L-ewwel  laqgħa tas-sena 2016 ġie trattat l-Evanġelu ta’ San Luqa (Lq 3, 15-16, 21-22) ‘Il-Magħmudija tal-Mulej’.   Wara li nqara l-Evanġelu ġew diskussi siltiet minnu.

L-ewwel ma ntqal hu li l-Antik Testment jagħlaq bil-profeti u Ġwanni l-Battista kien l-aħħar profeta li ġie jħejji t-triq tal-Mulej.  Skont l-evanġelista Ġwanni kienet jgħammed bl-ilma, rit li kien jintuża biex inaddaf u mhux biex jaħfer id-dnubiet.  Bid-dettal li Ġesù tgħammed l-aħħar, l-evanġelista ried jurina li xogħol Ġwanni l-Battista issa kien lest u li kien ġej xi ħadd aħjar.  L-evanġelista jurina lil Ġesù jitlob għax Ġesù kien iħobb jitlob.  It-talb tagħna huwa meta nitkellmu m’Alla.  Ħajjitna trid tkun ħajja ta’ talb.

Kif Ġesù tgħammed, jidher l-Ispirtu s-Santu f’forma ta’ ħamiema bajda u jinstema’ “Inti Ibni l-għażiż; fik sibt l-għaxqa tiegħi”. Is-simbolu tal-ħamiema tista’ tkun interpretata bħala purità u dgħufija.  Dan ried juri messaġġ li Alla bagħat lil Ġesù fuq missjoni ta’ purità u maħfra u mhux ta’ ġlied u tifrik biex jirbaħ!  Ġesù kellu jbagħti biex jifdi d-dnubiet tagħna. Isaija wkoll ħabbar li l-Messija kellu jbgħati.  Imma l-Lhud stennew Messija li jistagħna u jkun b’saħħtu biex jirbaħ lir-rumani ħalli jieħdu l-kmand f’idejhom!

Aħna li nafu li ġie l-Messija, konna kapaċi nilqgħuh jew ħallejnih għaddej?  Jekk naraw nies ta’ kulur ieħor jew nies li qed ibagħtu, x’nagħmlu ngħinuhom jew nagħlqu għajnejna? Jekk hemm xi ħadd miġġieled magħna nistennew lilu li jiġi għalina jew immorru aħna?  Aħna bħala Kristjani qed nagħtu eżempju lil ħaddieħor jew qed isir bil-kontra?  Aħna msejjħin biex nerfgħu u ngħinu l-problemi ta’ ħaddieħor billi nerfgħu s-salib tagħhom.  Ġesù jgħidilna ħobbu kif tħobbu lilkom infuskom u jispiċċa biex jgħid ‘ħobbu kif ħabbejtkom jien’.  Ġesù spiċċa biex miet fuq is-salib li tfisser li Hu ta kollox! U hekk aħna msejjħin biex ngħatu lil kulħadd.  Dik li tfisser il-magħmudija. Ġesù ma kellux bżonn jitgħammed għax ma kellux dnub imma tgħammed biex juri solidarjeta’ magħna li aħna midinbin u b’hekk qaddes il-magħmudija.  Jurina li l magħmudija għandna bżonnha.

L-laqgħa Prayer Cafe,bdiet bit-talba tal-Moviment u wara sar introduzzjoni fuq it-Tielet Ħadd tal-Avvent. Il-Ħadd li jirraprezenta l-Ferħ.

L-Avvent bħal Randan hu żmien ta’ penitenza. Wieħed hu mistenni li jagħmel sagrifiċċji biex imbagħad inkunu nistgħu nesperjenzaw il-Milied jew il-Qawmien ta’ Kristu mill-mewt (skond iż-żmien) . Fl-avvent żmien parties, drinks u ikliet l-penitenza donna saret issir b’għoti ta’ karita. Bħala nsara mistennija li nagħtu  mingħajr ma nħallu l-id ix-xellugi tkun taf x’inhi tagħmel il-leminija. Jiġifieri nagħtu mingħajr daqq tat-trombi.

Qabel beda l-Avvent sal-Festa ta’ Kristu Re,  il-vanġeli kellhom messaġġ kemmxejn tal-biża’ ..l-ibħra jqumu…jiġi u jsibu rieqed..imma f’dan il-Ħadd il-vanġelu jgħidilna biex ma nibżgħux għax wara dan kollu ġej il-MESSIJA.

Il-liturġija ta’ nhar il-Ħadd tagħtina ħafna kuraġġ. Qisha simbolu tal-ħajja tagħna. Meta nkunu għaddejin minn żminijiet koroh, li kullħadd jaddi minnhom, f’qalbek tibda tgħid tibżax dan għad jaddi u anke min jibda jiprova jagħtik kuraġġ jgħidlek ‘ Kuraġġ issa jaddi qed nitlob għalik.’

Hawn inqara l-vanġelu ta’ nhar il-Ħadd li ġie mehud minn Luqa 3:10-18

Il-qari ta’ l-Ewwel Lezzjoni u S-Salm ta’ nhar il-Ħadd huma qari ta’ Ferħ . Anke l-qassis f’dan il-Ħadd jilbes ilbies roza sinjal ta’ Ferħ.   Fl-ewwel lezzjoni nsibu: “infexx fil-hena u ifraħ b’qalbek kollha…minħabba fik jithenna b’hena kbir..fi mħabbtu jġeddek, jinfexx minħabba fik f’agħjat ta’ ferħ,bħallikieku f’jum ta’ festa.” “Aqbeż bil-ferħ, għanni…għax kbir hu f’nofsok il-Qaddis ta’ Israel.” Nsibu fis-salm. Fit-tieni lezzjoni mbagħad San Pawl jistieden lil insara Filippini biex “Ifirħu dejjem fil-Mulej..” Il-vanġelu mbagħad huwa aktar fuq nota kwieta għalkemm it-tema tibqa’ waħda ta’ ferħ u ta’ stennija ħerqana għal miġja tal-messija. “Il-poplu kien qiegħed jistenna ..”

Lil Ġwanni nsibuh bħala l-prekursur – dak li ġie qabel Ġesù. Il-vanġelu maqsum fi tliet partijiet. In-nies kienu jsegwu xi jgħid Ġwanni b’interess, hu kellu ħafna dixxipli warajh – staqsewh “X’għandna nagħmlu?” Nsibu tliet tipi ta’ nies: il-folla ġenerali: lil dawn Ġwanni qalilhom biex jaqsmu dak li għandhom mal-oħrajn. U dawn xi 2 ilbiesi kien ikollhom mhux gwardarobba mimlija bħal ħafna minna llum! Mbagħad kien hemm ukoll il-pubblikani li kienu jiġbru t-taxxi mill-poplu biex jgħadduhom lil ħakkiema tal-poplu, ir-Rumani. Lil dawn Ġwanni qalilhom biex ma jissikkaw lil ħadd b’taxxi żejda. Kien hemm ukoll suldati jisimgħuh u lil dawn Ġwanni ħeġġiġhom biex jikkuntentaw bil-paga tagħhom u ma jisirqu lil ħadd b’theddid.

Dan kollu jgħodd għalina lkoll llum, għandna lkoll nagħtu minn dak li għandna, u nkunu kuntenti bil-pagi li għandna. Bħala nsara għandna nkunu ta’ eżempju għall-oħrajn billi ħina nagħtuh kollu fuq ix-xogħol u mhux niskartaw jew nitilqu qabel il-ħin. Għandna nħallu lil ħaddieħor jgħaddi ħinu fuq il-post tax-xogħol trankwill u mhux nagħmlu l-ħajja tal-oħrajn infern.  Dawn huma l-affarijiet li jagħtu xhieda li aħna nsara.

F’dan il-Vanġelu naraw ukoll l-umiltà ta’ Ġwanni l-Battista. Għalkemm kellu ħafna nies segwaċi tiegħu ma ħalliex li dan jitla’ għal rasu. Meta kien jiġi mistoqsi jekk hux hu l-mistenni Messija. Hu kien jgħidilhom li lanqas jistħoqqlu jkun is-serv tiegħu. “ ..jien ma jistħoqqlix inħoll il-qfieli tal-qorq tiegħu..” Dak iż-żmien kellhom uzanza li meta jiġi mistieden id-dar il-qaddejja kienu jaħslulu saqajh. Din it-tip ta’ umilta rajnieha ukoll fil-Madonna mat-tħabbira tal-Anġlu li kellha tkun Omm Alla ma ħassithiex superjuri iżda wieġbet ‘Hawn hi l-qaddejja tal-Mulej…’ Huwa importanti li naħdmu b’umiltà.

Ir-rwol tagħna llum mhuwiex differenti minn ta’ Ġwanni l-Battista. Aħna l-insara; sew jekk lajċi, sew jekk reliġjuzi importanti li nkunu l-prekursuri ta’ ĠESÙ. Importanti li nressqu n-nies lejn Ġesù u l-konverżjoni fil-ħajja tagħhom.

