Il-laqgħa bdiet bit-Talba tal-Moviment.

Dak li qed jiġri fl-Ewropa, qed jolqot lilna wkoll. Dak li ġara elfejn sena ilu qed jiġri llum.

Waqt  li l-Lhud kienu qed jiċċelebraw l-Għid, sallbu lill-Messija li kienu ilhom tant jistennew. Ħajjithom kienet ibbażata fuq din l-istennija. Imma meta ġie, sallbuh. U naraw l-Appostli jitħawdu, jibżgħu u jinqaflu ġewwa.

F’dak li qed jiġri llum, hemm min qed jipprova jniżżel in-nisrani fil-katakombi, qed jgħid lin-nisrani “Int relegat. Taħseb x’taħseb, żommu għalik”

Elfejn sena ilu l-Appostli ħarġu miċ-Ċenaklu u bdew ixandru l-Kelma t’Alla, għax quddiem Alla, il-verita’ biss tgħodd. Ġesu’ qal “Min jiċħad Lili quddiem il-Missier, Jiena niċħdu.” Sentenza iebsa!

Is-sitwazzjoni li ħassew l-Appostli dak iż-żmien, jista’ jkun li qed inħossuha aħna wkoll. In-nies qed jonqsu mill-knisja. Elfejn sena ilu ġara hekk ukoll. L-Appostli qalu lil Ġesu’ “Qed jitilqu”. U Hu qalilhom “Tridux tmorru intom ukoll?” L-istess statistika tal-lum hi l-istess ta’ dak iż-żmien.

It-tagħlim ta’ Ġesu’ huwa ħafif, imma tqil biex tipprattikah. Illum indunajna li l-isteering ta’ dak li nemmnu aħna jista’ jdur. Aħna mhux id-dover tagħna li niġġudikaw lil ħaddieħor, imma aħna obbligati li nimxu fuq it-tagħlim nisrani. Sfidi ħa jkollna, bħal ma kellhom l-Appostli. Kien hemm minnhom min ċeda, u llum ukoll jiġri l-istess. Inċedu għall-pressjoni ta’ żmienna.

Qed ngħixu żmien il-Għid, li għandu jkun is-sena kollha, għax aħna l-poplu tal-Qawmien. Bejn it-tebut u l-Qawmien hemm “Tumas” – jien! Tumas ried jara l-affarijiet konkreti. Ġesu’ wrieh il-feriti. Dawk huma l-feriti tal-Knisja llum. Dawk li qed immissu llum. Għalhekk qed ngħixu bħal ma għexu l-appostli dak iż-żmien. Dawk ma waqfux mal-mewt ta’ Ġesu’, għax Hu tahom l-Ispirtu s-Santu, l-istess bħalma ta lilna fil-Magħmudija u fil-Griżma, l-istess Spirtu li ħadu l-Appostli elfejn sena ilu.

Jekk inħarsu lejn il-kmandamenti, dawn huma l-pilastri li jmexxu kull sistema legali fil-pajjiż – la toqtolx, la tisraqx, etc. Dawn kollha huma legalizzati. Fil-kmandamenti m’hemm xejn li jeħodha kontra l-ebda stat. Kull stat demokratiku jimxi fuq dawn il-pilastri. Pero’ llum qegħdin f’sitwazzjoni fejn hemm min qed iħoss li għandu jiftah. Il-piż ta’ dan hu jrid iġorru. Aħna, bħala nsara, il-piż tagħna hu li nimxu fuq il-prinċipji tagħna.

L-Appostli tħawdu, imma fl-aħħar, meta għarfu lil Ġesu’, ħarġu minn hemm u spiċċaw martri. Ġuda ppretenda xi ħaġa differenti minn Ġesu’, mill-Knisja. Aħna m’għandniex infittxu lil Alla fl-affarijiet ta’ din id-dinja. Aħna għandna nkunu dak il-poplu li nemmnu li għandna l-Ispirtu s-Santu fina. Aħna rridu nagħmlu d-differenza. Għax fl-aħħar mill-aħħar, ruħna rridu nsalvaw, u dik ta’ min aħna responsabbli – iż-żgħar – għax l-Evanġelizzazzjoni minn hemm trid tibda. Din hi l-missjoni tagħna.

Jekk aħna ħa noqogħdu għall-pressjoni, bħal ma kellhom l-Appostli dak iż-żmien, ħa nispiċċaw ninżlu fil-katakombi – li tkun nisrani żommu għalik! Id-differenza li rridu nagħmlu aħna hi li ngħixu ħajja differenti fid-dawl tal-Iispirtu s-Santu. It-tagħlim tagħna nġibuh mill-Kelma t’Alla.

L-Appostli m’emmnux mill-ewwel li Ġesu’ kien qam. Infatti Hu talabhom ħuta u kielha quddiemhom, għax ħasbuh xi fantażma. Illum li tippreżenta xi ħadd li jqum mill-mewt mhix faċli, meta kollox jiġi ppruvat bix-xjenza.

L-ewwel Appostli taw xhieda. Ħarġu mill-biża’. Qatlulhom lil Ġwanni u lil Ġesu’ għax dejjqithom il-verita’. Ġesu’ kien avżhom “Għad titħawwdu”.

Aħna rridu nkunu l-insara llum. Ma nistgħux inkunu nsara tat-tradizzjonijiet. Qed inkunu konkreti? Parir nisimgħuh? L-Evanġelizzazzjoni trid tkun bil-mod kif ngħixu aħna. Irridu nżommu sħiħ mat-twemmin tagħna. Ġesu’ ssallab għall-imħabba li jħallina fil-liberta’. U qegħdin insallbuh aħna llum. Ġesu’ ħa dan kollu fuqu biex jagħtina l-maħfra.

Aħna, bix-xhieda tagħna, rridu nagħmlu d-differenza, jiġri x’jiġri. Aħna nafu li d-dagħa, l-abort huwa dnub. Għandi nitkellem fejn għandi nitkellem, bir-rispett u l-imħabba. Għandi d-dritt u l-obbligu li nsemma leħni. Kulħadd irid iġorr il-piż tiegħu.

Hawnhekk sar intervent fuq il-moviment Kerygma. Dan twaqqaf tletin sena ilu biex jiġbor in-nies għal impenn nisrani fis-soċjeta, permess ta’ talb u formazzjoni. Hemm bżonn iktar minn qabel li nevanġelizzaw. Hu x-xogħol ta’ kulħadd. Imma din tibda billi niffurmaw u ninfurmaw irwieħna biex niffurmaw lil ħaddieħor. Qed tiġi diskussa l-liġi dwar l-IVF. Nafu x’inhi? Nafu x’inhu l-iffriżar tal-embrijuni? Jekk int m’intix infurmat sew, ser tibla’ kollox, tifhem u ma tifhimx! Irridu nkunu nsara konvinti – favur il-ħajja. Imma kemm jien infurmat biex nikkomunika – mal-familjari, fuq il-post tax-xogħol, għand tal-ħanut, mall-ħbieb?

Irid ikollna impenn kristjan fis-soċjeta’. Irridu formazzjoni reliġjuża qawwija – anke medika , soċjali, etċ – għalina u għall-oħrajn. U din tibda mid-dar. Meta tkisser il-valuri nsara, tkisser is-soċjeta’ – bħal boomerang tiġi lura fuqek, fuq il-familja, fuq is-soċjeta’, fuq il-pajjiż. Meta aħna naħsbu li sirna allat, it-tisbita tkun għall-infern. Niftakru li ruħna għandha prezz infinit – il-prezz li ħallas għalih Ġesu’!

Għalhekk għandna nibdew mill-familja, għax hemm jiġu miżrugħa l-valuri. Id-dar hi l-ewwel knisja.

Ġesu’ qal “Ikun l-Ispirtu tal-Mulej li jitkellem permezz tagħkom”

Il-laqgħa għalqet bit-talba tal-Missierna.

Il-laqgħa Prayer Cafè tal-21 t’April kienet laqgħa formattiva dwar il-qari tal-Ħadd li jmiss 2 Ħadd tal-Għid. Wara t-talba tal-Moviment nqraw l-ewwel lezzjoni mehud mill-Atti tal-Appostli 2:42-47u l-Vanġelu minn Ġwanni 20:19-31.  Dawn li ġejjin huma xi punti li l-kelliem ta’ din il-laqgħa s-Sur Joe Huber qasam magħna waqt il-laqgħa mimlija b’tagħlim interessanti.

Il-Vanġelu ta’ nhar il-Ħadd li ġej fih ħafna elementi li jolqtuna mill-qrib: l-aspett komunitarju, l-aspett sagramentali u l-aspett tal-fidi u l-aspett missjunarju.

Immedjatament wara l-qawmien ta’ Kristu, San Ġwann jirrakkuntalna tliet dehriet ta’ Ġesù, l-ewwel waħda lil Marija ta’ Magdala fl-inħawi fejn kien midfun, dakinhar stess filgħaxija u l-oħra l-ġimgħa ta’ wara meta kien hemm ukoll Tumas.

Il-kumment kif jispiċċa dal-Vanġelu kien miżjud wara.

Jolqtok mill-ewwel il-fatt li d-dixxipli kienu mbeżżgħin, kienu ngħalqu, issakkru għax beżgħu li x-xorti li kienet misset lill-Imgħallem tagħhom, dik ta’t-tbatija u l-persekuzzjoni, issa kienet se tasal għalihom ukoll.  Kienu għadhom neqsin mill-fidi sakemm wasal Ġesù f’nofshom.

Kienu għadhom ma fehmux kliemu meta kien ħabbrilhom dak li kellu jiġri minnu.  Nafu li San Luqa 24, 25 lid-dixxipli ta’ Għemmaws, kien ċanfarhom bl-ikraħ: “kemm intom boloh u tqal biex temmnu kulma qalu l-profeti”.

Ġesù jsellem lid-dixxipli bil-paċi u wriehom il-pjagi: il-Papa Franġisku itenni bosta drabi, li Ġesù li jinterċedi għalina dejjem quddiem il-Missier, jurih il-pjagi u jgħidlu: dawn sofrejthom minħabba fihom ilkoll.  Il-pjagi fil-ġisem mistiku ta’ Ġesù issa huma timbru, “trade mark” il-prova inkotrovertibbli ( jiġifieri li ma tista’ tmeriha bl-ebda mod), li kien hu, li qam li qed ikellimhom.  Mill-ġrieħi kollha li sofra waqt il-passjoni dawk kienu l-uniċi marki li kien għad fadallu.

