Il-Moviment Kerygma ser jerġa jorganizza l-“Premju Żagħżugħ tas-Sena” bil-għan li joħroġ fil-beraħ l-impenn taż-żgħażagħ b’mod nisrani fis-soċjetà Maltija.

Il-Premju hu miftuħ għal dawk iż-żgħażagħ kollha li juru sens kbir ta’ impenn fil-ħajja nisranija tagħhom ta’ kuljum u għalhekk jkunu ta’ eżempju qawwi għal żgħażagħ oħra.

Niżżel kopja tar-Regolamenti u l-Formola ta’ Applikazzjoni biex tkunu tistgħu tinnomminaw xi żagħżugħ jew żagħżuha li taħsbu li jikkwalifikaw u jimmerithom jkunu nnominati għal dan il-premju prestiġjuż.

 

Niżżel ir-Regolamenti

 

Niżżel il-Formola

 

L-applikazzjonijiet  u d-dokumenti relattivi għall-Premju Żagħżugħ tas-Sena 2018 għandhom jaslu fl-uffiċċju tal-Moviment Kerygma sa mhux aktar tard mil-Ġimgħa, 9 ta’ Novembru 2018 fl-12.00pm.  Applikazzjonijiet li jaslu wara din id-data ma jkunux ikkunsidrati.

 

Il-Premju Żagħżugħ tas-Sena 2017 organizzat mill-Moviment Kerŷgma din is-sena intrebaħ mil-Agara Foundation.  Ir-rebbieħ tal-premju, li huwa sponsorjat minn APS Bank, ġie mħabbar mill-President tal-Moviment Kerŷgma, is-Sinjura Bernice Micallef.

L-Eċċellenza Tagħha Marie-Louise Coleiro Preca, President ta’ Malta, attendiet għal din iċ-ċerimonja u għall-quddiesa li tqaddset mil-Arċisqof Emeritus Pawl Cremona O.P. fil-Knisja ta’ San Duminku r-Rabat, il-Ġimgħa,  16 ta’ Frar 2018.  Preżenti wkoll għal din iċ-ċerimonja kien hemm is-Sinjura Bernice Micallef, President tal-Moviment Kerŷgma, Dr George Hyzler Ċerman tal-Board tal-Għażla, is-Sur Hervé Delpech jirrapreżenta lil-APS Bank u mistednin oħra.  It-trofew Premju Żagħżugħ tas-Sena ingħata lil-Stephanie Micallef li kienet qed tirrapreżenta lil Agara Foundation mill-Arċisqof Emeritus Pawl Cremona.

 

 

 

 

 

 

 

 

 

 

Il-grupp Agara Foundation ġie mwaqqaf fl-2014 wara li żewġ żgħażagħ kellhom esperjenza ta’ volontarjat fl-Ethopja u ddeċidew jiftħu iżjed il-ħidma volontarja tagħhom u jesploraw metodi moderni fil-qasam tal-volontarjat u t-teknoloġija.  Fl-Ethopjan, l-isem Agara jfisser “Nimxu Flimkien”, u dan huwa rifless kemm fil-logo kif ukoll fil-viżjoni tal-grupp, għax l-għan tiegħu huwa li jimxi flimkien ma’ individwi jew komunitajiet diversi bla’ ebda discriminazzjoni jew distinzjoni.  Agara jissapportjaw komunitajiet madwar id-dinja, fosthom fil-Kenya, fl-Ethopja, fil-Lebanon, fir-Rumanija, fil-Peru’ kif ukoll f’pajjiżna stess.  Il-fondazzjoni taħdem bis-sħiħ biex toħloq kuxjenza u jwasslu l-vuċi ta’ dawk li jinsabu f’minoranzi jew ta’ dawk li l-dinjità tagħhom mhix tiġi mħarsa u rispettata kif jixraq lill-umanita’.

