It-2 Ħadd ta’ l-Avvent

IDDRITTAW

Isaija 11:1-10; Salm 71; Rumani 15:4-9; Mattew 3:1-12

Il-Vanġelu

F’dawk il-jiem deher Ġwanni l-Battista jippriedka fid-deżert tal-Lhudija u jgħid: “Indmu, għax is-Saltna tas-Smewwiet waslet’.  Għax għalih kien ingħad permezz tal-profeta Isaija, meta qal,

‘Leħen ta’ wieħed jgħajjat fid-deżert: Ħejju t-triq tal-Mulej, iddrittaw il-mogħdijiet tiegħu.’

Dan Ġwanni kellu fuqu libsa tax-xagħar tal-ġemel, bi ħżiem tal-ġild madwar qaddu, u l-ikel tiegħu kien ġradijiet u għasel selvaġġ.  U kienet tmur għandu Ġerusalemm u l-Lhudija kollha u l-inħawi kollha ta’ madwar il-Ġordan, u kienu jitgħammdu minnu fix-xmara Ġordan huma u jistqarru dnubiethom.

Kif ra bosta mill-Fariżej u mis-Sadduċej ġejjin għall-magħmudija tiegħu, qalilhom: “Ja nisel il-lifgħat, min uriekom kif għandkom taħarbu mill-korla li ġejja? Agħmlu mela frott xieraq ta’ l-indiema. U taħsbux li tistgħu tgħidu fikom infuskom, ‘Għandna b’missier lil Abraham,’ għax ngħidilkom li Alla, minn dan l-istess ġebel, jista’ jqajjem ulied lil Abraham.  Il-mannara ġa tressqet ma’ għerq is-siġra; u għalhekk, kull siġra li ma tagħmilx frott tajjeb titqaċċat u tinxteħet fin-nar. Jien, ngħid għalija, ngħammidkom bl-ilma   għall-indiema; imma min ġej warajja hu aqwa minni, u jien ma jistħoqqlix inġorr il-qorq tiegħu. Hu jgħammidkom bl-Ispirtu s-Santu u n-nar.  Il-midra qiegħda f’idu, biex iderri l-qiegħa tiegħu u jiġbor il-qamħ fil-maħżen, imma t-tiben jaħarqu b’nar li ma jintefiex.

Il-Ħsieb

It-tħejjija tagħna fl-Avvent hija maqsuma bejn ċerta ħeġġa għal bidla interna u l-orġja ta’ kummerċ li għaddejjin minnha fl-istennija tal-Milied b’elf proposta għal elf rigal.  Huwa għalhekk leħen qawwi dak li nisimgħu lil Ġwanni l-Battista jtenni llum:

“Ħejju t-triq tal-Mulej. Iddrittaw il-mogħdijiet tiegħu.”

Mill-ġdid appell kontra l-aljenazzjoni li tifga fina kull sens ta’ ftuħ għall-Mulej.  U hawn hija l-għażla tagħna f’din it-tħejjija.  Lesti li niddrittaw it-triq ta’ ħajjitna?  Jew  għadna mqabbdin ma’ tant kompromessi?  X’lesti nitilfu f’din it-tħejjija?

“Agħmlu mela frott xieraq ta’ ndiema”, jissuġġerixxi Ġwanni l-Battista.”

Israel kollu għad jinqered, iżda mill-qerda għad tinbet il-fergħa tas-Salvazzjoni – il-Messija li jġib il-bidla totali.  Hekk insibu fl-Ewwel Qari tal-lum meħud mill-Ktieb tal-Profeta Isaija 11:1-10 u din l-istennija għas-Saltna ta’ Alla tidher fis-Saltna tal-Messija kif insibu fis-Salm 71:  “Tħaddar f’jiemu l-ġustizzja.”  Din il-ġustizzja trid tixgħel fid-dinja permezz tax-xhieda ta’ għaqda fost l-insara.  Huwa għalhekk li San Pawl jikteb fis-silta tal-lum mill-Ittra lir-Rumani li l-Messija m’hu monopolju ta’ ħadd.  Dan ir-radikaliżmu tat-tħabbira u l-istennija jidher fil-figura u l-kliem ta’ Ġwanni l-Battista fil-Vanġelu ta’ San Mattew.  Ġwanni jistqarr li x-xogħol tiegħu huwa biss xogħol ta’ tħejjija.

Il-Ħajja

1. Inkomplu l-mixja fl-Avvent b’għażla f’idejna:  IRRIDU NINBIDLU?
2. X’ser tagħti biex tinbidel?
3. Hemm bżonn li f’dan l-Avvent issib mument ta’ deżert.  Tirrifletti bis-serjetà fuq x’tip ta’ ħajja qiegħed tgħix.
4. Hemm bżonn ta’ DEĊIŻJONI u BIDLA fil-ħajja tagħna.
5. Hu fid-deżert li sseħħ il-bidla.

Id-Djalogu

Mulej Ġesù, idħol fid-deżert ta’ qalbi u għinni niddritta l-mogħdijiet.

L-1 Ħadd ta’ l-Avvent

INQUMU FL-ISTENNIJA

1. Isaija 2,1-5; Salm 121; Rumani 13,11-14; Mattew 24, 37-44

Il-Vanġelu

     Bħal fi żmien Noè, hekk tkun il-miġja ta’ Bin il-Bniedem. Għax kif fiż-żmien ta’ qabel id-dilluvju kienu jieklu u jixorbu, jiżżewwġu u jżewwġu sa dakinhar li Noè daħal fl-arka, u b’xejn ma ntebħu sa ma wasal id-dilluvju u ġarr lil kulħadd, hekk tkun il-miġja ta’ Bin il-bniedem. Mbagħad tnejn ikunu fl-għalqa: wieħed jittieħed u l-ieħor jitħalla; żewġ nisa jkunu jitħnu flimkien: waħda tittieħed u l-oħra titħalla. Ishru, mela, għax ma tafuhx il-jum li fih jiġi Sidkom. Kunu afu dan, li kieku sid id-dar kellu jkun jaf f’liema sahra tal-lejl se jiġi l-ħalliel, kien jishar u ma jħallix min jinfidlu  l-ħitan ta’ daru. Mela kunu lesti intom ukoll, għax qatt ma tistgħu tobsru s-siegħa li fiha jiġi Bin il-bniedem.

Il-Ħsieb

     Bħala nsara huma ferm importanti l-mumenti li nqumu ftit mir-rutina li ħafna drabi nkunu waqajna fiha.  L-Avvent huwa ż-żmien it-tajjeb biex nagħmlu dan fl-istennija tat-twelid ta’ Ġesù, twelid li d-dinja tal-kummerċ illum għamlet minnu karikatura.  L-Avvent huwa kemm memorja kif ukoll profezija.  Ma rridux inħarsu biss lejn il-passat tal-ġrajja tal-Milied, iżda wkoll lejn il-preżent biex ninterpretawh fid-dawl tal-Kelma t’Alla.  L-Avvent għalhekk mhux xi stennija monotona li fiha ma tagħmel xejn, iżda stennija attiva.

