Il-Premju Żagħżugħ tas-Sena 2014 organizzat mill-Moviment Kerŷgma din is-sena intrebaħ mill-Youth Alive Foundation minn Marsascala.  Ir-rebbieħ tal-premju, li huwa sponsorjat minn APS Bank, ġie mħabbar mill-President tal-Moviment Kerŷgma, is-Sinjura Tania Borg.

Il-preżentazzjoni tat-trofew saret mis-Sur Edgar Preca, li kien qed jirrapreżenta lil President ta’ Malta, fi tmiem ta’ quddiesa li saret fil-Knisja ta’ San Duminku r-Rabat, il-Ġimgħa, 30 ta’ Jannar 2015.  Preżenti wkoll għal din iċ-ċerimonja kien hemm il-Prof. Emanuel P. Delia, Ċermen tal-APS Bank li sponsorjaw l-okkażżjoni u s-Sinjura Tania Borg, President tal-Moviment Kerŷgma, apparti mistednin oħra.

“Youth Alive Foundation hija organizzazzjoni ta’ voluntiera żgħażagħ li taf il-bidu tagħha bl-isem Youth Alive lura fl-1996 fi ħdan il-komunità parrokkjali ‘Madonna tas-Sacro Cuor’ f’Tas-Sliema.  Il-ħidma ewlenija tagħha dejjem kienet il-formazzjoni taż-żgħażagħ permezz ta’ parteċipazzjoni attiva fil-komunità mibnija fuq sisien sodi ta’ katekeżi tal-Kelma t’Alla u l-ispiritwalità Franġiskana.  F’Awwissu 2007, Youth Alive ġiet stabbilita bħala fondazzjoni, biċ-ċentru tagħha “Dar Frate Jacoba” ġewwa Wied il-Għajn, liema dar kienet ingħatatilhom b’donazzjoni minn żewġ nisa ta’ qalb kbira u ġeneruża.  Din id-dar tikkonsisti f’razzett antik ta’ 200 sena u raba madwarha ta’ numru ta’ tmiem.

Dar Frate Jacoba tistrieħ fuq tliet pilastri: l-ispiritwalità, il-karità u l-ambjent.  Ir-residenti jgħixu f’komunità miftuħa, bis-sistema tal-permakultura, li hija l-aħjar sistema li tħaddan fiha t-tliet pilastri.  Din hija l-ewwel u attwalment l-unika komunità f’Malta li b’mod ħolistiku tgħix ir-realtajiet tal-ispiritwalità, il-karità u l-ambjent b’mod sostenibbli.

Din id-Dar tilqa’ fi ħdanha żgħażagħ għaddejjin minn sitwazzjonijiet diffiċli, li sikwit jirreferu għalihom bħala ‘każijiet soċjali’ u li jkunu bla dar.  Dawn iż-żgħażagħ jgħixu flimkien mar-residenti bil-għan li jkunu parti mill-komunità.  Hemm ukoll numru ta’ żgħażagħ oħra li jattendu għal numru ta’ siegħat jew ġranet biex jingħataw is-servizzi offruti.  Is-sistema ta’ terapija li tintuża fid-Dar issir b’ħidma fuq l-ambjent li fih wieħed jgħix, aktar milli fuq l-individwu, biex ma ssirx vjolenza fuq il-karattru tiegħu.  Dan l-ambjent huwa neċessarju għax il-karattru tal-individwu jkun jista’ joħroġ mingħajr inibizzjonijiet u b’hekk jaffronta l-biżgħat tiegħu.  Meta s-sistema ta’ terapija li tintuża taħdem fuq l-ambjent li l-persuna tgħix fih, ma ssirx vjolenza fuq il-karattru tagħha.  Għalhekk dawn iż-żgħażagħ jitgħallmu jgħinu lil xulxin u jikkollaboraw flimkien, jgħinu kemm fl-għelieqi kif ukoll fit-trobbiji tal-annimali, apparti li jagħmlu x-xogħol normali tagħhom barra mid-Dar jew jattendu l-iskola.  Bħalissa Youth Alive Foundation qed tieħu ħsieb ħames żgħażagħ b’eta’ bejn 11 u 17-il sena.  Peress li f’Malta għandna numru konsiderevoli ta’ dawn il-każijiet soċjali, Youth Alive Foundation iddeċidiet li testendi d-Dar biex tkun tista’ tilqa’ sa 16 minn dawn iż-żgħażagħ.  Dan il-proġett jikkonsisti f’basement, semi-basement u sular ieħor bi ħdax-il kamra tas-sodda.  Il-binja hija diġa lesta u issa ser jibdew ix-xogħol tal-finishing.  Għalkemm ix-xogħolijiet kollha huma dipendenti fuq d-donazzjonijiet ġenerużi tan-nies, il-Fondazzjoni tagħmel numru ta’ attivitajiet ta’ fund-raising peress li l-ispiża għall-binja l-ġdida tammonta għal €200,000.  Fost dawn insibu skemi ta’ pledges, open weekends fejn jinbiegħ xogħol artiġjanali kif ukoll prodotti tal-ikel maħdumin hemm stess matul is-sena mir-residenti, u attivitajiet soċjali bħal barbeques u ikliet.  Il-voluntiera jingħataw korsijiet frequenti ta’ formazzjoni, irtiri, spiritwalita’, fost oħrajn.

