Għaliex Kristu ttrasfigura ruħu? Biex nifmhu dan l-ewwel irridu nifmhu il-kuntest li dan l-episodju seħħ fih. Ftit qabel Ġesù saqsa lill-Appostli:

“Min jgħidu n-nies li hu Bin il-bniedem?”  U huma weġbuh: “Xi wħud, Ġwanni l-Battista; oħrajn, Elija; u oħrajn, Ġeremija jew wieħed mill-profeti.” Imma intom min tgħidu li jien?” staqsiehom. U qabeż Xmun Pietru u qallu: “Inti l-Messija, Bin Alla l-ħaj.” Mt 16:13-16

Ġesù jgħidlu:

“Inti Pietru, u fuq din il-blata jiena nibni l-Knisja tiegħi, u s-setgħat ta’ l-infern ma jegħlbuhiex.” Mt 16:18

Ftit wara Ġesù jħabbar il-mewt tiegħu u Pietru  qallu:

            “Allaħares, Mulej! Ma jkun qatt li dan jgħaddi minn għalik!” Mt 16:22

Ġesu jgħidlu:

            “Itlaq minn quddiemi, ja xitan! Int tfixkil għalija, għax m’intix tqis il-ħwejjeġ ta’ Alla, imma qiegħed taħsibha ta’ bniedem li int!” Mt 16:23

Dan iffisser li Pietru ma kienx fehem il-pjan ta’ Alla. Dawk li segwew lill-Ġesù kien qed jistennew Messija gwerrier. It-Trasfigurazzjoni ġiet f’dan il-kuntest. L-appostli kienu mħawdin. Mingħalihom kienu qed isseqgwu messija gwerrier u Ġesù qed jippreżentalhom Messija qaddej: Messija li se jmut. Hawnhekk naraw li ma kienu qed jifmhu xejn. Allura t-trasfigurazzjoni kienet oportunità oħra biex l-appostli jifmhu Hu min kien u x’ġie jagħmel fid-dinja.

     F’din is-silta naraw kif Ġesù: tala’ fuq il-muntanja biex jitlob. U ġara li huwa u jitlob, id-dehra ta’ wiċċu tbiddlet u l-ilbiesi tiegħu saru ta’ bjuda li tgħammex. Tajjeb li naħsbu fuq dan sew għax meta nitolbu u nkunu fil-preżenza t’Alla, aħna nistgħu ninbiddlu għat-tajjeb.

      Hawnhekk naraw ukoll kif Ġesù qed juri d-divinità tiegħu lill-Appostli. Jidhru miegħu ukoll Mosé u Elija. Dawn qed jirappeżentaw il-Liġi u l-Profeti.

     Il-Papa Franġisku fid-diskors li għamel fl-egħluq tal-ħajja konsagrata qal li l-liġi hija r-regola, u l-profezija hija l-missjoni. Kultant aħna nimxu iktar mar-regola, u r-regola toħnoq il-missjoni. Ma jfissirx li r-regoli huma ħżiena imma r-regoli waħdehom ma jiswew xejn.

     Hawnhekk qed naraw Messija tal-liġi u l-profeti; il-Messija qaddej; u dak li qalu l-liġi u l-profeti se jsib l-milja tiegħu fil-qofol tal-Missjoni (il-Qadi) tal-Messija: Ġesù.

     Ftit wara Pietru ried jibni tlett tined. Hawnhekk l-evanġelista jgħid li Pietru ma kien fehem xejn. Wara li raw dan kollu xorta ma fehmux.

     Aħna wkoll ħafna drabi ma nifmhux min hu l-Mulej. Nfittxuh fil-Glorja mhux fit-Tbatija; kif għamel Pietru meta ċaħdu.

     Jiena qed nifhem min hu Ġesù? Qed nifhem x’irrid minni?

Ir-risposta jtihilna l-Vanġelu stess… xħini tiġi s-sħaba u nibżgħu, għandna nisimgħu minn dak li jgħidilna l-Missier:

“Dan hu Ibni l-maħtur, lilu isimgħu!”

Għandna nieqfu nreddnu, nħarsu lejn il-Mulej u nisimgħu lilu!

Mulej irrid ngħix miegħek
dan ir-Randan,
biex nikkonverti lejk.
Nikkonverti bil-kelma Tiegħek
li tqarribna Miegħek
nikkonverti billi nagħraf
numilja ruħi
sabiex tidher Int
u mhux is-suppervja tiegħi.
Nikkonverti billi
nsum u niċċaħħad
biex nagħraf li għad
għandi kontroll fuqi nnifsi,
fuq il-ġisem tiegħi
u s-sawm jippurifikani
biex nersaq aktar ħdejk.

