MA EMMINX – MA NEMMNUX!  IT-2 ĦADD TAL-GĦID – 3 T’APRIL 2016

 

     Il-laqgħa bdiet bit-talba tal-Moviment u wara sar il-qari tal-Vanġelu skond San Gwann, Kapitlu 20, versi 19 – 31.

     Fil-bidu ta’ dan il-Vangelu, naraw lil Gesu’ jsellem lid-dixxipli tiegħu bil-kliem “Is-sliem għalikom”.  Din kienet tislima li kienet tintuża mill-Ebrajki.

     X’inhu s-sliem u mnejn jiġi?  Ħafna drabi aħna naħsbu li biex ikollna l-paċi ġo fina rridu nsibuha fl-ambjent ta’ madwarna.  Imma fil-fatt ma jistgħax ikun hemm paċi esterna jekk qabel ma jkunx hemm paċi interna – fil-qalb tagħna.  Il-ħafna għawġ li naraw madwarna – terroriżmu, ġlied, abbużi, etc. huma riżultat ta’ dan in-nuqqas ta’ paċi nterna.  U jekk infittxu iżjed fil-fond, insibu li l-għerq ta’ dan kollu hu l-alla tal-flus – ir-rebgħa!

     Ġesu’ ġie biex iġib il-paċi u l-maħfra.  Lid-dixxipli qalilhom “Id-dnubiet li taħfru jkunu maħfura u d-dnubiet li żżommu jkunu miżmuma”  Hawnhekk ġiet imfissra din is-sentenza.  Kwalunkwe dnub, kbir kemm hu kbir, jista’ jinħafer, basta jkun hemm indiema sinciera.  Ma rridux inkunu arroganti u nippretendu l-maħfra qisa xi dritt tagħna.  Alla jaħfrilna ghax iħobbna, u mhux għax Hu obbligat jagħmel hekk.

     Aħna ħafna drabi f’dan il-Vangelu nittimbraw lil Tumas bħala wieħed li ma jemminx jekk ma jarax.  Fil-fatt Tumas ried jagħmel esperjenza personali ta’ Kristu Rxoxt, u Ġesu’ laqa’ din ix-xewqa meta qallu biex imiss il-pjagi tiegħu.  U hawnhekk Tumas jagħmel dik l-istqarrija ta’ fidi “Mulej tiegħi u Alla tiegħi” – stqarrija li ħadd mill-appostli l-oħra ma kien għamel.

     Fl-aħħar tal-laqgħa qamet diskussjoni dwar il-maħfra tad-dnubiet, u liema huma dawk li huma miżmuma.  Ingħata l-eżemplu tal-abort, li jġib miegħu l-iskomunika.  Din tinħall biss mill-Isqfijiet u ċerti ordnijiet bhad-Dumnikani, l-Agostinjani etc.  Din is-sena tal-Ġublew tal-Ħniena, il-Papa Franġisku ta’ permess lill-qassisin kollha biex iħollu din l-iskomunika.  Ġie spjegat ukoll li anke min jipparteċipa b’xi mod fl-abort ikun qiegħed jidneb.  Dan id-dnub, bħalma diġa ġie spjegat, jista’ jinħafer jekk ikun hemm indiema sinciera.

     Il-laqgħa tkompliet bi kwotazzjoni:­­­­­­­­­­­­­­­­­­­­­­­ Ġesu jagħder lill-bniedem mhux biss fl-uġigħ fiżiku imma anke meta jaddi minn mumenti ta’ qtigħ il-qalb. Għalkemm kien ġa deher lid-dixxipli; fl-evanġelju tal-llum naraw kif  Hu reġa deher biex jneħħi d-dubju lil San Tumas u biex jimlieh bit-tama, kuragg u perseveranza fil-fidi tiegħu.

     Grazzi Mulej, ta’ l-attenzjoni li tagħti lil bżonnijiet ta’ kull wieħed/waħda minna.

Il-5 Ħadd tar-Randan: Ġwanni 8: 1-11.

Din hija waħda mill-isbaħ siltiet tal-Evanġelju; hija tgħaqqad l-Antik mal-Ġdid Testment. Hemm bżonn napprezzaw il-Kelma ta’ Alla li nsibu fl-Evanġelju. Għall-kuntrarju tal-insara Kattoliċi, dawk l-insara kif inhuma msejħa Protestanti jagħti importanza kbira għall-Kelma t’Alla fil-Bibbja. Forsi l-iżball tagħhom huwa li joqogħdu biss fuq il-Kelma t’Alla u jitilfu l-importanza tal-Ewkaristija. Il-Kattoliċi min-naħa l-oħra jagħtu mportanza kbira lill-Ewkaristija u hekk għandu jkun, però jagħtu ftit li xejn importanza għall-Kelma t’Alla li qiegħda hemm biex tmexxi l-ħajja tagħna.

