Mistoqsija li żgur tiġina f’moħħna f’dan l-evanġelju hija kif Ġwanni l-Battista bagħat tnejn mid-dixxipli tiegħu għand Ġesu biex jistaqsuh jekk kienx hu l-Messija jew inkella jistennew lil xi ħadd ieħor. Issa aħna nafu li kien Ġwanni stess li għammed lil Ġesu fix-xmara Ġordan fejn instemgħet l-istqarrija minn Alla nnifsu li: “Dan hu Ibni l-għażiż, fik sibt l-għaxqa tiegħi.(Lq 3,22)”

X’aktarx li Ġwannni bagħat jistaqsi lil Ġesu proprju minħabba d-dixxipli tiegħu stess ħalli jintebħu kif għandu jkun il-Messija li kellu jiġi. Huma kellhom ideja ħażina tal-Messija, kellhom ideja biss ta’ Messija li se jsalvahom mill-oppressjoni politika u militari ta’ dawk li kienu qed jaħkmuhom.

Ġesu kien stqarr li ħadd ma hu aqwa minn Ġwanni; imma anke l-anqas wieħed minna hu aqwa minnu. Hu kien imsejjaħ biex iġib bidla fis-soċjeta fejn kien jgħix. Bħal Ġwanni hu kien imsejjaħ sabiex iwassal il-verita tal-Messija. Irridu nkunu ta’ għajnuna għal dawk ta’ madwarna.

Ebda bniedem li jiltaqa’ ma’ Ġesu ma jibqa’ l-istess imma jinbidel u jġib bidla pożittiva. Kulħadd se jfieq skont il-bżonnijiet tiegħu u bil-mod li għandu bżonn. Irid ikollna l-fidi f’Ġesu li huwa verament kapaċi jaqlagħna mill-problemi kollha tagħna kemm fiżiċi u kemm spiritwali.

Irridu niftakru wkoll li aħna umani u għandna wkoll id-difetti tagħna. Hemm xi dnub li qiegħed iżommna ‘l bogħod minn Alla u ma jħalliniex nikbru u ninbidlu. Ejjew nitolbu l-qawwa tal-Ispirtu s-Santu biex nirrikorru għall-qawwa tiegħu. L-Ispirtu, li huwa Alla; jilluminana u jurina dan in-nuqqas x’inhu. Tajjeb ukoll li nsibu persuna li titlob għalina, li tinterċedi għalina quddiem Alla. M’hemmx għalfejn nagħtu d-dettalji kollha lil din il-persuna imma tajjeb li l-komunita li ngħixu fiha titlob għalina bħalma għandna wkoll id-dmir li nitolbu għal ħaddieħor.

Il-maħfra għandha tkun għodda qawwija fil-ħajja tagħna li teħlisna.

Il-komunikazzjoni tagħna ma’ Alla tkabbar it-tama tagħna fih. Irridu nemmnu li l-grazzja t’Alla hija akbar mill-problemi kollha tagħna. Ġwanni l-Battista ma qatax qalbu u m’għamel xejn meta kien il-ħabs. Ġiegħel lid-dixxipli biex ikomplu jistaqsu l-mistoqsijiet tal-ħajja ħalli jkollhom aktar tama li twassalhom biex ikomplu jgħixu ħajjithom fi ħdan il-Messija l-Ġdid.

Il-Papa Franġisku semma kif f’dan l-Avvent se jkollna it-tliet miġjiet tal-Avvent. L-ewwel miġja hija tal-passat, l-Inkarnazzjoni u t-twelid ta’ Ġesu. It-tieni fil-preżent kif Ġesu jiġi jżurna kuljum fl-Ewkaristija b’mod speċjali. It-tielet huwa fil-futur meta se niltaqgħu ma’ Ġesu wara ħajjitna u fl-aħħar miġja ta’ Ġesu. L-Avvent jgħallimna li ma nafux meta se nerġgħu niltaqgħu wiċċ imb’wiċċ ma’ Ġesu u li għalhekk għandna nkunu dejjem ipprepeparati.

Il-Milied għandu jkun il-laqgħa tagħna verament ma’ Ġesu. Niltaqgħu miegħu bil-fidi tagħna speċjalment permezz tat-talb u l-Ewkaristija. Il-karita wkoll hija mportanti speċjalment f’dawn iż-żminijiet. Imqar ftit ħin ħdejn xi ħadd li huwa waħdu huwa biżżejjed. Irridu naraw lil dawn in-nies bħala Ġesu ieħor li aħna se nerġgħu niltaqgħu miegħu wiċċ imb’wiċċ. Ejjew insibu lil dawk in-nies li jħossuhom weħidhom f’dawn iż-żminijiet, nitolbu għalihom ħalli Ġesu jipprovdilhom min se jgħinhom.

Wieħed jista’ jistaqsi: Għaliex wara tant snin li ilna niċċelebraw il-festi tal-Milied, xi nies għadhom qatt ma daqu l-ferħ ta’ Ġesu? Jista’ jkun li m’aħniex infittxu l-għajnuna li verament kapaċi tgħinna mingħand Ġesu. M’aħniex konvinti li Ġesu għandu l-għajnuna partikulari għalina? Nifhmu li Ġwanni l-Battista beda jipponta, imexxi u jwassal id-dixxipli tiegħu għal għand Ġesu għaliex huwa biss, Ġesu, kien il-vera Messija.

Weħidna m’aħna kapaċi nagħmlu xejn; għandna nitolbu l-għajnuna mingħand Ġesu għaliex hu biss kapaċi jgħinna u jimliena.

Il-kmandament ta’ Ġesu huwa li iħobb lil Alla u lil għajrek bħalek innifsek. Importanti għalhekk li nħobbu wkoll lilna nfusna, li ma nintremewx. Irridu nħossuna mportanti fil-ħajja tagħna fil-Knisja. Meta nkunu fil-kwiet u l-kalma rridu nagħmlu eżerċizzju ta’ talb ħalli meta nkunu fl-inkwiet inkunu diġa tlabna l-għajnuna u ppreparati mentalment minn Ġesu għal dak il-mument. Meta forsi nkunu għaddejjin minn xi problema, irridu nkunu ppreparati minn qabel permezz tat-talb. Irridu ninbidlu minn qabel ma niltaqgħu mal-problemi. Il-Papa Franġsiku pereżempju kien għex minn qabel ma’ diversi persuni bi problemi soċjali u kulturali u pprepara ruħu permezz tat-talb speċjalment sabiex issa għandu dan il-programm ta’ tmexxija u mod partikulari kif jgħix u jiltaqa’ ma’ dawk li verament għandhom problemi.

 

X’inhi l-ewtanażja? L-ewtanażja hi meta persuna tiddeċiedi li ttemm ħajjitha, jew dik ta’ ħaddieħor, minħabba diversi raġunijiet, bħal mard terminali, s-sofferenzi li jġib miegħu, etċ. Fil-fatt, hawn ħafna istituzzjonijiet, bħal fl-Isvizzera, l-Belġju u l-Olanda, li jamministraw l-ewtanażja.  Hemm il-“physician assisted” ewtanażja, meta t-tobba jħejju taħlita ta’ mediċina letali biex il-pazjent jeħodha u jmut, u hemm l-ewtanażja diretta, meta tiġi amministrata mit-tobba nfushom. Fiż-żewġ każi, dan huwa qtil.

