Formats Quote

L-esperjenza ta’ Michaela Agius bħala parti mit-Teens 4 Jesus; fi kliemha:

“Jiena ġejt avviċinata mid-Direttur tal-Moviment Kerŷgma u staqsieni jekk kontx lesta li nagħmel parti mill-grupp sabiħ t’adoloxxenti li hemm fi ħdan il-Kerŷgma. Jien aċċettajt mal-ewwel, bil-ferħ dan ix-xoghol ġdid tiegħi għax indunajt li kien ser ikolli sfidi ġodda quddiemi. L-ewwelnett jien sibt ħbieb ġodda jistennewni f’dan il-grupp t’adoloxxenti. Għall-ewwel bdejt nibża’ li nista’ ma niġix aċċettata iżda malajr indunajt li l-membri tal-grupp kienu persuni żgħażagħ bħali, li għalkemm ġejjin minn postijiet differenti ta’ Malta xorta waħda għandna għan wieħed – dak li naħdmu sabiex inressqu aktar żġħażagħ lejn Ġesù permezz tal-ħidma tagħna. [pullquoteright]”għandna għan wieħed – dak li naħdmu sabiex inressqu aktar żġħażagħ lejn Ġesù permezz tal-ħidma tagħna”[/pullquoteright] Fil-grupp qegħdin numru sabiħ ta’ żgħażagħ li flimkien għandna r-responsabbiltà li noħolqu attivitjiet u parties. Kull nhar ta’ Ġimgħa filgħaxija niltaqgħu sabiex naqraw il-Vanġelu, niddiskutu fuqu u naqsmu l-esperjenzi tagħna ta’ matul dik il-ġimgħa. Barra minn dan, kull xahar nieħdu ħsieb li norganizzaw party għal żgħażagħ oħra bħalna. Jien nieħu ħafna gost norganizza għax minnbarra li qed ningħata opportunità li nkun leader billi ngħin fl-organizzazzjoni tal-party, qegħda wkoll ningħata ċans li permezz tal-idejat tiegħi nuri x’naf u x’kapaċi nagħmel. Dan qed jgħinni ħafna nikber fil-ħiliet tiegħi. Jien inħoss li f’dan il-grupp irnexxieli wkoll nitgħallem naħdem ma persuni li huma differenti minni fl-idejat tagħhom u għalhekk inħoss li tgħallimt naċċetta dak li hu differenti f’ħaddieħor filwaqt li nkun parti mill-grupp.”

Esperjenza: Teens 4 Jesus

Silta mill-mission statement tal-Moviment Kerŷgma  tgħid li aħna l-membri għandna ngħixu b’impenn fit-tixrid ta’ l-Aħbar it-Tajba, li trid tkun ċentrata fuq Ġesù Kristu. Fit-talba tal-moviment ukoll nghidu “sabiex b’għemilna u ħidmietna inwasslu l bxara t-tajba fl-ambjent ta’ madwarna”

Għalhekk d-diskors li għamel il- Papa Franġisku lill-katekisti fis-27 ta’ Settembru 2013 huwa ispirazzjoni għalina bħala moviment.  Dawn huma xi siltiet tad-diskors li wieħed tajjeb li jirrifletti fuqhom.

“Il-katekeżi hi pilastru għall-edukazzjoni fil-fidi. Anki jekk xi drabi jista’ jkun diffiċli, għax taħdmu ħafna, tħabirku tant u ma jidhrux ir-riżultati mixtieqa, hi ħaġa sabiħa nedukaw fil-fidi! Forsi hu l-aqwa wirt li nistgħu ngħaddu: il-fidi! Nedukaw fil-fidi, biex din tikber. Li ngħinu lit-tfal, lill-adolexxenti, liż-żgħażagħ, lill-adulti biex isiru jafu u jħobbu dejjem iżjed lill-Mulej hi waħda mill-isbaħ avventuri edukattivi, għax inkunu qed nibnu l-Knisja!

“Inkunu” katekisti! Mhux nagħmluha ta’ katekisti: dan ma jiswiex! Jien nagħmilha ta’ katekista għax nieħu gost ngħallem… Imma jekk int m’intix katekista, ma jiswa xejn! M’intix sa tagħti frott! Li tkun katekista hi vokazzjoni: “tkun katekista”, din hi l-vokazzjoni, u mhux tagħmilha ta’ katekista. Attenti, m’għidtx “tagħmluha ta’” katekisti, imma “tkunu” katekisti, għax dan jinvolvi l-ħajja kollha kemm hi. Inwasslu lill-oħrajn biex jiltaqgħu ma’ Ġesù permezz tal-kliem u permezz ta’ ħajjitna, bix-xhieda li nagħtu.

