Fr. Charles Fenech beda l-laqgħa Prayer Café tal-ġimgħa 17 ta’ Jannar, billi għamel  ħsieb ċkejken fuq Fr Ugo Cremona , patri u teologu kbir Dumnikan li miet nhar l-Erbgħa 16 ta’ Jannar. Kien bniedem ġgant tal-Ispiritwalità, li baqa’ sa l-aħħar jagħti  s-servizz tiegħu fuq l-artal minkejja li kien muġugħ. Kien bniedem ta’ sapport kemm b’mod fiżiku u anke spiritwali. Kien bniedem li jaf lil Ġesù u għalhekk Fr Ugo kien jitrasmetti fiduċja ma kull min jitkellem miegħu. U hawn Fr. Charles ħeġġigna biex nżommuh fit-talb tagħna.

Wara li nqara l-vanġelu tal-Ħadd li ġej Fr. Charles qasam dawn il-ħsibijiet:

Ġwanni li kien jaf lil jgħalaq il-vanġelu billi jgħid: ‘Dan rajtu b’għajnejja u xhedt, “Dan hu l-Iben t’Alla.”’ Aħna ħafna drabi nenfazzizaw li nagħtu xhieda, dan kompla Fr Charles irridu ngħamluh – f’affarijiet żgħar ta’ kuljum billi naraw lil Ġesù f’dawk l eqreb tagħna-f’martna/f’żewġna/f’uliedna/f’ommna… anke f’affarijiet żgħar bħal ngħinu fil-faċċendi tad-dar billi naraw u nħossu l-preżenza ta’ Ġesù f’dawk ta’ madwarna.

Kemm nagħtu xhieda ta’ x’aħna sal-mewt? Statistika li ħarġet mill-Vatikan tistqarr li fl-2012; 118,000 il-persuna ġew maqtula sempliċiment għax stqarru li kienu nsara. Fl-2013 nqatlu 105,000; 48,000  minnhom fis-Syria – fejn qegħed issir ‘wipeout’ tal-insara. Iħabbtu l-bieb, jistaqsu intix nisrani u jekk twieġeb iva jisparawlek. U dawn jagħżlu li jagħtu xhieda tal-fidi tagħhom u jieħdu l-mewt. Kemm int lest li tagħmlu dan? Jew inġibu mitt skuża – għax għandi l-familja, għax għandi x-xogħol… Ix-xhieda tagħna, tar-Reliġjon tagħna kif qegħda tkun? Hija waħda ta’ low cost kif isejħilha Papa Franġisku – immorru l-quddies il-Ħadd skond l-aptit, jew għax inħossu li rridu immorru bilfors? Kemm nħossu li rridu nxandru lil Ġesù u nħajjru aktar nies jersqu lejh? Kemm nħossu li għandna nħajru lil Mulej jagħmel mirakli fuq ċerti nies li birdu? Fr. Charles kompla jgħidilna li għandna nibdew minn dawk l-eqreb tagħna. Jekk għandek ir-raġel jew il-mara li birdet mir-Reliġjon, jew uliedek adolexxenti, itlob biex l-Ispirtu s-Santu jdawwlek b’kelma fil-mument ġust biex terġa tressaqhom lejn Ġesù. Kemm nemmnu li nafu lil Gesu mhux kemm nafu fuq Gesu? Dan hu l-messaġġ tal-vanġelu tal-Ħadd li ġej.

Biex nkunu nafu lil Ġesù rridu nħallu spazju għalih. Kemm inqattgħu ħin nitolbu anke ftit minuti kuljum? Jew ħajjitna mimlija daqs bajda dejjem b’xi skuża lesta… issa għax għandi x-xogħol tad-dar… anke min hu waħdu llum ħajtu mimlija daqs bajda… anke s-saċerdoti u r-reliġjużi għandhom ħajjithom mimlija; Anke t-talb u l-quddiesa jistgħu jsiru parti mir-rutina – kemm qegħdin nħallu ħin ta’ intimita ma Ġesù? Inti trid verament tara lil Ġesù bħala l-mera ta’ ħajtek? Skond l-eta tiegħek trid tkun lest li toffri sagrifiċċji ta’ veru għal Ġesù mhux għalik. Forsi tgħiduli, kompla Fr Charles, li nrabbi t-tfal, li nieħu ħsieb lit-tfal tat-tfal, li nieħu ħsieb lil kbar, dawn mhumiex sagrifiċċji? Mela mhumiex, IMMA qiegħed tagħti 100% tiegħek lil Ġesù? Inti qiegħed titkellem ċar u ma tibqax ddur mal-problemi. Ġwanni f’dan il-vanġelu qegħed jgħidilna: ‘Dan rajtu b’għajnejja u xhedt: “Dan hu l-Iben t’Alla.” ’ Forsi din hi l-problema tagħna l-insara li mmorru l-quddies kuljum – mingħalina li nafu lil Ġesù iżda m’għandniex rapport miegħu. Li jkollok rapport miegħu jfisser li meta jkellmek taġġixxi anke fi rqaqat żgħar. Papa Franġisku jenfasizza li m’għandniex naħlu. Għandu jkollna ‘management’ tajjeb kemm tal-flus u kif ukoll tal-ħin. Jekk ġa għandek ġakketta tal-firma qabel tmur tixtri oħra, ara tinqediex b’dak li għandek..din hi l-fidi..mhux jien x’irrid – iżda nħares lejn ta’ madwari għax faċli li nrattbu l-kuxjenza tagħna.

Waħda mill-affarijiet li qegħda tiġi diskussa anke fit-teoloġija hi jekk ċ-ċittadini li jemmnu għandhomx jibdew jiġi ntaxxati. Waħda mill-pajjiżi li ġa tagħmel dan hija l-Ġermanja. L-gvern jissusidja x-xogħolijiet ta’ tiswija fil-knejjes kemm Luterani u kif ukoll Insara u dawk li jemmnu jiġu ntaxxati xi ħaġa żgħira. Għal l-ewwel kien hemm rejazzjoni kbira saħansitra kien hemm min mar għand il-kappilan u staqsa biex jinqata’ mir-registru tal-magħmudija! U dan biex ma jħallasx taxxa żgħira! (Filwaqt li għandna pajjizi oħra kif diġa għidna fejn n-nisrani qiegħed imut biex ma jiċħadx il-fidi tiegħu!)

