It-33 Ħadd Matul is-Sena

JOBGĦODUKOM  MINĦABBA  F’ISMI!

Malakija 3:19-20a; Salm 97; 2 Tessalonkin 3, 7-12; Luqa 21:5-19

Il-Vanġelu

 Kien hemm xi wħud li bdew jgħidu fuq kemm it-tempju kien imżejjen b’ġebel sabiħ u għotjiet; iżda Ġesù qalilhom: “Kull ma qegħdin taraw, għad jiġi żmien li ma tibqax ġebla fuq oħra minnu li ma tiġġarrafx.”

 U huma staqsewh u qalulu: “Mgħallem, issa dan meta għad jiġri? U x’se jkun is-sinjal li dawn il-ħwejjeġ ikunu waslu biex iseħħu?” Qalilhom: “Araw li ma titqarrqux. Għax għad jiġu ħafna f’ismi u jgħidu, ‘Jien hu,’ u, ‘Iż-żmien wasal.’ Tmorrux warajhom!  Meta tisimgħu min jitkellem fuq gwerer u taqlib fil-pajjiżi, tinħasdux għax jeħtieġ li l-ewwel jiġri dan, iżda t-tmiem ma jasalx minnufih.”  Mbagħad qalilhom: “Għad iqum ġens kontra ġens u saltna kontra saltna,  l-art titheżheż bil-kbir, f’ħafna bnadi jkun hemm il-ġuħ u mard li jittieħed, u fis-sema jidhru ħwejjeġ tal-biża’ u sinjali ta’ l-għaġeb.  Imma qabel dan kollu jixħtu idejhom fuqkom u jippersegwitawkom, jagħtukom f’idejn il-mexxejja  tas-sinagoga u jitfgħukom il-ħabs, u jeħdukom quddiem slaten u gvernaturi minħabba f’ismi. Dan ikun jiswielkom biex tistgħu tagħtu xhieda. U żommu sewwa f’moħħkom: toqogħdux taħsbu minn qabel kif se tiddefendu ruħkom,  għax jien nagħtikom kliem u għerf li kull min ikun kontra tagħkom ma jkunx jista’ jiqaflu jew imerih.  U jittradukom saħansitra l-ġenituri tagħkom u ħutkom u qrabatkom u ħbiebkom, u lil xi wħud minnkom joqtluhom, u kulħadd isir jobgħodkom minħabba f’ismi. Imma xagħra waħda minn raskom ma tintilifx.  Jekk tibqgħu sħaħ sa l-aħħar issalvaw ħajjitkom!

Il-Ħsieb

Li tgħix ta’ nisrani m’huwiex faċli.  Tista’ tirreċta ta’ nisrani, tista’ tilgħabha ta’ nisrani, iżda li verament tgħix ta’ nisrani mhix ħaġa faċli.  Fil-ħajja kollox jintemm, jitfarrak u jispiċċa.  Kull ħaġa li ħsibna li fl-istorja tal-bniedem se tibqa’:  ideoloġiji, personaġġi, monumenti, kollox qdiem, intemm.  Iżda Kristu baqa’; il-fidi tibqa’.  Hu għalhekk li Ġesù llum jistedinna biex l-ewwelnett nirriflettu ftit fuq kemm il-fidi tagħtina l-kuraġġ kif inħarsu lejn il-ħajja tagħna ta’ kuljum u wkoll kif tassew aħna.  Dan biex ilkoll nindunaw li rridu ngħaddu minn persekuzzjonijiet iżda li moħħna għandu jkun mistrieħ li l-Mulej qatt m’hu se jħallina waħedna, “għax jien nagħtikom diskors u għerf.”

Ġesù jtenni li saħansitra dawk li nafdaw fihom iduru kontrina, dawk li qatt ma stennejna li se jeħduha kontrina.  Għax kif inti ma tibqax taqdi l-kompromessi ta’ dawk ta’ madwarek li jkunu għasruk biżżejjed, għax ma jqisux il-valuri tal-persuni umani, jitfgħuk ’il barra u jwarrbuk.  Ġesù għalhekk jisfidana biex nibqgħu sħaħ sa l-aħħar.  M’aħniex se nkunu waħedna f’din il-mixja ta’ fidi u mpenn fuq dak li għallimna huwa stess.  Dan huwa Ħadd li jiftħilna għajnejna iżda fl-istess ħin jimliena kuraġġ meta nkunu mimlija niket minħabba dak li jkun qed jiġri madwarna u li ħafna drabi jkunu ġrajjiet li ma nistgħux nifhmu.

Il-Kelma

Fl-Ewwel Qari, meħud mill-Ktieb tal-Profeta Malakija, għandna lill-Profeta jwissi lill-kburin u l-midinbin waqt li jqawwi l-qalb ta’ dawk li għandhom il-biża ta’ wlied għall-Isem ta’ Alla.  Is-Salm 97 li ntennu fis-Salm Responsorjali huwa għanja ta’ tifħir lil Alla għax ġej biex jagħmel ħaqq bil-ġustizzja mill-popli tiegħu, ġustizzja li tkun fuq il-mod li aħna mxejna fid-dawl ta’ kliemu.  It-Tieni Qari, meħud mit-tieni Ittra ta’ San Pawl lit-Tessalonkin, jagħtina twissija tal-Mulej li s-salvazzjoni u l-istennija tat-tieni miġja tal-Mulej m tridx tkun fil-għażż u wkoll b’idejna fuq żaqqna.  Hemm bżonn li naħdmu u nimpenjaw ruħna sew, fil-ħajja ta’ kuljum fejn trid toħroġ fil-beraħ il-fidi tagħna.  Fil-Vanġelu ta’ San Luqa għandna lil Ġesù li ma jwiegħedx suċċess iżda persekuzzjoni.  Fl-istess ħin, iżda, Ġesù jwiegħed l-għajnuna tiegħu u li qatt m’hu se nkunu waħedna fl-isfida biex nibqgħu sħaħ sa l-aħħar fi kliemu.

Il-Ħajja

1.  Il-Mulej qed jurina biċ-ċar illum xi tfisser tkun nisrani.  Trid taħdem, ma tibżax mill-persekuzzjoni u żżomm għajnejk u widnejk miftuħa sew għal dak li jgħidlek hu fil-mumenti iebsa.

2.  Ġesù jridna nibqgħu sħaħ sa l-aħħar.  Kif?  Billi nisimgħu l-messaġġ tal-Kelma tiegħu u nagħtuh il-ħajja fl-ambjent tagħna.

3.  San Pawl itenni l-importanza tax-xogħol fl-istennija tal-Mulej.  Il-post tax-xogħol u dmirijiet tagħna rridu nifhmuhom sew, għax huma parti mill-vokazzjoni u l-impenn nisrani ta’ kuljum.

4.  F’dan il-Vanġelu tal-lum Ġesù jurina li fil-mumenti diffiċli, meta aħna nkunu qed nagħmlu għażliet għalih u nimxu fuq kliemu, l-ispirtu tiegħu se jdawlilna d-deċiżjonijiet u l-kliem li ngħidu.

5.  Illum irridu nwiegħdu lil Ġesù li nimxu fuq kliemu mingħajr kompromessi.

Id-Djalogu

Mulej,

dawwal il-fehma tiegħi,

biex nifhem aktar

dak li trid minni

u għinni nħoss il-preżenza u d-dawl tiegħek

f’kull deċiżjoni li nieħu fil-ħajja

biex dejjem tkun fuq kliemek.

