Grupp Kulturali Natività, which is part of the Kerŷgma Movement, is organising courses on how to build a Nativity crib. These will be held at the Dominican Priory, in Rabat. These course are open for adults as well as children and will commence in June with another set starting in August. The duration of the course is 8 sessions and a fee of €70 will be charged to every participant. This price will include the 8 sessions and all the material needed to build a crib. The cribs built during these courses will be exhibited in an exhibition which will be held in December.

For more information one can phone on  21453375 between 09:00 and 16:00. Alternatively one can send an email to info@kerygma.org.

Il-Ħadd li ġej se niċċelebraw il-festa tat-Tlugħ ta’ Ġesu fis-sema – Lapsi – qal Fr Charles fil-bidu tal-laqgħa PRAYER CAFE l-ġimgħa 30 ta’ Mejju, iżda kemm verament  tagħmlilna differenza din il-ġrajja? Kultant bl-attitudni tagħna  ma nagħtuhx l-importanza li jistħoqq lill-Mulej. Il-meravilja tal-vanġeli, tenna Fr Charles, hi li huma sensiela ta’ ritratti tas-sitwazzjonijiet ta’ ħajjitna.

Il-vanġelu ta’ nhar il-Ħadd mehud minn Mattew 28:16-20, għalkemm rakkont  qasir, huwa mimli b’ritratti tagħna. Min jaf kemm il-darba mmorru l-knisja, ninxteħtu għarkubtejna iżda xorta iddubitajna – l-ħsibijiet u l-problemi li ġarrejna magħna ma ħallewniex nisimgħu l-kelma t’Alla u ma jinbidel xejn! Bħal meta d-dixxipli wara tlett snin sħaħ jisimgħu lil Ġesu u jarawh iwettaq miraklu wara l-ieħor, rawh rxuxtat u xorta “uħud iddubitaw” . Min jaf kieku konna aħna f’din is-sitwazzjoni konniex nibagħtuhom isaqqu l-ħass tal-Marsa, qal Fr Charles,  Iżda Ġesu  xorta qalilhom:

 “MORRU , GĦALLMU L-ĠNUS KOLLHA U GĦAMMDUHOM FL-ISEM TAL-MISSIER U TA’ L-IBEN U TA’ L-ISPIRTU S-SANTU.” 

Ġesu għandu l-istess fiduċja fina, ejjew ma nħallux ix-xitan jkissirna bid-dnubiet jew bid-djugħfijiet tagħna. Hu wegħdna li se jkun magħna “sal-aħħar taż-żmien”. Nsibu personaġġi bħalna fil-Bibbja li ddubitaw fil-kapaċita tagħhom nfushom – bħal Mose, dan kif l-Mulej qallu biex joħroġ il-poplu t’Alla mill-Eġittu Mose qallu: ‘ Jien , raġel intemtem!  Jien se mmur quddiem il-Farajun?’ Iżda bil-qawwa tal-Mulej irnexxilu.  Ejjew nużaw l-qawwa li nnagħatat lilna fil-Magħmudija – ejjew nitħeġġu bit-talb. Ejjew naħsbu f’xulxin kif kienu jagħmlu l-ewwel insara – ejjew nitolbu għal xulxin.

Il-Mulej jagħżilna, kompla Fr Charles, biex naqduh u bħala gwida Hu jibgħat lil min imexxina bħalma bagħat lil Papa Franġisku – Papa li ħasad lid-dinja. Dan il-Papa bit-talb irnexxilu jwaqqaf gwerra kontra s-Syria mill-Amerika u r-Russja. U issa qiegħed jirsisti biex iġib il-paċi bejn il-Palestinjani u l-Lhud. Għal dan il-għan L-Qdusija Tiegħu stess waqt iż-żjara tiegħu fl-Art Imqaddsa ħareġ stedina unika lill-Presidenti ta’ Iżrael u tal-Palestina biex imorru l-Vatikan u jitolbu miegħu. Din l-istedina kienet aċċettata mit-tnejn li huma. Il-Kap tal-Knisja Kattolika ħeġġeġ lin-nies ta’ dawn it-tliet reliġjonijiet biex jaħdmu flimkien għall-paċi.