Għalhekk il-Papa Franġisku jinsisti li l-fidi tagħna trid tkun high cost u mhux low cost. Il-Fidi mhix li tmur il-quddies issaħħan il-bank, ir-reliġjon u l-fidi tagħna ma titkejjilx minn kemm nagħmel dnubiet jew le, għalkemm dan ma jfissirx li meta tagħmel d-dnub m’intix teħodha kontra Alla,  imma l-ewwel pass tagħna jrid ikun kemm qegħdin nibnu relazzjoni intima ma’ Ġesù. Kemm qed nużaw il-quddies u laqgħat li mmorru biex nibnu relazzjoni biex insiru nafu lil Ġesù b’mod intimu? Dan irid ikun it-training tagħna.

Fr Charles kompla billi fakkar profezija tal-Papa Ġwanni Pawlu II, meta kien qal  “familja li ma tilobx flimkien b’xi mod jew ieħor titfarrak” u dan qegħdin narawh llum.

Il-laqgħa tkompliet b’diskussjoni fuq jekk aħniex nagħmlu r-rieda t’Alla. Qegħdin nagħtu xhieda li aħna nsara? Meta naraw inġustizzja qegħdin nitkellmu? Nħossuna ħatja jekk naraw inġustizzja u ma nitkellmux?

Avviż: Ġimgħa 24 ta’ Jannar fis-7.00 ta’ filgħaxija se jsir seminar fuq it-Talba tal-Missierna miftuh għal kulħadd fiċ-ċentru tal-KERYGMA, jitmexxa minn Fr Charles Fenech o.p.

It-Tielet Ħadd tal-Avvent

Il-Ġimgħa 13 ta’ Diċembru 2013

Fl-assenza ta’ Fr Charles Fenech, Prayer Café din il-ġimgħa tmexxa minn membri tal-Kerŷgma. Dawn huma xi ħsibijiet li nqassmu waqt il-laqgħa wara li nqara l-Vanġelu tal-Ħadd li jmiss.

F’dan il-Vanġelu naraw lil Ġwanni l-Battista mixħut fil-ħabs minħabba li bla biża’ ta’ xejn ċanfar lil Erodi u Erodijade tal-imġiba tagħhom.

Ġwanni l-Battista ŻGUR li ma kienx “qasba vojta tixxejjer mar-riħ”. Kien bniedem sod fit-twemmin tiegħu. Ġesù stess meta  jiddeskrivih jgħid “ħadd ma qam aqwa minn Ġwanni l-Battista.” Ġwanni l-Battista qeda lejalment il-parti tiegħu, fil-pjan tas-salvazzjoni ta’ Alla. Hu kien il-pont bejn ir-Rabta l-Qadima u r-Rabta l-Ġdida.

Għall-mistoqsija li jibgħat Ġwanni lil Ġesù jekk hux il-veru MESSIJA,Kristu Ġesù ma jweġibx direttament iżda  jikkwota minn kliem il-profeta ISAIJA. “ l-għomja jaraw, iz-zopop jimxu, l-imġiddmin ifiequ, it-torox jisimgħu, il-mejtin iqumu, u l-Bxara t-tajba titħabbar lill-fqar.” Dawn huma profeziji li nsibu dwar Ġesù f’Isaija u li seħħew fiH.

L-aħbar it-tajba hi li Alla għandu l-wiċċ tal-emarġinati u l-imwarrbin, għalhekk anki l-mejtin għad iqumu għax l-aħbar it-tajba ma jwaqqafha xejn anqas id-dnub u l-mewt. Id-dubji tagħna u tal-Battista se jibqgħu jagħmlu parti mill-mixja ta’ fidi tagħna.Il-kelma u l-wegħeda huma persuna waħda –Ġesù. X’neħtieġu iktar bħala garanzija għall-fidi tagħna?

Mela hekk kif il-messaġġ ta’ Ġwanni ħejja t-triq għall-Mulej fl-ewwel seklu, aħna wkoll imsejħin biex inkunu profeti ta’ Ġesù, li nwasslu l-Aħbar it-tajba, li Ġesù ġej; u dan  permezz tax-xhieda ta’ ħajjitna.

L-Avvent għaldaqstant huwa opportunità mill-isbaħ li jagħtina Alla biex niskopru r-rigal tal-indiema u l-grazzja tas-sagrament tal-qrar. L-id tal-ħniena t’Alla hi fil-qrib, miftuħa u lesta biex tilqa’ lilek u lili li għandna bżonn nħejju t-triq tal-Mulej u niddrittaw il-mogħdijiet tiegħu.

Wara ttiehdu xi punti mid- diskors ta’ Mons. Arċisqof Pawlu Cremona O.P. fil-quddiesa ta’ l-ordinazzjoni episkopali tiegħu.

Il-laqgħa tkompliet b’riflessjoni  minn wieħed mill-membri:

Ġesù ġie mistoqsi min kien. L-istess domanda għadha tiġi mistoqsija sal-ġurnata tal-lum anke biex in-nisrani jiġi ċċalinġjat minn persuni li ma jemmnux fiH.

Darba mort norqod naħseb fuq dan. Ħlomt…. rajtni miexi fi triq mimlija nies. Daħal fija tifel li kien qiegħed jiġri. Imbeżża’ ħares lejja, u għidtlu li ma kien ġara xejn. Rajt wiċċu jikkalma u jieħu r-ruħ.

Bqajt miexi. Minn ħanut ħarġet mara b’xirja f’idha. Waqalha pakket u jien ġbartulha. Meta rringrazzjatni weġibtha li ma kienx hemm għalfejn.