Irridu naraw dan kollu fi sfond nisrani. Jista’ jkun li ngħidu “Imma jaħasra, għalfejn tħallih ibati?” Hemm bżonn li, bħala nsara, niżviluppaw ċerti prinċipji:

1. Il-ħajja hi prerogattiva t’Alla. Ħajti mhix tiegħi. Hi don t’Alla. Alla biss jista’ jagħti l-ħajja u Alla biss jista’ jeħodha. Din tmur kontra l-idejat li żviluppaw f’dawn l-aħħar 40 sena fl-Ewropa u l-Amerika – li ħajti hi tiegħi u nagħmel biha dak li rrid. Dan huwa abbuż tal-liberta’ u għalhekk huwa dnub. Alla ħalaqna Hu u rridu nagħtu kont Lilu.

2. It-tbatija tagħmel sens. It-tbatija ma ħalaqiex Alla. Aħna ma narawx skop fiha. Hu tajjeb li l-kamp mediku, l-istat, etc, jagħmlu ħilithom biex ifejjqu l-mard u jtaffu t-tbatija. Quddiem is-salib ta’ Kristu, t-tbatija tagħmel sens. Alla għadda Hu stess mit-tbatija. It-tbatija tagħmel sens biss ghax Kristu għadda minna. Meta jien ngħaqqad is-sofferenzi tiegħi ma’ dawk ta’ Ġesu’, allura t-tbatija tiegħi issir redemptiva – hi stess issalvani. Hekk it-tbatija ma tibqgħax assurdita’ li tipprova tkissirni u tiddisprani. Dan hu l-iskop tax-xitan – li jisfiduċjani minn Alla, ma nibqgħax nafda fil-volonta’ Tiegħu. Alla għalhekk għażel li jsalvana bit-tbatija u l-mewt. Ix-xitan anke lil Ġesu’ ttanta fid-deżert u permezz tal-Lhud u l-ħalliel il-ħażin fuq is-salib. Bħal ma qal San Pawl “Jien intemm f’ġismi dak li jonqos mit-tbatijiet ta’ Kristu fuq is-salib għal ġisem Tiegħu il-Knisja.” It-tbatija fiha sens anke fin-natura: biex twelled, biex titħarreġ f’xi sport, biex titgħallem iddoqq strument, etc. Xejn ma jsir mingħajr sagrifiċċju.

3. Il-valur tal-ħajja ma jiddipendix mill-kwalita’ tagħha. Ma jfissirx li għandha inqas valur minħabba difetti fiżiċi jew mentali, jew livell soċjali, jew faqar. Aħna forsi nirraġunaw: “għax jien ma rridx nara lil ħaddieħor ibati minħabba fija.” Din it-tbatija ta’ dak li jieħu ħsiebu ma ħoloqiex il-marid. Dik hi l-ħajja – li niddependu minn ħaddieħor. Dik hi l-vulnerabbilta’ umana u d-djufija tagħna. Hu sinjal ta’ umilta’. B’hekk it-tbatija qed tagħti opportunita’ lil ħaddieħor biex iħobbok, biex jagħmel karita’, biex anke hu jiltaqa’ ma’ Kristu fit-tbatija tiegħek. Ħaddieħor għandu l-possibilta’ li jeżerċita l-virtujiet insara billi jdur bik.

L-ewtanażja hi ħażina għax il-valur tal-ħajja umana hu invijolabbli – ma nistgħax nimminaċċja l-ħajja, ma nista’ nagħmel xejn biex innaqqas jew intemm il-ħajja. Ħadd m’għandu d-dritt li jwaqqaf il-ħajja – la tiegħu u lanqas tal-oħrajn.

Hemm ukoll l-integrita’ tal-professjoni medika. It-tabib għandu ġurament li jgħin u jgħati s-saħħa, mhux biex inehhi l-ħajja.

L-istat għandu jiffoka iktar fuq il-kura palliattiva – tnaqqas kemm jista’ jkun it-tbatija u l-miżerja. Hemm differenza bejn l-intenzjoni li toqtol, u l-intenzjoni li ttaffi l-uġiegħ. Kultant il-kura palliattiva tħaffef il-mewt ukoll, bħal, per eżempju, il-morfina. Qed tieħu azzjoni u għandek diversi konsegwenzi li mhux kollha tkun tridhom – huma “by-product”. Aħna obbligati li nieħdu trattamenti ordinarji biex intejbu ħajjitna. Mhux obbligat tagħti trattament jekk m’hemm l-ebda ċans, bħal min hu “brain dead”, qed jinżamm ħaj artifiċjalment.

Irid ikun hemm aktar rispett lejn min hu anzjan, jew inkompetenti. M’għandhomx jitqisu bħala piż jew skart. Alla jħares lejn kulħadd bħala ibnu jew bintu. Alla l-ikar li jfittex l-iżvantaġġjati.

La darba tħalli daqsxejn ċans għall-ewtanażja, bħal f’każ ta’ canċer terminali, imbagħad tibda ssib elf raġuni għalfejn tagħmel ewtanażja. L-ewtanżja, bħall-abort, saret industrija. Ix-xjenza ghandha l-obbligu li tħares il-ħajja – obbligu lejn l-etika u l-valuri morali.

Ġesu’ stess qalilna “Erfa salibek u imxi warajja.”

Wara t-Tieni Gwerra Dinjija, il-bniedem beda’ jsir iktar iċ-ċentru ta’ kollox. Il-Knisja tkellmet dwar l-importanza tal-bniedem, mhux bħala assolut, imma bħala l-kapolavur t’Alla. Ġesu’ stess kien japprezza lill-bniedem sħiħ: “Biex nurik li nista’ naħfirlek dnubietek, qed ngħidlek qum u imxi”. Biss iċ-ċentru ta’ kollox jibqa’ dejjem Alla.

F’dan id-dokument il-Knisja titkellem ukoll dwar l-ekonomija, l-iżbilanċ, u l-globalizzzazjoni.

Fl-aħħar tal-laqgħa saret mistoqsija dwar l-evoluzzjoni. Jekk insiru mija fil-mija ċerti minn dan – għax għad hemm il-“missing link” – din m’għandiex tkun ta’ problema, għax huwa Alla li jagħti moħħ intelletwali u r-ruħ. F’kull twelid ta’ bniedem hemm il-nifs t’Alla – ir-ruħ.

Il-laqgħa għalqet bil-kwotazzjoni “Let pleasing God become bigger than pleasing people”

 

L-Ewwel Ħadd tal-Avvent: Inqumu fl-Istennija

Isaija 2,1-5; Salm 121; Rumani 13,11-14; Mattew 24, 37-44

Normalment naraw l-Avvent bħala preparazzjoni għat-twelid ta’ Ġesu fil-Milied. Allura wieħed jista’ jistaqsi: “Kif allura l-Knisja tipproponilna fl-ewel Ħadd tal-Avvent qari dwar it-tieni miġja ta’ Ġesu fid-dinja fl-aħħar tad-dinja u l-ġudizzju universali?”

