Il-5 Ħadd tar-Randan

MIN MA GĦANDUX DNUB?

Isaija 43:16-21; Salm 125; Filippin 3: 8-14; Ġwanni 8: 1-11

Il-Vanġelu

     Ġesù telaq lejn l-Għolja taż-Żebbuġ. Imma l-għada qabel is-sebħ raġa’ mar fit-tempju, u l-poplu kollu ġie ħdejh, u hu qagħad bilqiegħda jgħallimhom. Mbagħad il-kittieba u l-Fariżej ħadulu quddiemu waħda mara li kienet inqabdet fl-adulterju. Huma qegħduha fin-nofs u qalulu: “Mgħallem, din il-mara nqabdet fil-fatt fl-adulterju. Issa fil-Liġi tagħna Mosè ordnalna biex nisa bħal dawn inħaġġruhom. Int, imma, xi tgħid?” Dan qaluhulu biex iġarrbuh, ħalli jkollhom fuqiex jixluh. Imma Ġesù tbaxxa lejn l-art u beda jikteb b’sebgħu fit-trab. Billi dawk baqgħu jistaqsuh, qam dritt u qalilhom: “Min fostkom hu bla dnub jitfgħalha hu l-ewwel ġebla.” U raġa’ tbaxxa jikteb fit-trab. Kif semgħuh jgħid dan, qabdu u telqu wieħed wara l-ieħor, ibda mix-xjuħ, u Ġesù baqa’ waħdu mal-mara, wieqfa fin-nofs.  Qam dritt u qalilha: “Dawk fejnhom, mara? Ħadd minnhom ma kkundannak?” “Ħadd, Sinjur,” qaltlu.”Mela anqas jien ma nikkundannak,” qalilha Ġesù. “Mur, u mil-llum ‘il quddiem tidnibx iżjed.”

Il-Ħsieb

     Kemm-il darba niġġudikaw bl-addoċċ, fil-ħajja tagħna, persuni li mhux dejjem narawhom minn għajnejn tajba?    Kemm-il darba niġġudikaw persuni sempliċement għax ma jaqblux mal-fehma tagħna jew għax naħsbu li se jieħdu l-post tagħna?  Kemm niżirgħu ġudizzji foloz għal xejn b’xejn?  Kemm-il darba dawwarna subgħajna biex nakkużaw dawn in-nies?  Il-Vanġelu tal-lum jurina li l-Bxara t-Tajba li ġab Kristu ġabha biex tibdel il-persuni u tnaddafhom, speċjalment dawk li għandhom bżonn l-għajnuna u l-fejqan.  Kif itenni Ġesù stess, ix-xogħol tiegħu mhux li jikkundanna iżda li jfejjaq.  Il-każ tal-mara adultera huwa ċar għaliex quddiem persuna li nqabdet fil-fatt tiżbalja, Ġesù jħares l-ewwel u qabel kollox lejn is-salvazzjoni u l-fejqan tagħha.  Huwa jagħraf li naqset, jaħfer in-nuqqas tagħha u jagħtiha l-biċċa xogħol iebsa biex ma tidnibx iżjed.

     Kemm tassew, bħala Nsara, f’dawn l-aħħar jiem tar-Randan nagħrfu naċċettaw dan il-messaġġ qawwi ta’ Ġesu u ngħixuh fil-ħajja tagħna?

Il-Kelma

     L-Ewwel Qari meħud mill-Ktieb ta’ Isaija nkiteb mill-profeta li jinsab eżiljat f’Babel fi żmien is-sultan ~iru.  Il-profeta jrid iqawwi t-tama ta’ ħutu li jinsabu fil-jasar billi jħabbrilhom li Alla kien se jagħtihom ħajja ġdida.  Is-Salm Responsorjali juri li din il-ħajja ġdida hija parti mill-ħwejjeġ kbar li għamel magħna l-Mulej.  Fit-Tieni Qari mill-Ittra lill-Filippin, San Pawl jurina li (i) ma hemm xejn importanti daqs li tagħraf lil Kristu;  (ii) is-salvazzjoni tiġi biss minn Kristu; (iii) nagħtu s-sehem tagħna biex insiru nixbħu aktar lil Ġesù.  Fil-Vanġelu tal-lum, meħud minn San Ġwann, naraw lil Ġesù jpoġġi fil-prattika dak li kien qal fil-Vanġelu ta’ San Mattew (12.7) fejn itenni li ħniena jrid u mhux sagrifiċċju u dak li qal f’San Luqa 5,32:  Jiena mhux lill-ġusti ġejt insejjaħ iżda lill-midinbin.  Ġesù jaħfer lill-adultera u jgħidilha biex ma tidnibx iżjed.

Il-Ħajja

1. Il-Mulej huwa l-fejqan tagħna. Kif qed naċċettaw dan il-fejqan fil-ħajja tagħna u f’ta’ l-oħrajn?

2. Il-Mulej huwa s-salv azzjoni tagħna għax għamel magħna ħwejjeġ kbar.  Kemm qed nitlob li din is-salvazzjoni tasal għand ħaddieħor?

3. Il-Mulej idawwalna biex inwasslu l-Bxara t-Tajba. Għajb għan-nisrani li jipponta sebgħu biex jiġġudika lil ħaddieħor minflok jgħinu.

4. Bħal San Pawl nistgħu ngħidu li qed ngħoddu kollox bħala telf quddiem il-qligħ kbir li hemm filli nagħraf lil Alla?

5. Kemm qed insibu ħin li nagħmlu kuljum l-eżami tal-kuxjenza tagħna?

 

 

Id-Djalogu

  Mulej, aħfirli l-ħtijiet tiegħi,

  għinni nitlob għall-fejqan spiritwali tiegħi u tal-proxxmu,

  tħallini qatt naqa’ li niġġudika lil dawk ta’ ħdejja,

  għallimni iżda nitlob għall-fejqan tagħhom.

 Ir-4 Ħadd tar-Randan

L-AKKUŻA:  NIES MIDINBA JILQA’ GĦANDU!

Ġożwe 5:9a, 10-12; Salm 33; 2 Korintin 5:17-21; Luqa 15: 1-3, 11-32

Il-Vanġelu

     F’dak iż-żmien, il-pubblikani u l-midinbin kienu jersqu bi ħġarhom lejn Ġesù biex jisimgħuh. U kemm il-Fariżej u kemm il-kittieba kienu jgemgmu u jgħidu: “Nies midinba jilqa’ għandu dan u jiekol magħhom!” U Ġesù qabad u qalilhom din il-parabbola: “Kien hemm raġel li kellu Żewġ ulied. Iż-żgħir qal lil missieru: “Missier, agħtini s-sehem li jmiss lili mill-ġid.” U dak qassmilhom il-ġid. Ma kinux għaddew wisq ġranet, meta ż-żgħir sarr kollox u telaq minn beltu lejn pajjiż imbiegħed, u hemmhekk berbaq ġidu kollu f’ħajja mtajra. Meta ħela kulma kellu, fuq dak il-pajjiż waqa’ ġuħ kbir, u beda jħoss ruħu fil-bżonn. U mar daħal ma’ wieħed minn dak il-pajjiż, li bagħtu fir-raba’ tiegħu jirgħa l-ħnieżer. Kien jixtieq kieku jimla żaqqu mqar bil-ħarrub li kienu jieklu l-ħnieżer, imma ħadd ma kien jagħtih. Imbagħad daħal fih innifsu u qal: “Kemm lavranti ma’ missieri għandhom ħobż bix-xaba’, u jien qiegħed hawn immut bil-ġuħ! Ħa nqum u mmur għand missieri, u ngħidlu: Missier, dnibt kontra s-sema u kontra tiegħek; ma jistħoqqlix iżjed nissejjaħ ibnek; Żommni b’wieħed mil-lavranti tiegħek.” Qam, u telaq għal għand missieru.