Il-Kelma

Mat-Twaqqif tas-Saltna tal-Messija sal-aħħar tad-dinja, Sijon il- Ġdida – il-Knisja tkun għall-attenzjoni mhux tal-Lhud biss iżda tad-dinja kollha.  Hekk itenni l-awtur tal-Ktieb tal-Profeta Isaija fl-ewwel silta tal-lum.  Il-poplu jkollu x-xewqa li jitgħallem it-triqat u l-mogħdijiet tal-Mulej.  Dan il-ferħ ta’ għażla jidher fis-Salm Responsorjali tal-lum meta fis-Salm 121 insibu l-għanja ta’ ferħ:  “FRAĦT META QALULI: ‘IMMORRU FID-DAR TAL-MULEJ’.  San Pawl fl-Ittra tiegħu lir-Rumani jagħmel distinzjoni bejn il-lejl li huma l-jiem ta’ ħajjitna u l-jum li huwa t-tieni miġja tal-Mulej.  Fil-Vanġelu ta’ San Mattew insibu li Ġesù jisħaq fuq x’għandha tkun l-attitudni tagħna b’din l-istennija.  Hemm bżonn li nkunu dejjem imħejjija.  Quddiem dinja li tipprovdi vanġeli u valuri oħrajn. L-iżball ta’ l-aljenazzjoni jista’ jkun fatali.

Il-Ħajja

1. L-AVVENT huwa riflessjoni qabel il-Milied fuq it-tip ta’ ħajja li qegħdin ngħixu?
2. X’qed tħejji għal din il-miġja tal-Mulej?
3. Kemm tassew qed tipprova tegħleb l-aljenazzjoni tad-dinja biex tiġġedded mal-Mulej?
4. Theilard de Chardin kien itenni:  “Il-Mulej Ġesù ser jirritorna jekk nistennewh b’tama ħajja.”  Kemm verament qed nistennewh il- Mulej?
5. Lil min ser nistennew f’dan l-Avvent?
6. Kif ser nistennewh?
7. Fejn?

Id-Djalogu

Mulej Ġesù, għinna nirbħu l-aljenazzjoni fil-ħajja tagħna biex naslu ħalli nistennewk bi preparazzjoni serja.

Festa ta’ Kristu Sultan

SULTAN QADDEJ

2 Samwel 5:1-3; Salm 121; Kolossin 1:12-20; Luqa 23:35-43

 

Il-Vanġelu

Il-poplu waqaf hemm, iħares, waqt li l-kapijiet bdew jiddieħku b’Ġesù u jgħidu: “Salva lil oħrajn; ħa jsalva lilu nnifsu jekk dan hu l-Messija, il-Maħtur ta’ Alla!” Is-suldati wkoll bdew jgħadduh biż-żmien; u resqu lejh, newwlulu nbid qares u qalulu: “Jekk inti s-sultan tal-Lhud salva lilek innifsek!” Fuq rasu kien hemm ukoll kitba li kienet tgħid, ‘Dan huwa s-sultan tal-Lhud.’

Wieħed mill-ħatjin li kienu msallbin miegħu beda jgħajjru u jgħidlu: “Int m’intix il-Messija? Salva lilek innifsek u lilna.” Imma qabeż l-ieħor, ċanfru u qallu: “Anqas minn Alla int ma tibża’,  int li qiegħed taħt l-istess kundanna? Tagħna hija ġusta, tassew, għax qegħdin nieħdu li ħaqqna ta’ kull ma għamilna; imma dan ma għamel xejn ħażin.” Mbagħad qal: “Ġesù, ftakar fija meta tidħol fis-Saltna tiegħek.” U Ġesù wieġbu: “Tassew ngħidlek, illum tkun fil-Ġenna miegħi.”

Il-Ħsieb

Sultan Qaddej.  Din hija l-festa li qed niċċelebraw illum.  Il-festa li tradizzjonalment insejħulha l-festa ta’ Kristu Re.  Hija l-festa fejn ir-Re ġie fid-dinja biex isalvana u jkun is-salvatur tagħna.  Ilkoll kemm aħna llum irridu nirringrazzjaw lil Ġesù li wriena mhux bil-kliem biss iżda wkoll bil-ġrajjiet li jħobbna lkoll, li jħobb l-umanità kollha tant li daħal fl-istorja ta’ l-umanità tagħna.  Sultan li qiegħed għas-servizz tagħna u għalhekk fih sens akbar illum fl-aħħar Ħadd tas-Sena Liturġika li nħarsu lejn il-Mulej bħala dak li mhux huwa s-sultan tal-ħolqien kollu iżda li jsegwi bil-fidwa li kisbilna dan l-istess ħolqien.  Huwa messaġġ ta’ faraġ u kuraġġ għalina lkoll.  Messaġġ li permezz tiegħu nagħrfu li qatt fid-dinja ma aħna waħedna.  Biex wettaq din il-missjoni ta’ salvazzjoni Ġesù bata ħafna.  Bata l-umiljazzjoni.  Huwa, li kien Sultan ta’ l-Univers kollu, kien umiljat bl-akbar mod kif naraw anki fil-Vanġelu tal-lum.  U anki minn hawn irid joħroġ messaġġ qawwi għall-ħajja tagħna.  Aħna l-insara ġejna mifdijin bi prezz għoli, bid-demm ta’ l-istess ħallieq tagħna.  Huwa għalhekk li għandna responsabbiltà kbira li nuru lid-dinja ta’ madwarna l-qawwa ta’ din is-Saltna ta’ dan is-Sultan li huwa għas-servizz tagħna erbgħa u għoxrin siegħa kuljum.

Il-Kelma

L-Ewwel Qari tal-lum huwa meħud mit-Tieni Ktieb ta’ Samwel fejn għandna lil David Sultan ta’ Ġuda jiġi midluk Sultan ta’ Israel kollu.  B’hekk iż-żewġ saltniet saru saltna waħda.  David huwa xbieha tal-Messija fuq il-ħolqien kollu.  Is-Salm Responsorjali, meħud minn Salm 121, huwa għanja ta’ tifħir tal-poplu t’Alla fejn Kristu huwa s-Sultan.  Fit-Tieni Qari mill-Ittra lill-Kolossin, San Pawl juri li l-Mulej huwa l-bidu u t-tmiem tas-salvazzjoni tagħna filwaqt li fit-tieni parti San Pawl jinseġ innu ta’ glorja u tifħir lil Ġesù.  Fil-Vanġelu ta’ San Luqa għandna silta mill-passjoni ta’ Ġesù, forsi wieħed mill-aktar mumenti ta’ umiljazzjoni fuq is-salib u l-konverżjoni tal-ħalliel mislub ma’ Ġesù. Ġie msejjaħ sultan għax feda l-umanità minn fuq is-salib.

Il-Ħajja

1.  Kemm tħoss fil-fond ta’ qalbek li llum għandek tgħid GRAZZI lil Kristu Sultan?

2.  Taf kemm kuljum dan is-sultan huwa għad-dispożizzjoni tiegħek?  Jirnexxilek tieqaf u tkellmu huwa li qed jistenniek erbgħa u għoxrin siegħa kuljum?

