Imwieled Francesco Forgione, magħruf l-iktar bħala Patri Piju jew Padre Pio, (Pietrelcina, Italja, 25 ta’ Mejju 1887 – San Giovanni Rotondo, 23 ta’ Settembru 1968), kien patri Franġiskan Kapuċċin Taljan u saċerdot; qaddis ikkanonizzat mill-Knisja Kattolika li ċ-ċelebrazzjoni tal-festa tiegħu ssir fit-23 ta’ Settembru, fl-anniversarju ta’ mewtu.

 

Anke meta kien għadu ħaj, ingħata venerazzjoni popolari kbira minħabba l-pjagi li kellu f’ġismu u l-mirakli li jingħad li wettaq f’ħajtu u wara mewtu. Kien ukoll oġġett ta’ ħafna kritika u suspetti fi ħdan il-Knisja u barra minnha.

 

Il-fama ta’ Patri Piju xterdet ‘il barra mill-Italja. Kienu jmorru jżuruh pellegrini mhux biss mill-pajjiżi Ewropej, fosthom Maltin, iżda wkoll Amerikani u Sudamerikani. Eluf ta’ ittri kienu qegħdin jaslulu fil-kunvent minn madwar id-dinja kollha, x’uħud anke miċ-Ċina u mil-Lvant Imbiegħed. Fost l-ittri li rċieva kien hemm waħda, fl-1962, mingħand il-Kardinal Pollakk Karol Woytla (iktar tard il-Papa Ġwanni Pawlu II), li talbu biex jitlob għal waħda omm żagħżugħa Pollakka li kienet kważi fl-aħħar għax kellha tumur fi griżmejha. Għaddew ftit ġranet u l-Kardinal reġa’ kitiblu biex jirringrazzjah għax il-mara kienet qalgħet il-grazzja.

 

Minkejja l-popolarita’ kbira tiegħu, ħajtu fil-kunvent baqgħet dejjem l-istess. Kien iqaddes tal-ħamsa ta’ filgħodu. Għall-quddiesa tiegħu, in-nies ġieli għamlu lejl sħiħ wara l-bieb tal-knisja biex malli tiftaħ, jintasbu fl-ewwel postijiet. Nistgħu ngħidu li ħajtu bħala saċerdot kienet talb, quddiesa u qrar. Kien iqatta’ sigħat twal fil-konfessjonarju u kien jixtieq li “l-ġurnata fiha 48 siegħa flok 24” biex ikun jista’ jqarar iżjed. Fil-festi jingħad li ġieli għamel 18-il siegħa jqarar. Eluf kbar jingħad li sabu lil Alla mill-ġdid permezz ta’ Patri Piju. Kienu jqerru għandu isqfijiet, kardinali, politiċi, artisti u minn kull xorta ta’ nies.

 

Jibni sptar: Casa Sollievo della Sofferenza

 

Fl-1925 Patri Piju rranġa bini li qabel kien iservi ta’ monasteru u għamel sptar żgħir li semmieh San Franġisk. Iżda fl-1956 għamel l-opra kolossali tiegħu meta bil-flus ta’ ħafna benfatturi fetaħ wieħed mill-aktar sptarijiet moderni anke sal-ġurnata tal-lum, “Casa Sollievo della Sofferenza” – Dar għas-Serħan mit-Tbatija. Iżda dan l-isptar, għalkemm ġab serħan lil ħafna pazjenti, reġa’ ġab sofferenza kbira għal Patri Piju, liema sofferenza kient tixbah lil dik li għadda minnha għoxrin sena qabel, meta waqqfuh milli jqaddes. Issa Patri Piju kien bniedem anzjan u batut fiżikament.

 

Waqt li kien qed jinbena l-isptar mhux kollox kien miexi dritt fl-amministrazzjoni, mhux tort ta’ Patri Piju, li kien ħalla f’idejn ħaddieħor it-tmexxija tal-isptar. Fl-1952, il-Ġeneral tal-Kapuċċini, fuq struzzjoni mis-Sant’Uffizzju, wissa lir-reliġjużi tiegħu biex ma jorganizzawx pellegrinaġġi għal San Giovanni Rotondo. Fl-1960, il-Papa bagħat li Mons. Carlo Maccari biex jinvestiga l-ħafna xnigħat li kienu qegħdin isiru fuq Patri Piju, anke li kien qiegħed ikollu relazzjonijiet ma’ xi nisa. Patri Piju ġie miżmum milli jiċċelebra ż-żwiġijiet u l-magħmudijiet u ma jdumx iktar minn nofs siegħa fil-quddiesa. Saħansitra kienu tpoġġew xi mikrofoni fiċ-ċella u fil-konfessjonarju tiegħu. Patri Piju kien ħadha bi kbira wisq din il-ħaġa skandaluża għax qatt ma stenna li jsir dan min-nies tal-Knisja. Kien fl-1964, erba’ snin qabel mewtu, li l-Papa Pawlu VI temm din it-tieni persekuzzjoni tas-Sant’Uffizzju.

IL-MAGĦMUDIJA TAL-MULEJ – taħdita minn Fr. Joseph Aguis, il-Ġimgħa 11 ta’ Jannar, 2019.

 

Il-laqgħa bdiet bit-Talba tal-Moviment.

 

Skond il-Kalendarju Liturġiku, il-Ħadd 13 ta’ Jannar niċċelebraw il-Magħmudija tal-Mulej, li, fit-tradizzjoni tal-liturġija tal-Knisja, hi meqjusa bħala aspett tal-Epifanija. Meta ċċelebrajna l-Epifanija, l-attenzjoni tagħna kienet fuq iż-żjara tal-Maġi. Biss jekk naqraw it-testi liturġiċi, fl-Epifanija il-Knisja tagħmel riferiment espliċitu għaż-żjara tal-Maġi, għall-magħmudija ta’ Ġesu’ u anke għall-miraklu ta’ Ġesu’ f’Kana tal-Galileja.

 

L-Għasar tal-Epifanija jibda b’innu li fih hemm riferiment għal dawn it-tlett ġrajjiet:

 

“Ġrew il-Maġi wara l-kewba, fid-dawl tagħha d-dawl ifittxu”

“Il-Ħaruf tas-sema niżel fl-ilma tal-Ġordan u qaddsu”

“Ħammru l-ġarar kbar tal-ilma li l-qaddejja b’ordni Tiegħu rawh mibdul f’inbid quddiemhom”

 

Għall-Liturġija tal-Knisja, Ġesu’ jagħmel l-Epifanija Tiegħu – il-manifestazzjoni pubblika Tiegħu – mhux sepliċement dak inhar li marru ifittxuh il-Maġi, imma għamel hekk ukoll fil-Magħmudija, u kompla meta beda l-missjoni pubblika Tiegħu bl-ewwel miraklu fit-tieġ ta’ Kana. L-Epifanija ta’ Kristu hi progressiva.

 

Hawnhekk inqara’ l-Vanġelu tal-Ħadd – Luqa 3, v 15-16, 21-22.