L-istil ta’ ħajja fid-Dar jimplika proċess li jirrikjedi ħafna paċenzja.  Hija mixja li taf il-punt tat-tluq tagħha iżda l-punt tal-wasla għadu mistur.  It-tlajja’ u l-inżul, it-tumbati u l-iskossi ma jonqsux.  Kull mument, sabiħ jew ikrah, huwa pass ieħor f’dan il-vjaġġ tal-Youth Alive Foundation.”

Iż-żgħażagħ nominati għal dan il-Premju kienu: Joseph Cauchi mill-Għarb, Għawdex, Franco Cefai miż-Żebbug, Għawdex, Andrea Grima minn Ħal Luqa, Edward Mifsud mill-Fgura u l- Youth Alive Foundation mill-Marsascala.

Dan it-trofew jingħata kull sena f’ġieħ il-mejjet Dr Rudolph Saliba li kien l-ewwel president tal-Moviment Kerŷgma.  Is-Sur Preca feraħ lir-rebbieħ u lin-nominati l-oħrajn.  Huwa stqarr li, li tkun nisrani llum huwa diffiċli ħafna kif jidher minn dak li għaddej f’pajjiżi oħra fejn insara qed jiġu mmassakrati kuljum.  F’Malta wkoll li tkun nisrani ma għadiex moda.  Madankollu dan mhux iżommhu milli juri t-twemmin tiegħu anki fil-postijiet pubbliċi.  It-talb huwa importanti ħafna.  Huwa qal li sfortunatament il-midja prattikament dejjem tagħti aktar importanza lin-negattiv taż-żgħażagħ, bħal meta huma jieħdu d-droga imma ma jagħmlux l-istess ħaġa biex jippromwovu żgħażagħ oħra, tant tajba, u l-ġid li qed jagħmlu fis-soċjetà. Il-ħames nominati huma eżempju eċċellenti ta’ dan.

Il-laqgħa Prayer Cafè ta’ lbierah 23 ta’ Jannar, bdiet billi għidna t-Talba tal-Moviment Kerŷgma, talba li biha nitolbu lill-Ispirtu s-Santu jinżel fuqna u jħeġġiġna biex b’egħmilna u ħidmietna nkomplu nxandru l-Kelma t’Alla. Wara nqara l-vanġelu tal-Ħadd li ġej mehud minn San Mark 1:14-20.

Dan il-vanġelu jeħodna fil-bidu tal-ministeru ta’ Ġesu. Ma kienx żmien faċli  – ftit taż-żmien qabel din il-ġrajja msemmija kien ġie arrestat San Ġwann il-Battista. Dan la waqqaf u lanqas ma beżża’ lil Ġesu biex ikompli bil-missjoni tiegħu. “Wara li arrestaw lil Ġwanni, Ġesu mar il-Galilija jxandar l-Evanġelju t’Alla.” Hekk ukoll aħna meta niltaqgħu ma xi għawġ, ma qtih il-qalb… għandna nitħeġġu u nafdaw f’Alla l-Mulej  b’dik l-istess fiduċja sempliċi li tifel ċkejken għandu lejn missieru. Jekk il-Mulej fdalna biċċa xogħol x’inwettqu f’idejna għandna nidħlu għaliha bil-fidi li l-Mulej se jsibilna l-mezzi Hu kif inwettquha. Minn naħa tagħna rridu nxamru l-kmien u nħalluh jużana għal ġid tal-bxara t-tajba.

Fejn irridu nxandru l-Kelma t’Alla?

Il-kelma KERŶGMA ġejja mill-Grieg u tfisser ‘ixxandar l-aħbar it-tajba’. Bxara li bdiet mill-għadira tal-Galilija. Il-Galilija hija żona fertili ħafna madwar għadira tal-ilma ħelu. Il-post huwa madwar 208 metru ‘l fuq mil-livell tal-baħar u l-għadira fiha 21km b’11km. Hemm diversi bliet imdawra max-xtut tagħha bħal Kafarnahum, Tiberija, Magdala … Kienet rotta ta’ kummerċ bejn l-Eġittu u l-Ewropa (Via Maris) għalhekk kienet bħala żona tilqa’ fiha nies ta’ kulturi differenti u vjaġġaturi. Kien hemm madwar 230 dgħajsa li jaħdmu fuq din l-għadira. Hija għadira  magħrufa li faċilment iqumu l-irwiefen u hekk isir ambjent perikoluż għad-dgħajjes jaħdmu hemm. Kien hawn il-post fejn Ġesu ltaqa’ u sejjaħ lil Xmun, Indri, Ġakbu u Ġwanni biex jħallu kollox u jimxu warajh.

