Il-laqgħa bdiet bit-Talba tal-Moviment.

 

Imbagħad inqara l-Vanġelu minn San Luqa, k96, v287-36 ir-rakkont tat-Trasfigurazzjoni ta’ Ġesu’ fuq it-Tabor.

 

Ir-Randan u l-Avvent huma “t-tempi forti” – żminijiet qawwija – li fihom il-Knisja tistedinna biex nagħmlu sforz akbar ħalli ntejbu l-ħajja spiritwali tagħna, biex dejjem nagħmlu passi l-quddiem, u naturalment nipperseveraw, mhux wara li jgħaddu nerġgħu lura fejn konna qabel!!

 

Matul dawn il-ġimgħat il-Knisja tippreparana għall-Għid il-Kbir, il- qofol kollu tat-twemmin tagħna, b’serje ta’ Vanġeli li jgħinuna nirriflettu aħjar fuq il-mixja tagħna lejn l-iskop għalfejn ninsabu fid-dinja – il-ħajja ta’ dejjem.

 

Il-Ħadd li għadda kellna t-Tentazzjonijiet. Il-Knisja ttina dis-silta biex tgħinna nirriflettu, nifhmu li Ġesu’ kellu jgħaddi mill-istess tiġrib li ngħaddu minnu aħna biex toħroġ l-umanita’ kollha Tiegħu, biex jurina li t-tentazzjonijiet nistgħu negħlbuhom – kif qal il-Papa Franġisku – mhux bid-djalogu max-xitan, imma bil-Kelma t’Alla u bil-familjarita’ tagħna magħha.

 

F’dan it-tieni Ħadd, il-Knisja ttina t-Trasfigurazzjoni – il-glorja, it-teofanija  (Alla juri min hu Ibnu) l-oħra wara dik tal-Magħmudija.

 

Wara li affronta t-tentazzjonijiet, issa Ġesu’ qed jurina għala hu tajjeb li nitqabdu kontra l-ħażen, li nagħmlu ħilitna biex ngħelbu lilna nnfusna, li “vale la pena” nitqabdu spiritwalment, għax l-Għid ifisser li ngħaddu minn dil-ħajja għal stat li San Pawl jgħidilna li la għajn qatt ma rat, la widna qatt ma semgħet x’ħejja Alla għal dawk li jħobbuh.

 

Ħajjitna spiss donnha bla kulur, ċatta, rutina, imma l-ħajja fi Kristu, qribu, tfisser li ngħaddu minn dil-medjokrita’ u nidħlu fi stat ta’ ħajja ġdid, mill-medjokrita’ ngħaddu għas-sbuħija, mhux dik fiżika li tipproponielna l-ħin kollu d-dinja, il-maskra li, skond il-Papa Franġisku, jekk nilbsuha Alla ma jagħrafniex!

 

Ifisser li mlll-vanaglorja (kelma li kien iħobb isemmi San Ġorġ Preca) nimxu lejn il-vera glorja, dik ta’ Alla, ninsew l-egoiżmi tagħna, li naħsbu li aħna ċ-ċentru ta’ kollox, biex nixbħu lil Ġesu’ fl-għotja, fl-imħabba vera.

 

Fit-Trasfigurazzjoni, Ġesu’ qed juri biċ-ċar li hu l-verita’, li tiddi aktar mix-xemx, sopranaturali: donnu jiftħilna purtiera, li simbolikament tiċċarrat fit-tempju fil-ħin ta’ mewtu fuq il-Kalvarju – il-mewt li tiftħilna l-bieb tal-Ġenna.

 

Fuq it-Tabor Ġesu’ juri d-divinita’ Tiegħu biex jipprepara lid-dixxipli, u lilna, ħalli jaffrontaw il-passjoni li kellu jgħaddi minna, bit-tama u bil-konvinzjoni li dak li hemm imħejji għal min jaċċetta r-rieda tal-Missier f’ħajtu, hu ta’ min jagħti kasu u jaċċettah f’ħajtu.

 

Ma nistgħux ninsew li fit-tagħlim Tiegħu, f’waħda mit-tħabbiriet tal-passjoni, lid-dixxipli kien qalilhom (Mk: 10:29) “Tassew ngħidilom, li fost dawk kollha li minħabba fija u l-Evanġelju jħallu lil darhom jew lil ħuthom jew lil ommhom jew lil missierhom jew lil uliedhom jew l-għelieqi tagħhom, ma hemm ħadd fosthom li minn issa, f’din id-dinja stess, ma jirċevix, għal mitt darba iktar, djar, aħwa, subien u bniet, ommijiet, ulied u għelieqi flimkien ma’ persekuzzjonijiet, u l-ħajja ta’ dejjem fiż-żmien li ġej”.

 

Donnu li tant isemmi affarijiet tajbin li se jiġru fid-dinja, li ma nagħtux importanza lill-aħħar waħda: il-persekuzzjoni. Jekk irridu nfasslu verament ħajjitna fuq dik ta’ Kristu, l-persekuzzjonijiet ma mistgħu nwarrbuhom bl-ebda mod. Jonqosna biss li nimtlew bit-tama u nsaħħu l-fidi bit-twemmin li xorta waħda “vale la pena” li ngħixu għall-verita’. Il-verita’ x’inhi? Hi Ġesu’, Iben Alla li ġie fid-dinja biex jurina liema hi l-verita’ li lesta tissallab mhux biss għall-ħbieb, imma wkoll għall-għedewwa.

 

Kif qed naffrontaw il-provi tal-ħajja? Jew nippruvaw ngħelbuhom bil-ħiliet tagħna biss? Insibu li minflok inħollu l-kobob inkunu qed ngħaqqduhom aktar! Iinkella nħarsu lejhom bħala waqtiet li bihom nistgħu nsaħħu l-fidi tagħna f’Alla, għaliex Hu jaf għaliex iġarrabna. Bħal ma qal Ġob: “nilqgħu t-tajjeb mingħand Alla u l-ħażin le?”

 

F’ħajjitna lkoll kemm aħna għaddejin, u għad ngħaddu, minn mumenti ta’ dlam, mumenti li fihom donnu xejn ma jista’ jiċċaqlaq: kif ngħidu, is-sabiħ malajr jgħaddi imma l-ikrah donnu ma jkun irid jintemm qatt! F’dawn iċ-ċirkostanzi x-xitan għandu ħakma iktar fuqna, jissuġġerilna biex nintelqu, li ndendlu geddumna u nippruvaw naraw għaliex u f’min se nwaħħlu. It-tentazzjoni tax-xitan f’dal-waqtiet hi: “Qed tara l-fidi tiegħek fejn wasslitek?”

 

Hemm ħafna li jsostnu li Alla kien nieqes, ma mpurtahx mill-kampijiet tal-konċentrament. Veru? Jaqaw San Massimiljanu Kolbe, Edith Stein, mhux fil-kamp tal-konċentrament kienu? Tgħid dawk ma kienux preżenza t’Alla bix-xhieda tagħhom? Il-verita’ hi li f’dawk il-postijiet ta’ dlam il-bniedem qal lil Alla: “Hawn mhux postok” u r-riżultat nafu lkoll x’inhu.

 

L-istess jiġri fil-ħajja tagħna. Nirriflettu ftit kemm-il darba waqajna fil-kompromessi mal-fidi tagħna u b’dak li għamilna. Lil Alla għidnilu: “F’din tindaħallix. Hawn irrid nagħmel fattija”.

 

Imma f’dawn iċ-ċirkostanzi, l-qrubija tagħna mal-Mulej turina li għad ma wasalniex fit-terminus, dak li nkunu qed inġarrbu jkun biss wieħed mill-istages tal-vjaġġ. Importanti li ma nippruvawx ninżlu minn fuq is-salib, imma nitolbu biex, bl-għajnuna tal-Ispirtu s-Santu, nagħrfu kif inġorruh. Nistgħu ngħidu li l-Ispirtu s-Santu għandu jkun iċ-Ċirinew tagħna fil-mumenti tad-dlam.

 

Importanti li mid-dlam ngħaddu għad-dawl, niskopru s-sbuħija tar-rabta tagħna mal-Mulej. Għal dan kemm l-istedina tal-Knisja fiż-żmien tar-Randan biex inżidu aktar it-talb, is-sawm u l-karita’. Ir-relazzjoni tagħna ma’ Ġesu’ nsaħħuha biss bit-talb.

 

Insibu ħin biex nitolbu, jew il-ġurnata tagħna hi mimlija tant li t-talb inqisuh bla mportanza? It-trasfigurazzjoni ta’ Ġesu’ saret waqt li kien qed jitlob, waqt li kien f’għaqda intima mal-Missier. Kollox, kull ma nagħmlu, hu aktar importanti mit-talb?

 

Madanakollu nafu li hu fil-ħin tat-talb li l-Mulej jista’ jdawwalna, jurina t-triq, jurina x’inhu l-aktar importanti u urġenti, kif għandna naffrontaw ċerti sitwazzjonijiet. Attenti, għax ħafna drabi t-talb tagħna, kif qal reċentament il-Papa Franġisku, jkun talb biex nissodisfaw ix-xewqat tagħna, ninsew li fil-Missierna ngħidu: “ikun li trid Int”.

 

Forsi din hi l-qabża ta’ kwalita’ li titlob minna l-Knisja fi żmien ir-Randan: inwarrbu ftit għalina waħedna, inwarrbu mill-ħafna banalitajiet u preġudizzji li jaħkmuna bla ma nindunaw, u ninżlu ftit aktar fil-fond ħalli nifhmu x’inhu l-proġett ta’ Alla għalina, biex nagħraf il-limitazzjonijiet tiegħi u, bħal ma qed itammbrilna spiss il-Papa Franġisku, nammetti li jien midneb, imma midneb maħfur, u għax maħfur, ikolli l-qawwa li naħfer lil min jagħmilli l-ħsara. B’hekk nistgħu nsaħħu l-fidi.

 

It-teofanija tat-Tabor hi: ” Isimgħu Lilu. Dan hu Ibni l-Maħbub”.

 

Biex nagħrfu s-sabiħ, ma nistgħux naħarbu minn dan il-kmand li tana l-Missier fuq it-Tabor, ma nistgħux nieqfu biss fuq dak li jidher, jeħtieġ li nisimgħu biex l-atteġġjamenti tagħna jsiru dejjem aktar jaqblu mal-messaġġ li ġabilna Ġesu’. Nisimgħu l-Vanġelu, imma s-smigħ waħdu mhux biżżejjed. Irridu nħallu l-Kelma t’Alla tidħol ġo qalbna, biex tibdilhielna, u dak li nisimgħu imbagħad nipprattikawh. anke meta jiswielna tbatija, offiżi, twarrib, inġustizzji …. il-persekuzzjonijiet li semmejna qabel.

 

Ħafna ma jimxux wara Ġesu’ għax l-aljenazzjoni ma tħallihomx jifhmu u jagħrfu s-sbuħija ta’ dil-mixja, jibqgħu dejjem jgħixu bis-superfiċjalita’, jimpurtahom biss mill-qoxra ta’ barra għax aktar jimpurtahom li jfaħħruhom u jammirawhom in-nies.

 

Is-sbuħija tal-fidi mhix estetika, xi ħaġa li tidher, mhix “beauty parlour”. Is-sbuħija tal-fidi fi nterna, tiġi mill-qalb li tħobb sa ma tweġġa’ (Madre Tereża), li taf tingħata għall-oħrajn b’mod li tinsa’ lilha nfisha.

 

Il-messaġġ tat-Trasfigurazzjoni jfisser li n-nisrani jgħix f’mixja biex jifhen aħjar il-missjoni li għandu li bis-saħħa tagħha hu konvint li għad ikun ma xi ħadd li hu ferm sabiħ li tkun Miegħu għall-eternita’.

 

Il-laqgħa għalqet bit-Talba tal-Missierna.

Il-laqgħa bdiet bit-Talba tal-Moviment. Wara nqara l-Vanġelu minn San Luqa, k4,  v 1-13.

 

Ir-rakkont tat-tentazzjoni fid-deżert jaqbad mar-rakkont tal-Magħmudija ta’ Ġesu’, li hu meħud ukoll mill-Vanġelu ta’ San Luqa. F’dan ir-rakkont, Ġesu’ għaraf x’kellha tkun il-missjoni Tiegħu. Għaraf li kellu jaqdi l-missjoni tal-Qaddej t’Alla li kien ħabbar Iżaija: “…Hu refa’ fuqu l-mard tagħna, tgħabba bin-niket tagħna. Aħna ħsibnieh bħal wieħed ikkastigat, mitluq minn Alla u miġjub fix-xejn. Iżda Hu kien miġruh minħabba fi dnubietna, misħuq minħabba fi ħżunitna. Għas-saħħa tagħna waqa’ l-kastig fuqu, u bis-swat Tiegħu sibna l-fejqan tagħna” (Iż 53, 4-5). Ġesu’ għaraf dan kollu fid-dikjarazzjoni mis-sema: “Inti Ibni l-għażiż, fik sibt il-għaxqa Tiegħi” (Lq 3, 22). Ġesu’ rċieva l-Ispirtu s-Santu biex jagħraf x’kienet il-missjoni Tiegħu, u anki biex jipprepara għaliha.