Aħna fl-Avvent ma nagħmlux biss preparazzjoni għall-miġja ta’ Ġesu fil-Milied; imma nagħmlu preparazzjoni wkoll biex nilqgħu lil Ġesu f’qalbna llum u nkunu mħejjija għat-tieni miġja ta’ Ġesu fostna. Aħna nfakkru xi ħaġa li ġrat fil-passat u nkunu mistiedna biex nimmeditaw u nħejju l-qalb tagħna biex Ġesu jitwieled u jgħix fil-qlub tagħna.

Dawn il-ġrajjiet tal-ewwel miġja ta’ Kristu fostna nsibuhom prinċipalment fl-evanġelju ta’ San Luqa kif ukoll fl-evanġelju ta’ San Mattew. Dawn jippreżentawlna żewġ stejjer differenti li f’ċerti aspetti anke ma jaqblux. Il-ġrajja ta’ San Luqa tippreżentalna storja pjuttost romantika. L-ewwel għandna il-ġrajja tat-twelid ta’ Ġwanni l-Battista bit-tħabbira ta’ Sidna Ġesu Kristu. Imbagħad il-ġrajja tispiċċa bit-twelid ta’ Ġesu.

Fit-tħabbira tal-anġlu Gabrijel lil Marija diġa nistgħu naraw il-missjoni ta’ Sidna Ġesu. Hu għażel li jitwieled minn mara sempliċi. Jurina li Alla se jitħabbeb mal-klassi komuni tan-nies. Marija aċċettat din il-missjoni li għall-bidu ma fehmitiex. Meta saret taf li l-qariba tagħha Eliżabetta kien se jkollha wild, hija telqet kollox u marret taqdi. Ma kibritilhiex rasha imma saret persuna ta’ qadi u servizz lejn min hu fil-bżonn. Hija ħasset u emmnet li għandha missjoni. Hija ntelqet f’idejn Alla għaliex kienet tarah bħala s-sid ta’ kollox.

Sidna Ġesu għażel li jitwieled fl-ambjent ta’ stalla ġewwa Betlem sabiex jagħtina sinjal li huwa solidali ma’ min ma jsibx post fis-soċjeta. Matul iż-żmien tal-Avvent, Ġesu u Marija se jħabbtulna fuq il-bieb tal-qalb tagħna sabiex Ġesu jitwieled fil-qalb tagħna. Normalment aħna nkunu nixtiequ ngħidulu iva; imma fil-verita irridu nistaqsu jekk għandniex spazju reali għalih. Ninħakmu minn mentalita ta’ riċevimenti, divertiment, dwal u ġenn. Nispiċċaw niġru f’dawn l-affarijiet li jeħdulna ħafna ħin li minnu suppost jibqgħalna ħin biex nilqgħu lil Ġesu fil-ħajja tagħna. Inkunu nixbħu lil dawk tal-lukandi li ma laqgħux lil Ġesu mhux għaliex ma rriduhx imma għaliex aħna ‘full up’. Ġesu għalhekk qiegħed juri li hu proprju irid jingħaqad u jkun solidali ma’ min hu eskluż.

L-ewwel tħabbira meta l-anġli ħabbru t-twelid ta’ Ġesu marru jħabbruha lir-rgħajja li kienu jkunu ‘l barra mis-swar tal-belt. Ir-raġuni ma kinitx biss minħabba n-ngħaġ imma wkoll għaliex dawn ir-rgħajja ma kinux jingħoġbu min-nies tas-soċjeta. Huma kienu jkunu jintnu minħabba l-ambjent ta’ annimali li jgħixu magħhom u hawn insibu lil Ġesu li jrid iwassal l-aħbar tiegħu l-ewwel lilhom. Kienu huma, dawn l-esklużi mis-soċjeta li laqgħu din l-aħbar, din il-ġrajja ta’ Ġesu.

Ma rridux sempliċiment niftakru f’din il-ġrajja imma rriduha tbiddlilna qalbna.

Sa mill-bidu nett qegħdin naraw din l-għażla ta’ Alla li ċekken lilu nnifsu u sar ħaġa waħda mal-persuni tal-poplu tiegħu. Mela aħna rridu wkoll nagħmlu dan l-eżerċizzju li nċekken lili nnifsi, f’eżerċizzju ta’ umilta. Aħna s-soċjeta narawha bħala persuni li jkollhom post u pożizzjoni soċjali. In-nies għalina huma politiċi, kantanti popolari, tabib eċċ. Imbagħad niltaqgħu ma’ persuni li m’għandhom l-ebda pożizzjoni u aħna niddejqu lil nġibu ruħna ma’ dawn it-tip ta’ nies. Irridu ngħidu li huma ħafna dawn in-nies għaliex għas-soċjeta anke min hu normali jaqa’ f’din il-kategorija. Aħna bħala nsara irridu ngħixu ma’ dawn it-tip ta’ nies li bħala klassi soċjali mhumiex importanti u ta’ poter. Papa Franġisku jgħidilna li hemm bżonn nieħdu r-riħa ta’ dawn in-nies bħalma r-rgħajja kienu jieħdu r-riħa tan-ngħaġ li kienu jgħixu magħhom. Għaliex irridu nġagħlu lil ħaddieħor iħossu inferjuri?

Sidna Ġesu qatt ma ftaħar b’rixu, għaliex għandna nagħmlu hekk aħna? Irridu ngħixu ma’ dawn in-nies u nħallu lill-qalb tagħna ssir tixbaħ lill-qalb ta’ Ġesu.

Jekk aħna nsara, irridu nfakkru din il-ġrajja u nimmeditaw fuqha ħalli aħna bil-ħajja tagħna nagħtu xhieda li Kristu għadu qrib dawk il-persuni li huma mwarrbin u jitqażżiżhom kullħadd.

Min huma dawn it-tip ta’ nies fi żmienna? Jistgħu ikunu dawk il-vittmi ta’ vizzji bħad-drogi, xorb, djun dawk li tilfu x-xogħol fost oħrajn. Issa ħafna drabi huwa vera li dawn in-nies ġabu l-problemi fuqhom imma dawn huma persuni li Alla sar bniedem għalihom u aħna bħala nsara irridu nkunu xhieda għalihom. Qiegħed ninteressa ruħi kif għandi ngħinhom u nismagħhom? Dawn il-persuni huma wkoll l-immigranti li huma fostna. Ħafna drabi dawn nibżgħu minnhom. Niġġudikawhom mill-ewwel u npoġġu fuqhom il-problemi kollha ta’ kriminalita. Imma aħna għandna nkunu solidali ma’ dawn in-nies li huma sfruttati.

Jien bħala nisrani issa li se jibda l-Avvent; x’bidla se jġib fija? Trid tkun bidla fil-qalb tagħna. Meta aħna qed nilqgħu lil Ġesu, qalbna u ħajjitna huma mħejjija biex nilqgħu lil Ġesu fit-tieni miġja tiegħu. Ejjew insibu affarijiet sempliċi li nistgħu nagħmlu matul dan l-avvent; imqar ngħidu bonġu lil dawk li jkunu qegħdin jiġbru ż-żibel, ibqa’ ċert li jirrisponduk lura u jħossu li huma apprezzati bħala bnedmin.

Ejjew ma nibqgħux diżumani u nibdew inpoġġu n-nies fl-ewwel post speċjalment dawk li huma emarġinati. Dan l-avvent irid iġib bidla imqar żgħira imma ta’ vera.