Immedjatament wara t-tislima Ġesù jinkariga lid-dixxipli biex ikomplu l-missjoni li beda hu. “Kif Missieri bagħat lili, jien nibgħat lilkom. Ħudu fuqkom l-Ispirtu s-Santu.”   Dak li beda Hu issa jrid li jkompluh l-Appostli.  Il-mandat li tahom hu biex ikunu rgħajja, imexxu l-merħla, jiġifieri aħna.  Ma jfissirx li l-obbligu tat-tixrid tal-Kelma hi tagħhom biss, hi tagħna wkoll.

San Ġwann itina deskrizzjoni eżatta tat-twaqqif tas-Sagrament tar-rikonċiljazzjoni: id-dnubiet ta’ dawk li taħfru jkunu maħfura u d-dnubiet ta’ dawk li żżommu jkunu miżmuma.  Din l-aħħar affermazzjoni hi oġġett ta’ diskussjonijiet kbar fost it-teoloġi. Il-verità hi li ma jistax ikun hemm maħfra jekk ma jkunx hemm indiema.  Jew min jersaq għar-rikonċiljazzjoni jrid ikun niedem sew minn dnubietu. Minkejja d-dgħufija għax nerġgħu naqgħu, irridu nkunu determinati li nagħmlu ħilitna biex bl-għajnuna t’Alla nbiegħedu minn xulxin l-okkażjonijiet li fihom nerġgħu naqgħu fl-istess żbalji.

Id-dehra ta’ Kristu imlitilhom qalbhom bil-ferħ u kliemu serrħilhom rashom sakemm bil-miġja tal-Ispirtu s-Santu huma mtlew bil-kuraġġ biex il-Kelma u l-Aħbar ma jżommuhiex għalihom imma jmorru jxandruha mal-erbat irjieħ tad-dinja magħrufa ta’ żmienhom.

Hawnhekk nidħlu aħna.  Il-missjoni mogħtija lid-dixxipli baqgħet għaddejja minn ġenerazzjoni għal oħra u waslet għandna bid-dmir li nħalluha lil ta’ warajna.

Il-Papa Franġisku spiss jagħmel dil-mistoqsija: imma fil-kuntest tal-ħajja tal-lum nista’ nagħti xhieda u nwassal l-Aħbar meta aħna mdawwrin bil-mondanità, bil-preġudizzji, bir-relattiviżmu, bis-sekulariżmu sfrenat?

Jekk aħna għandna l-fidi u fidi soda, irridu naċċettaw li l-kisba ta’ dak li ġabilna Kristu bil-passjoni, il-mewt u l-qawmien tiegħu ma jiġix mingħajr tbatija.  It-tbatija tbeżżgħana.  Insibuha aktar faċli nikkonformaw ma’ dak li jdawwarna milli li nibqgħu sodi u ggranfati mat-twemmin tagħna quddiem iż-żebliħ u l-inġustizzji.

Irridu ninsew li nistgħu ngħixu ħajja fuq żewġ saffi, waħda privata u oħra pubblika.  In-Nisrani jrid ikun konsistenti f’imġiebtu f’kull ambjent li jkun fih.  Il-passjoni, il-mewt u l-qawmien għalina jfissru xita ta’ grazzji li ma nistgħux inżommuhom għalina imma rridu naqsmuhom mal-oħrajn.

Meta ngħid mal-oħrajn infisser anki ma’ min ma jaqblix magħna, ma’ min għandu twemmin differenti minn tagħna.  L-agħar eżempju li nistgħu nagħtu hu li meta nitkellmu ma’ min ma jaqblilx magħna nuru li qed nitkellmu bil-preġudizzju.

Eżempju: fil-mezzi tal-komunikazzjoni soċjali tara spiss Insara (suppost) li juru preġudizzji kbar kontra l-Musulmani… l-ideja li l-istudenti Musulmani jkollhom il-faċilità li jitgħallmu r-reliġjon tagħhom anki fl-ambjenti tagħna.  Kemm rajna kliem ta’ tmaqdir kontra l-Arċisqof għax qal li mhux kontra!!  Saħansitra kien hemm min ried jiġbor il-firem biex jitneħħa.  Dik karità Nisranija?!

It-tweġiba jtihilna mill-ġdid il-Papa straordinarju li għandna:  Nafu li jiġbed ammirazzjoni kbira minn Musulmani li huma Musulmani awtentiċi?  Nies rashom sħuna hemm fosthom, bħalma kif għidna hemm fostna.

Il-fanatiżmu mhux reliġjon.  Fuq hekk il-Papa Franġisku jiġbed l-ammirazzjoni ta’ ħafna bnedmin li mhumiex Kattoliċi għax jagħmel distinzjoni bejn il-fundamentaliżmu u r-reliġjon.  Anzi, kien hemm saħansitra mexxejja Musulmani li ddikjaraw li l-fundamentalisti m’għandhomx reliġjon.

Mhux biżżejjed.  Kemm fil-passat għamilna ħsara lil xulxin bejnietna li nistqarru lil Kristu, bejnietna l-Insara?  Imma l-paċi li ġab Kristu, il-paċi li sellem biha lid-dixxipli meta dehrilhom wara li qam, tinkiseb biss bit-talb u d-djalogu.

Albert Storace kien kellimna dwar ir-Riforma Protestanta.  Il-Luterani u l-Kattoliċi fil-passat ma kienux jintaħmlu bejniethom, anzi missirijietna għamlu ħafna ħsara lil xulxin.

Xi ħadd kien jemmen li wara l-Konċilju Ekumeniku, u f’tant qasir żmien, id-djalogu kellu jwassal biex il-Kattoliċi u l-protestanti jiċċelebraw flimkien il-500 sena mill-bidu tar-Riforma?

Lejn l-aħħar ta’ Marzu saret laqgħa msejħa mill-Kunsill Pontifiċju tax-Xjenzi Storiċi li fiha saret diskussjoni dwar ir-Riforma fil-kuntest taż-żmien li seħħet fiha.

Meta ltaqgħu mal-Papa kliemu kien li l-passat ma nistgħux nibdluh imma l-preżent hu f’idejna u jekk irridu nibqgħu mexjin ‘il quddiem lejn l-għaqda rridu nkunu umli u ninsew dak li għadda biex inħarsu biss ‘il quddiem.

Jekk ma naħfrux u nitolbu l-għajnuna tal-Ispirtu s-Santu nistgħu nitħabtu għax “jekk il-Mulej ma jibnix id-dar għalxejn jitħabtu l-ħaddiema”, jibda s-Salm 127.

Dal-ħsieb jerġa’ joħodna lura lejn il-Vanġelu ta’ nhar il-Ħadd li ġej: biex naħfru l-ewwel irridu nkunu maħfura aħna bis-sagrament li waqqaf Sidna Ġesù b’dak li qal lid-dixxipli meta dehrilhom  wara l-qawmien.

Is-sagrament tar-rikonċiljazzjoni ma jfissirx biss li aħna nirrikonċiljaw ma’ Alla imma li nirrikonċiljaw ukoll magħna nfusna.

Ftit ilu l-Papa qal li l-qrar mhux ‘dry cleaning’. Nara li għandi tebgħa, immur inneħħiha u kif noħroġ niltaqa’ ma’ xi ħadd u nibda natqtaq fuq dak u l-ieħor, fuq dik u l-oħra.

Il-qrar hu laqgħa ma’ Alla u l-atturi tiegħu la huma s-saċerdot (dak hu biss medjatur) u lanqas il-penitent, imma hu Kristu Rxoxt bil-qawwa tiegħu li jaħfer lil kulħadd, saħansitra lil min sawwtu, immaltrattah u qatlu.

Nemmnuh dan?  Jew aħna San Tumasijiet?, għandna d-dubji u rridu l-provi konkreti kif qed isostnu l-materjalisti u s-sekularisti li jidħku bihom infushom għax mingħalihom se jaslu jagħtu prova xjentifika tal-misteru tal-univers?

Kemm-il San Tumas hawn fostna?, li rridu mmissu b’idejna u naraw b’għajnejna minflok ma ngħixu l-beatitudni li żidilna Ġesù fil-laqgħa tal-Ħadd ta’ wara ma’ Tumas: “Emmintni għax rajtni! Imberkin dawk li ma rawx u emmnu.”

Dan hu l-aspett tal-fidi li joħroġ minn dal-Vanġelu.  Nistaqsu: x’inhi l-fidi?  Hi twemmin mingħajr ma rajt, mingħajr ma missejt b’idejja, li Alla hu dejjem fidil mal-patt tiegħu.  Fit-testment l-antik wiegħed is-salvazzjoni u żamm kelmtu meta bagħat lil Ibnu bniedem bħalna f’kollox minbarra d-dnub, biex imut għalina u jsalvana.

Il-fidi hi dak li jispjegalna San Pietru fl-ewwel ittra tiegħu meta jikteb:

“Għalhekk għandkom għax tifirħu mqar jekk issa, għal ftit żmien ieħor, jeħtiġilkom toqgħodu għal ħafna provi. Bħalma d-deheb, li jintemm, jgħaddi mill-prova tan-nar, hekk tgħaddi mill-prova l-fidi tagħkom biex ikun jistħoqqilha tasal għat-tifħir, għall-glorja, u għall-ġieħ, meta jidher Ġesù Kristu. Lilu, għalkemm ma rajtuhx, intom tħobbuh; fih, għad li issa m’intomx tarawh, intom temmnu; fih intom tifirħu b’ferħ glorjuż, li ma jistax jitfisser, waqt li tiksbu l-frott tal-fidi tagħkom, li hu s-salvazzjoni ta’ ruħkom.”

Ma nistgħux ninsew ukoll li dal-Ħadd, huwa wkoll il-Ħadd tal-Ħniena Divina, festa li kif nafu kien waqqafha San Ġwanni Pawlu II.   Dan il-Ħadd huwa magħruf ukoll bħala Dominica in Albis, isem li ġej mill-antik meta l-katekumeni li kienu jkunu rċevew il-Magħmudija fl-Għid kienu jilbsu libsa bajda u jibqgħu biha sal-Ħadd ta’ wara meta jneħħuha.  Fil-fatt l-isem eżatt hu Dominica in albis depositis – il-Ħadd meta jitneħħew l-ilbiesi bojod.