     Iżda kif kien għadu fil-bogħod missieru lemħu u tħassru, u b’ġirja waħda mar inxteħet fuq għonqu u biesu. It-tifel qallu: “Missier, dnibt kontra s-sema u kontra tiegħek; ma jistħoqqlix iżjed nissejjaħ ibnek.” Iżda l-missier qal lill-qaddejja tiegħu: “Isaw! Ġibulu l-isbaħ libsa u xidduhielu, libbsulu ċ-ċurkett f’sebgħu u s-sandli f’riġlejh! Ġibu l-għoġol l-imsemmen u oqtluh, ħa nieklu u nagħmlu festa, għax dan ibni kien mejjet u raġa’ qam, kien mitluf u nstab!” U għamlu festa.

     Mela ibnu l-kbir kien fl-għalqa. Huwa u rieġa’ lura, kif wasal qrib id-dar sama’ daqq u żfin. Sejjaħ wieħed mill-qaddejja u staqsieh dak x’kien. Dak qallu: “Hawn ħuk u missierek qatillu l-għoġol l-imsemmen, għax raġa’ kisbu qawwi u sħiħ.” Hu inkorla, u ma riedx jidħol ġewwa, iżda missieru ħareġ jitolbu jidħol. Iżda hu qal lil missieru: “Ara, ili dawn is-snin kollha naqdik, kelmtek ma ksirthielek qatt, u kieku qatt tajtni gidi lili biex nagħmel ikla u nifraħ ma’ ħbiebi! Imbagħad jiġi dan ibnek, li belagħlek ġidek man-nisa żienja, u lilu toqtollu l-għoġol l-imsemmen.” Qallu missieru: “Ibni, inti dejjem miegħi, u kulma hu tiegħi huwa tiegħek. Imma kien meħtieġ li nagħmlu festa u nifirħu, għax dan ħuk kien mejjet u raġa’ qam, kien mitluf u nstab!”

Il-Ħsieb

     L-istorja ta’ l-Iben il-Ħali ilna nafuha u nisimgħuha minn meta konna żgħar.  L-Iben il-Ħali, wara li tilef kollox u berbaq ġidu kollu, mar lura jitkarrab għand missieru li laqgħu u ħaddnu miegħu.  Ħafna drabi aħna ngħixu din l-istorja bil-maqlub.  Ngħixuha mil-lenti ta’ l-iben il-kbir li ħa għalih għax il-missier ħafer lil ħuh u laqgħu lura.  Nieħdu għalina għax imdorrijin f’xalata ta’ ġudizzji fuq għajrna.  Ix-xogħol tagħna huwa li nippuntaw subgħajna kull ħin u kontinwament lejn in-nuqqasijiet ta’ ħaddieħor u ftit nagħtu kas, mhux biss tan-nuqqasijiet tagħna, iżda li aħna rridu nagħdru u naħfru lil dawk li jonqsuna.  L-akkuża prinċipali li għamlulu n-nies lil Ġesù kienet waħda: nies midinba qed jilqa’ għandu!

     Ġesù ma jiddejjaqx li jkun mal-prostituti u n-nisa tat-triq; ma jiddejjaqx u ma jagħtix każ tal-fama tiegħu.  Ġie biex jaħdem, inaddaf u jsalva.  Ma tax każ tal-ġudizzji ħżiena li għamlu fuqu, għax wara kollox it-tajjeb tiegħu ma ġiex apprezzat u kalkulat u xorta spiċċa msallab ma’ għuda tas-salib.  Il-poplu mhux talli ma apprezzax, talli minn ftit jiem wara l-HOSANNA  nbidlet f’SALLBU.

     Għal dawk li jippruvaw jgħixu ta’ nsara dan għandu jkun eżempju ċar ta’ kif in-nies iħarsu lejn in-nisrani.  Ħafna drabi jkollu jgħum f’baħar qawwi kontra l-kurrent biex ikompli jwettaq l-ideali tiegħu.  Iżda l-ideal tan-nisrani jibqa’ li jilqa’ lill-Iben il-Ħali u jħaddnu  miegħu.  Din hija l-ħidma kontinwa ta’ salvazzjoni li kisbilna Kristu.

Il-Kelma

     Fl-Ewwel Qari tal-lum, mill-Ktieb ta’ ĠożweÏ, insibu li wara erbgħin sena fid-deżert il-poplu Lhudi daħal fl-Art Imwiegħda u ċċelebra l-festa ta’ l-Għid li kienet tfisser il-ħelsien sħiħ tal-poplu Lhudi.  Dan il-ħelsien veru jista’ jidher fis-Salm 33 meta flimkien intennu:  “Duqu u taraw kemm hu tajjeb il-Mulej”.  Fit-Tieni Qari tal-lum, meħud mit-Tieni Ittra ta’ San Pawl lill-Korintin, San Pawl ifisser x’ġabet ġdid il-fidwa li kiseb għalina Kristu li kienet it-tiġdid tal-ħbiberija bejn Alla u l–bniedem.  Fil-Vanġelu tal-lum, meħud minn San Luqa, insibu r-rakkont ta’ l-Iben il-Ħali.  Iżda dan ir-rakkont jiftaħ billi l-evanġelista jgħidilna li l-Fariżej kienu qed igemgmu kontra Ġesù u jtennu li qed jiekol mal-midinbin.

Il-Ħajja

1. Ġesù ġie biex jilqa’ u jfejjaq il-midneb. Kemm tassew qed nersqu lejh aħna l-midinbin, minkejja dak kollu li nkunu għamilna?
2. Il-Liturġija tal-lum fiha messaġġ qawwi ta’ tama u kuraġġ. Minkejja li nabbużaw mill-ħniena tiegħu, Alla jgħaqqadna miegħu meta jara l-indiema sinċiera tagħna.
3. Il-Mulej ma jridniex nagħmlu bħall-iben il-kbir u niskandalizzaw irwieħna bil-ħniena li wera l-Missier. Iridna nkunu tiegħu u miegħu biex ingawdu l-frott tas-salvazzjoni li kisbilna.
4. Nitgħallmu mill-Vanġelu tal-lum ma niġġudikawx iżda naħfru kontinwament u nitolbu bla waqfien għas-salvazzjoni ta’ l-Erwieħ.

Id-Djalogu

  Mulej, inti li ħaddant miegħek

  l-iben il-ħali,

  għinna biex nersqu lejk fis-Sagrament tar-Rikonċiljazzjoni,

  biex nibdew mill-ġdid ħbiberija ġdida miegħek.

L-3 Ħadd tar-Randan

QEGĦDIN  NABBUŻAW MILL-ĦNIENA  TA’ ALLA?

Eżodu 3: 1-8a, 13-15; Salm 102; 1 Korintin 10:1-6; 10-12; Luqa 13:1-9

Il-Vanġelu

Dak iż-żmien, ġew xi wħud għand Ġesù u qalulu b’dawk il-Galilin li Pilatu kien ħallat demmhom mad-demm tal-vittmi tas-sagrifiċċji tagħhom.  U Ġesù qabad u qalilhom: “Taħsbu intom li dawn il-Galilin kienu iżjed midinbin mill-Galilin l-oħra biex sofrew dan kollu?  Le, ngħidilkom; imma jekk ma tindmux, ilkoll tintilfu bħalhom.  Jew dawk it-tmintax-il ruħ li fuqhom waqa’ t-torri ta’ Silwam u qatilhom, taħsbu intom li kienu iżjed ħatja min-nies l-oħra ta’ Ġerusalemm ?  Le, ngħidilkom; imma jekk ma tindmux, ilkoll tintilfu xorta waħda.”