Wara rajt raġel anzjan b’bastun f’idu li kien qiegħed jipprova jaqsam triq traffikuża. Għintu biex imur in-naħa l-oħra tat-triq u qalli,“Għall-erwieħ tiegħek tal-għajnuna.”

Ma nafx kif, sibt ruħi f’dawl qawwi, tiela’ taraġ wiesa w abjad. Fit-taraġ, iltqajt mat-tifel li kien ħabat miegħi. Qalli “Jien Ġesu. Grazzi talli ma rrabjajtx meta dħalt fuqek.” Ftit wara, iltqajt mal-mara tal-pakkett u din qaltli “Jien Ġesù. Grazzi li ġbart il-pakkett”. Aktar ‘l quddiem, għaddejt minn ħdejn l-anżjan tat-triq. Qalli “Jien Ġesù. Grazzi talli għintni naqsam it-triq.”

F’daqqa waħda, ftakart li Ġesù kien qal li dak li aħna nagħmlu ma’ ħaddiehor, inkunu qegħdin nagħmluh miegħU.

Mela barra li Ġesù huwa wieħed mit-tlett persuni f’Alla wieħed, huwa wkoll kull persuna li aħna niltaqgħu magħha fid-dinja. Għaldaqstant, għandna nittrattaw lil xulxin b’rispett u mħabba.

All families were invited to dedicate a day to the Lord during the begining of another liturgical year –on the first Sunday of Advent. Adults and adolescents followed a series sessions with the theme based on Pope Francis’ words “We cannot be part-time christians”. The figure of Mother Theresa was presented as an example to those who attended; and youths who volunteer and work with the sisters of Mother Theresa shared their experience of working in Malta and abroad, namely Peru and Ethiopia. Bro Ben Deguara, who volunteered for five weeks with the sisters of Mother Theresa in Malta, also shared his experience. A separate programme for children who attended was also prepared. Around 100 participants attended in all.

Mumenti ta’ riflessjoni minn Fr Charles Fenech waqt il-laqgħa ta’ Prayer Cafe’

Il-Ġimgħa 29 ta’ Novembru 2013

[L-1 Ħadd tal-Avvent  (Mt 24, 37-44)]

L-ambjent ta’ madwarna ma jgħinx biex nippreparaw ruħna spiritwalment, għax qed naqbżu għall-festa mingħajr ma ngħaddu għall-perjodu tal-Avvent.  Is-sabiħ tal-Avvent jinqabeż u mmorru dritt għall-maxtura.  Madankollu għandu jkun hemm proċess  sħiħ sakemm wieħed jasal għall-maxtura.

Waqt dan il-proċess naraw figuri important, bħall-figura ta’ Ġwanni l-Battista, li  għax ta xhieda ta’ Ġesu’ qatgħulu rasu.  Il-figura ta’ Marija u ta’ San Ġużepp jidhru li għalkemm qalu iva, tħawdu u ma fehmux, (kif ħafna drabi jiġri  fil-ħajja tagħna).  Għalhekk f’dan l-Avvent irridu nħarsu sew lejn il-ħajja tagħna bħala mixja spiritwali. Il-kalendarju tal-Avvent jista’ jgħinna biex nikbru spiritwalment.

Ħarsa lejn il-vanġelu tal-Ħadd li ġej:

 Wieħed m’għandux jiżbalja billi jħares lejh bħala vanġelu tal-biża li bih nibdew l-Avvent. Alla hu għani fil-ħniena u mhux fil-biża.  San Mattew qed jgħidilna li l-mixja tagħna hija stennija mhux biss fl-erba’ ġimgħat tal-avvent imma stennija kontinwa.

[pullquoteleft]Jista’ jkollok kollox imma tkun vojt. Il-Mulej sa jsibna nishru? Sa jsibna attenti?[/pullquoteleft]

Ishru jgħidilna San Matthew, jiġifieri stennew.  Ma jfissirx li nistennew b’idejna fuq żaqqna,  imma nistennew lil Ġesu’ waqt il-ħidma tagħna.  Waqt din l-istennija rridu nkabbru t-talenti tagħna – hu x’inhu x-xogħol, DAN M’GĦANDUX ISIR  BIL-BIŻA.  Il-fidi tagħna hija fidi ta’ ferħ mhux ta’  biża.

Aħna rridu nwelldu lil Ġesu’ Bambin billi nagħtu xhieda ta’ Ġesu’ bid-diskors tagħna, b’għemilna,  billi nitkellmu ftit man-nies u nuruhom  sens ta’ ġentilezza. Dan kollu jrid jsir kontinwament. Dan nibdewh miċ-ċirku żgħir tagħna –  Iċ-ċirku tal-familja u fuq il-post tax-xogħol tagħna…..

Ejjew nużaw l-Avvent biex nimlew il-maxtura tagħna sew.

l-Aħħar Ħadd ta’ matul is-sena.

Il-Ġimgħa 22 ta’ Novembru 2013

Din il-ġimgħa fl-assenza ta’ Fr Charles Fenech, Prayer Café tmexxa mill-membri tal-Kerŷgma. Li ġejjin huma xi ħsibijiet li nqassmu waqt il-laqgħa wara li nqara l-vanġelu tal-Ħadd li jmiss.

Illum il-vanġelu jirrakkonta parti mill-ġrajja ta’ meta Ġesu’ kien imsallab mal-ħallelin. “Salva oħrajn; ħa jsalva lilu nnifsu jekk inhuwa l-Messija ta’ Alla, il-midluk tiegħu!” qalu l-kapijiet. “Salva lilek innifsek u lilna.” Qal wieħed mill-ħalliel imsallab miegħu.

Is-setgħa tiegħu li jagħti s-salvazzjoni ma ħaddimhiex favur tiegħu nnifsu iżda ħaddimha għall-oħrajn, u tahom l-aqwa salvazzjoni “Tassew, ngħidlek, illum tkun miegħi fil-Ġenna.” Lil dawk li kkundannawh, wriehom kemm kien setgħan billi ma mexiex magħhom bl-istess kejl: mhux biss ma kkundannahomx, imma ħafrilhom u skużhom,”Missier, aħfrilhom, għax ma jafux x’inhuma jagħmlu.”