It-32 Ħadd Matul is-Sena

ALLA  TAL-ĦAJJIN

2 Malakija 7: 1-2, 9-14; Salm 16; 2 Tessalonkin 2: 16-3,5; Luqa 20: 27-38

Il-Vanġelu

Il-Qawmien mill-Imwiet

(Mt 22, 23-33; Mk 12, 18-27)

Mela resqu fuqu xi wħud mis-Sadduċej, dawk li jiċħdu l-qawmien mill-imwiet, u staqsewh: “Mgħallem,” qalulu,”Mosè ħallielna miktub, ‘Jekk wieħed imutlu ħuh miżżewweġ u dan ikun bla tfal, dak ikollu jiżżewweġ l-armla biex inissel ulied lil ħuh.’Issa jkun hemm sebat aħwa, u l-kbir iżżewweġ u miet bla tfal.  It-tieni wieħed,  u mbagħad it-tielet, f’kelma waħda, is-sebgħa li kienu, ħadu l-armla, u mietu bla ma ħallew tfal.  Fl-aħħar mietet  il-mara wkoll.  Issa din, fil-qawmien ta’ l-imwiet, mart min minnhom tkun? Għax is-sebgħa jkunu żżewwġuha.”  Weġibhom Ġesù: “Il-bnedmin f’din id-dinja jiżżewwġu u jżewwġu; imma dawk li jkun jistħoqqilhom jgħaddu għad-dinja l-oħra u jqumu   mill-imwiet, dawn la jżewwġu u lanqas jiżżewwġu.  Għax anqas jistgħu jmutu iżjed, għaliex ikunu bħall-anġli, u huma wlied Alla ladarba qamu mill-imwiet. U li l-mejtin iqumu, Mosè wkoll urieh,  fir-rakkont tax-xitla ta’ l-għollieq, għax lill-Mulej isejjaħlu Alla ta’ Abraham, Alla ta’ Iżakk, u Alla ta’ Ġakobb.  Issa Hu m’huwiex Alla tal-mejtin, iżda tal-ħajjin, għax għalih kulħadd jgħix.”

 

Il-Ħsieb

Ninsabu fix-xahar li fih niftakru fl-għeżież tagħna mejtin.  Fix-xahar ta’ Novembru bla ma trid tħoss xi ftit niket.  Jorbotna ma’ dawk li ma għadhomx aktar magħna, li telqu qabilna fil-vjaġġ tagħhom għall-eternitaÏ.  U min jaf kemm-il darba għaddew ħsibijiet minn moħħna ta’ x’se jsir minn din il-ħajja!

Huwa fatt importanti li ħafna drabi nagħmlu enfasi kbira fuq il-kelma MEJTIN.  U għalhekk noqtlu fina, anki mill-aspett psikoloġiku, kull ħjiel ta’ tama għal ħajja oħra.  Ġesù llum fil-Vanġelu jitkellem ċar – AĦNA WLIED IL-ĦAJJA.  Alla tagħna m’huwiex Alla tal-mejtin iżda tal-ħajjin:  “għax għalih kulħadd jgħix.”  U dan huwa l-mument li għalih irridu naħdmu tul ħajjitna kollha.  Aħna wlied il-ħajja u għalhekk irridu, minn din il-ħajja stess, nimpenjaw ruħna u nagħmlu l-investimenti tagħna mhux fuq din l-art iżda fis-sema fejn hu pajjiżna.  Meta jkollna l-fidi tagħna msaħħa kapaċi naslu għal dawn il-ħsibijiet, iżda mingħajr il-fidi ma naslu mkien.

Ħafna kumplikazzjonijiet u ħsibijiet żejda fil-ħajja tagħna nagħmluhom għax inħaddnu l-prinċipju tas-Sadduċej li ma kinux jemmnu fil-qawmien u għalhekk kollox isir kumplikat u jispiċċa fix-xejn minn dak kollu li ngħaddu minnu f’din il-ħajja.

Il-Kelma

Fl-Ewwel Qari tal-lum, meħud mit-Tieni Ktieb tal-Makkabej, insibu għall-ewwel darba fit-Testment il-Qadim stqarrija ta’ twemmin fil-qawmien mill-imwiet.  Fi żmien il-persekuzzjoni ta’ Antijoku, il-qtil ta’ tant Lhud tajba qajjem fost il-poplu t-tama ta’ dan il-qawmien.  Is-Salm Responsorjali huwa stqarrija li dawk li jibqgħu fil-liġi tal-Mulej meta jqumu jaraw id-dawl tiegħu.  Fit-Tieni Qari għandna silta mit-Tieni ittra ta’ San Pawl lit-Tessalonkin fejn San Pawl jissokta jitlob għall-insara tat-Tessalonika biex ifehimhom li ma jistgħux jaslu waħedhom għas salvazzjoni iżda jrid ikun hemm l-għajnuna ta’ Alla.  Fil-Vanġelu meħud minn San Luqa, għad-domanda “hemm tassew qawmien mill-imwiet?” insibu li t-tweġiba ta’ Ġesù mhix waħda mibnija fuq ix-xjenza iżda fuq il-fidi.

Il-Ħajja

1.  Inti konvint mill-qawmien wara din il-ħajja?

2.  Kif qed tgħix il-fidi tiegħek issa?

3.  Kemm qed tagħmel investimenti fis-sema?

4.  Kemm tassew temmen li l-mixja tagħna fuq din l-art se titkompla mal-Mulej għall-eternitaÏ?  Kemm tassew qed tgħix il-Kelma ta’ Alla f’dan id-dawl?

5.  Alla tiegħek huwa Alla tal-ħajjin jew tal-mejtin?

Id-Djalogu

Isma’, Mulej, il-kawża ġusta tiegħi,

ilqa’ l-għajta tiegħi,

agħti widen għal talbi

li ġej minn xofftejn bla qerq.

Il-25 Ħadd Matul is-Sena

AMMINISTRAZZJONI TAJBA MAL-FQIR U L-BATUT

Għamos 8: 4-7;  Salm 112; 1 Tim 2:1-8; Luqa 16: 1-13

 

Qari mill-Evanġelju ta’ San Luqa (16: 1-13)

