After a successful #PrayerCafe meeting yesterday evening… we'll meet again in two weeks time on the 11/10/13 http://t.co/4YV6MgI2Tm

— Moviment Kerŷgma (@MovimentKerygma) September 28, 2013

Evangelion, In-Newsletter tagħna: Evangelion No32

We are now Online! http://t.co/tNF1u9MqYq

— Moviment Kerŷgma (@MovimentKerygma) September 20, 2013

Il-Moviment Kerŷgma jwassallek sfida għalik li inti nisrani.  Sfida li timpenja ruħek b’mod sfaċċat għal Ġesù fis-soċjetà.  “Għal Impenn Kristjan fis-Socjeta” mhuwiex biss is-slogan u l-mission statement tal-Moviment izda wkoll provokazzjoni li rridu nagħmlu lil xulxin biex ngħixu il-ħajja nisranija Full time.  Il-Papa Frangisku ta sikwit jgħidilna li in-nisrani ma jistax ikun part time., u pemezz tat-talb u l-formazzjoni nisranija, il-membri tal-Moviment Kerŷgma jridu jifhmu, jaċċettaw u jwettqu dak li Alla jrid minnhom fis-soċjeta tal-lum.

Il-mixja li l-membri tal-Moviment Kerŷgma qed iwettqu fis-soċjeta Maltija hija mixja ta fidi b’impenn sħiħ fir-rejalta li qed jgħixu fiha, fil-familji, fil-post tax-xogħol kif ukoll fl-iskola.  Il-proposti ta’ fidi u dawk edukattivi li l-Moviment Kerŷgma jwettaq, jagħtu qawwa lill-istess fidi u jsaħħah l-impenn tà dak li Ġesù jrid minn kull wieħed minnha.

Nittama li din l-esperjenza int taqsamha magħna bħala kommunita nisranija!

Il-Mulej u Ommna Marija tbierek lilkom

Fr. Charles Fenech OP

Direttur

Dan huwa studju dwar il-“Missierna”, it-tema tal-Moviment għal din is-sena.

[pullquoteright]Mela itolbu hekk: ‘Missierna, li inti  fis-smewwiet, jitqaddes ismek, tiġi saltnatek, ikun li trid int, kif fis-sema, hekkda fl-art. Ħobżna ta’ kuljum agħtina llum. Aħfrilna dnubietna, bħalma naħfru lil min hu ħati għalina. U la ddaħħalniex fit-tiġrib, iżda eħlisna mid-deni.’ San Mattew 6: 9–13 [/pullquoteright]

Ġesù jgħid lid-dixxipli tiegħu kif għandhom jitolbu.  Hu jgħallimhom dik li aħna llum insejħulha t-Talba tal-Missierna.  Talba li nistgħu ngħidu drajna nitolbuha ta’ spiss – f’kull Quddiesa, kull meta nitolbu r-rużarju u ħafna drabi oħra.

It-talba hija maqsuma f’seba’ partijiet (il-verżjoni ta’ San Luqa hija iqsar).  Seba’ huwa numru favorit ta’ San Mattew.  Huwa jaqsam il-lista tat-tnissil ta’ Ġesù, f’tlett listi ta’ sebgħa (Kap. 1); probabbli kien hem seba’ beatitudnijiet fit-test oriġinali (Kap. 5); hemm seba’ parabboli fuq is-Saltna t’Alla (Kap. 13) u l-maħfra trid tingħata mhux seba’ darbiet, imma sebgħa u sebgħin darba (Kap. 18); hemm seba’ ċanfiriet meta  kkundanna l-Fariżej (Kap. 23) u l-Vanġelu nniffsu huwa maqsmum f’sebgħa taqsimiet prinċipali (it-tfulija, il-ħames taħditiet, il-passjoni).

It-talba tal-Missierna m’għandiex tiġi kkunsidrata biss bħala formola li tiġi sempliċiment ripetuta bil-kliem.  Imma hija numru ta’ frażijiet li fihom aħna naffermaw ir-relazzjoni tagħna m’Alla, man-nies ta’ madwarna u mad-dinja.  Hija stqarrija ta’ fidi u hija wkoll – kif ser naraw – ta’ sfida kbira u għalhekk, hija kemmxejn talba perikoluża.

Ħa nagħtu ħarsa ħafifa lejn is-seba’ partijiet tat-talba:

1.  Missierna:

L-isfida u l-periklu jibdew mal-ewwel kelma.  Aħna nindirizzaw lil Alla bħala l-Missier, is-sors tal-ħajja u ta’ kull m’għandna; m’għandna xejn li huwa purament tagħna.  Imma Alla mhuwiex biss ‘Missier’;  huwa Missierna.  U għalhekk din tinkludi kull persuna li tgħix jew li qatt għexet fuq din id-dinja;  l-ebda persuna ma tista’ tkun eskuża.