Nikkonverti billi nitlob
għax bid-djalogu
Miegħek biss
inkompli nimxi f’dan
il-wied tad-dmugħ.
Nikkonverti billi nkun
ta’ karità għall-proxxmu
niltaqa’ magħhom
għax fihom nara Lilek.
Nikkonverti billi ngħix kuljum
matul dawn l-erbgħin jum
ir-rieda Tiegħek.
Għinni nagħmel dan Mulej
sabiex għalija jkun Randan ta’
fidwa u konverÿjoni.

 

 

Mulej Ġesù Kristu,
int li għallimtna nħennu bħalma ħanin hu Missierna tas-Sema,
u għidtilna li min jara lilek jara lilu:
urina wiċċek u nkunu salvi.
Ħarstek mimlija mħabba ħelset lil Żakkew u ’l Mattew mill-jasar tal-flus;
lill-adultera u l-Maddalena milli jqiegħdu l-ferħ tagħhom biss fi ħlejqa;
bikkiet lil Pietru wara t-tradiment,
u wiegħdet il-Ġenna lill-ħalliel niedem.
Agħmel li kull wieħed u waħda minna jisma’ tingħad lilu
dik il-kelma li int lissint lis-Samaritana:
Kieku kont taf id-don ta’ Alla!

 

Int il-wiċċ li jidher tal-Missier li ma jidhirx,
ta’ Alla li juri s-setgħa tiegħu fuq kollox bil-maħfra u l-ħniena:
agħmel li l-Knisja tkun fid-dinja l-wiċċ tiegħek li jidher,
int li int il-Mulej tagħha, rebbieħ fuq il-mewt u glorjuż.
Int ridt li l-ministri tiegħek ikunu huma wkoll imlibbsa bid-dgħufija
biex jistgħu jħossu għal dawk li qegħdin fl-injoranza u l-iżball;
agħmel li kull min jersaq lejn wieħed minnhom
iħossu milqugħ, maħbub u maħfur minn Alla.

 

Ibgħat l-Ispirtu tiegħek u kkonsagrana lkoll bid-dilka tiegħu
biex dan il-Ġublew tal-Ħniena jkun sena ta’ grazzja tal-Mulej
u l-Knisja tiegħu b’ħeġġa mġedda tista’ twassal lill-foqra l-bxara t-tajba,
tħabbar il-ħelsien lill-imjassrin u l-maħqurin, u d-dawl mill-ġdid lill-għomja.

 

Dan nitolbuhulek bl-interċessjoni ta’ Marija, Omm il-Ħniena,
int li tgħix u ssaltan flimkien mal-Missier u mal-Ispirtu s-Santu
għal dejjem ta’ dejjem.

Ammen.

 

40 Jum

 

 

Mulej irrid ngħix miegħek

dan ir-Randan,

biex nikkonverti lejk.

Nikkonverti bil-kelma Tiegħek

li tqarribna Miegħek

nikkonverti billi nagħraf

numilja ruħi

sabiex tidher Int

u mhux is-suppervja tiegħi.

Nikkonverti billi

nsum u niċċaħħad

biex nagħraf li għad

għandi kontroll fuqi nnifsi,

fuq il-ġisem tiegħi

u s-sawm jippurifikani

biex nersaq aktar ħdejk.

Nikkonverti billi nitlob

għax bid-djalogu

Miegħek biss

inkompli nimxi f’dan

il-wied tad-dmugħ.

Nikkonverti billi nkun

ta’ karità għall-proxxmu

f’dawk li ser

niltaqa’ magħhom

għax fihom nara Lilek.

Nikkonverti billi ngħix kuljum

matul dawn l-erbgħin jum

ir-rieda Tiegħek.

Għinni nagħmel dan Mulej

sabiex għalija jkun Randan ta’

fidwa u konverżjoni.

12 ta’ Frar 2016

 

Il-Premju Żagħżugħ tas-Sena 2015 organizzat mill-Moviment Kerŷgma din is-sena intrebaħ mill-grupp Joy Boys mill-Għarb, Għawdex.  Ir-rebbieħ tal-premju, li huwa sponsorjat minn APS Bank, ġie mħabbar mill-President tal-Moviment Kerŷgma, is-Sinjura Tania Borg.