Il-kelliem Fr. Ivan Attard O.P. ikkonkluda l-laqgħa billi enfasizza kemm hu mportanti li nersqu lejn is-sagrament tar-rikonċiljazzjoni, tal-qrar matul dan l-Avvent.

 

L-laqgħa Prayer Cafe,bdiet bit-talba tal-Moviment u wara sar introduzzjoni fuq it-Tielet Ħadd tal-Avvent. Il-Ħadd li jirraprezenta l-Ferħ.

L-Avvent bħal Randan hu żmien ta’ penitenza. Wieħed hu mistenni li jagħmel sagrifiċċji biex imbagħad inkunu nistgħu nesperjenzaw il-Milied jew il-Qawmien ta’ Kristu mill-mewt (skond iż-żmien) . Fl-avvent żmien parties, drinks u ikliet l-penitenza donna saret issir b’għoti ta’ karita. Bħala nsara mistennija li nagħtu  mingħajr ma nħallu l-id ix-xellugi tkun taf x’inhi tagħmel il-leminija. Jiġifieri nagħtu mingħajr daqq tat-trombi.

Qabel beda l-Avvent sal-Festa ta’ Kristu Re,  il-vanġeli kellhom messaġġ kemmxejn tal-biża’ ..l-ibħra jqumu…jiġi u jsibu rieqed..imma f’dan il-Ħadd il-vanġelu jgħidilna biex ma nibżgħux għax wara dan kollu ġej il-MESSIJA.

Il-liturġija ta’ nhar il-Ħadd tagħtina ħafna kuraġġ. Qisha simbolu tal-ħajja tagħna. Meta nkunu għaddejin minn żminijiet koroh, li kullħadd jaddi minnhom, f’qalbek tibda tgħid tibżax dan għad jaddi u anke min jibda jiprova jagħtik kuraġġ jgħidlek ‘ Kuraġġ issa jaddi qed nitlob għalik.’

Hawn inqara l-vanġelu ta’ nhar il-Ħadd li ġie mehud minn Luqa 3:10-18

Il-qari ta’ l-Ewwel Lezzjoni u S-Salm ta’ nhar il-Ħadd huma qari ta’ Ferħ . Anke l-qassis f’dan il-Ħadd jilbes ilbies roza sinjal ta’ Ferħ.   Fl-ewwel lezzjoni nsibu: “infexx fil-hena u ifraħ b’qalbek kollha…minħabba fik jithenna b’hena kbir..fi mħabbtu jġeddek, jinfexx minħabba fik f’agħjat ta’ ferħ,bħallikieku f’jum ta’ festa.” “Aqbeż bil-ferħ, għanni…għax kbir hu f’nofsok il-Qaddis ta’ Israel.” Nsibu fis-salm. Fit-tieni lezzjoni mbagħad San Pawl jistieden lil insara Filippini biex “Ifirħu dejjem fil-Mulej..” Il-vanġelu mbagħad huwa aktar fuq nota kwieta għalkemm it-tema tibqa’ waħda ta’ ferħ u ta’ stennija ħerqana għal miġja tal-messija. “Il-poplu kien qiegħed jistenna ..”

Lil Ġwanni nsibuh bħala l-prekursur – dak li ġie qabel Ġesù. Il-vanġelu maqsum fi tliet partijiet. In-nies kienu jsegwu xi jgħid Ġwanni b’interess, hu kellu ħafna dixxipli warajh – staqsewh “X’għandna nagħmlu?” Nsibu tliet tipi ta’ nies: il-folla ġenerali: lil dawn Ġwanni qalilhom biex jaqsmu dak li għandhom mal-oħrajn. U dawn xi 2 ilbiesi kien ikollhom mhux gwardarobba mimlija bħal ħafna minna llum! Mbagħad kien hemm ukoll il-pubblikani li kienu jiġbru t-taxxi mill-poplu biex jgħadduhom lil ħakkiema tal-poplu, ir-Rumani. Lil dawn Ġwanni qalilhom biex ma jissikkaw lil ħadd b’taxxi żejda. Kien hemm ukoll suldati jisimgħuh u lil dawn Ġwanni ħeġġiġhom biex jikkuntentaw bil-paga tagħhom u ma jisirqu lil ħadd b’theddid.

Dan kollu jgħodd għalina lkoll llum, għandna lkoll nagħtu minn dak li għandna, u nkunu kuntenti bil-pagi li għandna. Bħala nsara għandna nkunu ta’ eżempju għall-oħrajn billi ħina nagħtuh kollu fuq ix-xogħol u mhux niskartaw jew nitilqu qabel il-ħin. Għandna nħallu lil ħaddieħor jgħaddi ħinu fuq il-post tax-xogħol trankwill u mhux nagħmlu l-ħajja tal-oħrajn infern.  Dawn huma l-affarijiet li jagħtu xhieda li aħna nsara.

F’dan il-Vanġelu naraw ukoll l-umiltà ta’ Ġwanni l-Battista. Għalkemm kellu ħafna nies segwaċi tiegħu ma ħalliex li dan jitla’ għal rasu. Meta kien jiġi mistoqsi jekk hux hu l-mistenni Messija. Hu kien jgħidilhom li lanqas jistħoqqlu jkun is-serv tiegħu. “ ..jien ma jistħoqqlix inħoll il-qfieli tal-qorq tiegħu..” Dak iż-żmien kellhom uzanza li meta jiġi mistieden id-dar il-qaddejja kienu jaħslulu saqajh. Din it-tip ta’ umilta rajnieha ukoll fil-Madonna mat-tħabbira tal-Anġlu li kellha tkun Omm Alla ma ħassithiex superjuri iżda wieġbet ‘Hawn hi l-qaddejja tal-Mulej…’ Huwa importanti li naħdmu b’umiltà.

Ir-rwol tagħna llum mhuwiex differenti minn ta’ Ġwanni l-Battista. Aħna l-insara; sew jekk lajċi, sew jekk reliġjuzi importanti li nkunu l-prekursuri ta’ ĠESÙ. Importanti li nressqu n-nies lejn Ġesù u l-konverżjoni fil-ħajja tagħhom.

Is-sena tal-Ġublew tal-Ħniena bdiet fit-8 ta’ Diċembru 2015, solennità tal-Immakulata Kunċizzjoni. Din se tkun sena tal-Grazzja u tal-Maħfra. Fl-antik, il-Poplu Lhudi kien jiċċelebra s-Sena tal-Ġublew kull 50 sena. Skont il-Levitiku l-iskjavi u l-priġunieri kienu jiġu meħlusa, id-djun maħfura u l-ħniena ta’ Alla tkun murija b’mod speċjali. [Levitiku 25:8-23]

[Lev:25:8] “Mbagħad tgħodd seba’ ġimgħat ta’ snin, seba’ snin għal seba’ darbiet, li jġibu disgħa u erbgħin sena. [Lev:25:9] U ddoqq it-tromba fl-għaxra tas-seba’ xahar, f’jum l-espjazzjoni, u ssemmgħu t-trombi ma’ artkom kollha. [Lev:25:10] Tqaddsu intom il-ħamsin sena u tniedu  l-ħelsien fl-art lil kull min jgħammar fiha. Tkun is-sena tal-ġublew għalikom: kull wieħed jerġa’ għal li kellu u għal ma’ niesu.[Lev:25:11] Tkun għalikom il-ħamsin sena, is-sena tal-ġublew; la tiżirgħu u lanqas taħsdu milli tnibbet l-art, u anqas tiġbru l-għeneb mid-dwieli bla żbir. [Lev:25:12] Għax hu żmien il-ġublew, żmien li għandkom tqaddsu, u tieklu mir-raba’ dak li trodd l-art.