Il-fondazzjoni Agara hija mqassma f’numru ta’ sub-teams iżda ix-xogħol ewlieni tagħha huwa li tiffoka fuq ġbir ta’ laptops second hand.  It-tim jifformattja dawn il-laptops, jinstalla l-Windows u l-Office li wara jintużaw biex jgħallmu nies, kemm lokali u internazzjonali, li m’għandhomx l-opportunità li jużaw t-teknoloġija.  F’ħafna mill-proġetti, Agara jissettjaw ‘laboratorji’ b’dawn il-laptops u joffru tagħlim varjat skont il-ħtieġa tal-individwi.

F’Awwissu 2016, Agara kellhom esperjenza volontarja f’Calais u Dunkirk fi Franza, żewġ kampijiet kbar tar-refuġjati.  Hemmhekk daqu u għexu xi ftit mit-tbatijiet li l-ħajja qed toffri lir-refuġjati li ħafna drabi jiġu ġġudikati u ppersegwitati.  It-tim ta’ Agara kienu jagħmlu sessjonijiet kuljum ta’ tagħlim ta’ IT kif ukoll attivitajiet oħra fejn kienu jferrħu u jagħtu spażju lir-refuġjati biex jitkellmu.

Fl-2017 Agara kellhom esperjenzi ta’ volontarjat fil-Lebanon u r-Rumanija fejn ħolqu laboratorji b’laptops li kienu nġabru minn Malta.  Saru diversi sessjonijiet ta’ tagħlim tal-IT jvarjaw minn dawk bażiċi sa oħrajn avvanzati bħal ECDL, photoshop eċċ.

Il-pjan tal-Agara għal 2018 huwa li jkomplu jsaħħu dak li qed jagħmlu bħalissa u jimplimentaw ukoll idejat u opportunitajiet ġodda.  Żewġ oqsma li qed jesploraw huma l-mużika u l-isports fil-volontarjat.  Proġett ieħor huwa li lokalment jagħtu lezzjonijiet lit-tfal li jgħixu ġewwa djar residenzjali filwaqt li jipprovdulhom laptops għal skop ta’ edukazzjoni.  Qegħdin ukoll jippjanaw proġetti f’kamp tar-refuġjati fil-Greċja, u oħrajn fl-Afrika t’Isfel, f’xi postijiet f’Asja u anke fl-Amerika t’Isfel.  Agara jieħdu ħsieb li jżommu follow-ups tal-proġetti diġa’ eżistenti biex jaraw li dawn għadhom sostenibbli u jaraw kif jistgħu isaħħuhom.

Iż-żgħażagħ nominati għal dan il-Premju kienu: Agara Foundation, Ryan Attard mill-Fgura, Felicienne Cini miż-Żebbuġ, Għawdex, Martina Fenech mill-Mosta, Mellieha Youth u Matthew Theuma mil-Għarb, Għawdex.

Dan it-trofew jingħata kull sena f’ġieħ il-mejjet Dr Rudolph Saliba li kien l-ewwel president tal-Moviment Kerŷgma.  L-Eċċellenza Tagħha Marie-Louise Coleiro Preca ferħet liż-żgħażagħ u l-Moviment Kerygma għall-organizzazzjoni ta’ dan l-avveniment annwali fejn jesponu il-ħidma volontarja ta’ tant żgħażagħ.  Hija qalet li il-parteċipanti kienu qed jagħmlu l-missjoni li tana’ Ġesù billi jagħtu ħattijhom għal ħaddieħor.  Bl-eżempju tagħhom kienu qed juru li jimpurtahom minn xulxin u minn hu fil-bżonn.  Huma kienu qed iservu ta’ pedament għas-soċjetà Maltija biex jibqa jgħix fi spirtu ta’ mħabba u paċi.

 

Il-Moviment Kerygma jorganizza l-“Premju Żagħżugħ tas-Sena” bil-għan li joħroġ fil-beraħ l-impenn taż-żgħażagħ b’mod nisrani fis-soċjetà Maltija.