Is-sena tal-Ġublew tal-Ħniena bdiet fit-8 ta’ Diċembru 2015, solennità tal-Immakulata Kunċizzjoni. Din se tkun sena tal-Grazzja u tal-Maħfra. Fl-antik, il-Poplu Lhudi kien jiċċelebra s-Sena tal-Ġublew kull 50 sena. Skont il-Levitiku l-iskjavi u l-priġunieri kienu jiġu meħlusa, id-djun maħfura u l-ħniena ta’ Alla tkun murija b’mod speċjali. [Levitiku 25:8-23]

[Lev:25:8] “Mbagħad tgħodd seba’ ġimgħat ta’ snin, seba’ snin għal seba’ darbiet, li jġibu disgħa u erbgħin sena. [Lev:25:9] U ddoqq it-tromba fl-għaxra tas-seba’ xahar, f’jum l-espjazzjoni, u ssemmgħu t-trombi ma’ artkom kollha. [Lev:25:10] Tqaddsu intom il-ħamsin sena u tniedu  l-ħelsien fl-art lil kull min jgħammar fiha. Tkun is-sena tal-ġublew għalikom: kull wieħed jerġa’ għal li kellu u għal ma’ niesu.[Lev:25:11] Tkun għalikom il-ħamsin sena, is-sena tal-ġublew; la tiżirgħu u lanqas taħsdu milli tnibbet l-art, u anqas tiġbru l-għeneb mid-dwieli bla żbir. [Lev:25:12] Għax hu żmien il-ġublew, żmien li għandkom tqaddsu, u tieklu mir-raba’ dak li trodd l-art.

Is-Sena tal-Ġublew  tikkonsisti f’maħfra ġenerali, indulġenza miftuħa għal kulħadd, u l-possibiltà ta’ tiġdid tar-rapport tan-nisrani ma’ Alla u mal-proxxmu.  Għalhekk is-Sena tal-Ġublew trid tkun opportunità ta’ approfondiment tal-fidi u biex il-ħajja nisranija tkun mgħejxa b’aktar xhieda awtentika.

Ir-rit tal-bidu tas-Sena tal-Ġublew ikun jikkonsisti fil-ftuħ tal-Porta Santa li fi snin oħra dan jinżamm dejjem magħluq.  Dan ir-rit jissimbolizza li matul din is-Sena tal-Ġublew, l-insara qed ikunu mogħtija passaġġ ieħor straordinarju fil-mixja spiritwali tagħhom. F’ Malta l-Ħamis 10 ta’ Diċembru nfetaħ Bieb il-Ħabs minn Mons Grech u qal: Jalla din is-sena tkun is-sena ta’ konverżjoni .

Għalina li aħna nsara parteċipanti, rridu nagħmlu din il-mixja ta’ konverżjoni kuljum u importanti li nagħmluha bil-ferħ. Irridu nkunu pozitivi. Li timxi wara l-kmandamenti mhijiex faċli, anke li nsegwu b’mod regolari r-regolamenti tagħna b’konsistenza …naqraw il-Kelma t’Alla kuljum, mmorru l-quddiesa kull nhar ta’ Ħadd u jekk possibli anke mal-ġimgħa, li nersqu b’mod regolari lejn is-sagrament tal-qrar. Xi kultant ngħaddu minn konflitti fina nfusna speċjalment jekk nkunu qegħdin nagħmlu ħilitna biex insegwu r-regolamenti kollha u l-ħajja ttik bil-ħarta – hija ħaġa naturali li nistaqsu imma ‘Għaliex jien?’ Dan ma għandux jaqtagħlna qalbna. Meta l-kuxjenza tagħna hi safja – fina nsibu ċerta paċi.  Ma nistgħux nikkonvertu lil ħaddieħor jekk aħna nfusna m’aħniex konvertiti.

Ejjew inkunu ġenituri li ntellgħu lil uliedna bi spirtu Kristjan. Familja Kristjana hi familja ferħana. Id-dar issir post fejn kull membru jkollu seba’ mitt sena biex jerġa’ jirritorna fiha.

L-għalliema wkoll huma bħal Ġwanni l-Battista. Għalliema Kristjana jridu jkunu konxji mill-azzjonijiet tagħhom f’kull mument quddiem l-istudenti, hu x’inhu s-suġġett li qegħdin jgħallmu. Student jista’ lanqas biss juża l-materjal li tgħallem fis-suġġett li studja iżda l-personalità tal-għalliem/a tiegħu jibqa’ jiftakarha.

Mela hu x’inhu rwol tagħna fil-ħajja, l-aktar mod effettiv kif ngħaddu lil Kristu lil oħrajn hu bl-ezempju ta’ ħajjitna. Bħal Ġwanni l-Battista xgħolna hu li nressqu n-nies lejn Ġesù mbagħad nħallu Lilu jagħmel xgħolu.

Fl-istess ħin, Ġesù għandu bżonn il-koperazzjoni tagħna, Hu jaħdem bil-mezz ta’ kull ġenitur, għalliem u dawk kollha li għandhom sejħa biex jifformaw in-nies. Pietru u Indri kienu dixxipli ta’ Ġwanni l-Battista sakemm iltaqgħu ma Ġesù u marru warajh. Imbagħad kienu huma li ressqu nies oħra biex isiru jafu u jesperjenzaw lil Ġesù. Dan hu l-disinn u t-tifsira tal-evanġelizzazzjoni, li twassal il-vanġelu lill-oħrajn.

Il-laqgħa tkompliet bi kwotazzjoni tal-qaddisa Mother Theresa: “ Meta persuna fqira tmut bil-ġuħ, dan ma jkunx seħħ għax Alla ma jimpurtahx minnu jew minnha. Seħħ għaliex la inti u lanqas jien ma ridna nagħtu lil dik il-persuna dak li kellha bżonn.

Inti u jien, aħna l-knisja le? Aħna rridu naqsmu  dak li għandna ma l-poplu tagħna. It-tbatija tgħezisti llum għaliex in-nies flok jagħtu u jaqsmu dak li għandhom, qegħdin jaħżnu.

Ġesù għamilha ċara ħafna. “Dak kollu li tagħmel mal-iċken minn ħuti, qiegħed tagħmlu miegħi.”

Agħti tazza ilma, tkun qiegħed tagħtiha lili. Aċċetta tifel ċkejken, u tkun qed tirċievi lili.”

Fl-aħħar għalaqna l-laqgħa bit-talba tal-Missierna.

Nistiednek lilek li qrajt dan il-blog tingħaqad magħna nhar il-ġimgħa 18 ta’ Diċembru tieħu kikkra kafe magħna u taqsam magħna l-Kelma tal-Mulej.

NEĦĦU N-NIKET – IT-TIENI ĦADD TAL-AVVENT – 6 TA’ DIĊEMBRU

Il-laqgħa bdiet bit-talba tal-Moviment, u mbagħad inqara l-vanġelu minn San Luqa, Kapitlu 3, versi 1 – 6, li jitkellmu fuq Ġwanni l-Battista: “Leħen ta’ wieħed jgħajjat fid-deżert….”

Wara saret introduzzjoni, u mbagħad infetħet id-diskussjoni bil-mistoqsija: “Taħsbu li l-bidla li ġab Gesu’ qed isseħħ fi żminijietna?”  Għalkemm hemm min jgħid li morna l-baħar, pero’ fil-fatt it-tajjeb għadu jseħħ, imma ma jagħmilx ħoss bħal ħażen. Il-qawwa t’Alla qegħda fuqna; il-fanatiċiżmu fir-reliġjonijiet minn dejjem kien jeżisti, imma l-bidla li ġab Kristu għadha tinħass – mhux dejjem turi ruħha bl-istess mod, imma teżisti u tibqa’ sal-aħħar taż-żminijiet.

Ġesu’ huwa dejjem magħna.  Il-Milied għandu jkun is-sena kollha.  Kieku taf x’bidla jkun hawn!  Għalkemm dan iż-żmien ġie kkommerċjalizzat, għandna nkunu aħna li npoġġu l-Ġesu’ fl-ewwel post fil-Milied.  M’għandniex naqtgħu qalbna, inkunu fejn inkunu.  Jista’ jkun li jidħqu bina, li jwaqquna għaż-żufjett.  Ma rridux nibżgħu nuru t-twemmin tagħna, ma noqogħdux lura milli ngħidu kelma tajba.  Il-Mulej itina l-qawwa.  Aħna, li verament konvinti, għandna bżonn li nintervjenu.  Il-Mulej qed isejjħilna biex naħdmu fl-għalqa Tiegħu.  Mhux biżżejjed li nattendu l-laqghat u nikbru flimkien, imma rridu mmorru hemm barra u nwasslu l-Kelma t’Alla.