3.  Kemm tassew nifhmu l-prezz iebes u għoli li dan is-Sultan ħallas għalina?

4.  Iċ-ċelebrazzjoni tal-lum trid tkun ċelebrazzjoni ta’ radd il-ħajr lil Ġesù għal dak li għamel u jibqa’ jagħmel għalina, minkejja li neħduh for granted fil-ħajja tagħna.

5.  Bix-xhieda tagħna f’din id-dinja aħna rridu nuru li niffurmaw parti minn din is-saltna li tagħha Ġesù huwa l-mexxej.  L-ID Card tagħna trid tkun ix-xhieda permezz tas-sagrifiċċju.

Id-Djalogu

Nadurawk, o Sultan tagħna,

għax b’salibek u l-mewt tiegħek

inti fdejtna.

It-33 Ħadd Matul is-Sena

JOBGĦODUKOM  MINĦABBA  F’ISMI!

Malakija 3:19-20a; Salm 97; 2 Tessalonkin 3, 7-12; Luqa 21:5-19

Il-Vanġelu

 Kien hemm xi wħud li bdew jgħidu fuq kemm it-tempju kien imżejjen b’ġebel sabiħ u għotjiet; iżda Ġesù qalilhom: “Kull ma qegħdin taraw, għad jiġi żmien li ma tibqax ġebla fuq oħra minnu li ma tiġġarrafx.”

 U huma staqsewh u qalulu: “Mgħallem, issa dan meta għad jiġri? U x’se jkun is-sinjal li dawn il-ħwejjeġ ikunu waslu biex iseħħu?” Qalilhom: “Araw li ma titqarrqux. Għax għad jiġu ħafna f’ismi u jgħidu, ‘Jien hu,’ u, ‘Iż-żmien wasal.’ Tmorrux warajhom!  Meta tisimgħu min jitkellem fuq gwerer u taqlib fil-pajjiżi, tinħasdux għax jeħtieġ li l-ewwel jiġri dan, iżda t-tmiem ma jasalx minnufih.”  Mbagħad qalilhom: “Għad iqum ġens kontra ġens u saltna kontra saltna,  l-art titheżheż bil-kbir, f’ħafna bnadi jkun hemm il-ġuħ u mard li jittieħed, u fis-sema jidhru ħwejjeġ tal-biża’ u sinjali ta’ l-għaġeb.  Imma qabel dan kollu jixħtu idejhom fuqkom u jippersegwitawkom, jagħtukom f’idejn il-mexxejja  tas-sinagoga u jitfgħukom il-ħabs, u jeħdukom quddiem slaten u gvernaturi minħabba f’ismi. Dan ikun jiswielkom biex tistgħu tagħtu xhieda. U żommu sewwa f’moħħkom: toqogħdux taħsbu minn qabel kif se tiddefendu ruħkom,  għax jien nagħtikom kliem u għerf li kull min ikun kontra tagħkom ma jkunx jista’ jiqaflu jew imerih.  U jittradukom saħansitra l-ġenituri tagħkom u ħutkom u qrabatkom u ħbiebkom, u lil xi wħud minnkom joqtluhom, u kulħadd isir jobgħodkom minħabba f’ismi. Imma xagħra waħda minn raskom ma tintilifx.  Jekk tibqgħu sħaħ sa l-aħħar issalvaw ħajjitkom!

Il-Ħsieb

Li tgħix ta’ nisrani m’huwiex faċli.  Tista’ tirreċta ta’ nisrani, tista’ tilgħabha ta’ nisrani, iżda li verament tgħix ta’ nisrani mhix ħaġa faċli.  Fil-ħajja kollox jintemm, jitfarrak u jispiċċa.  Kull ħaġa li ħsibna li fl-istorja tal-bniedem se tibqa’:  ideoloġiji, personaġġi, monumenti, kollox qdiem, intemm.  Iżda Kristu baqa’; il-fidi tibqa’.  Hu għalhekk li Ġesù llum jistedinna biex l-ewwelnett nirriflettu ftit fuq kemm il-fidi tagħtina l-kuraġġ kif inħarsu lejn il-ħajja tagħna ta’ kuljum u wkoll kif tassew aħna.  Dan biex ilkoll nindunaw li rridu ngħaddu minn persekuzzjonijiet iżda li moħħna għandu jkun mistrieħ li l-Mulej qatt m’hu se jħallina waħedna, “għax jien nagħtikom diskors u għerf.”

Ġesù jtenni li saħansitra dawk li nafdaw fihom iduru kontrina, dawk li qatt ma stennejna li se jeħduha kontrina.  Għax kif inti ma tibqax taqdi l-kompromessi ta’ dawk ta’ madwarek li jkunu għasruk biżżejjed, għax ma jqisux il-valuri tal-persuni umani, jitfgħuk ’il barra u jwarrbuk.  Ġesù għalhekk jisfidana biex nibqgħu sħaħ sa l-aħħar.  M’aħniex se nkunu waħedna f’din il-mixja ta’ fidi u mpenn fuq dak li għallimna huwa stess.  Dan huwa Ħadd li jiftħilna għajnejna iżda fl-istess ħin jimliena kuraġġ meta nkunu mimlija niket minħabba dak li jkun qed jiġri madwarna u li ħafna drabi jkunu ġrajjiet li ma nistgħux nifhmu.

Il-Kelma

Fl-Ewwel Qari, meħud mill-Ktieb tal-Profeta Malakija, għandna lill-Profeta jwissi lill-kburin u l-midinbin waqt li jqawwi l-qalb ta’ dawk li għandhom il-biża ta’ wlied għall-Isem ta’ Alla.  Is-Salm 97 li ntennu fis-Salm Responsorjali huwa għanja ta’ tifħir lil Alla għax ġej biex jagħmel ħaqq bil-ġustizzja mill-popli tiegħu, ġustizzja li tkun fuq il-mod li aħna mxejna fid-dawl ta’ kliemu.  It-Tieni Qari, meħud mit-tieni Ittra ta’ San Pawl lit-Tessalonkin, jagħtina twissija tal-Mulej li s-salvazzjoni u l-istennija tat-tieni miġja tal-Mulej m tridx tkun fil-għażż u wkoll b’idejna fuq żaqqna.  Hemm bżonn li naħdmu u nimpenjaw ruħna sew, fil-ħajja ta’ kuljum fejn trid toħroġ fil-beraħ il-fidi tagħna.  Fil-Vanġelu ta’ San Luqa għandna lil Ġesù li ma jwiegħedx suċċess iżda persekuzzjoni.  Fl-istess ħin, iżda, Ġesù jwiegħed l-għajnuna tiegħu u li qatt m’hu se nkunu waħedna fl-isfida biex nibqgħu sħaħ sa l-aħħar fi kliemu.