Il-Premju hu miftuħ għal dawk iż-żgħażagħ kollha li juru sens kbir ta’ impenn fil-ħajja nisranija tagħhom ta’ kuljum u għalhekk jkunu ta’ eżempju qawwi għal żgħażagħ oħra.

Qed nibgħatu ma’ din l-ittra kopja tar-Regolamenti u l-Formola ta’ Applikazzjoni biex tkunu tistgħu tinnomminaw xi żagħżugħ jew żagħżuha li taħsbu li jikkwalifikaw u jimmerithom jkunu nnominati għal dan il-premju prestiġjuż.  Kopja tar-regolamenti u l-applikazzjoni tinsab ukollminn hawn:

• Formola t’Applikazzjoni
• Regolamenti

 

L-applikazzjonijiet  u d-dokumenti relatati għall-Premju Żagħżugħ tas-Sena 2017 għandhom jaslu fl-uffiċċju tal-Moviment Kerygma sa mhux aktar tard mil-Ġimgħa, 3 ta’ Novembru 2017 fl-12.00pm.

 

 

Il-Premju Żagħżugħ tas-Sena 2016 organizzat mill-Moviment Kerŷgma din is-sena intrebaħ minn James Borg Cumbo minn San Gwann.  Ir-rebbieħ tal-premju, li huwa sponsorjat minn APS Bank, ġie mħabbar mill-President tal-Moviment Kerŷgma, is-Sinjura Bernice Micallef.  Ingħata wkoll Ċertifikat ta’ Rikonoxximent Speċjali lil Sara Portelli minn Birkirkara għax-xogħol volontarju li wettqet favur il-kultura tal-ħajja speċjalment għal dawk li m’għandomx vuċi kif ukoll għal ħidma tagħha fi ħdan il-Komunità Franġiskana.

Il-preżentazzjoni tat-trofew saret mill-Eċċellenza Tagħha Marie-Louise Coleiro Preca, President ta’ Malta, fi tmiem ta’ quddiesa li saret fil-Knisja ta’ San Duminku r-Rabat, il-Ġimgħa, 3 ta’ Frar 2017.  Preżenti wkoll għal din iċ-ċerimonja kien hemm ir-raġel tal-President is-Sur Edgar Preca, il-Prof. Emanuel P. Delia, Ċermen tal-APS Bank li sponsorjaw l-okkażżjoni, s-Sinjura Bernice Micallef, President tal-Moviment Kerŷgma, Dr George Hyzler Ċerman tal-Board tal-Għażla u mistednin oħra.

James Borg Cumbo huwa  żgħażugħ ta’ 25 sena minn San Gwann jaħdem ma’ kumpanija tal-insurance.  Fl-2012, James mar ma’ sħabu għal youth exchange ġewwa l-Fillandja.  Hawn il-parteċipanti kienu mħeġġa jirriflettu fuq ir-realtajiet tal-ħajja li hinn minn xtutna u għalhekk tkebbset ġewwa fihom il-ħajra li jagħmlu esperjenza missjunarja.  Minn hawn nibtet l-idea ta’ Karibu! Malta (Karibu tfisser Merħba bis-Swahili).

James kien involut f’dan il-proġett biex iħajru żgħażagħ imorru l-Kenja taħt skema tal-Youth in Action iżda l-applikazzjoni għal fondi ma ġietx milquha.  Iż-żgħażagħ li kienu nteressati jagħmlu din l-esperjenza għalhekk iddeċidew li ma kienx hemm triq oħra ħlief li jmorru xorta waħda u jħallsu l-flus min buthom.  James dak iż-żmien kien segretarju tal-grupp u kien responsabbli għal ġbir tar-rekords lokali kif ukoll fl-ippjanar tal-attivitajiet għat-tfal fil-Kenja.  Għamlu kuntatt mal-Arċisqof Emanuel Barbara fil-Kenja, u f’Awwissu tal-2013 il-grupp mar f’dan il-pajjiż u minn hawn bdew l-esperjenzi ta’ Karibu! Malta.  Għamlu xogħol ta’ manteniment ġenerali, attivitajiet mat-tfal u ssoċjalizzaw man-nies lokali tal-Malindi u xi villaġġi oħra fil-viċin.  Fl-istess ħin raw x’proġetti setgħu jagħmlu għall-futur.  Hawn James tkellem mat-tfal biex jara kif kienu jħossuhom u verament x’jixtiequ.  Ra d-differenza bejn dak li jkunu jridu tfal Maltin u dawk tal-Kenja li xtaqu affarijiet bażiċi tal-ħajja.