U qalilhom din il-parabbola: “Wieħed kellu siġra tat-tin imħawwla fl-għalqa. Mar ifittex il-frott fiha, u ma sabx.  Għalhekk qal lil dak li kien jaħdimlu l-għalqa, ‘Ara, ili tliet snin niġi nfittex il-frott f’din is-siġra tat-tin, u qatt ma sibtilha. Mela aqlagħha, għax għalfejn se tibqa’ tkidd l-art?  Iżda dak wieġbu, ‘Inti ħalliha, sinjur, għal din is-sena, sa ma nagħżqilha madwarha u nagħtiha d-demel.  Id-dieħla għandha mnejn tagħmel il-frott; jekk le, aqlagħha.’ “

 

Il-Ħsieb

Il-ġrajjiet li jiġru madwarna kemm-il darba jimpressjonawna, speċjalment meta jkun hemm xi diżgrazzja jew xi mewta ta’ xi ħadd żgħir.  Kulħadd jistaqsi u jrid ikun jaf ir-raġuni tal-mewt.  Xi kultant insiru anki mħallfin fuq il-ħajja tal-mejjet billi nagħtu l-ġudizzju glorjuż jew ta’ tkasbir skond il-mod kif inħarsu lejh.

Fi żmien Ġesù wkoll ġraw żewġ traġedji kbar u l-poplu tkellem dwarhom:  il-fatt li Pilatu qatel xi Galilej waqt l-offerta tas-sagrifiċċju u l-fatt ta’ meta waqa’ t-torri ta’ Silwah f’Ġerusalemm.  Fiż-żewġ każijiet mietu n-nies.  Ġesù jtenni li dawn ma mitux għax midinbin.  Kull midneb huwa ħati sakemm ma jindimx mill-ħtija tiegħu.  Il-Mulej irid ineħħi minni kull sens ta’ ġudizzju li ngħaddu fuq in-nies, iżda fl-istess ħin irid jiftħilna għajnejna beraħ biex ngħaddu ġudizzju u kritika fuq l-għemil tagħna.

IL-Kelma

Fl-Ewwel Qari tal-lum, meħud mill-Ktieb ta’ l-Esodu, insibu s-sejħa li Alla għamel lil MoseÏ.  Il-mod kif Alla jsejjaħ lil MoseÏ huwa mod meraviljuż kif il-Mulej ma jħarisx lejn l-uċuħ iżda lejn id-disponibbiltà, minkejja li lkoll inġibulu xi skuża.  Is-Salm 102 li ntennu fis-Salm Responsorjali huwa għanja ta’ radd il-ħajr għax ħanin u ta’ qalb tajba l-Mulej.

Fit-Tieni Qari mill-Ewwel Ittra ta’ San Pawl Appostlu lill-Korintin, jurihom li għalkemm ħafna salvaw mill-jasar ta’ l-Eġittu, ftit baqgħu fidili lejn Alla.  San Pawl itenni li r-rigal tal-fidi rridu nilqgħuh u ngħixuh.  Fil-Vanġelu ta’ San Luqa għandna r-rakkont taż-żewġ diżgrazzji li fi żmien Ġesù qajmu ħafna għagħa.  Ġesù nnifsu jurihom li kull min għadu ħaj jeħtieġ li juża tajjeb iż-żmien tiegħu.

Il-Ħajja

1. Irridu ngħixu l-fidi tagħna b’mod sħiħ u b’fiduċja kbira f’Alla.  Il-ġrajjiet kurrenti tad-dinja jgħaddu, imma Alla ma jgħaddix, ma jispiċċax.  Huwa għalhekk importanti li nżommu qalbna magħquda mal-Mulej.
2. Hemm bżonn nagħrfu l-ħniena kbira ta’ Alla għal kull wieħed u waħda minna.
3. Hemm bżonn nagħrfu ma nabbużawx minn din il-ħniena ta’ Alla għalina.  Fir-Randan, permezz tat-talb u tas-sawm, irridu nersqu aktar lejn Ġesù kif aħna, iżda b’indiema  vera u mhux b’ipokresija.
4. Alla huwa ħanin u mhux Alla tal-vendikazzjonijiet. Jeħtieġ li din il-ħniena kbira t’Alla mhux biss nindunaw biha iżda   ngħadduha lill-oħrajn.
5. Fir-Randan, biex ikun Randan veru, irid ikun hemm mumenti ta’ deċiżjonijiet radikali u bidliet veri.  Ix-xogħol f’idejna.

 

 

 

Id-Djalogu

Mulej, inti li tant tħobbna,

tant tafda fina,

għinna biex tassew matul dan ir-Randan,

ngħixu l-imħabba tiegħek

sabiex ninbidlu aħna u ngħinu lil oħrajn jinbidlu,

biex nagħrfu kull ħin ir-rieda tiegħek.

It-2 Ħadd tar-Randan

DEHRA – GARANZIJA

Ġenesi 15:5-12,17-18; Salm 26; Filippin 3, 17-4,1; Luqa 9, 28b-36

 

Il-Vanġelu

     F’dak iż-żmien, Ġesù ħa miegħu lil Pietru, lil Ġwanni u lil Ġakbu, u tala’ fuq il-muntanja biex jitlob. U ġara li huwa u jitlob, id-dehra ta’ wiċċu tbiddlet u l-ilbiesi tiegħu saru ta’ bjuda li tgħammex. U kien hemm żewġt irġiel jitħaddtu miegħu, Mosè u Elija, li dehru fil-glorja, jitħaddtu fuq it-tmiem ta’ ħajtu li kellu jseħħ f’Ġerusalemm.

     Pietru u sħabu kienu mejtin bin-ngħas, imma baqgħu mqajmin sewwa, u raw il-glorja tiegħu u ż-żewġt irġiel li kienu miegħu.

     Xħin dawn it-tnejn kienu se jinfirdu minnu, Pietru qal lil Ġesù: “Mgħallem, kemm hu sew li aħna hawn! Ħa ntellgħu tliet tined, waħda għalik, waħda għal Mosè, u waħda għal Elija.” Ma kienx jaf x’inhu jgħid.

     Waqt li kien qiegħed jgħid dan, ġiet sħaba u għattiethom u huma beżgħu kif daħlu fis-sħaba. U minn ġos-sħaba nstama’ leħen jgħid: “Dan hu Ibni l-maħtur, lilu isimgħu!”

     Malli nstama’ l-leħen Ġesù sab ruħu waħdu. Huma żammew is-skiet, u għal dawk il-jiem ma qalu xejn lil ħadd minn dak li kienu raw.

Il-Ħsieb

     Fil-mixja tagħna ta’ kuljum ikun hemm mumenti ta’ qtigħ il-qalb, mumenti li fihom ngħaddu minn passaġġi mdallma.  F’dawn il-mumenti ħafna jitilfu l-fidi tagħhom.  Jaħsbu li Alla nsiehom.  Illum il-Mulej, proprju fil-mixja tiegħu lejn il-passjoni, fuq il-muntanja Tabor jitbiddel f’dik li aħna nsejħulha t-Trasfigurazzjoni, il-mument ta’ bidla li jfisser għalina lkoll garanzija.  Garanzija li, wara din il-ħajja, il-premju tagħna huwa li mmorru ma’ dan “L-Iben il-Maħtur”.  Din id-dehra tal-lum, fil-mixja tagħna matul dawn l-erbgħin jum tar-Randan, tfisser għalina lkoll li aħna rridu nimxu wara Ġesù li huwa d-dawl ta’ ħajjitna u nemmnu bil-fidi li l-Mulej se jibdel f’ferħ in-niket tagħna.  Huwa għal dan il-għan li l-Mulej Ġesù jkun spalla ma’ spalla magħna fil-mixja tagħna fuq din l-art.  Hi mixja li mhux dejjem tkun għan-niżla, iżda ħafna drabi għat-telgħa.  Hemm bżonn iżda li nisimgħu mill-vuċi li nstemgħet fit-trasfigurazzjoni:  Nemmnu li Ġesù huwa l-Iben il-Maħtur, u nisimgħu mill-Kelma tiegħu.