Fr Charles temm il-laqgħa billi ħeġġiġna biex mar-radd tas-Salib filgħodu nitolbu lill-Ispirtu s-Santu għal doża ta’ Enerġija. U wara nkunu nistgħu nwettqu dmirna. It-TALB huwa importanti pero li nwettqu dmirna mhu xejn inqas. Dak li nitolbu għalih fil-knisja jrid  jitkompla barra l-għatba taż-żuntier.

B’hekk temmejna l-laqgħat tal-ġimgħa ta’ Prayer Cafe għal din s-sena. Jerġgħu jitkomplew f’Ottubru.  Dan ma jfissirx li l- MOVIMENT KERYGMA se jorqod waqt ix-xhur tas-Sajf. ANZI hemm ħafna attivitajiet organizzati għal dan is-sajf, kemm għal adulti, adoloxxenti u t-tfal. Informazzjoni dwar dawn għandkom issibuhom fuq dan dan is-sit (attivitajiet)  jew fuq facebook, fil-paġna tal-Moviment Kerygma.

Fil-laqgħa Prayer Cafe il-ġimgħa 24 ta’ Mejju, Fr Charles Fenech enfasizza l-bżonn li aħna lkoll għandna nkunu mħeġġa biex nevanġelizzaw il-Kelma tal-Mulej. Fuq kull wieħed minna niżel l-Ispirtu s-Santu u kulħadd għandu l-istess doża, m’hemmx skużi .. min għax jgħid li mhux kapaċi.. min għax jistħi.. l-Ispirtu s-Santu jagħtina qawwa kbira ġo fina, kif se nużawha hija f’idejna. Hawn min jevanġelizza bl-eżempju, oħrajn billi jgħaddu kelma tajba…kulħadd bil-metodu tiegħu.

Hawn Fr Charles semma fatt t’ Omm. Din kienet se twelled għall- ewwel darba u t-tobba tawha parir biex tagħmel abbort u teħles mit-tarbija mistennija għax skond huma t-tarbija kienet se titwieled b’xi difett. Iżda din l-Omm żammet sod fil-fehma tagħha u wara li għadda ż-żmien meħtieġ weldet tarbija f’saħħitha. Dawn huma l-prietki ta’ llum. Bħala insara ma rridux nħallu l-ewwel baħar qawwi li niltaqgħu miegħu jaqtalna qalbna. Il-knisja tal-bidu qabel Pentekoste għaddiet minn żminijiet iebsa ta’ qtigħ il-qalb. Naraw l-ewwel insara miġburin flimkien ma Marija mwerwrin, maqfulin ġewwa. Iżda minn hawn inbniet il-Knisja nisranija, inbniet fuq krizijiet ta’ l-ewwel insara. Dan il-qtigħ ta’ qalb ngħaddu minnu aħna lkoll llum meta l-kurrent ikun kontra t-twemmin tagħna. Nibqgħu ħalqna magħluq u nibżgħu nuru x’aħna – ma nesprimux it-twemmin tagħna. Huwa f’dawn il-mumenti li rridu nħallu l-qawwa tal-Ispirtu s-Santu tidħol fina u tmexxina hi.

Importanti li f’mumenti li wieħed ikun għaddej minn problemi spiritwali  jistaqsi lil Ispirtu s-Santu jidħol fih. Santa Rita u Santa Monica huma eżempji ċari ta’ nsara li kombattew il-ħażen, l-qtigħ ta’ qalb u s-sofferenza bit-talb. It-tnejn talbu bis-sħiħ għal fidwa t’uliedhom mill-ħażen, Santa Rita talbet li uliedha ma jiċċapsux b’omiċidju filwaqt li Santa Monica talbet li binha jikkonverti minn ħajja mtajra. Bil-qawwa tat-talb it-tnejn raw il-fidwa t’uliedhom. Ħafna ommijiet llum jgħaddu minn mumenti ta’ qtigħ il-qalb, qal Fr Charles, meta jaraw li uliedhom li rabbew b’għozza fit-twemmin nisrani jaqbdu triqat ‘l bogħod minn Alla. It-talb u l-perseveranza huma l-unika soluzzjoni.