Il-Ħajja

1.  Il-Mulej qed jurina biċ-ċar illum xi tfisser tkun nisrani.  Trid taħdem, ma tibżax mill-persekuzzjoni u żżomm għajnejk u widnejk miftuħa sew għal dak li jgħidlek hu fil-mumenti iebsa.

2.  Ġesù jridna nibqgħu sħaħ sa l-aħħar.  Kif?  Billi nisimgħu l-messaġġ tal-Kelma tiegħu u nagħtuh il-ħajja fl-ambjent tagħna.

3.  San Pawl itenni l-importanza tax-xogħol fl-istennija tal-Mulej.  Il-post tax-xogħol u dmirijiet tagħna rridu nifhmuhom sew, għax huma parti mill-vokazzjoni u l-impenn nisrani ta’ kuljum.

4.  F’dan il-Vanġelu tal-lum Ġesù jurina li fil-mumenti diffiċli, meta aħna nkunu qed nagħmlu għażliet għalih u nimxu fuq kliemu, l-ispirtu tiegħu se jdawlilna d-deċiżjonijiet u l-kliem li ngħidu.

5.  Illum irridu nwiegħdu lil Ġesù li nimxu fuq kliemu mingħajr kompromessi.

Id-Djalogu

Mulej,

dawwal il-fehma tiegħi,

biex nifhem aktar

dak li trid minni

u għinni nħoss il-preżenza u d-dawl tiegħek

f’kull deċiżjoni li nieħu fil-ħajja

biex dejjem tkun fuq kliemek.

9 ta’ Novembru:  Id-Dedikazzjoni tal-Bażilika tal-Lateran

QALB WAĦDA MAL-PAPA

Eżekjel 47,1-2; 8-9; 12; Salm 45; 1 Korintin 3: 9-11; 16-17; Ġwanni 2: 13-23

 

Il-Vanġelu

Kien qorob l-Għid tal-Lhud, u Ġesù tela’ Ġerusalemm. Fit-tempju sab min qiegħed ibigħ barrin, nagħaġ u ħamiem, u min kien bilqiegħda jsarraf il-flus. Għamel sawt mill-ħbula, u keċċiehom ilkoll ‘il barra mit-tempju, bin-nagħaġ u l-barrin tagħhom; xerred il-flus ta’ dawk li kienu jsarrfu, u qalbilhom l-imwejjed. U lill-bejjiegħa tal-ħamiem qalilhom: “Warrbu dawn minn hawn, u dar Missieri tagħmluhiex dar tan-negozju!” Id-dixxipli ftakru f’dak li kien hemm miktub fl-Iskrittura, “Il-ħeġġa għal darek fnietni.’ Mbagħad il-Lhud qabdu u qalulu: “X’sinjal se turina li inti tista’ tagħmel dan?” Ġesù weġibhom: “Ħottu dan it-tempju, u fi tlitt ijiem nerġa’ ntellgħu.”  Għalhekk il-Lhud qalulu: “Dan it-tempju ħa sitta u erbgħin sena biex inbena, u int se ttellgħu fi tlitt ijiem?” Iżda hu tkellem fuq it-tempju tal-ġisem tiegħu. Meta mbagħad qam mill-imwiet, id-dixxipli tiegħu ftakru f’dan li kien qal, u emmnu fl-Iskrittura u fil-kliem li kien qal Ġesù.

Waqt li kien Ġerusalemm għall-festa ta’ l-Għid, kien hemm ħafna li emmnu f’ismu billi raw is-sinjali li kien jagħmel.

Il-Ħsieb

It-tifkira tad-dedikazzjoni tal-Bażilika tal-Lateran, il-knisja fejn il-Papa għandu l-katedra tiegħu bħala Isqof ta’ Ruma u ragħaj tal-Knisja kollha, tfakkarna fid-dmir tagħna li nuru fedeltà sħiħa għat-tagħlim li hu jxandrilna biex iwettaqna fil-fidi ta’ Kristu.  Huwa l-mument ta’ unità u għaqda tagħna l-Insara mal-Missier tagħna.  Il-mument li mhux biss inħarsu lejh bħala mexxej iżda wkoll bħala gwida spiritwali.  Ħafna drabi lkoll kemm aħna nisimgħu jew naqraw ċertu dissens fil-Knisja li mhux dejjem ikun dissens li ġej minn diskussjoni għaqlija iżda minn nies li jew ikunu jixtiequ jagħmlu ħoss fil-media jew, minħabba ċerti kompromessi li jkunu ntrabtu magħhom, ikunu jixtiequ jgħawġu u jbiddlu t-tagħlim u t-tifsir li tagħti l-Knisja ta’ Kristu.  Illum huwa l-mument fejn aħna niddikjaraw l-għaqda tagħna mal-Papa u nkunu qalb waħda miegħu u ĠEBEL ĦAJ tal-Knisja fis-soċjetà tagħna.

Il-Kelma

L-Ewwel Qari tal-lum, meħud mill-Ktieb tal-Profeta Eżekjel, jagħti l-immaġini ta’ l-Anġlu li jieħu lill-Profeta sa ħdejn il-bieb tat-tempju u jurih li l-ilma ħaj li ħiereġ mit-tempju se jkun is-salvazzjoni tal-poplu li jersaq lejn it-tempju.

Fis-Salm Responsorjali, minn Salm 45, naraw kemm il-Mulej huwa tassew il-kenn u fl-istess ħin il-qawwa tagħna.  Fit-Tieni Qari, meħud mill-Ewwel Ittra ta’ San Pawl lill-Korintin, insibu lil San Pawl jitkellem dwar Ġesù Kristu nnifsu li huwa l-pedament tat-tempju ta’ Alla u ħadd  ma jista’ jeqred dan it-tempju.  San Pawl itenni li l-Insara huma t-tempju ta’ Alla minħabba li l-Ispirtu ta’ Alla jgħammar fihom.  Fil-Vanġelu tal-lum, meħud minn San Ġwann, insibu li  Ġesù jitkellem fit-tempju u jirreferi għall-mewt u l-qawmien tiegħu.  Ħadd ma fehem li kien qed jitkellem fuq it-tempju tal-ġisem tiegħu.

 

Il-Ħajja

1. Fil-festa tal-lum irridu nifhmu li aħna l-insara aħna ĠEBEL ĦAJ. Hemm ħafna responsabbiltà fil-mod kif ngħixu u nitkellmu.
2. Għad-dinja ta’ madwarna, irridu nkunu eżempju għax qed inġorru fina l-istess tempju ta’ Alla. Kif nistgħu nagħmlu dan?
3. Billi nifhmu u naċċettaw il-Kelma ta’ Alla kif imfissra mill-Maġisteru tal-Knisja.
4. Irridu nkunu qalb waħda mal-Papa fit-tagħlim li huwa mdawwal mill-Ispirtu s-Santu biex idawwalna ħalli ngħixu kull ħin ir-rieda ta’ Alla fil-ħajja tagħna, fl-ambjent li fih ninsabu.

Id-Djalogu

Mulej, għinni

biex bħal ĠEBEL ĦAJ

ninbena f’dar spiritwali,

saċerdozju qaddis

sabiex inkun strument f’idejk

għat-tixrid tal-kelma tiegħek.