Jiena ċerta li ebda wieħed minna qatt, jew għad qatt ma jasal biex iwaqqa’ lil Ġesu’ għaċ-ċajt bħalma għamlu s-suldati u l-ħalliel il-ħażin. Imma ejjew naħsbu ftit. Qatt ma sibna ruħna nirrabjaw ma Ġesu’ għax l-affarijiet ma jirrizultawx eżatt bħalma nixtiequhom aħna? Veru r-rabja tagħna m’għandiex x’taqsam mal-mod kif is-suldati ġabu ruħhom ma’ Ġesu’, imma xorta waħda ma nkunux qed nagħtu lill Alla dik il-fiduċja li jixraqlu.

“Tassew, ngħidlek, illum tkun miegħi fil-Ġenna.” Din hija r-risposta li Ġesu’ ta lill-ħalliel it-tajjeb. Bl-istess mod se jittratta magħna jekk aħna nagħtu lil Alla l-ġieħ li jixraqlu u nemmnu li Alla dejjem hu viċin tagħna anki f’dawk l-okkazzjonijiet meta naħsbu li hu il-bogħod minna.

Kemm nies jipproponulna fatti, ġrajjiet, wegħdi, imma meta tifli sew tinduna li f’dak li qed jingħad m’hemmx il-ġid tiegħi imma l-ġid personali tiegħu moħbi wara l-wegħda ta’ pjaċir jew ieħor.

Fl-aħħar mill-aħħar, l-ideja li ma teżisti l-ebda verita’, iġġelgħna nfasslu verita’ għalina, mingħajr ma nikkunsultaw lil dak li ddeskriva lilu innifsu bħala l-Verita’, nibdew naħsbu li aħna biżżejjed għalina nfusna, li m’għandix bżonn ta’ Alla, li kif ngħidu aħna hu s-sewwa.

U għalhekk illum Ġesu’ qed jistedinna biex ma naqtgħux qalbna fi tfittxija tagħna għall-verita’. Meta nsibuha ma nibżgħux nxandruha, ma nibżgħux ngħixuha anke jekk dan jiswielna diffikultajiet u forsi kultant żeblieħ. Ġesu’ illum ifakkarna wkoll fl-atteġjament li għandu jħaddan min jinsab fil-verita’ ; atteġament qatt arroganti, qatt vjolenti.. Kienu ħafna dawk li fl-istorja ġġieldu għall-verita’ mingħajr ma qatlu lil ħadd, mingħajr ma baxxew lil min jaħsibha differenti minnhom, mingħajr ma għamlu kruċjati. Min jgħix fil-verita’, jxandarha bla biża, imma mingħajr għajjat u storbju għax jaf li x-xhieda tiegħu tgħajjat weħidha. Pittura sabiħa ma tgħajjatx, imma bi sbuħija tagħha twaqqfek u tordnalek tħares lejha, tirbħek mingħajr vjolenza. Hekk ukoll il-bniedem veru, jirbaħ bix-xhieda tiegħu. U lil min din ix-xhieda ma tgħoġbux jagħmel minn kollox biex isikktu, iħammġu… imma fl-aħħar mill-aħħar it-tajjeb jirbaħ.

Din kienet l-esperjenza ta’ Ġesu’. Għax kien il-Verita’, bħal ħaruf meħud għall-qatla spiċċa ma’ salib. Imma la s-salib u anqas il-qabar ma siktuħ. Rebaħ il-mewt u illum qed niċċelebrawh bħala s-Sultan tal-ħolqien kollu.

Naqsam ukoll parti minn omelija tal-Papa Franġisku dwar kif għandha tkun il-fidi. Hu kien qal: “Jiena nisrani “bl-iskossi” [illum mod u għada mod ieħor], jew jiena nisrani dejjem?  Il-kultura tal-proviżorju, ta’ dak li huwa relattiv tidħol ukoll fil-għixien tal-fidi.  Alla jitlob minna li nkunu fidili miegħu, kuljum, fl-azzjonijiet ta’ kuljum u jżid li ukoll meta xi drabi ma nkunux fidili lejH, Huwa dejjem jibqa’ fidil f’kelmtu u bil-ħniena tiegħu ma jgħejja qatt inewwlilna idejh biex jgħinna, biex jinkuraġġina ħalli nerġgħu naqbdu t-triq, nerġgħu lura għandu u nkellmuH fuq in-nuqqas ta’ ħila tagħna sabiex jagħtina l-qawwa tiegħu.  U din hija t-triq definittiva: dejjem mal-Mulej, fid-dgħufijiet tagħna wkoll, ukoll fi dnubietna.  Ma mmorru qatt fuq it-triq tal-proviżorju.  Dan joqtolna.  Il-fidi hija fedelta’ għal dejjem, bħal dik ta’ Marija.”

Saret ukoll riflessjoni fuq Kristu bħala r-re tar-rejiet:

• Kemm qed inħalluh lil Kristu jsaltan fil-ħajja tagħna?
• Kemm inqisuh bħala Sultan?
• Lis-sultan irridu naqduh, irridu nonorawh, irridu nobduh.
• Kristu huwa r-re tar-rejiet, saltnatu m’għandhiex tmiem.
• Kristu hu Sultan li obda, li ħafer, li ħabb sal-aħħar nifs fuq is-salib. Ġesu s-Sultan, il-Mulej Alla magħmul bniedem, jilbes fardal, għarkupptejh, jaħsel riġlejn il-bniedem.
• Kemm aħna lesti nimxu wara sultan hekk kbir minkejja l-umiljazzjoni, it-tbatija, il-miżerja li taf tħabbatna magħhom il-ħajja?
• Meta KRISTU jkun qed isaltan verament f’ħajjitna hemmhekk inkunu lesti li nagħdru, naħfru u nissaportu.