Fil-vanġelu nsibu ; “Jekk tħobbuni, tħarsu l-kmandamenti tiegħi.” Biex inwettqu dan il-Mulej bagħtilna l-Difensur li jiftħilna għajnejna għall-preżenza ta’ Alla.Aħna rridu nilqgħuh u nħalluh jgħammar fina. Fil-ħajja tagħna ta’ kuljum irridu nwasslu lil Ġesu lil dawk ta’ madwarna. Fil-familji importanti li kif qal Papa Franġisku ndaħħlu tlett kelmiet : grazzi, skuzani, u jekk jogħġbok  bihom nuru mħabba u apprezament ta’ xulxin. It-TALB hu essenzjali , familja li titlob hija familja magħquda. It-talb tagħna jrid ikun skond ir-rieda ta’ Alla. Rridu nħallu spazju għal Mulej u ngħarfu li ż-żmien ta’ Alla mhuwiex żminijitna. Iżda kompla Fr Charles, meta nkunu għaddejin minn żminijiet diffiċli, żminijiet ta’ tifrik, tajjeb li nitolbu sinjal mill-Mulej biex ngħarfu li Hu qiegħed hemm magħna, bħal dik il-qatra ilma wara mixja fis-sħana tas-sajf, jew bħal dik iż-żiffa ħelwa li insibu kemm il-darba msemmija fil-bibbja bħala prezenza t’Alla.

Fr Charles temm il-laqgħa billi fakkar fir-rigal li rċevejna l-ewwel fil-Magħmudija u mbagħad fil-Grizma tal-Isqof – l-Ispirtu s-Santu – ejjew nisktu u nħossuh jaħdem fina.

‘Żomm il-fidi soda fik, il-boxxla tal-fidi hija li temmen għax il-Mulej ikellimna bil-fatti. ’

Fr Charles Fenech O.P. f’Prayer Cafè

Tul il-laqgħa kollha, Fr Charles tana kliem ta’ kuraġġ kbir għal min irid jgħix ħajja tajba.  Fi ftit kliem qal hekk:

Ikun hemm perjodi fejn wieħed jaħseb li qiegħed jitħawwad fil-fidi tiegħu, fejn ma jarax ċar u anke jkun irrabjat għal Alla u jara biss dlamijiet.  Pero’ ikkunslaw, għax dan ma ġarax lilna biss u lanqas sa jieqaf milli jkompli jiġri.  Tlett affarijiet li eżżew it-trankwilita’ tal-knisja tal-bidu kienu:

1. It-tradiment ta’ Ġuda; li Ġesù għażlu b’ismu!
2. Iċ-ċaħda ta’ Pietru; li kien sa jmexxi l-knisja
3. It-tluq ta Ġesù; li l-appostli, li għexu qrib tiegħu, baqgħu ma fehmux.

Allura d-diskors ta’ Ġesù jagħmel sens meta aħna nindunaw li l-komunita’ tal-ewwel insara kienet imbeżżgħa u inċerta.  Allura nindunaw li Ġesù kien qed jitkellem quddiem nies li m’għandhomx ċertezza; u Ġesù qiegħed hemm biex iżommhom milli jkomplu jitfarku.  Wara l-qari tal-Vanġelu, wieħed għandu jżomm f’moħħu li hemm nies imfarrkin, imbeżżgħin, li qatgħu qalbhom u nies li m’għadhomx jemmnu f’Ġesù, minkejja li għażilhom hu.

Ġesù jitkellem ċar u bla kantunieri:

“Tħallux qalbkom titħawwad!

Emmnu f’Alla, u emmnu fija wkoll.”

Mela allura, qalbna titħawwad, meta aħna ma nemmnux f’Alla u f’Ġesù.  Jiġifieri t-taħwid li hawn fid-dinja huwa għax sempliċiment immorru kontra r-rieda t’Alla.  Jekk wieħed iħares ħarsa lejn ħajtu; lejn l-għażliet u x’għamilna, jinduna li, il-ħajja hija tqila, għaliex ma nemmnux f’Alla.