Il-Kelma

Fl-Ewwel Qari tal-lum, meħud mill-Ktieb tal-Ġenesi, għandna ċerimonja antika ta’ kuntratt li l-Lhud ħadu mingħand il-Ħittin, poplu b’kultura kbira ta’ l-istess żmien tal-Lhud.  F’din iċ-ċerimonja Alla għamel ma’ Abraham Patt li bih wegħdu nisel kbir daqs il-kwiekeb tas-sema, u li jagħti lil nislu art kbira.  Minkejja li Abraham u martu kienu mdaħħla fiż-żmien huwa emmen dak li qallu Alla.  Is-Salm 26 li ntennu fis-Salm Responsorjali, huwa għajta ta’ ferħ u faraġ li l-Mulej huwa d-dawl u s-salvazzjoni tagħna.  Fit-Tieni Qari tal-lum, fl-Ittra lill-Filippin, San Pawl itenni li għandhom jixbħu lilu, huwa li għamel ħiltu kollha biex jimxi fuq l-eżempju ta’ Kristu.  Għal Kristu u x-xandir ta’ l-Evanġelju huwa jinsab il-ħabs.  Fl-Evanġelju minn San Luqa għandna l-mument tat-Trasfigurazzjoni tal-Mulej.  Pietru saħansitra jinsa lilu nnifsu tant kemm id-dehra kienet kbira.

Il-Ħajja

1. Qatt assistejt għat-trasfigurazzjoni tal-Mulej? Qatt ħassejt il-bidla li jġib fik il-Mulej fl-Ewkaristija?  Qatt  tennejt li tassew inti ħieni bil-preżenza fik tal-Mulej?
2. Kemm tassew ilkoll kemm aħna nagħrfu nirringrazzjaw lill-Mulej għall-ġid kollu li jagħtina kull ħin bid-dawl u s-salvazzjoni li kisbilna?
3. Isimgħu lilu kien il-kliem li ntemm bih id-diskors tal-konferma li nstema’ fit-Trasfigurazzjoni. Kemm tassew qed nisimgħu l-Kelma tal-Mulej u naċċettawha fil-fond ta’ qalbna?
4. “Imma aħna pajżana tas-sema pajjiżna”, itenni San Pawl fit-Tieni Qari tal-lum. Tassew li aħna nħossuna ċittadini  tas-sema?
5. Is-salvazzjoni tagħna għandna nħarsu lejha bħala trasfigurazzjoni – bidla – konverżjoni li hija l-garanzija li ġab Ġesù permezz tal-Predikazzjoni –Passjoni – Mewt u  Qawmien tiegħu.

Id-Djalogu

Mulej, inti d-dawl u s-salvazzjoni tiegħi.

Għinni, Mulej, inwettaq tassew ir-rieda tiegħek fija,

sabiex naċċetta u ngħix il-kelma tiegħek

ħalli matul dawn il-jiem tar-Randan

nagħraf tassew nagħtik qalbi u ħajti.

L-1 Ħadd tar-Randan

DWEJJAQ – TENTAZZJONIJIET – BIDLA

Dewteronomju 26:4-10; Salm 90; Rumani 10:8-13; Luqa 4:1-13

Il-Vanġelu

     Ġesù, mimli bl-Ispirtu s-Santu, raġa’ lura mill-Ġordan u l-Ispirtu ħadu fid-deżert. Hemm għal erbgħin jum Ġesù kien imġarrab mix-Xitan. Matul dawk il-jiem ma kiel xejn; u mbagħad, meta għaddew dawk il-jiem, ħadu l-ġuħ.  U x-Xitan qallu: “Jekk inti Bin Alla, għid lil din il-ġebla ssir ħobż.”  Wieġbu Ġesù: “Hemm miktub li ‘l-bniedem mhux bil-ħobż biss jgħix.’ ” Mbagħad ix-Xitan ħadu fl-għoli u wrieh is-saltniet tad-dinja kollha f’daqqa.  Qallu x-Xitan: “Nagħtik is-setgħa fuq dawn kollha, bil-glorja tagħhom ukoll għax hija ngħatat lili, u jiena nagħtiha lil min irrid.  Jekk tinxteħet quddiemi tagħtini qima, kollha tiegħek tkun.”  Ġesù wieġbu u qallu: “Hemm miktub, ‘Lill-Mulej Alla tiegħek tagħti qima u lilu biss taqdi.’ ”

Mbagħad ix-Xitan ħadu Ġerusalemm, qiegħdu fuq  il-quċċata tat-tempju, u qallu: “Jekk inti Bin Alla, inxteħet minn hawn għal isfel. Għax hemm miktub li ‘Lill-anġli tiegħu jordnalhom biex jieħdu ħsiebek sewwa,’  u li fuq idejhom jerfgħuk, ħalli ma taħbatx riġlek ma’ xi ġebla.’ ”  Wieġeb Ġesù u qallu: “Jingħad, ‘Iġġarrabx lill-Mulej Alla tiegħek.’ ” Mbagħad ix-Xitan meta temm dan it-tiġrib kollu, telaq minn ħdejh sa ma wasal il-waqt.

Il-Ħsieb

     “Kun miegħi Mulej fid-dwejjaq.”  Huwa t-tweġiba li ntennu fis-Salm Responsorjali tal-lum.  Huwa kliem li joħrog fil-beraħ ir-realtà li ħafna drabi ngħaddu minnha.  Iżda dan ma jfissirx li żmien ir-Randan huwa żmien id-dwejjaq…. anzi huwa mument ta’ riflessjoni u konverżjoni, mument li naraw lejn liema sens ta’ direzzjoni miexja l-ħajja tagħna lkoll.

     Kif se ngħixu dan il-mument tar-Randan?  L-ewwelnett billi lkoll kemm aħna nagħrfu u naċċettaw is-sejħa li tagħmlilna l-Knisja għall-konverżjoni b’mod sinċier.  Din is-sejħa tibda tagħmel sens fil-ħajja tagħna billi lkoll kemm aħna nisimgħu bis-serjetà l-Kelma ta’ Alla kif ukoll li nwettqu din l-istess Kelma fil-ħajja tagħna ta’ kuljum.  Huwa żmien li fih nirriflettu kemm tassew inħobbu lil Alla u qed inpoġġuh fl-ewwel post ta’ ħajjitna.

Il-Kelma

     L-ewwel Qari huwa meħud mill-Ktieb tad-Dewteronomju fejn insibu l-istqarrija tal-fidi tal-poplu Lhudi li kienet mibnija fuq il-ġrajjiet ta’ l-għaġeb li l-Mulej Alla kien għamel u baqa’ jagħmel magħhom matul iż-żminijiet.  Il-qalba ta’ dawn il-ġrajjiet kienet il-ħelsien mill-jasar ta’ l-Eġittu.  Fis-Salm Responsorjali, is-Salm 90, għandna talba lill-Mulej biex ikun magħna fil-mumenti iebsa ta’ ħajjitna.  Fit-tieni Qari, meħud mill-Ittra ta’ San Pawl lir-Rumani, San Pawl itenni li s-salvazzjoni tiġi mill-fidi fi Kristu Ġesù permezz tal-mewt u l-qawmien tiegħu.  Fil-Vanġelu tal-lum, meħud minn San Luqa, għandna r-rakkont tat-tentazzjonijiet tax-xitan fil-bidu tal-ħidma tiegħu.

Il-Ħajja

1. Tentazzjonijiet – Dwejjaq – Bidla. Kemm tassew se nċarrtu l-maskra tagħna minn fuq wiċċna u nħarsu f’għajnejn il-Mulej u nwettqu dak li jrid minna?