33 Ħadd ta’ matul is-sena.

Il-Ġimgħa 15 ta’ Novembru 2013

Bħal kull nhar ta’ Ġimgħa, Fr Charles Fenech fetaħ il-laqgħa tal-prayer cafe’ quddiem attendenza numeruża li wieħed ma jistax ma jinnotax li qed tiżdied kull ġimgħa.  Wara li nqara l-vanġelu tal-Ħadd li ġej (Lq21,5-19), Fr. Charles għamel ir-riflessjoni tiegħu fuq erba’ punti prinċipali.

…”għad jiġu ħafna f’ismi u jgħidu,

‘Jien hu’ u, ‘Iż-żmien wasal’.

Tmorrux warajhom!” 

Irridu niddistingwu bejn  aħna fil-knisja u  aħna tal-knisja pero’ irridu nifhmu x’inhi l-knisja u ma niżvijawx mit-tagħlim ta’ Ġesu’.  Ġesu’ stess kien diġa qed jipprofetizza li ħa jkun hemm minn jdawwarlu kliemu u juża kliemu għall-iskopijiet tiegħu.

1. Ġesu’ jitkellem fuq it-tmiem tad-dinja.  Dawn huma l-ħdud lejn l-aħħar tas-sena liturġika;  il-Ħadd li ġej u l-Ħadd ta’ wara – l-24 ta’  Novembru ( festa ta’ Kristu Re’) li huwa l-aħħar Ħadd tas-sena liturġika, imbagħad għandna ukoll fl-ewwel ħdud fil-bidu tal-avvent; fejn insibu li l-vanġeli jitkellmu fuq il-ħajja taż-żmien li ġej.  Vanġeli eskalotoġiċi fejn jitfgħuna lejn il-futur biex nagħrfu li aħna ma nistgħux niggranfaw mal-affarijiet ta’ din id-dinja.  Lejn l-aħħar tas-sena liturġika jrridu niżvojtaw kollox imma mhux bil-biża’.   Għalhekk irridu nkunu ippreparati.  Ġesu’ qalilna li ħa nkunu persegwitati, sa jkissruna, imma Hu qalilna biex ma nibżgħu xejn x’sa ngħidu u nagħmlu.  L-Ispirtu sa jkun qed jaħdem magħna u jilluminana u m’aħniex sa nintilfu.

‘Imma xagħra waħda minn raskom ma tintilifx.’

Aħna irridu nindunaw li aħna immirati lejn l-eternita’.  

2. Il-liturġija tal-lum ukoll titkellem dwar il-jum. F’partijiet oħra fil-Bibbja nsibu Jum il-Mulej, Jum Jaħweħ jew Jum iż-żjara.  Dan huwa l-jum li fih sa niltaqgħu wiċċ imb’wiċċ m’Alla.  Il-bniedem għandu ħabta li kif joqrob lejn l-aħħar jum jew jisma’ bl-aħħar jum, forsi għax sema’ bil-mewt ta’ xi ħadd eċċ, donnu tinħoloq biża’ ġo fina.  Is-sens tal-biża’ li tiddomina l-ħajja tagħna fuq din l-art rridu nneħħuha.  Aħna wlied id-dawl, aħna nipprietkaw id-dawl u t-tama.  Dan huwa passaġġ.  Inkunu konxji ta’ dan il-passaġġ mhux bil-biża’ imma billi nippreparaw ruħna sew.  Il-fatt li nkunu konxji, inkunu qed inħejju ruħna aħjar għall-eternita’.  Inżommu f’moħħna li aħna immarkati għall-eternita’.  Ix-xahar ta’ Novembru, huwa ix-xahar tal-ħajjin u mhux tal-mejtin.  Dan ix-xahar jibda bil-festa tal-ħajja; bil-festa tal-qaddisin kollha.  Għandna obbligu li nitolbu għal min għadda għall-eternita’ ukoll.

Inħarsu ‘l quddiem b’ferħ u ottimizmu li aħna m’aħniex għal hawn.  Ma nħarsux bid-dwejjaq għall-fatt li ngħidu m’aħniex għal hawn.  Dawn il-Ħdud Ġesu’ sa jgħidilna:

Itfah għajnejk sew.

Ara l-għażliet li qed tagħmel.

Qed tagħti xhieda Tiegħi sew?

Ma’ xhiex qed tibni l-futur tiegħek?

L-investiment tiegħek ma’ xhiex qed tagħmlu?

Il-ħin tiegħek?  L-iktar ħaġa għażiza aktar mill-flus, qed tagħti ħin għaliha?

3. Għal darb’oħra, Fr Charles jirrepeti kemm hu mportanti li nagħtu ħin lil Alla.  U Alla imbagħad jagħtik aktar ħin milli għandek bżonn.  L-24 siegħa hekk sa jibgħu – mhux ħa jiżdiedu imma Alla  jagħtik aktar ħin; fil-mod ta’  kif taħdem, fil-mod ta’ kif tħares, fil-mod ta’ kif tirraġuna, fil-mod ta’ kif tħares lejn problema u tittekiljaha …..  kollox sa jkun differenti.  Kultant problema tista’ tħarbatlek ġurnata jew  inkella taħli ħin fuq xi ħaġa li tkun stajt għamiltha fi ftit minuti. Il-fatt li inti toffri ħin lill-Mulej jevitalek dawn l-affarijiet.  Ippruvaw u taraw kemm hu tajjeb il-Mulej.

4: Xhieda.  Ġesu’ qal:

‘Imma qabel dan kollu, jixħtu idejhom fuqkom u jippersegwitawkom, jagħtukom f’idejn is-sinagogi u jitfgħukom fil-ħabs, u jeħdukom quddiem slaten u gvernaturi minħabba f’ismi.  Dan ikun jiswielkom biex tistgħu tagħtu xhieda.’