 

L-ewwel vers tal-Vanġelu jgħid “… mimli bl-Ispirtu s-Santu reġa’ lura mill-Ġordan u l-Ispirtu ħadu fid-deżert”. Fil-magħmudija fil-Ġordan, Ġesu’ niżel fuqu l-Ispirtu s-Santu, u mqanqal mill-istess Spirtu, erħielha lejn id-deżert biex iħejji ruħu għall-missjoni Tiegħu, biex jirrifletti fuq dak li kien dieħel għalih. Mar fid-deżert, mhux sempliċement biex jeħles mill-għagħa tan-nies fil-bliet u l-irħula tal-Palestina, imma anki għaliex id-deżert kien jirrappreżenta l-ambjent fejn ir-rapport bejn Alla u Iżrael kien fl-aqwa tiegħu. Il-profeta Hosegħa jwiegħed li Alla lest jirrestawra r-rapport idejali li kellu ma’ Iżrael, u jgħid: “Għalhekk, araw, jiena se niġbidha, neħodha fid-deżert u lil qalbha nkellem”.

 

Kien hemm diversi gruppi li għażlu li jgħixu fid-deżert għal din ir-raġuni. Kien hemm il-komunita’ ta’ Qumran, li ħallewlna d-dokumenti tal-Baħar il-Mejjet. Kien hemm Ġwanni l-Battista. U fost dawk li baqgħu jgħixu fl-ibliet, kien hemm min baqa’ jgħix l-istil tal-ħajja tad-deżert. Fosthom insibu n-Nazzrin, li kien jappartjeni għalihom Sansun. Ma kinux jixorbu nbid. Kienu jiċċaħħdu mill-kumditajiet li l-komunita’ kellha meta stabbilixxiet ruħha fl-art ta’ Kagħnan.

 

It-tieni vers jgħid: “Hemm għal erbgħin jum kien imġarrab mix-xitan”. Il-missjoni ta’ Ġesu’ tibda b’riferiment għall-erbgħin jum u tintemm b’riferiment għall-erbgħin jum wara l-qawmien Tiegħu mill-imwiet (Atti 1, 3) . L-erbgħin jum fil-bidu jixbħu l-erbgħin jum li Mose’ għadda fuq il-muntanja fl-okkażżjoni tal-Patt (Ez 24, 18). Elija għadda erbgħin jum fid-deżert (Iż 19, 8). Ġesu’, bħal Mose’ u Elija, kellu jistabbilixxi r-rapport tal-bniedem ma’ Alla.

 

“Kien inġarrab mix-xitan”. Id-deżert hu meqjus bħala l-ambjent fejn jgħammru spirti ħżiena (Is 13, 20, 30). Levitiku 16 isemmi l-Azazel, spirtu li joqgħod fid-deżert. Infatti l-poplu kien jagħmel Jum ta’ Tpattija – “Yom Kippur”. Kienu jieħdu żewġ mogħżiet. Waħda joffruha sagrifiċċju, u l-oħra jgħabbuha bid-dnubiet tal-komunita’ u jitilquha fid-deżert.

 

“Kien imġarrab”. Ġesu’ kien bniedem, u bħal kull bniedem kien imġarrab, imma, kuntrarju tagħna, Hu qatt ma ċeda għat-tiġrib. “Għalhekk kellu jkun jixbaħ lil ħutu f’kollox, biex ikun il-Qassis il-Kbir, ħanin u fidil f’dak kollu li għandu x’jaqsam ma’ Alla, u biex ipatti għal dnubiet il-poplu. Għax, billi Hu stess bata u kien imġarrab, jaf jgħin lil dawk li huma fit-tiġrib” (Lhud 2, 17-18).

 

It-tiġrib li jitkellem fuqu l-Vanġelu hu tiġrib speċifiku, li jolqot il-missjoni ta’ Ġesu’, il-missjoni tal-Qaddej t’Alla, u li kellha twasslu għall-mewt fuq salib. Din kienet ir-rieda t’Alla, imma fid-deżert kien imġarrab biex jaqdi missjoni messjanika li teħilsu mid-diffikulta’ tal-passjoni u l-mewt. Daħlulu dubji f’moħħu. Intebaħ li kienet missjoni diffiċli ħafna. L-ebda profeta qablu ma kien imsejjaħ għal missjoni ta’ dak it-tip. Dawn id-diffikultajiet kienu t-tentazzjoni li l-Evanġelista jattribwixxi lix-xitan. Ix-xitan ġarrbu biex ma jaqdix missjoni messjanika bħala Qaddej t’Alla, għax kien intebaħ li b’missjoni bħal din , is-saltna tiegħu fuq il-bniedem kienet tiġi fix-xejn.

 

“Ma kiel xejn, u ħadu l-ġuħ”. Fid-deżert ma tantx hu faċli ssib x’tiekol. Anki l-Iżraeliti kienu jgergru li fid-deżert ma kienx hemm x’tiekol. U Alla bagħtilhom il-manna u s-summien. L-ewwel tentazzjoni tolqot il-missjoni ndirettament. Ix-xitan sejjaħlu “Bin Alla” – b’riferiment għall-missjoni messjanika Tiegħu – u jissuġġerilu li juża l-poteri li ttih din il-missjoni għall-interessi personali Tiegħu. Ġesu’ ntebaħ li biex jaqdi l-missjoni Tiegħu kellu bżonn ta’ poteri partikolari. Id-dubju kien jekk għandux jużahom għall-interess personali Tiegħu, f’dan il-każ li jibdel il-ġebla f’ħobż. Fil-Vanġelu Ġesu’ qatt m’għamel mirakli għall-interessi personali Tiegħu, imma għall-ġid tal-komunita’.

 

Ġesu’ ma jċediex għat-tentazzjoni. Jikkwota test mid-Dewteronomju: “Il-bniedem mhux bil-ħobż biss jgħix”. Ir-risposta qegħda fil-parti tat-test li Ġesu’ jħalli barra, “imma b’dak kollu li joħroġ minn fomm il-Mulej, b’dan jgħix il-bniedem” (Dt 8, 3). Għal Ġesu’ aktar importanti kienet il-Kelma t’Alla li kien sema’ fil-magħmudija Tiegħu, li fil missjoni kien se jkollu jinsa l-interessi Tiegħu u jidħol għall-missjoni li kienet se ġġib magħha sagrifiċċju u tbatija.

 

“Ħadu fl-għoli u wrieh is-saltniet kollha f’daqqa…” Din it-tieni tentazzjoni tolqot direttament in-natura tal-missjoni messjanika. In-nies kienet qed tistenna messija minn nisel ta’ David, messija li jaqdi missjoni politika – li jeħles lill-komunita’ mill-ħakma tar-Rumani, u jerġa’ jwaqqaf is-saltna ta’ David. David sar sultan fuq it-tribu’ tiegħu – Ġuda – u wara sentejn fuq il-bqija tat-tribu’ l-oħra – Iżrael, wara ħakem fuq il-Filistin, l-Aramej, il-Moabin, l-Edomin, u diversi gruppi oħra. Ix-xitan urieh dawn is-saltniet, u b’xi mod webblu biex jinqeda bil-poteri li kellu u dak li kienet qed tistenna in-nies biex jerġa’ jwaqqaf is-saltna ta’ David.

 

Hawnhekk nagħmlu parentesi. Ix-xitan wegħdu l-glorja. Ma nafx kemm kien jasal għall-glorja kieku ċeda għat-tentazzjoni. Ir-Rumani ma tantx kienu lesti li jħallu lil xi ħadd jopponi l-awtorita’ tagħhom fil-Palestina. u dawk li ppruvaw spiċċaw ħażin.

 

Li kieku Ġesu’ ċeda għal din it-tentazzjoni, kien jagħmel ir-rieda tax-xitan, mhux ir-rieda ta’ Alla. Kien fil-prattika jaqdi, jadura lix-xitan, flok ma jadura u jaqdi lil Alla. Imma Ġesu’ ma ċediex għat-tentazzjoni.

 

“Imbagħad ix-xitan ħadu Ġerusalemm, qiegħdu fuq il-quċċata….fuq idejhom jerfgħuk, ħalli ma taħbatx riġlek ma’ xi ġebla”. Hawnhekk ix-xitan talbu jġarrab lil Alla. Ix-xitan waqqa’ lil Adam u Eva għax ikkonvinċiehom li b’xi mod setgħu jisfidaw l-awtorita’ ta’ Alla. Dit-tattika ħadmet, u tat lix-xitan il-possibilta’ li jaħkem fuq il-bniedem. Ipprova l-istess tattika ma’ Ġesu’. Għaraf li Ġesu’ ried joqgħod għall-kelma li kien sema’ fil-magħmudija, u pproponielu li jara jekk verament kienitx ir-rieda ta’ Alla li jmut fuq salib biex jeħles lill-bniedem mill-jasar tad-dnub. Qallu, jekk Alla jridek tagħmel dan, anke jekk taqbeż minn hawn fuq għal isfel ma jiġrilek xejn, għax Alla jibgħatlek l-anġli Tiegħu biex jerfgħuk. Ix-xitan webblu biex jittanta jagħmel suwiċidju. Jekk Alla jridni nidħol għal din il-missjoni diffiċli, biex nagħmilha, Alla jrid ikun miegħi u jagħtini l-għajnuna li għandi bżonn. Irrid prova li Alla lest li jkun miegħi waqt li nħabbat wiċċi mad-diffikultajiet tal-missjoni. Ix-xitan webblu biex jipprova jara jekk Alla kienx lest ikun miegħu hu u jħabbat wiċċu mad-diffikultajiet. Ġesu’ ma ċediex għat-tentazzjoni, u mill-ġdid wera li lest li joqgħod għall-kelma li kien sema’ fil-magħmudija. “Iġġarrabx lill-Mulej, Alla tiegħek”.

 

Vers 13 “…ix-xitan telaq minn ħdejh sa ma wasal il-waqt”. Ix-xitan kompla jiżra’ f’moħħ Ġesu’ d-dubju dwar jekk kellux jidħol għall-missjoni messjanika bħala l-qaddej t’Alla imwiegħed minn Iżaija. Fil-Vanġelu niltaqgħu ma’ rakkonti oħra fejn jingħad li xi ħadd ittanta lil Ġesu’ biex jiċħad għall-missjoni tal-Qaddej t’Alla, u kien hemm saħansitra min riedu, bħax-xitan, jaqdi missjoni ta’ Messija politiku.

 

Pietru stqarr lil Ġesu’ bħala l-Messija (Mk 9, 27-30). Immedjatament wara Ġesu’ jħabbar il-passjoni u l-mewt Tiegħu. “U beda għallimhom fuq li kien meħtieġ li Bin il-Bniedem ibati ħafna, ikun miċħud mill-anzjani u mill-qassisin il-kbar u l-kittieba, joqtluh, u wara tlett ijiem jerġa’ jqum”. Fuq dan kellimhom ċar. Pietru ġibdu lejh u beda jlumu. Iżda Hu dar, ħares lejn id-dixxipli Tiegħu, u ċanfar lil Pietru u qallu: “Itlaq minn quddiemi, ja xitan, għax m’intix taħseb fil-ħwejjeġ ta’ Alla, imma f’dawk tal-bniedem” (Mk 8, 31-33).

 

Bħalma fl-istqarrija Pietru tkellem f’isem l-appostli, anki hawn jidher li qed jitkellem f’isem sħabu. Jidher li l-appostli kellhom din l-ideja dwar il-missjoni messjanika ta’ Ġesu’, u kien għalhekk li spiss fittxew li jkollom pożizzjoni fis-saltna (Mk 9, 34; Mk 10, 35-46, Ġw 1, 49). Biex ifhemhom li kellu jmut biex jaqdi l-missjoni Tiegħu tbiddel quddiemhom hu u jitkellem ma’ Mose’ u Elija (Lq 9, 28-36).

 

Meta l-Appostli abbandunawh, mhux biss għax beżgħu. Kienu tilfu l-fiduċja fih. Dehrilhom li l-missjoni Tiegħu kienet spiċċat fix-xejn. Anki huma kienu qed jistennew li jistabbilixxi s-saltna ta’ David.

 

Ix-xitan inqeda anki bin-nies ta’ żmien Ġesu’ biex iġarrbu u jipprova jikkonvinċih jaqdi missjoni politika. Dan kien it-tip ta’ Messija li kienet qed tistenna n-nies. It-tamiet tagħhom kienu bbażati fiq test tal-profeti li kienu jwegħdu r-restawr tas-saltna ta’ David. Meta n-nies rat l-egħġubijiet li kien qed jagħmel, ippruvat kemm-il darba tagħmlu sultan (Ġw 6,15; 12,13). Kien għalhekk li Ġesu’ spiss impona s-sigriet messjaniku, għalkemm kultant aċċetta li xi ħadd jagħarfu bħala l-Messija – is-Sammaritana, l-Appostli. Kien jippreferi jitkellem fuqu nnifsu bħala Bin il-Bniedem.

 

Ġesu’ kien imġarrab waqt l-agonija fil-Ġnien taż-Żebbuġ. Probabbilment kien hawn li Ġesu’ deher bħallikieku kien se jċedi għat-tentazzjoni u jiċħad li jaqdi l-missjoni tal-Qaddej t’Alla. Talab lil Alla jeħilsu mill-kalċi tal-passjoni u l-mewt. Veru li kien dispost li joqgħod għar-rieda t’Alla u jbati u jmut, imma l-fatt li talab lil Alla jeħilsu mill-passjoni u l-mewt hu prova li Ġesu’ għadda minn kriżi dwar il-missjoni Tiegħu.

