Il-Moviment Kerygma jorganizza l-“Premju Żagħżugħ tas-Sena” bil-għan li joħroġ fil-beraħ l-impenn taż-żgħażagħ b’mod nisrani fis-soċjetà Maltija.

Il-Premju hu miftuħ għal dawk iż-żgħażagħ kollha li juru sens kbir ta’ impenn fil-ħajja nisranija tagħhom ta’ kuljum u għalhekk jkunu ta’ eżempju qawwi għal żgħażagħ oħra.

Tista tniżżel kopja tar-Regolamenti u l-Formola ta’ Applikazzjoni biex tkunu tistgħu tinnomminaw xi żagħżugħ jew żagħżuha li taħsbu li jikkwalifikaw u jimmerithom jkunu nnominati għal dan il-premju prestiġjuż. 

L-applikazzjonijiet  u d-dokumenti relatati mal-Premju Żagħżugħ tas-Sena 2019 għandhom jaslu fl-uffiċċju tal-Moviment Kerygma sa mhux aktar tard mil-Ġimgħa, 15 ta’ Novembru 2019 fl-12.00pm.  Applikazzjonijiet li jaslu wara din id-data ma jkunux ikkunsidrati.

Ibgħat l-aplikazzjoni f’dan l-indirizz:

PREMJU ŻAGĦŻUGĦ TAS-SENA 2019
Moviment Kerŷgma
Centru Kulturali Kerŷgma
Kunvent Patrijiet Dumnikani
Misraħ San Duminku
Rabat RBT 2521

NIŻŻEL KOPJA TAR-REGOLAMENTI

NIŻŻEL KOPJA TAL-APPLIKAZZJONI

Evangelion: Ħarġa 72

DIRETTUR ĠENERALI ĠDID

Il-Provinċjal tal-Provinċja Dumnikana Maltija P. Frans Micallef OP, appunta lil P. Ivan Attard OP bħala Direttur Ġenerali ġdid għall-Moviment Kerŷgma.

Nawguraw ħafna lil P. Ivan għal din il-kariga l-ġdida.

ASSEMBLEJA ĠENERALI

L-Assemblea Ġenerali tal-Moviment Kerŷgma ser issir fit-28 ta’ Ġunju fis-6.30pm fiċ-Ċentru Kulturali Kerŷgma, ir-Rabat:

AGENDA:

1. Talba tal-Moviment Kerŷgma;
2. Qari tal-minuti;
3. Rapport Amministrattiv:
4. Ħidmiet ta’ matul is-sena;
5. Studju dwar l-evanġelizzazzjoni kontinwa tal-Moviment.
6. Rapport Finanzjarju;
7. Nomina ta’ Awdituri;
8. Mozzjonijiet/emendi għall-Istatut;
9. Elezzjonijiet tal-membri tal-Eżekuttiv.

Jekk ikun hemm aktar minn 8 nominazzjoni għall-Eżekuttiv il-ġdid, il-votazzjoni tibda fl-4.00pm u tibqa għaddejja sa tmiem l-Assembleja.

Membri mħallsa tal-Moviment jistghu jressqu emendi għall-Istatut u/jew jinnominaw membri għall-Eżekuttiv il-ġdid.  Dan jistgħu jagħmluh sa nhar il-Ġimgħa 31 ta’ Mejju 2019 billi jibgħatuhom f’envelope magħluq lil –

President Moviment Kerŷgma, Ċentru Kulturali Kerŷgma, Kunvent Patrijiet Dumnikani, Misraħ San Duminku, Rabat RBT 2521.  Formoli għan-nominazzjonijiet ta’ membri għall-Eżekuttiv jinkisbu mis-Segreterija jew permezz ta’ email lill-Moviment.

LAQGĦAT TAL-ĠIMGĦA

Nhar il-Gimgħa 3 ta’ Mejju ser jerġgħu jibdew il-laqgħat Prayer Cafe’ fiċ-Ċentru Kulturali Kerŷgma fis-7.15pm. Narawkom.