Il-preżentazzjoni tat-trofew saret mill-Eċċellenza Tagħha Marie-Louise Coleiro Preca, President ta’ Malta, fi tmiem ta’ quddiesa li saret fil-Knisja ta’ San Duminku r-Rabat, il-Ġimgħa, 12 ta’ Frar 2016.  Preżenti wkoll għal din iċ-ċerimonja kien hemm ir-raġel tal-President is-Sur Edgar Preca, il-Prof. Emanuel P. Delia, Ċermen tal-APS Bank li sponsorjaw l-okkażżjoni u s-Sinjura Tania Borg, President tal-Moviment Kerŷgma, Dr George Hyzler Ċerman tal-Board tal-Għażla u mistednin oħra.

“ Joy Boys huwa grupp ta’ żgħażagħ, ta’ bejn is-sittax u t-tletin sena, mwielda l-Għarb.  Żgħażagħ li bla dubju jmissu qalb kulħadd għal ħidma u l-impenn tagħhom fil-volontarjat b’mod speċjali r-residenti ta’ l-Għarb bil-modi ta’ impenji li juru lejn kulħadd.

Dan il-grupp ta’ żgħażagħ tista’ tgħid li jmiddu jdejhom għal kollox b’mod partikolari xogħol ta’ l-idejn.  Fil-ħin liberu tagħhom jagħtu servizz fil-bżonnijiet fil-knisja, iċ-ċentru parrokkjali u xogħol fil-maħżen tal-armar tal-festa, iffukati fuq xogħol ta’ restawr fuq l-armar tal-festa tar-raħal.  Dan jinkludi brix, żebgħa, manutenzjoni fuq l-armar kif ukoll jagħmlu ‘fiber glass’ li jieħu ħafna ħin ta’ xogħol ta’ paċenzja u dedikazzjoni iżda fuq kollox xogħol li jitlob attenzjoni minn l-att ta’ saħħa.  Kull meta tkun se ssir xi attivita’ fir-raħal dawn ikunu minn ta’ l-ewwel li jagħtu daqqa t’id biex kollox jimxi ħarir.  Ta’ sikwit jorganizzaw ikliet u attivitajiet għal fundraising biex imbagħad il-flus imorru f’ħafna manutenzjonijiet li jsiru fir-raħal b’mod partikolari għall-manutenzjoni taċ-ċentru parrokkjali.  Dan iċ-ċentru huwa t-tieni dar għaż-żgħażagħ tal-lokalita’ fejn isirilhom laqgħat ta’ informazzjoni spiritwali, attivitajiet u ħafna aktar sabiex dawn iż-żgħażagħ jkollhom opportunitajiet li jiltaqgħu f’ambjent sabiħ u li jkollhom iċ-ċans li jitgħallmu aktar.

Kif tkun qed toqrob il-festa tar-raħal dawn iż-żgħażagħ jinsew kollox biex ikunu jistgħu jiffokaw fuq l-armar, manutezjoni u ħafna aktar li għandu x’jaqsam magħha.  Dan jolqot armar fil-knisja ta’ ġewwa u ta’ barra, armar madwar ir-raħal,  attivitajiet oħra u ħafna aktar.  Ta’ min jgħid li dawn iż-żgħażagħ kollha għandhom l-impjieg tagħhom u għalhekk iqattgħu l-bqija tal-ħin tagħhom jaħdmu.  Xi drabi jibqgħu jaħdmu matul il-lejl.  Tista’ tgħid li kważi biddlu l-bozoz kollha għal dawk LED u saru wkoll fistuni ġodda.  Ħafna drabi jagħmlu xogħol ta’ armar fejn bosta drabi ikunu fil-għoli u jkun ta’ periklu.

Fis-sajf li għadda, dan il-grupp għamel esperjenza missjunarja ġewwa l-Albanija, fil-parroċċa

ta’ Dun Manwel Cutajar jisimha Torovice.  Hemmhekk iż-żgħażagħ tal-Għarb wettqu xogħol ta’ kostruzzjoni u manutenzjoni fi djar ta’ 3 familji fost l-ifqar tal-Albanija.  Prinċipalment dan kien jinkludi kisi u żebgħa tal-ħitan tad-djar, installazzjoni tas-sistema tal-elettriku u f’każ minnhom kisi tal-art.  L-ispejjeż għal din il-kostruzzjoni tħallsu mid-donazzjonijiet li ġabru mil-parruċċani tal-Għarb.  Dawn iż-żgħażagħ ħadmu bla heda.  Ta’ min isemmi li f’ġurnata minnhom dawn għaġnu b’idejhom 17-il xkora kisi u 5 xkejjer siment.

Huma ppreparaw ukoll u qassmu 150 hamper b’ikel bażiku għall-ifqar fost il-fqar tal-Albanija.  Fost l-oħrajn dan kien jinkludi ross, għaġin, dqiq u żejt.  Il-hampers tqassmu f’raħal mitluf ġol-muntanji magħruf bħala Malecaj-Kampi, post li fil-passat kien kamp ta’ konċentrament.  Dawn il-hampers li ma jiswew xejn għalina huma kollox għalihom.