 

Il-Kontrattakk ta’ Ġesu’: Il-missjoni Tiegħu li jmut fuq salib biex jeħles lill-bniedem minn dnubietu u mill-ħakma tax-xitan. Biex juri li din kienet il-missjoni Tiegħu beda din il-missjoni b’mirakli ta’ eżorċiżmu – keċċa x-xjaten. Kellu s-saħħa li jeħles lill-bniedem mill-ħakma fiżika tax-xitan , iktar u iktar għandu s-saħħa li jeħles lill-bniedem mill-ħakma morali tax-xitan. “Jekk inkeċċi x-xjaten bis-saħħa tal-Ispirtu t’Alla, kunu afu li waslet is-saltna t’Alla (Mt 12,28). Is-saltna tax-xitan hi fit-tmiem tagħha u waslet biex tiġi inawgurata s-saltna t’Alla.

 

Applikazzjoni

 

1. Il-bniedem ikun imġarrab – mhux darba jew tnejn, imma regolarment. Meta l-bniedem iħossu dgħajjef f’ċertu kamp tal-ħajja morali tiegħu, proprju hemm se jkun imġarrab.

 

2. Irid ikollna l-kuraġġ naffrontaw it-tiġrib li ngħaddu minnu. Jekk naqgħu, Alla lest li jaħfer. Minħabba l-mewt ta’ Ibnu fuq is-salib, Alla        jaħfer – ħafer mhux biss id-dnubiet li kkommetta l-bniedem qabel il-  mewt ta’ Ibnu fuq is-salib, imma anki li kkommetta u jikkommettu l-      bnedmin wara.

 

3. Alla jaf jgħin lil dawk li huma fit-tiġrib. It-tiġrib – mhux biss morali, imma anki kull tiġrib ieħor. Jgħin mhux għax jeliminalhom it-tiġrib,        imma aktar billi jimliehom bil-kuraġġ li jaffrontawh.

 

Il-laqgħa għalqet bit-Talba tal-Missierna.

 

IT-TMIEN ĦADD TA’ MATUL IS-SENA – taħdita mis-sur Charles Briffa, il-Ġimgħa 1 ta’ Marzu 2019.

 

Il-laqgħa bdiet bit-Talba tal-Moviment. Wara nqara l-Vanġelu tal-Ħadd.

 

Dan hu l-aħħar Ħadd ta’ qabel ir-Randan. Hu Vanġelu sempliċi. Fih Ġesu’ ndirizza diversi nies. Semma s-siġar. Il-bdiewa u n-nies komuni setgħu jifhmuh. Semma l-għami jmexxi l-għami. Kien qed jolqot lil dawk li kienu iktar intellettwali – dawk li kienu jaħsbu li setgħu jmexxu lill-oħrajn. Semma t-travu – minn dejjem kien hemm min isib id-difetti f’ħaddieħor u ma jarax tiegħu! Dan il-kliem, lil Ġesu’, ma tantx għamlu maħbub. Spiċċaw biex sallbuh.

 

Illum għandna għażla – bejn dan ir-Re mislub, u r-Re tal-Karnival. Ħafna qed jagħżlu dan tal-aħħar. Għaliex? L-ewwel wieħed hu bniedem imbiċċer, li jġiblek ħniena. Spiċċa biex warrbuh minħabba kliemu u sallbuh. Għażlu lil Barabba.

 

Ir-re l-ġdid li qed nagħżlu llum  jidher sabiħ minn barra , dejjem jitbissem, imdawwar b’żgħażagħ jiżfnu. M’hemmx sinjal ta’ problemi. Pero’ hu mmexxi minn ġewwa – re immanipulat, imma jiġbed ħafna nies.

 

X’inhi l-problema? Ma nikkritikawx lin-nies tal-lum. F’dan il- Vanġelu, Ġesu’ qed jagħmel kritika ċara u diretta lin-nies ta’ madwaru. U min fehmu waħħlu ma’ salib. L-għami li qed jirreferi għalih Ġesu’ hu dak li jaf li hu fil-ħażin u jrid ikarkar lil ta’ miegħu. Nies li jippriedaw ħafna, imma meta’ jiġu għall-fatti, ma ssib xejn.

 

It-tieni punt hu “it-travu”. Inwaħħlu f’dak u l-ieħor. Jien qed naghti xhieda tajba billi nressaq lil dak li jkun lejn il-Knisja? Waħda mill-aqwa priedki hi l-ħajja tagħna barra mill-bini tal-knisja. Faċli nilbsu l-maskra ta’ wieħed tajjeb, imma l-veru prova hi meta neħlu mas-salib, meta nispiċċaw bejn sema u art.

 

“Alla Tiegħi, Alla Tiegħi, għaliex tlaqtni?”. Wasal biex qal hekk Ġesu’, aħseb u ara aħna! Pero’ nafu f’qal wara: “Missier, f-idejk nintelaq”. Fil-mument tal-prova jista’ jonqosna l-kuraġġ, pero’ niftakru fl-aħħar kelma li ħarġet minn fomm Ġesu’.

 

Ġesu’ kien qed jindirizza nies sempliċi, għalhekk uża l-eżempju tas-siġra. Hu Vanġelu ħafif biex tifhmu, imma tqil biex twettqu, għax idaħħlek fil-prova, għax trid tipprattikah. Biex nagħżlu lil Ġesu’ u mhux lir-re tal-Karnival irridu nagħmlu att ta’ umilta’: “Indmu u emmnu fil-Kelma t’Alla” – “Trab kont u trab terġa’ ssir”.

 

Din ir-realta’ għandha tqanqalna biex dan ir-Randan ikun żmien li jerġa’ jtina l-enerġija biex nikkummbattu dan il-materjaliżmu tal-lum. Irridu noqgħodu attenti li ma nitkaxkrux. Faċli jiġri dan, għax id-dinja twegħdna ħafna affarijiet. Noqogħdu attenti li ma niġrux wara r-re tal-Karnival. Faċli jiġri dan, għax kulħadd iħobb ikun daqsxejn komdu. Irridu nkunu nsara konvinti.

 

Kif ħa nġib ruħi quddiem sitwazzjonijjiet kruċjali? Hawn irid ikollna l-fidi. Finalment, dawn huma l-prinċipji ta’ Ġesu’. Kien hemm min m’għoġbux kliemu, u telqu.

 

F’dan ir-Randan ix-xhieda tagħna hemm barra hi aktar importanti minn ħafna kliem. Azzjoni tajba tagħmel ħafna iktar ġid. Irridu nġibu ruħna ta’ veru nsara.

 

Rigward is-sawm fir-Randan, il-Knisja ttina l-veru minimu. Iktar minn dan, irridu niftakru li r-Randan hu żmien ta’ preparazjoni, biex nifhmu l-imħabba kbira li għandu Ġesu’. Mill-kliem Hu għadda għall-fatti. Ġesu’ seta’ jeħles mit-tislib. Fil-Ġetsemani, l-ikbat tentazzjoni tax-xitan kienet: “Inti għal dawn ser tbati?”.

 

Ir-randan hu żmien ta’ tħejjija għall-ikbar festa, meta Ġesu’ għamel l-ikbar att ta’ mħabba għalina. Irridu nkunu nsara ta’ fidi, u ma naqtgħux qalbna quddiem l-isfidi tal-lum. Ma nippuntawx subajna, ma npaċpux fil-vojt. Irridu niggranfaw mas-salib. Il-mistoqsija: “Alla tiegħi, Alla tiegħi, għaliex tlaqtni?” irridu nwieġbuha bil-kliem: “Mulej, f’idejk nerħi ruħi”.

 

Ir-Randan hu żmien ta’ ġabra, ta’ riflessjonijiet, ta’ riżoluzzjonijjiet. Irridu noqgħodu attenti li nnrażżnu lsienna, li ma niskandalizzawx irwieħna, li ma ngergrux, li ma jimpurtaniex x’jagħmel ħaddieħor, imma npoġġu ruħna quddiem is-salib.

 

Il-Madonna, fid-dehriet tagħha, insistiet ħafna fuq li ngħidu r-Rużarju tajjeb. L-Evanġelizzazzjoni trid tiba miċ-ċirku tal-familjari tagħna, il-ħbieb, fuq ix-xogħol. Ma niġġudkaw lil ħadd li ma jridx jaf b’Alla. Ma ninsewx li Patri Piju bena’ l-isptar tiegħu, fost ħafna affarijiet oħra, bl-għajnuna ta’ tabib ħabib tiegħu li ma kienx jemmen f’Alla. Niftakru x’qallu Patri Piju: “Inti ma temminx f’Alla, imma Alla jemmen fik”.

 

Dan ir-Randan irid ikun differenti. Ma nħalluħx jgħaddi bla ma jħalli effett. Ma nibżgħux mis-sagrifiċċji. Nużaw l-azzjonijiet tagħna bħala mezz ta’ evanġelizzazzjoni. Is-sawm huwa “training” għall-mumenti iebsin, bħal ma jagħmlu l-atleti. Hu dixxiplina fuqna nfusna. Jekk ma jkollniex dixxiplina fuqna nfusna, ma nistgħux ngħadduha lill-oħrajn. Anke Ġesu’ sam. U x-xitan ittantah. Ma kenitx faċli, lanqas għal Ġesu’. Is-sawm mhux mill-ikel biss: tgħaddi ftit ħin quddiem Ġesu’ Sagramentat, tattendi għall-eżerċizzi.

 

F’dinja ta’ sfidi rridu nagħmlu Randan qaddis.

 

Il-laqgħa ntemmet bit-Talba tal-Missierna.

Il-laqgħa bdiet bit-Talba tal-Moviment.

 

Imbagħad inqara l-Vanġelu minn San Luqa, k6, v27-38. Dan hu Vanġelu iebes. It-tagħlim li qed juri Ġesu’ f’dawn l-aħħar siltiet huwa rivoluzzjoni. Il-Liġi hemm baqgħet, imma issa ħadet xejr’oħra, saret iktar radikali: “Ħobb lil min jagħmillek il-ħsara”, “Ħobb lill-għadu u lil min jobgħodek”. Żewġ kelmiet jiġbru dan kollu: Imħabba u Maħfra.

 

L-ideja tal-imħabba altruista diġa’ nsibuha fl-ewwel ħames kotba tal-Iskrittura Mqaddsa – il-Pentatewku, per eżempju, Levitiku k19 v18: “La titħallasx b’idejk u la żżommx f’qalbek għal ulied niesek, imma ħobb lill-għajrek bħalek innifsek”. Fid-Dewteronomju nsibu: “Għalija l-ħlas u l-vendetta”

 

Il-ġudizzju uman, xi ftit jew wisq, dejjem imċappas bil-vendetta, bit-tpattija, għaliex l-imħabba tagħna hi dejjem imperfetta. Il-vera tifsira tal-imħabba jaghtiha San Pawl fl-Ewwel Ittra lill-Korintin, k13: “U kieku kelli nqassam ġidi kollu fil-karita’, u nagħti ġismi għall-ħruq bla ma jkolli mħabba, xejn ma jkun jiswieli ta’ ġid. L-imħabba taf tistabar u tħenn, l-imħabba mhix għajjura, ma tintefaħx biha nnifisha, ma titkabbarx fuq l-oħrajn, ma tagħmilx dak li mhux xieraq, ma tfittix dak li hu tagħha. Xejn ma tinkorla, ma żżommx f’qalbha għad-deni, ma tifraħx bl-inġustizzja, imma tifraħ bil-verita’. Kollox tagħder, kollox temmen, kollox tistaporti. L-imħabba ma tintemm qatt”.

 

Aħna ngħixu bil-fidi, bit-tama, u bl-imħabba, pero’ meta mmutu l-fidi u t-tama jispiċċaw. Tibqa’ biss l-imħabba. “Meta jfeġġ Dak li Hu sħiħ, jgħib dak li hu nieqes. Bħalissa naraw bħalli kieku f’mera, imbagħad naraw wiċċ imb’wiċċ. Issa hawn fidi, tama, u mħabba. L-ikbar fosthom hi l-imħabba”.

 

Ġesu’ stqarr li Hu ma ġiex biex ineħħi l-Liġi, imma biex jipperfezzjonha. U x’inhu dak li jagħmilha perfetta? Il-qies li bih titkejjel l-imħabba mhux iżjed bniedem ma’ bniedem, imma ma’ Ġesu’ stess: “Intom tridu tħobbu bħalma ħabbejtkom Jien”. Din hi d-differenza, ir-rivoluzzjoni. Dan li jagħmilha perfetta. Ġesu qalilna biex nixbħu Lilu għax Hu hekk għamel.

 

Il-Kmandament tal-Imħabba jolqot, l-ewwel nett, mhux lil min iħobbna, imma lil min jagħmlilna d-deni, jgħajjarna, iżeblaħna, jisraqna, ikun kiefer magħna. Kristu, fuq is-salib, dan kellu.

 

Issa rridu nagħmlu distinzzjoni bejn l-att u l-persuna. Anke l-ikbar delinkwent huwa xbiha t’Alla, u nafu li Alla dejjem jiġri warajna biex jerġa jressaqna lejn il-merħla, bħal fil-Parabbola tan-Nagħġa l-Mitlufa. “Ikun hemm iktar ferħ fis-sema għal bniedem li jikkonverti, milli għad-disgħa u disgħin li m’għandomx bżonn il-konverżjoni”.

 

Il-ġustizzja għanda ssir bl-imħabba, mhux bil-vendikazzjoni. Il-prinċijpju ta’ għajn għal għajn u sinna b’sinna, pero’, għadu jintiret sal-ġurnata tal-lum. Allura rridu ngħarblu lilna nfusna, għaliex xi mkien f’qalbna dejjem se nsibu dik ir-rokna maħmuġa li rridu naħdmu fuqha. Għandna dejjem nitolbu lill-Ispirtu s-Santu biex idawwlilna moħħna biex inkunu nistgħu nnaddfuha. Il-Papa Franġisku dejjem jisħaq fuq kemm Alla jħobbna, tant li jsofri magħna. Il-talb hu d-direzzjoni li għandna m’Alla.