ĊELEBRAZZJONIJIET TA’ JUM L-OMM

Is-Sibt 11 ta’ Mejju

Fl-okkażżjoni ta’ Jum l-Omm ser nagħmlu quddiesa fiċ-Ċentru Kulturali Kerŷgma (ħin eżatt navżaw aktar il-quddiem).  Wara l-quddiesa ser  ikollna bibita.  Kulħadd huwa mistieden.

ĊELEBRAZZJONIJIET TA’ JUM IL-MISSIER

Is-Sibt 16 ta’ Ġunju

Fl-okkażżjoni ta’ Jum il-Missier ser nagħmlu quddiesa fiċ-Ċentru Kulturali Kerŷgma fis-6.00pm.  Wara l-quddiesa ser  ikollna bibita.  Kulħadd huwa mistieden.

Il-Moviment Kerygma jorganizza l-“Premju Żagħżugħ tas-Sena” bil-għan li joħroġ fil-beraħ l-impenn taż-żgħażagħ b’mod nisrani fis-soċjetà Maltija.

Il-Premju hu miftuħ għal dawk iż-żgħażagħ kollha li juru sens kbir ta’ impenn fil-ħajja nisranija tagħhom ta’ kuljum.

Tistgħu tinnomminaw xi żagħżugħ jew żagħżugħa li taħsbu li jikkwalifikaw u jimmerithom jkunu nnominati għal dan il-premju prestiġjuż.  Tistgħu tinnominaw aktar minn persuna waħda, billi tibgħatu applikazzjoni separata. Kopja tar-regolamenti u l-applikazzjoni tista tniżżilhom minn hawn:

Niżżel l-applikazzjoni.

Niżżel ir-regolamenti.

L-applikazzjonijiet  u d-dokumenti relattivi għall-Premju Żagħżugħ tas-Sena 2015 għandhom jaslu fl-uffiċċju tal-Moviment Kerygma sa mhux aktar tard mill-Ġimgħa 11 ta’ Novembru 2016 fl-12.00pm.

Il-Moviment Kerŷgma qed iniedi lezzjonijiet tar-reliġjon. Dan il-kors jinvolvi ħafna aspetti mit-tagħlim tal-Knisja. Fil fatt ser jinkludi il-katekiżmu tal-Knisja kollu, ħafna mill-antik Testment kif ukoll it-Testment il-ġdid. Dan il-kors huwa tajjeb ħafna għal min qiegħed jistudja u ser jagħti xi eżami tar-reliġjon. Flistess ħin huwa tajjeb ukoll għal dawk li jridu jafu u jidħlu iżjed fil-fond fuq il-fidi taghna. Huwa tajjeb ħafna li wieħed jipparteċipa għaliex iżjed ma titgħallem iżjed issir taf dwar l-imħabba kbira li Alla għandu għalina; tneħħi xi perċezzjonijiet hżiena li forsi jkunu akkumulaw biż-żmien. Fl-istess ħin nitghallmu ikoll, ftit dwar it-twemmin ta’ niex mhux kattoliċi u nitghallmu nużaw il-Bibbja bħala għodda ta’ kuljum fil-ħajja tagħna.

Importanti li wieħed isemmi li dan il-kors ser jimxi fuq sillabu stipulat. B’hekk dawk li ser jagħtu eżami Intermediate jew Advanced level ma jkollomx problemi.

Dan il-kors huwa tajjeb ħafna għal min qed jaspira li jsir Katekista jew diġa jgħallem imma m’għandux il-livell Avanzat fir Religjon. Illum il-ġurnata it-tagħlim tar-reliġjon ħa xejra differenti. Dan għaliex it-tfal illum qed jistaqsu ħafna. Illum ma tistax tgħallem tfal (anke zghir) u ma jkollokx background sew. Tajjeb ukoll ghal min qiegħed f’xi għaqda jew jivvolontarja fil-knisja u jrid jidħol iktar fil-fond tal-fidi tiegħu.

Min hu interressat jista jniżżel il-formola minn hawn.