2. Ix-xitan ittanta lil Ġesù. Ix-xitan jittanta lil kull wieħed u waħda minna.  Kemm qed nieqfu lix-xitan u mhux nidħlu f’kompromessi miegħu?
3. Il-Mulej iridna nċarrtu qlubna u nibdlu l-ħajja tagħna. Kapaċi nużaw dawn l-erbgħin jum tar-Randan biex isseħħ fina din il-bidla?
4. Sawm – Talb – Penitenza. Iżda kollox immirat lejn il-karità li rridu nagħmlu mal-proxxmu tagħna.  Id-dwejjaq minn ġewwa fina jintemm meta niċċaħħdu aħna biex jikber ħaddieħor, biex il-proxxmu tagħna jieħu n-nifs meħtieġ.

Id-Djalogu

  Mulej, bdejna Randan ieħor.

  Agħmel li matul dawn l-erbgħin jum

  nifhem aktar xi trid minn inti,

  sabiex tassew inbiddel ħajti.

It-8 Ħadd Matul is-Sena Ċ

JISTA’ GĦAMA JMEXXI GĦAMA?

Sir 27,4-7;  Salm 91;1 Kor 15, 54-58; Luqa 6,39-45

Il-Vanġelu

Qari mill-Evanġelju skont San Luqa (6:39-45)

F’dak iż-żmien, Ġesù qal lid-dixxipli din il-parabbola: «Jista’ agħma jmexxi agħma ieħor? Mhux it-tnejn jaqgħu fil-ħofra? Id-dixxiplu mhuwiex aqwa mill-imgħallem tiegħu; imma kull min itemm it-taħriġ tiegħu jsir bħall-imgħallem tiegħu.

Għax tara t-tibna f’għajn ħuk, u ma tarax it-travu li għandek f’għajnek int? Kif tista’ tgħidlu lil ħuk: “Ħi, ejja nneħħilek it-tibna li għandek f’għajnek”, meta m’intix tara t-travu li għandek f’għajnek int? Ja wiċċ b’ieħor! Neħħi l-ewwel it-travu minn għajnek int, ħalli mbagħad tara sewwa kif tneħħi t-tibna minn għajn ħuk.

Ma hemmx siġra tajba li tagħmel frott ħażin, kif anqas ma hemm siġra ħażina li tagħmel frott tajjeb. Kull siġra mill-frott tagħha tingħaraf. Ħadd ma jiġbor it-tin mix-xewk, anqas l-għeneb mill-għolliq.

Il-bniedem tajjeb mit-teżor tajjeb ta’ qalbu joħroġ it-tajjeb, u l-bniedem ħażin mit-teżor ħażin tiegħu joħroġ il-ħażin, għax mill-abbundanza tal-qalb jitkellem il-fomm.

Il-Kelma tal-Mulej.

Tifħir lilek Kristu.

 

 

Il-Ħsieb

Forsi fil-ħajja tagħna ġieli ddispjaċiena li tlabna parir mingħand persuni li ma kinux kapaċi jagħtuna risposta, jew li żżattu jtuna risposta u sibna ruħna f’għali akbar?  Kemm-il darba forsi lagħbnieha minflok għexna ta’ qaddisin fil-ħajja tagħna?  Kemm-il darba konna minn ta’ l-ewwel li ġġudikajna lil ħaddieħor minflok ma dawwarna s-subgħa tal-kritika lejna nfusna?  Kif qatt nistgħu nikbru fil-ħajja tagħna jekk aħna dejjem inqisu ruħna bħala perfetti?  Dan l-atteġjament jurina biss li għadna immaturi u jkabbar fina l-egoiżmu u s-suppervja.

L-attaġġjament ta’ suppervja tagħna rridu nibdluh immedjatament.  Dan nistgħu nagħmluh billi nintelqu f’idejn ir-rieda ta’ Alla.  Huwa Alla li jrid u jista’ jfejjaqna mis-suppervja tagħna.  Huwa Alla li jista’ jiżra fina t-trankwilitaÏ li permezz tagħha nagħmlu deċiżjonijiet tajba fil-ħajja.  Huwa Alla li jista’ jagħtina d-dawl li permezz tiegħu nagħmlu deċiżjonijiet tajba fl-istess ħajja tagħna.

 

Il-Kelma

L-ewwel qari tal-lum huwa meħud mill-ktieb ta’ Bin Sirak u jurina li wieħed jingħaraf sewwa x’inhu minn għemilu stess.  Bil-kliem biss ma naslu mkien.  Il-fatti kollox fil-ħajja tagħna.  Is-Salm Responsorjali, minn Salm 91 jurina li biex wieħed jimxi wara Kristu jrid ikun sinċier.  L-imġiba tagħna minn barra trid tkun taqbel ma’ dik ta’ ġewwa.

Fit-Tieni Qari tal-lum huwa meħud mill-Ewwel Ittra ta’ San Pawl lill-Korintin u fiha l-Appostlu juri li għan-nisrani li jemmen fil-qawmien mill-Imwiet, ir-rebħa ġa bdiet, iżda hija rebħa li rridu nipparteċipaw fiha bil-ħidma tagħna.  Fil-Vanġelu ta’ San Luqa għandna lil Ġesù juri li s-sinċerita fit-tagħlim tal-Vanġelu għandha post quddiem nett.  Ġesù jwissi biex id-dixxipli jegħlbu l-ipokresija.

 

Il-Ħajja

1. Taħseb li miexi fit-triq it-tajba?
2. Minn liema għajn qed tixrob?
3. Kemm int ċert mis-salvazzjoni tiegħek?
4. Kapaċi tumilja ruħek, jew is-suppervja tirrenja fil-ħajja tiegħek?
5. Kemm tassew qed tħalli lil Ġesù jneħħi jew it-tibna jew it-travu

minn għajnejk?

 

Id-Djalogu

Mulej, tħallinix inkun supperv bija nnifsi.  Agħmel, Mulej, li kontinwament ninduna bl-iżbalji tiegħi biex nersaq lejk.

Is-7 Ħadd Matul is-Sena

IL-VERA MĦABBA IEBSA:

DIK LEJN L-GĦADU!

1 Samwel 26.2.7-9.12-13.22-23: Salm 102; 1 Korintin 15,45-49; Luqa 6:27-38

Il-Vanġelu

     “Imma lilkom, li qegħdin tisimgħuni, ngħidilkom: “Ħobbu l-għedewwa tagħkom, agħmlu l-ġid lil min jobgħodkom, bierku lil min jisħetkom, itolbu għal min iżeblaħkom. Min jagħtik bil-ħarta fuq naħa waħda, dawwarlu wiċċek ħalli jagħtik fuq in-naħa   l-oħra; min jeħodlok il-mantar, anqas il-libsa ma għandek tiċħadlu. Agħti lil kull min jitolbok; u min jeħodlok xi ħaġa tiegħek, titlobhilux lura. Kif tridu li l-bnedmin jagħmlu lilkom, hekk ukoll agħmlu intom lilhom.  Jekk intom tħobbu lil min iħobbkom, xi ħlas jista’ jkollkom? Għax il-midinbin ukoll iħobbu lil min iħobbhom. U jekk tagħmlu l-ġid lil min jagħmel il-ġid lilkom, xi ħlas jista’ jkollkom? Għax dan jagħmluh saħansitra l-midinbin.  U jekk tisilfu xi ħaġa lil min tistennewh iroddhielkom lura, xi ħlas jista’ jkollkom? Il-midinbin ukoll jisilfu lill-midinbin, bil-ħsieb li jieħdu lura daqshekk ieħor mingħandhom.  Imma intom ħobbu l-għedewwa tagħkom, agħmlu l-ġid, isilfu bla ma tistennew xi ħaġa lura, u l-ħlas tagħkom ikun kbir; u tkunu wlied Alla l-Għoli, li hu tajjeb ma’ l-ingrati u l-ħżiena.  Ħennu, bħalma hu ħanin Missierkom.