   Qal ukoll lid-dixxipli tiegħu: “Kien hemm raġel għani li kellu amministratur, u lil dan xlewh lil sidu li kien qiegħed iberbaqlu ġidu.   Għalhekk is-sid sejjaħlu u qallu, ‘Dan x’inhu li qiegħed nisma’ fuqek? Agħtini kont ta’ l-amministrazzjoni tiegħek, għax ma tistax tibqa’ iżjed amministratur tiegħi.’  L-amministratur bejnu u bejn ruħu qal, ‘Issa x’sejjer nagħmel, ladarba sidi se jneħħini mill-amministrazzjoni? Immur nagħżaq? Ma niflaħx. Nittallab? Nistħi.  Naf x’nagħmel, ħalli meta nitwarrab minn fuq din l-amministrazzjoni, nsib lil ħaddieħor li jilqagħni għandu.’   U wieħed wieħed bagħat għal dawk li kellhom jagħtu lil sidu. ‘Kemm għandek tagħtih lil sidi?’ staqsa lill-ewwel wieħed.  ‘Mitt barmil żejt,’ wieġbu dak. ‘Oħroġ il-karti tiegħek,’ qallu l-amministratur, ‘oqgħod bilqiegħda malajr u ikteb ħamsin.’  Lil ieħor staqsieh, ‘U int, kemm għandek tagħti?’ ‘Mitt xkora qamħ,’ wieġbu. Qallu, ‘Oħroġ il-karti tiegħek u ikteb tmenin.’  U s-sid faħħru lil dak l-amministratur ħażin talli ħadem b’rasu. Għax ulied din id-dinja jimxu bil-għaqal aktar minn ulied id-dawl ma’ min hu tal-qatgħa tagħhom.  U jiena ngħidilkom, agħmlu għalikom infuskom ħbieb ta’ qligħ il-ħżunija, ħalli meta jonqoskom, jilqgħukom fl-għerejjex ta’ dejjem.   Min hu fidil f’ħaġa tassew żgħira, hu fidil ukoll fil-ħafna; min hu diżonest f’ħaġa tassew żgħira, hu diżonest ukoll fil-ħafna.   Jekk mela ma wrejtux ruħkom fidili fil-qligħ il-ħażin, min se jafdalkom il-ġid veru?   U jekk ma wrejtux ruħkom fidili f’dak li hu ta’ ħaddieħor, min se jagħtikom dak li hu tagħkom?  Ebda qaddej ma jista’ jaqdi żewġ sidien, għax jew ikun jobgħod lil wieħed minnhom u jħobb lill-ieħor, jew jintrabat ma’ wieħed u jistmell lill-ieħor. Ma tistgħux taqdu lil Alla u lill-flus.”

.

Il-Ħsieb

     Ebda qaddej ma jista’ jaqdi żewġ sidien… Ma tistgħux taqdu lil Alla u lill-flus.  Ġesù ma jdurx mal-lewża.  Permezz tal-parabbola ta’ l-amministratur, Ġesù jrid ikompli jurina li biex inkunu dixxipli tiegħu hemm bżonn li nevitaw il-kompromessi perikolużi.  Illum kulħadd jersaq biex jgħid u jagħmel kollox għall-flus.  Familji mkissra, ħajjiet jintilfu, dan kollu għax inpoġġu l-valur tal-flus qabel il-valur assolut li huwa Alla.  U propju hawn hija l-għażla tal-ħajja tagħna.  Il-Mulej iridna nkunu amministraturi tajba u onesti ta’ dak li tana. U x’tana l-Mulej?  Tana kollox: tana d-doni, tana dak kollu li wieħed jista’ jimmaġina.  Ħafna drabi aħna ma nagħtux każ, anzi aħna stess nagħmlu kompromessi ma’ affarijiet li jbegħduna mill-Mulej.

Illum il-messaġġ li jrid jgħaddilna l-Mulej huwa biex nagħmlu għażla ċara u soda fil-ħajja tagħna.  Ma nistgħux naqdu żewġ sidien.  L-għażla hija f’idejna.  Ta’ min għalhekk jifli b’reqqa l-messaġġ tal-kelma li l-Mulej irid jgħaddilna llum.

.

Il-Kelma

     Fl-Ewwel Qari tal-lum, meħud mill-Profeta Għamos, insibu lil dan il-profeta bil-kitbiet tiegħu dwar il-ġustizzja so`jali.  Huwa tela’ fit-tempju ta’ Bethel u `anfar lil dawk li kienu jkasbru lill-fqir.  Fis-Salm Responsorjali tal-lum, meħud minn Salm 112, għandna innu lill-Mulej li jgħin u jerfa’ l-fqir.

“Hu jerfa’ mit-trab l-imsejken

u jerfa’ l-fqir mill-miżbla,

biex mal-kbarat iqiegħdu

mal-kbarat tal-poplu tiegħu.”

Fit-Tieni Qari tal-lum, meħud mill-Ewwel Ittra ta’ San Pawl lil Timotju, għandna t-twissija ta’ San Pawl li ĦADD ma għandu jitħalla barra mit-talb fil-pubbliku għax Alla jrid li kulħadd isalva.  Fil-Vanġelu ta’ San Luqa għandna lil Ġesù jgħallimna kif għandna nużaw tajjeb il-ġid tad-dinja.

.

Il-Ħajja

1.  Ġesù jurina li l-ġid li jkollna rridu nużawh tajjeb.  Hemm bżonn li ngħinu lil min huwa fil-bżonn u nħarsu ’l fuq għax il-valur assolut fil-ħajja tagħna jibqa’ Alla.
2.  Irrifletti ftit.  Kemm għandek kompromessi ħajjin fil-ħajja tiegħek?
3.  Liema huwa l-veru Alla ta’ ħajtek?  Alla l-Missier jew il-flus li saru alla falz għalik?
4.  Kif qed tuża l-ġid tiegħek?  Bi prospettivi li tistagħna aktar?  U wara din il-ħajja x’se tieħu miegħek fis-sema?
5.  Kemm qed ngħinu minn dak li għandna lil-fqir u l-batut?

.

Id-Djalogu

Mulej,

inti tagħtini ħafna,

u jiena ftit li xejn nagħtik lura.

Għinni nħares madwari

u narak fil-fqir

u ngħinek Mulej.

It-23 Ħadd Matul is-Sena

NIBNU BIL-ĦSIEB U BIS-SALIB

Għerf 9:13-18b; Salm 89; Filemon 9b-10, 12-17; Luqa 14: 25-33

Il–Vanġelu

Kotra kbira ta’ nies kienet miexja miegħu; hu dar lejhom u qalilhom:  “Min jiġi għandi ma jistax ikun dixxiplu tiegħi jekk ma jobgħodx lil missieru u ‘l ommu u lil martu u lil uliedu, ‘l ħutu subjien u bniet, u saħansitra lilu nnifsu. Min ma jerfax salibu u jimxi warajja ma jistax ikun dixxiplu tiegħi.

 “Għax min minnkom ikun irid jibni torri u ma joqgħodx bilqiegħda biex l-ewwelnett iqis in-nefqa, ħalli jara għandux biżżejjed biex iwassal sa l-aħħar? Għax jekk jiġrilu li jqiegħed is-sisien biex imbagħad ma jkunx jista’ jtemm il-bini, kull min jarah jibda jwaqqgħu għaċ-ċajt u jgħid, ‘Dan il-bniedem beda jibni u ma kellux il-ħila jkompli sa l-aħħar.’ Jew liema sultan, li jkun sejjer jagħmel gwerra kontra sultan ieħor, ma joqgħodx l-ewwel bilqiegħda biex jara jekk jistax b’għaxart elef raġel iħabbatha ma’ min ġej għalih b’għoxrin elf ruħ? Għax inkella, meta l-ieħor ikun għadu ‘l bogħod, ikollu jibgħatlu ambaxxata biex jitolbu l-ftehim għall-paċi.  Hekk ukoll ħadd ma jista’ jkun dixxiplu tiegħi jekk ma jitlaqx ġidu kollu.

 

 

Il-Ħsieb

     Ħafna nies kienu miexja lejn Ġesù.  Ġesù jdur lejhom u qed idur lejja u lejk biex ifehimna li l-importanza tal-mixja miegħu hija li tibni fuq is-sens ta’ sagrifiċċju tal-ħajja li ngħixu kuljum u fid-dawl tas-salib li huwa ġarr qabilna u li lkoll kemm aħna rridu nġorru.