Li tkun katekista jfisser tagħti xhieda tal-fidi; tkun koerenti fil-ħajja tiegħek. U din m’hix ħaġa ħafifa.  Aħna ngħinu, aħna niggwidaw lill-oħrajn lejn laqgħa ma’ Ġesù permezz ta’ kliemna u ta’ ħajjitna, bix-xhieda li nagħtu.”

Imbaghad il-Papa kellimhom fuq tlett punti u fil-qasir qalilhom hekk: 

 

Source - Agência Brasil / Author - Tânia Rêgo/ABr

1. L-ewwel ħaġa, għal dixxiplu, hi li jibqa’ ma’ l-Imgħallem, jisimgħu, jitgħallem minnU. U dan jgħodd dejjem, din hi mixja li tibqa’ għaddejja tul ħajjitna kollha. Niftakar kemm drabi fid-djoċesi, fid-djoċesi l-oħra li kelli qabel, kont nara l-katekisti, fi tmiem il-kors fis-seminarju katekistiku, ħerġin jgħidu: “Issa nista’ nissejjaħ katekista!”. Dak ma jiswa xejn, m’għandek xejn, għadek għamilt biss triq żgħira! Dan li jgħodd għal dejjem! M’hux titlu, imma atteġġjament: li tkun miegħU; u jibqa’ jgħodd tul ħajtek kollha! Meta tmur għand il-Mulej, tħares lejn it-Tabernaklu u x’tagħmlu? . Jien ngħid, naħseb, nimmedita u nisma’. Imma int lill-Mulej tħallih iħares lejk? Inħallu lill-Mulej iħares lejna. Hu jħares lejna u dan hu mod kif nitolbu. F’waħda mill-ħarġiet tiegħi, hawn f’Ruma, waqt Quddiesa, resaq lejja sinjur, għadu pjuttost żgħir, u qalli: “Dun, għandi pjaċir li sirt nafek, imma jien ma nemmen f’xejn! M’għandix id-don tal-fidi!”. Fehem li hu don. “M’għandix id-don tal-fidi! X’tgħidli?”. “Taqtax qalbek. Hu jħobbok. ĦalliH iħares lejk! Xejn iżjed”. U dan ngħidu wkoll lilkom: ħalluh lill-Mulej iħares lejkom! Inħallih iħeġġiġli qalbi bin-nar tiegħu? Jekk fil-qalb tagħna m’hemmx is-sħana ta’ Alla, ta’ mħabbtu, tal-ħlewwa tiegħu, kif nistgħu aħna, imsejkna midinba, inħeġġu l-qlub ta’ l-oħrajn?

 

2.  It-tieni ħaġa hi din. Nitilqu mill-ġdid minn Kristu jfisser nimitawh f’li noħorġu minna nfusna u mmorru niltaqgħu mal-persuna l-oħra. Din hi esperjenza sabiħa, hi xi ftit paradossali. Għaliex? Għaliex fiċ-ċentru tal-ħajja tagħna nqiegħdu lil Kristu, u aħna nwarrbu miċ-ċentru! Iktar ma tingħaqad ma’ Ġesù u Hu jsir iċ-ċentru ta’ ħajtek, Hu iktar joħorġok minnek innifsek, ‘jiddeċentrak’ u jiftħek għall-oħrajn. Dan hu d-dinamiżmu veru ta’ l-imħabba, dan hu l-moviment ta’ Alla nnifsu! Alla hu ċ-ċentru, imma hu dejjem don li jingħata, relazzjoni, ħajja li tikkomunika lilha nfisha… Hekk ukoll insiru aħna jekk nibqgħu magħquda ma’ Kristu, Hu jdaħħalna f’dan id-dinamiżmu ta’ l-imħabba.

Il-qalb tal-katekista tgħix dejjem dan il-moviment tal-qalb li tħabbat ’il ġewwa u ’l barra: għaqda ma’ Ġesù u laqgħa mal-persuna l-oħra. Huma t-tnejn flimkien: jien ningħaqad ma’ Ġesù u noħroġ biex niltaqa’ ma’ l-oħrajn. Jekk jonqos wieħed minn dawn iż-żewġ movimenti l-qalb ma tibqax tħabbat, ma tistax tgħix. Hi tirċievi bħala don il-kerygma, u mbagħad min-naħa tagħha toffriha bħala don. Din il-kelma ċkejkna: don. Il-katekista jaf li rċieva don, id-don tal-fidi, u jagħtih b’don lill-oħrajn. U dan hu sabiħ. U ma jżommx għalih xi persentaġġ! Kull ma jirċievi, jagħtih! Din m’hix xi biċċa negozju!  Dan hu kollu kemm hu don: don milqugħ u don mogħti. U l-katekista qiegħed hemm, f’nofs it-triq ta’ dan id-don. Dan hu hekk mill-istess natura tal-kerygma: hi don li joħloq missjoni, li dejjem jimbuttana ’l barra minna nfusna.