Irridu nxandru l-Kelma t’Alla kulfejn inkunu – d-dar mal-familja tagħna, fuq il-post tax-xogħol, f’postijiet ta’ divertiment…u dan għandna nagħmluh kemm bil-kelma u wisq iżjed bl-egħmil tagħna. Dan nistgħu nagħmluh billi nagħtu kelma ta’ faraġ lil min għaddej minn xi diffikulta, bil-għajnuna tagħna lil min għandu bżonnha…anke billi twaqqaf lil min ma jagħtix ġieh bi kliemu lill-isem t’Alla, tal-Madonna u tal-qaddisin, billi nsibuhom f’ħin opportun u niġbdulhom l-attenzjoni ta’ x’inhuma jgħidu. San Ġorġ Preca kien jgħid biex meta nisimgħu lil xi ħadd jidgħi għandna nagħmlu talba ta’ tifħir bl-isem imsemmi. “Ikun imfaħħar l-isem t’Alla!”

Meta jibdew jiġu l-affarijiet ħażin f’ħajjitna x’għandna nagħmlu? Nibqgħu nitolbu? Jekk xi ħadd jaqla’ xi għajdut fuqna nibqgħu mmorru? F’kas ta’ mard naqtgħu qalbna?

Dawn huma mumenti diffiċli li aħna lkoll f’xi mument jew ieħor se ngħaddu minnhom u fihom għandna nsejjħu għal għajnuna t’Alla. Waħda mill-membri tħobb tgħid “Ġesu għinni! Tini l-għajnuna inti ħalli nkompli”.  Forsi naħsbu li l-qaddisin kienu xi ‘superpower’ iżda nafu li anke qaddisin kbar bħal  San Ġwann Pawlu 11, San Ġorġ Preca, Madre Teresa, kienu jgħaddu minn mumenti ta’ qtih il-qalb. Iżda kollha baqgħu għaddejjin bil-missjoni tagħhom.

Membru ieħor qasam magħna li hu meta jkun għaddej minn mumenti ta’ diffikulta, li ma jkunx jista’ jifhem ‘l għala qed iseħħu , jħares lejn in-natura – xi ħadd jifhem l-kobor tal-univers? Jew kif 120 tunnellata titla fis-smewwiet? Fakkarna fil-vers mill-Bibbja “Min ma jsirx tifel żgħir – ma jidħolx fis-saltna t’Alla.” B’din l-istess tip ta’ fiduċja innoċenti tat-tfal irridu nafdaw rwieħna f’kull ċirkustanza li niltaqgħu magħha f’idejn Missierna fis-smewwiet.

Vers simili ta’ dan hu “Għax l-madmad tiegħek ħelu u t-toqol tiegħi ħafif!”Mt 11:25-30 – trid tintreħa f’idejH. Ma rridux noqogħdu jdejna fuq żaqqna iżda rridu nħallu f’idejH bħalma għamel Pietru – sema’ milli qallu Ġesu u qabad il-ħut meta mill-esperjenza tiegħu ta’ sajjied kien ċert li ma kienx se jaqbad.

Hawn inqara vanġelu sinotiku għal dak ta’ San Mark 1: 14-20 minn San Luqa 5. F’dan il-vanġelu nsibu aktar dettalji fuq is-sejħa tad-dixxipli minn Ġesu. U ntwera wkoll “video” dwar l-ewwel laqgħa ta’ San Pietru ma Ġesu.

Sentenza ċkejken minn dan il-film  ġibdet l-attenzjoni,  ‘Give me an hour and I will give you a whole life” Ġesu  qiegħed jistedinna nagħtuh l-ħin tagħna, il-karattru tagħna, il-familja tagħna, u nħallu f’idejH biex imexxina Hu. Bl-iva ta’ San Pietru Ġesu minn sajjied tal-ħut bidlu f’sajjied tal-bnedmin.