Ejjew u ġibu l-ħbieb magħkom.

L-Assemblea Ġenerali tal-Moviment Kerŷgma saret fiċ-Ċentru Kulturali Kerŷgma nhar il-Ġimgħa 24 ta’ Ġunju.  Kien hemm attendenza tajba ħafna u wara li nqraw ir-rapporti varji, saret ukoll l-elezzjoni għall-Eżekuttiv għas-snin 2016-2019.  Fid-diskors li għamlet qabel l-elezzjoni, Tania Borg irringrazzjat lil dawk il-membri li tefgħu n-nomina tagħhom biex jagħtu sehem fit-tmexxija tal-Moviment u x-xogħol li jkun marbut ma’ dawn il-ħatriet.  Tania qalet li għalkemm l-istatut kien jippermetti massimu ta’ 8 persuni fuq l-Eżekuttiv, xorta waħda kien se jintalab l-għajnuna ta’ dawk li ma jiġux eletti biex permess tal-ħeġġa li għandhom huma ikunu jistgħu jagħtu s-sehem tagħhom ħalli l-Moviment ikompli jikber u jimxi l-quddiem.

Tania irringrazzjat ukoll lil membri kollha tal-Eżekuttiv li kien qed ixolji għax xogħol siewi li huma wettqu fit-tmexxija tal-Moviment fis-snin li għaddew.

Il-membri li ġew eletti fuq l-Eżekuttiv (f’ordni alfabetika) huma:

Borg Tania, Camilleri Katia, Chetcuti Marita, Chetcuti Stephen, Micallef Bernice, Seguna John, Tonna Carmen u Tonna Michele.

Laqgħa tal-Eżekuttiv

Fl-ewwel laqgħa tal-Eżekuttiv li saret fit-30 ta’ Ġunju saru dawn l-ħatriet f’elezzjoni sigrieta skont l-istatut tal-Moviment, bejn il-membri tal-Eżekuttiv:

President – Bernice Micallef;  Viċi-President – Tania Borg;  Segretarju Ġenerali – Katia Camilleri u Segretarju Finanzi – Stephen Chetcuti.

Waqt il-laqgħa inħatru wkoll il-Presidenti tal-erba Ministries.  Dawn huma:

Preaching Ministry – John Seguna, Music Ministry – Michele Tonna, Cultural & Social Ministry – Marita Chetcuti u Social Media Ministry – Carmen Tonna.

Matul il-laqgħa tal-Eżekuttiv saru wkoll il-ħatrijiet ta’ Direttur Taċ-Ċentru – Carmen Tonna u ta’ dawk il-membri li jieħdu ħsieb it-tmexxija tal-gruppi tal-Adulti – Tania Borg, Teens 4 Jesus u Kids 4 Jesus – Bernice Micallef.

12 ta’ Frar 2016

Il-Premju Żagħżugħ tas-Sena 2015 organizzat mill-Moviment Kerŷgma din is-sena intrebaħ mill-grupp Joy Boys mill-Għarb, Għawdex.  Ir-rebbieħ tal-premju, li huwa sponsorjat minn APS Bank, ġie mħabbar mill-President tal-Moviment Kerŷgma, is-Sinjura Tania Borg.

Il-preżentazzjoni tat-trofew saret mill-Eċċellenza Tagħha Marie-Louise Coleiro Preca, President ta’ Malta, fi tmiem ta’ quddiesa li saret fil-Knisja ta’ San Duminku r-Rabat, il-Ġimgħa, 12 ta’ Frar 2016.  Preżenti wkoll għal din iċ-ċerimonja kien hemm ir-raġel tal-President is-Sur Edgar Preca, il-Prof. Emanuel P. Delia, Ċermen tal-APS Bank li sponsorjaw l-okkażżjoni u s-Sinjura Tania Borg, President tal-Moviment Kerŷgma, Dr George Hyzler Ċerman tal-Board tal-Għażla u mistednin oħra.