Lura għall-punt: lil Santa Fawstina Ġesù qalilha biex propju dal-Ħadd ikun dedikat lill-ħniena bla qies tiegħu.  Il-ħniena tidher propju fis-sagrament tar-rikonċiljazzjoni għax anki jekk dnubietek ikunu ħomor daqs l-iskarlatt isiru bojod bħas-silġ, jurina b’liema mħabba ħabbna u fdiena Ġesù Bin Alla.

Tant Ġesù għandu għal qalbu din it-tifkira li lil Santa Fawstina kien qalilha: Min jersaq lejn l-għajn tal-ħajja- jiġifieri l-Qrar u l-Ewkaristija – jikseb il-maħfra sħiħa ta’ dnubietu u tal-pwieni.

Ġesù kien żied jgħidilha li l-bniedem ma jistax isib paċi sakemm ma jafdax lilu nnifsu għal kollox fil-ħniena tiegħu.

Dawn l-istqarrijiet ta’ Ġesù x’messaġġ ituna bħala komunità Nisranija?

Il-Papa Franġisku fir-Regina Coeli tal- 5 ta’ Mejju 2014 kien qal: illum il-qari mill-Atti tal-Appostli jurina li anke fl-ewwel snin tal-Knisja kienu jinqalgħu t-tensjonijiet u n-nuqqas ta’ qbil.  Fil-ħajja dejjem se jkun hemm il-konflitti, il-problema hi kif inġibu ruħna quddiemhom.  Sa dak iż-żmien l-għaqda fost l-insara kellha vantaġġ għax kienu lkoll tal-istess razza, u kellhom ilkoll l-istess kultura, dik Lhudija.  Imma meta l-Kristjaneżmu, li skont ir-rieda ta’ Ġesù hu għall-ġnus kollha, infetaħ għad-dinja Griega (jiġifieri għal kulħadd), din l-uniċità fir-razza u fil-kultura tispiċċa, u jibdew jidhru l-ewwel diffikultajiet.  Hemm tfeġġ il-qrusa, jibda t-tgergir, xi wħud jibdew jgħidu li hemm il-preferenzi u li s-servizz ma jsirx għal kulħadd l-istess.  Dan jiġri anke fil-parroċċi tagħna, fil-familji tagħna, fiċ-ċrieki tal-ħbieb, fl-ambjenti tax-xogħol u tad-divertiment!  L-għajnuna tal-komunità lill-persuni fil-bżonn – romol, orfni u fqar ta’ kull tip –, tidher li ssir aktar bil-qalb mal-insara li ġew minn fost l-Ebrej milli mal-oħrajn.

F’dal-Ħadd b’dal-Vanġelu u b’dak li nfakkru, il-Knisja qed issejħilna biex nigglorifikaw il-ħniena bla tarf ta’ Alla u nwiegħdu li nersqu lejn is-Sagrament tal-Qrar b’umiltà u bil-fidi, bir-rieda li ma nidinbux aktar mhux bil-forzi tagħna waħedna, li huma dgħajfa ħafna, imma bl-għajnuna li jtina Hu, aħna u nistqarru dnubietna u nħabbtu fuq sidirna x’ħin nirreċitaw l-att tal-indiema. ‘Mea culpa.’

L-aktar ħaġa importanti hi li l-akbar proponiment li nistgħu nagħmlu meta nqerru hu li kull fejn inkunu nġibu ruħna bħala nies ta’ paċi, ta’ rikonċiljazzjoni u ta’ djalogu għax kif ngħidu bil-Malti hu l-eżempju li jkaxkar.

“Mulej tiegħi u Alla tiegħi” stqarr Tumas wara li emmen għax ra u mess b’idejh.  Stqarrija ta’ fidi sħiħa għax ra biex emmen.  Din il-ġakulatorja ntennuha regolarment waqt il-konsagrazzjoni meta minkejja li naraw ħobż u nbid, nemmnu bil-fidi li hemmhekk hemm il-veru Ġisem u Demm ta’ Kristu, ħaj u veru.

L-Ewkaristija u l-Qrar huma l-għajn tal-ħajja tagħna u r-riżoluzzjoni li għandna nagħmlu aħna u nirriflettu fuq dal-Vanġelu, hi li nersqu bl-umiltà u l-fiduċja lejn dawn l-għejun biex nixorbu ħalib u għasel bla ħlas u bl-abbundanza.

L-Atti tal-Appostli huma l-kontiwazzjoni tal-missjoni mibdija minn Kristu.  Fihom naqraw fl-ewwel qari tal-liturġija tal-Ħadd li ġej li d-dixxipli kienu jżommu sħiħ mat-tagħlim tal-appostli, kienu magħqudin behniethom, jaqsmu l-ħobż u l-ħtiġijiet u jitolbu flimkien.  Dawn huma l-erba’ ingredjenti li jagħmel n-Nisrani awtentiku. Ma nistgħux ngħidu li aħna nibbrillaw f’kull aspett minn dawn imma l-impenn tagħna biex nipperfezzjonaw dawn l-erba’ ingredjenti tan-Nisrani veru hi t-triq li twassalna għall-ħajja vera, mhux dik li tispiċċa hawn fl-art imma dik li tibda meta l-eżistenza fiżika tagħna tintemm biex nibdew il-ħajja li qed naħdmu għaliha, il-ħajja ta’ dejjem flimkien ma’ Kristu li sar bniedem bħalna biex jeħodna miegħu fid-dar tal-Missier.

Il-laqgħa ntemmet bit-talba tal-Missierna u bi stedina għal ġimgħa oħra għall-laqgħa oħra ta’ Prayer Cafè. Din id-darba se tkun immexxija minn Fr Hayden Williams li se jkellimna dwar il-Madonna ta’ Fatima. Nistennewkom : )

Il-laqgħa Prayer Cafe tas-6 ta’ Mejju bdiet bil-qari tal-vanġelu tal-Ħadd ta’ wara mehud minn Lq 24:46-53. Il-Ħadd 8 TA’ Mejju ċċelebrajna t-Tlugħ ta’ Sidna Ġesu Kristu fis-sema. Dan ir-rakkont insibuh fl-evanġelji kollha barra ta’ San Ġwann. L-aħjar prezentazzjoni ta’ din il-ġrajja nsibuha fl-Atti tal-Apostli. F’dan ta’ l-aħħar nsibu li Ġesu tela’ s-sema wara 40 jum mill-Qawmien mill-mewt tiegħu.

Xi tifsira għandha għalina din il-Festa? Din mhijiex sempliċiment tifkira ta’ ġrajja imma qed niftakru f’misteru – dan il-fatt nistqarruh fil-Kredu: ‘Nemmen…..mat-tielet jum qam minn bejn l-imwiet; tela’ fis-smewwiet,..’ u li l-appostli huma xhieda tagħha. Mela rridu naċċettawha bħala fatt storiku li dan Ġesu ħalla d-dinja u daħal fis-saltna t’Alla; eżatt kif ma nafux, l-appostli sempliċiment qalu ‘tela’ s-sema’.

Sfortunatament llum qegħed tidħol l-ideja li din il-ġrajja għandha x’taqsam ma l-aljeni..ma xi UFO s! Ħafna skolaru u professuri qegħdin jippreżentaw dawn il-ġrajjiet f’dan id-dawl. Wieħed minn dawn studjuż tal-Ebrajk; jgħid li skond hu ċerti kliem mill-bibbja ġew tradotti differenti mit-tifsira vera tagħhom. Dan il-bniedem barra li jagħmel ħafna konferenzi f’universitajiet,  ħareġ diversi kotba fuq is-suġġett u ħaġa tal-iskantament eluf ta’ nies qegħdin isegwuh. Dan prattikament qiegħed jgħid li Alla ma jeżistiex u li l-Bibbja ma titkellimx fuq Alla imma titkellem fuq Aljeni. Ħafna reliġjonijiet fosthom il-Kattoliċi u l-Musulmani traduċew il-kelma Elohim plural ta’ Eloah bħala Alla imma dan qiegħed jgħid li tfisser Aljeni. Għalkemm ħafna minna narawha bħala fantaxjenza, ħafna adoloxxenti l-aljeni huma fatt ovvja li jeżistu. Għandek diversi channels fuq it-televixin jitkellmu dwar dan bħal Discovery Channel, National Geographic Channel, Prehistory Channel.. u anke fuq diversi siti tal-internet. Aħna bħala ġenituri nsara rridu noqgħodu attenti li ma nħallux lill-uliedna jibilgħu kulma jisimgħu mingħajr provi. Hemm ukoll sensiela sħiħa ta’ ċinema bbażati fuq dan is-suġġett. Aktar ma naraw minnhom aktar hemm ċans li xi ħaġa se jeħel fl-imħuħ li jarawhom. Dieħla ideja li it-Tlugħ ta’ Ġesu fis-sema seħħet qisha xi ġie xi UFO u ħadu x’imkien miegħu!  Segwiti ta’ dawn is-siti, ħafna minnhom tfal u adoloxxenti jaqbżu l-miljun. Mela bħala ġenituri responsabbli għandna nakkumpanjaw lil uliedna f’dak li jkunu qegħdin jaraw.

Il-misteru tat-Tlugħ fis-sema tal-Mulej rridu narawh f’kuntest sħiħ. Rridu naraw kif dan Alla ċekken lilu nnifsu u sar bniedem – ħa sehem fil-ħajja tagħna – biex b’hekk aħna wkoll nieħdu sehem fil-ħajja tiegħu – imbagħad hu reġa’ tela’ s-sema.  Ġesu huwa Alla li sar bniedem biex mbagħad aħna  nieħdu sehem fin-natura Divina tiegħu. Il-Fidi nisranija hija bbażatha fuq dan – li aħna rridu li ħajjitna  ssir tixbah lil ta’ Ġesu Kristu. Aktar  ma ħajjitna tkun tixbah lil ta’ Ġesu aktar il-qalb tagħna tkun miftuha biex Hu jammar ġewwa fina. Dan hu l-qofol tat-twemmin tagħna! IŻDA llum ħafna drabi qiegħed jiġri bil-kontra. Ħafna drabi mhuwiex Alla li jinżel ħdejna imma aħna rridu nniżluh għal-livell tagħna. Dan ma nagħmluhx bid-dagħa biss, imma wkoll meta  nagħmluh ħabib, qisu sieħbi li mmur nixrob flixkun birra miegħu! Veru li Alla ċċekken imma Hu ALLA li jiċċeken u mhux aħna nċeknuh! Hawn irreferejna għal ġrajja meta Ġesu ħasel saqajn l-appostli ..Pietru tfantas..tfantas għax Pietru kien għaraf min hu Ġesu! Imma Ġesu qallu li jekk ma jħallihx jaħsillu saqajh ma kienx se jkollu sehem miegħu. Għal dan Pietru wieġeb : “ Mhux biss saqajja izda, idejja u rasi ukoll.” Ġesu qal ‘Inthom tgħidu li jien l-Imgħallem tagħkom u sewwa qegħdin tgħidu, mela li jien l-Imgħallem tagħkom u qdejtkom; hekk ukoll tridu tagħmlu intom bejnietkom.’