Il-ħajja hija tqila, għaliex ma nemmnux f’Alla

Allura huwa mportanti li nagħrfu lil Alla f’ħajjitna.  Ħalli l-Mulej jidħol fil-ħajja tiegħek.  Ejjew ma nwaħħlux fi skużi bħal: għax id-dinja nbiddlet.  Jien qiegħed inħares lejja nnifsi biex nibni relazzjoni ma’ Alla?  Ħalli meta jinqala’ xi ħaġa f’ħajjitna ma mwaħħlux f’Alla jew nippenikjaw jew insemmu l-isem t’Alla.  Fr Charles hawnhekk għamel spunt importanti fuq id-dagħa.  ‘Jien ma niġġudikax min jidgħi, dak jarah Alla! Pero’ fejn hemm id-dagħa, hemm preżenti saħta kbira anke jekk ma tidgħix int.  Int tista’ tirbaħha din is-saħħta, billi tikkumbatti bit-talb.’

Int kemm titlob? Għandek kamra d-dar fejn titlob? Jew qegħdin inġebbdu r-rieda t’Alla kif jaqbel lilna?

Il-Prinċipji tal-insara huma tajbin u aħna niskandalizzaw ruħna jekk ta’ ħdejna mhux qed iħarishom jew jekk tgħaddi xi liġi kontra l-prinċipji. Imma meta l-liġijiet jibdew joqorsuna fil-ħajja tagħna… imbagħad jibdew l-IMMA, imma….

Ġesù jitkellem ċar:

‘Fis-sewwa, fis-sewwa ngħidilkom, min jemmen fija, hu wkoll għad jagħmel l-għemil li qiegħed nagħmel jien, u akbar minnu għad jagħmel.’

Allura aħna nagħmlu l-mirakli?  Iva fl-għemejjel żgħar tagħna, iva aħna nagħmlu l-mirakli.  Għin u agħti mingħajr interess, u Alla jtik paċi f’qalbek.  ‘Ili daqshekk magħkom u int, …..’

Dejjem nipprova nżomm dan il-blog qasir kemm nista’ biex waqt li nittama li jkun ta’ gwida, ma naqtax qalb il-qarrejja.  Iżda zgur li l-aqwa tgħallim ikun mar għand min sema’ lil Fr Charles jitkellem waqt il-Prayer Cafè.  U hawnhekk nixtieq nirringrazzja lil Mulej għax verament in-numru tan-nies li qed jiġu għal dawn il-ftit minuti tas-smigħ qiegħed dejjem jikber.

Joanne Ċiantar

Nemmen li kieku aħna m’għandniex fidi fix-xogħol volontarjat tagħna kieku m’aħnix hawn.

Li jkollok il-fidi, hija li temmen mingħajr ma tifhem. Il-fidi, bejnietna hija hekk ukoll; li jkollna fiduċja f’xulxin minkejja li mhux dejjem nifhmu lil xulxin. Kull ħsieb li jista’ jfixkilna milli nafdaw lil xulxin jkun ġej mix-xitan. Fidi Spiritwali hija li aħna jkollna fidi fix-xogħol ta’ Alla għalkemm mhux dejjem nifmuh.

Filwaqt li l-moħħ huwa aktar b’saħħtu mill-ġisem, L-Ispirtu huwa aktar b’saħħtu mill-moħħ.  La darba temmen dan, tkabbar dan it-twemmin fik. Kull diffikulta li nintaqaw magħha hija opportunita’ biex inkabbru l-fidi tagħna.

Talba

Mulej Ġesu’ nizzel fina L-Ispirtu tiegħek biex bħalma għamilt mad-dixxipli tagħmlu magħna.  Itfa fina l-qawwa tal-Ispirtu s-Santu biex nintlew b’fidi qawwija ħalli bħala komunita’ nxandru l-kelma tiegħek.  Użana Mulej u mlina bil-fidi soda biex qatt ma nitilfu kull opportunita’ biex nevanġelizzaw jew niddubitaw mill-fidi tagħna.

Ammen

 

Post ta’ Joanne Ciantar

 

AĦBARIJIET U AVVIŻI MILL-MOVIMENT KERŶGMA – April 2014

.

ITTRA TA’ RINGRAZZJAMENT

Qed nippubblikaw ittra ta’ ringrazzjament li l-Moviment Kerŷgma bagħat lil eks-President ta’ Malta, l-Eċċ. Tiegħu Dr. Ġorġ Abela.