F’din is-silta nsibu li kien mar il-poplu kollu. Il-Fariżej ħadu quddiem Ġesù mara li nqabdet tiżni fil-fatt. Il-Fariżej għamlu hekk bħala nassa kontra Ġesù għaliex il-liġi tal-Lhud kienet tgħid li suppost kellu jitla’ wkoll quddiem il-liġi r-raġel li kien magħha. Skont il-liġi tagħhom kien proprju dan ix-xhud, żewġ xhieda proprjament li kellhom jitfgħu l-ewwel ġebel lejn din il-mara meta tinstab ħatja.

Ġesù miel u beda jikteb b’sebgħu fit-trab filwaqt li qalilhom li min minnhom m’għandu l-ebda dnub seta’ jitfa’ l-ewwel ġebla. Issa min-nies kollha preżenti, kien Ġesù biss li kellu s-setgħa iħaġġarha għaliex hu kien bla dnub. Ġesù ma jitfax il-ġebel lil din il-mara għaliex dan il-każ sar ftit qabel ma Ġesù miet. Id-dejn tagħha kien għalhekk se jħallsu hu b’demmu stess. Hu kien qiegħed jaċċetta fuqu d-dnub tagħha. Anke aħna għalhekk ma niġux ikkastigati f’din id-dinja; għaliex Ġesù diġà feda d-dejn tagħna. Il-ħniena t’Alla hija għall-midneb u mhux għad-dnub. Ġesù għalhekk iħallas id-djun tagħna, mill-bidu sal-aħħar. Alla jinsa d-dnubiet tagħna għal kollox meta jaħfrilna d-dnubiet tagħna.

Meta Kristu Rxoxt iltaqa’ mal-appostli, huwa tahom l-Ispirtu s-Santu u l-paċi; imma eżżattament wara jagħtina r-rigal tal-Qrar, is-Sagrament tar-Rikonċiljazzjoni. Din hija l-laqgħa ta’ ferħ tagħna ma’ Alla. Kollox jiddependi jekk fil-prova tal-ħajja tagħna ħabbejniex u jekk ħfirniex lil ħaddieħor. Fil-parabbola tal-iben il-ħali il-missier kien qiegħed jistennieh jiġi. Xtaq lil missieru mejjet għaliex ried il-wirt tiegħu. Imma l-missier ġera lejn it-tifel meta dan ġie biex jitolbu maħfra. Il-missier bies lill-iben, jiġifieri nesa kollox; tah iċ-ċurkett u l-libsa, jiġifieri issa ma kienx għadu skjav. Meta naqbdu t-triq t’Alla aħna nħossuna kuntenti u hienja; hienja ħafna aktar minn meta naqbdu t-triq tal-ħażen u għal ftit mumenti nħossuna liberi u komdi.

Jekk it-tbatija tagħna ngħaqqduha ma’ dik ta’ Kristu, ma nkunux qegħdin naħlu din it-tbatija. Meta persuna ma tgergirx iżżejjed u taċċetta s-salib tagħha u ma tħallihiex tkissrek billi tgħaqqadha ma’ Kristu msallab; it-tisfija tal-purgatorju tibda minn din id-dinja.

Il-ġudizzji jgerrxu n-nies mill-Knisja u minn Ġesù. Il-ġebel li kienu se jitfgħu lil din il-mara huma dawn il-ġudizzji li aħna nistgħu nagħmlu. Taħlix ħin tiġġudika jew tgħid fuq in-nies.

Bħala konklużjoni nistgħu għalhekk ngħidu li Alla ma jgħajjiex jaħfer. Aħna rridu però ma naqtgħux qalbna mill-maħfra ta’ Alla u nitolbuhielu. Il-ħajja tagħna hija battalja waħda, l-importanti huwa li niġġieldu sal-aħħar u nerġgħu nersqu lejn Alla bis-sagrament tar-rikonċiljazzjoni anke meta bħala bnedmin nerġgħu naqgħu ghal ħafna aktar minn darba.

Il-laqgħa Prayer Cafe ta’ nhar il-Ġimgħa 4 ta’ Marzu bdiet bil-qari tal-Vanġelu meħud minn Lq 15:1-3,11-32. Dawn li ġejjin huma xi ftit mill-punti li ġew tratati waqt il-laqgħa.