Is-Sena tal-Ġublew  tikkonsisti f’maħfra ġenerali, indulġenza miftuħa għal kulħadd, u l-possibiltà ta’ tiġdid tar-rapport tan-nisrani ma’ Alla u mal-proxxmu.  Għalhekk is-Sena tal-Ġublew trid tkun opportunità ta’ approfondiment tal-fidi u biex il-ħajja nisranija tkun mgħejxa b’aktar xhieda awtentika.

Ir-rit tal-bidu tas-Sena tal-Ġublew ikun jikkonsisti fil-ftuħ tal-Porta Santa li fi snin oħra dan jinżamm dejjem magħluq.  Dan ir-rit jissimbolizza li matul din is-Sena tal-Ġublew, l-insara qed ikunu mogħtija passaġġ ieħor straordinarju fil-mixja spiritwali tagħhom. F’ Malta l-Ħamis 10 ta’ Diċembru nfetaħ Bieb il-Ħabs minn Mons Grech u qal: Jalla din is-sena tkun is-sena ta’ konverżjoni .

Għalina li aħna nsara parteċipanti, rridu nagħmlu din il-mixja ta’ konverżjoni kuljum u importanti li nagħmluha bil-ferħ. Irridu nkunu pozitivi. Li timxi wara l-kmandamenti mhijiex faċli, anke li nsegwu b’mod regolari r-regolamenti tagħna b’konsistenza …naqraw il-Kelma t’Alla kuljum, mmorru l-quddiesa kull nhar ta’ Ħadd u jekk possibli anke mal-ġimgħa, li nersqu b’mod regolari lejn is-sagrament tal-qrar. Xi kultant ngħaddu minn konflitti fina nfusna speċjalment jekk nkunu qegħdin nagħmlu ħilitna biex insegwu r-regolamenti kollha u l-ħajja ttik bil-ħarta – hija ħaġa naturali li nistaqsu imma ‘Għaliex jien?’ Dan ma għandux jaqtagħlna qalbna. Meta l-kuxjenza tagħna hi safja – fina nsibu ċerta paċi.  Ma nistgħux nikkonvertu lil ħaddieħor jekk aħna nfusna m’aħniex konvertiti.

Ejjew inkunu ġenituri li ntellgħu lil uliedna bi spirtu Kristjan. Familja Kristjana hi familja ferħana. Id-dar issir post fejn kull membru jkollu seba’ mitt sena biex jerġa’ jirritorna fiha.

L-għalliema wkoll huma bħal Ġwanni l-Battista. Għalliema Kristjana jridu jkunu konxji mill-azzjonijiet tagħhom f’kull mument quddiem l-istudenti, hu x’inhu s-suġġett li qegħdin jgħallmu. Student jista’ lanqas biss juża l-materjal li tgħallem fis-suġġett li studja iżda l-personalità tal-għalliem/a tiegħu jibqa’ jiftakarha.

Mela hu x’inhu rwol tagħna fil-ħajja, l-aktar mod effettiv kif ngħaddu lil Kristu lil oħrajn hu bl-ezempju ta’ ħajjitna. Bħal Ġwanni l-Battista xgħolna hu li nressqu n-nies lejn Ġesù mbagħad nħallu Lilu jagħmel xgħolu.

Fl-istess ħin, Ġesù għandu bżonn il-koperazzjoni tagħna, Hu jaħdem bil-mezz ta’ kull ġenitur, għalliem u dawk kollha li għandhom sejħa biex jifformaw in-nies. Pietru u Indri kienu dixxipli ta’ Ġwanni l-Battista sakemm iltaqgħu ma Ġesù u marru warajh. Imbagħad kienu huma li ressqu nies oħra biex isiru jafu u jesperjenzaw lil Ġesù. Dan hu l-disinn u t-tifsira tal-evanġelizzazzjoni, li twassal il-vanġelu lill-oħrajn.

Il-laqgħa tkompliet bi kwotazzjoni tal-qaddisa Mother Theresa: “ Meta persuna fqira tmut bil-ġuħ, dan ma jkunx seħħ għax Alla ma jimpurtahx minnu jew minnha. Seħħ għaliex la inti u lanqas jien ma ridna nagħtu lil dik il-persuna dak li kellha bżonn.

Inti u jien, aħna l-knisja le? Aħna rridu naqsmu  dak li għandna ma l-poplu tagħna. It-tbatija tgħezisti llum għaliex in-nies flok jagħtu u jaqsmu dak li għandhom, qegħdin jaħżnu.

Ġesù għamilha ċara ħafna. “Dak kollu li tagħmel mal-iċken minn ħuti, qiegħed tagħmlu miegħi.”

Agħti tazza ilma, tkun qiegħed tagħtiha lili. Aċċetta tifel ċkejken, u tkun qed tirċievi lili.”

Fl-aħħar għalaqna l-laqgħa bit-talba tal-Missierna.

Nistiednek lilek li qrajt dan il-blog tingħaqad magħna nhar il-ġimgħa 18 ta’ Diċembru tieħu kikkra kafe magħna u taqsam magħna l-Kelma tal-Mulej.

NEĦĦU N-NIKET – IT-TIENI ĦADD TAL-AVVENT – 6 TA’ DIĊEMBRU

Il-laqgħa bdiet bit-talba tal-Moviment, u mbagħad inqara l-vanġelu minn San Luqa, Kapitlu 3, versi 1 – 6, li jitkellmu fuq Ġwanni l-Battista: “Leħen ta’ wieħed jgħajjat fid-deżert….”

Wara saret introduzzjoni, u mbagħad infetħet id-diskussjoni bil-mistoqsija: “Taħsbu li l-bidla li ġab Gesu’ qed isseħħ fi żminijietna?”  Għalkemm hemm min jgħid li morna l-baħar, pero’ fil-fatt it-tajjeb għadu jseħħ, imma ma jagħmilx ħoss bħal ħażen. Il-qawwa t’Alla qegħda fuqna; il-fanatiċiżmu fir-reliġjonijiet minn dejjem kien jeżisti, imma l-bidla li ġab Kristu għadha tinħass – mhux dejjem turi ruħha bl-istess mod, imma teżisti u tibqa’ sal-aħħar taż-żminijiet.

Ġesu’ huwa dejjem magħna.  Il-Milied għandu jkun is-sena kollha.  Kieku taf x’bidla jkun hawn!  Għalkemm dan iż-żmien ġie kkommerċjalizzat, għandna nkunu aħna li npoġġu l-Ġesu’ fl-ewwel post fil-Milied.  M’għandniex naqtgħu qalbna, inkunu fejn inkunu.  Jista’ jkun li jidħqu bina, li jwaqquna għaż-żufjett.  Ma rridux nibżgħu nuru t-twemmin tagħna, ma noqogħdux lura milli ngħidu kelma tajba.  Il-Mulej itina l-qawwa.  Aħna, li verament konvinti, għandna bżonn li nintervjenu.  Il-Mulej qed isejjħilna biex naħdmu fl-għalqa Tiegħu.  Mhux biżżejjed li nattendu l-laqghat u nikbru flimkien, imma rridu mmorru hemm barra u nwasslu l-Kelma t’Alla.