7 ta’ April 2014

Għażiż Dr. Abela,

F’isem il-membri kollha tal-Moviment Kerŷgma, l-Eżekuttiv u jien personali nixtieq nirringrazzjak għas-sapport li dejjem tajt lil-Moviment Kerŷgma tul is-snin, speċjalment f’dawn l-aħħar ħames snin tal-presidenza tiegħek. Is-sapport li tajtna bil-preżenza tiegħek fil-Premju Żagħżugħ tas-Sena żgur li mhux ser jintesa’ minn ħadd minna.
Nixtiequ nifirħulek u nirringrazzjawk ukoll għax-xogħol tant siewi li int wettaqt għall-poplu kollu Malti u Għawdxi. Żgur li l-presidenza tiegħek ser tibqa’ imfakkra għat-tħabbrik bla waqfien tiegħek favur nies li qed ibatu u li huma fil-veru bżonn. L-imħabba u l-ħeġġa li int urejt biex tgħin lill-batut kif ukoll kif irnexxielek tgħaqqad il-poplu Malti u Għawdxi kollu warajk f’kull inizjattiva li ħadt, żgur li ser jibqgħu mnaqqxin fl-istorja ta’ pajjiżna.
Nawgurawlek u nibgħatulek l-isbaħ xewqat għall-fażi li jmiss fil-ħajja tiegħek. Insellu għalik u għall-familja tiegħek u nwegħdukom it-talb tagħna biex Alla jkompli jieqaf magħkom ilkoll.

Tiegħek fi Kristu,
Fr. Charles Fenech OP

.

KONFERENZA TAL-LAJĊI DUMNIKANI

Ser tiġi organizzata Konferenza tal-Lajċi Dumnikani fil-Kunvent San Duminku r-Rabat f’dawn il-ġranet/ħinijiet:
Il-Ġimgħa 9 ta’ Mejju fis-7.00 pm u Is-Sibt 10 ta’ Mejju fid-9.15 am.

L-ispeaker prinċipali ser tkun Dr. Donna Orsuto li tgħallem fl-Università f’Ruma. It-tema ser tkun “The Joy of Christian Living” u ser titkellem dwar l-irwol tal-lajċi fil-knisja – diskors li ser ikun mibni fuq l-eżortazzjoni Appostolika tal-Papa Franġisku “Il-Ferħ tal-Vanġelu”.
Kulħadd huwa mistieden.

.

PELLEGRINAĠĠ

Il-Moviment ser jagħmel pellegrinaġġ għas-Santwarju tal-Madonna ta’ Fatima f’Gwardamangia nhar it-Tnejn 26 ta’ Mejju 2014 fis-6.30pm. Ser ikollna quddiesa li titqaddes minn Fr. Charles Fenech OP waqt li l-kant isir mill-Christour Children’s Choir tal-Moviment Kerŷgma. Ser ikollna kowċ li titlaq minn Pjazza San Duminku, Rabat fis-5.45pm. Dan għandu jkun pellegrinaġġ tal-Moviment kollu u għalhekk kulħadd huwa mħeġġeġ biex jattendi. II-prezz għat-trasport huwa ta’ €2 kull persuna. Bookings fis-Segreterija l-Ġimgħa filgħaxija jew permezz ta’ email fuq : movimentkerygma@gmail.com

.

PASTA NIGHT

Nhar is-Sibt 31 ta’ Mejju 2014 ser norganizzaw Pasta Night fiċ-Ċentru Moviment Kerŷgma fis-7.30pm. Ser ikun hemm 3 tipi ta’ pasta – Lasagne, Timpana u Penne Bolognese. Il-prezz huwa €12 għall-kbar u €5 għat-tfal bejn is-6 u 11-il sena. Tfal sa 5 snin ma jħallsux. Il-prezz jinkludi wkoll inbid jew soft drink u deżerta. Kulħadd huwa mistieden inklużi familji u ħbieb. Bookings mis-segreterija l-Ġimgħa filgħaxija wara l-laqgħat jew mil-leaders tagħkom. Tistgħu ċċemplu wkoll mit-Tlieta sal-Ġimgħa bejn 12.00 u s-2.30pm fuq 21459942. Postijiet huma limitati u għalhekk tħallux għall-aħħar. Id-data tal-għeluq hija l-Erbgħa 28 ta’ Mejju 2014. Ħlas bil-quddiem jekk jogħġobkom.