Għandna tendenza li lil Alla nċekknu l-qawwa tiegħu …huwa Alla li fl-imħabba kbira li għandu lejna huwa ċekken lilu nnifsu – huwa Hu li jgħollina ‘l fuq mhux aħna ngħollu lilna nfusna ‘l fuq qisna xi allat! Għandna tendenza llum li nċekknu lil Alla bil-mod kif nitrattawh bla biżgħa ta’ xejn. M’hawnx biżgħa għal dak li hu sagru t’Alla. Dan jidher bil-mod kif inġibu ruħna fil-knejjes tagħna..meta mmorru għal quddies nidħlu l-knisja b’sens li dħalna f’post sagru? Aħna u telgħin biex nitqarbnu nkunu miġburin u ngħarfu min Hu dak li ġej ġewwa fina! Meta naddu minn quddiem Ġesu sagramentat, nagħmlu reverenza bħala sinjal ta rispett jew qas nafu x’inhi!!  Sforunatament dan is-sens ta’ sagru llum qegħdin nitlifuh u qegħdin nieħdu lil Alla ‘for granted’. Qiegħed jidħol sens ta’ suppervja – jew dan Alla se jaqbel ma li ngħidlulu, se jaqbel mal-kapriċċi tagħna jew inkella se ntellquh ‘l barra. F’dinja materjalistika ġibna dak li hu sagru fix-xejn!

Alla ċċekken biex jgħolli lilna; id-dnub waqqana u Kristu għollina… mela aħna rridu nħallu ‘l Alla hemm fuq u naċċettaw l-fatt li niżgħel sar bniedem bħalna imma hu jibqa ‘l fuq minna. Mela jiena rrid nħalli lil dan Alla jgħollini mhux jiena ngħolli lili nnifsi. Anke f’relazzjonijiet ta’ bejnietna – l-prosit għandna nħallu lil oħrajn jagħtuhilna. Ma nistgħux la nniżlu lil Alla u wisq anqas nagħmlu lilna nfusna allat! Ma nistgħux nibqgħu nimxu f’isem tal-kuxjenza u nimxu kif jogħġob lilna. Meta l-knisja titkellem fuq il-kuxjenza tkun qegħda tirreferi għal kuxjenza ffurmata – il-vuċi t’Alla f’qalb il-bniedem u mhux dak li jiftlilna moħħna. Qegħdin nħallu l-Kelma t’Alla idawlilna qalbi, nħalluha turina x’inhu tajjeb jew ħażin? Jew AĦNA rridu niddeċiedu? Ejjew nagħrfu dan il-misteru u nħallu lil Alla jaħdem fina.

Il-laqgħa tkompliet b’din il-kwotazzjoni :

Fil-ħidma appostolika mhux biżżejjed il-qawwa tagħna, ir-riżorsi tagħna, l-istrutturi tagħna, għalkemm dawn kollha huma neċessarji.  Mingħajr il-preżenza tal-Mulej u mingħajr il-qawwa tal-Ispritu tiegħu, xogħolna, għalkemm ikun organizzat tajjeb, ma jħalllix frott.  Għalhekk, ejjew immoru ngħidu lin-nies min hu Ġesù. (Omelija ta Papa Frangisku 1 ta’ Ġunju 2014).

Il-laqgħa ngħalqet bit-talba tal-Missierna u l-barka t’ALLA.

TITĦAWDUX U TIBŻGĦUX

Is-Sitt Ħadd tal-Għid

Il-laqgħa bdiet bit-talba tal-Moviment. Imbagħad inqara’ l-Vanġelu minn San Ġwann, kapitlu 14, versi 23 – 29.

“Il-Missier hu akbar minni”.  Din hi stqarrija li tqajjem ħafna kritika u tħassib.  Aħna nitgħallmu li fit-Trinita’, it-Tliet Persuni huma ndaqs.  Mela għalfejn Ġesù qal hekk?

Trinita’ fil-fatt hemm tnejn – it-Trinita’ tas-Sema, meta għandek Alla, fil-persuna tal-Missier, l-Iben u l-Ispirtu s-Santu fis-sema, u hemm it-Trinita’ fid-dinja – meta Ġesù ha l-libsa tagħna ta’ bniedem , u neża l-libsa ta’ Alla.  Allura sar inqas mill-Missier.  Fit-Trinita’ tas-Sema, kif kien mill-bidu, Ġesù la għandu bidu u l-anqas tmiem.  Ġesù għandu bidu biss bħala bniedem.  Bħala Alla m’għandux bidu.  Meta Ġesù jgħid “Il-Missier hu akbar minni” qed jgħid hekk għax Ġesù huwa bniedem.  Ġesù sar bniedem biex imut għalina, għax bħala Alla ma jistgħax imut.  Biex jirbaħ il-mewt, kellu jmut u jerga’ jqum.

Il-Vanġelu ta’ San Ġwann jibda bil-kelma “il-Verb”.  Hu, mill-bidu, jrid juri li Ġesù hu l-Iben t’Alla.  Filwaqt li t-tliet evanġelisti l-oħra jitrattaw ħafna fuq is-Saltan t’Alla u d-dixxipulat, San Ġwann jiffoka l-iktar fuq il-ħajja eterna.  Insibu lil Ġesù jirrelata l-hin kollu mal-Missier.  Isemmi li Ġesù mibgħut mill-Missier sittin darba.

Biex aħna nsalvaw, Ġesù għalina jrid ikun it-Triq tan-nofs.  Ġesù tana l-quddiesa biex nissieħbu miegħu fl-offerta lill-Missier.  Il-quddiesa u l-kelma t’Alla – il-Bibbja – huma ħaga waħda.  Fil-Bibbja aħna nsibu risposta għal dak kollu li niltaqgħu miegħu fil-ħajja llum, per eżempju, il-ġrajja ta’ meta Mose’ feraq l-ilma tgħallimna li għal Alla xejn ma hu mpossibli.  Fl-istorja ta’ Ġob insibu risposta għat-tbatija.

It-twemmin fil-ħajja eterna beda mill-Ktieb ta’ Danjel u laħaq il-milja tiegħu f’Ġesù.  Il-bniedem veru, li jipprova jgħix tajjeb u jħobb, ma jmutx, imma jagħlaq għajnejh għal din il-ħajja u jiftaħhom għall-ħajja eterna.  Ġesù kien ċar fuq dan meta qal “Ħejjejtilkom post għalikom”.

Hawnhekk saret riferenza għall-qawmien fl-aħħar tad-dinja u t-tifsira ta’ ġisem glorifikat – ġisem li m’għadux izjed taħt il-qawwa tad-dinja – qlibna għas-sopranatural.

Riferenza oħra kienet għall-parabbola tas-Sammaritan it-Tajjeb.  Il-qassis u l-levita ma missewx lill-midrub għax kienu sejrin it-tempju u ma riedux jitniġġsu.  Ġesù jrid jgħid x’inhu l-ikar importanti, li tħenn jew li tmur it-tempju?  L-istess ried ifisser meta qal li jekk ħuk għandu xi ħaga kontrik, ħalli hemm l-offerta u mur irranġa miegħu.

Meta Ġesù qal lil Pilatu li dik ma kenitx is-Saltna Tiegħu, hu ried ifisser li dawk ma kenux il-virtujiet Tiegħu.  Ġesù ma ġiex biex jiggieled – Ġesù ġie biex iħobb biss.  Aħna wkoll għandna din is-sejħa.  L-ewwel ħsieb tagħna għandu jkun li nħobbu u naħfru.

Ġesu’ jgħid li ħa jibgħat l-Ispirtu s-Santu, mhux biex jgħallimna xi ħaġa ġdida, għax Ġesù għamel rivelazzjoni kompluta.  L-Ispirtu s-Santu jgħina u jfakkarna f’dak li qal Ġesù u jipprofondih izjed.  L-ispirtu s-Santu għadu kuljum jgħidilna x’hemm moħbi fil-Bibbja.  Ġesù telaq biex jigi l-Ispirtu s-Santu u jkun preżenti f’kulħadd.  “M’inthomx ħa tibqgħu ltiema”.  Qabel ma miet, Ġesù tahom il-Paċi għax kien jaf li kienu ser jaqtgħu qalbhom.  Bl-Ispirtu s-Santu aħna nsiru tempji Tiegħu.  Hekk kif fit-tempju – il-Knisja – insibu l-faraġ – hekk ukoll aħna rridu nkunu ta’ faraġ għall-oħrajn.

Il-laqgħa għalqet bil-ħsieb “Għandek bzonn l-Ispirtu s-Santu biex, meta tgħejja, jimbuttak Hu” – mill-ktieb “X’għamiltli, Mulej?” ta’ Patri Elija Vella OFM.

Il-laqgħa Prayer Cafe tal-ġimgħa 22 t’April bdiet bil-qari tal-vanġelu tal-Ħadd li jmiss mehud mill-Evanġelu ta’ San Ġwann Kapitlu 13 Versi 31-33a,34-35. Dawn li ġejjin huma xi ħsibijiet li ħew diskussi waqt il-laqgħa.

Il-qari ta’ Żmien il-Għid igħaddina ta’ sikwit minn passaġġ ta’ din id-dinja li qegħdin fiha għal dik li għad irridu naslu fiha, u bil-maqlub. Ifakkarna f’dak li suppost inkunu, dak li mexjin lejh, u jurina fl-istess waqt is-sitwazzjoni tagħna f’din it-triq.  Papa Franġisku jiċċalinġjana b’mistoqsijiet fl-omeliji tiegħu ta’ kuljum biex neżaminaw is-sitwazzjoni tagħna fil-ħajja tagħna ta’ kuljum.