 

F’dan ir-rakkont, l-Evanġelista jikkunsidra lil Ġesu’ esklussivament bħala bniedem – ma jikkunsidrax id-divinita’ Tiegħu. Ġesu’ kien bniedem normali bħal kulħadd, u bħal kull bniedem kiber anke fl-għerf Tiegħu. L-Evanġelista jippreżenta lil Ġesu’ li, meta resaq għall-magħmudija Tiegħu, intebaħ li Alla fdalu missjoni. L-inżul tal-Ispirtu s-Santu jfisser li kien ħa jkollu missjoni. Pero’, iktar importanti, hi n-natura tal-missjoni li kellu jwettaq.

 

Skond il-Vanġelu, id-dikjarazzjoni hi magħmula lil Kristu biex Hu jifhem x’inhi l-missjoni Tiegħu. Permezz ta’ din id-dikjarazzjoni, li kellha warajha awtorita’ divina, Kristu ntebaħ li kellu jaqdi dik il-missjoni li Iżaija kien ħabbar meta tkellem fuq il-Qaddej t’Alla. Kapitlu 53 jippreżenta lill-qaddej t’Alla bħala dak li ser jitgħabba bil-ħażen tal-komunita’ u jagħti ħajtu biex jeħlisha mid-dnubiet tagħha. Din kienet il-missjoni li kellu jaqdi Kristu.

 

Fil-bidu tal-Vanġelu nsibu li l-poplu kien qed jistenna ħerqan li jiġi restawrat darba għal dejjem ir-rapport tal-poplu m’Alla. Mhux kulħadd kellu l-istess ideja ta’ kif kellu jseħħ dan. Imma kienu jafu li kellu jseħħ bl’intervent t’Alla. Ħafna kienu jemmnu li Alla kien ser jinqeda’ bi bniedem, li nsejħulu l-Messija. Pero’ mhux kulħadd kellu l-istess opinjoni dwar il-missjoni Tiegħu. Meta Ġwanni ħareġ jippriedka, lin-nies ma qalilhomx biss biex jindmu minn dnubiethom, imma għammidhom ukoll. Din il-magħmudija ma kenitx il-magħmudija nisranija. Din ma kenitx istitwita dak inhar tal-magħmudija ta’ Ġesu’ minn Ġwanni, imma dak inhar li qal lill-appostli: “Morru għallmu lill-ġnus kollha, u għammduhom fl-isem tal-Missier, u tal-Iben, u tal-Ispirtu s-Santu”.

 

Il-magħmudija ta’ Ġwanni ma kenitx taħfer id-dnubiet. Kienet ħasil ritwali. Dawk li kienu qed jistennew li jidħlu f’rapport m’Alla kienu jindmu minn dnubiethom u b’turija ta dan kienu jinħaslu fil-Ġordan. Ġwanni kien jgħammidhom u kienu jittamaw li Alla jaħsilhom spiritwalment u jnaddafhom minn dnubiethom.

 

L-istqarrija tad-dnubiet fil-magħmudija ta’ Ġwanni m’għandniex inqabbluha mal-istqarrija tad-dnubiet fis-sagrament tar-Rikonċiljazzjoni. F’dan is-sagrament, kulħadd imur jistqarr id-dnubiet personali tiegħu. Fi żmien Ġwanni, l-istqarrija tad-dnubiet kienet iktar tixbah lil dik li nagħmlu fid-bidu tal-quddiesa: “Nistqarr ‘l Alla li jista’ kollox u lilkom ħuti …” Din hi stqarrija ġenerika li aħna midinbin u nitolbu lil Alla jaħfrilna dnubietna: “Mulej ħniena, Kristu ħniena …” Kienet stqarrija ta’ dan it-tip li kien jagħmel kull minn kien jitgħammed fil-Ġordan, u mhux kif nagħmlu aħna fil-qrar.

 

Għalhekk m’għandux ikollna problema li naraw li Ġesu’ jħoss il-bżonn li jitgħammed. Ġesu’ tgħammed minħabba li ħass li kien membru ta’ komunita’ midinba, jiġifieri b’solidarjeta’ magħha. Hu ma stqarrx dnubiet Tiegħu, imma dawk tal-komunita’. Ġesu’ ħass li kellu jitlob maħfra għad- dnubiet tal-komunita’.

 

Waqt il-Magħmudija, Ġesu’ talab. Talab qabel għażel it-Tnax, talab waqt it-Trasfigurazzjoni, talab qabel ma għallem il-Missierna lill-appostli, talab fil-Ġnien taż-Żebbuġ. Waqt li Ġesu’ kien qed jitlob, niżel fuqu l-Ispirtu s-Santu. Dan ifisser li fil-magħmudija Tiegħu Ġesu’ ġie mogħti missjoni.

 

F’dan ir-rakkon, l-Evanġelista qed jittratta lil Kristu bħala bniedem li, bil-mod il-mod, qed jagħraf x’ser jgħaddi minnu f’ħajtu. Fir-rakkont Bibliku, kull darba li individwu jinħakem mill-Ispirtu, jiġri hekk għax dan ikollu jaqdi missjoni, bħall-Profeti, l-Imħallfin, is-Slaten – il-qaddejja t’Alla. Hawmhekk Ġesu’ ppreżentat bħala l-qaddej t’Alla mwiegħed minn Iżaija, kap 42: “Araw il-qaddej Tiegħi li Jien inwieżen, il-Maħtur Tiegħi li fih qalbi strieħet. Inti Ibni l-għażiż li fik sibt il-għaxqa Tiegħi”. Il-fatt li l-Ispirtu niżel fuq Ġesu’ jfisser li ħu inħatar minn Alla biex jaqdi missjoni.

 

Il-Vanġelu jibda l-ewwel nett billi jispjega l-iskop tal-missjoni, u mbagħad kif kellu jaqdiha Ġesu’. L-iskop jidher f’dak li jingħad fuq il-ħamiema. Hawn għandna kwadru letterarju. Fir-referenza għall-ħamiema hemm allużżjoni impliċita għal żewġ rakkonti fit-Testment il-Qadim. Fir-rakkont tal-Ħolqien “l-Ispirtu t’Alla kien jittajjar bħal ħamiema fuq wiċċ l-ilmijiet”.  l-Evanġelista jrid jgħid li l-iskop tal-missjoni ta’ Kristu hu li kollox jerġa lura għar-rapport li l-bniedem kellu m’Alla fil-bidu tal-ħolqien. Għal dan l-iskop Ġesu’ ġie maħtur bħala l-ewwel wieħed f’dan il-ħolqien ġdid. Hemm allużżjoni wkoll fir-rakkont tad-dulluvju, li wkoll hu ppreżentat bħala ħolqien ġdid.

 

Din ir-restawrazzjoni tar-rapport tal-bniedem m’Alla hi l-iskop tal-missjoni ta’ Kristu. Għalhekk l-Evanġelista jinsisti fuq l-Ispirtu li niżel fuqu bħal ħamiema.

 

Pero’, l-iktar importanti hi d-dikjarazzjoni, għax fiha hemm speċifikament fiex kienet tikkonsisti l-missjoni ta’ Kristu. Meta naqraw li d-dikjarazzjoni ġiet mis-sema, dan ifisser li warajha hemm awtorita’ divina. Id-dikjarazzjoni saret personalment lil Kristu, mhux għal kull min kien hemm prseżenti. Il-kelma “Iben” fid-dikjarazzjoni m’għandniex nifhmuha fis-sens ta’ divinita’. Skond Iżaija, il-kelma “iben” tfisser “qaddej”. Kristu kellu jaqdi l-missjoni tal-qaddej li kien imwiegħed minn Iżaija. Kellu jitgħabba bid-dnubiet tal-komunita’, u biex jeħles lill-komunita’ minn dawk id-dnubiet jagħti ħajtu. “Hu refa’ fuqu l-mard tagħna, tgħabba bin-niket tagħna …..u bis-swat Tiegħu sibna l-fejqan”.