     Ġesù jtenni li hemm bżonn li nkunu fid-dinja iżda mhux tad-dinja.  Ma jridniex li nintrabtu.  M’huwiex jgħid li ma għandniex inħobbu lil missierna u ’l ommna.  Ġesù qed jgħidilna biex ma nintrabtux.  Ma norbtu qalbna ma’ xejn ħlief miegħu.  U huwa jagħtina l-paċi.  Din hija esperjenza li forsi qatt ma għaddejna minnha għax dejjem irbatna qalbna ma’ xi ħaġa jew ma’ ħajjitna.

     Dan id-diskors mhux faċli li tattwah.  Trid kuraġġ u saħħa li l-Mulej biss jaf jagħti lilna.  Hemm bżonn li l-proġetti tagħna naħsbuhom sewwa.  Hemm bżonn li lkoll kemm aħna nħallu spazju għall-Mulej qabel kull ħaġa oħra.  Ħafna drabi nkunu mal-Mulej meta niġu daharna mal-ħajt.  Hemm bżonn għalhekk li nitkellmu aktar mal-Mulej u nħalluh ikellimna qabel ma nifgaw il-vuċi tiegħu bil-kompromessi ta’ ħajjitna.

Il-Kelma

     Fl-Ewwel Qari, meħud mill-Ktieb ta’ l-Għerf, għandna lill-awtur ifiehem lil-Lhud li l-għerf veru ġej minn Alla u mhux mill-kultura Griega.  Ebda ġens u beda kultura ma huma biżżejjed biex nagħrfu l-pjan ta’ Alla.  Is-Salm Responsorjali, meħud minn Salm 89, huwa talba biex il-Mulej isawwab fi qlubna l-għerf u l-grazzja tiegħu.  “Għallimna ngħoddu jiem ħajjitna, biex hemm nimxu b’moħħ għaqli.”  Dan huwa l-messaġġ ċentrali ta’ dan is-Salm.  It-Tieni Qari huwa meħud mill-Ittra ta’ San Pawl Appostlu lil Filemon.  F’din l-unika ittra privata tiegħu, San Pawl jitlob lil ħabibu Filemon biex jilqa’ mill-ġdid id-dar lil Onesimu li kien ħarab.  Qallu bies jilqgħu lura, mhux aktar bħala lsir, iżda bħala ħuh fi Kristu.  Fil-Vanġelu, meħud minn San Luqa, għandna lil Ġesù jitkellem dwar kif trid tkun il-mixja tad-dixxipli tiegħu.  Trid tkun mixja mingħajr kompromessi.

Il-Ħajja

1. Ġesù jridna nimxu miegħu. Ġesù jridna dixxipli tiegħu.  X’se  nagħmlu?
2. Ġesù jridna ninqatgħu mill-affarijiet ta’ din id-dinja iżda nibqgħu ngħixu fid-dinja. Biex nagħmlu dan għandna bżonn inħaddnu l-kelma tiegħu u nissaffew mill-ħtijiet tagħna.
3. It-talba tagħna llum trid tkun biex tassew il-Mulej isawwab fina l-għerf u l-grazzja tiegħu biex nagħrfu kull ħin ir-rieda tiegħu.
4. Hemm bżonn li naħsbu sew fuq il-proġetti u l-għażliet ta’ ħajjitna. Hemm bżonn li lil Kristu nżommuh magħna l-ħin kollu u b’hekk nevitaw kompromessi perikolużi.
5. “Min ma jerfax salibu u jimxi warajja ma jistax ikun dixxiplu tiegħi.” Hekk tenna Ġesù.  Int u jien x’se nagħmlu?  L-għażla f’idejna kuljum.

Id-Djalogu

  Mulej,

  inti tridni nerfa’ s-salib kuljum,

  għinni nagħmel dan, għinni nwettaq bil-għerf li tagħtini,

  dak li hemm fir-ras tiegħek fuq il-ħajja tiegħi.

  Dan biss nixtieq Mulej.

It-22 Ħadd Matul is-Sena

MIN HU FUQ JIĠI TAĦT!

Bin Sirak 3:19 -21, 30-31; Salm 67; Lhud 12: 18-19, 22-24a; Luqa 14,1,7-14

Il–Vanġelu

Darba, kien is-Sibt, daħal għand wieħed mill-kapijiet tal-Fariżej biex jiekol għandu, u huma qagħdu għajnejhom fih. 

Billi ra b’għajnejh kif il-mistednin bdew jagħżlu l-postijiet ta’ quddiem fil-mejda, qalilhom din il-parabbola: “Meta wieħed jistiednek għal xi festa ta’ tieġ, tmurx toqgħod fil-post ta’ quddiem, li ma jkunx hemm xi mistieden aqwa minnek, u dak li jkun stieden lilek u lilu jiġi fuqek jgħidlek, ‘Agħti l-post lil dan’, u int imbagħad, b’regħxa ta’ mistħija fuqek, ikollok tieħu l-post ta’ l-aħħar. Għall-kuntrarju, meta tkun mistieden, mur inxteħet fil-post ta’ l-aħħar, biex meta jiġi dak li stiednek jgħidlek, ‘Ħabib, itla’ f’post aktar ‘il fuq.’ U dan ikun ta’ ġieħ għalik quddiem dawk kollha li jkunu fil-mejda miegħek.  Għax kull min jitkabbar, jiċċekken; u min jiċċekken, jitkabbar.”  Mbagħad qal ukoll lil dak li kien stiednu: “Meta tagħti ikla jew pranzu, tistedinx lil ħbiebek jew lil ħutek jew lil qrabatek, u anqas ġirien għonja, għax għandhom mnejn imbagħad jistiednu lilek huma, u hekk iroddulek il-pjaċir li tkun għamiltilhom.  Għall-kuntrarju, meta tagħmel ikla, stieden il-foqra, il-magħtubin, iz-zopop u l-għomja,  u hieni int, għax dawn ma għandhomx minn fejn iroddulek pjaċir bi pjaċir, imma jroddhulek Alla meta l-ġusti jqumu għall-ħajja!”

 

Il-Ħsieb

     Is-suppervja ħafna drabi tagħmi lill-bniedem u ma tħallih jara xejn u lil ħadd quddiemu.  Bniedem supperv jagħmel lil kulħadd tapit u ċert li ma jarax xi jrid Alla minnu.  Din tkun id-diżgrazzja kbira ta’ ħajjitna.  Hemm bżonn li naraw tassew li nsaffu kontinwament mill-ħajja tagħna kull sens ta’ suppervja ġejja mill-egoiżmu.  Il-Mulej illum, filwaqt li jurina l-kruha tas-suppervja, jurina kif nistgħu nfiqu minnha.  Is-suppervja titfejjaq billi kontinwament tagħmel eżerċizzju ta’ umiltà fil-ħajja tiegħek.  Tipprova tkun inti għas-servizz ta’ Ġesù fil-proxxmu.  B’hekk biss nistgħu nfiqu u nersqu aktar lejn Alla meta aħna nħarsu madwarna u ngħinu lil min huwa fil-bżonn.  Dawn jistgħu jkunu fil-familji tagħna, fil-postijiet tax-xogħol tagħna, fil-komunitajiet tagħna.

     Hemm bżonn li niċkienu aħna biex jidher Ġesù għax wara kollox l-unika darba li għola aktar minna Ġesù kien fuq is-salib imtertaq għal dnubietna biex jiksbilna s-salvazzjoni tagħna.