Ġesu għandu jkun f’qalbna dejjem, imma forsi żmien il-Milied irattbilna u jiftħilna qalbna biex inġibu iktar għaqda u iktar qbil, biex b’hekk inkunu nsara ta’ veru u iktar twajba ma’ ta’ madwarna.

Kieku nimxu fuq l-eżempju tal-Papa Franġisku, naċċettaw lil kulħadd l-istess.  L-ewwel mistoqsija li għandna nagħmlu hi: “Xi jfisser il-Milied għalija? Dan il-Milied se jkun differenti mill-oħrajn?”  Veru li nagħmlu ħafna preparamenti, imma qalbi hi lesta għal dan il-Milied?  Ħa jkun hemm Ġesu’ fiha, jew ħa noħroġ lil Bambin biex inżejjen u nerġa nżarmah wara li jgħaddu l-festi!  X’inhu l-iktar importanti: it-tiżjin, jew li Ġesu’ jitwieled ġo qalbna?

Il-Milie
d irridu nħossuh tassew jekk aħna nagħmlu xi ħaġa li tbiddel lilna u ta’ madwarna.  Ġesu’ mhux qiegħed hemm biex noħorġuh mill-kaxxa fil-Milied u nerġgħu nerfgħuh fil-kaxxa wara l-Milied.  Kieku ma nsibux fejn inkunu rfajna l-Bambin nieħdu xokk.  Jiġrilna hekk jekk ma nsibuhx f’ħajjitna?  U dan ngħaqqduh ma’ dak li qed jiġri fid-dinja bħalissa.  Ħafna nies, b’solidarjeta’ ma’ dak li ġara fi Franza, żebgħu il-profil tagħhom fuq facebook bil-kuluri ta’ dan il-pajjiż.  Kieku kull darba li nagħmlu dnub niżbgħu il-profil tagħna aħmar, kieku kulħadd jispiċċa b’dan il-kulur, għax xi ftit jew wisq kollha nonqsu.

Il-Milied iġib festi kbar fil-Liturġija ta’ qabel u anke wara l-Milied – liturġija qawwija li tant inkunu “fis-sakra tal-Milied” li lanqas nifhmu is-sinifikat tagħha.  Ġesu’ se jitwieled, imma xi jfisser it-twelid ta’ Ġesu’?  Il-Liturġija tal-Knisja tagħtina tweġiba:

il-Martirju ta’ San Stiefnu (26 ta’ Diċembru), San Ġwann il-Battista (27 ta’ Diċembru), l-Innoċenti (28 ta’ Diċembru).  Kemm minna nikkommemoraw il-qtil tal-innoċenti?

Ma nistgħux niltaqgħu ma’ Kristu u nibqgħu fejn inkunu.  Hu biss jista’ jġib l-aqwa rivoluzzjoni fil-ħajja tagħna, jiġifieri dik li tista’ tinżel f’qalb il-bniedem biex tbiddlu mill-qiegħ.  Għalhekk aħna għandna għażla: il-ħajja fi Kristu, li twassalna għall-ħajja ta’ dejjem, jew il-mewt, li twassalna għat-telfien ta’ dejjem.  Ejjew mela nduru b’indiema lejn Ġesu’, inħalluh jibdilna u jsawwarna bl-Ispirtu qaddis Tiegħu.  Qegħdin fl-Avvent, żmien ta’ tħejjija.  Ejjew mela nagħmlu deċiżżjoni bis-serjeta’ sabiex lil Kristu, u lil Kristu biss, inħalluh ikun is-Sid ta’ ħajjitna, biex jibdilna u jqaddisna sakemm iwassalna għall-perfezzjoni.  Ma nħallux li dan il-Milied ikun bħall-oħrajn.  Irid ikun Milied speċjali – Milied ta’ bidla, ta’ twelid mill-ġdid għal ħajja aħjar fi Kristu Ġesu’.

L-għeluq sar bil-kliem ta’ San Pawl lill-Efesin: “Nitolbu lill-Ispirtu s-Santu sabiex ifejjaqna mid-dnub u jdawwalna u jsaħħaħna biex ngħixu bħala wlied id-dawl” – b’kull ma hu tajjeb, b’kull ma hu ġustizzja, b’kull ma hu veru.

Il-laqgħqa għalqet b’dan il-ħsieb: San Ġwann kien jgħammed.  Il-magħmudija hi att ta’ maħfra. It-teologu Amerikan Karl Paul Reinhold Niebuhr kien qal hekk fuq il-maħfra: “Forgiveness is the final form of love”.

     Il-laqgħa Prayer Cafè tal-Ġimgħa 13 ta’ Novembru 2015, iffukat fuq il-Vanġelu tat-33 Ħadd ta’ matul is-sena B.

     Dan il-vanġelu huwa test li sa ftit żmien ilu kien jintuża f’waħda mill-erbgħa priedki (min-ħamsa) li kienu jsiru waqt l-eserċizzi tar-Randan. Dawn kienu jiffukaw fuq in-Novissimi: Mewt, Ġudizzji, Infern u Ġenna.

     Illum, qiegħdin ngħixu f’kultura stramba; kultura tal-mewt li ma tridx taċċetta l-mewt. Ngħixu f’kultura li ma tridx il-mewt imma fl-istess ħin ngħixu f’soċjeta li trid tiddeċiedi min jgħix u min le. Dan il-Vanġelu ma jitkellimx b’ewfemiżmi: meta niddeskrivu xi ħaġa li hija kerha ħafna bi kliem inqas ikraħ. Per eżempju: meta xi ħadd imut ngħidu ħalliena. Nagħmlu dan għax nibżgħu mil-mewt. Dan huwa vanġelu appokalittiku li jitkellem dwar l-affarijiet li se jiġru fl-aħħar b’mod espliċitu. Vanġelu li jitkellem dwar dak li se jiġri fl-aħħar tal-ħajja. Jitkellem dwar traġedji kbar: ix-xemx tiddallam; il-kwiekeb jaqgħu; dan il-kliem ma għandux ibbeżgħana imma għandu jtina t-tama. Veru li qed ngħixu f’dinja fraġli; li se tispiċċa bħalma se nispiċċaw aħna. Iżda r-risposta itihilna l-vanġelu stess:

Mbagħad jaraw lil Bin il-bniedem ġej fis-sħab b’qawwa kbira u bi glorja.

Din hija risposta li għandha ttina t-tama!

     Aħna għandna ħabta nintrabtu mal-affarijiet li jleqqu; nagħmluhom l-idoli tagħna. Anke aħna li nemmnu ġieli nagħmlu dan. Kultant anke d-drawwiet li mdorrijin bihom kuljum, nagħmluhom idoli tagħna. Ninsew li aħna qiegħdin hawhekk passaġġ u norbtu ruħna ma dawn l-affarijiet tad-dinja. Dawn l-affarijeit kollha se jispiċċaw… imma aħna li nemmnu nafu li l-mewt tfisser bidu ta xi ħaġa ġdida. Għalina l-insara l-mewt tagħna għandha tfisser it-twelid tagħna.

     Il-vanġelu issemmi ħwejjeġ appokalitiċi. Iżda fuq livell iktar personali aħna nistgħu nesperjenzaw katastrofi permezz ta disgrazzji, mewt, traditamenti etc. Hawnhekk ukoll għandna jkollna t-tama. Permezz tas-sigra tat-tin Ġesù jtina tagħlima… għandna nagħrfu s-sinjali u nifmhu li waqt traġedja hemm id-dawl fit-tarf; Hemm it-tama; Hemm Alla fit-tarf; B’idejh miftuħa biex jilqagħna bl-imħabba u t-tenerezza.

     Barra minn hekk aħna bħala nsara għandna missjoni. Din hi l-missjoni li nwasslu t-tama lill-ħaddieħor: nevanġelizzaw lil-kulħadd, għax kulħadd qed jipprova jsalva. Ħafna drabi minflok inwasslu t-tama aħna nippruvaw nagħtu ħaqq u ġudizzji. Mingħajr ma nafu u naħsbu, niġudikaw lil ta’ madwarna. Pero Alla biss jista jiġudika. Alla se jiġudikana lkoll fl-aħħar u aħna ningħataw il-ħaqq: l-infern jew il-ġenna. U jekk nimxu fuq it-tagħlim ta’ Ġesù; fuq il-beatitudnijiet; ma għandniex għalfejn ninkwetaw. Alla huwa ħanin imma ma nistgħux nagħmlu li rridu imma rridu nagħmlu ħilitna biex ngħixu fit-tajjeb.

Dan il-vanġelu itina żewġ ingredjenti biex jgħinna nagħmlu dan:

1. it-Tama biex jgħinnha ma nitlfuhiex anke fl-agħar mumenti.
2. il-Fidi biex nemmnu f’dak li qal Kristu u mhux dak li jgħidu l-profeti foloz.