 

San Pawl jgħidilna li Alla ħabbna bla ma ta kas li aħna konna għedewwa Tiegħu. “Meta aħna konna bla saħħa, Kristu, meta wasal iż-żmien, miet għall-ħżiena. Bilkemm wieħed imut għal wieħed tajjeb, għalkemm wieħed għandu mnejn jagħmel il-qalb u jmut għal bniedem ġust. Iżda Alla wriena l-imħabba Tiegħu meta Kristu miet għalina, aħna li konna għadna midinbin”.

 

Permezz ta’ Kristu erġajna sibna l-ħbiberija li kienet intilfet minħabba d-dnub tan-nisel. Issa ħadd ma jista’ jħobb u jaħfer jekk ma jarax lil Kristu Msallab fl-oħrajn, u l-appoġġ spiritwali u anke fiżiku tal-komunita’. Weħidna ma naslux biex naħfru.

 

Il-Papa Franġisku jgħid: “Jekk jien inħobb bis-serjeta’, lil Knisja ma nippruvax inkissirha bis-snini”. Min jaħseb li qed jgħix ħajja nisranija kważi perfetta, dejjem għandu dik ix-xi ħaġa ġo qalbu li jrid jirranġa. Din hi l-mixja tal-konverżjoni, mhux episodju, imma kontinwita’.

 

L-imħabba lejn l-għadu hi l-pedament tal-Kristaneżmu. Imħabba mhux lejn l-għemil, imma lejn il-persuna. “Ħennu bħal ma Hu ħanin Missierkom”. Il-Ħniena t’Alla hi nfinita. Aħna rridu nersqu lejn l-infinita’ tal-ħniena, tal-imħabba, l-imħabba għotja. “Tiġġudikawx, u ma tkunux iġġudikati, tikkundannawx, u ma tkunux ikkundannati, aħfru, u ssibu l-maħfra”. “Kejl tajjeb, marsus, mheżżeż tajjeb u mburġat iqegħdulkom f’ħoġorkom, għax bl-istess kejl li tkejjlu intom jitkejjel lilkom”.

 

Dan kollu jinġabar fil-kliem tal-Missierna: “Aħrilna dnubietna bħal m’aħna naħfru lil min hu ħati għalina”.

 

Alla jħobb lil midneb, imma jobgħod id-dnub. Allura jħobb lil midneb biex jerġa jiġbdu Lejh. U aħna ħafna drabi nobgħodu lill-midinbin! Jekk aħna ma nħobbux l-għedewwa tagħna, allura aħna għedewwa t’Alla? L-għadu hu ħolqien t’Alla, anke jekk iweġġana u jagħmlilna l-ħsara. U lill-Iben t’Alla, min ma weġġgħux, speċjalment fuq is-salib?  Qgħad għaż-żebliħ, għall-bżieq, għat-tgħajir, għas-swat, għat-tislib. Dan kollu għall-midneb. Fuq is-salib qal: “Aħfrilhom, għax ma jafux x’inhuma jagħmlu”. Ġesu’ qabeż għalihom quddiem Alla.

 

Dan hu l-qofol ta’ dan il-Vanġelu. Ġesu’ ma neħħiex in-normi tal-Liġi, imma ġabha għall-perfezzjoni. Aħna rridu nagħmlu ħilitna biex nixbħu lil Alla, li jħobb bla ma jqis Lilu nnisfu. Madre Tereża hi eżempju ta’ dan: “Biex tħobb bis-serjeta’ trid tweġġa”.

 

Il-mibgħedu dejjem fiha element ta’ egoiżmu. Inħallu l-ispirtu tad-dinja jirkibna u jbegħdna minn Alla, għax nilqgħu l-messaġġi tal-profeti foloz. Aħna rridu nipperswadu ruħna li sitwazzjonijiet prekarji ma nistgħux nirbħuhom jekk mhux bl-intervent t’Alla, bit-talb, u bid-dehen tal-Ispirtu s-Santu. Weħidna hi mpossibbli. L-imħabba mhix atteġġjament interjuri, xi ħaġa li nħossu. “Lil min jagħmillek id-deni, pattilu b’ġid”.

 

Mhix faċli, imma din hi r-rivoluzzjoni li ġab Ġesu’. Trid tirbaħ lilek innifsek, tagħmel sforz kbir, trid tkun konvint. Barra dak li hu spiritwali, jidħol ukoll l-element psikoloġiku. Meta jirnexxilek tpatti azzjoni ħażina b’waħda tajba, anke psikoloġikament tħossok iktar b’saħħtek. Mhux li tħossok superjuri, imma aktar paċi miegħek innifsek.

 

Naħsbu ftit fuq dan il-Vanġelu u ngħarblu lilna nfusna b’reqqa, u nfittxu r-rokna li għandna bżonn innaddfu. Il-maħfra awtentika’ m’hix atteġġjement ta’ superjorita’. Irridu nkunu bħal Kristu, għax is-suppervja twebbes il-qlub, ittella’ l-ħitan bejnietna, filwaqt li l-imħabba lejn l-għedewwa tagħmilna nixbħu lil Alla, li ma talabna xejn biex bagħtilna lill-Ibnu. Hu ħallas il-prezz għalina. “Dak li tridu li ħaddieħor jagħmel magħkom, agħmluh intom lil ħaddieħor”

 

Fl-imħabba fraterna m’hemmx kompromessi, imma hi mibnija fuq ir-rispett u l-aċċettazzjoni tal-ieħor, anke meta dan għandu idejat opposti għal tagħna. Irridu dejjem infittxu dak li jgħaqqadna.

 

Santu Wistin jgħid: “Kristu hu kollox għalina. Jekk tixiteq tfejjaq il-ġrieħi tiegħek, Hu t-Tabib. jekk int mgħobbi bil-ħtija, Hu l-Ġustizzja. Jekk għandek bżonn l-għajnuna, huwa Hu li jtik il-Qawwa. Jekk tibża mill-mewt, ftakar li Hu l-Ħajja. Jekk tixtieq il-Ġenna, Hu it-Triq. Jekk taħrab id-dlam, Hu id-Dawl. Jekk tfittex l-ikel, Hu is-Sustanzi”.

 

Il-laqgħa għalqet bit-Talba tal-Missierna.

Il-laqgħa bdiet bit-Talba tal-Moviment.

L-ewwel parti ta’ din it-taħdita ser tkun fuq il-ħajja ta’ San Pawl, u t-tieni parti fuq xi punti prinċipali tad-duttrina tiegħu u l-impatt li din kellha fuq il-Kristjaneżmu. It-Teoloġija tal-Knisja, li hi bbażata fuq it-Testment il-Ġdid, ġeneralment hi bbażata fuq id-duttrina ta’ San Pawl u ta’ San Ġwann.

San Pawl twieled fid-bidu tal-era nisranija f’Tarsu taċ-Ċiliċja, fix-xlokk tat-Turkija, xi 22 kilometru ‘l bogħod mill-Mediterran. Il-familja kienet Lhudija ta’ osservanza stretta (Ġudajiżmu). San Pawl isemmi lill-oħtu u neputi fl-ittri tiegħu. F’Tarsu kellu l-ewwel edukazzjoni tiegħu. Tgħallem il-Ġudajiżmu u l-Kultura Griega, li narawha mit-tip ta’ Grieg li kien juża fl-ittri tiegħu, u l-mod kif kien kellem lill-Griegi f’diskors li kien għamel f’Ateni.

San Pawl kellu żewġ ismijiet – l-isem Lhudi “Sawl”, u l-ieħor Ruman “Paulos” peress li kien ċittadin Ruman. Meta beda jxandar il-Vanġelu inqeda’ l-iktar bl-isem Ruman.

Kompla l-istudji tiegħu f’Ġerusalemm, għand wieħed mill-aqwa Rabbin – Gamaljel. Mingħandu kellu formazzjoni tista’ tgħid liberali tal-Ġudajiżmu, fl-interpretazzjoni tal-Liġi ta’ Mose’. Studja Ġerusalemm madwar is-sena 30 sa 36 W.K.

Kien f’dan iż-żmien li probabbli San Pawl kien involut fil-persekuzzjoni tal-insara. Din kellha l-bidu tagħha fl-oppożizzjoni li l-Lhud kienu għamlu lil Ġesu’ ta’ Nazzaret, li wasslithom biex dendluh fuq is-salib. Wara l-mewt ta’ Ġesu’ ppersegwitaw anke lill-insara Lhud li kienu ġew minn barra l-Palestina, fosthom Stiefnu. Kien f’din il-fażi li San Pawl beda jeħodha kontra l-insara.

 

Il-Konverżjoni ta’ San Pawl

Il-kelma “konverżjoni” hi tajba, imma rridu nżommu quddiem għajnejna li wara fl-esperjenza fit-triq ta’ Damasku, San Pawl ma ċaħad assolutament xejn mill-fidi li kellu qabel. Fit-triq ta’ Damasku ntebaħ li ċ-ċentru tal-fidi tiegħu, li kienet il-wegħdiet li Alla kien għamel mall-poplu Lhudi fit-Testment il-Qadim, seħħew fil-ġrajja ta’ Kristu. Allura nistgħu nikkunsidraw l-aċċettazzjoni tal-Kristjaneżmu minn San Pawl mhux eżatt bħala konverżjoni, imma aktar bħala żvilupp fil-fidi Lhudija tiegħu. Hi konverżjoni fis-sens li, minħabba din l-aċċettazzjoni li Kristu hu t-twettiq tal-wegħdiet li Alla għamel lill-Poplu Lhudi fit-Testment il-Qadim, San Pawl biddel kompletament l-atteġġjament tiegħu lejn il-Kristjaneżmu u l-komunitajiet insara. Dil-bidla b’xi mod nistgħu nsejħulha “konverżjoni”.

Il-ġrajja fit-triq ta’ Damasku għandha aspett ieħor. Jekk naqraw ir-rakkonti li għamel Luqa fl-Atti tal-Appostli, u r-riferimenti li għamel San Pawl fid-diskorsi tiegħu, dan iktar jinsisti fuq il-fatt li f’dik l-esperjenza rċieva s-sejħa għall-apostolat biex ixandar il-Vanġelu. Kif intebaħ b’dan, mar jagħmel irtir fid-deżert tas-Sirja. Meta reġa’ lura beda jxandar il-Vanġelu f’Damasku, u hawnhekk ħalla mressjoni tajba.

Meta beda jxandar il-Vanġelu, peress li qatt ma kellu kuntatt personali ma’ Kristu, u peress li l-mandatt biex ikun appostlu rċevih f’dik is-sejħa, ried ikun ċert minn dak li kien qed jgħallem. Allura mar Ġerusalemm biex jitkellem ma’ Pietru, ħalli dak li kien qed jgħallem jaqbel ma’ dak li Pietru kien ħa mingħand Ġesu’. L-insara ta’ Ġerusalemm ma tantx fdawh lil Pawlu, għax kienu jafuh bħala wieħed li jippersegwita lill-Knisja. Wara rritorna lejn Tarsu, art twelidu.

Sadanittant, il-Kristjaneżmu kien beda jinfirex lil hinn mix-xtut tal-Palestina. Kien hemm komunita’ mportanti f’Antijokja, is-Sirja. Kien hawnhekk li l-insara bdew jissejjħu Kristjani. Kien hemm bżonn li din il-komunita’ tissaħħaħ. Allura Barnaba mar Tarsu u sejjaħ lil Pawlu u ħadu miegħu fl-Antijokja. Dawn it-tnejn jingħad li rċevew il-mandatt tagħhom b’intervent tal-Ispirtu s-Santu.

San Pawl għamel tlett vjaġġi missjunarji. L-ewwel wieħed għamlu ma’ Barnaba. Fil-bidu mexxa Barnaba, u mbagħad San Pawl ħa l-inizzjattiva u mexxa hu. Marru tajjeb. Waqqfu diversi komunitajiet insara u ġrat ħaġa li ma kinux qed jistennewha – il-Vanġelu ġie milqugħ mill-pagani, u mhux mill-Lhud.

Din ħolqot problema, għax kien hemm Lhud oħra li kienu aċċettaw il-Kristjaneżmu u dawn dehrilhom li l-pagani konvertiti kellhom isiru Lhud bħalhom. Rieduhom joqgħodu għal-Liġi ta’ Mose’. Meta l-Lhud ta’ Ġerusalemm ikkonvertew għall-Kristjaneżmu, dawn ħassewhom marbutin bl-obbligi kollha li kienet marbuta l-komunita’ Lhudija. Kienu jmorru regolarment is-Sinagoga. Dawn ippretendew li l-pagani konvertiti jsiru Lhud bħalhom, jiġifieri joqgħodu għall-Liġi ta’ Mose’. San Pawl ma ridx dan. Għalhekk iltaqa’ l-Konċilju ta’ Ġerusalemm, b’inizzjattiva ta’ San Pawl u Barnaba. Ġie deċiż li l-Liġi ma tobbligax lill-pagani li jsiru Lhud.

Il-Konċilju ta’ Ġerusalemm, pero’, m’affrontax problema li minħabba fiha kienu tlewwmu Pawlu u Pietru. Kienet tolqot żewġ gruppi ta’ nsara – dawk li ġejjin mill-Ġudajiżmu u dawk li ġejjin mill-paganiżmu. Tal-ewwel ħassuhom marbutin mal-Liġi ta’ Mose’. Kienu josservaw ċertu drawwiet ta’ purita’ ritwali li ma kinux iħalluhom jitħalltu ma’ dawk li ma josservawx l-istess normi. Għalhekk kienet saret impossibbli għaż-żewġ gruppi li jiltaqgħu flimkien u jiċċelebraw il-Liturġija flimkien. Bl-atteġġjament tiegħu, Pietru kien ta l-impressjoni li din is-sitwazzjoni kienet ħaġa aċċettabbli, għalhekk San Pawl ħadha bi kbira.