 

Din hi l-missjoni li kellu jwettaq Kristu – li jġib ruħu kif previst fil-profezija ta’ Iżaija – jitgħabba bid-dnubiet tal-komunita’, imut biex jeħlisha minn dnubietha, u b’hekk jiġu restawrat ir-rapport t’Alla mall-komunita’ – dak ir-rappport li kellha fil-bidu tal-ħolqien. Hekk il-magħmudija ta’ Ġesu’ hi tħabbira tal-mewt Tiegħu fuq is-salib. Infatti, meta Ġesu’ tkellem fuq il-mewt Tiegħu, sejħilha “magħmudija” (Lq K12, v50).

 

San Luqa, fir-rakkonti tiegħu, spiss jagħmel allużżjoni impliċita għall-mewt ta’ Kristu fuq is-salib. Ir-ragħajja tħabbrilhom Salvatur, dawn marru jfittxuh f’Betlem, sabuh f’maxtura mgeżwer fil-faxex – allużżjoni għall-mewt ta’ Ġesu’ li kien imgeżwer fil-faxex u l-liżar. Meta Kristu temm il-missjoni Tiegħu, dawk il-faxex u l-liżar ħalliehom warajh. Jekk aħna rridu nagħrfu s-sens tal-maxtura ta’ Betlem irridu nżommu quddiem għajnejna s-sens tas-salib u l-qabar vojt.

 

Ir-Reliġjon tagħna mhix reliġjon tas-sentimentaliżmu. Alla bagħat lill-Ibnu fid-dinja biex imut. Din hi l-ideja li niltaqgħu magħha fit-Testment il-Ġdid kollu. Għalhekk, Ġesu’ jgħid “Kollox mitmum” – il-missjoni kien qdieha sal-aħħar. Hi għajta ta’ trijonf, mument ta’ glorja: “meta nkun merfugħ, niġbed lil kulħadd lejja”.

 

Il-Vanġelu tal-Ħadd jitkellem esklussivament fuq Ġesu’ – Hu l-protagonista. Impliċement hemm riferenza wkoll għall-magħmudija tagħna. Ġwanni jgħid: “Hu jgħammidkom bl-Ispirtu s-Santu u n-nar”.

 

Jekk il-Magħmudija ta’ Ġesu’ ġabet fih bidla, Hu aċċetta. Ħalla l-ħajja privata Tiegħu u beda dik pubblika, fejn kellu jkun il-qaddej t’Alla. Il-Magħmudija tagħna wkoll iġġib bidla. Teħlisna mill-jasar tad-dnub, u tibda fina rapport partikulari m’Alla – insiru ulied addottivi t’Alla. Irridu nimpenjaw ruħna biex noqgħodu għar-rieda t’Alla. Ser ikun hemm mumenti li rridu nagħmlu l-istess sagrifiċċju li għamel Ġesu’ biex qeda’ l-missjoni Tiegħu.

 

Ġesu’ qatt ma wiegħed lid-dixxipli Tiegħu xi ġenna tal-art: “Min irid jimxi warajja jrid jerfa’ salibu ta’ kuljum”. Se jkun hemm mumenti meta niġu mitlubin nagħmlu l-istess għażla bħal ma għamel Ġesu’. Kultant irridu negħlbu l-istinti tagħna biex nibqgħu fidili għall-wegħdiet li għamilna fil-magħmudija. Irridu nġibu ruħna ta’ qaddejja t’Alla.

 

Id-dinja tal-lum għandha bżonn ta’ din ix-xhieda. Qed ngħixu f’soċjeta’ sekularizzata – soċjeta’ li tittollera l-Kristjaneżmu imma ħafna drabi ma tantx għandha stima tiegħu. Il-missjoini tagħna hi li nuru li anke f’soċjeta’ sekularizzata il-Kristjaneżmu għandu ċertu valur li jħalli impatt pożittiv anke fuq is-soċjeta’ ċivili.

 

Il-laqgħa għalqet bit-talba tal-Missierna.

 

 Il-Moviment Kerygma ser jerġa jorganizza l-“Premju Żagħżugħ tas-Sena” bil-għan li joħroġ fil-beraħ l-impenn taż-żgħażagħ b’mod nisrani fis-soċjetà Maltija.

Il-Premju hu miftuħ għal dawk iż-żgħażagħ kollha li juru sens kbir ta’ impenn fil-ħajja nisranija tagħhom ta’ kuljum u għalhekk jkunu ta’ eżempju qawwi għal żgħażagħ oħra.

Niżżel kopja tar-Regolamenti u l-Formola ta’ Applikazzjoni biex tkunu tistgħu tinnomminaw xi żagħżugħ jew żagħżuha li taħsbu li jikkwalifikaw u jimmerithom jkunu nnominati għal dan il-premju prestiġjuż.

 

Niżżel ir-Regolamenti

Niżżel il-Formola

 

L-applikazzjonijiet  u d-dokumenti relattivi għall-Premju Żagħżugħ tas-Sena 2018 għandhom jaslu fl-uffiċċju tal-Moviment Kerygma sa mhux aktar tard mil-Ġimgħa, 9 ta’ Novembru 2018 fl-12.00pm.  Applikazzjonijiet li jaslu wara din id-data ma jkunux ikkunsidrati.

 

Il-laqgħa bdiet bil-kant tat-Talba tal-Moviment.

Imbagħad inqara l-Vanġelu tal-Ħadd – Matt 25: 1-13 – Il-Parabbola tal-Għaxar Xebbiet. Ħafna drabi l-Vanġelu jibda bil-kliem “dak iż-żmien”. Kif nisimgħu din l-espressjoni norbtuha ma’ xi ħaġa tal-passat. Pero’ “dak iż-żmien” jista’ jkun illum ukoll, għaliex il-Vanġelu hu universali. Il-Vanġelu mhux miktub għall-insara ta’ dak iż-żmien biss, imma għandu tifsira għal kulħadd – għal issa u għaż-żmien li ġej.

X’inhu ż-żmien li ġej? Ma nafux, imma l-Parabbola turina ċar x’se jiġri fiż-żmien li ġej. Għaliex Bin il-Bniedem għad jiġi għalina u għal kulħadd mingħajr ma jkun mistenni, kif naraw fil-Parabbola.

Hawnhekk insibu kelma mportanti – “ishru” – ibqgħu dejjem imqajjmin, jiġifieri lesti, bħax-xbejbiet għaqlin tal-Parabbola.