.

Assembleja Ġenerali

L-Assembleja Ġenerali tal-Moviment Kerŷgma ser issir fiċ-Ċentru Kulturali Kerŷgma nhar il-Ġimgħa 13 ta’ Ġunju fis-6.30pm, b’din l-aġenda:

a. Talba tal-Moviment Kerŷgma;
b. Qari tal-minuti;
c. Rapport Amministrattiv:

i. Ħidmiet ta’ matul is-sena;
ii. Studju dwar l-evanġelizzazzjoni kontinwa tal-Moviment.

d. Rapport Finanzjarju;
e. Nomina ta’ Awdituri;
f. Mozzjonijiet/emendi għall-Istatut.

Membri mħallsa tal-Moviment jistgħu jressqu emendi għall-Istatut sa nhar il-Ġimgħa 30 ta’ Mejju 2014 billi jibgħatuhom f’envelope magħluq lid-Direttur Ġenerali Moviment Kerŷgma, Ċentru Kulturali Kerŷgma, Kunvent Patrijiet Dumnikani, Rabat RBT 2521.

.

KALENDARJU TA’ ATTIVITAJIET

Fil-laqgħa ta’ Prayer Cafe ġie maqruh u diskuss il-vanġelu tal-Ħadd li ġej. Din id-darba huwa mehud minn San Luqa 24:13-35. Dan il-vanġelu, beda Fr Charles, juri l-ħajja tagħna bid-dettalji kollha tagħha. Il-vanġelji tal-Għid huma kollha sbieh –  fihom irridu naraw lilna nfusna fl-appostli u minnhom irridu naraw kif se niksbu l-ferħ veru. F’dan il-vanġelu irridu ngħarfu kif San Luqa ried ifisser lill-komunita nisranija ta’ dak iż-żmien t-triq li twassalna biex nitaqgħu ma Ġesù. Kultant nisimgħu ħafna kliem iżda x’ħin niġu għal fatti neħlu. Nisimgħu ħafna dwar u fuq Ġesù, nimxu ma ĠesùĠesu – mmorru laqgħat bħal dawn, immorru l-quddies,  kompla Fr Charles, iżda nibqgħu mwaħħlin fejn inkunu. Kultant naqgħu f’medjokrita – m’hemm xejn li jħeġġiġna fil-ħajja spiritwali tagħna. Irridu nqumu fuq tagħna, irridu noħorġu mill-qabar tagħna. F’dan il-vanġelu mhux biss naraw il-mixja tad-dixxipli lejn Emmaws iżda naraw ukoll ir-ritorn tagħhom lejn Ġerusalemm. Il-vanġelu jgħidilna li “Għemmaws kien sittin stadju ’l bogħod minn Ġerusalemm” dan kien ekkwivalenti għal 11 kilometru, mixja twila mhux ħażin li matulha Ġesù deher lil dawn iż-zewġ dixxipli msemmija u tul id-distanza kollha tkellmu flimkien fuq l-Iskrittura u l-ġrajjiet li kienu qegħdin iseħħu. Kwazi tidher tad-daħk li wara 11 il kilometru, d-dixxipli li għexu miegħu dak iż-żmien kollu jistaqsuh: “ Inti waħdek f’Ġerusalemm il-barrani li ma tafx x’ġara hemmhekk f’dawn il-jiem? ” Dan l-istess bħal meta aħna mmorru l-quddies u nibqgħu ngħixu ħajja normali, ma ninbidlux. Ġesù jimxi magħna f’kull ħin ta’ ħajjitna.