Għalhekk irridu nġorru s-slaleb tagħna bil-fidi f’Alla u bit-tama li se jasal żmien aħjar.

Il-Laqgħa spiċċat billi qrajna s-salm li se jinqara fil-quddiesa ta3-33 Ħadd (sena B):

Ħarisni Mulej, għax għandek nistkenn
Mulej, inti s-sehem ta’ wirti u ta’ xortija
Inti żżomm f’idejk xortija.
Dejjem quddiemi żammejt ‘il-Mulej,
Għax bih f’leminti ma nitħarrek qatt.

Tifraħ għalhekk qalbi u tithenna ruħi,
U ġismi jistrieħ bil-kwiet.
Għax int ma tħallix lil ruħi fl-imwiet,
Ma tħallix il-maħbub tiegħek jara t-taħsir.

Inti turini t-triq tal-ħajja,
Hemm il-milja tal-ferħ quddiemek,
Hemm għaxqa għal dejjem f’lemintek.

Imbagħad inqrat din il-kwotazzjoni:

“Kont bil-ġuħ u tmajtuni, kont bil-għatx u sqejtuni, kont barrani u lqajtuni, kont għeri u libbistuni, kont marid u ġejtu tarawni, kont fil-ħabs u ġejtu żżuruni”

Mattew 25:35-36

Id-Diskors tal-Muntanja.

Il-laqgħa bdiet b’talba u mbagħad inqara l-Vanġelu minn San Mattew, kapitlu 5, versi 1 – 12 – il-Beatitudnijiet.  Wara, kulħadd ġie mistieden biex isemmi kelma jew frażi li tkun laqtitu mis-silta.

Dan il-Vanġelu, imsejjaħ tal-Beatitudnijiet, jagħmel parti mid-Diskors tal-Muntanja (Mattew kap 5 – 7).  Dan huwa l-magna karta ta’ Ġesu’, speċi ta’ mission statement tiegħu – x’kien jaħseb, x’kellu f’qalbu, x’kienu l-prinċipji tiegħu.    Prattikament huma l-linji gwida ta’ dak kollu li jagħmel bniedem nisrani.

Ġesu huwa Mose’ il-ġdid.  Mose’ tela’ fuq il-muntanja u ġab il-twavel tal-Liġi, li l-Lhud kienu jsegwu b’reqqa kbira.  Ġesu’, fid-diskors tal-muntanja, jipperfezzjona u jġedded il-Liġi.  Flok sensiela ta’ liġijiet, dan id-diskors jiġbor it-tagħlim kollu ta’ Ġesu’.  Huwa attitudni ġdida tan-nisrani.  Ġesu’ qed jgħidilna biex inkunu ferħanin.  Kull sentenza tibda bil-kelma “henjin”.

Imbagħad ġiet irrakkuntata l-ġrajja ta’ missjunarju li mar il-missjoni biex jiftaħ sptar.  Meta bdew ġejjin il-pazjenti, kien hemm tlieta li, meta ġew f’kuntatt mal-missjunarju, iddeċidew li jitgħammdu.  Xi ġimgħat wara, l-missjunarju mar fil-villaġġ ta’ wieħed minnhom u sab li dan kien għadu jipprattika r-reliġjon pagana.  Meta staqsieh għaliex kien qed jagħmel hekk, dan qallu li hu nisrani meta jkun l-isptar, imma fil-villaġġ jieħu kontroll alla tagħhom.  Forsi aħna ħafna drabi mhux hekk nagħmlu?  Qalbna marbuta wisq mal-postijiet.  Aħna nsara meta mmorru l-quddies, meta nattendu għal-laqgħat, imma mbagħad meta nkunu fuq ix-xogħol, fil-hajja miżżewwġa?  Donnu l-ħajja tagħna nisranija maqsuma f’dawn il-ħafna kompartimenti.  Dawn il-beatutnijiet jgħinuna biex ħajjitna ma tkunx hekk, imma jgħaqqdu flimkien il-ħajja tagħna ta’ kuljum mal-ħajja spiritwali.  Juruna kif ngħixu ħajjitna, x’inhi l-kuntentizza vera.

Wara din l-introduzzjoni, reġa’ nqara il-Vanġelu u bdiet id-diskussjoni fuqu.

“Ġesu’ tala’ fuq il-muntanja, qagħad bilqiegħda, u resqu lejh id-dixxipli tiegħu”.  Ġesu’ mar fil-beraħ, f’post pubbliku, biex juri li kulħadd kien mistieden.  Wieħed kitteb Franċiż, Gilbert Cesbron, qal hekk dwar dan it-tagħlim ta’ Ġesu’:  “Għalija dan huwa l-iktar kitba mportanti fl-istorja tal-umanita’.  Huwa ndirizzat għall-bnedmin kollha, dawk li jemmnu u dawk li le, u wara għoxrin seklu huwa l-uniku dawl li jiddi f’tant dlamijiet ta’ vjolenza, biża’ u solitudni li fih tinsab id-dinja minħabba s-suppervja u l-egoiżmu.”

Għal min irid jibda jaqra l-Bibbja, id-Diskors tal-Muntanja hu l-post idejali minn fejn jibda, għax jitkellem dwar dak kollu li jagħmilna bnedmin.  Dan id-diskors jgħodd għal kulħadd.  Kieku kulħadd iħenn, iġib il-paċi, kieku d-dinja tkun ferm aħjar milli hi.

Wara bdiet diskussjoni fuq il-frażi “Ħenjin il-foqra fl-ispirtu”.  Aħna mdorrijin li d-dar hija tiegħi, dik il-biċċa art hija tiegħi, imma dawn il-foqra x’saltna għandhom?  Għandhom is-saltna t’Alla, li tiġi meta aħna ma nkunux marbutin ma’ dak li għandna, mal-prinċipji tagħna, mas-suppervja u l-kburija.  Ma rridux insiru allat tagħna nfusna.  Irridu nintelqu f’idejn Alla u s-Saltna tingħatalna minn issa.

“Ħenjin dawk li jġibu l-paċi”  Xi tfisser il-paċi nisranija?  Hi dik li tibda minn dawk ta’ madwarek.  Id-differenza bejn paċi ta’ żewġ pajjiżi li kienu fi gwerra u l-paċi nisranija hi li l-ewwel waħda hi paċi ta’ konvenjenza, filwaqt li l-paċi nisranija hi dik tal-qalb.

Imbagħad saret riflessjoni fuq post fejn hemm il-paċi – iċ-ċimiterju.  Il-mejtin ma jiġġieldux.  Ma rridx inkun mejjet ħaj.  Għandna ħafna mudelli: Gandhi, il-papiet, il-martri.  Dawn ġabu l-paċi għax kienu ħajjin.  Jekk ma nifhmux xi tfisser il-paċi ta’ Kristu ma nistgħux niżirgħuha f’dawk ta’ madwarna u f’kull mument ta’ ħajjitna – fid-divertiment, fil-familja, fuq ix-xogħol.  Jekk moħħni biss biex intaqqtaq, nipponta sebgħi, nikkritika, inkun mejjet ħaj.  Il-paċi ma tfissirx li għalik xejn mhu xejn, li ma tiftaħx ħalqek, imma li titkellem permezz tal-għajnuna tal-Ispirtu s-Santu li twettaq ir-rieda t’Alla f’kull minuta.  Din hi l-veru paċi tal-qalb, minkejja d-diffikultajiet li jista’ jkollok.

“Ħenjin intom li jippersegwitawkom”  F’dawn il-mumenti, minħabba l-idejat tiegħek, ħaddieħor jista’ jwaqqek għaċ-ċajt, għax ma tużax ċertu kliem, għax tpoġġi l-familja qabel il-flus, għax għandek prinċijpji nsara, għax tieħu x-xogħol bis-serjeta’ u ma tiskartax, għax tattendi laqgħat, għax toqgħod attent x’tara fuq l-internet, għax taħfer.  F’dawn il-mumenti tkun ippersegwitat minħabba l-prinċijpji nsara.

Għal min irid imaqdar, dawn il-Beatutnijiet jidher li fihom ħafna kontradizzjonijiet – kif tkun fqir u jkollok saltna, kif tkun bil-ġuħ u mxabba’?  Jaqrahom min jaqrahom, jekk dak li jkun jipprova jagħmilhom tiegħu, xorta se jħossu kuntent, għax jitkellmu fuq dak li jagħmel persuna bniedem.  Kieku d-dinja tkun perfetta!  Jekk trid tgħix tajjeb u timxi fuqhom, ikollok il-kuntentizza vera.

Aħna nitkellmu dwar min jippersegwitana, imma rridu noqogħdu attenti li ma nkunux aħna li nippersegwitaw li ħaddieħor – meta niġġudikaw, inqassqsu, nisirqu minn fuq ix-xogħol, nagħtu eżempju ħażin lit-tfal, innikktu bil-kliem vojt, inħarrxu lil ħaddieħor b’għemilna, intellfu l-paċi, indafflu fellus f’ras dak li jkun.  Aħna bħala nsara għandna responsabbilta’ kbira.