It-32 Ħadd Matul is-Sena

ALLA  TAL-ĦAJJIN

2 Malakija 7: 1-2, 9-14; Salm 16; 2 Tessalonkin 2: 16-3,5; Luqa 20: 27-38

Il-Vanġelu

Il-Qawmien mill-Imwiet

(Mt 22, 23-33; Mk 12, 18-27)

Mela resqu fuqu xi wħud mis-Sadduċej, dawk li jiċħdu l-qawmien mill-imwiet, u staqsewh: “Mgħallem,” qalulu,”Mosè ħallielna miktub, ‘Jekk wieħed imutlu ħuh miżżewweġ u dan ikun bla tfal, dak ikollu jiżżewweġ l-armla biex inissel ulied lil ħuh.’Issa jkun hemm sebat aħwa, u l-kbir iżżewweġ u miet bla tfal.  It-tieni wieħed,  u mbagħad it-tielet, f’kelma waħda, is-sebgħa li kienu, ħadu l-armla, u mietu bla ma ħallew tfal.  Fl-aħħar mietet  il-mara wkoll.  Issa din, fil-qawmien ta’ l-imwiet, mart min minnhom tkun? Għax is-sebgħa jkunu żżewwġuha.”  Weġibhom Ġesù: “Il-bnedmin f’din id-dinja jiżżewwġu u jżewwġu; imma dawk li jkun jistħoqqilhom jgħaddu għad-dinja l-oħra u jqumu   mill-imwiet, dawn la jżewwġu u lanqas jiżżewwġu.  Għax anqas jistgħu jmutu iżjed, għaliex ikunu bħall-anġli, u huma wlied Alla ladarba qamu mill-imwiet. U li l-mejtin iqumu, Mosè wkoll urieh,  fir-rakkont tax-xitla ta’ l-għollieq, għax lill-Mulej isejjaħlu Alla ta’ Abraham, Alla ta’ Iżakk, u Alla ta’ Ġakobb.  Issa Hu m’huwiex Alla tal-mejtin, iżda tal-ħajjin, għax għalih kulħadd jgħix.”

 

Il-Ħsieb

Ninsabu fix-xahar li fih niftakru fl-għeżież tagħna mejtin.  Fix-xahar ta’ Novembru bla ma trid tħoss xi ftit niket.  Jorbotna ma’ dawk li ma għadhomx aktar magħna, li telqu qabilna fil-vjaġġ tagħhom għall-eternitaÏ.  U min jaf kemm-il darba għaddew ħsibijiet minn moħħna ta’ x’se jsir minn din il-ħajja!

Huwa fatt importanti li ħafna drabi nagħmlu enfasi kbira fuq il-kelma MEJTIN.  U għalhekk noqtlu fina, anki mill-aspett psikoloġiku, kull ħjiel ta’ tama għal ħajja oħra.  Ġesù llum fil-Vanġelu jitkellem ċar – AĦNA WLIED IL-ĦAJJA.  Alla tagħna m’huwiex Alla tal-mejtin iżda tal-ħajjin:  “għax għalih kulħadd jgħix.”  U dan huwa l-mument li għalih irridu naħdmu tul ħajjitna kollha.  Aħna wlied il-ħajja u għalhekk irridu, minn din il-ħajja stess, nimpenjaw ruħna u nagħmlu l-investimenti tagħna mhux fuq din l-art iżda fis-sema fejn hu pajjiżna.  Meta jkollna l-fidi tagħna msaħħa kapaċi naslu għal dawn il-ħsibijiet, iżda mingħajr il-fidi ma naslu mkien.

Ħafna kumplikazzjonijiet u ħsibijiet żejda fil-ħajja tagħna nagħmluhom għax inħaddnu l-prinċipju tas-Sadduċej li ma kinux jemmnu fil-qawmien u għalhekk kollox isir kumplikat u jispiċċa fix-xejn minn dak kollu li ngħaddu minnu f’din il-ħajja.

Il-Kelma

Fl-Ewwel Qari tal-lum, meħud mit-Tieni Ktieb tal-Makkabej, insibu għall-ewwel darba fit-Testment il-Qadim stqarrija ta’ twemmin fil-qawmien mill-imwiet.  Fi żmien il-persekuzzjoni ta’ Antijoku, il-qtil ta’ tant Lhud tajba qajjem fost il-poplu t-tama ta’ dan il-qawmien.  Is-Salm Responsorjali huwa stqarrija li dawk li jibqgħu fil-liġi tal-Mulej meta jqumu jaraw id-dawl tiegħu.  Fit-Tieni Qari għandna silta mit-Tieni ittra ta’ San Pawl lit-Tessalonkin fejn San Pawl jissokta jitlob għall-insara tat-Tessalonika biex ifehimhom li ma jistgħux jaslu waħedhom għas salvazzjoni iżda jrid ikun hemm l-għajnuna ta’ Alla.  Fil-Vanġelu meħud minn San Luqa, għad-domanda “hemm tassew qawmien mill-imwiet?” insibu li t-tweġiba ta’ Ġesù mhix waħda mibnija fuq ix-xjenza iżda fuq il-fidi.

Il-Ħajja

1.  Inti konvint mill-qawmien wara din il-ħajja?

2.  Kif qed tgħix il-fidi tiegħek issa?

3.  Kemm qed tagħmel investimenti fis-sema?

4.  Kemm tassew temmen li l-mixja tagħna fuq din l-art se titkompla mal-Mulej għall-eternitaÏ?  Kemm tassew qed tgħix il-Kelma ta’ Alla f’dan id-dawl?

5.  Alla tiegħek huwa Alla tal-ħajjin jew tal-mejtin?

Id-Djalogu

Isma’, Mulej, il-kawża ġusta tiegħi,

ilqa’ l-għajta tiegħi,

agħti widen għal talbi

li ġej minn xofftejn bla qerq.

• It-30 Ħadd Matul is-Sena

SINĊERITÁ U XHIEDA

Bin Sirak 35, 12-14; 16-18; Salm33; 2 Timotju 4, 6-8; 16-18; Luqa 18: 9-14

Qari mill-Evangelju ta’ San Luqa

F’dak iż-żmien, kien hemm uħud li kienu jafdaw fihom infushom li huma ġusti u kienu jmaqdru lill-oħrajn. Ġesù qalilhom din il-parabbola:

«Żewġt irġiel, wieħed fariżew u l-ieħor pubblikan, telgħu fit-tempju biex jitolbu. Il-fariżew, wieqaf, talab hekk f’qalbu: “O Alla, niżżik ħajr li m’iniex bħall-bqija tal-bnedmin, ħalliela, inġusti, żienja, jew ukoll bħal dan il-pubblikan. Jiena nsum darbtejn fil-ġimgha u nħallas l-għexur ta’ kulma ndaħħal.”

Iżda l-pubblikan, bilwieqfa fil-bogħod anqas biss ried jerfa’ għajnejh lejn is-sema, imma beda jħabbat fuq sidru u jgħid: “O Alla, ħenn għalija, għax jien midneb!”