F’San Mark 1:15 nsibu “Iż-żmien huwa mitmum, u s-Saltna ta’ Alla waslet; indmu u emmnu fl-Evanġelju.” Il-kelma mitmum hija qawwija ħafna, turi ċerta urġenza – l-affarijiet li tista’ tagħmel llum tħallihomx għal għada – f’kas ta’ problema tas-saħħa naqbdu u mmorru għand it-tabib biex infiequ. L-istess is-sejħa ta’ Ġesu rridu ngħixuha fil-prezent tagħna – mhux dejjem nħallu għal darb’oħra. Ħafna qaddisin kienu jgħixu l-prezent. Mt Teresa kienet tgħin lin-nies fil-prezent tagħha, f’dak il-mument u mhux toqgħod tgħid issa qed inħossni dgħajfa – mkissra – niġi għada – LE kienet tgħix is-sejħa tagħha f’kull ċirkustanza ta’ ħajjitha. Aħna l-insara rridu ngħixu l-Fidi tagħna bi prijorita fuq ħwejjeġ oħra. Ma rridux nħallu mumenti ta’ toqol iwaqqfuna mill-mixja jew mill-ħidma tagħna. Mitmum tfisser li dak li kellu jiġri ġara u żmien il-profeti kien spiċċa. San Ġwann il-Battista għalaq l-era tal-profeti. Dawn kienu jħabbru l-miġja tal-Messija. Il-wasla ta’ Ġesu kienet il-milja ta’ dan it-tħabbir. ISSA aħna rridu nwasslu l-messaġġ ta’ Ġesu lill-ħaddieħor. Ma nistgħux nħallu l-ħidma tagħna bħala nsara għal meta jikbru t-tfal jew għal meta noħorġu bil-penzjoni. Kif jgħid il-Malti “Għada qatt ħadd ma rah.”

Ġesu sejjaħ lid-dixxipli tnejn,tnejn. Il-Knisja hi grupp ta’ nies flimkien. Ir-reliġjon ma nistgħux ngħixuha weħidna. Li nattendu laqgħat bħal Prayer Cafe jew simili jgħinuna nkomplu mexxjin – ma nħossuniex  weħidna iżda ngħarfu li qegħdin nimxu din il-mixja tal-fidi ma u bl-għajnuna ta’ l-oħrajn.

Hawnhekk nqrat storja mill-ktieb  ‘FTIT TOGĦMA TAJBA’ ta’ Mons. Mikiel Azzopardi

Taħseb li Inti Għaref Iktar Minn Alla?!

Mela darba kien hemm raġel li kien jippretendi li hu għaref ħafna u ma kienx jaħsibha darbtejn biex jikkritika l-għemil tal-oħrajn. Kollox ħażin! Dak li jagħmel hu biss tajjeb! Saħansitra kien jasal biex jikkritika anki l-għemil ta’ Alla stess! Kieku kien hu Alla, l-affarijiet kien jagħmilhom wisq aħjar! Imma ġurnata waħda nduna kemm hu iblah u prużuntuż. Ħalli ngħidilkom xi ġralu. Mela ħareġ passiġġata fil-kampanja, qalb is-siġar u l-għelieqi. Anki hemm sab x’jikkritika! Ġewwa għalqa kienu qed jikbru kwantita kbira ta’ qara’ aħmar. Dan il-prużuntuż qal: Dan hu l-għerf t’Alla! Frott daqshekk kbir, imbagħad ħiereġ minn xitla żgħira kemm kemm taraha. Għall-kuntrarju siġra hekk kbira u qawwija bħalma hi l-balluta tagħmel ġandar hekk żgħir. Imissu sar il-kuntrarju, il-ġandar mix-xitla żgħira u l-qargħa ħamra mill-balluta! U jgerger u jzekzek baqa’ miexi. Meta għejja ried jistrieħ u mtedd jieħu ngħasa għad-dell ta’ balluta kbira. Kif għajnu marret bih qam b’ħasda għax ġandra waqgħet mis-siġra u ġiet preċiż fuq il-ponta ta’ mnieħru. U kif kien hekk maħsud deherlu li sema’ leħen minn wara s-siġra li qallu: “Mur ara kieku flok ġandra kienet qargħa ħamra!” Daqsxejn ta’ ħrafa li niddedikaha lil xi semmigħa li għandhom il-marda li jikkritikaw kollox u lil kulħadd, anki l-għemil t’Alla. Ma nkunux għorrief aktar milli tassew aħna.

Il-laqgħa għalqet b’talb spontanju u bit-talba tal-Missierna.

Avviżi :

• Nfakkru li ġimgħa oħra flok il-laqgħa Prayer Cafe niltaqgħu fil-knisja tal-Madonna tal-Għar Ir-Rabat għal PREMJU ŻAGĦŻUGĦ TAS-SENA 2014. Nħeġġu lil kulħadd jattendi. Sabih li nisimgħu t-tajjeb li jsir miż-żagħżagħ tagħna.
• Is-Sibt 31 ta’ Jannar il-grupp Kerygma se jorganizza WINE AND PIZZA PARTY.
• Nħeġġu biex kulħadd jibda’ jaħseb għal Irtir tar-Randan li se jsir ġewwa S-Seminarju tal-Arċisqof tal-Virtu bejn 6 ta’ Marzu u 8 ta’ Marzu. Nħallu dawn id-dati ħielsa.