Imbagħad issemma’ il-Ġublew tal-Ħniena.  L-enfasi hi fuq il-ħniena li ġġib il-maħfra.  Fil-parabbola tal-Iben il-Ħali, il-missier ħafer lill-ibnu li għamillu nsult pubbliku.  Li titlob għal min għamillek id-deni mhix faċli.  Imma hemm issib il-vera paċi tal-qalb.

X’inhu dak li jagħmel persuna ħienja?  Issemma’ l-papa Ġwanni Pawlu 1 – il-papa tat-tbissima.  Dan qal “It-tama t’Alla tagħti s-serenita’ tal-qalb għaliex il-pjan ikun dak ta’ Alla għalina u mhux bil-kontra.”  Irridu nagħmlu tagħna dak li hu ta’ Ġesu’.  Jekk nimxu fuq dan id-diskors tal-muntanja jkollna aktar ħeġġa biex nagħmlu affarijiet li forsi waħedna ma nagħmluhomx.

Fl-aħħar saret riferenza għall-festa tal-qaddisin kollha u tal-erwieħ li mxew fuq dawn il-linji gwida tal-beatutnijiet.  Filwaqt li l-kmandamenti jgħidulna x’mgħandniex nagħmlu, il-beatutdinijet jiggwidawna dwar x’għandna nagħmlu.

Il-laqgħa ntemmet bil-kwotazzjoni ta’ C.S. Lewis: “The stamp of the saint is that he can waive his own rights and obey the Lord Jesus.”

Prayer Café 15 ta’ Mejju 2015: Lapsi

Il-laqgħa bdiet bħas-soltu bit-talba tal-Moviment.  Wara inqrat is-silta meħuda mill-għeluq tal-Evanġelju ta’ San Mark li tirrakkonta fid-dettal kif Ġesù tal-missjoni lill-Appostli qabel ittella’ fis-sema.  Il-festa magħrufa bħala Lapsi.

Inqrat is-silta ukoll mill-għeluq tal-Evanġelju ta’ San Luqa li tirrakkonta l-istess ġrajja għalkemm iktar fil-qosor u bla dettalji żejda.  Dawn huma l-uniċi żewġ evanġelisti li jirrakontawlna din il-ġrajja.  Dan ifisser li l-Mulej tela’ s-sema u ġie kollox fi tmiemu?

Iżda filwaqt li ż-żewġt Evanġelji jagħlqu b’din il-ġrajja, fl-Atti tal-Appostli insibu l-istess ġrajja – x’aktarx miktub ukoll mill-istess id tal-evanġelisti – propju fil-bidu u b’aktar dettall.  Ġesù qalilhom ukoll “meta jiġi fuqkom l-Ispirtu s-Santu, intom tirċievu l-qawwa u tkunu xhieda tiegħi f’Ġerusalem, fil-Lhudija kollha u s-Samrija u sa truf l-art”. Tissemma ukoll kif “żewġt irġiel lebsin l-abjad jgħidu lill-Appostli “Irġiel tal-Galilija, x’intom tħarsu lejn is-sema?  Dan Ġesù, li kien meħud minn magħkom lejn is-sema, għad jerġa’ jiġi kif rajtuh sejjer”.  Ġesù jwiegħed li ħa jibgħat Spirtu difensur u b’hekk turi li hemm kontinwazzjoni tal-preżenza ta’ Ġesù fostna u mhux spiċċa kollox mat-tlugħ fis-sema.

 Tana missjoni biex inxandru l-Kelma t’Alla.  Fil-fatt dan hu l-għan tal-Movement Kerŷgma!  Illum naraw l-bżonn tal-impenn anke tal-lajċi fi ħdan il-Knisja fin-nuqqas ta’ vokazzjonijiet.  Ma jiswa xejn li jkollok eluf kbar ta’ saċerdoti u ma jkollokx lajċi jew viċi versa li jkollok ħafna lajċi u ma jkollokx min jamministra s-Sagramenti.  Mhux il-kwantità imma l-kwalità tgħodd.  Kull wieħed u waħda minna għandu l-missjoni biex iwassal l-Bxara it-tajba sat-tarf tad-dinja.  Ma jfissirx li rridu nitilqu fl-artijiet imbegħda għax din il-missjoni tista’ tagħmilha fl-ambjent ta’ madwarna: fid-dar, fil-familja, fl-uffiċju, fil-fabbrika, mal-ħbieb: inkunu fejn inkunu.  Illum aktar minn qatt qabel għandna bżonn tal-evanġeliżżazzjoni.

Illum il-Knisja għandha influwenza anke fuq il-kultura. F’sempliċi reklam tal-kafè naraw rappreżentazzjoni tal-Ġenna b’San Pietru mal-Anġli mixjin fuq is-sħab!  Ma nistgħux naqbdu u nwarrbu r-reliġjon minn fostna.  Żball li forsi d-dinja ta’ llum qed tipprova tagħmel: twarrab elfejn sena ta’ storja, tagħlim u kultura!

Aħna lkoll nagħmlu parti mill-knisja u l-knisja ikollha xi ħaġa nieqsa mingħajrna.  Aħna għandna missjoni x’nagħmlu f’din id-dinja. Issa jew nagħmluha sew jew ħa naħarbu minn dan ix-xogħol li ħallielna Ġesù.

Hawn infetħet id-diskussjoni.  Ġew diskussi diversi temi rrelatati ma’ dan il-Vanġelu: l-Ġenna u l-Ġenna tal-Art. Fil-verità il-Ġenna mhux post fiżiku imma fejn titgawda l-glorja ta’ dejjem.

Meta qamet il-mistoqsija jekk min mhux mgħammed u ma jemminx hux diġa’ kkundannat skont m’hemm fl-istess Evanġelju, intqal li aħna liberi. Alla jagħtina ċans li nidinbu imma  jagħtina ċans ukoll li nirrikonċiljaw bis-Sagrament tal-qrar. Hu jaf li aħna dgħajfin u naqgħu. Anke l-Papa jqerr darba kull ħmistax! Tana l-għodda biex insalvaw!

Anke nies ta’ reliġjonijiet oħra: jekk dawn jimxu sewwa fir-reliġjon tagħħom, jistgħu jsalvaw ukoll!  Kristu stess qal li ‘għandi nagħaġ oħra li mhumiex minn dan il-maqjel’  Alla sal-aħħar sekonda jibqa’ jagħtina ċ-ċans li nsalvaw! Ma ninsewx li l-ħalliel t-tajjeb li ġie mwiegħed l-Ġenna fl-aħħar mumenti ta’ ħajtu.

Il-laqgħa ntemmet billi nqrat storja u bit-talba tal-Missierna.

Il-laqgħa tal-Prayer Café bdiet bit-talba tal-Moviment.  Ġie mbagħad spjegat kif din il-parabbola (storja mhux veru, imma b’tagħlima warajha li Ġesù jinqeda biha biex iwassal il-messaġġ tiegħu) hija faċli biex tiftiehem, imma fiha ħafna ħsieb meta wieħed jsaqsi lilu nnifsu: ‘x’nagħmlu aħna bit-talenti tagħna?’

Wara li nqara l-Vanġelu, wieħed seta’ jaqra dik il-biċċa li l-aktar laqtitu biex b’hekk għaddejna għall-ewwel ħsieb u komplejna nitgħallmu minn xulxin.

Il-kelma Talent, fil-kuntest tal-vanġelu tfisser somma ta’ flus.  Jingħad li din setgħat kienet ammont sostanzjali ta’ deheb jew il-paga li r-Rumani kienu jagħtu f’sena u talent wieħed kien jfisser paga ta’ għoxrin sena.  Maż-żmien din il-kelma inbiddlet f’talent li tfisser li kapaċita’ tal-bniedem kif nagħfuha llum.

Waqt il-laqgħa kienu ħafna li ddiskutew diversi mistoqsijiet relatati mal-Vanġelu bħal:

• Konxju li Alla qasam il-ġid tiegħu magħna? X’jista’ jkun dan il-ġid li Alla tana?
  • Il-fidi hija dik ir-rigal li Alla tagħna flimkien mad-doni.
  • Don li tagħraf tħobb… tħobb lill dawk tal-familja, kollegi… Imħabba li tagħraf tagħti ftit ħin biex tisma’ lil ħaddieħor li jkun jixtieq jiftah qalbu miegħek.. Alla tana ġid li nħobbu lil ħaddiehor u dan kif rajna nistgħu nuzawh tajjeb.