Huma rregalaw ukoll baqra lill-mara armla fqira ta’ 38 sena, mara li sofriet ħafna mir-raġel tagħha meta kien għadu ħaj.  Din il-baqra li tiswa €700, ġiet iffinanzjata minn familja mill-Għarb Għawdex u ser tkun ta’ għajnuna kbira għall-għixien ta’ din il-mara miskina u l-erba ulied tagħha.

Iz-żgħażagħ irregalaw wkoll 8 nagħġiet li jiswew €500 biex koppja oħra jkollha biex tgħajjex lil 4 uliedha.

Huma żaru ukoll dar li tospita persuni b’diżabilità severa mmexxija mis-Sorijiet ta’ Madre Tereża, fir-raħal ta’ Shkoder.

Dan il-grupp ta’ żgħażagħ bla dubju ma jieqaf qatt.  Il-kalendarju ta’ attivitajiet għas-sena 2016 jinsab preparat u mimli daqs bajda.  Uħud mill-attivitajiet ikunu fundraising u oħrajn attivitajiet filantropiċi kemm fil-komunita’ parrokkjali u anke oħrajn f’istituti barra l-lokalita’.  Wara l-esperjenza fil-missjoni fl-Albanija dan il-grupp ta’ żgħażagħ iħares ‘il quddiem għall-esperjenza oħra, fejn il-grupp jinsab ċert li oħrajn ser jakkumpanjawhom.  L-esperjenza fl-Albanija ħalliet impatt pożittiv fuqhom spiritwalment u soċjalment u b’mod speċjali fuq il-popolazzjoni fqira ta’ l-Albanija.  Iż-żgħażagħ fi ħdan dan l-grupp issibhom dejjem lesti għal kull eventwalita’ sabiex iwettqu kull xorta ta’ xogħol fil-volontarjat u jwettqugħ b’dedikazzjoni u impenn kbir.”

Iż-żgħażagħ nominati għal dan il-Premju kienu: Gabriel Cassar minn Kirkop, Nicholas Cassar miż-Żebbuġ Għawdex, Joy Boys mill-Għarb Għawdex, Nikita Mizzi mill-Birgu u l-Oratorju Salesjan Sliema.

Dan it-trofew jingħata kull sena f’ġieħ il-mejjet Dr Rudolph Saliba li kien l-ewwel president tal-Moviment Kerŷgma.  Is-Sinjura Marie-Louise Coleiro Preca ferħet lill-rebbieħa, l-finalisti l-oħra u l-Moviment Kerygma għall-organizzazzjoni ta’ dan l-avveniment annwali fejn jesponu il-ħidma volontarja ta’ tant żgħażagħ. Qalet li l-iktar ħaġa importanti mhux li tagħti l-flus iżda li tagħti mill-ħin tiegħek biex tgħin lill-oħrajn, ħin li qatt ma jistax jiġi rkuprat. Hija qalet li x-xogħol volontarju jittrasforma l-persuna li tagħmlu imma speċjalment is-soċjetà nnifisha f’pajjiż li għandu bżonn kbir tal-valur tal-imħabba. Għalkemm għal grazzja ta’ Alla aħna m’għandniex gwerer, ġirien qrib tagħna huma għaddejjin minn ħafna konflitti u żminijiet diffiċli ħafna b’familji sħaħ għaddejjin minn tant tbatija u telf, bażikament minħabba l-riżultat ta’ l-egoiżmu.  Għalhekk huwa importanti ħafna li aħna nkomplu nsaħħu l-valur tal-imħabba għall-oħrajn anke fis-soċjetà tagħna li qed tiffaċċja sfidi kbar.  Hemm il-possibbiltà li jiġri lilna wkoll li l-egoiżmu jikber u ninsew it-tbatija ta’ ħaddieħor.  Għalhekk huwa  importanti li dawn iż-żgħażagħ ikomplu jgħinu lill-oħrajn u b’hekk jibdlu s-soċjetà tagħna.  Dan il-valur tal-imħabba għall-oħrajn kien mgħoddi lilna minn missirijietna u huwa importanti li jkompli jikber u jissaħħaħ u li aħna ngħaddu dawn il-valuri lill ġenerazzjonijiet futuri.  Hija temmen li hemm ħafna li qed jgħinu f’dan ir-rigward u għalhekk hi awgurat lil finalisti li qatt ma jieqfu jagħtu daqqa t’id-oħrajn fil-bżonn.

Evanġelju ta’ San Luqa 5: 1-11.