Il-kelma li Ġesù jwieġeb biha liż-żewg dixxipli tiegħu hija kelma qawwija, stedina u fl-istess ħin sfida li Ġesù jagħmel liż-żewg dixxipli u lilna lkoll.  Il-Papa Franġisku nafu li huwa Papa li jagħti attwalita’ kbira lil Vanġelu u dan il-Vanġelu jsejjaħlu: “Il-Vanġelu tas-sejħa tagħna lkoll”.  Ġwanni jindika mill-ewwel li permezz tal-frażi “Hawn hu il-ħaruf ta’  Alla”, qed jibgħat lid-dixxipli tiegħu wara Ġesù.

Din hija riflessjoni qawwija li toħroġ mhux biss minn Ġwanni, iżda fuq kollox mill-vokazzjoni tagħna li nimxu wara Ġesù u li rċivejna fil-magħmudija.  Quddiem l-għajta ta’ Ġwanni u quddiem l-istedina ta’ Ġwanni, irridu nwieġbu b’mod ċar u qawwi fil-mixja tal-ħajja ta’ kuljum:  aħna qed narawh lil Ġesù? Qed nimxu wara Ġesù?  Kif?  Il-Kelma u l-Ewkaristija huma l-qawwa tagħna fil-ħajja ta’ Ġesù?

Ġesù iwieġeb ‘EJJEW U TARAW’ – hija kelma ta’ stedina u sfida li l-ebda riklam jew marketing manager illum ma jagħmel.  “Ejjew u taraw” kif itenni l-Papa Franġisku jfisser li tmur tara u tagħżel?  Irridu nagħżlu bejn l-egoiżmu tagħna u l-għatx tagħna ta’ kuljum biex nimxu wara Ġesù.

Ġesù bil-kelma ‘EJJEW U TARAW’ jolqot dirett.  Il-kelma ta’ Ġesù hija qawwija.  Ma nistgħux nisimgħu l-Kelma jew naqraw il-Kelma ta’ Ġesù u ma jsir xejn ġo fina.

Ġwanni jibqa’ jiftakar il-ħin ezatt. “Kien għall-ħabta tal-erbgħa ta’ wara nofsinhar.  Meta nkiteb il-Vanġelu kienu għaddew bosta snin u l-kittieb jibqa’ jiftakar il-ħin eżatt meta ltaqa’ ma’ Ġesù.  Int u jien niftakru meta ltqajna l-ewwel darba ma’ Ġesù?  Meta ħassejna l-ewwel darba lil Ġesù, immarkatilna ħajjitna?  Inħossu lil Ġesù kuljum fil-ħidma tagħna?

Ġesù lil Pietru jibdillu ismu wara li jaċċetta li jimxi warajH.  Lili u lilek jagħmlilna l-istess.  Taf xi jrid minnek Ġesù?  X’missjoni tak?  Ġesù jibdlek u jsaħħek kuljum.  Importanti li tintelaq f’idejH.  Induna xi jrid minnek.  U tibda tagħmel il-mirakli bħal Ġesù …. u tinsiex tagħmel bħal Xmun Pietru  li mar sab lil ħuh u qallu sibna l-Messija.  Din il-ġimgħa sib lil xi ħadd biex iġġibu jisma’ l-kelma ta’ Alla nhar il-Ġimgħa.

Il-Laqgħat Prayer Cafè reġgħu komplew nhar id-9 ta’ Jannar, wara waqfa qasira fil-ġranet tal-Milied. F’din l-ewwel laqgħa tal-2015, tkellimna dwar il-Vanġelu tal-Ħadd 11 ta’ Jannar 2015; jiġifieri l-Ħadd fejn niċċellebraw il-magħmudija tal-Mulej.  [ara l-Vanġelu]

Il-laqgħa bdiet billi ġie spjegat li l-Magħmudija tal-Mulej għandha ħafna komuni ma’ dak li ċċelebrajna il-ġimgħa l-oħra: l-Epifanija tal-Mulej. Dan għaliex fil-magħmudija, Ġesù qiegħed juri lilu nnifsu bħala l-Iben ta’ Alla. L-istess ġara fl-epifanija fejn Alla qiegħed juri lilu nnifsu bħala tarbija. Fil-fatt epifanija tfisser turija jew manifestazzjoni u l-insara tal-lvant  din il-festa jsejħula Theofanija li tfisser, “Alla juri lilu nnifsu”.