“ Joy Boys huwa grupp ta’ żgħażagħ, ta’ bejn is-sittax u t-tletin sena, mwielda l-Għarb.  Żgħażagħ li bla dubju jmissu qalb kulħadd għal ħidma u l-impenn tagħhom fil-volontarjat b’mod speċjali r-residenti ta’ l-Għarb bil-modi ta’ impenji li juru lejn kulħadd.

Dan il-grupp ta’ żgħażagħ tista’ tgħid li jmiddu jdejhom għal kollox b’mod partikolari xogħol ta’ l-idejn.  Fil-ħin liberu tagħhom jagħtu servizz fil-bżonnijiet fil-knisja, iċ-ċentru parrokkjali u xogħol fil-maħżen tal-armar tal-festa, iffukati fuq xogħol ta’ restawr fuq l-armar tal-festa tar-raħal.  Dan jinkludi brix, żebgħa, manutenzjoni fuq l-armar kif ukoll jagħmlu ‘fiber glass’ li jieħu ħafna ħin ta’ xogħol ta’ paċenzja u dedikazzjoni iżda fuq kollox xogħol li jitlob attenzjoni minn l-att ta’ saħħa.  Kull meta tkun se ssir xi attivita’ fir-raħal dawn ikunu minn ta’ l-ewwel li jagħtu daqqa t’id biex kollox jimxi ħarir.  Ta’ sikwit jorganizzaw ikliet u attivitajiet għal fundraising biex imbagħad il-flus imorru f’ħafna manutenzjonijiet li jsiru fir-raħal b’mod partikolari għall-manutenzjoni taċ-ċentru parrokkjali.  Dan iċ-ċentru huwa t-tieni dar għaż-żgħażagħ tal-lokalita’ fejn isirilhom laqgħat ta’ informazzjoni spiritwali, attivitajiet u ħafna aktar sabiex dawn iż-żgħażagħ jkollhom opportunitajiet li jiltaqgħu f’ambjent sabiħ u li jkollhom iċ-ċans li jitgħallmu aktar.

Kif tkun qed toqrob il-festa tar-raħal dawn iż-żgħażagħ jinsew kollox biex ikunu jistgħu jiffokaw fuq l-armar, manutezjoni u ħafna aktar li għandu x’jaqsam magħha.  Dan jolqot armar fil-knisja ta’ ġewwa u ta’ barra, armar madwar ir-raħal,  attivitajiet oħra u ħafna aktar.  Ta’ min jgħid li dawn iż-żgħażagħ kollha għandhom l-impjieg tagħhom u għalhekk iqattgħu l-bqija tal-ħin tagħhom jaħdmu.  Xi drabi jibqgħu jaħdmu matul il-lejl.  Tista’ tgħid li kważi biddlu l-bozoz kollha għal dawk LED u saru wkoll fistuni ġodda.  Ħafna drabi jagħmlu xogħol ta’ armar fejn bosta drabi ikunu fil-għoli u jkun ta’ periklu.

Fis-sajf li għadda, dan il-grupp għamel esperjenza missjunarja ġewwa l-Albanija, fil-parroċċa

ta’ Dun Manwel Cutajar jisimha Torovice.  Hemmhekk iż-żgħażagħ tal-Għarb wettqu xogħol ta’ kostruzzjoni u manutenzjoni fi djar ta’ 3 familji fost l-ifqar tal-Albanija.  Prinċipalment dan kien jinkludi kisi u żebgħa tal-ħitan tad-djar, installazzjoni tas-sistema tal-elettriku u f’każ minnhom kisi tal-art.  L-ispejjeż għal din il-kostruzzjoni tħallsu mid-donazzjonijiet li ġabru mil-parruċċani tal-Għarb.  Dawn iż-żgħażagħ ħadmu bla heda.  Ta’ min isemmi li f’ġurnata minnhom dawn għaġnu b’idejhom 17-il xkora kisi u 5 xkejjer siment.