Il-grupp kien tant maħkum mill-impatt ta’ din l-esperjenza speċjalment meta rritornaw għal kumditajiet ta’ djarhom, li ddeċidew li din żgur ma kienitx se tkun esperjenza ta’ darba biss u għalhekk waqqfu kumitat apposta, b’James jinħatar President.  Huwa kien responsabbli li jfassal pjan ta’ attivitajiet matul is-sena kollha għal ġbir ta’ flus u kif l-aħjar li jintefqu.  Inħolqu esperjenzi ta’ team-building għall-parteċipanti, ippjanaw il-mawra tal-2014 u l-komunikazzjoni kontinwa ma’ l-Arċisqof Barbara.  Din id-darba marru Ruiru u James u l-voluntiera l-oħra qagħdu għand is-sorijiet tal-Qalb ta’ Ġesù.  Hawn it-tfal kienu jiġu kuljum kif ukoll in-nies tat-triq.  Il-grupp Malti kien jgħin fit-tisjir u tqassim tal-ikel u l-finanzjament tiegħu.  Għat tfal din id-dar kienet l-unika speranza għalihom.  Karibu! Malta ffinanzjat ukoll kċina ġdida sabiex it-tfal setgħu wkoll jitgħallmu jsajru.  Apparti minn hekk sar xogħol ta’ tqejid ta’ madum fil-knisja tal-viċin.  Sar ukoll ristrutturar tal-iskola St. Theresa Nuzzo.

Fl-2015 u fl-2016 ix-xogħol kien ikkonċentrat ġewwa Kipangajeni, villaġġ li jinsab fil-periferija ta’ Malindi.  Ġiet mibnija u ffinanzjata wkoll l-ewwel binja magħmula mill-ġebel li tintuża bħala kappella, kif ukoll għal attivitajiet varji bħal edukazzjoni għan-nisa, skola għat-tfal żgħar u post fejn jiltaqgħu r-residenti tal-villaġġ.  Bnewlhom ukoll l-ewwel toilet pubbliku.

Fl-2016 tkompla dan il-proġett billi żiedu 2 kmamar li se jintużaw bħala klassijiet u 2 kmamar iżgħar bħala uffiċini għal-għalliema.  Saru wkoll żewġ toilets oħra pubbliċi kif ukoll bnew kanal madwar is-sala ħalli jkollhom aċċess għal ilma nadif mix-xita.

James s’issa mar il-Kenja erbgħa snin wara xulxin u qed jippana oħra għal-Lulju 2017.  Din id-darba se jinbeda proġett ta’ 3 snin ġewwa Mbaoni, villaġġ ieħor l-barra ħafna miċ-ċentru ta’ Malindi u li għalhekk ir-riżorsi tiegħu huma ħafna limitati.  Karibu! Malta diġà introduċa ruħu magħhom bil-bini ta’ bore-hole.  L-iskola trid tinbena mill-ġdid peress li dik li għandhom hija magħmula minn zkuk iddeterjorati u m’għandomx bankijiet għat-tfal li jogħqodu bilqegħda fl-art.  Peress li l-villaġġ huwa kbir, hemm bżonn ta’ 11-il klassi, 3 uffiċini amministrattivi u 5 toilet pits.  Ir-residenti jixtiequ wkoll knisja li tintuża wkoll bħal post fejn jiltaqgħu bħala komunità kif ukoll isservi għall-edukazzjoni tan-nisa.  L-ispiża ta’ dan il-proġett kollu hija stmata li tlaħħaq għal €90,000.