Ġesu għandu jkun f’qalbna dejjem, imma forsi żmien il-Milied irattbilna u jiftħilna qalbna biex inġibu iktar għaqda u iktar qbil, biex b’hekk inkunu nsara ta’ veru u iktar twajba ma’ ta’ madwarna.

Kieku nimxu fuq l-eżempju tal-Papa Franġisku, naċċettaw lil kulħadd l-istess.  L-ewwel mistoqsija li għandna nagħmlu hi: “Xi jfisser il-Milied għalija? Dan il-Milied se jkun differenti mill-oħrajn?”  Veru li nagħmlu ħafna preparamenti, imma qalbi hi lesta għal dan il-Milied?  Ħa jkun hemm Ġesu’ fiha, jew ħa noħroġ lil Bambin biex inżejjen u nerġa nżarmah wara li jgħaddu l-festi!  X’inhu l-iktar importanti: it-tiżjin, jew li Ġesu’ jitwieled ġo qalbna?

Il-Milie
d irridu nħossuh tassew jekk aħna nagħmlu xi ħaġa li tbiddel lilna u ta’ madwarna.  Ġesu’ mhux qiegħed hemm biex noħorġuh mill-kaxxa fil-Milied u nerġgħu nerfgħuh fil-kaxxa wara l-Milied.  Kieku ma nsibux fejn inkunu rfajna l-Bambin nieħdu xokk.  Jiġrilna hekk jekk ma nsibuhx f’ħajjitna?  U dan ngħaqqduh ma’ dak li qed jiġri fid-dinja bħalissa.  Ħafna nies, b’solidarjeta’ ma’ dak li ġara fi Franza, żebgħu il-profil tagħhom fuq facebook bil-kuluri ta’ dan il-pajjiż.  Kieku kull darba li nagħmlu dnub niżbgħu il-profil tagħna aħmar, kieku kulħadd jispiċċa b’dan il-kulur, għax xi ftit jew wisq kollha nonqsu.

Il-Milied iġib festi kbar fil-Liturġija ta’ qabel u anke wara l-Milied – liturġija qawwija li tant inkunu “fis-sakra tal-Milied” li lanqas nifhmu is-sinifikat tagħha.  Ġesu’ se jitwieled, imma xi jfisser it-twelid ta’ Ġesu’?  Il-Liturġija tal-Knisja tagħtina tweġiba:

il-Martirju ta’ San Stiefnu (26 ta’ Diċembru), San Ġwann il-Battista (27 ta’ Diċembru), l-Innoċenti (28 ta’ Diċembru).  Kemm minna nikkommemoraw il-qtil tal-innoċenti?

Ma nistgħux niltaqgħu ma’ Kristu u nibqgħu fejn inkunu.  Hu biss jista’ jġib l-aqwa rivoluzzjoni fil-ħajja tagħna, jiġifieri dik li tista’ tinżel f’qalb il-bniedem biex tbiddlu mill-qiegħ.  Għalhekk aħna għandna għażla: il-ħajja fi Kristu, li twassalna għall-ħajja ta’ dejjem, jew il-mewt, li twassalna għat-telfien ta’ dejjem.  Ejjew mela nduru b’indiema lejn Ġesu’, inħalluh jibdilna u jsawwarna bl-Ispirtu qaddis Tiegħu.  Qegħdin fl-Avvent, żmien ta’ tħejjija.  Ejjew mela nagħmlu deċiżżjoni bis-serjeta’ sabiex lil Kristu, u lil Kristu biss, inħalluh ikun is-Sid ta’ ħajjitna, biex jibdilna u jqaddisna sakemm iwassalna għall-perfezzjoni.  Ma nħallux li dan il-Milied ikun bħall-oħrajn.  Irid ikun Milied speċjali – Milied ta’ bidla, ta’ twelid mill-ġdid għal ħajja aħjar fi Kristu Ġesu’.

L-għeluq sar bil-kliem ta’ San Pawl lill-Efesin: “Nitolbu lill-Ispirtu s-Santu sabiex ifejjaqna mid-dnub u jdawwalna u jsaħħaħna biex ngħixu bħala wlied id-dawl” – b’kull ma hu tajjeb, b’kull ma hu ġustizzja, b’kull ma hu veru.

Il-laqgħqa għalqet b’dan il-ħsieb: San Ġwann kien jgħammed.  Il-magħmudija hi att ta’ maħfra. It-teologu Amerikan Karl Paul Reinhold Niebuhr kien qal hekk fuq il-maħfra: “Forgiveness is the final form of love”.

Il-Moviment Kerygma qed jorganizza kompetizzjoni tal-Presepji tal-Milied li wara jiġu eżebiti f’wirja li ser issir bejn 20 u d-29 ta’ Novembru 2015 ġewwa c-Ċentru Kulturali Kerŷgma, ir-Rabat.  Ir-rebbieħ jingħata premju ta’ €200, waqt li dak tat-tieni post jingħata €100 u għat-tielet post – €50.  Kulħadd jista’ jipparteċipa f’din il-kompetizzjoni tal-presepji li taghrif dwarha jinsabu f’dawn ir-regolamenti.

1. Il-qies tal-presepju m’għandux jaqbeż il-120 ċm wisa’ bi 80 ċm fond. Il-presepju għandu jkun statiku, imma affarijiet żgħar mekkanizzati bħal xi sienja, imtieħen eċċ huma aċċettati. Jista’ jintuża kull tip ta’ materjal MINBARRA oġġetti protetti bil-liġi bħal Sagħtar eċċ. Il-materjal KOLLU użat fix-xogħol irid jissemma, u dan biex il-membri tal-Moviment ikunu jistgħu jagħmlu nota miktuba fuq kull mejda tal-wiri għal benefiċċju ta’ kompetituri oħra u tal-pubbliku li jżur il-wirja.
2. Il-ġurija sejrin jagħtu l-punti tagħhom fuq: l-oriġinalità, artistrija, il-grotta u l-madwar, irfinar fix-xogħol, perspettiva u proporzjon, tqassim ta’ pasturi u wkoll effetti maħluqa permezz ta’ dwal jew ilma. Presepji mingħajr dwal ukoll jiġu aċċettati u ma jsir ebda tnaqqis ta’ punti fihom. Fl-ebda post tal-presepju ma jista’ jitħalla fejn jidher, l-isem jew xi dettalji oħra li jistgħu jagħtu xi ħjiel ta’ min huwa l-presepju. Min jagħmel dan ikun qed joħloq kunflitt ta’ interess u b’hekk jiġi skwalifikat mill-ewwel.
3. L-esebituri jridu jġibu u jieħdu x-xogħol tagħhom fil-ġranet mogħtija lilhom mill-Moviment. Ir-reġistrazzjoni tagħlaq hekk kif il-postijiet jimtlew u mhux ser ikun hemm data ta’ għeluq. Il-Moviment Kerŷgma jżomm d-dritt li jista’ ma jaċċettax xi presepji, mingħajr ma jagħti spjegazzjoni.
4. Id-deċiżjoni tal-ġurija għandha tkun DEJJEM finali.
5. Il-premjijiet ser ikunu hekk: L-ewwel post €200, it-Tieni post € 100 u t-Tielet post € 50. Ċertifikati ta’ parteċipazzjoni ser jiġu mogħtija wkoll lill-kompetituri KOLLHA. Id-data tal-premjazzjoni tingħata mill-membri tal-Moviment,
6. Il-ħlas ta’ €10 jsir mar-registrazzjoni u kull individwu jista’ jippreżenta presepju wieħed. Għal aktar taghrif cemplu fuq 99110888

Niżżel l-applikazzjoni minn hawn.