F’dan il-vanġelu nsibu żewġ gruppi ta’ nies li qegħdin jiġru wara Ġesu biex jisimgħuh. Nsibu l-Pubblikani u l-Midinbim, li huma għatxana biex jisimgħuh; u hemm wkoll il-Fariżej u l-Imgħallmin tal-Liġi li wkoll iridu jisimgħuh imma  biex jonsbuh u jagħtuh xi gambetta. Infatti fil-bidu ta’ dan il-vanġelu nsibuhom igergru li Ġesu kien jilqa’ nies midinba  għandu. Għandna dawn iż-żewġ aspetti tal-ħajja tal-bniedem li jorbtu wkoll mal-aspetti fiż-żewġt personaġġi msemmija fil-parabola. Il-Missier fil-parabola jirraprezenta lil Alla l-missier.

F’din il-parabola tal-Iben il-Ħali għandna 4 aspetti fil-ħajja tal-bniedem u minnha rridu naraw x’jolqotna  speċjalment f’din is-sena tal-ħniena; irridu naraw x’nistgħu nieħdu minnha għal ħajjitna. Il-vrus li ma nisimgħux huma żewġ paraboli oħra, il-parabola tan-ngħaġa l-mitlufa u l-parabola tat-talent il-mitluf. Meta Papa Franġisku nieda s-sena tal-Ħniena minħabba raġunijiet li jixtieq idaħħal l-ideja tal-Ħniena f’dinja fejn il-ħniena sfortunatament qegħed tgħib; kellu dan il-vanġelu quddiemu- speċjalment il-parti tan-nagħġa l-mitlufa li hi wkoll l-                                                            logo ta’ din is-sena. Dan il-vanġelu ta’ San Luqa infatti jissejjaħ il-vanġelu tal-ħniena. San Luqa jurina li meta seħħet din il-ġrajja lu Ġesu kien riesaq lejn il-post li fih kien se jirċievi l-martirju. San Luqa jiddedika għaxar kapitli għal din il-mixja. Il-fus ta’ dawn l-għaxar kapitli huwa dan il-vanġelu; bih San Luqa ried jurina s-sens tal-Ħniena fil-missjoni ta’ Ġesu. Dawn it-tlett paraboli taqadhom is-sens ta’ imħabba gratwita, abbundanti u bla qies li għandu l-Missier speċjalment lejn il-bniedem midneb; il-bniedem mitluf. In-nagħġa u l-iben li ntilfu u reġgħu instabu b’ferħ kbir!

Din il-parabola fiha 4 taqsimiet differenti:

1. Il-pretensjonijiet tal-Iben iż-żgħir u l-firda minn ma missieru.
2. Il-ħajja mtajjra u l-waqgħa fil-ħama kemm spiritwali u kif ukoll morali tal-Iben il-Ħali.
3. L-Indiema u d-deċizzjoni li jerġa jersaq lura lejn missieru .
4. L-aspett tal-Iben il-Kbir.

F’din il-parabola sempliċi u magħrufa minn kulħadd irridu nirriflettu l-aspett tal-ħniena fiha. Hemm min isejjħilha l-vanġelu tal-vanġelu; jekk il-kotba kollha tal-vanġelu jinqerdu din il-parabola tiġbor fiha il-messaġġ sħiħ tal-vanġelu tal-ħniena u l-abbundanza. Ġesu b’din il-parabola ried iħalli messaġġ x’għamel l-Iben il-Ħali iżda riedna wkoll nħarsu lejn l-Iben il-Kbir. Ngħiduha kif inhi aktar nixxiebhu mal-Iben il-Kbir, Ġesu jridna nindunaw li m’għandniex naqgħu fil-preġudizzju tal-Iben il-Kbir. Ħaġa li Papa Franġisku jirrepeti kontinwament. Preġudizzjoni li naqgħu fih bla ma nafu kif u xi kultant kif ġie ġie.