Ir-rwol ta’ James bħala president huwa li bl-għajnuna tal-membri l-oħra, l-ewwel jagħżlu voluntiera addatati għax-xogħol u li jkunu kapaċi jaħdmu bħala tim.  Wara jorganizzalhom laqgħat regolari biex jippreparawhom sewwa għal dak li se jsibu fil-Kenja u x’ikun mistenni minnhom.  Fl-istess ħin James jibda jinnegozja għal-aħjar prezzijiet tal-ivjaġġar u biex ikunu jistgħu jtellgħu kemm jista’ jkun bagalji biex jimlewhom bil-ħwejjeġ għat-tfal.  Jibdew ukoll l-attivitajiet għal ġbir ta’ flus għall-proġetti, normalment waħda kull xahar.  James jikkuntattja nies biex iġib sponsorships, japplika għall-permessi neċessarji u jqassam ix-xogħol lil-parteċipanti biex jintlaħqu l-aspettattivi tagħhom biex kulħadd iħossu parti mill-proġett, u fl-stess ħin jara li x-xogħol isir kollu.  Iżomm ukoll kuntatt kontinwu mal-Malindi biex jara li kollox għadu għaddej sew u li l-Arċisqof tal-Malindi u l-assistenti tiegħu qed jieħdu ħsieb il-permessi neċessarji.  Lokalment jagħmel kuntatti mad-dipartiment tas-Saħħa biex il-parteċipanti jieħdu t-tilqim neċessarju u fl-istess ħin iżomm rekords ta’ xi kundizzjonijiet ta’ saħħa speċjali tal-parteċipanti biex jiżgura s-saħħa tagħhom waqt l-esperjenza.

Il-proġett ġewwa Mboani huwa bla dubju l-akbar proġett li qatt daħlu għalih Karibu! Malta u James għandu fiduċja li bis-sapport kontinwu tal-ġenerożità tal-Maltin flimkien max-xogħol tal-grupp, jirnexxielhom jagħmluh u minn hemm ikomplu jħarsu l-quddiem.

Iż-żgħażagħ nominati għal dan il-Premju kienu: James Borg Cumbo minn San Gwann, Alan Joseph Buhagiar minn Haż-Żabbar, Fabio Cini miż-Żebbuġ Għawdex, Sarah Magro mill-Birgu, Mellieha Youth u Sara Portelli minn Birkirkara.

Dan it-trofew jingħata kull sena f’ġieħ il-mejjet Dr Rudolph Saliba li kien l-ewwel president tal-Moviment Kerŷgma.  L-Eċċellenza Tagħha Marie-Louise Coleiro Preca ferħet lill-rebbieħ u lill-finalisti l-oħra u l-Moviment Kerygma għall-organizzazzjoni ta’ dan l-avveniment annwali fejn jesponu il-ħidma volontarja ta’ tant żgħażagħ.   Hija qalet li x-xogħol li wettqu dawn iż-żgħażagħ u ħafna oħra, jagħtuha inkoraġġiment u fiduċja fis-socjeta’ Maltija u hemm bżonn li dawn iż-żgħażagħ ikomplu ikaxkru żgħażagħ oħra biex ikomplu ikabbru l-ġid li qed jagħmlu kemm f’Malta u f’pajjiżi oħra speċjalment fl-Afrika.  Hija sejjħet dawn iż-żgħażagħ bħala l-peace builders tal-komunita’ tagħna u kienu qed jagħtu lezzjoni li dawk in-nies li qed jinqdew bil-biża biex imexxu messaġġi skorretti ta’ biża fil-konfront ta’ nies li għandhom bżonn ir-rispett u dinjita’.  Ma jistax ikollna tensjonijiet soċjali għax dawn qegħdin hawn.  Dawn il-Maltin huma nies li għalkemm ma jiddejjqux idaħħlu idejhom fil-but biex jgħinu l-missjoni, meta jaraw xi ħadd minn dawn in-nies f’pajjiżna, jarawh bħal xi ħadd ta’ barra minn hawn.  Għalhekk hemm bżonn li jkun hemm xi ħadd li jwassal il-verita’ ta’ dawn is-sitwazzjonijiet ta’ ħlejjaq t’Alla li qed jaħarbu minn gwerrer, faqar u ġuħ u jingħataw rispett, dinjita’ u l-id tal-ħbiberija li dawn iż-żgħażagħ b’qalb imfawwra b’imħabba u solidarjeta’ kienu qed jagħtu.  Għalhekk irringrazzjathom u qalet li hi kburija biex xogħol li kienu qed jagħmlu bħala peace-builders u ħeġġithom iwasslu messaġġi ta’ din il-verita’ fl-ambjent lokali.