Kien hemm ukoll it-tieni u t-tielet vjaġġ missjunarju. Fi tmiem it-tielet vjaġġ, San Pawl tela’ Ġerusalemm, fejn iltaqa’ ma’ Trożimu, li kien pagan. Il-Lhud ħasbu li San Pawl kien daħħlu fit-tempju, daru għalih u kienu s-suldati Rumani li salvawlu ħajtu. Arrestawħ u dam fil-ħabs sentejn. Meta ntebaħ li l-Gvernatur il-ġdid seta’ jagħtih f’idejn il-Lhud, Pawlu appella biex jintbgħat Ruma. Telaq minn Ċesarija Marittima u spiċċa Malta.

Il-vjaġġ li wasslu Malta ma kienx wieħed missjunarju. Infatti, matul il-vjaġġ, ma jgħidx kelma waħda fuq Ġesu’. Għalkemm l-awtur tar-rakkont isemmi xi mirakli u fejqan li għamel hawn imma ma jgħid xejn dwar predikazzjoni li San pawl seta’ għamel hawn.

San Pawl ma kienx jitlef okkażżjoni biex ixandar lil Kristu. Għalkemm m’hemmx miktub hekk, pero’ fil-vjaġġ xandar lil Kristu, u anke hawn Malta, kif inżommu fit-tradizzjoni tagħna. Meta farfar il-lifgħa fin-nar u ħasbuh xi alla, San Pawl approfitta ruħu minn dan l-inċident biex ixandar lil Kristu. Luqa ma jgħidx hekk, għax ir-rakkont tiegħu jsegwi l-proġett t’Alla kif fehmu hu. Fl-Atti tal-Appostli k1, v8: “Meta jiġi fuqkom l-Ispirtu s-Santu, intom tirċievu l-qawwa u tkunu xhieda Tiegħu li xxandru l-Vanġelu Tiegħu f’Ġerusalemm, fil-Lhudija, fis-Samarija, u sat-truf tal-art”. San Luqa jsegwi din l-iskema – l-ewwel ix-xandir tal-Vanġelu f’Ġerusalemm, fil-Lhudija, fis-Samarija, u mbagħad ix-xandir tal-Vanġelu barra x-xtut tal-Palestina – Antijokja, l-Ażja Minuri, l-Greċja u l-Afrika.

San Pawl kien parti mit-twettiq ta’ dan il-proġett. Kellu jxandar il-Vanġelu sat-trufijiet tal-art. Luqa ma ppretendiex li l-Vanġelu jixxandar fid-dinja kollha, imma meta l-Vanġelu ġie mxandar Ruma – iċ-ċentru tal-Imperu Ruman li kien jirrappreżenta d-dinja ta’ dak iż-żmien – dik għalih kienet sat-trufijiet tal-art. Allura ppreżenta lil San Pawl bħala individwu totalment ikkonċentrat fuq din il-missjoni f’Ruma. Infatti injora għall-kollox kull xandir ieħor li San Pawl seta’ għamel tul dan il-vjaġġ. L-Atti tal-Appostli jagħlaq proprju bix-xandir tal-evanġelju f’Ruma – sat-trufijiet tal-art.

Meta wasal Ruma, San Pawl kien f’ħabs domiċiljarju – fid-dar – imma kellu liberta’ kbira, u anke għamel xi vjaġġ. Ħa l-martirju taħt Neruni, bejn wieħed u ieħor fis-sena 67 W.K. Indifen fejn ħa l-martirju, fejn illum hemm il-Basilika ta’ San Paolo Fuori Mura, li nbiet fis-seklu IV.

 

It-Tagħlim ta’ San Pawl

Il-ġrajja fit-triq ta’ Damasku kienet importanti għal San Pawl għaliex mhux biss intebaħ li l-Kristjaneżmu hu t-twettiq tal-wegħdiet li Alla kien għamel lill-antenati tiegħu fit-Testment il-Qadim, mhux biss intebaħ li kien imsejjaħ għall-apostolat, imma kellu intuizzjoni oħra dwar ir-rapport ta’ kull nisrani ma’ Kristu. Fl-esperjenza li kellu Ġesu’ qallu: “Jien Ġesu’ li inti qiegħed tippersegwitah”. San Pawl intebaħ bl-identita’ – l-għaqda – li hemm bejn kull nisrani u Kristu. Fl-ittri tiegħu jitkellem diversi drabi fuq din l-għaqda: “Batejna ma’ Kristu, issallabna ma’ Kristu, mitna ma’ Kristu, indfinna ma’ Kristu, qomna ma’ Kristu, konna gglorifikati ma’ Kristu, insaltnu ma’ Kristu”.

San Pawl jirrappreżenta din l-għaqda b’mod figurattiv – id-dielja li fiha ġew imlaqqmin friegħi ġodda. Il-kambjament li ġġib magħha din l-għaqda ma’ Kristu hu wieħed morali – mitna għad-dnub u qomna għall-grazzja. Din hi l-parteċipazzjoni tagħna fil-Misteru tal-Għid.

San Pawl iqabbel ir-rwol ta’ kull nisrani fil-komunita’ lokali ma’ diversi partijiet tal-ġisem tal-bniedem. Dan fih ħafna membri li kollha għandhom rwol partikolari. Allura anke l-insara fi ħdan il-komunita’ għandhom rwol partikolari. Pero’ hemm armonija bejniethom, u l-insara għandhom jiffunzjonaw bejniethom eżattament kif jiffunzjonaw id-diversi membri tal-ġisem tal-bniedem.

San Pawl jitkellem hekk għax ħabbat wiċċu ma’ problema kbira fil-komunita’ ta’ Korintu. Kien hemm firda fuq diversi livelli. Kien hemm grupp li kien tgħammed minn San Pietru, grupp li kien tgħammed minn San Pawl, ieħor minn Apollo. Kienu qed jikkunsidraw ruħhom bħala tlett gruppi differenti. Barra din il-firda, kien hemm oħra ta’ natura ekonomika. Dak iż-żmien, maċ-ċelebrazzjoni tal-Ewkaristija kien hemm ikla, tradizzjonalment tissejjaħ “Agape”. F’din l-ikla kien ikun hemm min ikollu biex jiffanga, u kien ikun hemm min jibqa’ bil-ġuħ, minħabba li kien hemm din id-diversita’ ekonomika bejn it-tlett gruppi li kienu fi ħdan il-komunita’ ta’ Korintu.

Fil-komunita’ ta’ Korintu kien hemm ukoll il-Kariżmatiċi. Kien hemm xi wħud li kellhom doni tal-Ispirtu s-Santu. B’xi mod dawn kienu qed iħarsu ‘l isfel lejn dawk li ma kellhom l-ebda don. San Pawl ma felaħx għal din is-sitwazzjoni. Kien għalhekk li tħaddet fuq il-fatt li fil-ġisem hemm ħafna membri li, għalkemm diversi, ilkoll jikkoperaw flimkien għall-ġid tal-ġisem. L-istess, id-diversita’ fil-komunita’ għandha sservi biex il-gruppi jgħinu lil xulxin għall-ġid tal-komunita’ kollha. San Pawl qallhom li għalkemm tgħammdu minn persuni differenti, il-magħmudija hi waħda. “Fl-Ewkaristija lkoll tieklu minn ħobża waħda u tingħaqdu ma’ Kristu. Min għandu d-don tal-Ispirtu s-Santu, hu dan l-istess Spirtu li qed jagħtihom, allura għandu jkun hemm din l-għaqda bejnietkom u ġġibu ruħkom eżatt bħal ma d-diversi membri tal-ġisem iġibu ruħhom għall-ġid tal-istess ġisem”.

Din l-ideja wasslet lil Pawlu għal ideja oħra – dik tal-Ġisem Mistiku ta’ Kristu. Jikkunsidra l-Knisja Universali bħala l-Ġisem Mistiku ta’ Kristu, u lil Kristu bħala r-ras tal-Knisja. Jippreżentah hekk taħt żewġ aspetti. Fl-aspett semitiku, ir-ras, meta tintuża metaforikament fil-lingwi Semitiċi, tindika awtorita’. Hemm imbagħad l-aspett Grieg, li kienu jqisu r-ras bħala l-prinċipju vitali tal-bniedem – dak li jagħti l-ħajja. Meta San Pawl jippreżenta lil Kristu taħt dan l-aspett, qed juri li Kristu hu dak li minnu tieħu s-saħħa l-Knisja.

Il-Lhud li kienu kkonvertew għall-Kristjaneżmu kienu konvinti li kienu għadhom marbutin bl-obbligi tal-Liġi ta’ Mose’, u ppretendew li l-pagani li kkonvertew kellhom joqgħodu għal din il-Liġi. San Pawl ra d-diffikultajiet ta’ din l-ideja u skopra li kienet iktar faċli li tikkonverti lill-pagani milli lil-Lhud. Kellhom problema ta’ natura fiżika – li jmorru Ġerusalemm biex jagħtu qima lil Alla fil-festi tal-Lhud, joqgħodu għaċ-ċirkonċiżżjoni, etċ. San Pawl kien tal-ideja li fil-każ tal-pagani l-Liġi ta’ Mose’ ma torbotx. Il-Konċilju ta’ Ġerusalemm aċċetta din l-ideja.

Kien hemm ukoll raġuni teoloġika li San Pawl jittratta fl-Ittra lir-Rumani u fl-Ittra lill-Galatin – il-problema tal-ġustifikazzjoni – kif wieħed isalva. Il-Bibbja kollha tippreżenta lil Alla bħala Esseri Sovran li l-bniedem irid joqgħod għalih. Pero’, fit-tradizzjoni Lhudija, kemm tat-Testment il-Qadim, u anke l-Ġudajiżmu ta’ żmien San Pawl, kienu jenfasizzaw ħafna il-ħniena t’Alla. Kienu qed jippromwovu l-ideja li, jekk inti tagħmel ċerti affarijiet, tista’ b’xi mod tikkundizzjona lil Alla biex Hu jtik dak li għandek bżonn – is-salvazzjoni. Fit-Testment il-Qadim hemm test li jitkellem fuq l-elemożina’, l-offerta tas-sagrifiċċji. Imma l-Ġudajiżmu u xi Lhud li kienu kkonvertew waħħluha f’rashom li jekk wieħed joqgħod għal-liġi ta’ Mose’ b’xi mod jista’ jikkondizzjona lil Alla biex Hu jtih is-salvazzjoni. Jappellaw għall-ħniena t’Alla bl-osservanza tal-Liġi ta’ Mose’.

Din l-ideja lil San Pawl ma niżlitlux. Għalih Alla hu bħal fuħħari, li b’ċappa tafal jagħmel oġġett ta’ unur. Bl-ebda mod ma jista’ l-bniedem jikkundizzjona lil Alla. Fl-Ittri tiegħu lir-Rumani u lil Galatin jinsisti ħafna li s-salvazzjoni l-bniedem ma jiksibiex bl-osservanza tal-Liġi ta’ Mose’, imma bil-fidi fi Kristu. Alla diġa’ tana s-salvazzjoni permezz ta’ Kristu. Il-bniedem jaċċetta dan id-don jekk jibda jemmen fi Kristu.

 

Il-laqgħa għalqet bit-talba tal-Missierna.

 

 

 

Il-laqgħa bdiet bit-Talba tal-Moviment. Wara nqara l-Vanġelu skond San Luqa.

Għalkemm dan il-Vanġelu ngħaqqduh maż-żwieġ, ma jitkellimx fuq l-għarajjes. L-għarus jissemma’ biss fl-aħħar tas-silta. Il-protagonisti ta’ dan il-Vanġelu huma Ġesu’ u Ommu Marija.

Marija probabbli kienet diġa’ taf li Binha kien kapaċi jagħmel dan il-miraklu. Pero’, meta qaltlu li kien spiċċalhom l-inbid, Hu qallha li ma kinitx għadha waslet is-siegħa Tiegħu. Ġesu’ diġa’ kellu d-dixxipli Miegħu. L-Evanġelista jaċċenna li dan kien l-ewwel miraklu Tiegħu.

Dan il-Vanġelu qed jagħtina l-bidu tal-ħidma ta’ Ġesu’. Kważi nisgħtu ngħidu li ħassu mhux lest. Ġesu’, meta twieled, ma kellux l-għerf mill-ewwel. Dan bnieh ftit ftit. Għalhekk, meta ġie f’dan il-punt kruċjali seta’ ħass hekk. Pero’ xorta jgħidilhom biex jimlew il-ġarar bl-ilma. Issa dawn il-ġarar kienu jintużaw għall-ħasil ritwali, u mhux għall-inbid.

Probabbli li min kien qed jara din ix-xena, ma kienx jaf x’ser jiġri. Hawnhekk issir il-bidla tal-ilma f’inbid. Issa fl-Antik Testment l-inbid huwa sinjal reali u rikk.

X’ifisser dan il-Vanġelu għalina? Is-sabiħ ta’ dan il-Vanġelu hu li fih naraw il-protezzjoni tal-omm. San Bernard jgħid fit-talba tiegħu: “Qatt ma nstema’ li xi ħadd intefa’ taħt il-ħarsien tiegħek, talbek il-għajnuna u inti ma smajtux”. Marija għamlet wiċċha għall-għarajjes, mingħajr ma talbuha. Avolja Ġesu’ qallha li għad mhux il-ħin, xorta qalet lill-qaddejja biex jagħmlu dak li jgħidilhom.