Huma ppreparaw ukoll u qassmu 150 hamper b’ikel bażiku għall-ifqar fost il-fqar tal-Albanija.  Fost l-oħrajn dan kien jinkludi ross, għaġin, dqiq u żejt.  Il-hampers tqassmu f’raħal mitluf ġol-muntanji magħruf bħala Malecaj-Kampi, post li fil-passat kien kamp ta’ konċentrament.  Dawn il-hampers li ma jiswew xejn għalina huma kollox għalihom.

Huma rregalaw ukoll baqra lill-mara armla fqira ta’ 38 sena, mara li sofriet ħafna mir-raġel tagħha meta kien għadu ħaj.  Din il-baqra li tiswa €700, ġiet iffinanzjata minn familja mill-Għarb Għawdex u ser tkun ta’ għajnuna kbira għall-għixien ta’ din il-mara miskina u l-erba ulied tagħha.

Iz-żgħażagħ irregalaw wkoll 8 nagħġiet li jiswew €500 biex koppja oħra jkollha biex tgħajjex lil 4 uliedha.

Huma żaru ukoll dar li tospita persuni b’diżabilità severa mmexxija mis-Sorijiet ta’ Madre Tereża, fir-raħal ta’ Shkoder.

Dan il-grupp ta’ żgħażagħ bla dubju ma jieqaf qatt.  Il-kalendarju ta’ attivitajiet għas-sena 2016 jinsab preparat u mimli daqs bajda.  Uħud mill-attivitajiet ikunu fundraising u oħrajn attivitajiet filantropiċi kemm fil-komunita’ parrokkjali u anke oħrajn f’istituti barra l-lokalita’.  Wara l-esperjenza fil-missjoni fl-Albanija dan il-grupp ta’ żgħażagħ iħares ‘il quddiem għall-esperjenza oħra, fejn il-grupp jinsab ċert li oħrajn ser jakkumpanjawhom.  L-esperjenza fl-Albanija ħalliet impatt pożittiv fuqhom spiritwalment u soċjalment u b’mod speċjali fuq il-popolazzjoni fqira ta’ l-Albanija.  Iż-żgħażagħ fi ħdan dan l-grupp issibhom dejjem lesti għal kull eventwalita’ sabiex iwettqu kull xorta ta’ xogħol fil-volontarjat u jwettqugħ b’dedikazzjoni u impenn kbir.”

Iż-żgħażagħ nominati għal dan il-Premju kienu: Gabriel Cassar minn Kirkop, Nicholas Cassar miż-Żebbuġ Għawdex, Joy Boys mill-Għarb Għawdex, Nikita Mizzi mill-Birgu u l-Oratorju Salesjan Sliema.

Dan it-trofew jingħata kull sena f’ġieħ il-mejjet Dr Rudolph Saliba li kien l-ewwel president tal-Moviment Kerŷgma.  Is-Sinjura Marie-Louise Coleiro Preca ferħet lill-rebbieħa, l-finalisti l-oħra u l-Moviment Kerygma għall-organizzazzjoni ta’ dan l-avveniment annwali fejn jesponu il-ħidma volontarja ta’ tant żgħażagħ. Qalet li l-iktar ħaġa importanti mhux li tagħti l-flus iżda li tagħti mill-ħin tiegħek biex tgħin lill-oħrajn, ħin li qatt ma jistax jiġi rkuprat. Hija qalet li x-xogħol volontarju jittrasforma l-persuna li tagħmlu imma speċjalment is-soċjetà nnifisha f’pajjiż li għandu bżonn kbir tal-valur tal-imħabba. Għalkemm għal grazzja ta’ Alla aħna m’għandniex gwerer, ġirien qrib tagħna huma għaddejjin minn ħafna konflitti u żminijiet diffiċli ħafna b’familji sħaħ għaddejjin minn tant tbatija u telf, bażikament minħabba l-riżultat ta’ l-egoiżmu.  Għalhekk huwa importanti ħafna li aħna nkomplu nsaħħu l-valur tal-imħabba għall-oħrajn anke fis-soċjetà tagħna li qed tiffaċċja sfidi kbar.  Hemm il-possibbiltà li jiġri lilna wkoll li l-egoiżmu jikber u ninsew it-tbatija ta’ ħaddieħor.  Għalhekk huwa  importanti li dawn iż-żgħażagħ ikomplu jgħinu lill-oħrajn u b’hekk jibdlu s-soċjetà tagħna.  Dan il-valur tal-imħabba għall-oħrajn kien mgħoddi lilna minn missirijietna u huwa importanti li jkompli jikber u jissaħħaħ u li aħna ngħaddu dawn il-valuri lill ġenerazzjonijiet futuri.  Hija temmen li hemm ħafna li qed jgħinu f’dan ir-rigward u għalhekk hi awgurat lil finalisti li qatt ma jieqfu jagħtu daqqa t’id-oħrajn fil-bżonn.