 

Il-Moviment Kerygma jorganizza l-“Premju Żagħżugħ tas-Sena” bil-għan li joħroġ fil-beraħ l-impenn taż-żgħażagħ b’mod nisrani fis-soċjetà Maltija.

Il-Premju hu miftuħ għal dawk iż-żgħażagħ kollha li juru sens kbir ta’ impenn fil-ħajja nisranija tagħhom ta’ kuljum.

Tistgħu tinnomminaw xi żagħżugħ jew żagħżugħa li taħsbu li jikkwalifikaw u jimmerithom jkunu nnominati għal dan il-premju prestiġjuż.  Tistgħu tinnominaw aktar minn persuna waħda, billi tibgħatu applikazzjoni separata. Kopja tar-regolamenti u l-applikazzjoni tista tniżżilhom minn hawn:

Niżżel l-applikazzjoni.

Niżżel ir-regolamenti.

L-applikazzjonijiet  u d-dokumenti relattivi għall-Premju Żagħżugħ tas-Sena 2015 għandhom jaslu fl-uffiċċju tal-Moviment Kerygma sa mhux aktar tard mill-Ġimgħa 11 ta’ Novembru 2016 fl-12.00pm.

 

 

12 ta’ Frar 2016

 

Il-Premju Żagħżugħ tas-Sena 2015 organizzat mill-Moviment Kerŷgma din is-sena intrebaħ mill-grupp Joy Boys mill-Għarb, Għawdex.  Ir-rebbieħ tal-premju, li huwa sponsorjat minn APS Bank, ġie mħabbar mill-President tal-Moviment Kerŷgma, is-Sinjura Tania Borg.

Il-preżentazzjoni tat-trofew saret mill-Eċċellenza Tagħha Marie-Louise Coleiro Preca, President ta’ Malta, fi tmiem ta’ quddiesa li saret fil-Knisja ta’ San Duminku r-Rabat, il-Ġimgħa, 12 ta’ Frar 2016.  Preżenti wkoll għal din iċ-ċerimonja kien hemm ir-raġel tal-President is-Sur Edgar Preca, il-Prof. Emanuel P. Delia, Ċermen tal-APS Bank li sponsorjaw l-okkażżjoni u s-Sinjura Tania Borg, President tal-Moviment Kerŷgma, Dr George Hyzler Ċerman tal-Board tal-Għażla u mistednin oħra.

“ Joy Boys huwa grupp ta’ żgħażagħ, ta’ bejn is-sittax u t-tletin sena, mwielda l-Għarb.  Żgħażagħ li bla dubju jmissu qalb kulħadd għal ħidma u l-impenn tagħhom fil-volontarjat b’mod speċjali r-residenti ta’ l-Għarb bil-modi ta’ impenji li juru lejn kulħadd.