Hekk tagħmel magħna Marija meta jibda jonqos l-inbid f’ħajjitna – dak li jagħtiha togħma tajba. Għandna l-fiduċja li Marija lesta li tidħol għalina. Imma rridu nagħżlu aħna t-tip ta’ nbid.

Issa l-inbid fil-ħajja nużawh biex nifirħu. Imma s-soċjeta’ llum qed tuża nbid li jistordi u li jnessiena r-realta’. Kultant aħna jiġrilna li l-aqwa li jkollna spirtu, hu x’inhu, biex inessiena.

L-inbid li tahom Ġesu’ kien inbid mill-aqwa. Hu għalhekk li għandna jkollna fiduċja Fih. Bl-interċessjoni ta’ Ommna Marija, aħna għandna nitolbu nbid li hu veru tajjeb – mhux dak li jistordina, bħal ma taf tagħti d-dinja.

Issa aħna kuntant jista’ jiġrilna bħal dawk l-għarajjes – jibda jispiċċalna l-inbid u lanqas biss nittendu. L-Vanġelu ma jgħidilnix li l-għarus għamel paniku. Ħafna drabi l-inbid fil-ħajja tagħna jiżvinta bil-mod il-mod. Għalhekk tajjeb li nżommu l-għaqda m’Alla, għax Hu biss jista’ jagħtina dan l-inbid biex il-festa tkompli. U l-festa x’inhi? Il-festa hi l-ħajja tagħna fiċ-ċelebrazzjoni m’Alla. L-Evanġelista jgħidilna li t-tnejn kienu hemm għall-festa – Ġesu’ u Ommu. Jekk aħna ħa nkunu barra minn din il-festa, se nkunu barra mill-festa li għalija aħna ġejna mistednin.

Issa meta jispiċċalna l-inbid x’ser infittxu? Ħafna drabi l-ħajja iktar tagħti morr milli ħelu. Hawnhekk għandna nduru għal dik it-talba ta’ San Bernard. Huwa mportanti li noqgħodu ħafna attenti li ma jispiċċalnix l-inbid f’ħajjitna – dak il-ferħ li nħossu f’din il-festa li għaliha stedinna Ġesu’.

Il-problema tas-soċjeta’ llum hi li trid tgħix mingħajr Alla. Noqgħodu attenti għax faċli li nwarrbu l-ħarsa tagħna ‘l bogħod minn Alla. Noqgħodu attenti li minn din il-festa tat-tieġ ma nispiċċawx barra.

Dan il-Vanġelu għandu joħodna f’riflessjoni li aħna wkoll mistiedna għal tieġ ieħor, li mhu ser jispiċċa qatt, bil-preżenza ta’ Ġesu’ u Ommu Marija. Għandna nżommu f’moħħna din il-festa tat-tieġ, u li meta jispiċċalna l-inbid induru lejn din l-Omm.

Għalkemm il-kliem ta’ Ġesu’ lill-Ommu narawh xi daqsxejn iebes, hi xorta waħda daħlet għall-għarajjes. Hi fhemitu dan il-kliem, għax kienet taf li mill-mument li ħa tikkonsenja lil Ġesu’ f’idejn il-poplu, Hu ma kienx ser jibqa’ tagħha. Jekk elfejn sena ilu Ommna Marija għamlet wiċċha għall-għarajjes, illum lesta li tagħmel l-istess ma kull min jintefa’ taħt il-ħarsien tagħha.

Dan il-Vanġelu ġie ftit wara l-ġrajja tat-twelid u ftit qabel il-preżentazzjoni ta’ Ġesu’. Għandna nżommu f’moħħna li x-xewqa ta’ Ġesu’ kienet li lil dawn l-għarajjes jagħmilhom kuntenti. Pero’ xtaq jara l-isforz tal-bniedem. Qalilhom biex jimlew il-ġarar bl-ilma. L-istess għamel fil-Miraklu tat-Tkattir tal-Ħobż. Qal lid-dixxipli biex jaraw min għandu xi ħaġa tal-ikel.

Aħna rridu nitolbu biex meta l-inbid tagħna jonqos, jerġa’ jiġġenera ruħu. Pero’ rridu nagħmlu l-isforz tagħna. Ġesu’ ma jitlobnix ħwejjeġ kbar – Alla lest li jtina iktar milli għandna bżonn. Ħafna drabi nitolbu affarijiet materjali u dawn ma jiġux. Niftakru li l-mewt lanqas lil Ġesu’ ma ħafritha. Hawn nerġgħu niġu għas-simbolu tal-inbid – inbid itjeb minn dak li kellna. Tajjeb li nitolbu għas-saħħa. Pero’ għandna nemmnu li hemm xi ħaġa aktar qawwija. L-inbid li jagħtina Ġesu’ hu dak li jsalva r-ruħ u jdaħħalna fil-ħajja ta’ dejjem.

Mela lill-għarus jgħidulu li suppost ħareġ l-inbid it-tajjeb l-ewwel, u dak inqas tajjeb fl-aħħar. Din id-dinja hekk tgħidlek tagħmel. Qed tgħidilna li qed niġru wara l-baħħ. Fejn hu Alla tagħkom? Spiċċajt bla flus, bla xogħol, għamlulek kalunja, ma daħalx għalik! Niżel minn hemm? Qaluha anke lil Ġesu’ meta kien fuq is-salib. U min qalilu kien jafha l-Iskrittura Mqaddsa, u xorta sfidawh.

Aħna rridu nlestu għal din il-ġlieda. Nafu li hemm omm li lesta tidħol għalina. L-importanti li nagħmlu l-isforz tagħna. Nemmnu li fl-aħħar mill-aħħar Alla ħa jirbaħ, u se jtina inbid mill-aqwa. Kultant, meta tgħaddi minn xi kedda, tkun tixtieq tivvendika ruħek minn dak li jkun, jew tgħid “kemm nixtieq li jitla’ ż-żejt f’wiċċ l-ilma”. Imma l-arloġġ tal-Mulej huwa differenti: “Jien inħejjilkom mejda quddiem l-għedewwa tagħkom” – il-mument tat-trijonf tagħna, meta l-Mulej jgħidilna: “Idħlu għall-festa eterna. Idħlu f’dak li kien hemm imħejji għalikom”.

Ir-rebħa tagħna tkun li, fl-aħħar mill-aħħar, nidħlu fil-festa tat-tieġ, fejn Ġesu’, bl-interċessjoni t’Ommu Marija, ħejjilna nbid tajjeb li ma jispiċċax, u l-kalċi tagħna jkun imfawwar għal dejjem ta’ dejjem.

Il-laqgħa għalqet bit-Talba tal-Missierna.

Il-Premju Żagħżugħ tas-Sena 2018 organizzat mill-Moviment Kerŷgma din is-sena intrebaħ minn Mellieħa Youth.  Ir-rebbieħ tal-premju, li huwa sponsorjat minn APS Bank, ġie mħabbar mill-President tal-Moviment Kerŷgma, is-Sinjura Bernice Micallef fl-1 ta’ Frar 2019.  L-għan tal-premju hu li jingħata ġieħ u għarfien lil żgħażagħ li bl-emgħil, bil-karattru, bl-attivita’ u bl-eżempju ikunu ta’ xhieda nisranija għal sħabhom iż-żgħażagħ.

L-Arċisqof Emeritus Pawl Cremona O.P. qaddes il-quddiesa ta’ ringrazzjament fil-Knisja ta’ San Duminku r-Rabat, u wara ppresieda fuq iċ-ċerimonja tat-tħabbir tar-rebbieħ.  Preżenti wkoll għal din iċ-ċerimonja kien hemm is-Sinjura Bernice Micallef, President tal-Moviment Kerŷgma, Dr Romina Cuschieri Ċermen tal-Board tal-Għażla, is-Sur Jeremy Vassallo jirrapreżenta lil-APS Bank u mistednin distinti oħra fosthom is-soprano Amy Marie Borg.  It-trofew Premju Żagħżugħ tas-Sena ingħata lil-Sarah Vella li kienet qed tirrapreżenta lil Mellieħa Youth mill-Arċisqof Emeritus.

Mellieħa Youth huwa grupp soċjo-reliġjuż ta’ żgħażagħ minn 12-il sena l-fuq li nħoloq fil-bidu tas-snin 2000.  Il-motto tagħhom huwa “Moving Forward Together – Reach, connect, grow, discover”.  Apparti mill-laqgħat ta’ kull ġimgħa, ż-żgħażagħ jorganizzaw numru ta’ attivitajiet regolari għal karità biex dak li jiddiskutu fil-laqgħat, jattwawh fir-realtà.  Fost dawn l-attivitajiet insibu:

L-użu ta’ l-arti tal-palk biex iħeġġu team-work.  Kull sena jtellgħu żewġ produzzjonijiet – pantomima oriġinali għall-Milied u musical għal żmien l-Għid jew għall-btajjel tas-sajf.

Iklijiet, barbecues u attivijiet simili.  Hawn iż-żgħażagħ jitgħallmu kif jippreparaw u jservu l-ikel bl-għajnuna ta’ nies bl-esperjenza u jagħmlu kollox li jkun hemm bżonn.

Live-ins u funzjonijiet reliġjużi biex isaħħu r-ruħ.  Dawn jiġu organizzati fuq weekend biex iż-żgħażagħ jkunu jistgħu jinqatgħu mill-ħajja ta’ kuljum u jagħtu aktar attenzjoni lir-ruħ.

Fund-raising għal min hu fil-bżonn.  Jorganizzaw attivitajiet kemm jista’ jkun varjati– attivijiet barra ta’ ġurnata jew ġewwa ta’ ġimgħatejn.  Dawn jinkludu il-Festa Familja, Christmas Market, Maratona ta’ 48 sieha, u l-ikla tal-Passover.  Id-dħul kollhu jmur għal min hu fil-bżonn.

Xogħol Voluntarju fl-Lourdes.  Il-Mellieħa Youth ilhom dawn l-aħħar 17-il sena jingħaqdu mall-

Assocjazzjoni Voluntarji Lourdes biex jgħinu lil-morda u x-xjuħ.  Bla dubju dan huwa l-iżjed xogħol importanti tal-Mellieħa Youth u l-parti l-kbira tal-fondi li jiġbru jmorru għal din l-attività. Hawnhekk iż-żgħażagħ jesperjenzaw bil-fatti dak li jiddiskutu fil-laqgħat ta’ kull ġimgħa.  Jiltaqgħu ma’ nies minn kull sfond tal-ħajja u jesperjenzaw il-ferħ li tagħti mingħajr ma tistenna xejn lura.  Numru kbir ta’ żgħażagħ imorru biex jagħmlu din l-esperjenza kull sena.

Attivitajiet Soċjali u exchanges.  Il-grupp jinvolvi ruħu f’ċittadinanza attiva u parteċipazzjoni sew jekk tkun attività lokali bħal Milied Mellieħi u sew bi bdil ta’ żgħażagħ minn pajjiżi oħra.

Iż-żgħażagħ nominati għal dan il-Premju kienu: Grupp Żgħażagħ Corpus Christi, Għasri, Matthew Deguara mis-Siġġiewi, Mellieħa Youth u Sezzjoni Żgħażagħ – Soċjeta’ Filarmonika Santa Marija, Żebbuġ Għawdex.

Dan it-trofew jingħata kull sena f’ġieħ il-mejjet Dr Rudolph Saliba li kien l-ewwel president tal-Moviment Kerŷgma.

Imwieled Francesco Forgione, magħruf l-iktar bħala Patri Piju jew Padre Pio, (Pietrelcina, Italja, 25 ta’ Mejju 1887 – San Giovanni Rotondo, 23 ta’ Settembru 1968), kien patri Franġiskan Kapuċċin Taljan u saċerdot; qaddis ikkanonizzat mill-Knisja Kattolika li ċ-ċelebrazzjoni tal-festa tiegħu ssir fit-23 ta’ Settembru, fl-anniversarju ta’ mewtu.

 

Anke meta kien għadu ħaj, ingħata venerazzjoni popolari kbira minħabba l-pjagi li kellu f’ġismu u l-mirakli li jingħad li wettaq f’ħajtu u wara mewtu. Kien ukoll oġġett ta’ ħafna kritika u suspetti fi ħdan il-Knisja u barra minnha.

 

Il-fama ta’ Patri Piju xterdet ‘il barra mill-Italja. Kienu jmorru jżuruh pellegrini mhux biss mill-pajjiżi Ewropej, fosthom Maltin, iżda wkoll Amerikani u Sudamerikani. Eluf ta’ ittri kienu qegħdin jaslulu fil-kunvent minn madwar id-dinja kollha, x’uħud anke miċ-Ċina u mil-Lvant Imbiegħed. Fost l-ittri li rċieva kien hemm waħda, fl-1962, mingħand il-Kardinal Pollakk Karol Woytla (iktar tard il-Papa Ġwanni Pawlu II), li talbu biex jitlob għal waħda omm żagħżugħa Pollakka li kienet kważi fl-aħħar għax kellha tumur fi griżmejha. Għaddew ftit ġranet u l-Kardinal reġa’ kitiblu biex jirringrazzjah għax il-mara kienet qalgħet il-grazzja.