Il-Kelma

     L-Ewwel Qari tal-lum, meħud mill-ktieb ta’ Bin Sirak, huwa stedina għall-umiltàu biex wieħed ma jitkabbarx meta jkollu l-ġid, anzi jaqsmu ma’ min huwa fqir u fil-bżonn.  Is-Salm Responsorjali, minn Salm 67, juri li l-Mulej jaħseb ukoll fil-fqir u l-batut u ħejja post għalihom, għax Alla huwa “Missier il-Ħniena u difensur tar-romol.”  Fit-Tieni Qari mill-ittra lil-Lhud insibu li fir-Rabta l-Qadima l-Lhud kienu jersqu lejn Alla bil-biża’ u t-tregħid.  L-awtur ta’ l-ittra lil-Lhud iħeġġeġ lin-nies jersqu lejn il-Mejda Ewkaristika mingħajr biża’.  Fil-Vanġelu ta’ San Luqa llum insibu lil Ġesù jidħol għand wieħed mill-kapijiet għall-ikla.  Juża dan il-mument biex joħroġ fil-beraħ il-problema ta’ dawk li jagħmlu kollox għal wiċċ in-nies b’tant suppervja.  Isostni li ta’ l-ewwel jiġu l-aħħar u ta’ l-aħħar  l-ewwel.  Hemm bżonn eżerċizzju kbir fl-umiltà.

Il-Ħajja

1. Kemm tassew qatt għamilna eżami tal-kuxjenza dwar is-suppervja u l-egoiżmu fil-ħajja tagħna? Dejjem trid tgħaddi tiegħek?  Dejjem int għandek raġun?
2. Kemm qatt irriflettejt dwar l-għażliet li għamilt fil-ħajja tiegħek għall- foqra?
3. Il-Mejda Ewkaristika tagħtina l-qawwa u ssaffina mill-egoiżmu u s-suppervja għax nirċievu l-ġisem u d-demm ta’ Kristu mimlijin tjubija u fejqan. Kemm qed nersqu lejn dan is-sagrament bil-ferħ u mingħajr biża’?
4. L-għażliet f’ħajjitna jridu jkunu ċari favur u mal-Mulej. Minkejja d-difetti tagħna hemm bżonn li ninħallu mis-suppervja u ngħixu b’umiltà l-jiem ta’ ħajjitna.

Id-Djalogu

  Mulej, taf li xi ftit jew wisq

  jien supperv.

  Għinni nħares lejk,

  lejn is-Salib,

  biex nagħraf inkun umli fil-ħajja tiegħi.

 

L-20 Ħadd Matul is-Sena

LESTI GĦAL ĠLIEDA!

Ġeremija 38: 4-10; Salm 39;  Lhud 12 :1-4; Luqa 12:49-53

Il-Vanġelu

     “Nar ġejt inqiegħed fuq l-art, u kemm nixtieq li diġà qabad!  Iżda hemm magħmudija li biha għandi nitgħammed, u x’diqa għandi sa ma dan iseħħ!  Taħsbu intom li jien ġejt inġib il-paċi fid-dinja? Le, ngħidilkom, imma l-firda;  għax mil-lum ‘il quddiem ħamsa minn nies f’dar waħda jkunu mifruda bejniethom, tlieta kontra tnejn u tnejn kontra tlieta;  jinfirdu l-missier kontra  l-iben u l-iben kontra l-missier, l-omm kontra l-bint u l-bint kontra l-omm, omm ir-raġel kontra mart binha u mart l-iben kontra omm żewġha.”

 

Il-Ħsieb

     “Nar ġejt inqiegħed fuq l-art, u kemm nixtieq li diġà qabad.”  Huwa l-kliem ta’ Ġesù, kliem li juri li rridu nkunu lesti għal ġlieda kbira magħna nfusna u kontra l-kurrenti li jdawruna.  Kliem li juri li tgħix ma’ Ġesù jfisser li tkun sinjal ta’ kontradizzjoni, li trid tmur kontra l-għażliet egoistiċi tiegħek, li trid tinqata’ minn ħafna affarijiet ta’ din id-dinja u tagħti l-ewwel post fil-ħajja tiegħek lil Alla.  Ġesù ġie fid-dinja b’messaġġ ċar u biex jagħtina viżjoni ċara lejn fejn nindirizzaw il-mod ta’ ħajja tagħna.  Huwa għalhekk li ħafna minna jridu jkunu ħajjin fil-fidi tagħhom, fl-azzjonijiet li jwettqu kuljum.  Ġesù juri li tkun miegħu jfisser li tiġġieled battalja kuljum kontra l-kurrenti ta’ madwarna.

Il-Kelma

     L-Ewwel Qari, meħud mill-Ktieb tal-Profeta Ġeremija, juri li fil-qadi tal-missjoni tiegħu l-Profeta kellu jkun sinjal ta’ kontradizzjoni; in-nies ma jifhmuhx u jkollu jħallas għall-verità li kien qed jippriedka.  Is-Salm 39 li ntennu fis-Salm Responsorjali tal-lum jurina iżda li l-Mulej qatt m’hu se jħallina waħedna u għalhekk:  “Ittamajt b’tama qawwija fil-Mulej, u miel lejja u sema’ l-għajta tiegħi.”  Fit-Tieni Qari, meħud mill-Ittra lil-Lhud, l-awtur iħeġġiġna biex nagħtu xhieda ta’ dak li nemmnu.  Iġib l-eżempju ta’ tellieqa.  Fil-Vanġelu tal-lum, meħud minn San Luqa, għandna x-xewqa ta’ Ġesù li jsaffi bin-nar dak li l-bniedem ikun akkumula bid-dnub.  It-tieni parti turi l-isfida li għaliha jrid jidħol il-bniedem kemm-il darba jkollu jagħżel ħajja ġdida.

 

Il-Ħajja

1. Il-ħajja tiegħek hija sinjal ta’ kontradizzjoni għal dawk ta’ madwarek għall-mod kif tgħix il-fidi tiegħek?
2. Tirrifletti kemm tassew qed tgħix bħall-oħrajn għax tinġarr mill-kurrent, jew bħal Kristu: tgħix għall-oħrajn permezz tal-fidi bbażata fuq it-tagħlim ta’ Ġesù li huwa nar iħeġġeġ kuljum?
3. Inti lest għall-ġlieda kontra tiegħek innfisek u kontra l-kurrenti ta’ madwarek?
4. Kemm tassew qed tħoss li, bħala nisrani, inti trid taħdem għall-verità fuq it-tagħlim ta’ Ġesù?
5. F’dan is-sajf il-fidi tiegħek marret ukoll il-baħar?

Id-Djalogu

  Mulej,

  għinni biex jiena wkoll

  inqabbad in-nar ta’ mħabbtek

  fl-ambjent tiegħi.

Id-19-il Ħadd Matul is-Sena

NISTENNEW B’FIDUĊJA!

Għerf 18: 6-9;  Salm 32;  Lhud 11,1-2; 8-19; Luqa 12:32-48

Il-Vanġelu

     F’dak iż-żmien, Ġesù qal lid-dixxipli tiegħu: “Le, merħla ċkejkna, tibżgħu xejn, għax Missierkom għoġbu jagħtikom is-Saltna!  Bigħu ġidkom u agħtuh karità u fittxu għalikom infuskom boroż li ma jitmermrux, teżor li ma jiġix nieqes  fis-sema, fejn la l-ħalliel ma jersaq u lanqas il-kamla ma tħassar.  Għax fejn hemm it-teżor tagħkom, hemm tinsab qalbkom ukoll.”