Għan-nies tal-qedem il-baħar kien il-post fejn jgħammru l-ispirti ħżiena u l-qawwiet tal-ħażen. Ix-xbiha ta’ bniedem maħkuk mill-ħażen kienet għalhekk xbiha ta’ bniedem maħkum mill-qawwiet tal-ħażen li joħduha kontra Alla u li jwasslu għat-telfien ta’ dejjem. Meta Ġesù qal lill-appostli li se jagħmilhom sajjieda tal-bnedmin, kien se jafdalhom il-ħidma li jsalvaw lin-nies mill-ħakma tad-dnub u tal-ħażen u jwassluhom għall-ħelsien ta’ wlied Alla. Il-ħidma tas-salvazzjoni li Ġesù kien irċieva mingħand missieru, issa kien qiegħed jagħtiha lil Pietru li min-naħa tiegħu kien qiegħed iwassalha għall-Knisja kollha.

Fl-evanġelju tal-lum Ġesù qiegħed jistedinna biex nieħdu sehem minn din il-Knisja. Sabiex inkunu sajjieda tal-bnedmin, jeħtieġ li l-ewwel Alla juri lilu nnifsu lilna. Hu se jurina t-triq u jagħtina l-qawwa.

Jeħtieġ li Alla jagħtina r-rigal tal-fidi li fih Alla hu l-aktar qaddis u l-aktar għoli u fi Kristu jagħtina sehem mill-għerf u l-qdusija tiegħu. Jeħtiegħ imbagħad nagħrfu li aħna midimbin. Il-gwaj hu li huma ħafna dawk in-nies li ma jammettux li huma midimbin u jagħżlu li aktar iwaħħlu f’ħaddieħor u jippuntaw subgħajhom lejhom. Bħala bnedmin għandna bżonn nagħrfu li filwaqt li weħidna m’aħna kapaċi nagħmlu xejn; ma’ Ġesù aħna nkunu kapaċi nagħmlu kollox.

Nemmnu li Kristu qiegħed fostna u jgħammar fina? Kienu diversi d-dixxipli li bdew jimxu wara Ġesù imma kienu ftit dawk li kienu lesti jibdew jitfgħu ix-xbiek, li jikkommettu ruħhom għal din il-missjoni ta’ Ġesù. Sabiex tkun sajjied tajjeb, trid tkun ippreparat tajjeb u l-istess biex tkun sajjied tal-bnedmin, irridu nkunu ppreparati. F’din is-sajda tal-bnedmin, irid ikun Ġesù li jmiss il-qlub tan-nies u mhux aħna biss li se naħdmu għas-saltna t’Alla. Il-Mulej tana s-setgħa però l-qawwa irridu nġibuha mingħand Alla. Kull wieħed u waħda minna għandna d-doni u t-talenti tagħna u ta’ kullħadd huma differenti, però kull wieħed u waħda minna għandna l-missjoni tagħna u aħna msejħin sabiex naqduha. Irridu nkunu xhieda ta’ Kristu fix-xogħol tagħna, hu x’inhu. Irridu nkunu xhieda ta’ Kristu mill-mod li bih ngħixu, bl-attitudni tiegħek u bi kliemek. In-nies li niltaqgħu magħhom kuljum huma l-missjoni tagħna; żgur li mhux bilfors li mmorru x’imkien fil-missjoni. Bħala nsara irridu nimxu fit-triq li Ġesù pprepara għalina.

 Irridu nibdew mid-dar tagħna stess, mat-tfal pereżempju, li forsi rridu nikkoreġuhom biex ikomplu mexjin fit-triq it-tajba. Irridu nintervjenu meta xi ħadd qiegħed iwassal messaġġ ħażin. Kullħadd għandu din il-missjoni u m’għandniex naqtgħu qalbna li nidhru koroh jew jidħaq bina b’dak li qed nagħmlu. J’Alla meta niltaqgħu ma’ Alla wiċċimbwiċċ ma’ Alla wara ħajjitna fuq din l-art ma jgħidilniex li ma jafniex għaliex ma nkunux wettaqna dak li ħejja għalina hu mal-oħrajn.