Ngħidilkom jien li dan, u mhux l-ieħor, niżel id-dar iġġustifikat. Għax kull min jitkabbar, jiċċekken; u min jiċċekken, jitkabbar.»

Il-Ħsieb

Kemm-il darba fil-ħajja tagħna għexna ż-żewġ karattri jew personaġġi tal-parabbola tal-lum, il-pubblikan u l-fariżew?  Kemm-il darba ħajjitna kienet tixbaħ dik tal-fariżew li nilagħbuha tal-qaddisin u mhux nippruvaw kuljum ngħixu u niġġieldu kontra d-dgħufija tagħna biex inkunu qaddisin?  U l-pubblikan?  Kemm kienu dawk il-mumenti li għarafna bis-sinċerita d-dgħufija ta’ ħajjitna u l-Mulej b’umiltÁ kbira ngħidulu aħfrilna u nippruvaw nibdew mill-ġdid?  Il-fariżew u l-pubblikan, żewġ direzzjonijiet differenti ta’ ħajja, żewġ għażliet differenti li niltaqgħu magħhom kuljum?  Jew inkunu suppervi u ngħidu li aħna biss “the best”, tajbin u perfetti u li ħadd ma jista’ għalina daqskemm aħna qaddisin, bħalma għamel il-fariżew jew l-atteġġjament ta’ umiltà kbira li wettaq il-pubblikan?  Huma l-għażliet biex ngħixu li rridu nwettqu kuljum.  Kemm qed ngħixu s-sinċerità fuq kull livell ta’ kuntatt f’ħajjitna, inkluż magħna nfusna u ma’ Alla?  Hija biss din it-triq li biha nistgħu niksbu s-salvazzjoni.   Ma teżisti l-ebda triq oħra.

Il-Kelma

Fl-Ewwel Qari tal-lum, meħud mill-Ktieb ta’ Bin Sirak, insibu li l-offerta lil Alla la għandha tkun meħuda mill-qligħ inġust u lanqas minn għemil ta’ inġustizzja oħra.  L-offerta lil Alla hija mkejla mill-kobor tal-qalb.  Alla ma jħarisx lejn il-wiċċ iżda lejn il-qalb.  Fis-Salm Responsorjali, meħud minn Salm 33, insibu “Il-fqajjar sejjaħ u l-Mulej semgħu.”  Hija l-garanzija li l-Mulej qatt m’hu se jħallina waħedna.  Fit-Tieni qari, mit-Tieni Ittra ta’ San Pawl lil Timotju, għandna t-Testment ta’ San Pawl fid-deskrizzjoni tas-sbuħija u l-iebes fil-ħajja ta’ l-Appostlu.  “Il-Mulej jeħlisna minn kull deni” hija espressjoni tal-qawwa li l-Mulej jagħti lil dawk li jsegwuh u jippruvaw minkejja d-dgħufija tagħhom iwassluh lill-oħrajn.  Fil-Vanġelu ta’ San Luqa għandna s-silta tal-parabbola tal-fariżew  u l-pubblikan, wieħed supperv u jiftaħar li huwa ġust u l-ieħor b’umilta kbira jistqarr li huwa dgħajjef u ma jiflaħx spiritwalment.  Is-salvazzjoni tingħata lil min jagħraf tassew il-ħtieġa tagħha.

Il-Ħajja

1.  Hemm bżonn li nħarsu f’mera u nkunu sinċieri magħna nfusna. Fejn huma d-difetti tagħna?  Irridu ninbidlu?

2.  Qegħdin insejħu lill-Mulej bl-umiltà kollha?

3.  Kemm qed nagħrfu tassew il-ħtijiet tagħna?

4.  Qed nitqabdu t-taqbida t-tajba?

5.  Kemm qegħdin nagħrfu li “Jiena lill-Mulej nistenna, ruħi f’kelmtu tittama” (Salm 129)?

6.  Is-salvazzjoni nakkwistawha jekk l-ewwel u qabel kollox tassew irriduha.

Id-Djalogu

Mulej,

inti l-kenn tiegħi,

għallimni nagħraf ir-rieda tiegħek

u b’umilta kbira nagħraf il-ħtijiet tiegħi,

sabiex inti tfejjaqni

u tħaddanni miegħek kull ħin.

Grazzi, Mulej, tal-fejqan!

Id-29 Ħadd Matul is-Sena

JGĦAJTULU LEJL U NHAR

Eżodu 17, 8-13; Salm 120; 2 Timotju 3, 14-4,2; Luqa 18, 1-8

 

Il-Vanġelu – Il-parabbola ta’ l-imħallef u l-armla

      Mbagħad qalilhom parabbola biex jurihom li għandhom dejjem jitolbu bla ma jaqtgħu.  Qalilhom: “Kien hemm f’belt wieħed imħallef, li la kien jibża’ minn Alla u lanqas iħabbel rasu minn ħadd.  F’dik il-belt kien hemm waħda armla, u kienet tmur għandu u tgħidlu, ‘Agħmilli ħaqq kontra l-għadu tiegħi.’  Hu ma riedx, u dam ħafna hekk; iżda mbagħad bejnu u bejn ruħu qal, ‘Mhux għax nibża’ minn Alla jew għax se nħabbel rasi min-nies, imma għallinqas għax din l-armla dejjqitni; ħa nagħmlilha ħaqq, biex ma tibqax ġejja u sejra sa ma tifnini.’ ”  U l-Mulej qal: “Isimgħu ftit x’jgħid  l-imħallef il-ħażin.  Mbagħad Alla, lill-magħżulin tiegħu li jgħajjtulu lejl u nhar, sejjer ma jagħmlilhomx ħaqq? Se joqgħod itawwal magħhom?   Jiena ngħidilkom li malajr jagħmlilhom ħaqq. Imma taħsbu intom li Bin il-bniedem se jsib il-fidi fuq l-art meta jiġi?”

 

Il-Ħsieb

     Kemm se ndum nitlob?  Naħseb li Alla nsieni.  Kemm-il darba smajna din il-frażi jew inkella għidnieha fil-qalb tagħna?  Kemm-il darba ħsibna li t-talb tagħna m’hu qed jiswa għal xejn?  Għaliex illum qed ngħixu f’dinja fejn il-mentalitaÏ hija li kollox trid, jekk jista’ jkun, il-bieraħ qabel illum?  Irridu kollox malajr u b’effiċjenza kbira.  It-talb ma jitlobx effiċjenza, iżda paċenzja.  U hemm proċess ukoll kif wieħed għandu jitlob, mhux biss billi jgħid u jibni kuntatt ma’ Alla meta jiġi dahru mal-ħajt kif rajna l-Ħadd li għadda fil-Vanġelu ta’ l-għaxar imġiddmin.  Hemm bżonn li r-relazzjoni intima ta’ djalogu ma’ Alla l-Ħallieq tinbena kuljum billi noffrulu l-azzjonijiet tagħna kollha, anki dawk imtappna jew mgħaffġa minħabba l-ebusija tal-ħajja.  Iżda Ġesù llum irid ukoll jipprovoka l-fidi u l-għajxien ta’ l-istess fidi tagħna.  Id-domanda li għandna fl-aħħar vers tal-Vanġelu tal-lum hija provokazzjoni kbira:  “meta jiġi Bin l-bniedem se jsib il-fidi fuq l-art?  Fija u fik x’se jsib il-Mulej?  Qed nibnu l-fidi tagħna pass wara pass minkejja, nerġa’ ntenni, id-djugħfija tagħna?