      “Żommu ġenbejkom imħażżma u l-imsiebaħ tagħkom mixgħula;   kunu bħal nies jistennew lil sidhom lura mill-festa tat-tieġ, biex malli jiġi u jħabbat jiftħulu minnufih.  Henjin dawk il-qaddejja li meta jiġi sidhom isibhom jishru! Tassew ngħidilkom, li hu jitħażżem, iqegħedhom madwar il-mejda, u jgħaddi quddiemhom iservihom.  U kieku kellu jiġi fil-ħin tat-tieni sahra, jew tat-tielet, u jsibhom xorta waħda fuq dmirhom, henjin huma!  Kunu afu dan, li kieku sid id-dar kellu jkun jaf xħin ikun ġej il-ħalliel ma kienx se jħalli min jinfidlu l-ħajt ta’ daru.  Mela kunu lesti intom ukoll, għax qatt ma tistgħu tobsru s-siegħa li fiha jiġi Bin il-bniedem.”

     “Mulej,” qallu Pietru, “din il-parabbola qiegħed tgħidha għalina, jew għal kulħadd?”  Wieġbu l-Mulej: “Int min tgħid li hu l-qaddej fidil u għaqli? Min hu dak li s-sid iqiegħdu fuq in-nies tad-dar biex jagħtihom sehemhom f’ħin l-ikel?   Hieni dak il-qaddej li sidu jiġi u jsibu jagħmel dan.  Ngħidilkom is-sewwa, li jafdalu ġidu kollu f’idejh.  Imma nagħmlu mod li dak il-qaddej jibda jgħid f’qalbu, ‘Sidi jiddawwar ma jiġi,’ u jaqbad isawwat lill-qaddejja kollha, rġiel u nisa, u jiekol u jagħtiha għax-xorb u s-sokor;  sid dak  il-qaddej jasal f’jum meta ma jkunx jistennieh, f’siegħa li fiha jieħdu għal għarrieda, u jagħmlu bċejjeċ u jagħtih dak li ħaqqhom in-nies li m’humiex fidili.  U dak il-qaddej li jkun jaf xi jrid sidu, u madankollu ma jħejjix jew ma jagħmilx li jrid sidu, swat kbir jaqla’.  Min imbagħad, bla ma jkun jaf xi jrid sidu, jagħmel xi ħaġa li jkun ħaqqha s-swat, dan ftit jissawwat. Għax lil min tawh ħafna, ifittxu li jieħdu ħafna mingħandu; u min ħallewlu ħafna f’idejh, iżjed jippretendu mingħandu.

 

Il-Ħsieb

     Kollox irridu malajr illum.  Kollox mgħaġġel u malajr.  Dan huwa r-ritmu tal-ħajja tagħna.  Min ma jgħaġġilx insejħulu kull titlu:  artab, rieqed, eċċ.  Iżda minkejja din l-għaġla kollha, fil-ħajja tagħna sirna nies li ninjoraw l-ovvju,  ħafna drabi aljenati kif ukoll mhux attenti għal dak li jseħħ madwarna.  U dan b’mod speċjali fejn tidħol il-fidi tagħna.  Il-Mulej jgħidilna llum:  “|ommu ġenbejkom imħażżmin u l-imsiebaħ tagħkom mixgħula, kunu bħal nies li qegħdin jistennew lil sidhom jiġi mill-festa tat-tieġ, biex malli jiġi jħabbat jiftħulu malajr!”

     Hemm bżonn li bħala nsara nkunu on alert  għall-mod kif qed ngħixu aħna u kif se nimpenjaw ruħna fis-soċjetà li qed ngħixu fiha.  U għalhekk l-istennija ma tridx tkun waħda passiva iżda attiva b’impenn u ħidma.  Naraw id-differenza bejn dak il-qaddej fidil u l-qaddej imħawwad mingħajr ebda sens ta’ stennija.  Il-ħajja tagħna hija kollha stennija, mhux idejna fuq żaqqna iżda stennija ta’ fidi b’ħidma u fiduċja.

Il-Kelma

     Fl-Ewwel Qari, meħud mill-Ktieb ta’ l-Għerf, għandna silta li titkellem dwar dak il-lejl ta’ biża li fih seħħ l-aħħar u l-agħar kastig li laqat lill-Eġizzjani talli ma ridux jeħilsu l-poplu Lhudi.  Kien lejl iebes ta’ stennija b’fiduċja għall-poplu Lhudi.  Fis-Salm Responsorjali, minn Salm 32, għandna għanja ta’ tifħir għall-Mulej li għażilna bħala l-poplu u l-wirt tiegħu.

     Fit-Tieni Qari, meħud mill-ittra lil-Lhud, għandna tifsira ta’ x’għandha tkun il-fidi tagħna, li hija l-pedament ta’ dak kollu li nwettqu.  Fil-Vanġelu ta’ San Luqa għandna l-parabbola li fiha Ġesù jqabbel dak kollu li jagħmel il-qaddej tajjeb ma’ dak li jwettaq il-qaddej il-ħażin.  Hemm messaġġ għalina lkoll biex inkunu dejjem imħejjija għal meta jsejħilna l-Mulej.

Il-Ħajja

1. Kemm tassew tħoss li l-ħajja tiegħek hija mħejjija tajjeb għal meta se jsejjaħlek il-Mulej?
2. Dan ma għandniex nagħmluh b’sens ta’ biża’, iżda b’sens ta’ mħabba kbira lejn dak Alla li huwa missierna u jrid biss il-ġid u s-salvazzjoni tagħna.
3. Kemm tassew, kif smajna fit-Tieni Qari, qegħdin nibnu kollox fuq il-fidi tagħna nisranija? Kull proġett ta’ ħajjitna?
4. Il-Mulej iridna nishru iżda fl-istess ħin naħdmu bla waqfien għas-saltna ta’ kulħadd bil-misssjoni u l-ħidma fdata lilu.

Id-Djalogu

  Mulej, inti għidtilna li inti

  IT-TRIQ, IS-SEWWA U L-ĦAJJA

  Għinna biex ilkoll kemm aħna nagħrfu

  li l-uniku mezz ta’ ħajjitna

  tkun inti,

  biex nersqu aktar lejk

  fix-xandir tas-Saltna ta’ Alla

  fil-ħidma tagħna ta’ kuljum.

  Grazzi talli tgħinna nwettqu dan.

It-18-il Ħadd Matul is-Sena

MINGĦAJR ALLA… IL-VOJT!