Fil-Ġrajja tal-magħmudija Ġesù ħa l-magħmudija mingħand Ġwanni l-Battista. Aħna nitgħammdu biex jitneħħielna d-dnub tan-nisel. Ġesù kien Alla, allura ma kellux bżonn magħmudija. Fl-ittra ta’ San Pawl lill-Fillipin naqraw hekk:

“Ġesù li għad li kellu n-natura ta’ Alla, ma qagħadx ifittex tiegħu li hu daqs Alla, iżda xejjen lilu  nnifsu billi ħa n-natura ta’ lsir; sar jixbah lill-bnedmin, u deher minn barra bħala bniedem; ċekken lilu nnifsu, billi obda sal-mewt, anzi sal-mewt tas-salib.”

Ġesu ma kellux bżonn magħmudija iżda sar bniedem bħalna u għalhekk ried jgħaddi minn dak kollu li ngħaddu minnu aħna.

Wara dan il-ħsieb ġie kkwotat dak li qal il-Papa Franġisku fid-diskors tiegħu fl-udjenza ġenerali fil-Pjazza San Pietru, nhar L-Erbgħa 8 ta’ Jannar 2014:

B’dan id-diskors il-Papa beda katekeżi fuq is-sagramenti u beda billi f’dan id-diskors tkellem dwar l-ewwel sagrament: il-magħmudija. F’dan id-diskors fost l-oħrajn jgħid hekk:

 Il-Magħmudija hi s-sagrament li fuqu tinbena l-istess fidi tagħna u li tlaqqamna bħala membri ħajjin fi Kristu u fil-Knisja tiegħu.  Flimkien ma’ l-Ewkaristija u l-Konfirmazzjoni tifforma l-hekk imsejħa ‘Inizjazzjoni Nisranija’

Imbagħad jistaqsi din il-Mistoqsija:

Imma hi tabilħaqq meħtieġa l-Magħmudija biex nistgħu ngħixu ta’Nsara u nimxu wara Ġesù?  Fl-aħħar mill-aħħar dan mhux sempliċi rit, att formali tal-Knisja biex nagħtu isem lit-tarbija?

Hawnhekk għandna nsaqsu lilna nfusna, “Aħna għalxiex nitgħammdu? Għaliex ngħammdu t-tfal tagħna? Nifhmu verament x’inhi l-magħmudija jew ngħammdu t-tfal għax hija parti mill-kultura tagħna? Mhux l-ewwel darba li nisimgħu il-frażi: “Fittex għammdu/ għammidha” jew “kemm se ddum ma tgħammdu?”. Allura qed ngħammdu t-tfal għax (forsi mingħajr ma nafu) qed inkunu superstizzjużi?

Il-Papa jirrispondi bil-kliem ta’ San Pawl fl-ittra lir-Rumani:

 “Ma tafux li aħna lkoll li tgħammidna fi Kristu Ġesù, tgħammidna fil-mewt tiegħu?  Indfinna miegħu fil-mewt permezz tal-Magħmudija sabiex kif Kristu kien imqajjem mill-imwiet permezz tal-qawwa glorjuża tal-Missier, hekk aħna ngħixu ħajja ġdida”(Rum 6:3-4).

Dwar dan il-Papa jgħid hekk:

Mela din mhix biss formalità!  Hi att li jmiss l-eżistenza tagħna fil-profondità tagħha.  Tarbija mgħammda u tarbija li mhix mgħammda m’humiex l-istess.  M’humiex l-istess persuna mgħammda u oħra li mhix.

Hawnhekk nistgħu nitkellmu dwar l-argument: għandna ngħammdu t-tfal meta jkunu trabi jew għandna nħalluhom jiddeċiedu jekk jitgħammdux meta jikbru u jkunu maturi? Dwar dan wieħed jista’ jgħid ħafna, pero’ jibqa l-fatt li ġenituri responsabbli ma jħallux tarbija bil-ġuħ biex meta titgħallem titkellem tkun tista’ tgħid x’tippreferi; u lit-tfal nagħtuhom il-mediċini/tilqim li għandhom bżonn, biex nipproteġuhom, mingħajr ma nikkunsidraw jekk huma jriduhomx jew le. Ħadd ma jħalli lit-tfal jikbru mingħajr ma jagħtihom jieklu biex imbag[ara l-Vanġelu]ħad jiddeċiedu huma jekk irridux jieklu jew le! Bl-istess mod ġenituri nsara ma jistgħux ma jagħmdux lit-tfal tagħhom. Għalhekk il-ġenituri nsara jiddeċiedu li jgħammdu tarbija għax jemmnu li dik hi l-aħjar triq għaliha. Il-Magħmudija mhijiex bħal membership ta’ xi klabb li tidħol tagħmel parti minnu iżda bil-magħmudija qed nirċievu il-barka ta’ Alla. Imbagħad irridu nkomplu nitkabbru u nieħdu ħsieb li nibqgħu f’din il-barka tul ħajjitna; meta nkunu żgħar permezz tal-ġenituri tagħna u meta nikbru din trid tkun deċiżjoni li nibqgħu nieħdu u nsostnu aħna. Dan nagħmluh anke bl-affarijiet żgħar li jiġru fil-ħajja tagħna ta’ kuljum; kif ngħixu ħajjitna: kif nitkellmu; kif nsuqu u l-bqija. Kull ma nagħmlu rridu nuru li aħna nsara: jiġifieri aħna mgħammda.