Ġesu hawnhekk qed jgħidilna biex ma noħolqux paniku.  Jekk ikun hemm min jipprova jirridekulak għax raddejt is-salib jew għedt xi kelma kif suppost kellek tgħidha, agħmel kuraġġ.  Dan jiswielkom biex tagħtu xhieda.  Aħna x-xhieda nagħtuha mill-knisja ‘l barra.  Aħna għandna qawwa bħala insara għalhekk nużawha!  Toqogħdux taħsbu minn qabel kif ħa tiddefendu ruħkom għax Ġesu stess qal:

‘jien nagħtikom diskors u għerf li kull min ikun kontra tagħkom ma jkunx jista’ jiqaflu jew imerih.’

Tibżgħux tikkonfrontawhom.  Uru l-fidi tagħkom mhux tagħlqulhom il-bieb u twaħħlu l-istiker  mal-bieb.  Pero’ tridu tkunu ittrenjati.  Bħal dak li sa jmur għall-maratona u jittrenja sew minn qabel.  Fr Charles poġġielna ftit mistoqsijiet quddiema biex inkunu nistgħu nirriflettu fuq il-ħajja tagħna u naħdmu għall-eternita’.

Spiritwalment, aħna qed nittrenjaw?  Il-Bibbja? Huwa l-aktar ktieb ġdid fid-dar tagħna?  Attenti għax meta tiftħuh bis-serjeta’ ma terġax tagħlqu.

Il-laqgħa kompliet b’aktar tagħrif minn Fr Charles u diskussjonijiet minn nies esperti u follow ups tagħhom minn ħafna nies li kienu preżenti.  Wieħed irid jiġi biex jittrenja sew l-kelma t’Alla.  Mela narawkam għall-Prayer Cafe’ ta’ kull nhar ta’ Ġimgħa.

 32 Ħadd ta’ matul is-sena – Il-Ġimgħa 8 ta’ Novembru 2013

Il-laqgħa infetħet bil-kanzunetta  ‘Christ is enough for me’.  Il-messaġġ tagħha huwa ċar. 

Wara Fr. Charles qal kelmtejn qabel inqara l-vanġelu.  Dan kien jgħid hekk.  

Fidi:  Ħadd u xejn m’għandu jdawwarni.  Nissaħħu f’din il-qawwa li kull wieħed u waħda minna għandu meta nemmnu. Importanti ħafna li l-fidi tagħna tista’ tikber meta NISIMGĦU l-Kelma t’Alla.  Imma l-fidi tagħna tissaħħaħ meta aħna NXANDRUHA, meta int ma tistħix tgħid li int NISRANI.  Hu x’inhu x-xogħol tiegħek ta’ kuljum fil-qadi ta’ dmirijietek.

Hekk kif imbagħad inqara l-vanġelu, Fr. Charles  kompla mill-ġdid.  Dan il-vanġelu kien test kif ukoll nasba tas-sadduċej għal Ġesù. Dawn kienu nies li ma kienux jemmnu fil-qawmien mill-imwiet.  Ġesù jgħidilna l-fehmiet tiegħi mhux fehmietkom u t-triqat tiegħi mhux triqatkom.   Ġesù qed jgħidilna f’dan it-test, b’mod indirettament,  li aħna mwaħħlin mal-art.  Ġesù jridna  ngħixu għas-sema. Ma jfissirx li ngħixu fil-qamar, jew li ngħixu distratti.  Ġesù jridna ngħixu verament bħala bnedmin imma naħsbu bħalu.  U din hija l-QABŻA fil-KWALITA’  fil-ħajja tagħna int min int.   Irridu nafdaw fiH.  Irridu naħsbu bħal Ġesù, ngħixu bħalu minkejja d-diffikultajiet fil-ħajja tagħna ta’ kuljum li jistgħu jkunu mard, dwejjaq, solitudni eċċ.  Ġesù qatt u qatt m’hu sa jħallina waħidkom.  Ġesù qed jgħidlek – kuraġġ qum fuq saqajk.  Postok fis-sema, imma għalissa trid timxi fl-art. 

Din it-tradizzjoni Ġudajka tal-Lhud għadha teżisti sal-lum – li l-aħwa jiżżewġu l-mara ta’ ħuhom meta ħuhom jmut.  Jisforzawhom biex jiżżewġu u Ġesù qed jirrakkonta dan il-fatt biex propju jurina li aħna ma nistgħux nibqgħu biss naħsbu fuq il-livell uman.  Kif?  Meta aħna rċevejna s-sagrament tal-magħmudija, u kull sagrament ieħor, Ġesù qed jgħollina tarġa biex aħna nibdew naħsbu bħalma jaħseb Hu.  Hawnhekk tibda l-maturita’ tal-fidi tagħna – il-maturita’ tal-fidi nisranija – meta nibdew naħsbu bħal Ġesù.

Fr. Charles semma x’jgħid il-Papa Franġisku: Hu jgħid li biex aħna nitnaddfu u  b’hekk inħossuna viċin Ġesù hemm bżonn li nqerru.  NQERRU u nqerru SEW u TA’ SPISS.  Mhux għall-okkazzjoni biss.  Hemm bżonn li nqerru biex nikbru.  Il-qrar huwa fejqan.  U din li qed jgħidlina Ġesù, biex ma nibqgħux naħsbuha bħala bnedmin.  Ġesù qed jgħidilna li fis-sema ser inkunu qed ngħixu fi stat ieħor; differenti minn tagħna fuq l-art, il-ġisem tagħna jindifen u nqumu f’ġisem spiritwali “daqs li kieku anġli” (Lq 20:36) .  Dan hu l-qawmien mill-mewt.