Il-laqgħa kienet xi ftit differenti minn tas-soltu fejn in-nies kienu bil-qegħda ġewwa l-cafeteria li f’dawn iż-zminijiet tkun armata fic-Ċentru.

Beda biex inqara l-Evanġelju ta’ nhar il-Ħadd li ġej – it-tielet Ħadd tal Avvent – li hija silta meħuda minn San Ġwann (Ġw 1, 6-8.19-28) bit-tema: Il-Fqar jiksbu l-ferħ ta’ Alla.  Ir-rakkont ta’ meta  l-Lhud ta’ Ġerusalemm bagħtu għand Ġwanni xi qassisin u Leviti biex jistaqsuh: “Int min int?”  U hu wieġeb kif qal il-profeta Isaija: “Jiena l-leħen ta’ wieħed jgħajjat fid-deżert: Wittu t-triq tal-Mulej.”

U meta staqsewh: “Mela kif qiegħed tgħammed la m’intix il-Messija, u la Elija u lanqas il-Profeta?” ”Jiena ngħammed bl-ilma,” weġibhom Ġwanni, “imma f’nofskom hemm wieħed li intom ma tafuhx, u li ġej warajja; jien anqas ma jistħoqqli nħoll il-qafla tal-qorq tiegħu.”

Wara inqrat silta b’forma poetika minn Xandâr il-Kelma fejn tirrakkonta kif jinbidlu ż-żminijiet. Fl-antik n-nies kienu jifirħu iktar bit-twelid ta’ Ġesù Bambin.  Iżda meta d-dinja għamlet progress in-nies bdiet aktar tagħti każ ix-xalar u d divertiment u warrbu l-Ġesù Bambin: il-Milied sar materjalistiku!   Iżda s-silta fl-aħħar tkompli hekk: “x’tiswa il-ħajja bla Alla, bla Mħabba, kif tgħixha bla Msallab, bla tfal, bla Bambin?” Is-silta tagħlaq billi tgħid li llum l-kurċifiss reġa’ twaħħal fl-iskejjel u l Bambini reġgħu nxtegħlu fit-twieqi.

Fid-diskussjoni qasira li saret, ħarġet ħafna l-ħtieġa li kemm jista’ jkun inżuru lill-anzjani u lil dawk kollha li jgħixu waħedhom mhux matul l-Avvent biss imma is-sena kollha.  Issemma wkoll l-faqar mill-ferħ f’qalbna minħabba li ħafna moħħhom li jkunu mimlijin b’ġid materjalistiku.  Hemm il-ħtieġa li nintrabtu għal kollox mall-Mulej bħala l-aktar ħaġa importanti f’ħajjitna.  Intqal ukoll li m’għandnix nistħu nuru li aħna nsara bħal meta xi ħadd jistħi jrodd is-salib fil-karozza tal-linja.

Fl-aħħar inqrat storja għal żmien il-Milied miktuba minn Antoine Barbara.  Din tirrakkonta kif Bartilmew minn tifel imrobbi minn familja sew ħafna, żvija għal ħajja mill-agħar fejn anke kien jisraq u jberbaq bl-addoċċ.  F’waħda mis-serqiet tiegħu, Bartilmew żelaq u ħabat rasu b’tant qawwa li tilef id-dawl t’għajnejh. Kien żmien il-Milied u nduna li x’ħin beda jisma’ l-għana tal-Milied li, għalkemm għama, xorta beda jħoss il-ferħ tal-Milied.  Il-fidi reġgħet nibtet ġo fih tant li sar miraklu miegħu u reġa’ beda jara.

Minħabba li l-ġimgħa d-dieħla tibda n-Novena tal-Milied, l-laqgħa li jmiss tkun fid- 9 ta’ Jannar 2015.

Sena B: L-Ewwel Ħadd tar-Randan: Evanġeju ta’ San Mark 13, 33-37.

It-laqgħa tal-lejla bdiet bit-Talba tal-Moviment Kerygma sabiex l-Ispirtu s-Santu idawwal lil dawk preżenti, dak l-Ispirtu li mingħajru aħna lanqas aħna kapaċi nduru lejn Alla u nesprimu dak kollu li qed inħossu u dak li għandna bżonn.

It-tema li l-Moviment Kerygma għal dan l-Avvent hija: “Ħajti Hi Avvent”. X’itfisser il-Kelma Avvent? Preparazzjoni u stennija għall-miġja ta’ Ġesú. Hawnhekk dawk preżenti ġew mistoqsija għal liema miġja ta’ Ġesú qegħdin nirreferu. Ħafna rrispondew li l-Avvent għandu jirreferi għall-miġja ta’ Ġesú fil-ħajja tagħna. Din il-miġja ta’ Ġesú fil-ħajja tagħna spiss noħduha for granted. Tajjeb li kuljum f’dan iż-żmien tal-Avvent nistaqsu: “Fhiex inhi qalbi għall-miġja ta’ Ġesú?

L-Avvent huwa wkoll bħar-Randan żmien penitenzjali. Għandna nippreparaw ukoll fih permezz ta’ sawm li jwassalna għall-konverżjoni. Għandu jkun proċess kontinwu ta’ konverżjoni.

L-evanġelju tal-Ħadd li ġej, l-ewwel Ħadd minn erbgħa tar-Randan tas-Sena B nużaw l-evanġelju ta’ San Mark li dejjem jgħinna niskopru min hu dan Ġesú. F’dan l-ewwel Ħadd tar-Randan l-evanġelju jpoġġina fl-istennija għall-miġja ta’ Ġesú. Hekk kif inpoġġu ħarsitna fuq il-Milied li kienet l-ewwel miġja ta’ Ġesú fid-dinja; il-Knisja qed tistedinna biex nippreparaw ruħna  għat-tieni miġja ta’ Ġesú. Fit-tieni u t-tielet Ħadd niltaqgħu mal-figura ta’ San Ġwann il-Battista, il-prekursur li jippuntana lejn min hu Ġesú. Fir-raba’ Ħadd għandna l-figura ta’ Marija li se ġġibilna u twasslilna lil Ġesú.

Fil-laqgħa ġie moqri l-ewwel qari mill-Ktieb tal-Profeta Iżaija 63, 16b-17.19b; 64, 2-7 kif ukoll inqara l-Evanġelju minn San Mark 13, 33-37.