Ġesu’ jibda r-rakkont hekk – “Is-saltna tas-smewwiet tixbah…” Meta jirrakkonta xi ħaġa, Ġesu’ jrid dejjem iwassalna lejn dak li hu l-veru għan tagħna – dak li jrid jiġri wara t-tmiem. L-għaxar xebbiet kollha kienu qed jistennew il-miġja tal-għarus. U kienu lesti li jistennew anke sad-dlam. Imma ħamsa kienu għaqlin, u ħamsa kienu boloh. L-għaqlin ħasbu ‘l quddiem għal li jista’ jinqala’. U allura ħadu magħhom iktar żejt. U l-boloh ma ħasbux, ma tawx kas. U l-għarus iddawwar ma ġie. Ma nafux għaliex – ma qalx x’ħin se jasal. Hawn niftakru wkoll fi kliem Ġesu’: “Li kieku s-sid jaf x’ħin se jiġi l-ħalliel ….”

Aħna rridu nkunu dejjem lesti. L-imsiebaħ tal-għaxar xebbiet baqgħu mixgħula sakemm baqa’ żejt fihom. Imma ż-żejt beda’ jonqos, allura kien hemm il-ħtieġa li jimlewhom.

X’inhu ż-żejt għalina bħala nsara? Huma l-azzjonijiet tajba tagħna – dak kollu li nagħmlu biex nibqgħu dejjem nikkonvertu – inħarsu ‘l quddiem lejn l-għan veru tagħna – il-ħajja ta’ dejjem.

X’ħin qorob l-għarus naraw ir-reazzjoni tax-xbejbiet. Il-boloh indunaw li ma kellomx biex iżommu d-dawl ħaj – il-festa ħajja. Allura talbu lill-għaqlin biex ituhom minn tagħhom. L-għaqlin qalulhom li jekk jagħmlu hekk ma jkunx hemm biżżejjed għal kulħadd. Qalulhom biex jaħsbu għal rashom. Dawn aċċettaw il-parir u marru jfittxu. L-għarus wasal x’ħin kienu għadhom ma ġewx lura. Dawk li kellhom id-dawl jixgħel daħlu għall-festa. Meta waslu l-boloh, semgħu tweġiba li jekk naħsbu daqsxejn fuqha tkexkixna – “Jien ma nafkomx”. Maqtugħin mill-festa minħabba l-bluha, għax ma ħasbux minn qabel. Hawnhekk Ġesu’ jrid itina tagħlima sempliċi: “Ishru, għax ma tafux la l-jum u lanqas is-siegħa” – għandna dejjem inkunu lesti.

Fi kliem ieħor, il-ħajja nisranija tagħna m’għandix tkun superfiċjali. Għandna nħarsu ‘hin minn dak li jidher – mhedijin wisq b’dak li naraw. Allura rridu nibqgħu nfittxu l-ħin kollu xi jrid Alla minna – anke fl-iktar affarijiet żgħar. Hekk inkunu qegħdin naħsbu biex matul ħajjitna nibnu l-ħażna taż-żejt – bħal ma kellhom l-għaqlin.

Biex aħna naħżnu dan iż-żejt, ma nistgħux niddependu minn ħaddieħor – nippretendu li ħaddieħor itina dak li nistgħu nagħmlu aħna. Kull bniedem hu responsabbli tal-azzjonijiet tiegħu. Aħna mdorrijin f’soċjeta’ fejn insibu d-difetti ta’ ħaddieħor biex niġġustifikaw l-iżball tagħna. Naħsbu li b’daqshekk ħlisna minn xi ħaġa fuq il-kuxjenza tagħna. L-iżball ta’ ħaddieħor qatt ma jiġġustifika l-iżball tagħna.

Il-boloh issa ndunaw li l-għaqlin kienu ħasbu minn qabel. Dawn l-għaxra kienu kollha magħżulin – mistednin. Il-boloh baqgħu jittamaw li l-għarus jasal f’xi ħin li l-imsiebaħ tagħhom ikunu għadhom mixgħulin. Għalhekk ma ħasbux minn qabel. Minflok ma ħadu l-inizzjattiva biex jirranġaw is-sitwazzjoni, riedu li l-oħrajn isolvulhom dil-problema. L-umilta’ tidher li ma kenitx waħda mill-karatteristiċi tagħhom – solvili l-problema int!

Kemm ngħabbu fuq ħaddieħor! Nippretendu li ħaddieħor isolvi l-problemi tagħna. Niippretendu li ħaddieħor għandu jinbidel biex jogħġob lilna. L-umilta’ tfisser li jien nagħraf in-nuqqasijiet tiegħi. Nammetti li għamilt żball. Kemm hi diffiċli, speċjalment f’din il-kultura li qed ngħixu fiha! Il-boloh, flok ma ddispjaċihom tal-iżball li kienu għamlu, riedu jaħtfu ż-żejt ta’ ħaddieħor. Ma tawx kas li setgħu jdaħħlu lill-għaqlin fi sqaq, għaliex kieku tawhom miż-żejt tagħhom, mhux ħamsa kienu jispiċċaw barra, imma għaxra.

Papa Franġisku, f’omelija li għamel dil il-ġimgħa, qal li ma nistgħux aħna, bħala nsara, nirkbu fuq dahar xulxin. Irid ikollna atteġġjament ta’ fraternita’. Nistgħu ngħidu wkoll li dawn il-boloh ma kellhomx rispett jew imħabba lejn il-ħamsa l-oħra, għax ma mpurtahomx li setgħu idaħħluhom fl-inkwiet. Il-ġenn tas-soċjeta’ moderna hi li ma tqisx ir-riskju li jista’ jgħaddi ħaddieħor meta bniedem jaħseb biss għal rasu.

F’parabbola oħra tal-festa tat-tieġ insibu li wieħed ma kienx liebes għall-festa – u dan spiċċa barra wkoll. Dawn il-boloh baqgħu barra mill-festa għax f’ħajjithom ma stinkawx biex idawwluha – wisq inqas ma dawwlu lil ħaddieħor.

F’din il-parabbola Ġesu’ jtina żewġ twissijiet importanti. L-ewwel waħda li rridu nkunu dejjem lesti biex niltaqgħu Miegħu, għax ħadd ma jaf il-futur. Ħaġa li tgħina biex inħarsu lejn il-futur huma n-Novissmi. Bil-ħsieb li aħna lkoll irridu nitilqgħu minn hawn, nistgħu nifhmu aħjar dak li dejjem jisħaq fuqu l-Papa Franġisku – l-imħabba. Meta aħna naslu f’punt il-mewt, jispiċċaw magħha żewġ virtujiet – il-fidi u t-tama. Tibqa’ biss l-imħabba – l-imħabba tal-Missier li tana s-salvazzjoni.

It-tieni twissija li jtina Ġesu’ hi li hemm affarijiet li aħna ma nistgħux nissellfu mingħand ħaddieħor, bħal ma hi r-relazzjoni u l-fedelta’ tiegħi lejn Alla. Ħafna qegħdin jibżgħu iġorru l-piż li jridu jagħtu eżempju tajjeb. Ġesu’ qal: “Agħmlu dak illi jgħidulkom, imma tagħmlux bħalhom”.

Għandna dmirijiet iebsin – ma nistgħux inġorruhom weħidna. L-Ispirtu s-Santu hu dak li jgħina. Irridu nħallulu l-ispazju biex jidħol fina. Ħadd ma jista’ jgħid “iva” lil Ġesu’ minflokna. Dik “iva” hi personali. Kollha qed nistennew lil Ġesu’, imma mhux kulħadd lest għal din il-miġja.