Meta qed nindirizzaw lil Alla bħala ‘Missierna’, aħna qed nagħrfu li kull persuna, inkluż jien, hija iben/bint ta’ Alla u għalhekk aħna lkoll nagħmlu parti minn familja waħda kbira, fejn aħna lkoll aħwa ta’ xulxin.  Ħadd ma jista’ jkun irrifjutat, u m’hemmx post għal mibgħeda, preġudizzju jew disprezz ta’ razza, nazzjonalità, kulur tal-ġilda, sess, orjentazzjoni sesswali, klassi soċjali jew reliġjon.  Jekk jien miniex lest li naċċetta kull persuna bħala ħija jew oħti, allura għandi problema biex nibda mqar l-ewwel biċċa ta’ din it-talba.

2.  Jitqaddes ismek:

Żgur li l-isem t’Alla huwa qaddis – irrispettivament ta’ x’ngħidu jew naħsbu.  Aħna nitolbu din it-talba għal ġid tagħna iktar milli għal Alla nniffsu.  Hawnhekk qed nitolbu biex l-isem t’Alla jkun irrispettat min-nies kullimkien.  Imma nafu li dan mhux minnu:  hawn nies li jiddisprezzaw ismU u oħrajn lanqas biss jafuH.  Aħna nitolbu biex id-dinja kollha ssir taf bl-isem t’Alla u għalhekk jagħrfu lil Alla bħala Alla tagħhom, il-ħallieq, dak li qed iżommna ħajjin u t-tmiem tal-ħajja fuq din l-art.  Din il-frażi hija fil-fatt forma oħra tal-frażi li jmiss.

3. Tiġi Saltnatek:

F’din il-parti qed nitolbu li kull persuna fid-dinja jkollha r-rieda li tkun parti mis-Saltna u l-imħabba t’Alla.  Dan jista’ jseħħ billi naħdmu flimkien biex nagħmlu minn din id-dinja l-post li Alla jrid li tkun – post ta’ verità u mħabba, ta’ ġustizzja u paċi, post fejn wieħed jaqsam il-ġid mal-oħrajn u jkun ta’ għajnuna għall-ħaddieħor.  Sa ċertu punt, il-Mulej huwa Alla rrispettivament mir-relazzjoni tagħna miegħU.  Imma hija x-xewqa tiegħu li l-bnedmin jaċċettaw min-naħa tagħhom l-imħabba t’Alla u jpoġġuha fiċ-ċentru tal-ħajja tagħhom.  U din hija l-ħidma tal-Knisja, ta’ kull nisrani u ta’ kull persuna, li tgħin lill-oħrajn jagħrfu s-Saltna t’Alla u jaċċettawha bħala ċ-ċavetta tal-ferħ tal-preżent u tal-futur.

4.  Ikun li trid Int, fis-sema hekkda fl-art:

Din il-frażi hija sempliċiment mod ieħor ta’ kif nitolbu dak li għadna kemm tennejna fiż-żewġ frażijiet ta’ qabel.  Għax ir-rieda t’Alla hija li l-bnedmin kollha jagħrfu l-qdusija ta’ ismu u jaċċettaw bil-qalb li jkunu parti mis-Saltna t’Alla fuq din l-art.  Dan nistgħu nagħmluh billi nissieħbu fil-missjoni u l-ħidma ta’ Ġesu, li nġibu l-ħajja, fejqan u għaqda fid-dinja.  Li tagħmel ir-rieda t’Alla mhix sempliċiment li twarrab dak li nixtiequ aħna u naċċattaw ir-rieda t’Alla anke meta hija kompletament kontra r-rieda tagħna.  Imma inkunu qed inwettqu tassew ir-rieda t’Alla meta nagħrfu li dak li jrid Hu huwa dejjem dak li hu l-aħjar għalina.  Għalhekk, inkunu qed nagħmlu r-rieda tiegħu meta aħna nkunu nixtiequ dak li jixtieq Hu, u għalhekk, ir-rieda tagħna tkun f’armonija perfetta mar-rieda tiegħU.  Imbagħad inkunu qed nagħmlu dak li jrid Hu u dak li rridu aħna.  Hawnhekk qed nitolbu li nilħqu dak il-livell ta’ unità.

5.  Ħobżna ta’ kuljum, agħtina llum:

Din hija talba perikoluża oħra għalina – għalkemm ma tidhirx hekk mad-daqqa t’għajn.  L-ewwelnett, qed nitolbu biss għal dak li neħtieġu issa.  Fid-diskors tal-muntanja, Ġesu jgħidilna biex ma ninkwetawx fuq ser iġib miegħu il-jum t’għada.  Għalhekk qed nistaqsu għal dak li neħtieġu llum; għada huwa jum ieħor.  Aħna ngħixu ġurnata b’ġurnata.

