi ħaġa li mhux sejra sew fl-għejxin tal-fidi tiegħek.  Għalhekk importanti li tiftakar meta tgħammidt, għax m’hijiex biss data imma hija ukoll mixja.  Importanti li nħallu lill-Mulej jmexxina Hu fit-triq tagħna.  Huwa għandu l-modi, il-mumenti ta’ sorprizi ta’ kif imexxina fit-triq tagħna.  Uża kull meżż biex tagħti spażju lil Alla, taqtax qalbek, Il-Mulej qiegħed miegħek, ħallih jidħol f’ħajtek imbagħad imexxik Hu.  Aħna wkoll dixxipli.

Il-provi għall-kunċert tal-Milied tal-kor tat-tfal Christour għaddejin ġmielom. Il-kor taħt id-direzzjoni ta’ Mary Rose Buhagiar, Debbie Scerri u Mary Sammut, ser ikantaw għanjiet tal-Milied, waqt dan il-kunċert ta’ siegħa, li ser isir nhar il-Ġimgħa 27 ta’ Diċembru fis-19:15.

Għafas hawn għal-iktar informazzjoni!

30 Ħadd ta’ Matul is-Sena.

Lq 18:9-14

Il-laqgħat Prayer Café, tkomplew il-bieraħ fiċ-ċentru tal-Kerŷgma, fejn Fr. Charles Fenech tkellem fuq il-Vanġelu tal-Ħadd li jmiss.  Dawn huma ftit punti meħudin mid-diskors tiegħu.

Il-Vanġelu tal-Ħadd li jmiss min jaf kemm-il darba smajnih, m’hemm xejn speċjali fih jekk neħduh b’mod artifiċjali. Il-Bibbja hi xi ħaġa li trid taqraha bil-mod, għax meta taqraha bil-mod l-Ispirtu t’Alla jdawwlek u jkollok ċans tomgħod il-Kelma t’Alla.

Min kienu il-Fariżej u l-Pubblikan? Ma kienux jitħamlu bejniethom. Il-Fariżew kienu l-għalliema li jsegwu l-liġijiet sal-anqas dettalji iżda mbagħad kienu jagħmlu dak li jfettilhom u għalhekk Ġesu kien jikkritikhom daqshekk. Fir-reliġjon Ġudajka hemm ‘l fuq minn 613 liġi u dawn barra li jridu jitgħallmuhom jridu jwettquhom. Ħafna mill-liġijiet huma marbutin mal-iġjene u mat-taxxi; filwaqt li l-Pubblikani kienu nies li jiġbru t-taxxi għall-ħakkiema Rumani barra li jieħdu xi ħaġa żejda għal buthom. Għalhekk ħadd ma kien iħares lejhom sabiħ. It-taxxa minn dejjem kienet xi ħaġa ġusta iżda li ħadd ma jieħu gost biha!

Ir-relazzjoni u r-rejazzjoni ta’ dawn iż-żewġ persuni jagħtuna żewġ modi ta’ kif nersqu lejn Alla fit-talb. Forsi aħna meta nisimgħu lill-Fariżew ngħidu x’għarukaża dan kemm jiftaħar bih innifsu: kliem il-Farizew kien “O Alla, niżżik ħajr li miniex bħall-bqija tal-bnedmin, ħalliela, inġusti, żienja, jew ukoll bħal dan il-publikan…” Lq 18:11 hawn għamel screening ta’ dak li għamel hu u ma talab xejn, u maqdar lill-publikan li kien qiegħed fit-tempju miegħu. Neżaminaw ftit kif inhu t-talb tagħna u kif suppost hu, kompla Fr. Charles.  Aħna l-Mediterranji għandna t-tendenza li ma jaħrabilna xejn – minflok noqgħodu attenti għat-talb tal-quddiesa aktar moħħna fuq min għaddej. M’aħniex kapaċi nikkonċentraw fuq il-Mulej. Hawn Fr. Charles qasam esperjenza li ltaqa’ magħha: daħal wieħed il-knisja li kien ilu ma jersaq ‘l hemm u dawk li huma midħla tal-knisja flok laqgħuh qalu ”Ara x’qala’ l-baħar, dan x’ġie jagħmel?” (b’mod li jisma’ dan ir-raġel.) Imbagħad fil-quddiesa talbu għall-midinbin! Hija faċli li niġġenarilizzaw u niġġudikaw kemm fil-knisja, kif ukoll barra mill-knisja. Mentri t-talb ifisser dak li għamel l-Pubblikan. “O Alla, ħenn għalija għax jien midneb.”Lq 18:13.