 

3. It tielet ħaġa  hi dejjem f’din il-linja: nitilqu mill-ġdid minn Kristu jfisser ma nibżgħux immorru flimkien miegħU fil-periferiji. Hawn tiġini f’moħħi l-istorja ta’ Ġona, figura tassew interessanti, speċjalment fiż-żminijiet tagħna ta’ bidliet u ta’ inċertezza. Ġona hu bniedem twajjeb, b’ħajja trankwilla u ordnata; dan iwasslu biex f’moħħu jibni skemi ċari ħafna u biex jiġġudika kollox u lil kulħadd skond dawn l-iskemi, b’mod riġidu. Kollox għandu ċar, din hi l-verità. Hu riġidu! Għalhekk meta l-Mulej isejjaħlu u jordnalu jmur jippriedka f’Ninwé, il-belt kbira pagana, Ġona ma jħossx li għandu jagħmel dan. Imur hemm! Ninwé qiegħda ’l barra mill-iskemi tiegħu, qiegħda fil-periferija tad-dinja tiegħu. U allura jaħrab, imur Spanja, jaħrab ’il bogħod. Il-Ktieb ta’ Ġona! Huwa qasir, imma hi parabbola li tgħallimna ħafna, speċjalment lilna li qegħdin fil-Knisja.

X’jgħallimna? Jgħallimna ma nibżgħux noħorġu mill-iskemi mentali tagħna biex nimxu wara Alla, għax Alla dejjem imur xi mkien ieħor. Imma tridu tafu ħaġa? Alla ma jibżax! Hu dejjem imur lil hemm mill-iskemi tagħna! Alla ma jibżax mill-periferiji. Imma jekk intom tmorru fil-periferiji, hemm issibuh. Alla jibqa’ dejjem fidil, hu kreattiv  Biex nibqgħu ma’ Alla jeħtieġ inkunu nafu noħorġu, ma nibżgħux noħorġu. Jekk katekista jħalli l-biża’ jirbħu, hu beżżiegħ; jekk katekista joqgħod trankwill, jispiċċa qisu statwa f’mużew: u minn dawn għandna ħafna! Għandna biżżejjed! Jekk jogħġobkom, ma rridux statwi ta’ mużew! Jekk katekista hu riġidu, jitqadded u jsir sterili.

Meta aħna l-Insara nibqgħu magħluqa fil-grupp tagħna, fil-moviment tagħna, fil-parroċċa tagħna, fl-ambjent tagħna, nibqgħu magħluqa u jiġrilna dak kollu li jiġrilu kull ma jibqa’ magħluq; meta kamra tkun magħluqa tibda tinxtamm ir-riħa ta’ l-umdità. U jekk persuna tkun magħluqa f’dik il-kamra, timrad! Meta Nisrani jingħalaq fil-grupp tiegħu, fil-parroċċa tiegħu, fil-moviment tiegħu, hu magħluq, jimrad.

Ġesù m’hux jgħidilna: Morru, irranġaw intom. Le, ma jgħidx hekk! Ġesù jgħid: Morru, jiena magħkom! Dan hu s-sabiħ li għandna u li jimliena bil-qawwa: jekk aħna mmorru, jekk noħorġu biex bl-imħabba nwasslu l-Vanġelu tiegħu, bi spirtu Appostoliku veru.  Ġesù jistenniena fil-qalb ta’ dak  ħuna, fil-ġisem miġruħ tiegħu, fil-ħajja mkasbra tiegħu, fir-ruħ tiegħu bla fidi.

Nibqgħu ma’ Kristu – nibqgħu fi Kristu – infittxu li nkunu dejjem iżjed ħaġa waħda miegħU; nimxu warajh, nixbhuh fil-moviment tiegħu ta’ mħabba, meta jmur jiltaqa’ mal-bniedem; u noħorġu, niftħu l-bibien, insibu l-kuraġġ li nfittxu toroq ġodda għat-tħabbir tal-Vanġelu.

          Papa Franġisku – Diskors lill-katekisti (27 ta’ Settembru 2013)

Inkunu Katekisti u mhux nagħmluha ta’ Katekisti!
 

PAPA

“I wanted to tell you this, to tell you: courage, go forward, make noise. Where there is youth, there should be noise. Then, we’ll adjust things, but the dreams of a young person always make noise. Go forward! In life there will always be people with proposals to curb, to block your way. Please, go against the current. Be courageous, courageous: go against the current.”
― Pope Francis (address to Youths from the Diocese of Piacenza – 28.08.13)
“Where there is youth, there should be noise.”
Other Pages