Imma hija perikoluża għax titkellem fil-plural – agħti lilna llum.  Min aħna? Jiena u l-familja immedjata tiegħi? Il-parroċċa tiegħi?  Il-ġirien jew ir-raħal tiegħi? Il-pajjiż tiegħi? Din il-frażi tiġbor fiha lil kulħadd – bħall-ewwel frażi.  Għalhekk, jien qed nitlob li kull persuna jkollha l-ħobż biex tiekol illum.  Iżda aħna nafu li hemm miljuni ta’ persuni (uħud minnhom f’pajjiżi sinjuri) li filfatt m’għandhomx x’jieklu, jew ibagħtu minn nuqqas ta’ ikel u dieti fqar. Allura meta nitolbu li kulħadd ikollu l-ħobż ta’ kuljum, qed nistennew li Alla jibgħat il-manna mis-sema? Jew m’aħniex niftakru li hija r-responsabbiltà tagħna li nitimgħu lil ħutna?  Jekk hawn persuni li huma bil-ġuħ, dan mhux ġej minn Alla;  ħafna drabi huma l-bnedmin stess li huma responsabbli (ħlief meta jkun hemm diżastri naturali).

Din il-frażi tista’ tinkludi wkoll il-Ħobż tal-Ewkaristija.  Fil-qsim tal-Ħobż, aħna nkunu qed ngħidu sagramentalment li aħna qed naqsmu u rridu naqsmu mal-bnedmin ħutna l-ġid u l-grazzji, speċjalment ma’ dawk fil-bonn.  Inkella l-Ewkaristija issir forma ta’ sagrileġġ.

6.  Aħfrilna dnubietna, bħalma naħfru lil min hu ħati għalina:

U din mhix talba oħra perikoluża li qed nagħmlu? Qed nitolbu lil Alla biex il-maħfra tiegħu lejna tkun kundizzjonali, skont kemm aħna lesti li naħfru lil dawk li weġġgħuna b’xi mod.  Din titlob kuraġġ kbir.  U l-maħfra mhix biss tlissin ta’ ftit kliem.  Fl-Iskrittura, il-maħfra tinkludi r-rikonċiljazzjoni bejn il-ħati u l-vittma.  Filfatt nistgħu ngħidu wkoll li n-nisrani veru qatt ma hu offiż u qatt ma jista’ jkun offiż.  In-nisrani veru għandu sens ta’ sigurtà u stima personali soda biżżejjed, tant li ħadd ma jista’ jeħodhielu.  Meta persuna bħal din tkun il-mira ta’ xi attakk – verbali jew fiżiku – l-ewwel rejazzjoni tkun li jħares lejn l-aggressur b’simpatija.  Dan għaliex huwa l-aggressur li għandu problema u mhux il-vittma.  Ħafna minna fadlilna ħafna biex naslu sa dan il-livell ta’ paċi interna.  “Jekk dak li qed tgħid fuqi huwa minnu, jiena naċċettah;  jekk mhux veru, hija gidba.  Għaliex għandi nieħu għalija?”

7.  La ddaħħalniex fit-tiġrib, iżda eħlisna minn kull deni:

Fl-aħħar ta’ din it-talba, aħna nagħrfu d-djufija u d-dipendenza tagħna fuq l-għajnuna t’Alla.  Nitolbu biex ma nsibux lilna nfusna f’sitwazzjonijiet fejn niżbaljaw.  Nitolbu biex inkunu mħarsa mill-qawwa tal-ħażen li bih aħna mdawwrin.

Xi kitbiet jikkonkludu bil-kliem “Għax tiegħek hija s-Saltna, l-qawwa u l-glorja għal dejjem.  Ammen”, li hija użata minn ħafna denominazzjonijiet Kristjani u issa hija nkluża fit-talba Ewkarista Kattolika, wara t-talba tal-Missierna, imma hija mifruda minnha b’talba għall-paċi.  Huwa maħsub li din il-konklużjoni ġiet introdotta minħabba raġunijiet liturġiċi.

Fl-aħħar, apparti li nitolbu din it-talba bħalma nagħmlu s-soltu, tajjeb li kultant ngħiduha bil-mod, biċċa biċċa biex nifhmu tassew dak li nkunu qed ngħidu.  Inkella nistgħu ngħidu biss frażi minnha li tfisser ħafna għalina, u nirrepetuha sakemm issir tassew parti minna.

Sir membru tal-Moviment Kerŷgma jew ġedded is-sħubija.

Niżżel il-formola hawn: Kerygma Membership Form 2013-2014 upwards

Għal-iktar informazzjoni ibgħat email lill- info@kerygma.org.mt.

“We cannot be Christians part-time. If Christ is at the center of our lives, he is present in all that we do.” “Ma nistgħux nkunu nsara part-time. Jekk Kristu Hu fiċ-ċentru ta’ ħajjitna, Hu jkun preżenti f’kull ma nagħmlu.” Papa Francesco , Twitter , 19/08/13