In-nies preżenti ġew mistoqsija x’jaħsbu li huma l-kliem imporanti ta’ dan l-evanġelju? Dawk preżenti semmew l-aktar il-kelma ‘ishru’. Tishar tfisser li tgħasses, tkun attent, taħdem aktar mis-soltu. Ġesú jgħidilna biex nishru ma jmurx jiġi s-sid u jsibna reqdin. Ġesú mhux l-ewwel darba li tkellem fuq is-sahra bħal pereżempju meta talab lill-appostli qrib tiegħu biex jibqgħu miegħu fil-Ġnien tal-Ġetsemani. Is-sahra għalhekk hija l-kelma mportanti f’dan l-evanġelju.  Betlem u l-art Lhudija kienu ilhom jistennew lill-Iben t’Alla imma twieled u ma ndunawx bih. Fil-Bibbja nsibu diversi referenzi għal dan l-irqad li jtellef is-sahra. Issemmew l-istejjer ta’ Sansun fost oħrajn, li qatgħulu xagħru waqt li kien rieqed. Dan l-irqad spiritwali itellef mill-ħajja u l-ħeġġa tagħna bħala nsara, itellef mill-imħabba li għandu jkollna fil-ħajja tagħna. Issemmiet l-Eżortazzjoni Appostolika “Ferħ tal-Evanġelju” tal-Papa Franġisku li fiha l-Papa jsemmi l-attiviżmu li forsi ninħakmu minnu meta nkunu nattendu f’xi grupp li jorganizza diversi attivitajiet. Importanti li l-attivitajiet li nkunu fihom għandu jkollhom l-iskop ta’ evanġelizzazzjoni li nwasslu lil Ġesú lil xulxin permezz tal-esperjenza komunitarja.

Aħna għalhekk irridu nishru sabiex nevanġelizzaw u nwasslu lil Ġesú ġewwa fina u lill-oħrajn. It-talb u l-formazzjoni, fosthom il-qari u l-meditazzjoni tal-Kelma t’Alla huwa essenzjali fil-ħajja tagħna. Nistgħu nagħmlu ħafna affarijiet imma mportanti li nkunu flimkien u bi skop wieħed. Inġieb l-eżempju ta’ arloġġ li jiddependi mhux biss mill-preċiżjoni ta’ kull rota/ingranaġġ li għandu imma wkoll jiddependi mill-qafas li jżomm dawn ir-roti kolha flimkien. Dan il-qafas li jżommna flimkien huwa t-talb u l-formazzjoni.

Meta nishru għandna noqogħdu attenti minn dawk l-affarijiet li forsi żgħar imma li jidħlu fin fin fil-ħajja tagħna; bħall-indifferenza u l-passivitá. Dawn huma l-affarijiet li jħalluna reqdin. Tishar tfisser li ma tħallix għal għada dak li għandek tagħmel. Importanti li nħossu li Alla diġá qiegħed magħna, aħna rridu nagħmlu sforz biex inħossu l-preżenza tiegħu fostna. Fl-ewwel qari nsibu: “Alla jħabrek għal min jittama fih.” Li aħna naċċettaw ir-rieda t’Alla f’ħajjitna permezz tal-umiltá iwassal lil Alla biex iħabrek għalina, li jagħtina grazzja, għajnuna speċjali. Meta aħna naċċettaw lilu fina, huwa jagħtina l-fidi li hija rigal mingħandu għalina biex ibiddel għall-aħjar il-ħajja tagħna.

Irridu nagħtu ċ-ċans lil Alla sabiex jagħmel dak li għandu jagħmel magħna. Il-paċenzja u l-perseverenza huma mportanti fil-ħajja tagħna sabiex nishru b’mod li jqawwina u jressaqna lejn Ġesú u lejn l-oħrajn.

Lejn l-aħħar tal-laqgħa issemma d-Dikors tal-Papa Franġisku lill-Parteċipanti ta’ Laqgħa organizzata mill-Kunsill Pontifiċju għall-Promozzjoni tal-Evanġelizzazzjoni Ġdida. Nixtiequ għalhekk nikkwotaw parti minnu li titkellem dwar l-imporanza li nżommu quddiem għajnejna l-iskop tal-attivitajiet u l-laqgħat kollha li aħna nagħmlu fil-ħajja tagħna speċjalment anke bħala Moviment reliġjuż:

“nitlobkom, ejjew ma niġrux wara l-ilħna tas-sireni li jsejħulna biex nagħmlu mill-pastorali serje ta’ inizjattivi mxerrda, bla ma jirnexxielna nagħrfu l-essenzjal ta’ l-impenn ta’ evanġelizzazzjoni.  Xi kultant donna aktar imħabbtin biex inkattru l-attivitajiet milli biex inkunu attenti għall-persuni u għal-laqgħa tagħhom ma’ Alla.  Pastorali li m’għandhiex din l-attenzjoni tibda ftit ftit issir sterili.  Ma ninsewx nagħmlu bħalma għamel Ġesù mad-dixxipli tiegħu: wara li dawn marru fl-irħula biex iwasslu l-bxara tal-Vanġelu, reġgħu lura kuntenti bis-suċċessi tagħhom; imma Ġesù sejħilhom għalihom waħidhom, f’post maqtugħ min-nies biex joqgħod ftit waħdu magħhom (ara Mk 6:31).  Pastorali mingħajr talb u kontemplazzjoni qatt ma tista’ tilħaq il-qalb tal-persuni.  Tieqaf mal-qoxra mingħajr ma tħalli ż-żerriegħa tal-Kelma ta’ Alla tagħmel l-għeruq, tnibbet, tikber u tagħti l-frott (ara Mt 13:1-23).

Jien naf li lkoll kemm intom taħdmu ħafna, u għalhekk nixtieq inħallilkom l-aħħar kelma importanti:  sabar.  Sabar u perseveranza.  Il-Verb ta’ Alla daħal fis-“sabar” fil-mument ta’ l-Inkarnazzjoni, u hekk baqa’, sal-mewt fuq is-Salib.  Sabar u perseveranza.  M’għandniex il-“bakketta maġika” għal kollox, imma għandna l-fiduċja fil-Mulej li sseħibna u ma titlaqna qatt waħidna.  Fid-diffikultajiet kif ukoll fil-qtigħ il-qalb li huma preżenti mhux ftit fil-ħidma pastorali tagħna, għandna bżonn li qatt ma tonqosna l-fiduċja fil-Mulej u fit-talb li jweżinha.” (Papa Franġisku: Awla Pawlu VI. Il-Ġimgħa 19 ta’ Settembru 2014)

Ġurnata flimkien ma’ Ġesu

Nhar il-Ħadd 30 ta’Novembru huwa l-EWWEL ĦADD TAL-AVVENT. Il-Moviment Kerŷgma qed joffri l-possibilità li nkomplu nikbru flimkien permezz ta’ ġurnata ta’ spiritwalità. L-attivitajiet matul il-ġurnata jinkludu mumenti ta’ talb, esperjenza, workshops, videos, kif ukoll Quddiesa. Se jkun hemm attivitajiet differenti għall-adulti, adolexxenti u tfal.

Dawk li se jattendu huma mitluba jimlew il-formola u jħalluha fis-segreterija tal-Moviment Kerŷgma. Il-prezz hu ta’ €10 għall-adulti u €5 għat-tfal bejn il-5 u s-16-il sena. Il-prezz jinkludi coffee break u one course meal, deżerta u tazza softdrink. Id-data tal-għeluq hi t-Tlieta 25 ta’ Novembru 2014.

Għal-aktar informazzjoni agħfas hawn!

Biex tniżżel il-formola agħfas hawn!