Kemm ingergru għax dak li nitolbu rridu li Alla jtinulna fil-pront! Allura niddejqu nistennew u nagħmlu ta’ rasna. Meta Alla jippruvana b’dan il-mod għandu loġika għalina li hi l-maqlub ta’ dik tagħna. Jekk kemm-il darba Alla jissodisfana mill-ewwel, nistgħu nitilfu l-entużjażmu. Minflok ma nibdew naħżnu ż-żejt nidraw ħajja komda. Din hi l-bruda! San Ġwann fil-Ktieb tal-Apokalissi jgħid: “ Aħjar li kont sħun jew kiesaħ għax il-biered jien nobsqu minn ħalqi”.

Sakemm wasal l-għarus, ix-xebbiet kollha ħadhom in-ngħas – bid-differenza li, għalkemm kienu reqdin, l-għaqlin kellhom iż-żejt maħżun. Aħna rridu ntejbu ħajjitna billi naqraw, nisimgħu u nimmeditaw fuq il-Kelma t’Alla. Irrid inkun dispost għaliha. Hemm ukoll it-talb – talb ta’ tifħir, talb ta’ ringrazzjament. Noffru dak kollu li nagħmlu matul il-ġurnata lil Alla.

Hekk kull deċiżżjoni li nagħmlu tkun f’dan id-dawl – dan hu ż-żejt fil-kus – li nagħmlu atti ta’ karita’, biex il-musbieħ tagħna jkun dejjem mixgħul u b’hekk indawwlu lil ħaddieħor.

Dawn huma kollha l-ingredjenti biex x’ħin naslu fil-punt tal-mewt ma jkollnix għalfejn nibżgħu. Allura t-talba tagħna għandha tkun: “Mulej kattar fija l-fidi, Mulej   kattar fija l-imħabba biex meta ddoqqli s-siegħa lili ma tħallinix barra mill-festa”

 

 

 

L-EPIFANIJA TAL-MULEJ – 8 TA’ JANNAR – taħdita minn Fr. Reno Muscat

X’inhu l-universaliżmu?

Hemm tlett termini li huma frott tal-universaliżmu.

1. “Global village”. Nisimgħu din l-espressjoni li bdiet permezz ta’ McLuhan u Fiore, awturi tal-ktieb “War and Peace in the Global Village”, fejn dawn jaraw lid-dinja kollha magħquda flimkien b’mezzi ta’ telekomunikazzjonijiet moderni. Biss xorta l-pajjiżi jibqgħu ndipendenti, ekonomikament, soċjalment, u politikament, pero’ fl-istess ħin interdipendenti. Illum ngħixu dak li jissejjaħ “real time”, li jfisser li naraw x’qed jiġri fid-dinja proprju dak il-ħin stess li qed iseħħ.

2. Soċjeta’ Likwida. Ħareġ b’din il-frażi Sigmund Bowman. Fil-globalizzazjoni, kien jara l-istess problemi li jinġarru minn soċjeta’ li m’għadhiex solida, m’għadhiex stabbli, fiha l-inċertezza, timxi wara l-produtturi u l-konsumaturi. “Il-konsumiżmu u l-industrija tal-biża’ f’dinja globalizzata iddewweb is-sigurta’ u titlef lill-umanita’ f’soċjeta’ likwida”. X’jiġifieri dan? Aħna kontinwament ibbumbardjati bir-reklami. X’iskop aħħari għandu r-reklamar? Li lilek iġiegħlek tħossok fil-bżonn ta’ dak il-prodott anke jekk fil-verita’ m’għandekx bżonnu. Din hi problema universali, anke f’pajjiżi tat-tielet dinja. Ir-reklamar hu wieħed mill-fatturi għaliex is-soċjeta’ tilfet l-istabbilita’ tagħha – saret likwida.

3. “The McDonaldisation of Society”. George Ritzer, awtur tal-ktieb “The McDonaldisation of Society” (1993) juri kif il-McDonaliżmu wkoll hu effett tal-universaliżmu. Qed ngħixu f’dinja sterjotipika – tmur fejn tmur fid-dinja, bħal McDonalds, se tiġi offrut l-istess prodott. M’hemmx fruntieri. Qed ngħixu f’raħal, mhux dinja. Chains sħaħ ta’ ħwienet li waqqgħu l-fruntieri fin-negozju. Qed ngħixu f’dinja żgħira fejn sirna ġirien ta’ kulħadd. Mal-universaliżmu ma tilgħabx. Trid tara xi jrid il-konsumatur. Għaliex nixtri dan il-prodott u mhux l-ieħor? Din hi ħaġa universali. Il-konsumatur għandu effett fuq il-globalizzazjoni. Per eżempju, illum kulħadd konxju tal-ambjent. Allura, fir-reklamar, bħal ta’ McDonalds u l-Coca Cola, qed jintuża l-aħdar flok l-aħmar. Dan kollu frott tal-universaliżmu.

Issa x’għandu x’jaqsam dan kollu mal-Vanġelu? Dan hu l-Vanġelu tal-universalita’ tad-dinja kollha. Fil-bidu tal-Vanġelu nsibu l-maġi jistaqsu fejn twieled is-sultan tal-Lhud. Elfejn sena ilu il-Lhud kienu, u għadhom, jistennew messija tagħhom biss, il-poplu magħżul, il-poplu t’Alla. Sa minn twelidu, Kristu wera li Hu ġie għad-dinja kollha – l-univers. “Ġew xi maġi mil-Lvant” – mill-bogħod. Kristu, bil-miġja Tiegħu, waqqa’ l-fruntieri kollha. Dawn aħna nagħmluhom. Anke fit-tagħlim Tiegħu, “morru sa’ truf l-art xandru l-bxara t-tajba”.

Ħsieb ieħor hu l-biża’ ta’ Erodi. Beża’ li ħa jitlef xi ħaġa. Għalhekk il-bniedem joffri oppożizzjoni anke għal ħaġa sempliċi. Il-bniedem jibża’ mill-bdil għax jibża’ li ser jitlef xi ħaġa minn tiegħu – soċjeta’ likwida. Erodi ma kellux fidi biżżejjed biex jemmen u jifhem li dik il biża’ kienet finta għalih għax is-sultan li twieled kien sultan universali. Kristu jneħħilna l-biża’. Irridu nduru lejH. Is-slaten maġi ma beżgħux li se jitilfu s-saltna tagħhom, imma raw fiH sultan ieħor u offrewlu rigali, għax raw fiH il-kobor t’Alla. Dan l-universaliżmu – dinja mingħajr fruntieri – ġagħabilna Kristu meta wera Lilu nnifsu lid-dinja kollha. Kien l-ewwel universaliżmu. Il-bniedem kien għadu ftit il-bogħod biex jifhem dan il-kunċett. Dan li qed ngħixu llum twettaq elfejn sena ilu, b’mod spiritwali, meta Kristu ta Lilu nnifsu lill-univers kollu. Dan hu s-sens veru tal-Epifanija. Jekk ħa nibqgħu soċjeta’ esklussiva ma nkunu fhimna xejn mill-fatt li Kristu ġie għal kulħadd. F’kollox irridu nwaqqgħu l-fruntieri, kemm soċjali kif ukoll spiritwali. Inkella ma nkunux qed nifhmu l-veru sens għaliex aħna nsara. Kristu hu ta’ kulħadd.