Qoħelet  1,2:2,21-23;  Salm 94;  Kolossin 3:1-4, 9-10; Luqa 12:13-21

Il-Vanġelu

     Xi ħadd mill-folla qallu: “Mgħallem, għid lil ħija jaqsam il-wirt miegħi.”  “Ħabib,” wieġbu Ġesù, “min qegħedni mħallef fuqkom, jew qabbadni nqassmilkom il-ġid bejnietkom?”  Mbagħad qal lin-nies: “Iftħu għajnejkom u ħarsu rwieħkom minn kull regħba, għax imqar jekk wieħed ikollu bir-radam, ħajtu ma tiddependix mill-ġid li jkollu.”  U qalilhom parabbola: “Wieħed raġel għani ġabar kotra ta’ frott mir-raba’ tiegħu.  U beda jaħseb u jgħid bejnu u bejn ruħu, ‘X’se nagħmel? Għax dan il-frott kollu ma għandix fejn naħżnu!  Ara x’nagħmel,’ qal, ‘inħott l-imħażen li għandi u nibni oħrajn akbar, u naħżen fihom il-qamħ u l-ġid kollu li għandi.   Mbagħad ngħid lili nnifsi: Ruħi, għandek ħażna kbira ta’ ġid għal bosta snin; mela strieħ, kul, ixrob, ixxala!”  Iżda qallu Alla, ‘Iblah li int! Dan il-lejl stess jitolbuk ruħek lura. U l-ħwejjeġ li ħejjejt għalik, ta’ min ikunu?’   Hekk jiġrilu min jiġma’ l-ġid għalih innifsu bla ma jistagħna quddiem Alla.”

 

Il-Ħsieb

     Ħafna drabi norbtu qalbna f’din id-dinja ma’ tant affarijiet kbar u żgħar, ħafna minnhom ikunu materjali jew oġġetti jew anki persuni.  Niġu mogħmija li t-teżori tagħna jinsabu biss f’din id-dinja.  Quddiem il-mewt nindunaw li kollox jispiċċa jew kważi… dak li nkunu żrajna fis-sema m’hu se jintemm qatt speċjalment l-għemejjel ta’ karità u dak kollu li nostru għalina fis-sema.  Bil-kliem ta’ Qoħelet il-profeta, frugħa tal-frugħat, il-Mulej fil-Vanġelu tal-lum iwissina u jħeġġiġna biex inkunu għaqlin u naħarbu mir-regħba li tista’ tfisser dak kollu li nkunu ħdimna għalih fil-ħajja tagħna.  Din hija twissija ferm attwali għal-lum b’mod speċjali meta tisma’ tant ġlied fuq il-wirt.  Nintilfu wara tant affarijiet ta’ din il-ħajja u ma nagħtux kas biex infittxu li naħdmu għall-ħajja ta’ dejjem.

Il-Kelma

     Fl-Ewwel Qari tal-lum mill-Ktieb tal-Profeta Qohelet, il-messaġġ ċentrali huwa li dak kollu li jgħaddi ma jistax jimla qalb il-bniedem.  Is-Salm Responsorjali, meħud minn Salm 94, itenni li rridu nfasslu ħajjitna billi nisimgħu leħen il-Mulej u ma nwebbsux qalbna.  Fit-Tieni Qari mill-Ittra ta’ San Pawl lill-Kolossin għandna wkoll messaġġ qawwi:  jekk aħna rxuxtajna ma’ Kristu rridu nfittxu l-ħwejjeġ tas-sema.  Fil-Vanġelu tal-lum Ġesù jwissi fuq ir-regħba u kif għandna naħdmu u ngħixu ħajjitna marbuta ma’ Alla fejn nostru t-teżor tal-ħidma tagħna.

Il-Ħajja

1. Aħna rxuxtajna ma’ Kristu. Għalhekk miegħu biss irridu norbtu  qalbna u nfittxu biss il-ħwejjeġ tas-sema.  Dan jagħmel sens kbir fl-għażliet li nagħmlu fil-ħajja tagħna.
2. Bħala nsara ħajjin hemm bżonn li nagħrfu li ma għandna qatt norbtu qalbna ma’ ħwejjeġ ta’ din id-dinja li jgħaddu. Hemm bżonn nibdew tassew inħobbu lil Alla billi nħarsu dak li jrid minna.
3. Inti qed tiġma’ l-ġid għalik innifsek mingħajr ma tistagħna quddiem Alla?  Aghmel ftit eżami tal-kuxjenza.
4. Hemm bżonn li kuljum nagħmlu reviżjoni ta’ ħajjitna. Fejn qed inpoġġu l-prijorità ta’ l-għażliet tagħna u fejn qed nersqu lejn Alla.

Id-Djalogu

  Il-kliem tiegħek Mulej

  huwa spirtu u ħajja

  Inti għandek il-kliem tal-ħajja ta’ dejjem

  Għinni nwettqu fil-ħajja tiegħi.

 

Is-17-il Ħadd Matul is-Sena

TAF TITLOB?

Ġenesi 18:20-22;  Salm 137;  Kolossin 2:12-14; Luqa 11:1-13

Il-Vanġelu

     Darba kien qiegħed xi mkien jitlob. Kif spiċċa mit-talb, wieħed mid-dixxipli tiegħu qallu: “Mulej, għallimna nitolbu, bħalma Ġwanni wkoll għallem lid-dixxipli tiegħu.”  U qalilhom: “Meta titolbu, għidu,

‘Missier, jitqaddes ismek,

tiġi Saltnatek.

Ħobżna ta’ kuljum agħtina kuljum.

U aħfrilna dnubietna,

għax aħna wkoll naħfru lil kull min

hu ħati għalina,

u la ddaħħalniex fit-tiġrib.’ “

Qalilhom ukoll: “Wieħed minnkom ikollu ħabib li jiġih f’nofs ta’ lejl u jgħidlu, ‘Ħabib, islifni tliet ħobżiet, għax ġie għandi wieħed ħabib tiegħi mill-vjaġġ u ma għandix x’nagħtih.’  U l-ieħor iwieġbu minn ġewwa u jgħidlu, ‘Iddejjaqnix; issa l-bieb magħluq, u wliedi qegħdin  fis-sodda miegħi; ma nistax inqum nagħtik.’ Ngħidilkom jien, li jekk ma jqumx jagħtih għax ħabib tiegħu, iqum u jagħtih kull ma jkollu bżonn minħabba l-wiċċ sfiq tiegħu. U jiena ngħidilkom:  Itolbu u jingħatalkom, fittxu u ssibu, ħabbtu u jiftħulkom.   Għax min jitlob, jaqla’; min ifittex, isib; u min iħabbat, jiftħulu.  Min hu dak il-missier fostkom li, jekk ibnu jitolbu ħuta, minflok ħuta jagħtih serp?   Inkella jekk jitolbu bajda jagħtih skorpjun?   Mela jekk intom, nies ħżiena bħalkom, tafu tagħtu lil uliedkom ħwejjeġ tajba, kemm aktar il-Missier mis-smewwiet jagħti spirtu qaddis lil dawk li jitolbuhulu!”

 

Il-Ħsieb

     It-talb, kif naħsbu xi kultant, irridu nagħmluh bilfors, qisu kien xi rit kultwali obbligatorju għall-Insara kollha.  Iżda t-talb huwa mument ta’ relazzjoni intima mal-Ħallieq tagħna u ma’ l-Imgħallem tagħna.  Huwa djalogu, mument li fih tagħmel sħaring, qsim ta’ esperjenza mal-Mulej.  Kemm tassew qed inqisu lit-talb b’dan il-mod?   Kemm qed insibu ħin biex nitolbu fil-ħajja tagħna?  Kemm tassew qed inkunu nies ta’ talb fil-prijoritajiet tagħna d-dar, ix-xogħol, l-iskola?  S’intendi t-talb jitlob miegħu wkoll li nagħtu xhieda.  It-talb huwa ringrazzjament lil Alla għal dak kollu li jagħtina u mhux biss dak li rridu issa.  Irridu wkoll nitolbu biex niskopru r-rieda ta’ Alla fil-futur.