It-TIENI QARI tal-Ħadd li ġej mehud mill-ktieb tal-Apokalissi jitkellem dwar Ġerusalemm il-ġdid; hija l-skop tagħna l-insara. Biex tgħina fil-mixja tagħna Kristu waqqaf il-knisja; li hi magħrufa wkoll bħala l-Wiċċ ta’ Kristu Sidna; biex tmexxina għal ħajja ta’ dejjem. Barra minn hekk fl-aħħar ċena Kristu ħallilna wkoll lilu nnifsu biex nitrejjqu u ngħixu bih. Speċjalment waqt iċ-ċelebrazzjoni tal-Ewkaristija għandna niftakru li fil-quddies aħna nitqarbnu b’żewġ speċi ; bit-tqarbina tal-Kelma t’Alla u għandna t-tqarbina bl-Ispeċi u l-Ħobż. Infatti laqgħat bħal din jippreparawna għal din il-laqgħa Ewkaristika.

Dan il-vanġelu seħħ wara li Ġuda telaq mill-aħħar ċenaklu tal-Appostli ma’ Sidna Ġesu qabel il-passjoni tiegħu. Kien il-waqt li l-missjoni ta’ Ġesu f’din id-dinja kienet waslet fi tmiem tagħha. Nsibu lill-apostli bezgħana u kif turina l-istorja kif ġie l-iebes telqu kollha. Ma kienx Ġuda biss li tradih li Ġesu. Papa Franġisku jħobb isemmi l-ipokresija – ipokresija tal-Fariżej u tagħna nfusna; li faċli naraw id-difetti ta’ l-oħrajn iżda ninsew nħarsu lejn id-difetti tagħna nfusna. Infatti l-Papa jgħid li jħoss dieqa kbira meta jisma’ li l-qassisin il-kbar kienu magħluqa għall-indiema ta’ Ġuda. Dan meta nduna l-iżball tiegħu mar niedem biex jerġa jagħtihom lura l-flus li tawh imma dawn ma aċċettawhomx. Rejazzjoni li waslet lil Ġuda jitgħallaq fid-disperazzjoni tiegħu. Il-qassisin kienu moħħhom fir-regoli u xejn ma importahom mill-ħajja tal-persuna. Hawn il-Papa jrid jpoġġilna quddiem għajnejna l-ebusija tal-qalbna lejn il-midneb.

Il-qofol ta’ dan il-vanġelu hija s-sentenza; “ Se nagħtikom kmandament ġdid li tħobbu lil xulxin. ”  Qabel Kristu l-poplu Lhudi wkoll kien imsejjaħ li jħobb u jgħin  lil għajru. Fi spjega ta’ Santu Wistin dwar dan, insibu li għalkemm dan il-kmandament kien ġa jeżisti huwa ġdid biss għaliex aħna nżajna l-bniedem il-qadim u bi Kristu lbisna l-bniedem il-ġdid għax l-imħabba vera ġġeded lil kull min jismagħha. Infatti l-Mulej Ġesu kompla jgħid “Bħalma ħabbejtkom jien..” biex jgħamel għażla mill-imħabba li toffri d-dinja. Hu ħabbna bi gratwita mingħajr ma jistenna xejn lura. Alla jħobbna kif aħna. Pero hawn rridu noqgħodu attenti. Dan ma jfissirx li wieħed jista’ jagħmel dak kollu li jiġih f’moħħu..iżda l-Mulej tant jirrispettana li jagħtina l-liberta li nagħżlu aħna xi triq irridu nieħdu u jibqa’ jagħtina mumenti ta’ grazzja biex nerġgħu nirritornaw lura lejH. Id-differerenza li kien hemm bejn Ġuda u San Pietru, kienet li Ġuda mar bl-indiema tiegħu fejn il-bnedmin u fin-nuqqas ta’ ħniena mar tgħallaq;  filwaqt li San Pietru ltaqa’ mal-ħniena u l-maħfra f’għajnejn Ġesu u setgħa jkompli l-mixja tiegħu fit-triq tal-Mulej bil-waqgħat u l-qawmien kollha li għadda minnhom.

Papa Franġisku il-ġimgħa 22 t’April fl-omelija tiegħu qal li n-nisrani awtentiku jrid jħabbar bil-kelma u b’għemilu li jemmen fl-Interċessjoni u jrid jittama u jkollu fiduċja fi KRISTU.

L-ewwel patt li għamel Alla kien ma Mose patt ta’ Liġi biex jgħin lil-poplu Lhudi hu u għaddej fil-mixja tiegħu lejn l-art imwegħda. Aħna wkoll bil-miġja ta’ Kristu ġejna mwegħda Ġerusalemm ġdida. L-ġenna. Filwaqt li fi żmien Mose l-għadu kienu jtemmuh bix-xabla issa aħna għandna kmandament ieħor dak li irridu nħobbu l-għadu tagħna. Mhix faċli. Kristu jrid Imħabba altruwista.

Se nagħtikom kmandament ġdid   tqanqal eċċitament ta’ stennija għal ġdid. Aħna meta mmuru nismgħu l-quddies qiegħdin immorru b’din l-antiċipazzjoni għal Kelma t’Alla? Kif qegħda tgħolqotna fil-ħajja personali tagħna ta’ kuljum? X’ħin noħorġu mill-Knisja qegħdin inkomplu bħal qabel? Morru biss bi tradizzjoni jew isir bdil ġenwienament ġewwa fina?

Bil-grazzja tal-Ispirtu s-Santu naslu li nħobbu lil xulxin bħalma ħabbna Ġesu. Il-veru mħabba huwa l-qagħdi. Infatti din is-silta tal-vanġelu mehuda mit-test li jibda bil-ħasil tar-riġlejn. Niftakru li Ġesu ħasel anke s-saqajn ta’ Ġuda avolja kien ġa jaf li kien se jitraddih. X’lezzjoni għalina lkoll! X’messaġġ ! Anke bid-dnubiet tagħna jkun hemm mumenti li aħna wkoll sirna Ġuda għal Kristu għal dak il-mument ngħidulu warrab ‘l hemm. Imma HU li jaf kemm aħna dgħajfa ħallielna rimedju biex nerġgħu mmorru lura għandu – ħallielna s-sagrament tar-Rikonċiljazzjoni, li jerġa jqarribna lejn Alla l-Missier. Hemm bżonn li nerġgħu nibdew nagħtuh l -importanza li jistħoqlu għax m’aħniex nersqu biżżejjed lejn dan is-sagrament. Permezz tiegħu nħossu t-tgħannieqa tal-Missier kif  dejjem jgħid Papa Franġisku. Infatti fit-talba tal-Ħniena tal-Ġublew insibu: “Int ridt li l-ministri tiegħek ikunu huma wkoll imlibbsa bid-dgħufija biex jistgħu jħossu għal dawk li qegħdin fl-injoranza u l-iżball; agħmel li kull min jersaq lejn wieħed minnhom iħossu milqugħ, maħbub u maħfur minn Alla.” Aħna lkoll midinba. Konfessur tajjeb jwasslek biex issib l-paċi u lil Alla. Meta tħossok maħfur tista taħfer lil ħaddieħor. Din hi l-mediċina li għandna bżonn biex infejqu r-ruħ. Din hi l-Elizir tagħna l-insara li biex nifhmu dan il-kmandament il-ġdid – li nħobbu lil xulxin bħalma ħabbna Hu – rridu nagħtu importanza lis-sagrament tar-Rikonċiljazzjoni.

Wara din l-ispjega nqrat kwotazzjoni minn ta’ Mother Theresa: “ Xerrdu l-imħabba kull fejn tmorru. Tħallu lil ħadd jiġi għandkom mingħajr ma jitlaq aktar ferħan.”

Il-laqgħa ngħalqet billi għidna t-talba tal-Missierna flimkien.

     Il-laqgħa Prayer Cafè tal-Ġimgħa 15 t’April, iffukat fuq il-Vanġelu tar-Raba’ Ħadd tal-Għid jiġifieri is-silta minn kapitlu 10 tal-Evanġelju ta’ San Ġwann, versi 27 sa 30. F’dan il-Vanġelu, Ġesù jgħid li hu bħala r-ragħaj tagħna, jagħtina l-ħajja ta’ dejjem. Pero biex insalvaw aħna rridu nibqgħu sodi u nibqgħu mexjin warajh. Dan nistgħu nagħmluh billi npoġġu l-kelma tiegħu fil-prattika. Jekk nisimugħha biss u ma ngħixuhiex ma nistgħux nsalvaw. Il-fatt li nafu li Ġesù se jsalvana, (jekk nimxu warajh) iħallina ngħixu fit-tama, għax wara t-tbatija ta’ din il-ħajja se jkollna qawmien ġdid.

     Dan il-ħsieb itina ferħ u sigurta’ f’din il-ħajja. Veru li f’din il-ħajja ġieli nkunu qed ngħixu sitwazzjonijiet diffiċli ħafna pero tajjeb li niftakkru fil-kliem ta’ Kristu stess:  “Jien magħkom sal-aħħar taż-żmien”. Għalhekk jekk mmutu fil-grazzja t’Alla nesperjenzaw stat tal-akbar hena, għal dejjem.

     Domanda li tqajmet waqt il-laqgħa kienet: jeżisti l-infern? Aħna rridu nimxu mal-katekiżmu tal-knisja u dan jgħid li teżisti l-ġenna u jeżisti l-infern; pero ma għandniex ninsew li hemm il-kompassjoni t’Alla. Is-salib ta’ Kristu huwa garanzija. Id-demm ta’ Kristu itina garanzija li aħna salvi u għandna post fil-ġenna. Aħna nitilfu dan il-post jekk nirrifjutaw din is-salvazzjon jekk nagħmel għażla kontra Alla u naqtgħu qalbna mil-ħniena t’Alla. L-għan ta’ Ġesù hu li aħna mmorru l-ġenna imma mbagħad iħalli l-għażla f’idejna. Fl-istess ħin, aħna ma aħna ħadd biex niġġudikaw min sejjer il-ġenna jew l-infern; dan jista’ jagħmlu Alla biss.