L-istess ideja ta’ universalita’ nsibuha sa’ mill-bidu nett tal-Bibbja – il-ħolqien. Hawnhekk issemma kif dal il-ħsieb jattakka l-egoiżmu tagħna. Naħsbu li d-dinja ddur madwarna, u mhux aħna nduru mad-dinja. Din hi problema anke fl-edukazzjoni fid-dar – il-mod kif inħarsu lejn uliedna – dejjem għanhom raġun.

Fr Reno hawnhekk kompla jżid li dan l-egoiżmu nsibuh anke fis-soċjeta, f’min għandu l-mezzi u l-poter. Hemm bżonn li jsir investiment f’pajjiżi tat-tielet dinja biex iċ-ċittadini jkunu jistgħu jgħixu aħjar f’pajjiżhom.

Dak li t-teknoloġija qed tagħmel illum, Kristu riedu mill-bidu. Għad għandna nsara, li huma konvinti li huma nsara, li emigrant f’pajjiżhom ma jriduhx. L-art hi ta’ kulħadd. Ġesu’ ħadha kontra n-nazzjonaliżmu Lhudi. Jew taċċetta lil Ġesu’ kif inhu, inkella tissejjaħx nisrani.

Bħal ma qal il-papa Franġisku, “Ejjew ngħixu l-kelma sempliċi ta’ Ġesu’.”

Taħdita minn Fr. Joseph Bonnici

Il-laqgħa bdiet bil-qari tal-vanġelu skond San Luqa, kapitlu 16, versi 1 – 13: l-amministratur diżonest. F’diversi sitwazzjonijiet, Ġesu’ jitkellem b’mod li narawh stramb, jew ġieli anke niskandalizzaw ruħna. F’din il-ġrajja, Ġesu’ faħħar lill-amministratur diżonest, mhux għall-għemil ħażin tiegħu, imma għal mod kif uża moħħu u ħaddem rasu biex meta jiġi fil-bżonn isib min jgħinu.

Ġesu’ ma jridnix nimxu bħan-nagħaġ ta’ Bendu. Kien iħalli lil kulħadd isaqsih li jrid. La tana moħħ, Alla jridna nħaddmuh, kemm fl-affarijiet materjali, u wisq iżjed f’dawk spiritwali. Kristu jrid nies li jsaqsu. Għalhekk il-Knisja waqqfet l-istudju tat-Teoloġija, u tħeġġeġ l-istudju tal-Filosofija. L-insara jridu jifhmu x’inhuma jemmnu. Irridu naħsbu u nħaddmu rasna biex aktar nifhmu u napprezzaw lil Kristu.

Aspett importanti li żviluppat il-Knisja hu dak soċjali. Ma kenitx titkellem biss fuq il-morali, imma anke fuq il-ħajja tagħna bħala bnedmin. Kristu, meta ġie fostna, ried isalva lill-bniedem sħiħ. Għalhekk Ġesu’ kien jagħmel il-mirakli, biex jagħti mportanza lill-aspett uman, u hekk għamlet il-Knisja sa mill-bidu. Infatti l-ewwel ħidmiet soċjali fid-dinja kienu inizzjattivi tagħha.

L-espressjoni ta’ Ġesu’ fit-tkattir tal-ħobż: “agħtuhom intom x’jieklu” hi mportanti ħafna għall-Knisja u għalina. Naqraw fl-Atti tal-Appostli kif il-Knisja ordnat id-djakni biex jgħinu lill-foqra u lir-romol. Kienet il-Knisja li waqqfet l-ewwel sptarijiet u skejjel.

Fiż-żmien meta d-dinja bdiet tiġi ndustrijalizzata u bdiet l-ideja tas-soċjaliżmu, il-Papa Ljun XIII ħareġ l-enċiklika Rerum Novarum, li titkellem dwar l-aspett soċjali tax-xogħol u d-drittijiet tal-ħaddiema. Tant kienet importanti li diversi papiet baqgħu ifakkruna fiha. Il-Papa Ġwanni Pawlu II wkoll tkellem dwar il-valur tax-xogħol magħmul mill-bniedem. Fil-Konċilju Vatikan it-Tieni, id-dokument “Il-Knisja fid-Dinja Llum” jitkellem dwar l-aspett soċjali u jagħti mportanza għal dak li qed jiġri fid-dinja tagħna.

Wara t-Tieni Gwerra Dinjija, il-bniedem beda’ jsir iktar iċ-ċentru ta’ kollox. Il-Knisja tkellmet dwar l-importanza tal-bniedem, mhux bħala assolut, imma bħala l-kapolavur t’Alla. Ġesu’ stess kien japprezza lill-bniedem sħiħ: “Biex nurik li nista’ naħfirlek dnubietek, qed ngħidlek qum u imxi”. Biss iċ-ċentru ta’ kollox jibqa’ dejjem Alla.

F’dan id-dokument il-Knisja titkellem ukoll dwar l-ekonomija, l-iżbilanċ, u l-globalizzzazjoni.

Fl-aħħar tal-laqgħa saret mistoqsija dwar l-evoluzzjoni. Jekk insiru mija fil-mija ċerti minn dan – għax għad hemm il-“missing link” – din m’għandiex tkun ta’ problema, għax huwa Alla li jagħti moħħ intelletwali u r-ruħ. F’kull twelid ta’ bniedem hemm il-nifs t’Alla – ir-ruħ.

Il-laqgħa għalqet bil-kwotazzjoni “Let pleasing God become bigger than pleasing people”

 

Il-Laqgħa Prayer Cafe, ta nhar il-Ġimgħa 7  t’Ottubru ġiet immexxija minn żewġ rapprezentanti mill-Agenzija Sedqa; Ms Glorianne Galea u Ms Stacey Grima.

Kienet laqgħa fejn tqajjmu l-mistoqsijiet bħal:

• Għalfejn wieħed jieħu jew jipprova d-drogi, anke meta jkun jaf bid-deni li din se tikkaġunalu?
• X’tipi ta’ Droga qegħdin niltaqgħu magħhom?
• X’karatteristiċi nistgħu naraw f’persuna biex nindunaw li din qegħda tieħu d-droga?

Minn video b’nies jagħtu xhieda ta’ kif / għaliex waqgħu fil-vizzju tad-drogi, ħareġ li dan jagħmluh:

• Biex isiru parti minn grupp.
• Għal gost u biex jirrilassaw.
• Biex jaħarbu mir-realta li jkunu fiha.
• Biex jesperimentaw xi ħaġa ġdida.
• Biex iħossuhom adulti.
• Issib min jeħodha biex jirribella.

Ssib min jieħu d-droga minn darba sa darbtejn biex jipprovha u jieqaf jeħodha. Imbagħad issib min jibda jeħodha aktar frekwenti biex tgħinu jibdel il-burdata. U hawn se jibda l-inkwiet għax qegħed issir dipendenti fuqha. Issib ukollmin sar  dipendenti fuqha. (Addicted ) Meta tqum u torqod taħseb biss  kif se  ġġib id-droga. Meta tasal f’dan l-istat  wieħed jkollu bżonn għajnuna professjonali biex joħroġ minnha.

Jezistu ħafna tipi ta’ drogi u l-effetti li jħallu huma diversi.

Iktar Informazzjoni Hawn!

More Info Here!