     Il-Kelma

L-Ewwel Qari tal-lum huwa meħud mill-Ktieb ta’ l-Eżodu fejn jitkellem dwar l-ewwel rebħa tal-poplu Lhudi wara l-ħelsien tiegħu mill-Eġittu fi triqtu lejn is-Sinaj, fejn naraw li Alla jieħu  ħsieb kontinwament tal-poplu tiegħu kemm fl-ikel kif ukoll fil-ħarsien u l-kenn mill-għadu.  Fis-Salm Responsorjali nindunaw li l-għajnuna vera tasal biss mingħand il-Mulej.  Huwa l-Mulej li jħarisna u huwa d-dell tagħna.  Fit-Tieni Qari, mit-Tieni Ittra ta’ San Pawl lil Timotju, insibu li n-nisrani tad-dinja jiltaqa’ ma diversi fehmiet li m’humiex dawk li għandhom x’jaqsmu mal-fidi tagħna.  Għalhekk jeħtieġ li nżommu sħiħ kontinwament fil-Kelma tal-Mulej.  Hemm bżonn li nxandru l-Kelma tal-Mulej u naraw li ħaddieħor qed jimxi fuq id-direzzjoni tagħna.  Fil-Vanġelu ta’ San Luqa nsibu lill-Mulej jgħidilna li għandna nitolbu mingħajr ma nintelqu.  Dan ifisser li s-Saltna tal-Mulej tikber bil-mod il-mod.  Nifhmu wikoll li l-bidla tagħna, il-konverżjoni tagħna, issir bil-mod u mhux f’daqqa.

     Il-Ħajja

1.  Il-messaġġ prinċipali li Ġesù jagħtina llum huwa biex naraw kif qed nimxu fil-proċess ta’ konverżjoni kontinwa lejn il-Mulej.

2.  Dan nistgħu nagħmluh biss f’għaqda intima ma’ Alla.  Kif?  Bit-talb.

3.  Hemm bżonn li lkoll kemm aħna nagħrfu li rridu nifhmu l-Kelma ta’ Alla, naċċettawha u ngħixuha ħalli nwasslu l-eżempju lil Ħaddieħor.

4.  Il-Mulej huwa l-kenn tagħna, kif tennejna fis-Salm Responsorjali. Qatt m’hu se jħallina waħedna.

5.  Hemm bżonn ta’ mument ta’ talb fl-24 siegħa li l-Mulej jagħtina kuljum.

     Id-Djalogu

Mulej,

għinni nagħraf aħjar

nitkellem miegħek,

sabiex tkabbar fija l-fidi.

It-28 Ħadd Matul is-Sena

FOR GRANTED!

2  Slaten 5,14-17;  Salm 97; 2 Timotju 2, 8-13; Luqa 17, 11-19

Qari mill-Evanġelju ta’ San Luqa

Ġara li huwa u sejjer lejn Ġerusalemm, Ġesù għadda minn bejn is-Samarija u l-Galilija.

Kif kien dieħel f’raħal, iltaqgħu miegħu għaxart irġiel morda bil-lebbra. Waqfu ’l bogħod minnu, għollew leħinhom u qalulu: «Ġesù, mgħallem, ikollok ħniena minna!» Kif rahom, qalilhom: «Morru uru rwieħkom lill-qassisin.» U ġara li, huma u sejrin, fiequ mill-marda tagħhom.

Wieħed minnhom, kif ra ruħu mfejjaq, raġa’ lura jgħajjat u jfaħħar lil Alla, inxteħet wiċċu fl-art f’riġlejn Ġesù u raddlu ħajr. Issa dan kien Samaritan. U Ġesù qabad u qal: «Mhux l-għaxra fiequ mil-lebbra? Fejn huma d-disgħa l-oħra? Ma kien hemm ħadd minnhom li raġa’ lura biex jagħti glorja lil Alla ħlief dan il-barrani?» Imbagħad qallu: «Qum, mur; il-fidi tiegħek salvatek.»

Il-Ħsieb

Meta Ġesù kien għaddej minn ħdejn is-Samarija u l-Galilija resqu lejh l-imġiddmin li talbuh il-fejqan.  ĠesuÏjfejjaqhom iżda wieħed biss mar lura jirringrazzjah.  Xi ħadd jgħid “imma Ġesù għandu bżonn il-grazzi tagħna?”  Għandu bżonn grazzi umana?  Iva, hemm bżonn li aħna ngħidu GRAZZI lill-Mulej għal dak kollu li jagħmel magħna.  Hemm bżonn li ma neħduhx for granted.  Hemm bżonn li ma nersqux lejh meta jkollna bżonn u wara ninsewh immedjatament.  Dan huwa l-messaġġ li joħroġ mil-liturġija tal-lum.  Il-Mulej iridna nħobbuh kif iħobbna huwa, mhux biss meta jkun kollox ħażin iżda anki meta nfiqu.  Huwa għalhekk importanti li fil-ħajja tagħna, wara li nersqu lejh fis-sagrament tal-qrar, nersqu lejh nirringrazzjawh fl-Ewkaristija Mqaddsa.

Huwa neċessarju li nagħrfu li l-uniku fejqan tal-ħajja tagħna jista’ jinkiseb biss minn Kristu.  Iżda huwa ferm importanti li lil Kristu ma neħduhx for granted u nersqu lejh biss meta niġu daharna mal-ħajt.  Hemm bżonn li ma’ Kristu jkollna rapport ta’ affettività u ta’ mħabba miegħu u lejh.  Hemm bżonn li nagħrfu wkoll li l-fejqan tagħna jkun tassew komplet meta nirritornaw biex ngħidu grazzi lil dak Kristu li huwa l-fejqan tagħna kuljum, forsi anki meta aħna ma nħobbuhx.

Il-Kelma

Fl-Ewwel Qari, meħud mit-Tieni Ktieb tas-Slaten, għandna l-fejqan ta’ Nagħman, il-Ġeneral Sirjan li kien marid bil-ġdiem.  Fieq għax emmen li l-fejqan jiġi biss billi tobdi r-rieda ta’ Alla.  Il-fejqan ta’ Alla huwa fejjiedi.  Fis-Salm Responsorjali, meħud minn Salm 97, insibu li bil-magħmudija aħna bdejna t-triq tas-salvazzjoni ta’ dejjem.  Hemm bżonn li nagħrfu li din is-salvazzjoni rridu naħdmu għaliha meta nisimgħu mill-Kelma ta’ Alla u nwettqu r-rieda tiegħu fina.  Fit-Tieni Qari, meħud mit-Tieni Ittra ta’ San Pawl Appostlu lil Timotju, insibu li l-ħajja tan-nisrani hija iebsa u tista’ wkoll twassal għall-jasar tal-persekuzzjoni, iżda ħadd ma għandu jaqta’ qalbu.  Fuq l-eżempju ta’ San Pawl, aħna għandna nisiltu mill-qawmien ta’ Ġesù dik it-tama li permezz tagħha nkomplu naqdu d-dmirijiet tagħna.  Fil-Vanġelu ta’ San Luqa għandna l-fejqan minn Ġesù ta’ l-għaxar imġiddmin.  Wieħed biss idur lura biex jgħidlu grazzi.