    Fl-aħħar mill-aħħar tajjeb niftakkru li Ġesù ġie fid-dinja biex ifittex in-nagħġa l-mitlufa; il-black sheep. Meta Ġesù jerfa nagħġa fuq spallejh, ma jerfax l-iktar nagħġa bajda, safja u nadifa iżda jerfa’ n-nagħġa li ntilfet; n-nagħġa li rribellat; n-nagħġa atteja; in-nagħġa li kienet prostituta’; u dawn in-nagħaġ il-mitlufa jistgħu jsalvaw u jsibu l-ħajja ta’ dejjem qabel dawk li sippost qed jgħixu ħajja tajba.

Evanġelju tat-3 Ħadd tal-Għid (Sena Ċ): Ġw 21, 1-19

[Ġw:21:1] Wara dan, Ġesù raġa’ deher lid-dixxipli ħdejn il-baħar ta’ Tiberija. Dehrilhom hekk:

Bil-verb ‘deher’ l-Evanġelista Ġwanni juri li kien se jseħħ avveniment kbir. Li Ġesù deher kienet diġà xi ħaġa straordinarja imma li ‘reġa’ deher tfisser li kien hemm relazzjoni ta’ Ġesù mad-dixxipli tiegħu wara l-qawmien. Tfisser ukoll li Ġesù jagħti każ tad-dettalji, bħal meta deher lill-appostli u Tumas ma kienx preżenti u d-darba ta’ wara meta reġa’ deher lill-appostli Ġesù sejjaħ  lil Tumas biex idaħħal sebgħu fil-kustat tiegħu ħalli jemmen li huwa verament l-Iben ta’ Alla. Il-fatt li Ġesù reġa’ deher lid-dixxipli għat-tielet darba ifisser ukoll li jagħti ħafna aktar minn ċans wieħed; Ġesù jimxi bil-pass tagħna, ma jiġġudikaniex u jippretendi affarijiet ‘il barra mill-personalità tagħna.

[Ġw:21:2] Xmun Pietru, Tumas, li jgħidulu  t-Tewmi, Natanjel minn Kana tal-Galilija, ulied Żebedew u tnejn oħra mid-dixxipli tiegħu kienu flimkien,

Pietru u s-sitt dixxipli l-oħra ħarġu miċ-ċenaklu u marru lura għall-ħajja tagħhom ta’ qabel, tas-sajd. Ġesù bil-mewt u l-qawmien tiegħu kien għadu ma messilhomx qalbhom u biddilhom. Niftakru kif anke d-dixxipli t’Għemmaws ma kinux għarfuh qabel il-qsim tal-ħobż.

Ġesù deher lil komunità (kienu sebgħa min-nies, in-numru perfett) u mhux individwu waħdu. Din tfakkarna meta Ġesù qal li fejn hemm tnejn jew tlieta miġbura f’ismu hemm hu jkun f’nofshom.

[Ġw:21:3] u Xmun Pietru qalilhom: “Sejjer nistad.” Qalulu: “Ħa niġu miegħek aħna wkoll.” Marru, rikbu  d-dgħajsa, u dak il-lejl ma qabdu xejn.

Wara ‘lejl’ ta’ sajd waħidhom ma kienu qabdu xejn. Niftakru f’Luqa 5,1-11 fl-ewwel miraklu tal-qabda tal-ħut li għandu ħafna similaritajiet mas-silta tal-evanġelju tal-lum. Kien id-dlam, kienu fis-solitudni waħidhom, kienu falliment f’xogħolhom.

[Ġw:21:4] Fil-għodu mas-sebħ, Ġesù kien qiegħed ix-xatt, imma d-dixxipli ma kinux jafu li kien Ġesù.

‘Filgħodu mas-sebħ’ dawn id-dixxipli ma baqgħux fid-dlam. Ġesù irritorna mal-appostli bħala d-dawl għalkemm huma kienu għadhom ma għarfuhx. Huma kienu għadhom fil-bżonn li jidħlu aktar fil-fond u ma jibqgħux waħidhom.

[Ġw:21:5] Ġesù qalilhom: “Għandkom x’tieklu, ħbieb?” “Le,” weġbuh.

L-inizjattiva ġiet minn Ġesù, il-grazzja tiġi minnu u mhux minna. Bi kliemu hu wriehom x’kienet is-sitwazzjoni tagħhom. “Għandkom x’tieklu ħbieb?”

Il-Kelma t’Alla dejjem tapplika għalina u tidħol fil-fond tal-personalità tagħna u l-karatteristiċi tagħna. Lest naċċetta ir-rimarka ta’ Ġesù fuq il-ħajja tiegħi u hija vojta? Għandi l-kuraġġ naċċetta li għandi bżonnu jew is-suppervja tagħmel bija? Jekk ma nħallix id-dawl tiegħu jiddi fuqi, ma nistax ninbidel.

[Ġw:21:6] Qalilhom: “Waddbu x-xibka n-naħa tal-lemin tad-dgħajsa u ssibu.” Dawn waddbu x-xibka, u mbagħad ma felħux jiġbduha daqs kemm qabdu ħut!

Hu stedinhom biex jitfgħu ix-xibka n-naħa tal-lemin; hu kien qiegħed jgħid lis-sajjieda kif għandhom jistadu. Però l-ubbidjenza tagħhom twassal għal miraklu.

(Interessanti li f’dan il-punt ma kinux għarfu diġà lil Ġesù: l-għajnuna għandna naċċettawha mhux meta ġejja minn miraklu imma anke min-nies ta’ madwarna; ħalliha li indirettament tkun ġejja mingħand Ġesù xorta waħda.)

Il-Kelma t’Alla tasal għandi b’diversi modi; bil-persuni, laqgħat ta’ talb, kliem ta’ nies oħra. Imma l-Kliem li jibdilni dejjem ġej mingħand Ġesù li jridilna biss il-ġid.

[Ġw:21:7] Id-dixxiplu li kien iħobb Ġesù qal lil Pietru: “Il-Mulej dan!” Għalhekk Xmun Pietru, kif sama’ li kien il-Mulej, xeħet fuqu l-libsa ta’ fuq, għax kien għoddu għeri, u ntafa’ l-baħar.

Ġwanni għaraf lil Ġesù u stqarr lil Pietru: ‘il-Mulej dan’.  Il-Fidi tagħna fil-Mulej irridu naqsmuha mal-oħrajn inkella ma tkunx kompluta u ma tagħmel l-ebda frott.

Dan wassal lil Pietru biex jilbes u jaqbeż mid-dgħajsa biex jiltaqa’ malajr ma’ Ġesù. (Dan l-att ifakkarna fil-magħmudija li fiha nilbsu l-libsa ta’ Kristu li ttina l-karattru ġdid ta’ membri fil-Knisja ta’ Ġesù u tagħmilna bnedmin ġodda.)

Napprezzaw li Pietru ħataf il-mument tal-laqgħa tiegħu ma’ Ġesù u rrejaġixxa mill-ewwel u mingħajr telfien.

Nistgħu naraw ix-xebh bejn Pietru u dawn il-personaġġi:

lill-armla li tat il-flus tagħha kollha fit-tempju,

lill-imxajtan ta’ Gerasa li ġera lejn Ġesù u nxteħet f’riġlejh,

Il-mara li fieqet min-nixxiegħa tad-demm.

L-għaxar imġiddma li marru quddiem Ġesù.

Ġesù stess li mar quddiem il-Missier u talab: Mk 14,35.

Kemm qiegħed nintelaq f’dan il-baħar ta’ ħniena tal-Mulej? Kemm qiegħed inkun bħall-Iben il-Ħali li jmur lura għand il-Missier u l-Missier jiġri lejja? Luqa 15, 18.20.

Pietru hawn qiegħed jitfa’ fuqu d-drapp, l-istess kif Ġesù libes fardal biex jaħsel saqajn l-appostli. Huwa l-libsa tal-umiltà, ta’ serv li jagħti ħajtu għal persuna oħra, drapp li jgħatti l-għera li huma d-difetti u l-limitazzjonijiet tagħna bħala bnedmin. Din il-libsa tagħtina ħajja u karattru ġdid, insiru Kristu ieħor.

[Ġw:21:9] Kif niżlu l-art, raw li kien hemm xi faħam jaqbad, bil-ħut fuqu, u xi ftit ħobż.

[Ġw:21:10] Qalilhom Ġesù: “Newwlu ‘l hawn xi ħutiet minn dawk li għadkom kemm qbadtu.”

Insibu lil Ġesù fuq ix-xatt: hawnhekk hu jgħaqqad il-ħobż li kellu hu mal-ħut tas-sajjieda. Il-ħajja u r-rigal tiegħu isiru ħaġa waħda mal-ħajja u r-rigal tagħhom.

Din hija l-qawwa tal-Kelma li saret Laħam. (Verbum Dei Caro Factum Est). Huwa l-miraklu li jseħħ kuljum fl-Ewkaristija meta l-ħobż u l-inbid, frott il-bniedem isiru l-ġisem u d-demm ta’ dan Ġesù.

Il-ħut huma n-nies li Ġesù jixtieq isalva permezz tagħna u l-isforzi tagħna. Ma nistax immur għand Ġesù waħdi.

[Ġw:21:11] Xmun Pietru tala’ fid-dgħajsa u ġibed l-art ix-xibka mimlija b’mija u tlieta u ħamsin ħuta kbira; u minkejja daqshekk ħut, ix-xibka ma nqasmitx.

Fix-xibka li hija l-Knisja hemm post għal kullħadd u kullħadd huwa mportanti: żewġ spjegazzjonijiet fost oħrajn għall-153 ħuta huma: 153 speċi ta’ ħut magħrufa, is-17 –il numru triangulari: 10 għal-liġi u 7 numru perfett.

Vrus 15-17:

Hawn insibu l-konverżazzjoni bejn Pietru u Ġesù, kliem ta’ żewġ persuni qrib xulxin bħal donnhom jieħdu gost bil-preżenza ta’ xulxin u li jridu l-konferma tar-relazzjoni li hemm bejniethom.

Dan il-kliem qiegħed ukoll jgħidu lilna Ġesù f’dan il-mument. Huma kliem ta’ stqarrija tal-imħabba tagħna lejn Alla quddiem ix-xhieda ta’ madwarna. (Fl-ewwel mistoqsija din l-imħabba tiġi mqabbla ma’ tal-oħrajn: għaliex l-imħabba tagħna għandha tkun xhieda quddiem l-oħrajn).

L-istedina ta’ Ġesù għal Pietru u għalina llum hija: ‘EJJA U IMXI WARAJJA’.