Fr. Charles żied jgħid li dawn l-aħħar Ħdud il-Vanġelu kien ikkonċentrat fuq it-talb. Ġesu qed jgħidilna kif għandu jkun it-talb. L-imġiddma jitolbu għal miraklu u jseħħ. Aħna kemm nirringrazzjaw lill-Mulej ta’ dak li jagħtina? Fil-parabbola tal-armla nsibu l-Imħallef li wara li qalgħatlu qalbu l-armla, taha dak li riedet biex jeħles minnha. Alla ma jaħdimx hekk magħna. Kemm tassew qegħdin nagħtu spazju lil Alla f’ħajjitna?  Din hi importanti – għax minn hemm tibda tinduna kemm l-Mulej jagħtina sinjali biex jagħtina kuraġġ u hawn Fr Charles ta eżempju kif hu stess qabel programm fuq Radju Marija qal lill-Mulej li dakinhar kienet f’idejH (f’idejn il-Mulej) , u propju  dakinhar iċċempel waħda mill-kontinent l-ieħor – mill-Awstralja tagħti xhieda li hi kompliet ixxerred dak li tgħallmet dwar il-Kelma t’Alla f’Malta.

Fr. Charles saħaq li huwa importanti li nħallu ħin għat-talb. Kultant sfortunatament ikunu l-ġenituri stess li jgħidu lit-tfal li l-ewwel għandha tiġi l-iskola mhux it-talb, mhux il-quddies! Iżda meta tagħti l-ewwel post f’ħajtek lil Alla kollox jibda jieħu postu. Xorta se jibqgħu l-problemi tal-ħajja iżda l-mod kif tħares lejn il-problemi jinbidel. Meta ma nħallux f’idejn Alla nibdew ninstabtu mal-ħajt. Hemm bżonn indaħħluh aktar fil-familji tagħna. Nħallu lill-Mulej imexxi l-familji tagħna. Għandna nħallu f’idejn il-Mulej. It-talba tagħna għandha tkun bħal ta’ Marija “Ħa jkun minni skont kelmtek” mhux skont kelmti.  Nħallu ‘ill-MULEJ jkun il-Mulej tas-SORPRIŻI.

Fr. Charles Fenech semma wkoll li kellu konferenza l-Vatikan fuq il-Fidi u l-Isports u wara l-Angelus, id-delegati ltaqgħu b’mod personali mal-Papa Franġisku. Fr. Charles ppreżentalu kopja tax-‘Xandar il-Kelma’ li b’kumbinazzjoni fil-faċċata nzerta kellu wiċċ il-Papa bil-kliem tiegħu stess ‘Sorpriżi minn Alla.” U l-Papa qallu “ U iktar nippriedkom dawn il-kliem għax veru minnhom. F’dawn l-aħħar sitt xhur kelli ħafna sorpriżi minn Alla” fosthom semma meta l-Papa ħareġ bl-ideja ta’ talb u sawm minħabba l-gwerra tas-Syria. Minkejja li għandu fidi kbira f’Alla kienet sorpriza kbira minn Alla li l-gwerra ma seħħitx.

Sorpriżi ta’ Alla hi realta’ kbira meta aħna nidħlu f’kuntatt ma’ Alla permezz tat-talb. It-talb mhux xi ħaġa tax-xjuħ jew tal-pensjonanti. IT-TALB ifisser tippreżenta ruħek kif int quddiem Alla. – bid-dnubiet tiegħek. Kif insibu fil-Ktieb ta’ Bin Sirak (fl-ewwel qari ta’ nhar il-Ħadd) “Il-Mulej hu Alla tas-sewwa, ma jħares lejn wiċċ ħadd.” Bin Sirak 35:12 .Il-Mulej ma jridx reċti.