Il-Papa jkompli hekk:

“bil-Magħmudija, niġu mgħaddsa f’din il-għajn tal-ħajja li qatt ma taqta’ li hi l-mewt ta’ Ġesù, l-akbar att ta’ mħabba tal-istorja kollha; u grazzi għal dik l-imħabba nistgħu ngħixu ħajja ġdida, mhux iżjed suġġetta għall-ħażin, għad-dnub u għall-mewt, imma f’komunjoni ma’ Alla u mal-aħwa.”

Hawnhekk tqajjem punt ieħor importanti. Bil-magħmudija aħna nsiru lkoll aħwa; ulied tal-istess Missier. AĦNA AĦWA – ngħixu f’familja, f’komunità’; Knisja waħda.

Il-Papa qal ukoll li: “Ħafna minna m’għandhomx l-iċken tifkira taċ-ċelebrazzjoni ta’ dan is-Sagrament”. Hawnhekk issemma l-fatt li l-Papa ħafna drabi jsostni li kull nisrani, kull sena għandu jiftakar u jiċċelebra mhux biss id-data tat-twelid – il-birthday, iżda wkoll id-data li fiha tgħammed. Dwar dan il-Papa jgħid hekk:

Li nkunu nafu d-data tal-Magħmudija tagħna jfisser li nafu data hienja.  Jekk ma nafuhiex inkunu nirriskjaw li nitilfu l-memorja ta’ dak li l-Mulej wettaq fina, il-memorja tad-don li rċivejna.  Imbagħad nispiċċaw biex inqisuha biss bħala ġrajja li seħħet fil-passat – u bilkemm għax ridna aħna, imma għax riedu l-ġenituri tagħna, li għalhekk m’għandha l-ebda effett fuq il-preżent.  Jeħtieġ nerġgħu nqajmu fina l-memorja tal-Magħmudija tagħna.  Aħna msejħin ngħixu l-Magħmudija tagħna kuljum, bħala realtà attwali fl-eżistenza tagħna.  Jekk jirnexxielna nimxu wara Ġesù u nibqgħu fil-Knisja, anke jekk bil-limiti tagħna, bid-dgħufijiet tagħna u bid-dnubiet tagħna, dan hu propju minħabba fis-Sagrament li fih sirna ħolqien ġdid u ġejna mlibbsa mill-ġdid bi Kristu.  

Fi ftit kliem il-Papa qiegħed jgħid li għandna niftakru l-magħmudija tagħna għax permezz ta’ hekk aħna nibqgħu niftakru li aħna nagħmlu parti minn familja; minn komunità. Nibqgħu parti minn din il-komunità; il-knisja permezz tal-magħmudija u sagramenti oħra li jżommuna f’komunjoni, speċjalment l-Ewkaristija. Dan għaliex l-Ewkaristija tgħaqqadna bħala komunità madwar l-istess mejda; aħna l-Maltin għandna nifhmu dan sew għax fil-kultura tagħna (bħall-kulturi oħra Mediterranji) meta niltaqgħu mal-familja jew il-ħbieb, ħafna drabi niltaqgħu madwar il-mejda tal-ikel; biex niltaqgħu rridu nieklu. Fl-Ewkaristija nagħmlu l-istess, niltaqgħu madwar mejda f’komunità. Il-Magħmudija, bl-istess mod, tagħqqadna flimkien bħala aħwa.

Il-Papa jkompli jgħid:

Hu bil-qawwa tal-Magħmudija, fil-fatt, li, meħlusin mid-dnub oriġinali, aħna mlaqqmin fir-relazzjoni ta’ Ġesù ma’ Alla l-Missier; li aħna nġorru tama ġdida, għax il-Magħmudija tagħtina din it-tama ġdida: it-tama li nimxu fit-triq tas-salvazzjoni, ħajjitna kollha.  U din it-tama xejn u ħadd ma jista’ jitfiha, għax it-tama ma tqarraqx bina.  Ftakruha: it-tama fil-Mulej qatt ma tqarraq.  

Il-Mulej huwa fidil; il-Mulej huwa lejali u dak li jwiegħed iwettaq.

Grazzi għall-Magħmudija, aħna kapaċi naħfru u nħobbu anki lil min joffendina u jagħmlilna d-deni; jirnexxielna nagħrfu f’dawk tal-aħħar u fil-foqra l-wiċċ tal-Mulej li jiġi jżurna u hu qrib tagħna.  Il-Magħmudija tgħinna nagħrfu l-wiċċ ta’ Ġesù f’wiċċ dawk il-persuni li huma fi ħtieġa, f’dawk li qed ibatu, anki fil-proxxmu tagħna.  Dan kollu hu possibbli grazzi għall-qawwa tal-Magħmudija!