• Iżda kif nisgħu nuzaw dawn it-talenti ma’ nies li m’għandniex grazzja magħhom?
  • Issemmiet il-paċenzja; li tkun kapaċi jżomm lura milli tgħid kelma li tista’ tweġġa’. Dan huwa talent kbir li huwa skars.
  • Li ma tpattix lura. Wieħed jagħmel il-parti tiegħu li jagħmel dak il-pass biex jersaq hu/hi lejn il-persuna.  Minkejja li dik il-persuna ma tagħmilx l-istess.

Riflessjonijiet:

• Inti kapaċi tkabbar it-talent tal-imħabba tiegħek lejn il-proxxmu?
• Id-doni/rigali li Alla tana huma t-talenti li wieħed irid iħaddem? X’jiġri jekk inti ma tħaddimx dawn it-talenti? Min ibati: aħna jew dawk ta’ madwarna?
• Dawn it-talenti/doni Alla tahomna b’xejn, imħabba… smigħ… tpinġi… tkanta eċċ. Iżda taħsbu li Alla jagħtina skont kemm nifilħu?

Nitolbu lil Alla biex il-missjoni – il-vokazzjoni – it-talenti – id-doni li Alla tana nwettquhom kif Alla jrid.  M’għandix naqtgħu qalbna.  M’għandix inħallu f’idejn ħaddieħor.  Kulħadd għandu l-kapaċitajiet tiegħu.  Ħadd m’għandu jgħid li ma hu kapaċi għal xejn għax inkunu qed inħallu l-biża t’Alla taħkimna u faċilment mbagħad jiġrilna bħal dak li ħeba l-talenti tiegħu għax beża’ minn sidu.  Imma għandna nibnu l-kuraġġ u l-fidi bit-talb biex it-talenti li Alla għażel għalina u tahomna b’xejn, nużawhom.  Aktar ma nużawhom aktar inkabbruhom.  Mhux kulħadd ikollu l-istess talenti u mhux kulħadd ikollu l-istess ammont ta’ talenti.  Min tah ħamsa, min tah tnejn u min tah wieħed.  Aħna llkoll għandna missjoni li nimxu skont it-talenti tagħna biex meta niġu quddiem Alla, nuru li aħna kbirna fit-talenti tagħna.

Fl-aħħar intwera vidjow qasir iżda b’messaġġ kbir fuq it-tema tal-Vanġelu:

Talents from Munn Brothers on Vimeo.

Il-laqgħa Prayer Cafè tal-lum, il-Ġimgħa, 7 ta’ Novembru 2014 bdiet b’talba. Imbagħad saru xi ħsibijiet:

Il-Konsagrazzjoni tal-Bażilika tal-Lateran:

• Illum il-Qari jieħu post il-Qari tat-32 Ħadd matul is-Sena u huwa ddedikat għat-tifkira tal-Konsagrazzjoni tal-Bażilika tal-Lateran li tinsab Ruma. F’din il-knisja il-Papa għandu l-katedra tiegħu bħala Isqof ta’ Ruma u ragħaj tal-Knisja kollha.

Id-Dmir u l-attitudni tagħna lejn il-Papa u l-awtoritá tal-Knisja:

• Bħala membri tal-Knisja, id-dmir tagħna huwa li nuru fedeltá sħiħa għat-tagħlim li l-Papa jxandrilna biex iwettaqna fil-fidi ta’ Kristu. Mhux il-mument biss li nħarsu lejh bħala mexxej iżda wkolla bħala gwida spiritwali.

• Kemm-il darba nisimgħu min jikkritika u juri ċertu dissens fil-Knisja. Dan ħafna drabi ma jkunx ġej minn diskussjoni għaqlija (bħal filkaż ta’ kummissjonijiet pastorali, sinodi, laqgħat ta’ evalwazzjoni eċċ.) imma jkun ġej minn sens ta’ suppervja għaliex l-iskop huwa ta’ ħsara.

• Illum għalhekk huwa l-mument fejn aħna niddikjaraw l-għaqda tagħna mal-Papa u nkunu qalb waħda miegħu u Ġebel Ħaj tal-Knisja fis-soċjetá tagħna.

 

Hawnekk nqara l-Evanġelju tal-Ħadd li ġej id-9 ta’ Novembru: San Ġwann Kapitlu 2, Versi 13-23.

Wara l-qari tal-Evanġelju saru xi ħsibijiet dwar din is-silta:

X’risposta jkollu kieku wieħed jistaqsi għaliex inbniet xi knisja partikulari?

• Ċertament li r-risposta trid tkun li din ġiet mibnija biex tkun id-Dar ta’ Alla. Mhix sempliċiment post ta’ laqgħat jew auditorium jew xi post fejn isiru l-kunċerti u d-drama.

• Din id-Dar għandha skop wieħed: Biex issaħħaħ ir-relazzjoni TAGĦNA ma’ Alla. Il-knisja hija post tal-komunitá ta’ Alla. Hemm niltaqgħu bħala grupp f’post qaddis li fih inkunu fil-preżenza speċjali ta’ Alla.

• Dik il-fjamma żgħira tixgħel quddiem it-tabernaklu hija sinjal li Alla qiegħed jgħix verament hemmhekk. Dan mhux sinjal imma preżenza reali ta’ Ġesú fostna. Per Eżempju: F’ċertu knejjes ortodossi, bħala sinjal ta’ rispett joħorġu mil-knisja mexjin b’lura biex ma jagħtux darhom lejn dak li hu mportanti għalihom. Aħna kultant ma nurux dan it-tip ta’ rispett lejn id-dar ta’ Alla u Alla nnifsu li sippost nemmnu li jinsab fiha.

• F’dan l-Evanġelju li smajna, Ġesú jimtela’ b’rabja qaddisa meta daħal fit-Tempju ta’ Ġerusalemm u sab li aktar kien jixraq li dan il-lok ikun imsejjaħ suq milli tempju ta’ Alla.

• X’jistgħu ikunu dawn l-affarijiet li kieku Ġesú jiġi f’xi knisja illum ma jkunx jixtieq li jara?

 

Papa Franġisku fit-22 ta’ Novembru 2013 fil-kappella ta’ Santa Marta qal li: “It-tempju jeżisti biex tadura lil Alla. U proprju għalhekk huwa punt ta’ riferiment tal-komunitá, magħmula minn persuni li huma huma stess tempju spiritwali fejn jgħammar l-Ispirtu s-Santu.”

Il-Papa spjega kif skont l-istorja tat-Tempju t’Alla:

1. Tibda bl-Arka tal-Patt li l-poplu Lhudi kien iġorr miegħu. Din tissemma’ fil-Ktieb tal-Eżodu u kien fiha t-twavel tal-liġi, il-bastun ta’ Aron, kontenitur bil-manna kif ukoll it-Torah, il-liġi ta’ Alla. (Ara Eżodu 37) Din kienet il-preżenza ta’ Alla fost il-poplu magħżul tiegħu.
2. Salamun iddeċieda li jibni Tempju, bini ddedikat lil Alla li ridt tmur hemmhekk biex inti tqim lil Alla.
3. Dan sar tempju ħaj: Ġesú Kristu; li permezz tiegħu aħna ningħaqdu kompletament ma’ Alla bħala ġebel ħaj ta’ dan it-tempju li huwa l-Knisja.
4. Kollox ikompli anke wara l-mewt f’Ġerusalemm tas-sema fil-glorja ta’ Alla.

F’dan id-diskors il-Papa qal ukoll li fit-tempju ta’ Alla tmur biex:

1. Titlob 
2. Tfaħħar lil Alla
3. Tiżżi ħajr
4. Tadura (fuq kollox biex tadura: il-Papa jinsisti li l-adorazzjoni hija mportanti aktar minn kull innu liturġiku) It-tempju jżid il-Papa għandu jkun post ta’ talb, u mhux ta’ xi ħaġa oħra.

 

It-Tieni Qari: Aħna wkoll it-Tempju ta’ Alla – fina jgħammar l-Ispirtu s-Santu

Wara din id-diskussjoni dwar l-evanġelju nqara it-tieni qari ta’ nhar il-Ħadd li ġej (1Kor 3, 9-11.16-17) u tkellimna dwaru.

• Kull wieħed/waħda minna huwa t-tempju ta’ l-Ispirtu Qaddis t’Alla. Fina tgħammar it-Trinitá bil-grazzja tagħha. Kull wieħed/waħda minna huwa tempju ħaj fejn jgħix Alla. Fil-fatt jekk jinqered il-bini tat-tempju (il-knisja tal-ġebel) l-iktar ħaġa mportanti tibqa ħajja; Aħna: il-Knisja t’Alla tibqa soda.

• Kemm dawk li jħarsu lejna, jew jisimgħuna jitkellmu huma konxji li għandhom quddiemhom tempju ħaj fejn jgħammar Alla ġewwa fih? Kemm qegħdin jaraw ħwejjeġ qaddisa mwettqa minna jew kemm qegħdin jisimgħu ħwejjeġ qaddisa mingħandna?