Tajjeb li bħala bnedmin ma nħallux l-istejjer negattivi biss jinfluwenzawna. Jeżistu però ħafna stejjer pożitttivi li aħna mdawra bihom. F’din is-sena ddedikata mill-Papa Franġisku għall-ħniena tajjeb li naraw kemm hu mportanti li nuru ħniena ma’ dawk ta’ madwarna. Huma ħafna dawk li jipprattikaw il-ħniena kuljum, fil-familji, fuq ix-xogħol u kullimkien. L-insara jridu jkunu kapaċi jirriflettu fuq dak li qed jagħmlu. Dan jista’ jsir b’mod speċjali bil-kelma t’Alla, mhux bil-quddiesa biss. Tajjeb li nsibu ftit ħin kuljum li fih nużaw il-Kelma t’Alla biex ikollna t-trankwillità ħalli naffaċċjaw il-ħajja tagħna bl-għajnejn ta’ Ġesù. Irridu nidraw nintelqu f’idejn ir-rieda t’Alla.

Ġesù lil Pietru qallu biex jixħet ix-xibka fil-fond, jiġifieri f’post fejn m’hemmx sodizza u m’hemm xejn ċert. Ejjew nilbsu n-nuċċali ta’ Ġesù ħalli naraw dak li qiegħed iseħħ madwarna bl-għajnejn ta’ Ġesù. Il-fond li semma’ Ġesù huwa l-qtiegħ il-qalb u l-problemi ta’ kuljum; Ġesù jridna nitfgħu ix-xibka tiegħu f’dawn l-abbissi, f’dawn il-problemi li niltaqgħu magħhom. It-talb għandu jkun l-għodda tan-nisrani biex ngħinu lil dawk ta’ madwarna. It-talb u l-Kelma t’Alla għandhom ikunu l-għodda li permezz tagħhom inwettqu din il-missjoni ta’ Ġesù. Bħall-appostli rridu ngħidu x’għamel Alla f’Ibnu Ġesù.

Kwotazzjoni: “Christian witness is concrete, words without actions are empty.” (Ix-xhieda nisranija hija konkreta u b’saħħitha, kliem mingħajr azzjoni huma vojta). Papa Franġisku.

Talba: Mulej Ġesù, agħtini d-dawl u d-dehem biex infittex biss dak li jibnini bħala dixxiplu tiegħek u li naħrab dak kollu li jfixkilni, iħawwadni u jaqtagħni minnek. Ammen.

F’ Prayer Café nhar id-29 ta’ Jannar tkellimna  dwar il-Qari tal-Ħadd 31 ta’ Jannar, f’Malta biss se jitratta fuq dwar in-Nawfraġju ta’ San Pawl. Ġurnata għażiża għalina l-Maltin b’mod speċjali għax kienet il-bidu tal-fidwa tagħna lejn il-fidi nisranija. Huwa privileġġ li isem taċ-ċkejken pajjiżna jissemma fi ktieb daqshekk Kbir! Ma nafx intom imma jien jaqbadni xewk xewk nisma lil isem pajjizi jissemma f’dan il-pasaġġ. L-aktar tkun f’xi pajjiż barrani jkollok aptit tqum tgħajjat ‘ Oi jien Malti! ’

Wara li lkoll ħadna kikkra kafe, nġbarna billi għidna t-Talba tal-Moviment u nqara  l–pasaġġ tat-tieni qari mehud mill-Atti 27:16-28,6 passaġġ pjutost twil li juri kif il-poplu Malti qaleb għar-reliġjon Nisranija.

Dawn li ġejjin huma xi punti li ssemmew dwar x’laqatna f’dan il-passaġġ. Ssemma li kif meta l-lifgħa gidmet id Pawlu u dan ma ġralu xejn naraw li l-Maltin ndunaw li kien hemm xi ħaġa sopranaturali f’Pawlu.

Fuq il-ġifen Pawlu ma kienx imdawwar b’insara, anzi b’suldati Rumani u priġunieri oħra. Imma hu bla ebda biża’ xorta qasam it-twemmin tiegħu magħhom: “..dal-lejl deherli  Anġlu ta’ dak Alla li tiegħu jien u li lilu nqim, u qalli, ‘Tibżax, Pawlu…..Alla tak il-ħajja ta’ dawk kollha li qegħdin jivjaġġaw miegħek. ..”  U huma f’sitwazzjoni ta’ baħar u mewt semgħuh, emmnuh. Setgħu qabduh u tefgħuh il-baħar dak il-ħin imma emmnuh. Mhux  hekk biss imma hu “qabad il-ħobż, radd il-ħajr ‘l Alla quddiem kulħadd qasam u beda jiekol.”  F’dak l-abissi li kienu fih San Pawl jaddi l-messaġġ tiegħu u jikkonforthom bih! Tant emmnuh li meta nduna li xi baħrin kienu qed jipprovaw jaħarbu mill-ġifen qatgħu l-ktajjen u ħallew d-dgħajsa titlaq għal riħa. Pawlu li hu marbut mar-rieda t’Alla – jorbot it-tama t’Alla fih u jaddiha lil oħrajn.