Il-Ħajja

1.  Għaraft li inti mġiddem?  X’se tkun ir-reazzjoni tiegħek?  Trid titnaddaf?

2.  Kif qed tagħraf fejn tassew tista’ tikseb il-fejqan u t-tindif mill-ħajja tiegħek?

3.  Kemm tassew qed twettaq fil-ħajja tiegħek dak kollu li jordnalek il-Mulej?  Kemm qed tgħidlu grazzi?

4.  Li tgħix ta’ nisrani mhux faċli u se tkun ippersegwitat.  Kemm tassew inti lest li tbati għal ĠesuÏquddiem sħabek u niesek?

5.  Ġesù ġibed fuqu l-mard tagħna.  Lest tiftaħ qalbek beraħ miegħu u għalih?

Id-Djalogu

Jekk tal-ħtijiet inti tagħti każ, Mulej,

min jista’ jżomm sħiħ?

Għinni, Mulej, nagħraf il-ħażen tiegħi,

u nersaq lejk għall-fejqan.

Is-27 Ħadd Matul is-Sena 

KATTAR FINA L-FIDI!

Ħabakkuk 1,2-3:2,2-4; Salm 94; 2 Tim 1,6-8,13-14; Luqa 17, 5-10

Qari mill-Evanġelju skont San Luqa:

F’dak iż-żmien, l-appostli qalu lill-Mulej: “Kattar fina l-fidi!” Weġibhom il-Mulej: “Kieku kellkom fidi mqar daqs żerriegħa tal-mustarda, kontu tgħidu lil din is-siġra tat-tut: “Inqala’ u mur tħawwel fil-baħar,” u hi kienet tisma’ minnkom.

Wieħed minnkom ikollu qaddej qiegħed jaħrat jew jirgħa; meta jidħol mill-għalqa x’se jgħidlu: “Ejja, isa, u oqgħod għall-ikel”? jew: “Lestili x’niekol, ilbes il-fardal u newwilli sa ma niekol u nixrob jien, u mbagħad tiekol u tixrob int”? Jaqaw se jroddlu ħajr lill-qaddej talli jkun għamel li ordnalu?

Hekk ukoll intom, meta tagħmlu kulma tkunu ordnati, għidu: “Aħna qaddejja li ma niswew għal xejn; għamilna biss dak li kellna nagħmlu.”

 

Il-Ħsieb

Issib ħafna llum li jtennu li jgħaddu minn mumenti li mhux biss jeħduha kontra Alla iżda xi kultant m jħossuhomx li għadhom jemmnu fih.  Itennu li jgħaddu minn mumenti ta’ dlamijiet u jistqarru li għalihom ma hemmx aktar is-salvazzjoni.  U meta jagħmlu hekk tassew jintelqu mal-kurrent.  Iżda min ma jgħaddix minn kriżi ta’ fidi?  Nafu b’xi ħadd fost l-akbar qaddisin li ma kellux il-mumenti iebsa tal-fidi tiegħu?  Huwa għalhekk li filwaqt li l-Appostli jtennu u jistaqsu lill-Mulej biex “ikattar fihom il-fidi”, il-Mulej jirrispondi li hemm bżonn li nemmnu aktar, li jkollna aktar fidu`ja f’dak kollu li Alla jagħmel magħna.

Illum ta’ min nistaqsu lilna nfusna jekk aħniex kuntenti bil-fidi tagħna.  Ma’ xiex qed norbtu l-fidi tagħna u kif qed nippruvaw inkabbru din l-istess fidi?  Fil-Ħdud li għaddew il-Mulej itenni li lkoll kemm aħna rridu ninżgħu mis-suppervja u l-egoiżmu, u biex inkunu appostli ta’ Kristu rridu nġorru kuljum is-salib tagħna li wara kollox ikun qed jgħinna nġorruh Hu stess.

Il-messaġġ li joħroġ mill-Kelma tal-Mulej li tinqara llum huwa wieħed qawwi li jagħmlilna kuraġġ sabiex nimxu aktar wara l-Mulej biex tikber fina l-fidi.

Il-Kelma

L-Ewwel Qari tal-lum huwa meħud mill-Ktieb tal-Profeta Ħabakkuk fejn insibu li l-profeta kien qed igerger ma’ Alla għall-inġustizzji li kienu qed isiru lill-poplu.  Alla jtenni li se jibgħat lill-Kaldin bħala kastig, iżda dawk li kellhom fidi kbira kienu se jsalvaw.  Is-Salm Responsorjali minn Salm 94 huwa stedina biex nisimgħu l-leħen tal-Mulej u ma nwebbsux qalbna.  Huwa stedina biex infaħħru bil-hena lill-Mulej, biex ngħajtu bil-ferħ lill-blata tas-salvazzjoni tagħna.  Fit- Tieni Qari, meħud mit-Tieni Ittra ta’ San Pawl lil Timotju, insibu d-diffikultaÏ kbira li tkun xhud ta’ Kristu għat-tħabbir tal-Vanġelu.  Minkejja tant diffikultajiet hemm bżonn li nkomplu nkunu qrib tal-Mulej.  Fil-Vanġelu tal-lum, meħud minn San Luqa, għandna lill-Appostli jistaqsu lil Ġesù biex ikattar fihom il-fidi.  Il-Mulej iwieġeb li hemm bżonn li jkollhom il-fidi u jqisu dejjem lilhom infushom bħala qaddejja li jagħmlu biss dak li kellhom jagħmlu.

Il-Ħajja

1.  Hemm bżonn li aħna wkoll nitolbu lill-Mulej ikattar fina l-fidi.

2.  Irridu iżda nagħmlu ftit eżami tal-kuxjenza.  Kif jista’ jkattar fina l-fidi?  Qegħdin inħallu l-grazzja taħdem fina?

3.  Kemm tassew qed nisimgħu u ngħixu l-Kelma tal-Mulej li tagħti l-ħajja?

4.  Il-fidi titkattar fina meta nkunu mal-Mulej u tal-Mulej, meta nwettqu r-rieda tiegħu.

5.  Lill-Mulej nitolbuh jiftħilna għajnejna u qalbna għad-don tal-grazzja li għandu għalina.

Id-Djalogu

Mulej, nitolbok

li minkejja d-diffikultajiet kollha

tkattar fija l-fidi biex inkun eżempju ħaj

tal-miġja tiegħek fid-dinja.