MA EMMINX – MA NEMMNUX!  IT-2 ĦADD TAL-GĦID – 3 T’APRIL 2016

     Il-laqgħa bdiet bit-talba tal-Moviment u wara sar il-qari tal-Vanġelu skond San Gwann, Kapitlu 20, versi 19 – 31.

     Fil-bidu ta’ dan il-Vangelu, naraw lil Gesu’ jsellem lid-dixxipli tiegħu bil-kliem “Is-sliem għalikom”.  Din kienet tislima li kienet tintuża mill-Ebrajki.

     X’inhu s-sliem u mnejn jiġi?  Ħafna drabi aħna naħsbu li biex ikollna l-paċi ġo fina rridu nsibuha fl-ambjent ta’ madwarna.  Imma fil-fatt ma jistgħax ikun hemm paċi esterna jekk qabel ma jkunx hemm paċi interna – fil-qalb tagħna.  Il-ħafna għawġ li naraw madwarna – terroriżmu, ġlied, abbużi, etc. huma riżultat ta’ dan in-nuqqas ta’ paċi nterna.  U jekk infittxu iżjed fil-fond, insibu li l-għerq ta’ dan kollu hu l-alla tal-flus – ir-rebgħa!

     Ġesu’ ġie biex iġib il-paċi u l-maħfra.  Lid-dixxipli qalilhom “Id-dnubiet li taħfru jkunu maħfura u d-dnubiet li żżommu jkunu miżmuma”  Hawnhekk ġiet imfissra din is-sentenza.  Kwalunkwe dnub, kbir kemm hu kbir, jista’ jinħafer, basta jkun hemm indiema sinciera.  Ma rridux inkunu arroganti u nippretendu l-maħfra qisa xi dritt tagħna.  Alla jaħfrilna ghax iħobbna, u mhux għax Hu obbligat jagħmel hekk.

     Aħna ħafna drabi f’dan il-Vangelu nittimbraw lil Tumas bħala wieħed li ma jemminx jekk ma jarax.  Fil-fatt Tumas ried jagħmel esperjenza personali ta’ Kristu Rxoxt, u Ġesu’ laqa’ din ix-xewqa meta qallu biex imiss il-pjagi tiegħu.  U hawnhekk Tumas jagħmel dik l-istqarrija ta’ fidi “Mulej tiegħi u Alla tiegħi” – stqarrija li ħadd mill-appostli l-oħra ma kien għamel.

     Fl-aħħar tal-laqgħa qamet diskussjoni dwar il-maħfra tad-dnubiet, u liema huma dawk li huma miżmuma.  Ingħata l-eżemplu tal-abort, li jġib miegħu l-iskomunika.  Din tinħall biss mill-Isqfijiet u ċerti ordnijiet bhad-Dumnikani, l-Agostinjani etc.  Din is-sena tal-Ġublew tal-Ħniena, il-Papa Franġisku ta’ permess lill-qassisin kollha biex iħollu din l-iskomunika.  Ġie spjegat ukoll li anke min jipparteċipa b’xi mod fl-abort ikun qiegħed jidneb.  Dan id-dnub, bħalma diġa ġie spjegat, jista’ jinħafer jekk ikun hemm indiema sinciera.

     Il-laqgħa tkompliet bi kwotazzjoni:­­­­­­­­­­­­­­­­­­­­­­­ Ġesu jagħder lill-bniedem mhux biss fl-uġigħ fiżiku imma anke meta jaddi minn mumenti ta’ qtigħ il-qalb. Għalkemm kien ġa deher lid-dixxipli; fl-evanġelju tal-llum naraw kif  Hu reġa deher biex jneħħi d-dubju lil San Tumas u biex jimlieh bit-tama, kuragg u perseveranza fil-fidi tiegħu.

     Grazzi Mulej, ta’ l-attenzjoni li tagħti lil bżonnijiet ta’ kull wieħed/waħda minna.

Fil-laqgħa ta’ Prayer Café, tat-22 ta’ Mejju 2015,  wara li ħadna kikkra kafe flimkien, trattajna l-qari tal-quddiesa ta’ nhar il-Ħadd 25 ta’ Mejju; it-tmien Ħadd tal-Għid jew Għid il-Ħamsin. It-tema ewlenija kif mistenni f’Pentecoste, kienet fuq l-Ispirtu s-Santu.

Fil-ħajja spiss nħossuna sfiduċjati , iżolati u b’qalbna maqtugħa minn dawk ta’ madwarna. Ngħaddu minn mumenti ta’ dlam u qtiegħ il-qalb. Pero il-Mulej daħal fil-ħajja tagħna bħala bniedem –Ġesu- u għaraf l-umanita fraġli tagħna. Bħala ġrajja llum se nħarsu lejn il-ġrajja li seħħet wara t-tlugħ ta’ Ġesu fis-sema, meta kif kien wegħedna Hu bagħat l-Ispirtu s-Santu, d-Difensur tagħna fuq id-dixxipli u Marija li kienu msakkrin f’kamra isolati weħidhom.  Xogħol  l-Ispirtu S-Santu huwa li jsaħħaħna u jagħtina skop fl-egħmil tagħna.

Hawn inqara l-evanġelju ta’ nhar il-Ħadd li ġej mehud minn Ġw 15, 26-27; 16, 12-15 u wara kullħadd ġie mistieden jgħid il-kelma jew frazi li laqtithom mill-vanġelu.

Din is-silta tinsab f’nofs minn dak li hu magħruf bħala d-diskors tat-tluq ta’ Ġesu li nsibuh fl-evanġelju ta’ San Ġwann minn Kap 13 sa Kap 17. Nħeġġukom taqrawhom dawn il-ġrajjiet.

Fil-vanġelu tal-llum Ġesu jitkellem fuq il-konsegwenzi inevitabbli tan-nisrani li jimxi wara Ġesu fil-fidi u l-imħabba. Waħda minnhom hi li min jimxi wara Ġesu se jiġi ppersegwitat. “id-dinja għad tobgħodkom” Infatti nafu minn esperjenzi tagħna stess li meta tiprova timxi tajjeb jibdew jinqalgħu ħafna affarijiet…iżda Ġesu tana wkoll il-garanzija tad-Difensur li jtina l-konsolazzjoni u l-faraġ li jkollna bżonn fiċ-ċirkustanzi ta’ ħajjitna, l-Ispirtu s-Santu.

L-Ispirtu s-Santu huwa it-tielet persuna tat-Trinita Mqaddsa – forsi ma nagħtuhx l-importanza li jistħoqqlu – huwa l-mutur li jaħdem bejn Alla u Ġesu biex iwasslilna l-messaġġ t’Alla – huwa HU li jnebbaħna, jiftħilna għajnejna bħalma għamel lid-dixxipli ta’ Emmaws. Nebbaħhom li dik il-persuna quddiemhom kienet Ġesu – fetħilhom għajnejhom waqt l-qsim tal-ħobż. Dan il-miraklu jseħħ quddiemna kuljum waqt kull quddiesa, qabel il-konsagrazzjoni l-qassis ibierek il-ħobż u l-inbid u jitlob il-miġja tal-Ispirtu s-Santu.

 L-Ispirtu s-Santu jnebbħek il-messaġġ int u taqra l-Bibbja. Hemm ħafna mumenti f’ħajjitna li jiġi l-Ispirtu s-Santu ġewwa fina. L-ewwel darba li ġie fuqna kien fil-magħmudija, li tibdilna, u tħalli l-marka tagħha fina, mbagħad jerġa jiġi fuqna waqt il-Griżma tal-Isqof b’qawwa akbar, fejn nirċievu d-doni tal-Ispirtu s-Santu.

Hawn inqrat is-silta mill-Ktieb tal-Atti tal-Appostli : Atti 2:1-11

Bil-qawwa tal-Ispirtu s-Santu Pietru, magħruf bħala sajjied, il-ġurnata ta’ wara din il-ġrajja kien ikkonverta 3,OOO ruħ bid-diskors tiegħu!

Din il-ġrajja seħħet fil-Festa tal-Ġimgħat u tal-Ħsad. Kienet festa li fiha jiġi offrut ‘l Alla l-frott tal-ħsad. Ġiet tissejjaħ tal-ġimgħat għaliex kienu jingħaddu 7 ġimgħat mill-Għid, 50 jum wara (Lev 23:15. Dewt 16:9). Għalkemm għall-bidu kienet festa agrikola biż-żmien saret ukoll spiritwali u solenni. F’dan iż-żmien il-poplu kien jagħmel penitenza u ma setgħux jiġu ċċelebrati żwiġijiet solenni.

Kienet waħda mit-tliet festi ta’ pellegrinaġġ (Għid-festa tal-ażżmi; Festa tal-ġimgħat u Festa tal-Għerejjex). Fiha kienu jiġu ħafna nies Ġerusalemm għalhekk kien ikun żmien ta’ ħafna nies miġbura flimkien.

Kellhom l-obbligu li jġibu magħhom żewġ ħobżiet moħmija bil-ħmira bħala radd il-ħajr ‘l Alla għall-għixien li jagħti lill-poplu. Dan il-ħobż ma kienx jinħema imma kien jiġi mogħti lis-saċerdoti.

Għall-Knisja tagħna din il-festa hija meqjusa mportanti ħafna għaliex hija t-tifkira tal-inżul tal-Ispirtu s-Santu u x-xandir tal-bxara t-tajba (KERYGMA) lill-ġnus kollha li kienu telgħu Ġerusalemm proprju għal din il-festa solenni (Atti 2,1-11).T irreferi għat-twettieq tal-wegħda ta’ Ġesù u hija simbolu tal-għaqda u l-universalità tal-Knisja.  Silta għal qalb l-membri tal-Moviment Kerygma għax minn din is-silta ittieħed l-isem u l-iskop tal-Moviment tagħna. : )

 Fil-jum ta’ Pentekoste, San Pietru, bniedem li kien magħruf bħala sajjied, ppriedka lil-Lhud f’Ġerusalemm u f’dak il-jum, jekk noqogħdu għal dak li naqraw fl-Atti tal-Appostli, mhux inqas minn 3,000 ruħ ħadu l-magħmudija!