AVVIŻI :

• Dawk it-tfal minn Year 4 ‘l fuq li jixtiequ jsiru parti minn Christour Children’s Choir jistgħu jiġu għall-audition San Duminku nhar ta’ Tlieta fis-7.00pm. Min jixtieq jieħu sehem fil-Christmas Concert jgħaġġel għax ir-rehearsals ġa bdew. Dan il-choir huwa mmexxi minn għalliema professjonali tal-mużika: Debbie Scerri, Mary Rose Buhagiar u Mary Sammut. Dan hu mod ieħor kif nevanġelizzaw.
• Nhar il-Ħamis 31 t’Ottubru se jkun hemm Quddiesa u Adorazzjoni biex nevanġelizzaw organizata mill-Kerŷgma. Inħajjru lil ħaddieħor biex jiġi.

28 Ħadd ta’ matul is-sena.

Noti mil-laqgħa Prayer Cafe’ tal-Ġimgħa 11 ta’ Ottubru 2013

Waqt il-laqgħa tal-Kerygma Fr. Charles Fenech tkellem fuq il-vanġelu tal-Ħadd li jmiss.  Dawn huma ftit spunti meħudin mid-diskors tiegħu.

Aħna nieħdu for granted  li ma nirringrazzjawhx lil Alla għax għandna dritt għalihom għal dak li nitolbuh.  Kuljum inpapċu, kulħadd, mhux in-nisa biss.  Nibżgħu mis-skiet, umbagħad ħin lil Alla m’għandix ħila ntuh.

Iva, nibżgħu mis-skiet.  Waqt adorazzjoni, għax mhux imdorrijin, moħħna jiġri bina.  Ma nħallux spazju għal intervent tagħna m’Alla.

Aktar ma nisimgħu l-kelma t’Alla, iċċartilna qalbna fil-kuntens tagħha.

Fiż-żmien Gesu’, l-lebbra, ma kienx hemm fejqan għaliha, allura kull min kien ikun marid biha, jrid jitlaq mis-soċjeta, jinqata’ għaliex il-marda ġġib epidemija sħiħa, ikollu joqgħod fit-tarf tas-soċjeta’ u ma kellu ebda dritt ta’ bniedem.  Kien ikollhom jgħajtu “Jien imġiddem.”  Ħalli ħadd ma’ jersaq lejhom.

Iżda dawn flok għajtu hekk qalu “Mgħallem, ikollok ħniena minna.”

Gesu’ kien spontajnu, u qalilhom “Morru uru rwieħkom lill-qassisin.” Għax Hu kien jaf li ħa jfiqu u bagħathom biex jirringrazzjaw.

It-Time Frame tagħna mhux bħal ta’ Gesu’.  Mhux kull meta nitolbu, huwa jfejjaqna.

Wieħed biss mar jirringrazzja lil Alla.  Hawnhekk niftħu għajnejna, għax anki t-talb tagħna mhux dejjem ikun sew.  Kemm qed nirringrazzjawh lil Alla fit-talb tagħna?  Aħna bħala nsara maturi,  bħala koppji, komunita’ jridu nirringrazzjaw lil Alla.

“Morru uru rwieħkom lill-qassisin, il-fidi tiegħek fejqitek.”  Fejnha l-fidi tagħna, l-liema barometru qegħdin? Henjin dawk li ma rawx u emmnu.”

Għandna bżonn nagħmlu reviżjoni tat-talb tagħna. Għandna bżonn inbiddlu l-attitudni tat-talb tagħna.  Ma nistgħux nibqgħu nitolbu biss meta tinqala’ xi emergenza, meta nkunu fi krizi.  Ma nkunux parti mid-disgħa.  Jekk int ma titlobx u tirringrazzja lil Alla kuljum, mela int nisrani part time. Kultant aħna nsara tal-krizijiet; meta niġu darna mal-ħajt induru lejn Alla.  Ma nistgħux nibqgħu hekk. Iridu nkunu nsara ta’ veru.

Dan il-vanġelu jagħti indikazzjoni tal-qrar.  Ineħħi l-ġdiem.  Il-qrar irid jsir ta’ spiss, mhux ta’ żewġ sekondi qabel il-quddies.  Trid tkun rutina,  bħal meta jżomm rutina li tmur għand id-dentist.  Il-qrar huwa l-istess.   Fil-qrar niftħu relazzjoni beraħ mal-Mulej.  Il-Mulej ma jħarisx lejn l-uċuh jew lejn il-ġdiem.