• Ta’ min jara x’inhu jseħħ fit-tempju tagħna; jekk dak li nagħmlu jaqbilx ma’ dak li nemmnu u nistqarru. Għandna nieqfu u neżaminaw lilna nfusna biex naraw jekk aħniex verament it-Tempju ta’ Alla.

• “Jekk xi ħadd iħobbni jżomm kelmti, u Missieri u jiena niġu ngħammru għandu.”(Ġw 14,23)

• Il-Papa Franġisku saħaq li għandna nippurifikaw ruħna permezz:
  1. Tat-talb
  2. Tas-sagrament tar-Rikonċiljazzjoni
  3. Bl-Ewkaristija

• Wieħed mill-modi ta’ kif nistgħu nagħmlu eżami tal-kuxjenza huwa billi naraw kemm qegħdin nimxu mal-Beatitudnijiet. (Lq 6, 20-26)

 

Il-laqgħa spiċċat bit-talb fejn nqara is-Salm responsorjali ta’ nhar il-Ħadd li ġej:

Salm 45

Rit: Tifraħ il-belt ta’ Alla!

Kenn u qawwa hu Alla għalina;

għajnuna kbira sibnieh fid-dwejjaq.

Għalhekk ma nibżgħux jekk l-art titriegħed,

jew jiġġarrfu l-muntanji f ’nofs il-baħar.

Hemm xmara li s-swieqi tagħha

jferrħu l-belt ta’ Alla,

il-għamara qaddisa tal-Għoli.

F’nofsha hemm Alla, ma titħarrikx,

jgħinha Alla mat-tbexbix tal-għodwa.

Il-Mulej tal-eżerċti magħna

fortizza għalina Alla ta’ Ġakobb.

Ejjew, araw x’għamel Alla,

il-għaġeb li għamel fuq l-art.

 

Talba ta’ l-Għeluq: 

O Missier, inti tajtna lil Ibnek Ġesú bhala t-tempju l-ġdid ta’ dan il-patt il-ġdid bejnietna. Dan it-tempju mhux mibni b’idejn umani imma mill-Ispirtu s-Santu. Filwaqt li nilqgħu bil-fidi l-Kelma tiegħu, agħmel li aħna nistgħu ngħixu f’dan it-tempju permezz ta’ Ġesú Kristu u b’hekk inkunu nistgħu nagħtuk qima fl-Ispirtu u l-veritá. Iftaħ għajnejna ghall-bżonnijiet ta’ ħutna li huma wkoll membri ta’ dan il-Ġisem ta’ Kristu sabiex filwaqt li nservuhom inkunu qegħdin nagħtu qima lilek. Nitolbuk dan permezz ta’ Kristu Ġesú sidna. Ammen.

“Din hi tabilħaqq ir-rieda ta’ Missieri: li kull min jara lill-Iben u jemmen fih, ikollu l-ħajja ta’ dejjem.”(Ġw 6, 40)

 

L-evanġelju li tlabna permezz tiegħu waqt il-laqgħa bi preparazzjoni għall-Jum tal-Għid tal-Imwiet kien meħud mill-Evanġelju ta’ San Ġwann Kapitlu 6, Vrus minn 37 sa 40.

Li nara lill-Iben ifisser li nkun iltqajt mal-persuna ta’ Ġesú, tgħallimt fuqu, min kien, x’kien jagħmel u x’kien it-tagħlim tiegħu. Peró dan mhux biżżejjed għaliex hemm bżonn il-fidi.

Li nemmen ifisser li jkolli fiduċja f’dan Ġesú li miegħu inkun iltqajt. Fiduċja tfisser li temmen, tagħmel u tħossok parti minn dak kollu li l-Mulej Ġesú jgħallimna jew jitlob minna. Meta inti temmen tkun għalhekk qiegħed tirċievi mingħand Ġesú il-ħajja ta’ dejjem. Il-Ħajja ta’ dejjem diġá bdiet minn din id-dinja.

 

X’inhi l-mewt?

Nafu li l-mewt iġġiegħel lin-nies isofru, jibku u jaqtgħu qalbhom fost diversi emozzjonijiet oħra. Imma hija hekk biss?

Il-mewt hija passaġġ mill-ħajja eterna li diġá bdiet; għall-kumplament tal-ħajja tagħna magħqudin ma’ Alla. L-ewwel pellegrinaġġ ta’ ħajjitna aħna nagħmluh hawnhekk fuq din l-art. Il-mewt hija għalhekk il-kontinwazzjoni ta’ dan il-pellegrinaġġ li jwassalna biex ningħaqdu mal-Mulej Ġesú fil-ġenna fejn kif qalilna San Pawl hemm jistenniena: “dak li għajn qatt ma rat u widna qatt ma semgħet, u dak li qatt ma tnissel f’qalb il-bniedem, dak li Alla lesta għal dawk li jħobbuh.”(1Kor 2, 9)

Il-Knisja tistedinna biex darba f’sena niftakru f’dawk li diġá għaddej minn dan il-passaġġ. Hemm rabta Spiritwali kbira bejn il-membri tal-Knisja fuq din l-art u dawk fis-sema. Aħna lkoll obbligati li bħalma ngħinu lill-proxxmu tagħna li jinsab madwarna fiżikament, hekk ukoll ngħinu bit-talb lil dawk li qegħdin diġá fil-ħajja l-oħra. B’hekk il-mewt issir rebħa u bidla  li rebaħ Kristu permezz tal-mewt u l-qawmien tiegħu.

Fil-mewt aħna l-bnedmin insibu s-sliem etern għaliex ningħaqdu għal dejjem ma’ dan Alla li ħalaqna. Il-Mulej mhux ser jitlaq lil dawk li fil-ħajja tagħhom għamlu l-għażla tiegħu.

“Mhux biex nagħmel ir-rieda tiegħi imma r-rieda ta’ min bagħatni.”(Ġw 6, 38)

Aħna r-rieda ta’ min qegħdin nagħmlu? Tagħna, ta’ min jinfluwenzana, tas-suq kummerċjali/reklami, xi grupp li nappartjeni għalih jew forsi ta’ min għandu prinċipji u valuri differenti minn dawk Kattoliċi? Tajjeb li nirriflettu għaliex ngħidu ċertu affarijiet jew kif inġibu ruħna quddiem ċerti valuri jew sitwazzjonijiet.

“Ir-rieda ta’ min bagħatni hija din: li jiena ma nitlef xejn minn dak kollu li tani.” (Ġw 6, 39)

Hawnhekk Ġesú qed jurina kemm aħna mportanti għalih bħala bnedmin li aħna xbiha ta’ Alla. Issemmew waqt il-laqgħa parabboli bħal tan-nagħga l-mitlufa u tal-Iben il-Ħali fejn naraw kemm huma mportanti l-persuni għal Ġesú. Il-persuni li għal Ġesú huma mportanti mhumiex biss il-ġusti u dawk ta’ subgħajhom dritt imma wkoll il-midimba.

Ġie moqri wkoll l-ewwel Qari fejn insibu l-faraġ fil-Mulej li huwa d-Difensur tagħna: “Jien naf li d-difensur tiegħi ħaj, u fl-aħħar fuq it-trab iqum. U wara li jintemm ġildi, mingħajr laħmi nara ‘l Alla. Lilu narah b’ħabib tiegħi.”(Ġob 19, 25-26)

Il-laqgħa intemmet bil-Qari ta’ Salm 22 fejn insibu l-istqarrija li “l-Mulej huwa r-Ragħaj u s-Salvazzjoni tiegħi; minn min għandi nibża’? Il-Mulej hu l-kenn tiegħi, quddiem min għandi nitwerwer?”(Salm 26, 1)

 

 

 

 

 

 

 

 

 

Fil-vanġelu ta’ nhar il-Ħadd li ġej nsibu mistoqsija: “Mgħallem liema huwa l-kmandament il-kbir fil-Liġi?” Aħna forsi nistaqsu, għaliex saret lil Ġesu? Hekk beda Fr Charles il-laqgħa ta’ Prayer Cafe fl-24 t’Ottubru. Huwa kompla billi qal li din il-mistoqsija mill-ewwel iġibilna f’moħħna l-għaxar kmandamenti. Hawn stedinna biex nirriflettu naħsbux li hemm xi kmandament li  hu aktar importanti mill-oħrajn? Ħafna drabi, tenna Fr Charles Fenech, fil-mentalita tagħna nħossu li l-aktar wieħed importanti hu dak fuq is-sesswalità. Dan huwa żbaljat . Huma kollha mportanti ndaqs.