Ngħalaq billi nistedinkom tiġu għal laqgħa li jmiss. Il-Laqgħat issir kull nhar ta’ Ġimgħa fis-19:15.

 

Il-laqgħa Prayer Cafe tas-6 ta’ Mejju bdiet bil-qari tal-vanġelu tal-Ħadd ta’ wara mehud minn Lq 24:46-53. Il-Ħadd 8 TA’ Mejju ċċelebrajna t-Tlugħ ta’ Sidna Ġesu Kristu fis-sema. Dan ir-rakkont insibuh fl-evanġelji kollha barra ta’ San Ġwann. L-aħjar prezentazzjoni ta’ din il-ġrajja nsibuha fl-Atti tal-Apostli. F’dan ta’ l-aħħar nsibu li Ġesu tela’ s-sema wara 40 jum mill-Qawmien mill-mewt tiegħu.

Xi tifsira għandha għalina din il-Festa? Din mhijiex sempliċiment tifkira ta’ ġrajja imma qed niftakru f’misteru – dan il-fatt nistqarruh fil-Kredu: ‘Nemmen…..mat-tielet jum qam minn bejn l-imwiet; tela’ fis-smewwiet,..’ u li l-appostli huma xhieda tagħha. Mela rridu naċċettawha bħala fatt storiku li dan Ġesu ħalla d-dinja u daħal fis-saltna t’Alla; eżatt kif ma nafux, l-appostli sempliċiment qalu ‘tela’ s-sema’.

Sfortunatament llum qegħed tidħol l-ideja li din il-ġrajja għandha x’taqsam ma l-aljeni..ma xi UFO s! Ħafna skolaru u professuri qegħdin jippreżentaw dawn il-ġrajjiet f’dan id-dawl. Wieħed minn dawn studjuż tal-Ebrajk; jgħid li skond hu ċerti kliem mill-bibbja ġew tradotti differenti mit-tifsira vera tagħhom. Dan il-bniedem barra li jagħmel ħafna konferenzi f’universitajiet,  ħareġ diversi kotba fuq is-suġġett u ħaġa tal-iskantament eluf ta’ nies qegħdin isegwuh. Dan prattikament qiegħed jgħid li Alla ma jeżistiex u li l-Bibbja ma titkellimx fuq Alla imma titkellem fuq Aljeni. Ħafna reliġjonijiet fosthom il-Kattoliċi u l-Musulmani traduċew il-kelma Elohim plural ta’ Eloah bħala Alla imma dan qiegħed jgħid li tfisser Aljeni. Għalkemm ħafna minna narawha bħala fantaxjenza, ħafna adoloxxenti l-aljeni huma fatt ovvja li jeżistu. Għandek diversi channels fuq it-televixin jitkellmu dwar dan bħal Discovery Channel, National Geographic Channel, Prehistory Channel.. u anke fuq diversi siti tal-internet. Aħna bħala ġenituri nsara rridu noqgħodu attenti li ma nħallux lill-uliedna jibilgħu kulma jisimgħu mingħajr provi. Hemm ukoll sensiela sħiħa ta’ ċinema bbażati fuq dan is-suġġett. Aktar ma naraw minnhom aktar hemm ċans li xi ħaġa se jeħel fl-imħuħ li jarawhom. Dieħla ideja li it-Tlugħ ta’ Ġesu fis-sema seħħet qisha xi ġie xi UFO u ħadu x’imkien miegħu!  Segwiti ta’ dawn is-siti, ħafna minnhom tfal u adoloxxenti jaqbżu l-miljun. Mela bħala ġenituri responsabbli għandna nakkumpanjaw lil uliedna f’dak li jkunu qegħdin jaraw.

Il-misteru tat-Tlugħ fis-sema tal-Mulej rridu narawh f’kuntest sħiħ. Rridu naraw kif dan Alla ċekken lilu nnifsu u sar bniedem – ħa sehem fil-ħajja tagħna – biex b’hekk aħna wkoll nieħdu sehem fil-ħajja tiegħu – imbagħad hu reġa’ tela’ s-sema.  Ġesu huwa Alla li sar bniedem biex mbagħad aħna  nieħdu sehem fin-natura Divina tiegħu. Il-Fidi nisranija hija bbażatha fuq dan – li aħna rridu li ħajjitna  ssir tixbah lil ta’ Ġesu Kristu. Aktar  ma ħajjitna tkun tixbah lil ta’ Ġesu aktar il-qalb tagħna tkun miftuha biex Hu jammar ġewwa fina. Dan hu l-qofol tat-twemmin tagħna! IŻDA llum ħafna drabi qiegħed jiġri bil-kontra. Ħafna drabi mhuwiex Alla li jinżel ħdejna imma aħna rridu nniżluh għal-livell tagħna. Dan ma nagħmluhx bid-dagħa biss, imma wkoll meta  nagħmluh ħabib, qisu sieħbi li mmur nixrob flixkun birra miegħu! Veru li Alla ċċekken imma Hu ALLA li jiċċeken u mhux aħna nċeknuh! Hawn irreferejna għal ġrajja meta Ġesu ħasel saqajn l-appostli ..Pietru tfantas..tfantas għax Pietru kien għaraf min hu Ġesu! Imma Ġesu qallu li jekk ma jħallihx jaħsillu saqajh ma kienx se jkollu sehem miegħu. Għal dan Pietru wieġeb : “ Mhux biss saqajja izda, idejja u rasi ukoll.” Ġesu qal ‘Inthom tgħidu li jien l-Imgħallem tagħkom u sewwa qegħdin tgħidu, mela li jien l-Imgħallem tagħkom u qdejtkom; hekk ukoll tridu tagħmlu intom bejnietkom.’

Għandna tendenza li lil Alla nċekknu l-qawwa tiegħu …huwa Alla li fl-imħabba kbira li għandu lejna huwa ċekken lilu nnifsu – huwa Hu li jgħollina ‘l fuq mhux aħna ngħollu lilna nfusna ‘l fuq qisna xi allat! Għandna tendenza llum li nċekknu lil Alla bil-mod kif nitrattawh bla biżgħa ta’ xejn. M’hawnx biżgħa għal dak li hu sagru t’Alla. Dan jidher bil-mod kif inġibu ruħna fil-knejjes tagħna..meta mmorru għal quddies nidħlu l-knisja b’sens li dħalna f’post sagru? Aħna u telgħin biex nitqarbnu nkunu miġburin u ngħarfu min Hu dak li ġej ġewwa fina! Meta naddu minn quddiem Ġesu sagramentat, nagħmlu reverenza bħala sinjal ta rispett jew qas nafu x’inhi!!  Sforunatament dan is-sens ta’ sagru llum qegħdin nitlifuh u qegħdin nieħdu lil Alla ‘for granted’. Qiegħed jidħol sens ta’ suppervja – jew dan Alla se jaqbel ma li ngħidlulu, se jaqbel mal-kapriċċi tagħna jew inkella se ntellquh ‘l barra. F’dinja materjalistika ġibna dak li hu sagru fix-xejn!