Qegħdin inħossu l-fidi qed tfejjaqna?  Għax emmint fil-kelma fiqt.  Aħna nisimgħu ħafna,  imma nemnu fiha?

It-talb għandu qawwa kbira.  Ippruvaw u taraw kemm hu tajjeb.  Kif? Ezempju, dik il-persuna li int tevita biex ma tkellimix,  itlob fuq din il-problema u ħalli l-fidi tiegħek tgħinek mhux kif taħseb int.

Nitolbu bil-fidi u nirringrazzjaw lil Alla.

 Diskussjoni

l-għaxart irġiel għarfu li għandhom bżonn l-għajnuna u għamlu x’ħaġa fuqha. X’għamlu?

l-ewwel ma stħawx juru wiċċhom u l-problema tagħhom u resqu HUMA lejn Ġesu’. Taħseb li Ġesu’ ma kienx rahom qabel? Imma jekk aħna ma nitolbuhx l-għajnuna u mhux ħa jdejjaqna .  Jħalli lilna ngħamlu l-ewwel pass.  Kwazi f’kull meraklu narawha din.  Li dejjem kienet il-persuna li resqet għall-għajnuna għand Gesu.

Aħna meta fil-ħajja tagħna jkollna xi problema jew sitwazzjoni, nirrikorru għand il-prof. tabib, avukat ect.  Dan huwa tajjeb li ngħamluh, imma kemm minna nersqu quddiem Ġesu’ u nitolbuh? Kemm minna nemmnu li huwa Hu li jnaddaf kull ġdiem….basta nersqu aħna l-ewwel.

Mela għaraf li għandek bżonnu, ersaq lejh, itlob u emmen bil-fidi u faħħar.

Gesu’ jgħin lil kull minn jitolbu.  Meta Gesu’ jisma l-bikja tagħna, it-talba tagħna, Gesu’ qatt u qatt ma jdawwar wiċċhu u jinjorana. Fil-Bibbja,kull min resaq lejn Ġesu’, Ġesu’dejjem kellu risposta jew fejqan għalih.

Sikwit insibu lil Ġesu’ jgħid “il-fidi tiegħek fejqitek”.

Issa ħa niġu għall- parti tal-fejqan.  Għaliex dawn fiqu u jien li tant ili nitlob lill Ġesu x’ħaġa għandni ma qlajtix?  Jista’ jkun il-fidi qed jżommni?  U jekk hi l-fidi. mela ħa nara x’inhi sew il-fidi għax JRID nfiq, JRID naqla dak li qed nitlob jew risposta.

Int x’taħseb? Temmen li Alla huwa miegħek u tista tegħleb kull dnub u ġdiem?  Temmen li dan tista’ tagħmlu biss bil-fidi?

Il-fidi hija x’ħaġa spiritwali ma tarahiex.  Hija kif naħseb jien, kunfidenza f’Alla u temmen.  Fil-Bibbja, naraw kif Abraham, sar il-kampjun tal-bniedem tal-fidi.  Il-bniedem li hu miftuħ għal Alla.  Bniedem li jobdi minkejja li ma jifhimx.  Il-bniedem li jittama minkejja li ma kellu l-ebda tama quddiemu.

U ħaġa oħra!  Aħna t-tfal ngħidulhom, x inhi l- magic word? U jgħidulek “Thank you”.

Mela aħna t-tfal ngħalmuhom jgħidu thankyou lill ġenituri, lill-għalliema ect. Ngħalmuhom ukoll jgħidu thankyou lil Alla? U fuq kollox mhux li ngħidulhom biss għax l-eżempju jkaxkar!

Mela minn din is-silta x’sa nieħdu magħna d-dar?

Għaraf li għandek bżonnu, ersaq lejh, itlob u emmen bil-fidi u faħħar.

Id-diskors tal-Arċisqof fil-festa ta’ Kristu Re’ 2012 huwa relevanti:

http://maltadiocese.org/posts/detail/archbishops-message-on-the-feast-of-christ-the-kingil-messagg-tal-arcisqof-fil-festa-ta-kristu-re-2012