Minn hawn tibda l-ħidma missjunarja tal-Knisja. “Intom tkunu xhieda tiegħi f’Ġerusalemm, fil-Lhudija kollha u fis-Samarija u sa truf l-art.” (Atti 1,8)

Biex nidħlu aktar fl-atmosfera tal-ambjent ta’ din il-ġrajja, ntwera l-video:

• Video 1: L-Inżul tal-Ispirtu s-Santu fuq l-appostli:

Ftit wara dan l-episodju fil-bibbja nsibu d-diskors ta’ San Pietru fejn kien qal;  “ le dawn mhumiex fis-sakra kif qed taħsbu intom, għadhom id-disgħa ta’ filgħodu”. Dan l-atteġġament niltaqgħu miegħu anke llum meta nibdew nitkellmu fuq Ġesu jew nuru li nimxu warajh bilkemm ma jkunux iridu jgħidu li tlaqna jew jiprovaw iwaqqgħuna għaċ-ċajt. Pero meta nkunu qed ngħaddu messaġġ ta’ ĠESU rridu nibqgħu għaddejjin u ma naqtgħux qalbna u hawn jidħol l-Ispirtu s-Santu – Hu jagħtina dik il-qawwa biex nkomplu nxandru anke f’mumenti li nkunu qed naqtgħu qalbna.

Wara ħarisna mill-qrib lejn it-talba tal-Moviment tagħna: it-Talba tal-Moviment Kerygma/Talba lill-Ispirtu s-Santu.

1)     Spirtu s-Santu nitolbuk tinżel fina,

2)     biex turina xi trid minna,

3)     sabiex b’għemilna u ħidmietna nwasslu l-bxara t-tajba fl-ambjent ta’ madwarna.

4)     Dawwlilna moħħna biex nagħrfu nimpenjaw ruħna bħala nsara fis-soċjetà.

5)     Bierek il-ħidma tagħna, ibqa’ magħna, sabiex aħna nkunu strumenti tal-bxara t-tajba.

Mistoqsijiet:

Min hu l-Ispirtu s-Santu għalina?

X’naħsbu li huwa xogħlu u l-effetti tiegħu?

L-Ispirtu s-Santu jagħmilna ġisem wieħed, grupp wieħed, Knisja waħda. Kemm nagħrfu din il-qawwa ta’ grupp, ta’ Moviment li tinsab fina?

Xi tfisser il-kelma Kerygma u fejn seħħet fil-ġrajja tal-lum?

Xi tfisser li tkun xhud ta’ xi ħadd? Għal min qegħdin inkunu xhieda aħna u x’inhu l-Messaġġ li qegħdin inwasslu?

X’inhuma d-doni tal-Ispirtu s-Santu?

Xhieda

Vers 27 jgħid: “U intom ukoll tixhdu, għax intom kontu miegħi sa mill-bidu.”

Għaliex insibuha daqshekk diffiċli biex nixhdu l-fidi tagħna quddiem l-oħrajn? Nista’ nibqa’ sieket u ma nxandarx?

Li tagħti xhieda jitlob minna li nkunu konvinti minn dak li qed nagħmlu u nagħtu l-provi tat-twemmin tagħna. Irridu nkunu konvinti.

Waħda mill-membri qalet li hi jolqotha l-vers “b’egħmilna u ħidmitna” ix-xhieda tagħna tkun aktar qawwija meta nagħmlu dak li nemmnu milli niprietkaw biss b’ħafna kliem.

Oħra semmiet li għandna nsejħu lill-Ispirtu jqawwina kontinwament għax aħna bħala bnedmin, aħna dgħajfa ,u għalhekk hemm bżonn li nerġgħu nitqawwew wara xi waqgħa biex nerġgħu nqumu.

Aħna strumenti tal-bxara t-tajba u hekk hu aħna strumenti t’Alla – strument waħdu ma jdoqqx, aħna rridu nkunu l-istrumenti t’Alla biex inwasslu l-messaġġ tiegħu.

Wara nqara passaġġ mill-Atti tal-Appostli Kap 3.

Jista’ jkun li l-egoiżmu tagħna ma jħalliniex naċċettaw il-fatt li għandna bżonn l-għajnuna tal-Ispirtu s-Santu li jiggwidana? San Pietru meta fejjaq lill-magħtub tat-tempju (Atti 3, 1-10) qal lill-magħtub: “Fidda u deheb ma għandix; imma dak li għandi se nagħtihulek: fl-isem ta’ Ġesù Kristu ta’ Nazaret, imxi!”

Mela ifejjaq huwa Alla biss. L-Ispirtu s-Santu jgħallem u jħarreġ lid-dixxiplu biex f’ismu jagħmel il-mirakli.

Video 2:

San Pietru jfejjaq il-magħtub bil-qawwa ta’ Ġesù ta’ Nazaret

Video li juri kif ntqal fil-bidu tal-laqgħa meta twassal l-messaġġ ta’ Ġesu stenna l-persekuzzjoni infatti l-video jispiċċa bid-dixxipli jintefgħu l-ħabs. Iżda kif stqarr Pietru fil-video “We have a duty to speak..” hekk ukoll aħna – ma nistgħux nieqfu nxandru.

Din il-persekuzzjoni hi attwali fid-dinja tal-llum, fil-ħarġa ta’ Xandar il-Kelma nsibu li fis-sena 2013 ġew maqtula 135,000 nsara minħabba l-fidi tagħhom. Bħalissa hemm 150 miljun nsara mhedda madwar id-dinja kollha.

Il-laqgħa ngħalqet bil-qari tas-Sekwenza u bit-talba tal-Missierna.

Prayer Café 15 ta’ Mejju 2015: Lapsi

Il-laqgħa bdiet bħas-soltu bit-talba tal-Moviment.  Wara inqrat is-silta meħuda mill-għeluq tal-Evanġelju ta’ San Mark li tirrakkonta fid-dettal kif Ġesù tal-missjoni lill-Appostli qabel ittella’ fis-sema.  Il-festa magħrufa bħala Lapsi.

Inqrat is-silta ukoll mill-għeluq tal-Evanġelju ta’ San Luqa li tirrakkonta l-istess ġrajja għalkemm iktar fil-qosor u bla dettalji żejda.  Dawn huma l-uniċi żewġ evanġelisti li jirrakontawlna din il-ġrajja.  Dan ifisser li l-Mulej tela’ s-sema u ġie kollox fi tmiemu?

Iżda filwaqt li ż-żewġt Evanġelji jagħlqu b’din il-ġrajja, fl-Atti tal-Appostli insibu l-istess ġrajja – x’aktarx miktub ukoll mill-istess id tal-evanġelisti – propju fil-bidu u b’aktar dettall.  Ġesù qalilhom ukoll “meta jiġi fuqkom l-Ispirtu s-Santu, intom tirċievu l-qawwa u tkunu xhieda tiegħi f’Ġerusalem, fil-Lhudija kollha u s-Samrija u sa truf l-art”. Tissemma ukoll kif “żewġt irġiel lebsin l-abjad jgħidu lill-Appostli “Irġiel tal-Galilija, x’intom tħarsu lejn is-sema?  Dan Ġesù, li kien meħud minn magħkom lejn is-sema, għad jerġa’ jiġi kif rajtuh sejjer”.  Ġesù jwiegħed li ħa jibgħat Spirtu difensur u b’hekk turi li hemm kontinwazzjoni tal-preżenza ta’ Ġesù fostna u mhux spiċċa kollox mat-tlugħ fis-sema.

 Tana missjoni biex inxandru l-Kelma t’Alla.  Fil-fatt dan hu l-għan tal-Movement Kerŷgma!  Illum naraw l-bżonn tal-impenn anke tal-lajċi fi ħdan il-Knisja fin-nuqqas ta’ vokazzjonijiet.  Ma jiswa xejn li jkollok eluf kbar ta’ saċerdoti u ma jkollokx lajċi jew viċi versa li jkollok ħafna lajċi u ma jkollokx min jamministra s-Sagramenti.  Mhux il-kwantità imma l-kwalità tgħodd.  Kull wieħed u waħda minna għandu l-missjoni biex iwassal l-Bxara it-tajba sat-tarf tad-dinja.  Ma jfissirx li rridu nitilqu fl-artijiet imbegħda għax din il-missjoni tista’ tagħmilha fl-ambjent ta’ madwarna: fid-dar, fil-familja, fl-uffiċju, fil-fabbrika, mal-ħbieb: inkunu fejn inkunu.  Illum aktar minn qatt qabel għandna bżonn tal-evanġeliżżazzjoni.

Illum il-Knisja għandha influwenza anke fuq il-kultura. F’sempliċi reklam tal-kafè naraw rappreżentazzjoni tal-Ġenna b’San Pietru mal-Anġli mixjin fuq is-sħab!  Ma nistgħux naqbdu u nwarrbu r-reliġjon minn fostna.  Żball li forsi d-dinja ta’ llum qed tipprova tagħmel: twarrab elfejn sena ta’ storja, tagħlim u kultura!

Aħna lkoll nagħmlu parti mill-knisja u l-knisja ikollha xi ħaġa nieqsa mingħajrna.  Aħna għandna missjoni x’nagħmlu f’din id-dinja. Issa jew nagħmluha sew jew ħa naħarbu minn dan ix-xogħol li ħallielna Ġesù.

Hawn infetħet id-diskussjoni.  Ġew diskussi diversi temi rrelatati ma’ dan il-Vanġelu: l-Ġenna u l-Ġenna tal-Art. Fil-verità il-Ġenna mhux post fiżiku imma fejn titgawda l-glorja ta’ dejjem.

Meta qamet il-mistoqsija jekk min mhux mgħammed u ma jemminx hux diġa’ kkundannat skont m’hemm fl-istess Evanġelju, intqal li aħna liberi. Alla jagħtina ċans li nidinbu imma  jagħtina ċans ukoll li nirrikonċiljaw bis-Sagrament tal-qrar. Hu jaf li aħna dgħajfin u naqgħu. Anke l-Papa jqerr darba kull ħmistax! Tana l-għodda biex insalvaw!

Anke nies ta’ reliġjonijiet oħra: jekk dawn jimxu sewwa fir-reliġjon tagħħom, jistgħu jsalvaw ukoll!  Kristu stess qal li ‘għandi nagħaġ oħra li mhumiex minn dan il-maqjel’  Alla sal-aħħar sekonda jibqa’ jagħtina ċ-ċans li nsalvaw! Ma ninsewx li l-ħalliel t-tajjeb li ġie mwiegħed l-Ġenna fl-aħħar mumenti ta’ ħajtu.

Il-laqgħa ntemmet billi nqrat storja u bit-talba tal-Missierna.