“Tiġġudikawx, u ma tkunux iġġudikati; tikkundannawx, u ma tkunux ikkundannati; aħfru, u ssibu l-maħfra; Lq:6:38] agħtu, u jingħatalkom. Kejl tajjeb, marsus, mheżheż sewwa u mburġat iqegħdulkom f’ħoġorkom; għax bl-istess kejl li tkejjlu intom jitkejjel lilkom.

 

Il-Ħsieb

Tiġġudikawx, tikkundannawx!  Din hija t-twissija ta’ Ġesú llum.  Ġesú li issa qed jagħmel diskors personali lil kull wieħed u waħda minna.  Kemm-ildarba fil-ħajja tagħna ta’ kuljum inqattgħu ħin twil nilħqu salib in-nies minflok ngħinu lin-nies jerfgħu s-salib tagħhom.  Min jaf kemm ħlejna ħin nikkundannaw u niġġudikaw, nippreġudikaw l-atteġġjament tagħna lejn il-familjari tagħna, lejn dawk fuq il-post tax-xogħol, lejn sħabna tal-klassi jew fil-komunitajiet tagħna.  Dan kollu minħabba li għadna ma fhimniex li fuq is-salib Kristu ġabar dawn id-difetti tagħna u sammarhom miegħu biex aħna ngħixu biss il-kelma pura tiegħu li tagħti l-ħajja.

“Aħfru u jinħafrilkom!  Agħtu u jingħatalkom!  Diskorsi ta’ Ġesú li permezz taghom irid jgħallimna li dak kollu li nwettqu fil-ħajja tagħna għandu sens biss, meta mmorru kontra l-kurrent u nwettqu t-tagħlim tiegħu fil-prattika fil-ħajja ta’ kuljum.  Mhux dejjem huwa faċli, anzi huwa iebes meta quddiemna nsibu għadu tagħna li minnu nirċievu biss ħars ikraħ jew azzjonijiet ħżiena.  Iżda proprju minn hawn trid titlaq il-konverżjoni tagħna fiż-żmien tal-lum u fi żmien ir-Randan.  Jekk tibqa’ tħobb lil min iħobbok xi ħlas jista’ jkollok?

 

Il-Kelma

Fl-Ewwel Qari mill-Ewwel Ktieb ta’ Samwel għandna ġrajja mill-ħajja ta’ David fejn joħroġ il-messaġġ li l-imħabba lejn l-għedewwa titnissel mill-maħfra.  David ma joqtolx lil Sawl u jaħfirlu minkejja li seta’ kiseb il-vendetta fuqu.  Fis-Salm Responsorjali għandna t-talb u radd ta’ ħajr fl-istess ħin għaliex ħanin u ta’ qalb tajba l-Mulej.  Kulħadd illum irid jara kemm tassew il-Mulej qed juri ħniena u tjubija magħna fil-ħajja tagħna ta’ kuljum.  Fit-Tieni Qari, mill-ewwel ittra ta’ San Pawl lill-Korintin,  San Pawl qed iwieġeb għall-mistoqsija ta’ kif se jkun il-ġisem ta’ dawk li jqumu minn bejn l-imwiet.  Fil-Vanġelu ta’ San Luqa għandna ġabra ta’ tagħlim ta’ Ġesú li juri kif in-nisrani għandu jġib ruħu biex ikun nisrani tassew.  “Jekk tħobb biss lil min iħobbok xi ħlas jista’ jkollok?”  Hemm bżonn, għalhekk, li nagħmlu għażla soda għall-kliem ta’ Sidna Ġesú Kristu.

 

Il-Ħajja

1. Kristu jitkellem ċar. Taħseb li fhimt dak li ried jgħidlek fil-Vanġelu tal-lum?  Taħseb li hemm materjal biżżejjed biex ħajtek tinbidel?
2. Kemm tassew, fil-ħajja tagħna ta’ kuljum, qed naċċettaw li ma niġġudikawx u ma nikkundannaw lil ħadd iżda minflok nitolbu għal dawk kollha li għandhom bżonn it-talb tagħna?
3. Kemm qed nagħmlu training fl-imħabba tagħna ta’ kuljum, mhux biss lejn dawk li jħobbuna u li jagħtuna mħabbithom lura iżda lil dawk li huma għedewwa jew rivali tagħna?
4. Lest, fil-ħajja tiegħek, taħfer mingħajr kundizzjoni? Ħares lejn Kristu Msallab qabel twieġeb.

 

Id-Djalogu

Mulej, għinni biex kull ħin tal-ħajja tiegħi nħares lejk,

u nara x’wettaqt inti għalija,

minkejja li jiena midneb.

Għinni nkun jien li nħobb qabel nirċievi l-imħabba,

li naħfer qabel jaħfruli.

Għinni, Mulej, nagħmel dan

kuljum, kull ħin.

It-6 Ħadd Matul is-Sena

GĦALIEX ĦENJIN?

Ġeremija 17:5-8; Salm 1; 1 Korintin 15: 12:16-20; Luqa 6:17,20-26

 

Il-Vanġelu

     F’dak iż-żmien, Ġesù niżel mat-Tnax u waqaf f’wita, flimkien ma’ kotra kbira ta’ dixxipli u folla kbira ta’ nies minn kull na˙a tal-Lhudija u Ġerusalemm u mix-xtajta ta’ Tir u Sidon. Ġesù rafa’ għajnejh lejn id-dixxipli tiegħu u qal: ‘Henjin intom il-foqra, għax tagħkom hija s-Saltna ta’ Alla. Henjin intom li għalissa bil-ġuħ, għax għad tkunu mxebbgħin. Henjin intom li għalissa tibku, għax għad tithennew. Henjin intom meta minħabba Bin il-bniedem in-nies jobogħdukom, jaqtgħukom minn magħhom, jgħajrukom u jwarrbu isimkom bħallikieku kien xi ħaġa ħażina. Dakinhar li jiġrilkom hekk, ifirħu u aqbżu bil-ferħ, għax araw, ħlaskom kbir ikun fis-sema. L-istess għamlu missirijiethom lill-profeti. Imma ħażin għalikom, intom l-għonja, għax il-faraġ tagħkom ħadtuh. Ħażin għalikom intom li għalissa mxebbgħin, għax għad tkunu bil-ġuħ. Ħażin għalikom intom li għalissa tidħku, għax għad tnewħu u tibku. Ħażin għalikom meta kulħadd isemmikom fil-ġid. Għax l-istess għamlu missirijiethom lill-profeti foloz!”

Il-Ħsieb

Kemm qed inbatu minħabba Bin il-Bniedem-Ġesú?  Kemm tassew, fil-ħajja tagħna, qed nimxu kontra l-kurrent?  Kemm qed nagħżlu li nkunu foqra f’dinja li tippriedka biss il-ġid u l-kumdità?  Kemm tassew ħajjitna qed tkun skomda għal Ġesú?  Fil-ħajja tagħna ta’ kuljum ħafna drabi ninġarru mir-reklami tas-swieq ta’ madwarna li jmexxu u jiddettaw lis-soċjeta x’għandha tagħmel u kif għandha timxi. Hija soċjetà li ma tridx min ikun kritiku lejha b’domandi serji fuq it-tip ta’ ħajja li qed ngħixu.  Huwa għalhekk li Ġesú qed jagħmel dan id-diskors li huwa proġett għall-mod kif għandna nħarsu lejn il-ħajja tagħna u l-għażliet li nwettqu.  Huwa Ħadd fejn nagħmlu ftit eżami ta’ x’tip ta’ ħajja qegħdin ngħixu u x’għażliet se nagħmlu fil-futur.