Il-Moviment Kerygma qed jorganizza kompetizzjoni tal-Presepji tal-Milied li wara jiġu eżebiti f’wirja li ser issir bejn 20 u d-29 ta’ Novembru 2015 ġewwa c-Ċentru Kulturali Kerŷgma, ir-Rabat.  Ir-rebbieħ jingħata premju ta’ €200, waqt li dak tat-tieni post jingħata €100 u għat-tielet post – €50.  Kulħadd jista’ jipparteċipa f’din il-kompetizzjoni tal-presepji li taghrif dwarha jinsabu f’dawn ir-regolamenti.

1. Il-qies tal-presepju m’għandux jaqbeż il-120 ċm wisa’ bi 80 ċm fond. Il-presepju għandu jkun statiku, imma affarijiet żgħar mekkanizzati bħal xi sienja, imtieħen eċċ huma aċċettati. Jista’ jintuża kull tip ta’ materjal MINBARRA oġġetti protetti bil-liġi bħal Sagħtar eċċ. Il-materjal KOLLU użat fix-xogħol irid jissemma, u dan biex il-membri tal-Moviment ikunu jistgħu jagħmlu nota miktuba fuq kull mejda tal-wiri għal benefiċċju ta’ kompetituri oħra u tal-pubbliku li jżur il-wirja.
2. Il-ġurija sejrin jagħtu l-punti tagħhom fuq: l-oriġinalità, artistrija, il-grotta u l-madwar, irfinar fix-xogħol, perspettiva u proporzjon, tqassim ta’ pasturi u wkoll effetti maħluqa permezz ta’ dwal jew ilma. Presepji mingħajr dwal ukoll jiġu aċċettati u ma jsir ebda tnaqqis ta’ punti fihom. Fl-ebda post tal-presepju ma jista’ jitħalla fejn jidher, l-isem jew xi dettalji oħra li jistgħu jagħtu xi ħjiel ta’ min huwa l-presepju. Min jagħmel dan ikun qed joħloq kunflitt ta’ interess u b’hekk jiġi skwalifikat mill-ewwel.
3. L-esebituri jridu jġibu u jieħdu x-xogħol tagħhom fil-ġranet mogħtija lilhom mill-Moviment. Ir-reġistrazzjoni tagħlaq hekk kif il-postijiet jimtlew u mhux ser ikun hemm data ta’ għeluq. Il-Moviment Kerŷgma jżomm d-dritt li jista’ ma jaċċettax xi presepji, mingħajr ma jagħti spjegazzjoni.
4. Id-deċiżjoni tal-ġurija għandha tkun DEJJEM finali.
5. Il-premjijiet ser ikunu hekk: L-ewwel post €200, it-Tieni post € 100 u t-Tielet post € 50. Ċertifikati ta’ parteċipazzjoni ser jiġu mogħtija wkoll lill-kompetituri KOLLHA. Id-data tal-premjazzjoni tingħata mill-membri tal-Moviment,
6. Il-ħlas ta’ €10 jsir mar-registrazzjoni u kull individwu jista’ jippreżenta presepju wieħed. Għal aktar taghrif cemplu fuq 99110888

Niżżel l-applikazzjoni minn hawn.