 

Minkejja l-popolarita’ kbira tiegħu, ħajtu fil-kunvent baqgħet dejjem l-istess. Kien iqaddes tal-ħamsa ta’ filgħodu. Għall-quddiesa tiegħu, in-nies ġieli għamlu lejl sħiħ wara l-bieb tal-knisja biex malli tiftaħ, jintasbu fl-ewwel postijiet. Nistgħu ngħidu li ħajtu bħala saċerdot kienet talb, quddiesa u qrar. Kien iqatta’ sigħat twal fil-konfessjonarju u kien jixtieq li “l-ġurnata fiha 48 siegħa flok 24” biex ikun jista’ jqarar iżjed. Fil-festi jingħad li ġieli għamel 18-il siegħa jqarar. Eluf kbar jingħad li sabu lil Alla mill-ġdid permezz ta’ Patri Piju. Kienu jqerru għandu isqfijiet, kardinali, politiċi, artisti u minn kull xorta ta’ nies.

 

Jibni sptar: Casa Sollievo della Sofferenza

 

Fl-1925 Patri Piju rranġa bini li qabel kien iservi ta’ monasteru u għamel sptar żgħir li semmieh San Franġisk. Iżda fl-1956 għamel l-opra kolossali tiegħu meta bil-flus ta’ ħafna benfatturi fetaħ wieħed mill-aktar sptarijiet moderni anke sal-ġurnata tal-lum, “Casa Sollievo della Sofferenza” – Dar għas-Serħan mit-Tbatija. Iżda dan l-isptar, għalkemm ġab serħan lil ħafna pazjenti, reġa’ ġab sofferenza kbira għal Patri Piju, liema sofferenza kient tixbah lil dik li għadda minnha għoxrin sena qabel, meta waqqfuh milli jqaddes. Issa Patri Piju kien bniedem anzjan u batut fiżikament.

 

Waqt li kien qed jinbena l-isptar mhux kollox kien miexi dritt fl-amministrazzjoni, mhux tort ta’ Patri Piju, li kien ħalla f’idejn ħaddieħor it-tmexxija tal-isptar. Fl-1952, il-Ġeneral tal-Kapuċċini, fuq struzzjoni mis-Sant’Uffizzju, wissa lir-reliġjużi tiegħu biex ma jorganizzawx pellegrinaġġi għal San Giovanni Rotondo. Fl-1960, il-Papa bagħat li Mons. Carlo Maccari biex jinvestiga l-ħafna xnigħat li kienu qegħdin isiru fuq Patri Piju, anke li kien qiegħed ikollu relazzjonijiet ma’ xi nisa. Patri Piju ġie miżmum milli jiċċelebra ż-żwiġijiet u l-magħmudijiet u ma jdumx iktar minn nofs siegħa fil-quddiesa. Saħansitra kienu tpoġġew xi mikrofoni fiċ-ċella u fil-konfessjonarju tiegħu. Patri Piju kien ħadha bi kbira wisq din il-ħaġa skandaluża għax qatt ma stenna li jsir dan min-nies tal-Knisja. Kien fl-1964, erba’ snin qabel mewtu, li l-Papa Pawlu VI temm din it-tieni persekuzzjoni tas-Sant’Uffizzju.

IL-MAGĦMUDIJA TAL-MULEJ – taħdita minn Fr. Joseph Aguis, il-Ġimgħa 11 ta’ Jannar, 2019.

 

Il-laqgħa bdiet bit-Talba tal-Moviment.

 

Skond il-Kalendarju Liturġiku, il-Ħadd 13 ta’ Jannar niċċelebraw il-Magħmudija tal-Mulej, li, fit-tradizzjoni tal-liturġija tal-Knisja, hi meqjusa bħala aspett tal-Epifanija. Meta ċċelebrajna l-Epifanija, l-attenzjoni tagħna kienet fuq iż-żjara tal-Maġi. Biss jekk naqraw it-testi liturġiċi, fl-Epifanija il-Knisja tagħmel riferiment espliċitu għaż-żjara tal-Maġi, għall-magħmudija ta’ Ġesu’ u anke għall-miraklu ta’ Ġesu’ f’Kana tal-Galileja.

 

L-Għasar tal-Epifanija jibda b’innu li fih hemm riferiment għal dawn it-tlett ġrajjiet:

 

“Ġrew il-Maġi wara l-kewba, fid-dawl tagħha d-dawl ifittxu”

“Il-Ħaruf tas-sema niżel fl-ilma tal-Ġordan u qaddsu”

“Ħammru l-ġarar kbar tal-ilma li l-qaddejja b’ordni Tiegħu rawh mibdul f’inbid quddiemhom”

 

Għall-Liturġija tal-Knisja, Ġesu’ jagħmel l-Epifanija Tiegħu – il-manifestazzjoni pubblika Tiegħu – mhux sepliċement dak inhar li marru ifittxuh il-Maġi, imma għamel hekk ukoll fil-Magħmudija, u kompla meta beda l-missjoni pubblika Tiegħu bl-ewwel miraklu fit-tieġ ta’ Kana. L-Epifanija ta’ Kristu hi progressiva.

 

Hawnhekk inqara’ l-Vanġelu tal-Ħadd – Luqa 3, v 15-16, 21-22.

 

F’dan ir-rakkont, l-Evanġelista jikkunsidra lil Ġesu’ esklussivament bħala bniedem – ma jikkunsidrax id-divinita’ Tiegħu. Ġesu’ kien bniedem normali bħal kulħadd, u bħal kull bniedem kiber anke fl-għerf Tiegħu. L-Evanġelista jippreżenta lil Ġesu’ li, meta resaq għall-magħmudija Tiegħu, intebaħ li Alla fdalu missjoni. L-inżul tal-Ispirtu s-Santu jfisser li kien ħa jkollu missjoni. Pero’, iktar importanti, hi n-natura tal-missjoni li kellu jwettaq.

 

Skond il-Vanġelu, id-dikjarazzjoni hi magħmula lil Kristu biex Hu jifhem x’inhi l-missjoni Tiegħu. Permezz ta’ din id-dikjarazzjoni, li kellha warajha awtorita’ divina, Kristu ntebaħ li kellu jaqdi dik il-missjoni li Iżaija kien ħabbar meta tkellem fuq il-Qaddej t’Alla. Kapitlu 53 jippreżenta lill-qaddej t’Alla bħala dak li ser jitgħabba bil-ħażen tal-komunita’ u jagħti ħajtu biex jeħlisha mid-dnubiet tagħha. Din kienet il-missjoni li kellu jaqdi Kristu.

 

Fil-bidu tal-Vanġelu nsibu li l-poplu kien qed jistenna ħerqan li jiġi restawrat darba għal dejjem ir-rapport tal-poplu m’Alla. Mhux kulħadd kellu l-istess ideja ta’ kif kellu jseħħ dan. Imma kienu jafu li kellu jseħħ bl’intervent t’Alla. Ħafna kienu jemmnu li Alla kien ser jinqeda’ bi bniedem, li nsejħulu l-Messija. Pero’ mhux kulħadd kellu l-istess opinjoni dwar il-missjoni Tiegħu. Meta Ġwanni ħareġ jippriedka, lin-nies ma qalilhomx biss biex jindmu minn dnubiethom, imma għammidhom ukoll. Din il-magħmudija ma kenitx il-magħmudija nisranija. Din ma kenitx istitwita dak inhar tal-magħmudija ta’ Ġesu’ minn Ġwanni, imma dak inhar li qal lill-appostli: “Morru għallmu lill-ġnus kollha, u għammduhom fl-isem tal-Missier, u tal-Iben, u tal-Ispirtu s-Santu”.

 

Il-magħmudija ta’ Ġwanni ma kenitx taħfer id-dnubiet. Kienet ħasil ritwali. Dawk li kienu qed jistennew li jidħlu f’rapport m’Alla kienu jindmu minn dnubiethom u b’turija ta dan kienu jinħaslu fil-Ġordan. Ġwanni kien jgħammidhom u kienu jittamaw li Alla jaħsilhom spiritwalment u jnaddafhom minn dnubiethom.

 

L-istqarrija tad-dnubiet fil-magħmudija ta’ Ġwanni m’għandniex inqabbluha mal-istqarrija tad-dnubiet fis-sagrament tar-Rikonċiljazzjoni. F’dan is-sagrament, kulħadd imur jistqarr id-dnubiet personali tiegħu. Fi żmien Ġwanni, l-istqarrija tad-dnubiet kienet iktar tixbah lil dik li nagħmlu fid-bidu tal-quddiesa: “Nistqarr ‘l Alla li jista’ kollox u lilkom ħuti …” Din hi stqarrija ġenerika li aħna midinbin u nitolbu lil Alla jaħfrilna dnubietna: “Mulej ħniena, Kristu ħniena …” Kienet stqarrija ta’ dan it-tip li kien jagħmel kull minn kien jitgħammed fil-Ġordan, u mhux kif nagħmlu aħna fil-qrar.

 

Għalhekk m’għandux ikollna problema li naraw li Ġesu’ jħoss il-bżonn li jitgħammed. Ġesu’ tgħammed minħabba li ħass li kien membru ta’ komunita’ midinba, jiġifieri b’solidarjeta’ magħha. Hu ma stqarrx dnubiet Tiegħu, imma dawk tal-komunita’. Ġesu’ ħass li kellu jitlob maħfra għad- dnubiet tal-komunita’.

 

Waqt il-Magħmudija, Ġesu’ talab. Talab qabel għażel it-Tnax, talab waqt it-Trasfigurazzjoni, talab qabel ma għallem il-Missierna lill-appostli, talab fil-Ġnien taż-Żebbuġ. Waqt li Ġesu’ kien qed jitlob, niżel fuqu l-Ispirtu s-Santu. Dan ifisser li fil-magħmudija Tiegħu Ġesu’ ġie mogħti missjoni.

 

F’dan ir-rakkon, l-Evanġelista qed jittratta lil Kristu bħala bniedem li, bil-mod il-mod, qed jagħraf x’ser jgħaddi minnu f’ħajtu. Fir-rakkont Bibliku, kull darba li individwu jinħakem mill-Ispirtu, jiġri hekk għax dan ikollu jaqdi missjoni, bħall-Profeti, l-Imħallfin, is-Slaten – il-qaddejja t’Alla. Hawmhekk Ġesu’ ppreżentat bħala l-qaddej t’Alla mwiegħed minn Iżaija, kap 42: “Araw il-qaddej Tiegħi li Jien inwieżen, il-Maħtur Tiegħi li fih qalbi strieħet. Inti Ibni l-għażiż li fik sibt il-għaxqa Tiegħi”. Il-fatt li l-Ispirtu niżel fuq Ġesu’ jfisser li ħu inħatar minn Alla biex jaqdi missjoni.

 

Il-Vanġelu jibda l-ewwel nett billi jispjega l-iskop tal-missjoni, u mbagħad kif kellu jaqdiha Ġesu’. L-iskop jidher f’dak li jingħad fuq il-ħamiema. Hawn għandna kwadru letterarju. Fir-referenza għall-ħamiema hemm allużżjoni impliċita għal żewġ rakkonti fit-Testment il-Qadim. Fir-rakkont tal-Ħolqien “l-Ispirtu t’Alla kien jittajjar bħal ħamiema fuq wiċċ l-ilmijiet”.  l-Evanġelista jrid jgħid li l-iskop tal-missjoni ta’ Kristu hu li kollox jerġa lura għar-rapport li l-bniedem kellu m’Alla fil-bidu tal-ħolqien. Għal dan l-iskop Ġesu’ ġie maħtur bħala l-ewwel wieħed f’dan il-ħolqien ġdid. Hemm allużżjoni wkoll fir-rakkont tad-dulluvju, li wkoll hu ppreżentat bħala ħolqien ġdid.

 

Din ir-restawrazzjoni tar-rapport tal-bniedem m’Alla hi l-iskop tal-missjoni ta’ Kristu. Għalhekk l-Evanġelista jinsisti fuq l-Ispirtu li niżel fuqu bħal ħamiema.

 

Pero’, l-iktar importanti hi d-dikjarazzjoni, għax fiha hemm speċifikament fiex kienet tikkonsisti l-missjoni ta’ Kristu. Meta naqraw li d-dikjarazzjoni ġiet mis-sema, dan ifisser li warajha hemm awtorita’ divina. Id-dikjarazzjoni saret personalment lil Kristu, mhux għal kull min kien hemm prseżenti. Il-kelma “Iben” fid-dikjarazzjoni m’għandniex nifhmuha fis-sens ta’ divinita’. Skond Iżaija, il-kelma “iben” tfisser “qaddej”. Kristu kellu jaqdi l-missjoni tal-qaddej li kien imwiegħed minn Iżaija. Kellu jitgħabba bid-dnubiet tal-komunita’, u biex jeħles lill-komunita’ minn dawk id-dnubiet jagħti ħajtu. “Hu refa’ fuqu l-mard tagħna, tgħabba bin-niket tagħna …..u bis-swat Tiegħu sibna l-fejqan”.

 

Din hi l-missjoni li kellu jwettaq Kristu – li jġib ruħu kif previst fil-profezija ta’ Iżaija – jitgħabba bid-dnubiet tal-komunita’, imut biex jeħlisha minn dnubietha, u b’hekk jiġu restawrat ir-rapport t’Alla mall-komunita’ – dak ir-rappport li kellha fil-bidu tal-ħolqien. Hekk il-magħmudija ta’ Ġesu’ hi tħabbira tal-mewt Tiegħu fuq is-salib. Infatti, meta Ġesu’ tkellem fuq il-mewt Tiegħu, sejħilha “magħmudija” (Lq K12, v50).