Dan ifisser li kull ma nagħmlu aħna, bħala nsara mgħammda, huwa riżultat u riflessjoni tal-magħmudija tagħna. Aħna bħala nsara għandna nagħmlu dak li hu tajjeb. Dan ma jfissirx li min mhux nisrani ma jistax jagħmel it-tajjeb. Anzi, kulħadd jista’ jagħmel it-tajjeb. Id-differenza hi, li min hu mgħammed għandu jagħmel it-tajjeb għall-glorja ta’ Alla u mhux biex iħossu aħjar hu nnifsu.

Punt tal-aħħar, li hu importanti.  U hawn nagħmel mistoqsija: Tista’ persuna tgħammed lilna nfisha?  Ħadd ma jista’ jgħammed lilu nnifsu!  Ħadd.  Nistgħu nitolbuha, nixtiequha, imma għandna bżonn ta’ xi ħadd li jagħtina dan is-Sagrament f’isem il-Mulej.  Għax il-Magħmudija hi don li jingħata f’kuntest ta’ attenzjoni u ta’ kondiviżjoni fraterna.  Dejjem tul l-istorja, wieħed jgħammed lill-ieħor, lill-ieħor, lill-ieħor…hi katina.  Katina ta’ grazzja.  Imma jien ma nista’ qatt nitgħammed waħdi: hemm bżonn nitlob lil xi ħadd ieħor jagħtini l-Magħmudija.  Hu att ta’ fratellanza, att ta’ filjazzjoni għall-Knisja.  Fiċ-ċelebrazzjoni tal-Magħmudija nistgħu naraw il-karatteristiċi l-iżjed naturali tal-Knisja, li bħal omm tkompli tnissel ulied ġodda fi Kristu, fil-frott li jagħti l-Ispirtu s-Santu.

Dan isostni l-fatt li aħna bħala mgħammda; bħala nsara, aħna famila waħda, komunità.

Hawnhekk rajna x’qal il-Papa fid-diskors tal-udjenza tal-ġimgħa ta’ wara:

Hawnhekk il-Papa ta eżempu, permezz tal-istorja, ta’ x’ġara meta l-knisja fil-Ġappun għamlet mijiet ta’ snin teżisti b’mod klandestin u x’fissret il-mgħammudija f’dan iż-żmien partikolari għal dawn in-nies.  Aqra d-diskors kollu bil-Malti hawn!

Bħala konklużjoni għal-laqgħa ssemma l-messaġġ tal-Papa għall-jum dinji tal-Paċi (1 ta’ Jannar) ta’ din is-sena: MHUX AKTAR ILSIRA IMMA LKOLL AĦWA.

F’dan il-messaġġ, fost l-oħrajn, il-Papa jgħid hekk:

Huwa, l-Iben il-Maħbub (cfr Mattew 3,17), ġie biex jurina l-imħabba tal-Missier lejn l-umanità.  Kull min jisma’ l-Evanġelju u jwieġeb għas-sejħa tal-konverżjoni, għal Ġesù jsir «ħija, oħti u ommi» (Mattew 12,50) u għalhekk iben adottiv ta’ Missieru (cfr Efesin 1,5).

Il-Messaġġ jikkonkludih hekk:

Nafu li Alla jitlob lil kull wieħed u waħda minna: «X’għamilt b’ħuk?» (cfe Ġenesi 4,9-10).  Il-globaliżżazzjoni tal-indifferenza, li llum ittaqqal il-ħajja ta’ tant ħutna, titlob minna li nsiru atturi ta’ globaliżżazzjoni tas-solidarjetà u tal-fraternità, biex lil dawn il-vittmi ntuhom lura t-tama u biex, mimlijin bil-kuraġġ jerġgħu jibdew it-triq fost il-problemi ta’ żmienna bil-prospettivi ġodda li jġib miegħu u li Alla jqegħedilna f’idejna.

 

It-tlett punti li għandom  joħorġu minn din il-laqgħa huma:

1. Meta tgħammidna? Nfittxu u niftakkru din id-data, biex niftakru li aħna mgħammdin u parti minn Knisja.
2. Għandna kontinwament insaqsu lilna nfusna: «X’għamilt b’ħuk?». Bl-imġieba tiegħi, qiegħed nieħu ħsieb lil ħija jew lil oħti?
3. Infittxu d-diskorsi u l-messaġġi tal-Papa. Dawn nistgħu nsibuhom fuq www.laikos.org.
   • Iklikkja hawn biex issib il-messaġġi tal-Papa.