Il-Moviment Kerŷgma għadu kemm ippubblika l-ktieb IL-WIRT TAL-QADDISIN.  Meta tieħu dan il-ktieb f’idejk issib gawhar li jimlewk bil-ferħ iżda wkoll tagħraf il-bniedem magħqud ma’ Alla sa fejn jasal.  Aħna nistqarru fil-Kredu: ix-xirka tal-qaddisin.  Xi tfisser din ix-xirka tal-qaddisin?  Hija l-komunjoni li tinbet mill-fidi u tgħaqqad bejniethom lil dawk kollha li huma ta’ Kristu bis-saħħa tal-Magħmudija.  Hija għaqda spiritwali – ilkoll aħna magħqudin! – li ma tinkisirx bil-mewt, imma tibqa’ għaddejja fil-ħajja l-oħra.  Fil-fatt dejjem jibqa’ rabta li ma tinkiser b’xejn bejnna, li aħna ħajjin f’din id-dinja, ma’ dawk li għaddew mill-għatba tal-mewt.  Aħna, hawn isfel fl-art, flimkien ma’ dawk li għaddew għall-eternità, niffurmaw familja waħda kbira.  Dan huwa l-iskop tal-Wirt tal-Qaddisin.  Mgħandux biss valur ta’ storja u narrazzjoni iżda wkoll li jibni pont kuljum mall-Mulej fuq mudelli ta’ ħajjiet li għexu din il-ħajja biex jimxu wara Ġesù.

Il-Papa Franġisku fl-1 ta’ Novembru 2014 tenna li: “Din il-komunjoni meraviljuża, din l-għaqda meraviljuża bejn l-art u s-sema, titwettaq b’mod mill-aktar għoli u intens fil-Liturġija, u fuq kollox, fiċ-ċelebrazzjoni tal-Ewkaristija li tesprimi u ġġib fis-seħħ għaqda mill-aktar profonda bejn il-membri tal-Knisja.  Fl-Ewkaristija, infatti, aħna niltaqgħu ma’ Ġesù ħaj u mal-qawwa tiegħu, u bis-saħħa tiegħu nidħlu f’komunjoni ma’ ħutna fil-fidi: ma’ dawk li jgħixu magħna fid-dinja u ma’ dawk li qabilna waslu fil-ħajja l-oħra, il-ħajja li ma tintemmx.  Din ir-realtà timlina bil-ferħ: kemm hu sabiħ li jkollna tant ħutna fil-fidi li jimxu ma’ ġenbna, isostnuna bl-għajnuna tagħhom u flimkien magħna jimxu l-istess triq lejn is-sema.  U hu ta’ konsolazzjoni li nafu li hemm ħutna oħra li diġà waslu s-sema, qed jistennewna u jitolbu għalina biex aħna nkunu nistgħu nikkontemplaw għall-eternità l-wiċċ glorjuż u mimli ħniena tal-Missier.

Fix-xirka l-kbira tal-qaddisin, Alla ried jirriżerva l-ewwel post għal Omm Ġesù.  Marija hija ċ-ċentru tax-xirka tal-qaddisin bħala ħarriesa waħdanija tar-rabta tal-Knisja universali ma’ Kristu, tar-rabta tal-familja.  Hi l-Omm, Hi Ommna, Ommna.  Għal min irid jimxi wara Ġesù fit-triq tal-Vanġelu, Hi l-gwida żgura għax hija l-ewwel dixxiplu.  Hi l-Omm attenta li tieħu ħsiebna li lilHa għandna nisqtarru kull xewqa u diffikultà li jkollna.”

Il-Wirt tal-Qaddisin huwa ktieb ta’ 524 paġna, hardbound b’marker li tista timmarka fejn tkun wasalt.  Ktieb li jirrakkonta fid-dettal il-ħajja tal-qaddisin ta’ kull ġurnata bi kwotazzjoni mill-istess qaddisin.  Il-ktieb jinbiegħ bil-prezz ta’ €20 mill-Libreriji ewlenin.  Il-Ktieb huwa produzzjoni tal-Moviment Kerŷgma.