Filwaqt li fil-ġurnata tal-llum qegħdin nitkellmu dwar għaxar kmandamenti; fi żmien Ġesu kien hemm 613-il wieħed xi jħarsu. Ħafna minnhom kienu rqaqat tal-liġi li ridt tkun taf fid-dettal. Ġesu u d-dixxipli tiegħu kienu jiġu kritikati ħafna drabi għaliex ma kienux josservaw l-irqaqat kollha tal-liġi; bħal per eżempju ma kienux iħallsu t-taxxa tan-naniegħ jew għaliex ma kienux jaħslu jdejhom qabel l-ikel. U Ġesu kien jeħodha kontra l-ipokrezija tal-kittieba u tal-Fariżej li għalkemm kienu jsegwu l-liġijiet sa l-iċken dettal, ma kienux isegwu l-akbar liġi dik li trid “Tħobb lil Alla tiegħek b’qalbek kollha, b’ruħek kollha u b’moħħok kollu”. Dawn is-613 il-kmandament kollha Ġesu ġabarhom fi tnejn.

B’dawn iż-żewġ sisien irridu niffurmaw il-mixja ta’ ħajjitna. Irridu noqogħdu attenti li l-ħajja tagħna ma tkunx ħajja ta’ devozzjonijiet biss imma trid tkun ħajja ta’ għixien tal-fidi. Din hi waħda mill-akbar kritika li rridu nagħmlu fuqna nfusna bħala Maltin. Aħna poplu li fil-fond ta’ qalbna kulħadd iħobb il-knisja. Pero aħna nies ta’ devożżjonaliżmu kbir JEW nies ta’ fidi kbira? Eżempju ta’ dan huwa li għalkemm l-attendenza tal-quddies niżlet, xorta fil-jum tad-Duluri madwar 80 fil-mija tal-Maltin għadhom jieħdu sehem; kemm fil-quddies ta’ dak inhar u kif ukoll fil-purċissjoni li ssir filgħaxija f’ħafna postijiet. DIN hi devozzjoni, spjega Fr Charles, ħaġa tajba minnha fiha pero importanti ħafna li nagħmlu distinzjoni bejn devozzjoni u fidi. Ilkoll kemm aħna rridu nagħtu kas tal-fidi tagħna u mhux għal irqaqat tad-devozzjonijiet. Aħna fuq il-post tax-xogħol, id-dar, fit-triq, fis-soċjetὰ kemm tassew qegħdin nagħtu xhieda tal-fidi tagħna?

Il-Fidi tinqasam f’żewġ partijiet – Ħobb lil Alla u ħobb lil għajrek bħalek nnifsek. Hawnhekk għandna oċejan kbir u importanti li lkoll ngħumu fih u mhux naħarbu minnu, kompla Fr Charles fl-ispjega tiegħu. Dan il-vanġelu jagħmlilna sfida – Alla min hu għalina? Bih u mingħajru ngħaddu xorta? Qegħdin ngħixu verament fuq il-valuri t’Alla jew qegħdin nqablu fejn jaqblilna? Jekk niltaqgħu ma problema d-dar jew  fuq ix-xogħol, kif se nsolvuha? Irridu ngħelbu l-egoiżmu tagħna biex nibdew naħsbuha bħal Alla. F’sitwazzjoni diffiċli li nsibu ruħna fiha nistaqsu “Kieku kien ALLA flokna x’kien jagħmel f’din is-sitwazzjoni?” Din l-attitudni ma tiġiex waħidha iżda tiġi bit-training – dawn il-laqgħat (Prayer Cafè) huma parti minn dan it-training. Mhix faċli li toħroġ mill-qoxra umana u tidħol fil-qoxra t’Alla. Irridu nitgħallmu naħsbu bil-loġika Divina u mhux bil-loġika umana.

San Girgor kien jgħid li aħna lanqas aħna kapaċi nikkonċentraw fuq it-talba tal-Missierna waqt quddiesa għax moħħna mxerred w iżjed w iżjed meta jkollna problema, moħħna aktar jkun mxerred għax ikun qiegħed fi stat ta’ paniku jew jibda jaħdem bl-egoiżmu tagħna li ma jħalliniex naraw. Bħal wieħed f’rabja ma jqisx dak li jgħid.

Hawn inqara l-vanġelu tat-30 Ħadd ta’ matul is-sena – mehud mill-Vanġelu ta’ San Mattew, Kapitlu 22, Versi 34 sa 40.

ĦOBB, ĦOBB, ĦOBB… jekk nagħmlu eżami tal-kuxjenza tagħna nfusna , stqarr Fr Charles, jkollna nammettu li diffiċli ngħaddu minn dan it-test. ĦOBB LIL ALLA TIEGĦEK B’QALBEK KOLLHA, B’MOĦĦOK KOLLU U B’RUĦEK KOLLHA…aħna kapaċi nqegħdu l Alla qabel uliedna?… qabel ir-raġel jew il-mara tagħna?… kemm qegħdin inħobbuH lil Alla? Kemm hu diffiċli li tħobb lil min m’aħniex naraw u lanqas immissu? Imbagħad nsibu ĦOBB LIL GĦAJREK BĦALEK NNIFSEK… Aħna lanqas lilna nfusna ma nħobbu xi kultant! Jekk inħarsu lejn il-ġenituri, bl-altruwiżmu tagħhom; dejjem ipoġġu lilhom nfushom wara  uliedhom, għalkemm hu sentiment li għandu valur, fl-istess ħin huwa dnub kbir jekk ma nagħtux kas tagħna nfusna… Minn naħa l-oħra nsibu wkoll xi uħud li mbagħad jagħtu kas iżżejjed tagħhom nfushom.

Fl-aħħar mill-aħħar dan hu vanġelu qasir li pero jurina kemm aħna falliment totali fejn tidħol l-imħabba.

Hawn infetħet id-diskussjoni:

• L-Imħabba sħiħa lejn Alla u lejn il-proxxmu! Imma il-proxxmu min hu?
• Nħobbu lil min nsibuh simpatiku biss? U lil min nsibuh antipatiku?? Lil ta l-aħħar kif se ssir nħobbuh?
• Lil min jiġġakbinak – tara lil Alla fih? Filwaqt li trid titlob għal min għamillek id-deni ma tridx tobgħod lil persuna pero tobgħod l-għaġir li wettaq kontrik. Mhix faċli li taħfer – hu proċess.
• Jekk xi ħadd jgħamillek l-ħsara u jitolbok pjaċir lest li tgħinu? Hawn kien hemm min qal li pjaċir jasal li jagħmlu, imma l-istess persuna stqarret li zgur li ssibha aktar diffiċli taħfer u tħobb lil xi ħadd li, per eżempju, joqtol lil xi ħadd li hu għaziz għalik. Kif tasal li taħfer dan l-att? Hawn Fr Charles semma fatt attwali – xi erba’ snin ilu fl-Italja tan-nord – tfajla ta’ tmintax-il-sena ġiet maqtula minn sħaba stess li kienu f’setta satanika. Wara 4 snin. il-missier tal-vittma, mar iżur lil dik li qatlitlu lil bintu, biex jgħinha ġġib scholarship, biex tkun tista tkompli l-istudji tagħha minn ġewwa l-ħabs. Dan il-missier qal li wara snin ta’ talb ħass lil Ġesu sagramentat jibgħatu jagħti dinjita lil min ċaħadha lil bintu stess u b’dan l-aġir ta’ maħfra tiegħu ħass mistrieh hu stess. Dan għaliex il-maħfra ġġib fejqan.

Hawn issemma wkoll San Papa Ġwanni Pawlu II li kien ħafer u żar fil-ħabs lil Mehmet Ali Ağca li kien sparalu. Għandna nafdaw l-weġgħat tagħna lil Ispirtu s-Santu biex bil-qawwa tiegħu noħorġu minnhom. Weħidna nafġuha.

Fr Charles għalaq il-laqgħa billi tenna kemm hu importanti li nużaw l-għodda li għandna – nipparteċipaw fil-quddies biex nitqawwew fil-fidi tagħna u nagħmlu ħin għal talb personali… għax hu t-talb li jgħinek tkun dixxiplu ffurmat tajjeb. Meta tħalli ħin li fih tagħti ċans lill-Mulej jidħol fik, tara l-affarijiet minn perspettiva differenti.

Wara d-diskussjoni ntwera video ċkejken bl isem LOVE GOD, LOVE NEIGHBOUR naħseb taqblu li veru jidħol mas-suġġett tal-llum.

 

Quote li ntużat waqt il-laqgħa kienet waħda ta’ Madre Tereza:

“Every time you smile at someone, it is an action of love, a gift to that person, a beautiful thing.”

“Kull darba li nitbissmu lil xi ħadd, nagħmlu azzjoni ta’ mħabba, nagħtu rigal, xi ħaġa mill-isbaħ”

.

L-laqgħa ngħalqet bit-talba tal-MISSIERNA u ingħatat l-barka minn Fr Charles.

Nfakkrukom li nerġgħu niltaqgħu nhar il-ġimgħa 31 t’Ottubru. Narawkom! 🙂