Il-kultura preżenti tagħna tgħidilna “għix il-preżent għax għada ma tafx x’sa ssib.  Gawdi llum għax għada ma tafx x’ġej.” Din hija kultura li totalment teqred ir-ruħ tal-bniedem.   Kultura li tisfiduċjak għall-futur.  Kultura li llum tagħtik kollox, inkluż il-liġijiet;  li tagħmel il-bniedem komdu għal ftit minuti mingħajr ma tħallik tħares lejn il-futur tiegħek, li jfisser l-eternita’ – dik li ma tintem qatt.  Din hi l-bidla li rridu nagħmlu aħna f’ħajjitna.  Aħna rridu nħarsu ’l quddiem b’fiduċja kbira u li kull ħaġa li nagħmlu f’din l-art ħa tħalli riperkussjoni fis-sema.  Alla sa jħallsek bl-eternita’.  Alla mhux kattiv. Alla hu għani fil-ħniena.  Il-kalkoli tal-Mulej jagħmilhom hu mhux aħna.  Irridu nħallu ħin u spazju lil Alla.  Ġesù ser isaqsina: “Int għextni f’ħajtek?  Żammejtni ħaj? Xandartni?”  Meta kontiwament nitolbu lil Ġesù, ħajjitna tinbidel. [pullquoteright]Meta kontiwament nitolbu lil Ġesù, ħajjitna tinbidel[/pullquoteright]

L-istatwi mhux qegħdin hemm għalxejn imma biex jgħinuna.  Għandna wkoll l-Ewkaristija li hija ħajja u tidħol fina.  Alla tagħna mhux Alla tal-mejtin imma tal-ħajjin.  Għandna dmir spiritwali li nitolbu għal mejtin imma Alla hu tal-ħajjin.  Ma nibżgħux nagħtu spażju lil Alla f’ħajjitna għax Alla tagħna huwa Alla tad-dawl, huwa Alla ħaj.

Riflessjoni tal-għeluq

Tribujiet u nazzjonijiet oħra, per eżempju, l-Eġizzjani tal-qedem, kienu jħallu affarijiet u oġġetti prezzjuzi oħra ma’ dik il-persuna li jkunu difnu. Dan sabiex l-istess persuna mejta tkun tista’  tagħmel użu minnhom fil-ħajja ta’ wara din tad-dinja. Donnhom kienu jaħsbu li l-ħajja wara l-mewt ser tibqa’ tkompli bla tibdil.

Uħud mis-Saduċej, dawk li jiċħdu l-qawmien mill-imwiet, labgħbuha li huma wkoll kienu jemmnu li l-ħajja wara l-mewt ser tibqa’ tkompli bla tibdil, u staqsew lil Ġesù ta’ min tkun l-mara li żżewġet lis-seba’ aħwa. Dan għamluh biex jippruvaw jaqbdu lil Ġesù f’nassa għax is-Saduċej ma kienux jemmnu li wara l-mewt hemm ħajja oħra.

Ħafna mill-bnedmin ukoll għandhom (jew aħjar ngħid ‘għandna’) it-tendenza li ngħixu qiesu li wara mewtna jispiċċa kollox. Iżda r-rejalta hija li ġisimna biss imut. Aħna nibqgħu ħajjin, nħallu lil ġisimna u ngħaddu minn esperjenza ta’ ħajja differenti minn dik li konna nafu. Ma jkollniex  bżonn aktar ta’ dawk l-affarijiet li qabel kellna bżonn. Anke s-sess ta’ ragel jew mara, li bħalissa għandna, jispiċċa. Aħna nsiru bhall-Anġli – Spirti flimkien ma’ Alla.

[pullquoteright]”B’riħ jew riefnu minn hawn irridu nsiefru!” Qawl Malti[/pullquoteright] Noqgħodu attenti, mela, biex dak li Alla jipprovdilna, nużawh b’mod tajjeb u ġust għalina w għal oħrajn. Ftakru li meta, kif jgħid qawl Malti, “b’riħ jew riefnu minn hawn irridu nsiefru”, magħna m’aħna ser nieħdu xejn. Jgħoddu biss l-azzjonijiet li nkunu għamilna tul il-ħajja li nkunu għixna hawn fid-dinja.

31 Ħadd ta’ matul is-sena.

Il-Ġimgħa 1 ta’ Novembru 2013

Dawn huma mumenti biex nirriflettu ftit fuq il-ħajja tagħna fejn nieħdu ftit edukazzjoni biex nimxu ’l quddiem fil-ħajja nisranija tagħna. U b’dan id-diskors, Fr. Charles beda l-laqgħa tal-Prayer Café għax-xahar ta’ Novembru 2013.

Kompla jgħid li dan ix-xahar mhux ix-xahar tal-mejtin imma tal-ħajjin.  Hu jara li dawn il-festi huma maqsumin fi tlieta: il-festa tal-qaddisin, il-festa tal-mejtin u l-festa tagħna.  Għax aħna, ukoll imsejħin għall-qdusija li tfisser tama.  Aħna qed nimmiraw għal ħajja oħra.

Aħna l-bnedmin  ma tantx nitkellmu fuq il-mewt.  Imbagħad jiġi żmien li nilbsu l-iswed u nibku.  Pero’ fl-istess ħin, f’dan iż-żmien, tmur f’ħanut u ssib saqajn maqtugħin, skeletri,  irjus eċċ.  Din il-festa tal-Halloween  ikkundannata b’mod ċar mill-knisja.  Aħna niċċelebraw il-ħajja, aħna wlied id-dawl għalhekk għandna il-blandun fil-knisja.

Għandna dmir niftakru fil-mejtin.  Fr. Charles qasam magħna ħsieb żgħir. Waqt funeral ħafna jilbsu l-iswed u jkunu mbikkma.  Min jaf il-mejjet hux diġà ferħan dak il-ħin mal-Mulej?

Il-Vanġelu

Dawn il-laqgħat jgħinuna ħafna qal Fr. Charles, pero’ aħna rridu nagħmlu l-H.W. id-dar.  Dan il-vanġelu huwa ritratt tagħna lkoll.  In-nies, f’dan il-vanġelu kienu qed jagħtu t-taxxa mhux lill-gvern, bħalma nagħmlu aħna, imma lill-Imperu Ruman, ħakkiem barrani.  Għalhekk il-folla lil Żakkew kienet tarah ikrah, għax kien korrot.