 

San Luqa, fir-rakkonti tiegħu, spiss jagħmel allużżjoni impliċita għall-mewt ta’ Kristu fuq is-salib. Ir-ragħajja tħabbrilhom Salvatur, dawn marru jfittxuh f’Betlem, sabuh f’maxtura mgeżwer fil-faxex – allużżjoni għall-mewt ta’ Ġesu’ li kien imgeżwer fil-faxex u l-liżar. Meta Kristu temm il-missjoni Tiegħu, dawk il-faxex u l-liżar ħalliehom warajh. Jekk aħna rridu nagħrfu s-sens tal-maxtura ta’ Betlem irridu nżommu quddiem għajnejna s-sens tas-salib u l-qabar vojt.

 

Ir-Reliġjon tagħna mhix reliġjon tas-sentimentaliżmu. Alla bagħat lill-Ibnu fid-dinja biex imut. Din hi l-ideja li niltaqgħu magħha fit-Testment il-Ġdid kollu. Għalhekk, Ġesu’ jgħid “Kollox mitmum” – il-missjoni kien qdieha sal-aħħar. Hi għajta ta’ trijonf, mument ta’ glorja: “meta nkun merfugħ, niġbed lil kulħadd lejja”.

 

Il-Vanġelu tal-Ħadd jitkellem esklussivament fuq Ġesu’ – Hu l-protagonista. Impliċement hemm riferenza wkoll għall-magħmudija tagħna. Ġwanni jgħid: “Hu jgħammidkom bl-Ispirtu s-Santu u n-nar”.

 

Jekk il-Magħmudija ta’ Ġesu’ ġabet fih bidla, Hu aċċetta. Ħalla l-ħajja privata Tiegħu u beda dik pubblika, fejn kellu jkun il-qaddej t’Alla. Il-Magħmudija tagħna wkoll iġġib bidla. Teħlisna mill-jasar tad-dnub, u tibda fina rapport partikulari m’Alla – insiru ulied addottivi t’Alla. Irridu nimpenjaw ruħna biex noqgħodu għar-rieda t’Alla. Ser ikun hemm mumenti li rridu nagħmlu l-istess sagrifiċċju li għamel Ġesu’ biex qeda’ l-missjoni Tiegħu.

 

Ġesu’ qatt ma wiegħed lid-dixxipli Tiegħu xi ġenna tal-art: “Min irid jimxi warajja jrid jerfa’ salibu ta’ kuljum”. Se jkun hemm mumenti meta niġu mitlubin nagħmlu l-istess għażla bħal ma għamel Ġesu’. Kultant irridu negħlbu l-istinti tagħna biex nibqgħu fidili għall-wegħdiet li għamilna fil-magħmudija. Irridu nġibu ruħna ta’ qaddejja t’Alla.

 

Id-dinja tal-lum għandha bżonn ta’ din ix-xhieda. Qed ngħixu f’soċjeta’ sekularizzata – soċjeta’ li tittollera l-Kristjaneżmu imma ħafna drabi ma tantx għandha stima tiegħu. Il-missjoini tagħna hi li nuru li anke f’soċjeta’ sekularizzata il-Kristjaneżmu għandu ċertu valur li jħalli impatt pożittiv anke fuq is-soċjeta’ ċivili.

 

Il-laqgħa għalqet bit-talba tal-Missierna.

 

Il-laqgħa bdiet bit-Talba tal-Moviment. Wara, peress li ninsabu fil-xahar tal-mejtin, saret talba għalihom.

Qabel ma’ ttratta s-suġġett tal-lum, il-kelliem għamel ħsieb fuq il-Quddiesa.

Il-Quddiesa twaqqfet fl-Aħħar Ċena, meta Ġesu’ ħallielna l-Ewkaristija u ta pass għas-saċerdozju. San Alfons jgħid li l-quddiesa hi l-aktar ħaġa qaddisa li togħġob lil Alla – il-mod l-iktar qawwi biex ittaffi l-korla Divina għall-midinbin u l-mod żgur biex trażżan il-qawwa tal-infern L-akbar ġid għall-bniedem u l-aqwa suffraġju għall-erwieħ tal-purgatorju hu t-teżor bla tmiem li Ġesu’ għoġbu jħallilna bħala tifkira għażiża Tiegħu.

Santa Tereża. waqt estasi, staqsiet kif tista’ togħġob lil Alla, u t-tweġiba kienet “Attendi għall-quddiesa”. Illum, l-attendenza għall-quddies naqset, u anke meta nattendu, nagħmlu hekk bħala drawwa. Immorru l-Ħadd għax inkella nagħmlu dnub mejjet, allura mmorru b’obbligu.

M’għandux ikun hekk. Il-quddiesa hi l-laqgħa tagħna m’Alla. Fost il-ġimgħa tmur għax trid int, u għalhekk għandha mertu kbir. Fil-quddiesa jseħħ is-sagrifiċċju ta’ Kristu mill-bidu sal-aħħar. Il-quddiesa llum ġibniha qisa bla ebda sinifikat. Fil-quddiesa tisma’ l-Kelma t’Alla, u meta toħroġ barra, hemmhekk tibda l-quddiesa tiegħek. Jekk dak li smajt ma jibdillek xejn f’ħajtek, allura għandek problema. Il-quddiesa ma tibdlekx mil-lum għal għada, imma biż-żmien, meta teħodha bis-serjeta’.

Meta tmur il-quddies, tpatti għad-dnubiet iżjed milli tagħmel penitenza ħarxa. Il-talb personali huwa mportanti, imma l-iżjed talba perfetta tibqa’ il-quddiesa, għax fiha Ġesu’ jagħtik sehem mill-merti Tiegħu. Ġesu Kristu jitlob għalik bl-istess ħeġġa li biha talab fuq is-salib għall-għedewwa Tiegħu. Il-pjagi mqaddsa Tiegħu jitolbu maħfra għal dnubietek bis-saħħa tat-talb ta’ Ġesu’. Fil-quddiesa ningħaqdu mal-Iben t’Alla biex Bih u Fih nitilgħu għand il-Missier. Dak ifisser meta jgħid “Jien it-Triq, is-Sewwa u l-Ħajja”.

 

 

L-UMILTA’

Il-Kmandamenti, il-Beatudnijiet, u l-Bibbja kollha jduru fuq l-umilta’. Id-dnub ta’ Adam u Eva kien li ma kinux umli – il-Bibbja kollha hi dwar l-umilta’ t’Alla u l-kburija tal-bniedem – mill-bidu sal-aħħar.

“The minute you think you’ve got it, you’ve lost it”. Jekk tgħid jien umli, diġa’ inti m’intix. L-umli qatt ma jgħid li hu umli. Ma jfissirx li ma tagħrafx il-qawwiet tiegħek, imma mhux li titkessaħ bihom. Il-qawwiet tiegħek qegħdin hemm biex tgħin lil ħaddieħor.

Fid-dinja kulħadd huwa ndaqs. Ħadd mhu aħjar minn ħadd. Aħna lkoll maħluqin fuq ix-xbiha t’Alla. Kristu xerred demmu għal kulħadd. Fir-rakkont tal-Fariżew u l-Pubblikan, Ġesu’ jgħid “Tal-aħħar hu ġġustifikat iżjed mill-ewwel wieħed”.

Ma nistgħux inkejlu l-umilta’ tagħna, lanqas tal-qaddisin, mal-umilta’ t’Alla. Fil-ħasil tas-saqajn, Ġesu’ juri l-umilta’ kollha. L-Iben t’Alla, li kien jaf li ħa jagħti ħajtu, niżel jaħsel riġlejn l-appostli. Hawn Kristu jgħallimna li iżjed ma Alla jtik talenti, iżjed għandek tbaxxi ruħek, għax dawn Alla tahomlok biex tgħin lil ħaddieħor.

“It was pride that changed angels into devils. It is humility that makes men as angels”. Biex tkun qaddis trid tilħaq ċertu umilta’. L-umilta’ mhix li tkasbar is-saħħa tiegħek, imma li taċċetta d-djufija tiegħek.

Illum, ħafna drabi, nitkejlu magħna nfusna b’kemm nafu, kemm għandna flus, etċ. Imma l-veru kejl hi l-qalb tajba. Hemm bniedem jilħaq il-maturita’ tiegħu.

L-umilta’ nsibuha f’kull reliġjon, barra s-Sataniżmu. Il-Ġudaiżmu, il-Buddiżmu, l-Iżlam u l-Kristjanita’ kollha jimxu fuq l-umilta’. Imma x-xitan qed jidħol baxx baxx u kulħadd moħħu fit-titli u fil-postijiet, anke f’ċertu laqgħat. Kristu jgħid “Fostkom m’għandux ikun hekk”. Iġġieled biex taqdi, mhux biex tilħaq. Ma jfissirx li m’għandikx ittejjeb il-pożizzjoni tiegħek, imma mhux li tagħmel hekk akkost ta’ kollox. Hemm bżonn insibu l-bilanċ f’kollox.

“The Dark Night of the Soul” ta’ San Ġwann tas-Salib jispjega li d-demonju inqeda’ b’nies li tant jagħmlu ġid li jibdew jikbru fl-isem u tibda wkoll tikbrilhom rashom. Għalhekk it-titlu tal-ktieb, meta Alla jitlaq daqsxejn minn ħajtek biex jikkoreġik, biex rasek ma tikbirx. Meta lil Kristu n-nies riedet tagħmlu sultan, Hu warrab minn hemm. Dik hi l-umilta’. Ġesu’ għażel l-iżjed nies sempliċi.

Minn fejn tibda l-umilta’? Fil-bidu, Alla u l-bniedem kienu ħaġa waħda, imma bid-dnub seħħet il-firda. Aħna, biex naslu s’għand Alla irridu nibnu pont billi nippruvaw ngħixu ħajja tajba. Minn hemm tibda l-umilta’. Weħidna ma naslux. Insalvaw bil-fidi. Ġesu’ qatt ma qal “isalvaw it-tajbin”, imma “min jemmen Fija jsalva”. Issa ma tistgħax temmen f’Ġesu’ u ma tagħmilx l-opri tal-ħniena.

Biex naslu s’għand Alla, irridu nerfgħu s-Salib. Il-kmandamenti qegħdin hemm mhux biex irebbħuk il-Ġenna, imma biex ituk direzzzjoni kif għandek tgħix. Il-Ġenna tinfetaħ biss permezz tal-mewt u l-qawmien ta’ Kristu.

L-oppost tal-umilta’ hi l-kburija. Hekk seħħ l-ewwel dnub – Adam u Eva riedu jsiru daqs Alla. Aħna qatt ma nistgħu nsiru daqs il-Kreatur, lanqas l-akbar qaddisin, lanqas ix-xitan, għax ilkoll maħluqin. L-arroganza, li dak li tgħid int biss tajjeb, l-egoiżmu sfrenat, is-superjorita’, ir-razziżmu, il-pretensjoni – dawn huma kollha l-oppost tal-umilta’.

L-umli jagħmel minn kollox biex jaħfer. Is-supperv ma jaħfirx. Jekk ma taċċettax it-tbatija, ma tistgħax tkun nisrani. Ġesu’ qal “Fid-dinja tbatu jkollkom, imma agħmlu l-qalb għax Jien irbaħt lid-dinja”. Ġesu’ jgħid li iżjed ma taħfer, iżjed jinħafirlek.

Alla jiqfilhom lill-kburin, imma lill-umli jagħtihom il-grazzja. “Kull min jitkabbar jiċċekken, u min jiċċekken jitkabbar”. Il-moralita’ nisranija qegħda bbażata fuq il-Kmandamenti tat-Testment il-Qadim u fuq il-Beatudnijiet tat-Testment il-Ġdid. Fuq dawn għandna nimxu. Ma tistgħax tħaddanhom jekk ma tkunx umli.

Alla jsalva lill-umli, jkun mal-umli, jagħti grazzja lill-umli. Kultant aħna ma nifhmux lil Alla, imma Hu jaf x’inhu l-aħjar għalina. Aktar ma wieħed jinżel u jiċċekken f’għajnejn il-bnedmin, iktar jikber f’għajnejn Alla, u jara wiċċ Alla. Wara l-umilta’ tiġi l-glorja. L-umli m’għandux bżonn jilbes maskra. L-umli huwa naturali. Tagħmel it-tajjeb għax thobb. Kristu stess qal “Tgħallmu minni, għax Jien ta’ qalb ħelwa u umli”. Hu biss jista’ jgħidu dan. Mingħajr umilta’ ma nistgħux nidħlu fis-saltna tas-smewwiet. “Tassew ngħidilkom li jekk ma tinbidlux u ma ssirux bħat-tfal iż-żgħar, ma tidħlux fis-saltna tas-smewwiet”.

L-umli:

• jobdi għas-sewwa bla ebda tnehida.
• jfittex minn naħa tiegħu l-inqas post. “Meta jistidnuk, oqgħod fl-aħħar post”.
• jieħu gost fil-kumpanija ta’ nies “baxxi” f’għajnejn is-soċjeta’. Għandna nistmaw lil kulħadd indaqs.
• ma jitkellimx, la tajjeb u lanqas ħażin, fuqu nnifsu.
• ifittex u jgħożż is-skiet proprju tiegħu.
• jagħraf li l-ġid ġej minn Alla.
• iġarrab paċi kontinwa f’qalbu.
• ma jafdax fih innifsu
• jitlob
• ma jagħmilx lilu nnifsu mudell
• ma jagħmiliex ta’ umli biex jidher umli
• ifaħħar il-ġid ta’ ħaddieħor.

L-umilta’ tibda dejjem billi tinżel għarkobbtejk – li tqerr. Qed tagħraf dnubietek. Qed tagħraf li Kristu jista’ jaħfirhomlok, tisqarrhom lill-qassis u titqarben.

Il-laqgħa għalqet bit-Talba tal-Hniena Divina.