Il-Moviment Kerygma qiegħed iniedi proġjett ambizzjuz ieħor għat-tfal dan is-sajf, il- ‘Kids for Jesus Summer Club’.

It-teknoloġija toffri sfidi kontinwi lill-ġentituri sabiex jimmotivaw lil uliedhom jipparteċipaw f’attivitajiet li jgħinuhom jikbru b’mod ħolistiku. Għalhekk il-Moviment ħaseb biex dan is-sajf jagħmel stedina lit-tfal ta’ bejn 4 u 13-il sena  sabiex permezz ta’ dan il-club, it-tfal ikunu qegħdin iqattgħu sajf mimli avventuri, logħob, drama, ħbieberiji u fuq kollox esperjenza ħajja ma’ Ġesù.

Hemm diversi raġunijiet għalxiex il-ġenituri għandhom jaħsbu sabiex iħeggu lil uliedhom għal dan il-club tas-sajf. Permezz tas-Summer Club it- tfal ser ikunu qegħdin jiksbu:

1. Valuri Nsara: Permezz ta’ dan il-club it-tfal jikbru b’mod spiritwali u morali permezz ta’ diversi attivitajiet b’tema reliġjuża, kant u tagħlim ieħor flimkien ma’ sħabhom
2. Avventuri varji: Huma jikbru fil-kunfidennza u l-ħiliet tagħhom permezz ta’ logħob, avventuri, ħarġiet, reċti, kant u żfin sabiex jiċċelebraw ma’ sħabhom it-talenti tagħhom.
3. Tagħlim dwar is-saħħa: jitgħallmu dwar il-kura tal-ġilda tagħhom, ikel nutrittiv u ħiliet bażiċi fl-ewwel għajnuna.
4. Jikbru b’mod individwali, filwaqt li ser ikunu fil-kumpanija ta’ sħabhom, it-tfal ser jingħataw l-opportunità li jitgħallmu ħiliet ġodda, jibnu kunfidenza fihom infushom u jitgħallmu jkunu aktar indipendenti permezz ta’ responsabbiltajiet u sfidi ġodda.
5. Ħbieb ġodda: Il-club joffri opportunità li t-tfal isaħħu l-ħbiberji li diġà għandhom u jkabbru ċ-ċirku ta’ ħbieb tagħhom f’ambjent nadif u sigur iżda fuq kollox jesperjenzaw ħbiberja ma’ Ġesù
6. Memorji sbieħ: F’dan il-club ser nagħmlu ħilitna kollha sabiex nagħtu lit-tfal esperjenza pożittiva li ma jinsew qatt. U nibagħtu lit-tfal lura lejn l-iskola mimlija enerġija, ħeġġa u ferħ.

Mela x’qed tistenna?

Applikazzjonijiet jinkisbu mill-uffiċċju tal-Moviment Kerygma ġewwa l-Kunvent San Duminku r-Rabat, jew mir-reception ta’ Radju Marija jew online: niżżel minn hawn. Għal aktar informazzjoni tista’ ċċempel fuq 21459942 jew 99110888.

Reġistrazzjoni flimkien mal-ħlas ta’ €25 għal dawk li mhux membri tal-Kerygma u €15 għal membri tal-Kerygma jistgħu jaslu fis-segreterija tal-Moviment Kerygm nhar is-16 ta’ Ġunju mis-6.00 sat-8.00 ta’ filgħaxija, fis-26 ta’ Ġunju mill-4.00  sa 7.00 ta’ filgħaxija, 27 ta’ Ġunju mid-9.00 sal-11.00 pm jew fit-30 ta’ Ġunju mill-5.00 sa 8.00 ta’ filgħaxija.

Il-postijiet huma limitati u r-reġistrazzjonijiet jagħlqu meta jittieħdu l-postijiet kollha. Dan mhux neċessarjament li ser jieħu sat-30 ta’ Ġunju.