     Għalhekk illum il-Mulej jgħallimna nitolbu bit-talba tal-Missierna.  Hija talba li tiġbor kemm ir-ringrazzjament li rridu nagħtu lil Alla kif ukoll it-talb tagħna għal issa, għal dak li rċevejna u dak li se nirċievu.  Il-Mulej iħeġġiġna biex nitolbu.  Se nkomplu nibnu din ir-relazzjoni ħajja mal-Ħallieq kull ħin?

Il-Kelma

     Fl-Ewwel Qari tal-lum, meħud mill-Ġenesi, għandna djalogu bejn Alla u Abraham li fih toħroġ l-importanza tad-djalogu mingħajr waqfien.  Il-ħtieġa tat-talb narawha wkoll fis-Salm Responsorjali tal-lum fejn insibu li fil-jum li fih sejjaħtlek smajtni Mulej.  Il-Mulej jismagħna kull darba li nduru lejh.  San Pawl, fit-Tieni Qari mill-Ittra lill-Kolossin, juri li aħna se nsalvaw bil-grazzja ta’ Alla u mhux billi nħarsu l-liġijiet tar-Rabta l-Qadima.  Aħna nieħdu din il-grazzja tas-salvazzjoni fil-Magħmudija.  Fil-Vanġelu ta’ San Luqa nsibu lil Ġesù jwieġeb għat-talba ta’ l-Appostli biex jgħallimhom jitolbu.  Huwa jgħallimhom il-Missierna li tiġi għalhekk il-mudell tat-talb kollu tagħna.  Ġesù jinsisti biex nitolbu kontinwament u b’hekk noħolqu rapport ta’ mħabba mal-Missier.

Il-Ħajja

1. Liema huma l-mumenti ta’ talb kuljum fil-ħajja tiegħek personali? Tħossok li tingħaqad ma’ Alla fit-talb?
2. Kemm qed inkunu nies ta’ talb u nitolbu li titwettaq ir-rieda ta’ Alla fil-ħajja tagħna?
3. Fid-dawl tat-talba tal-Missierna, it-talb tagħna qed ikun ukoll talb ta’ ringrazzjament u radd ta’ ħajr lil Alla jew nitolbu biss meta niġu daharna mal-ħajt?
4. Fil-mument li aħna nitolbu u nippretendu li nsibu lil Alla Mħabba  lest li jgħinna, irridu nkunu lesti li ngħinu b’kull mezz lill-proxxmu tagħna.

Id-Djalogu

   Missierna li inti fis-smewwiet,

   jitqaddes ismek,

   tiġi saltnatek,

   ikun dak li trid inti

   fis-sema u fl-art.

Is-16-il Ħadd Matul is-Sena

TINKWIETA?

1. Ġenesi 18:1-10a;  Salm 14;  Kolossin 1:24-28; Luqa 10:38-42

Il-Vanġelu

      Huma u sejrin, daħal f’raħal, u laqgħetu għandha waħda mara jisimha Marta.  Din kellha oħtha, jisimha Marija, li niżlet bilqiegħda f’riġlejn il-Mulej tisimgħu x’kien qiegħed jgħid.  Iżda Marta kienet moħħha fuq il-ħafna xogħol tad-dar. Mbagħad resqet u qaltlu: “Mulej, m’intix tara kif oħti ħalliet ix-xogħol kollu fuqi biss? Mela għidilha taqbad tagħmel xi ħaġa miegħi!”  Qabeż il-Mulej u qalilha: “Marta Marta! Inti taħseb wisq u tinkwieta fuq ħafna ħwejjeġ;  imma waħda hi meħtieġa. U Marija għażlet l-aħjar sehem, li ma jitteħdilhiex.”

 

Il-Ħsieb

     L-inkwiet ħafna drabi jkisser l-armonija u l-ħajja tal-bniedem.  L-inkwiet fuq affarijiet kbar u żgħar ma jħallikx fil-kwiet u l-paċi.  Il-messaġġ li l-Mulej irid jagħtina llum huwa li aktar ma nintrabtu ma’ affarijiet ta’ din id-dinja aktar se jkollna nkwiet.  Hemm bżonn li nafdaw f’Alla u li l-veru teżor tagħna hu fis-sema.  Ġesù jenfasizza, fil-laqgħa ma’ Marta u Marija, li huwa importanti li kollox jitlaq mis-smigħ tal-Kelma ta’ Alla, biex wara, l-affarijiet u l-proġetti tagħna materjali jagħmlu sens fil-ħajja tagħna.  Ħafna drabi l-inkwiet inġibuh b’idejna stess meta nwarrbu l-kliem ta’ Ġesù u nimxu wara l-proġetti ta’ rasna.

Il-Kelma

     Fl-Ewwel Qari tal-lum, meħud mill-Ktieb tal-Ġenesi, għandna l-eżempju ta’ Abraham li jilqa’ għandu tlett irġiel li ma jafhomx.  L-ospitalità tiegħu hija mbuttata mill-fatt li jwettaq dak li jitlob minnu Alla kuljum.  L-ospitalità hija virtu li n-nisrani jrid jipprattika tul ħajtu kollha.  Fis-Salm Responsorjali, minn Salm 14, għandna mistoqsija:  Mulej min jgħammar fid-dar tiegħek?  Din il-mistoqsija ssib it-tweġiba tagħha fil-attitudni tagħna għall-Kelma ta’ Alla.  Fit-Tieni Qari, meħud mill-Ittra ta’ San Pawl lill-Kolossin, għandna lill-Appostlu jqis lilu nnifsu bħala l-Ministru tal-Misteru, li huwa Kristu, li jissallab għall-Knisja tiegħu.  Fil-Vanġelu tal-lum, meħud minn San Luqa, għandna l-laqgħa ta’ Ġesù ma’ Marta u Marija fejn iwissi lil Marta biex tpoġġi l-Kelma t’Alla bħala l-prijorità ta’ ħajjitha kif għamlet Marija.

 

Il-Ħajja

1. Qatt irriflettejt x’inhu l-veru nkwiet tiegħek fil-ħajja ta’ kuljum? Kif qed tipprova tegħleb dan l-inkwiet?  Tersaq lejn Ġesù fl-Ewkaristija?
2. Il-Mulej itenni llum li ma jridniex ninkwetaw fuq l-affarijiet materjali. Fejn huwa t-teżor ta’ qalbek fuq din l-art?
3. Bħal Marija, lest li titlaq kollox biex tisma’ lil Ġesù?
4. Li tisma’ lil Ġesù jfisser li xxandru, kif itenni San Pawl fit-Tieni Qari, kif ukoll li tilqa’ ’l barrani kif jagħmel Abraham fl-Ewwel Qari tal-lum. Lest għal dawn l-isfidi?
5. Il-Kelma tal-Mulej hija sfida-avventura-missjoni, iżda rridu kull ħin nisimgħu aktar il-Mulej biex nagħarfu xi jrid minna.

 

Id-Djalogu

  Aħna nisimgħu l-kelma tiegħek,

  ħafna drabi nħossuha iebsa.

  Għinna, Mulej, biex ilkoll kemm aħna

  naċċettaw il-qawwa ta’ din il-kelma

  li tibdel il-mod ta’ ħajja tagħna.

  Għinna biex nilqgħu lill-barrani

  u nxandru l-kelma tiegħek kull ħin.