Dan il-grupp ta’ żgħażagħ tista’ tgħid li jmiddu jdejhom għal kollox b’mod partikolari xogħol ta’ l-idejn.  Fil-ħin liberu tagħhom jagħtu servizz fil-bżonnijiet fil-knisja, iċ-ċentru parrokkjali u xogħol fil-maħżen tal-armar tal-festa, iffukati fuq xogħol ta’ restawr fuq l-armar tal-festa tar-raħal.  Dan jinkludi brix, żebgħa, manutenzjoni fuq l-armar kif ukoll jagħmlu ‘fiber glass’ li jieħu ħafna ħin ta’ xogħol ta’ paċenzja u dedikazzjoni iżda fuq kollox xogħol li jitlob attenzjoni minn l-att ta’ saħħa.  Kull meta tkun se ssir xi attivita’ fir-raħal dawn ikunu minn ta’ l-ewwel li jagħtu daqqa t’id biex kollox jimxi ħarir.  Ta’ sikwit jorganizzaw ikliet u attivitajiet għal fundraising biex imbagħad il-flus imorru f’ħafna manutenzjonijiet li jsiru fir-raħal b’mod partikolari għall-manutenzjoni taċ-ċentru parrokkjali.  Dan iċ-ċentru huwa t-tieni dar għaż-żgħażagħ tal-lokalita’ fejn isirilhom laqgħat ta’ informazzjoni spiritwali, attivitajiet u ħafna aktar sabiex dawn iż-żgħażagħ jkollhom opportunitajiet li jiltaqgħu f’ambjent sabiħ u li jkollhom iċ-ċans li jitgħallmu aktar.

Kif tkun qed toqrob il-festa tar-raħal dawn iż-żgħażagħ jinsew kollox biex ikunu jistgħu jiffokaw fuq l-armar, manutezjoni u ħafna aktar li għandu x’jaqsam magħha.  Dan jolqot armar fil-knisja ta’ ġewwa u ta’ barra, armar madwar ir-raħal,  attivitajiet oħra u ħafna aktar.  Ta’ min jgħid li dawn iż-żgħażagħ kollha għandhom l-impjieg tagħhom u għalhekk iqattgħu l-bqija tal-ħin tagħhom jaħdmu.  Xi drabi jibqgħu jaħdmu matul il-lejl.  Tista’ tgħid li kważi biddlu l-bozoz kollha għal dawk LED u saru wkoll fistuni ġodda.  Ħafna drabi jagħmlu xogħol ta’ armar fejn bosta drabi ikunu fil-għoli u jkun ta’ periklu.

Fis-sajf li għadda, dan il-grupp għamel esperjenza missjunarja ġewwa l-Albanija, fil-parroċċa

ta’ Dun Manwel Cutajar jisimha Torovice.  Hemmhekk iż-żgħażagħ tal-Għarb wettqu xogħol ta’ kostruzzjoni u manutenzjoni fi djar ta’ 3 familji fost l-ifqar tal-Albanija.  Prinċipalment dan kien jinkludi kisi u żebgħa tal-ħitan tad-djar, installazzjoni tas-sistema tal-elettriku u f’każ minnhom kisi tal-art.  L-ispejjeż għal din il-kostruzzjoni tħallsu mid-donazzjonijiet li ġabru mil-parruċċani tal-Għarb.  Dawn iż-żgħażagħ ħadmu bla heda.  Ta’ min isemmi li f’ġurnata minnhom dawn għaġnu b’idejhom 17-il xkora kisi u 5 xkejjer siment.

Huma ppreparaw ukoll u qassmu 150 hamper b’ikel bażiku għall-ifqar fost il-fqar tal-Albanija.  Fost l-oħrajn dan kien jinkludi ross, għaġin, dqiq u żejt.  Il-hampers tqassmu f’raħal mitluf ġol-muntanji magħruf bħala Malecaj-Kampi, post li fil-passat kien kamp ta’ konċentrament.  Dawn il-hampers li ma jiswew xejn għalina huma kollox għalihom.

Huma rregalaw ukoll baqra lill-mara armla fqira ta’ 38 sena, mara li sofriet ħafna mir-raġel tagħha meta kien għadu ħaj.  Din il-baqra li tiswa €700, ġiet iffinanzjata minn familja mill-Għarb Għawdex u ser tkun ta’ għajnuna kbira għall-għixien ta’ din il-mara miskina u l-erba ulied tagħha.