 

Il-Kelma

L-Ewwel qari tal-lum huwa meħud mill-profeta Ġeremija li jitkellem fuq l-istess idea mill-aspett pożittiv u wara negattiv.  Huwa jtenni li ħażin għalih il-bniedem li jpoġġi l-fidi tiegħu fi ħwejjeġ li jgħaddu u mbierek dak li jafda f’Alla.  Is-Salm Responsorjali meħud minn Salm 1, huwa tifħir għal dak il-bniedem li jqiegħed fil-Mulej it-tama tiegħu għaliex dan huwa tant għaqli li “ma jimxix fuq il-pariri tal-ħżiena,”  Fit-Tieni Qari, meħud mill-Ewwel Ittra ta San Pawl lill-Korintin insibu lill-Appostlu jfiehem ir-rabta kbira li hemm bejn il-qawmien ta’ Kristu u l-qawmien tagħna mill-mewt.  Aħna għad inqumu għax Kristu, li kien bniedem bħalna u lilna ġabarna fil-ġisem tiegħu, qam tassew.  Din hija l-garanzija għalina l-bnedmin.  Fil-Vanġelu ta’ San Luqa għandna lil Ġesú jagħmel id-diskors tal-beatidudnijiet fejn ifaħħar lil dawk li f’ħajjithom ipoġġu fl-ewwel post is-saltna ta’ Alla.

 

Il-Ħajja

1. Il-ħajja li ngħixu kuljum hija kollha tlajja’ u nżul, ward u xewk, iżda kemm tassew aħna lkoll qegħdin nafdaw f’idejn Alla l-ħajja tagħna?
2. Kemm huwa realtà l-fatt li ma nimxux fuq dak li jgħidilna l-ħażen iżda nqegħdu kollox fit-triq it-tajba ta’ Ġesú.
3. Kemm Ġeremija kif ukoll Ġesú llum jgħidulna li n-nisrani jrid iżomm ruħu bogħod mill-kompromessi.  Kemm aħna tassew  konvinti minn dan?  Kemm tassew qed nagħtu kollox għall-Mulej?
4. Setgħa u Flus. Ħafna drabi jagħmu lil bosta bnedmin, mhux biss lill politiċi jew lin-nies li jmexxu l-kummerċ.  Fil-ftit u fil-ħafna tiegħek, kemm tassew qed tuża l-ġid biex tgħix inti flimkien mal-proxxmu?  Hemm persuni
5. li qed isibu l-għajnuna tiegħek fil-pront  mingħajr tnikkir?
6. X’inhi l-aktar ħaġa importanti fil-ħajja tiegħek illum, issa?

 

Id-Djalogu

Mulej, inti sejjaħt ħienja

lil dawk li ma jintrabtux mal-ħwejjeġ li jgħaddu.

Għinna nfittxu kull ħin,

dawk l-affarijiet li jibqgħu għal dejjem,

it-teżori li huma mistura fis-sema.

Għinna biex bil-ġesti ta’ karità kontinwa tagħna,

mal-proxxmu li narawh kuljum,

niftaqru aħna

u nneħħu minna kull sens ta’ egoiżmu,

biex tidher aktar Inti, o Mulej!

10 ta’ Frar:  L-Appostlu Missierna San Pawl

NAWFRAĠJU!

Għerf 14, 3-7; Salm 106; Atti 27, 16-28,6; Mark 16, 15-20

Il-Vanġelu

U qalilhom: “Morru fid-dinja kollha, xandru l-Evanġelju lill-ħolqien kollu.  Min jemmen u jitgħammed, isalva; iżda min ma jemminx, ikun ikkundannat.  U dawn huma s-sinjali li jsieħbu lil dawk li jemmnu: f’ismi jkeċċu x-xjaten, jitkellmu b’ilsna ġodda, jaqbdu s-sriep b’idejhom, u jekk jixorbu xi xorb li jġib il-mewt ma jagħmlilhomx ħsara; iqiegħdu idejhom fuq il-morda u dawn ifiqu.” U hekk il-Mulej Ġesù, wara li kellimhom kien imtella’ fis-sema u qagħad in-naħa tal-lemin ta’ Alla. Huma mbagħad marru jippritkaw kullimkien; il-Mulej kien jaħdem magħhom u jwettaq il-kelma bil-mirakli li kienu jsiru magħha.

Il-Ħsieb

San Pawl, anzi l-ġifen tiegħu, tfarrak mal-gżejjer Maltin.  Tidher diżgrazzja kbira li minnha iżda ħarġet grazzja mhux biss għaliex ħadd minn dawk li kienu fuq il-ġifen ma tfarrku jew intilfu iżda wkoll għaliex San Pawl kien għodda f’idejn Alla biex ġab il-fidi lil gżiritna.  San Pawl ġie bħala missjunarju u żera’ żerriegħa li minnha ħarġet żerriegħa missjunarja kbira għaliex aħna l-Maltin mhux biss għożżejna din il-fidi talli nies kuraġġużi Maltin, reliġjużi u lajċi, ħallew ġżiritna tul is-snin biex marru jwasslu l-fidi f’artijiet oħra.  Il-Providenza ħasbet fina l-Maltin.  Ftit huma dawk il-pajjiżi li għandhom isimhom minqux fl-Iskrittura Mqaddsa.  Huwa mument mhux biss ta’ tifkira iżda ta’ tiġdid għalina l-Maltin.

Il-Mulej Ġesù ħabbna fuq li ħabbna tant li bagħtilna wieħed mid-dixxipli tiegħu, l-Appostlu tal-Ġnus, biex jiżra’ l-fidi fil-qalb tagħna.

Missirijietna ħabbewh mill-ewwel.  San Pawl, minkejja li kien għadu priġunier, ma beżax iwasslilna l-kelma ta’ Alla li dehret bil-kliem li wettaq u bil-mirakli li għamel ta’ fejqan.  San Pawl seraq il-qlub tal-Maltin u żera’ fihom iż-żerriegħa tas-salvazzjoni dejjiema…. Iżda llum dan kollu huwa storja?  Kemm tassew fadal fidi fil-poplu Malti?

Il-Kelma

Fl-Ewwel Qari tal-lum, meħud mill-Ktieb ta’ l-Għerf, naraw li kulma jseħħ fid-dinja jseħħ minħabba l-Providenza ta’ Alla.  Is-Salm Responsorjali, minn Salm 106, huwa għanja ta’ tifħir lill-Mulej għall-għeġubjijiet li jagħmel mal-bnedmin.  Fit-Tieni Qari, mill-Atti ta’ l-Appostli, għandna r-rakkont tan-nawfraġju ta’ San Pawl fuq gżiritna.  Fil-Vanġelu ta’ San Mark għandna lil Ġesù jagħti l-mandat u l-missjoni lill-Appostli biex imorru JXANDRU AĦBAR TAJBA u jgħammdu lill-ġnus.

Il-Ħajja

San Pawl ġie Malta u wettaq dak mitlub minnu mill-Mulej.  Ġabilna fejqan bil-kelma u fejqan bil-mirakli li wettaq.  Il-fidi żammet lill-poplu Malti ħaj tul dawn is-sekli kollha.  Illum huwa jum ta’ ringrazzjament nazzjonali lil Alla għal din il-grazzja li tana.  Iżda wkoll jum ta’ tiġdid fil-fidi li tgħinna lkoll meta ngħixuha mhux biss fuq livell individwali iżda anki fuq dak kollettiv bħala nazzjon.  Kemm tassew il-familji Maltin għad għandhom lil Ġesù fiċ-ċentru ta’ ħajjithom?  Ħafna drabi naqgħu fl-iżball li ninġarru minn modi u kurrenti li huma frontali kontra l-valuri tal-fidi tagħna.  Inġibu l-gwaj b’idejna.  U dan narawh mill-esperjenza tagħna ta’ kuljum.  Liema huma l-mumenti tal-veru ferħ fil-ħajja tagħna?  Kemm tassew qed nitolbu kull ħin maħfra lill-Mulej u nitolbuh idawwal l-għemil tagħna?