Niesu stess li kienu jafu min hu Alla ma emmnuhx lil Pawlu u kemm il-darba riedu jaħtfuh …imma f’dan il-passaġġ naraw kif kemm il-ġentili ta’ fuq il-ġifen u l-barbari  li laqgħuh fuq l-art emmnuh.

U llum qegħdin naċċettawh l-messaġġ ta’ Ġesu?  Bil-paroli u r-reliġjożita ngħidu iva kieku – mmorru l-quddies , quddiesa nhar ta’ Ħadd ma nitilfuhiex, nqerru, nitqarbnu, imma x’ħin niġu biex niddiskutu l-emigranti llegali? X’TAĦSBU? Nibdew nqasqsu hemm? Kieku ġie San Pawl llum – konna nilqgħuh jew nerġgħu nibgħatuh lura minn fejn ġie! Il-Maltin ta’ dak iż-żmien mhux li ma aċċetawhomx imma nsibu “Laqgħuna tajjeb…qabdulna ħuġġieġa…”. Sa ftit żmien ilu konna niftaħru bihom dawn il-frazijiet. Imma llum għadna poplu ospitabli? Jew ospitabli għal ġinġlin biss jew għal dawk li jġibulna l-flus f’pajjiżna? L-oħrajn le, le għax huma ta’ piż fuqna u saħansitra ssib lil min juża r-reliġjon  bi skuza biex nibgħatuhom lura għax inkella dawn se jkaxkruna!! U l-Papa Franġisku jipriedka l-ħniena mal-foqra!!

Lura għal passaġġ. Nsibu l-frazi “.kien ilhom erbatax-il ġurnata sajmien … tlifna kull tama li nsalvaw…” min jaf f’liema stat fiżiku kienu! Pero nsibu li San Pawl qalilhom “lanqas xagħara waħda mhi se tintilef.” X’konvinzjoni ! Xi twemmin dak! L-erbatax-il ġurnata tfakkarna fl-erbatax- il jum li l-poplu Lhudi għamel qabel l-mogħdija tal-Anġlu. U dawn l-erbatax-il ġurnata mhumiex il-mogħdija ta’ Malta? F’San Luqa 12:7 nsibu “ U intom, sa x-xagħar ta’ raskom, kollu magħdud..” Xi sbuħija din il-Kelma t’Alla! Kif jagħqad kollox flimkien.

Problema li jista’ jkollna f’dan it-test hu li nintilfu fir-romantiċiżmu tiegħu… Ara Malta!

Il-baħar fil-kuntest bibliku ħafna drabi għandu kuntest negattiv jew denomiku. Din it-tempesta u dan il-ġifen għaddej minn fuq it-tempesta nistgħu nqabbluh mal-ħażen li jrid jibla’ kollox . Mat-taqbid li niltaqgħu miegħu fil-ħajja ta’ kuljum. “Wara li xebgħu ,bdew iħeffu l-ġifen u jwaddbu l-qamħ il-baħar.” Bl-iskop biex isalvaw l-ġifen. (Ma kienx xi ġifen ckejken, kellu “mitejn u sitta u sebgħin” persuna fuqu.) Kultant aħna wkoll jkollna narmu din it-tagħbija tagħna biex insalvaw. Tkun iebsa..deċizzjoni iebsa, biex tarmija imma neċesarja jekk trid isalva. Nogħqodu attenti ma nintrabtux mal-valur materjali u ngħerqu bih b’kollox.Għax imbagħad jintilef dak li għereq u aħna miegħu.

San Pawl ħeles mill-għarqa … l-missjoni tiegħu kienet għadha ma spiċċatx. Il-konverzjoni tagħna waħda minnhom. Il-kapaċita t’Alla li joħloq il-grazzja mid-disgrazzja. Kemm hi kbira l-providenza t’Alla. Fl-ewwel qari mill-ktieb tal-Għerf 14:3 nsibu “ O Missier, bil-provvidenza tiegħek inti tmexxih(il-bniedem). ” Provvidenza divina fil-kuntest bibliku ħafna drabi meqjusa bħala l-ħaġa li fuq kollox hemm Alla u jekk Alla jrid jagħmel l-ġid b’xi ħaġa lanqas erbatax-il ġurnata ta’ baħar jibla’ l-art mhu se jwaqqfu.