Iz-żgħażagħ irregalaw wkoll 8 nagħġiet li jiswew €500 biex koppja oħra jkollha biex tgħajjex lil 4 uliedha.

Huma żaru ukoll dar li tospita persuni b’diżabilità severa mmexxija mis-Sorijiet ta’ Madre Tereża, fir-raħal ta’ Shkoder.

Dan il-grupp ta’ żgħażagħ bla dubju ma jieqaf qatt.  Il-kalendarju ta’ attivitajiet għas-sena 2016 jinsab preparat u mimli daqs bajda.  Uħud mill-attivitajiet ikunu fundraising u oħrajn attivitajiet filantropiċi kemm fil-komunita’ parrokkjali u anke oħrajn f’istituti barra l-lokalita’.  Wara l-esperjenza fil-missjoni fl-Albanija dan il-grupp ta’ żgħażagħ iħares ‘il quddiem għall-esperjenza oħra, fejn il-grupp jinsab ċert li oħrajn ser jakkumpanjawhom.  L-esperjenza fl-Albanija ħalliet impatt pożittiv fuqhom spiritwalment u soċjalment u b’mod speċjali fuq il-popolazzjoni fqira ta’ l-Albanija.  Iż-żgħażagħ fi ħdan dan l-grupp issibhom dejjem lesti għal kull eventwalita’ sabiex iwettqu kull xorta ta’ xogħol fil-volontarjat u jwettqugħ b’dedikazzjoni u impenn kbir.”

Iż-żgħażagħ nominati għal dan il-Premju kienu: Gabriel Cassar minn Kirkop, Nicholas Cassar miż-Żebbuġ Għawdex, Joy Boys mill-Għarb Għawdex, Nikita Mizzi mill-Birgu u l-Oratorju Salesjan Sliema.

Dan it-trofew jingħata kull sena f’ġieħ il-mejjet Dr Rudolph Saliba li kien l-ewwel president tal-Moviment Kerŷgma.  Is-Sinjura Marie-Louise Coleiro Preca ferħet lill-rebbieħa, l-finalisti l-oħra u l-Moviment Kerygma għall-organizzazzjoni ta’ dan l-avveniment annwali fejn jesponu il-ħidma volontarja ta’ tant żgħażagħ. Qalet li l-iktar ħaġa importanti mhux li tagħti l-flus iżda li tagħti mill-ħin tiegħek biex tgħin lill-oħrajn, ħin li qatt ma jistax jiġi rkuprat. Hija qalet li x-xogħol volontarju jittrasforma l-persuna li tagħmlu imma speċjalment is-soċjetà nnifisha f’pajjiż li għandu bżonn kbir tal-valur tal-imħabba. Għalkemm għal grazzja ta’ Alla aħna m’għandniex gwerer, ġirien qrib tagħna huma għaddejjin minn ħafna konflitti u żminijiet diffiċli ħafna b’familji sħaħ għaddejjin minn tant tbatija u telf, bażikament minħabba l-riżultat ta’ l-egoiżmu.  Għalhekk huwa importanti ħafna li aħna nkomplu nsaħħu l-valur tal-imħabba għall-oħrajn anke fis-soċjetà tagħna li qed tiffaċċja sfidi kbar.  Hemm il-possibbiltà li jiġri lilna wkoll li l-egoiżmu jikber u ninsew it-tbatija ta’ ħaddieħor.  Għalhekk huwa  importanti li dawn iż-żgħażagħ ikomplu jgħinu lill-oħrajn u b’hekk jibdlu s-soċjetà tagħna.  Dan il-valur tal-imħabba għall-oħrajn kien mgħoddi lilna minn missirijietna u huwa importanti li jkompli jikber u jissaħħaħ u li aħna ngħaddu dawn il-valuri lill ġenerazzjonijiet futuri.  Hija temmen li hemm ħafna li qed jgħinu f’dan ir-rigward u għalhekk hi awgurat lil finalisti li qatt ma jieqfu jagħtu daqqa t’id-oħrajn fil-bżonn.