Id-Djalogu

Mulej, San Pawl żera’ ż-żerriegħa tal-fidi fil-poplu Malti.  Għinni, lili bħala Malti, biex inkompli din il-missjoni tiegħu fi gżiritna bl-għemil u bit-twemmin tiegħi.

Il-5 Ħadd Matul is-Sena

SAJJIEDA  FI  KRIŻI?

Isaija 6:1-2; 3-8; Salm 137; 1 Korintin 15,1-11; Luqa 5:1-11

 

Il-Vanġelu

      Darba l-kotra bdiet tross fuqu biex tisma’ l-kelma ta’ Alla. Hu kien qiegħed f’xatt l-għadira ta’ Ġennesaret.  U ra żewġ dgħajjes qegħdin max-xatt; is-sajjieda kienu niżlu minn fuqhom u kienu qegħdin jaħslu x-xbiek.  Tela’ fuq waħda minnhom, li kienet ta’ Xmun, u talbu jaqla’ kemmxejn ‘il barra mill-art; mbagħad qagħad bilqiegħda u beda jgħallem lin-nies mid-dgħajsa.  Meta temm li kellu jgħid, qal lil Xmun: “Aqdef ‘il barra fil-fond, u kalaw ix-xbiek tagħkom għas-sajd.”  Wieġbu Xmun u qallu: “Mgħallem, għamilna lejl sħiħ nitħabtu u ma qbadna xejn. Imma, la qiegħed tgħid int, ħa nkala x-xbiek.”   Hekk għamlu, u qabdu kotra hekk kbira ta’ ħut li  x-xbiek tagħhom kien għoddu nqasam.  Għalhekk għamlu sinjal lil sħabhom li kienu fid-dgħajsa l-oħra biex jiġu jgħinuhom. Dawk ġew, u mlew iż-żewġ dgħajjes hekk li għal ftit ma għerqux.

      Xmun Pietru, kif ra dan, nxteħet f’riġlejn Ġesù u qallu: “Tbiegħed minni, Mulej, għaliex jiena raġel midneb!”  Għax baqgħu tassew mistagħġba, kemm hu u kemm dawk kollha li kienu miegħu, għal dik il-qabda ħut li qabdu.  U hekk ukoll ġralhom Ġakbu u Ġwanni, ulied Żebedew, li kienu sħab Xmun. Mbagħad Ġesù qal lil Xmun: “Tibżax; minn issa ‘l quddiem tkun taqbad in-nies.”  Meta mbagħad ressqu d-dgħajjes ma’ l-art, telqu kollox u marru warajh.

 

Il-Ħsieb

     Kemm-il darba fil-ħajja tagħna nħossu li qegħdin ma’ Ġesù iżda l-fidi tagħna tisparixxi?  Nibżgħu.  Ngħixu ħajjitna kollha mbeżża’ u nistħu nuru l-fidi tagħna?  Ġesù jrid iqawwi fina l-fidi.  Għalhekk ġie fid-dinja.  Għalhekk għadu jxandar il-Bxara t-Tajba kull jum u kull ħin

permezz tal-Kotba Mqaddsa.  U l-Mulej irid jagħmlilna l-kuraġġ mhux bil-paroli iżda bil-ġrajjiet ta’ kuljum.  Hekk għamel ma’ l-Appostli.  Hekk għamel ma’ Pietru.  Kull ma jrid biex iwettaq il-miraklu Ġesù hija d-dispożizzjoni tagħna, anki jekk is-sitwazzjoni tidher impossibbli.  U Ġesù jurina li jħobbna billi jixħet il-providenza kbira fuqna lkoll.  Lil Pietru seta’ ppermettielu jaqbad xi żewġ ħutiet kbar wara lejl li kien għamel mingħajr ma qabad xejn, iżda minflok,  Ġesù tahom sajda li żewġ dgħajjes ma felħuhiex.  Il-Mulej ma jaħsibhiex bħalna li ħafna drabi nwettqu r-relazzjoni tagħna mal-Mulej kemm niddubbaw.  Immur il-quddies il-Ħadd għax bilfors, biex ma nagħmilx dnub, inqerr għal xi funeral eċċ.  Le.  L-imħabba tal-Mulej lejna hija abbundanti.  Meta se nibdew nifhmu u niċċaqalqu fil-ħajja tagħna?

Il-Kelma

     Din is-silta titkellem fuq is-sejħa ta’ Isaija biex ikun Profeta ta’ Alla.  Alla juri lilu nnifsu fuq kull ħaġa maħluqa u fl-istess ħin qrib il-poplu tiegħu.  Fit-tieni parti naraw il-bniedem quddiem Alla li, biex ikun jista’ jwettaq il-missjoni tiegħu, jeħtieġ li jindem u jikkonverti.  Il-kliem tal-profeta Hawn jien, Ibgħat lili huwa kliem qawwi ta’ telqa totali f’idejn ir-rieda ta’ Alla.  Dan ir-riskju kbir ta’ fidi fuq l-istess ħajja umana jidher fis-Salm Responsorjali meta f’Salm 137 intennu r-radd ta’ ħajr tagħna għax il-Mulej se jsalvana.  Fis-silta meħuda mill-Ewwel Ittra ta’ San Pawl Appostlu lill-Korintin, insibu lill-Appostlu San Pawl jitkellem l-ewwel dwar il-Vanġelu li n-nies ta’ Korintu kienu laqgħu, u wara jitkellem dwar il-qawmien ta’ Kristu mill-mewt u d-dehriet lill-Appostli.  Fil-Vanġelu ta’ San Luqa wara s-sajda mirakoluża Ġesù jagħti l-mandat lil Pietru u wara li jimlieh bil-kuraġġ jgħidlu biex ma jibżax u jgħidlu li issa l-missjoni tiegħu se tinbidel.  Mhux se jaqbad aktar ħut iżda nies.

Il-Ħajja

1. Il-ħajja tagħna spiritwali, fil-mixja tagħna meta kuljum ngħixu l-fidi tagħna, hija mimlija mumenti ta’ diffikultajiet. Hafna drabi hija l-biża’ u l-qtigħ il-qalb li timblokka l-mixja tagħna. Il-Mulej irid  jagħmlilna kuraġġ għax kien huwa li sejħilna b’isimna u tana l-missjoni li rridu nwettqu min bħala ġenitur, min bħala saċerdot, min bħala reliġjuż eċċ.  Hija t-triq li fiha tassew  kuljum irridu ngħidulu:  Hawn jien, ibgħat lili.
2. Imma la tgħid int, ħa nkala x-xbiek. Minkejja li kien kontra kull loġika tas-sajda li tkala x-xbiek mas-sebħ, u minkejja li kienu  għajjenin wara lejl sħiħ sajd li fih ma qabdu xejn, Pietru jobdi għall-kliem ta’ Ġesù u l-miraklu jseħħ bl-abbundanza.  Kemm qed nobdu għal dak li qed jgħidilna Ġesù  Kemm tassew qed inwettqu dak li jridna hu li nagħmlu fil-ħajja tagħna?
3. Il-Mulej jurina li jħobbna billi jenfasizza biex ma nibżgħux. Hemm bżonn li nifhmu li waqt li qed inwettqu r-rieda ta’ Alla ħadd u xejn m’hu ser iwaqqafna.
4. Hawn jien. Ibgħat lili.  Kemm tassew aħna konvinti li ntennu dan il-kliem b’konvinzjoni u nagħmluh il-programm ta’ ħajjitna biex aħna wkoll inkunu sajjieda mal-Mulej u tal-Mulej.

 

Id-Djalogu

  Mulej,

  inti taf li jiena nibżà

  nibża’ minn ħafna kompromessi li nagħmel fil-ħajja tiegħi ta’

  kuljum.

  Għinni Mulej biex nagħraf tassew ngħidlek bil-qalb

  Hawn jien, ibgħat lili.

  Nittama li nwettaq dejjem

  ir-rieda tiegħek, Mulej.