Alla ċċekken biex jgħolli lilna; id-dnub waqqana u Kristu għollina… mela aħna rridu nħallu ‘l Alla hemm fuq u naċċettaw l-fatt li niżgħel sar bniedem bħalna imma hu jibqa ‘l fuq minna. Mela jiena rrid nħalli lil dan Alla jgħollini mhux jiena ngħolli lili nnifsi. Anke f’relazzjonijiet ta’ bejnietna – l-prosit għandna nħallu lil oħrajn jagħtuhilna. Ma nistgħux la nniżlu lil Alla u wisq anqas nagħmlu lilna nfusna allat! Ma nistgħux nibqgħu nimxu f’isem tal-kuxjenza u nimxu kif jogħġob lilna. Meta l-knisja titkellem fuq il-kuxjenza tkun qegħda tirreferi għal kuxjenza ffurmata – il-vuċi t’Alla f’qalb il-bniedem u mhux dak li jiftlilna moħħna. Qegħdin nħallu l-Kelma t’Alla idawlilna qalbi, nħalluha turina x’inhu tajjeb jew ħażin? Jew AĦNA rridu niddeċiedu? Ejjew nagħrfu dan il-misteru u nħallu lil Alla jaħdem fina.

Il-laqgħa tkompliet b’din il-kwotazzjoni :

Fil-ħidma appostolika mhux biżżejjed il-qawwa tagħna, ir-riżorsi tagħna, l-istrutturi tagħna, għalkemm dawn kollha huma neċessarji.  Mingħajr il-preżenza tal-Mulej u mingħajr il-qawwa tal-Ispritu tiegħu, xogħolna, għalkemm ikun organizzat tajjeb, ma jħalllix frott.  Għalhekk, ejjew immoru ngħidu lin-nies min hu Ġesù. (Omelija ta Papa Frangisku 1 ta’ Ġunju 2014).

Il-laqgħa ngħalqet bit-talba tal-Missierna u l-barka t’ALLA.

Għaliex Kristu ttrasfigura ruħu? Biex nifmhu dan l-ewwel irridu nifmhu il-kuntest li dan l-episodju seħħ fih. Ftit qabel Ġesù saqsa lill-Appostli:

“Min jgħidu n-nies li hu Bin il-bniedem?”  U huma weġbuh: “Xi wħud, Ġwanni l-Battista; oħrajn, Elija; u oħrajn, Ġeremija jew wieħed mill-profeti.” Imma intom min tgħidu li jien?” staqsiehom. U qabeż Xmun Pietru u qallu: “Inti l-Messija, Bin Alla l-ħaj.” Mt 16:13-16

Ġesù jgħidlu:

“Inti Pietru, u fuq din il-blata jiena nibni l-Knisja tiegħi, u s-setgħat ta’ l-infern ma jegħlbuhiex.” Mt 16:18

Ftit wara Ġesù jħabbar il-mewt tiegħu u Pietru  qallu:

            “Allaħares, Mulej! Ma jkun qatt li dan jgħaddi minn għalik!” Mt 16:22

Ġesu jgħidlu:

            “Itlaq minn quddiemi, ja xitan! Int tfixkil għalija, għax m’intix tqis il-ħwejjeġ ta’ Alla, imma qiegħed taħsibha ta’ bniedem li int!” Mt 16:23

Dan iffisser li Pietru ma kienx fehem il-pjan ta’ Alla. Dawk li segwew lill-Ġesù kien qed jistennew Messija gwerrier. It-Trasfigurazzjoni ġiet f’dan il-kuntest. L-appostli kienu mħawdin. Mingħalihom kienu qed isseqgwu messija gwerrier u Ġesù qed jippreżentalhom Messija qaddej: Messija li se jmut. Hawnhekk naraw li ma kienu qed jifmhu xejn. Allura t-trasfigurazzjoni kienet oportunità oħra biex l-appostli jifmhu Hu min kien u x’ġie jagħmel fid-dinja.

     F’din is-silta naraw kif Ġesù: tala’ fuq il-muntanja biex jitlob. U ġara li huwa u jitlob, id-dehra ta’ wiċċu tbiddlet u l-ilbiesi tiegħu saru ta’ bjuda li tgħammex. Tajjeb li naħsbu fuq dan sew għax meta nitolbu u nkunu fil-preżenza t’Alla, aħna nistgħu ninbiddlu għat-tajjeb.

      Hawnhekk naraw ukoll kif Ġesù qed juri d-divinità tiegħu lill-Appostli. Jidhru miegħu ukoll Mosé u Elija. Dawn qed jirappeżentaw il-Liġi u l-Profeti.

     Il-Papa Franġisku fid-diskors li għamel fl-egħluq tal-ħajja konsagrata qal li l-liġi hija r-regola, u l-profezija hija l-missjoni. Kultant aħna nimxu iktar mar-regola, u r-regola toħnoq il-missjoni. Ma jfissirx li r-regoli huma ħżiena imma r-regoli waħdehom ma jiswew xejn.

     Hawnhekk qed naraw Messija tal-liġi u l-profeti; il-Messija qaddej; u dak li qalu l-liġi u l-profeti se jsib l-milja tiegħu fil-qofol tal-Missjoni (il-Qadi) tal-Messija: Ġesù.

     Ftit wara Pietru ried jibni tlett tined. Hawnhekk l-evanġelista jgħid li Pietru ma kien fehem xejn. Wara li raw dan kollu xorta ma fehmux.

     Aħna wkoll ħafna drabi ma nifmhux min hu l-Mulej. Nfittxuh fil-Glorja mhux fit-Tbatija; kif għamel Pietru meta ċaħdu.

     Jiena qed nifhem min hu Ġesù? Qed nifhem x’irrid minni?

Ir-risposta jtihilna l-Vanġelu stess… xħini tiġi s-sħaba u nibżgħu, għandna nisimgħu minn dak li jgħidilna l-Missier:

“Dan hu Ibni l-maħtur, lilu isimgħu!”

Għandna nieqfu nreddnu, nħarsu lejn il-Mulej u nisimgħu lilu!

Nemmen li kieku aħna m’għandniex fidi fix-xogħol volontarjat tagħna kieku m’aħnix hawn.

Li jkollok il-fidi, hija li temmen mingħajr ma tifhem. Il-fidi, bejnietna hija hekk ukoll; li jkollna fiduċja f’xulxin minkejja li mhux dejjem nifhmu lil xulxin. Kull ħsieb li jista’ jfixkilna milli nafdaw lil xulxin jkun ġej mix-xitan. Fidi Spiritwali hija li aħna jkollna fidi fix-xogħol ta’ Alla għalkemm mhux dejjem nifmuh.

Filwaqt li l-moħħ huwa aktar b’saħħtu mill-ġisem, L-Ispirtu huwa aktar b’saħħtu mill-moħħ.  La darba temmen dan, tkabbar dan it-twemmin fik. Kull diffikulta li nintaqaw magħha hija opportunita’ biex inkabbru l-fidi tagħna.

Talba

Mulej Ġesu’ nizzel fina L-Ispirtu tiegħek biex bħalma għamilt mad-dixxipli tagħmlu magħna.  Itfa fina l-qawwa tal-Ispirtu s-Santu biex nintlew b’fidi qawwija ħalli bħala komunita’ nxandru l-kelma tiegħek.  Użana Mulej u mlina bil-fidi soda biex qatt ma nitilfu kull opportunita’ biex nevanġelizzaw jew niddubitaw mill-fidi tagħna.

Ammen

 

Post ta’ Joanne Ciantar