Ir-Rebħa ta’ Kristu fuq id-dnub u fuq il-mewt u fuq ix-xitan ma jista’ jwaqqafha xejn. Għamilt x’għamilt il-ħniena t’Alla li qed niċċelbraw din is-sena hija kbira ħafna. Alla ma jgħejja qatt iħenn. Aħna ngħejjew  nitolbu dik il-ħniena, jew ix-xitan jaqtalna qalbna. Imma l-provvidenza t’Alla hija kbira – dak li għalina ma jagħmilx sens – dak li narawh jikrolla quddiem għajnejna li jkollna nduru fuq il-Mulej u nistaqsu; ‘ Imma għaliex Mulej? Għaliex it-tajjeb ibgħati u l-ħażin jirnexxi?  U hija iebsa meta tara lil xi ħadd jiġi minnek f’qiegħ ta’ sodda magħkus b’xi marda. Irridu nintelqu f’idejn il-Mulej għax jekk hemm xi  ħadd li vera jħobbna huwa Hu. Forsi l-ġenituri tagħna imma anke dik qed tirrokka llum! L-imħabba tiegħu immensa.

Dak li rebaħ Ġesu għalina jiżboq kull forza tal-ħażen. Ġesu li ma kien jonqsu xejn kif kien jgħid San Pawl lil Filippini, Hu ftaqar kompletament għalina biex isalvana,  ġie fostna u mill-bidu sal-mewt  ħlief kuntrarju ma rax. Imbagħad aħna nippretendu li kollox  għandu jiġina sew? Li taċċetta r-rieda t’Alla mhux dejjem hija faċli.

Il-qofol ta’ dan il-passaġġ hu “Tibżax, Pawlu. Jeħtieġ li inti tidher quddiem Ċesari; ara Alla tak il-ħajja ta’ dawk kollha li qegħdin jivjaġġaw miegħek. Mela qawwu qalbkom, ġbieb. Jien nemmen f’Alla li hekk isir, sewwa sew kif tħabbar lili. Jeħtieġ iżda li naħbtu ma gżira.” “Jien nemmen f’Alla li hekk isir” – il-fidi ta’ San Pawl kienet kbira. L-istess San Pawl li 15/20 sena qabel kien jgħix skond il-preċetti tal-liġi tal-Lhud u kien jaħseb li permezz bihom hu se jiġi meħlus..iżda issa narawh jara s-salvazzjoni tiegħu permezz tal-fidi bħal ma jgħid il-Galatin.

“Jeħtieġ iżda li naħbtu ma’ gżira.” Ma qalx se naħbtu ma gżira jew se ninkaljaw ma gżira qal JEĦTIEĠ. Għaliex jeħtieġ ? Xi trid minna Mulej? Imma żgur li meta xi ħadd jgħid jeħtieġ hu sinjal li għandu xi ħaġa f’moħħu.  

Bħal meta fil-passaġġ li smajna l-ġimgħa l-oħra Ananija ddubita meta l-Mulej qallu jieħu ħsieb lil San Pawl wara li waqa’ fit-triq ta’ Damasku; qallu ‘Mulej dan ġie hawn biex iħarbatna’ U l-Mulej qallu ‘Mur Ananija għax minn dan se nagħmel għodda prezzjuża għalija u jeħtieġ li jbati għalija. Kellu pjan Alla.

Għaliex JEĦTIEĠ? Nitolbu fuqha l-aħwa għax tinkludi lilna lkoll li nissejħu Maltin. Il-kburija li semmejna fil-bidu għax hemm isem pajjizna fi ktieb daqshekk importanti l-BIBBJA, ġġib magħha responsabilta. Jekk San Pawl ġieu  ħallielna teżor sabiħ jeħtieġ nipproteġuh u nwassluh.

Hawn inqara l-vanġelu tal-Ħadd mehud minn Mk 16:15-20 fejn insibu l-Mulej jibgħat lill-appostli tiegħu jxandru l-Bxara t-Tajba  lill-bnedmin kollha. Dan hu li Ġesu jrid minna “Morru fid-dinja kollha, xandru l-Bxara t-Tajba lill-ħolqien kollu.”  Dan ma jfissirx li rridu nsiefru iżda jfisser li rridu nagħtu xhieda tal-fidi tagħna ma dawk li niltaqgħu magħhom f’ħajjitna –jalla l ezempju tagħna jkun xhieda ta’ dik il-ħtieġa li l-Mulej ra fin-Nawfraġju ta’ San Pawl. Mela nitolbu biex kull wieħed minna jinduna x’jeħtieġ il-Mulej minnu.

Quote: Min jagħmel it-tajjeb mhux dejjem apprezat.

(Ma għandniex naħsbuha darbtejn meta hemm bżonn ta’ kelma jew azzjoni tajba għandna nagħmluha għax dan hu mod ieħor kif aħna nxandru l-bxara tal-vanġelu. )

Il-laqgħa ntemmet bit-talba tal-Missierna.