Imma Żakkew xtaq jara lil Ġesu’ minn aspett ta’ kurżita’.  Hawnhekk nidhru aħna.  Immorru l-quddies u naraw Ġesu’ x’sa joffri.

Żakkew mar jiġri biex jara lil Ġesu u mhux bil-lajma.  Kellu ħeġġa u għamel minn kollox biex jarah.  Hawnhekk bdiet dieħla l-fidi.

Aħna ma nistgħux nibqgħu nitolbu meta jkollna aptit.  L-atleti ma jimxux bl-aptit, ma jittrenjawx biss meta jkollhom aptit.  Aħna xi kultant fil-ħajja tagħna ma jkollniex aptit nitolbu.  Il-ħeġġa ma tkunx hemm għax il-problemi jħawduna.  Ma jkollnix moħħna kwiet.  Ma jimpurtax, qal Fr. Charles, il-Mulej jaf. U hu tana parir sempliċi imma prattiku ħafna: issuġġerixxa  li tajjeb li nżommu prayer book tagħna u meta inħossuna bla ħeġġa u bla aptit biex nitolbu, naqbdu dan il-prayer book u nibdew naqraw minnu.  Iva bħall-pappagal imma Ġesu’ jaf.  Importanti hu li ma nieqfux nitolbu meta ma jkollniex aptit.

Ġesu’ jagħti ordni mal-ewwel lil Żakkew u uża ismu.  Għax Ġesu’ jafna b’isimna.  Żakkew kollu ferħan laqgħu għandu, għax issa l-kurżita’ telqet. Iżda n-nies flok ferħu, iġġudikaw.

Żakkew tilef ġidu kollu imma rebaħ lil Ġesu’.  Għax meta l-imħabba ta’ Ġesu’ tidħol ġo fik m’hemmx limiti.

Għalhekk importanti li tagħti spażju lil Alla f’ħajtek bħal Żakkew.

29 Ħadd ta’ matul is-sena.

Prayer Café – Il-Ġimgħa 18 ta’ Ottubru 2013

Bħal kull nhar ta’ Ġimgħa, waqt il-laqgħa Prayer Cafe fiċ-ċentru tal-Kerygma, Fr. Charles Fenech tkellem fuq il-vanġelu tal-Ħadd li jmiss.  Dawn huma ftit spunti meħudin mid-diskors tiegħu.

In-Nuċċali ta’ Ġesu’

Għandna bżonn nilbsu n-nuċċali ta’ Ġesu’ biex nibdew naraw aħjar u differenti.  Il-viżjoni hija l-kelma t’Alla.  Il-vanġelu jgħinna nifhmu u naraw aħjar.

It-Talb

Fr. Charles enfasizza fuq it-talb.  It-talb huwa relazzjoni intima tagħna ma’ Ġesu’.  Imma kultant infallu – ma nagħmluhx tajjeb – inkunu arroganti.  Inħarsu lejn it-talb bħala xi ħaġa biex ninqdew ta’ malajr.  Kompla jgħid li rridu neħħuha li ngħidu ‘m’għandix ċans.’  Tuh spażju lill-Mulej, kulħadd bil-mod tiegħu.  e.ż. prayer corner fid-dar jew kamra fejn nitolbu. Permezz tat-talb biss issibu lil Alla.

Huwa importanti jgħid Fr. Charles, li t-talb nagħmluh b’ċertu ritmu u bi spiritwalita’. Il-mediċina hija d-djalogu Miegħu.  Hija ferm importanti li naqraw silta mill-vanġelu jew Bibbja kuljum.

Il-Grazzi u stil tajjeb ta’ talb

Ġesu’ ma jgħix bil-grazzi tagħna, imma jixtieqha.  Għalhekk

1. Ibda t-talb tiegħek bill-grazzi.
2. Itlob lill-Mulej dak li għandek bżonn  “Itolbu, u jingħatalkom, fittxu, u ssibu; ħabbtu u jiftħulkom.” Mt. 7:7
3. Afda f’idejn Alla anke jekk ma tifhimx.  Marija ukoll ma fehmitx meta l-anġlu ħabbrilha li kellha tkun omm Alla, fdat xorta.  Ħadet deċizjoni perikoluża fit-tradizzjoni tal-Lhud. Minkejja li kienet taf li niesha jħaġġruha kieku nqabdet li tqalet barra ż-żwieġ fdat fis-sejħa li għamlilha l-Mulej. Hemm bżonn li nintelqu għar-rieda tal-Mulej.

Fr Charles staqsa u kompla jgħid; “Aħna kultant ngħidu x’irid il-Mulej?  Jien li mmur quddies, nisma’ r-radju reliġjuż, nattendi laqgħat u kollox jiġi ħażin u min ma jmurx quddies, jiġihom kollox tajjeb.”  Hawnhekk hu wieġeb;” Itlobu lil Alla biex jagħtikom sinjali KULJUM. Dawn nistgħu nsibuhom f’silta mill-Bibbja li naqraw kuljum; pero’ tinsewx tilbsu n-nuċċali ta’ Ġesu għax jista’ jkollok nuċċali b’lenti tajba ħafna u xorta tibqa’ ma tara l-ebda sinjal .

Nsibu Ħin

Il-laqgħa spiċċat fuq dan l-ispunt. Kif għandna l-wiċċ ngħidu li m’għandiex ċans għat-talb, għal quddiesa, għal Mulej, meta l-24 siegħa tal-ġurnata tahomlna Hu?  Ngħidu ma għandniex ċans għax għandna l-familja, x-xogħol, l-istudju eċċ.  L-intimita’ mal-Mulej hija u għandha tkun parti importanti fil-ħajja tagħna ta’ KULJUM.

(Fl-aħħar Fr.Charles fakkarna li l-adorazzjoni li jmiss fil-knisja ta’ San Duminku Rabat ser issir nhar il-31 ta’ Ottubru)