Meta mmorru l-quddies, nisimgħu fuq Ġesù qisna d-dixxipli ta’ Ġħemmaws li għalkemm semgħu lil Ġesù tul il-11 il-kilometru ma nbidel xejn fihom tant li baqgħu ma għarfux min kien. Noqgħodu attenti, wissina Fr Charles, li ma jiġrilniex l-istess, li f’ħajjitna nibqgħu ma ngħarfux lil Ġesu sa l-aħħar ta’ ħajjitna. Nkunu għarafna lil Ġesù meta ngħamlu dak li jgħidilna Hu. Mela noqgħodu attenti li ma nserrħux moħħna għax immorru l-quddies. Dan ma jfisser xejn. Li timxi ma Ġesù jfisser li tagħmel dak li jgħidlek Hu anke meta jgħidilna ninżabru xi ftit.

Id-dixxipli ta’ Għemmaws, x’ħin waslu fl-aħħar tal-vjaġġ stiednu lil Ġesù bħala foristier għax baqgħu ma għarfux lil Ġesu. Qalulu “Ibqa’ magħna, għax issa sar ħafna ħin u l-jum wasal biex jispiċċa.” Kienet stedina lil dak li mexa magħhom għaliex l-vjaġġ spiċċa, għaliex għeja, għaliex kien qiegħed jidlam. U d-dalma tfisser l-biża’, l-qtugħ ta’ qalb. Mbagħad seħħ il-miraklu u ntebħu li dak li kien magħhom kien Ġesù meta Hu qasam il-ħobż magħhom nfetħu għajnejhom, għarfu lil Ġesù. Din hija twissija għalina lkoll, qal Fr Charles. Kemm nikkonċentraw fuq l-Ewkaristija aħna u telgħin għat-tqarbin? Xi tfisser l-Ewkaristija għalina? X’inhi r-rejazzjoni tagħna x’ħin l-Ostja tmiss ma jdejna, x’ħin tmiss ma lsienna? Nagħmluha bħala drawwa biss u kollox jibqa’ għaddej. Il-mixja tagħna tista’ tkun il-mixja tagħna lejn l-artal biex nirċievu l-Ostja u kollox jibqa’ l-istess. Jista’ jkun li meta nirċievu l-ostja tkun biss slot fil-ħajja tagħna u ma jinbidel xejn f’ħajjitna.

Meta d-dixxipli għarfu lil Ġesù dan għeb minn quddiem għajnejhom. Imma għax għarfu min kien Ġesù nsew l-ikel, insew il-biżgħa tagħhom minn kull periklu li jistgħu jiltaqgħu miegħu matul it-triq u reġgħu marru lura lejn Ġerusalemm bl-aħbar li Ġesu qam lid-dixxipli l-oħra. Aħna għandna nkunu l-istess ħabbara tal-bxara t-tajba lill-familji tagħna, fuq il-postijiet tax-xogħol, u lil dawk ta’ madwarna. Hemm nidhru li aħna dixxipli ta’ Ġesu.

Hawn Fr Charles semma dak li qal Papa Franġisku fil-kanonizazzjoni tal-Papa Ġwanni XXIII u l-Papa Ġwanni Pawlu II, se sseħħ nhar il-Ħadd 27 t’ April, dawn iż-żewġ Papiet bi storja differenti u li f’mumenti iebsin kemm fis-soċjeta u kif ukoll fil-knisja għarfu jwettqu r-rieda t’Alla u jġibu terremot ta’  bidliet akkost li kellhom ħafna ostakli biex iwettqu ħidmiethom.

Aħna ukoll nistgħu nagħmlu terremot bl-egħmil tagħna ta’ kuljum.

Fr Charles Fenech spiċċa l-laqgħa b’dawn il-mistoqsijiet.

• Id-dixxipli ta’ Għemmaws qalu “ ‘Ma kenitx mħeġġa qalbna ġewwa fina waqt li kien qiegħed ikellimna fit-triq u jfissrilna l-Iskrittura?’ ”
• X’inhi r rejazzjoni tagħna meta nisimgħu jew meta naqraw l-Iskrittura Mqaddsa?
• Bħala nsara qegħdin nħossu l-ferħ anke ma ħadd ieħor? Jew il-ferħ insibuh fid-divertivement?
• X’inhu jġiblina l-ferħ f’ħajitna, l-Ostja li nirċievu jew l-flus li naqilgħu,jew bl-affarijiet materjali li jista jkollna?
• Importanti li aħna lkoll ngħarfu li l-Għid huwa tfittxija għal dan il-ferħ.