L-Iben il-Kbir kien jintrabat mal-Farizej u l-Imgħalmin  tal-Liġi. Huwa ma telaqx mid-dar ta’ Missieru, segwa l-liġijiet ‘ “ma berbaqtlekx flusek” qallu lil missieru’ pero li ma tiksirx il-liġi biss nkunu għadna ‘l bogħod fil-mixja tal-fidi. L-Iben il-Kbir m’aċċettax lil ħuh lura – daħlet is-suppervja. Meta neżaminaw ħajjitna u nqabbluha ma tal-Iben il-Kbir – irridu noqgħodu attenti. L-Iben il-Ħali dineb imma qabad it-triq lura lejn il-Missier – lejn il-konversjoni. Jekk aħna nsara tajba rridu ngħarblu l-messaġġ li jrid jagħtina Ġesu. Noqgħodu attenti ma nagħmlux bħal Farizej – “Jien pur – ħadd ieħor irid jinbidel/jirranġa.” Parabola mimlija b’rakonti ta’ żbalji, żbal tal-Iben iż-żgħir, tal-Iben il-Kbir, imma l-iżball ċentrali hu li aħna ma nindunawx fejn aħna. U allura neħlu, nilludu ruħna li mexjin imma nibqgħu mwaħħlin mal-użanzi u d-drawwiet li m’għandniex il-kuraġġ li ninqatgħu minn magħhom. Hawn ġiet kwotata sentenza li qal Fr Philip Cutajar waqt eserċizzi “Aħna l-Maltin għandna bżonn nieqfu ngħixu r-reliġjon, u r-reliġjosita u nibdew ngħixu l-FIDI.” Jekk ngħixu l-Fidi ; ir-reliġjon u r-reliġjosita tiġi waħeda – issir l-istil ta’ kif ngħixu. L-iskop ta’ din il-parabola hu li twassalna biex nifmhu min hu Alla, x’inhu l-ġudizzju tiegħu. Il-ġudizzju t’Alla lilna jdejjaqna għaliex hu mibni fuq kriterju differenti minn tagħna u naħsbu li huwa inġust.

Hawn ġejna mfakkra fil-parabola meta s-sid ħareġ ifittex ħaddiema  – mar fl-ewwel siegħa u baqa ħiereġ f’ħinijiet differenti isib ħaddiema aktar. Meta ġie biex iħallas – ħallas lil kulħadd l-istess! X’agħmlu dawk li ġew fl-ewwel siegħa? Bdew igergru. Ppretendew li dawk li kienu bdew jaħdmu fl-ewwel siegħa kellhom jieħdu aktar minn dawk li ġew warajhom. Imma ‘s-sid’ ALLA rrispondihom: “b’ġidi – b’dak li hu tiegħi ma nistax nagħmel li rrid jien?” Dak li kien wegħdhom kien tahulhom.

Matul din is-sena tal-Ħniena meta nisimgħu li rridu nkunu ġeneruzi ma l-oħrajn naħsbu li kemm il-darba nħabbtu lil ġar tagħna u ngħamlu paċi miegħu nkunu lħaqna l-iskop ta’ din is-sena – imma fil-fatt rridu nibdew minna nfusna – irridu naħfru lilna nfusna, għaliex jekk iktar iridu nkunu qrib t’Alla rridu naħfru u ninsew li rċevejna xi tort u ninsew li għandna f’qalbna għal ħaddieħor għaliex interessanti li l-Mulej jgħidilna ħobbu l-għadu tagħkom dik hija t-‘twist’ importanti mit-Testment l-Qadim għat-Testment il-Ġdid li nindunaw li l-ewwel għadu tagħna mhux ta’ ħdejja jew ta’ faċċata huwa aħna stess għax inżommu f’qalbna; meta lil Ġesu kienu qegħdin jaħqruh mingħajr ħtija kif stqarr Pilatu stess: “ Jien ma nsib l-ebda ħtija f’dan ir-raġel.”( U dan lanqas kien xi dixxiplu ta’ Ġesu! ) Ġesu xorta talab għal min kien qiegħed jaħqru minn fuq il-forka – s-salib tiegħu – ħafer lil min kien qiegħed jaħqru. Mela aħna ma rridux nibqgħu irrabjati. Huwa diffiċli. Pero għandna l-għajnuniet – għandna l-Ispirtu t’Alla li jista’ jieqaf magħna. Irid jkollna l-Fidi mhux r-reliġjosita – il-FIDI li ċċaqlaq il-muntanji. Biex aħna dejjem nersqu lejn il-perfezzjoni – il-fidi li twassalna nifhmu li fejn ma naslux aħna hemm Ġesu jaqbeż għalina. Il-Papa Franġisku jħobb jgħid li Ġesu għad għandu l-Pjagi f’idejh u f’saqajh; u kull meta jrid jinterċjedi għalina lill Alla ’l missier jgħidlu ‘ Dawn minħabba fihom għamilthom biex nressaqhom lejn imħabbtek.” Irid ikollna Fidi li għandna lil xi ħadd jaqbeż għalina. Għaliex il-Fidi tgħina naslu fejn ma naslux weħidna – tagħtina fiduċja li Ġesu qiegħed jaqbeż għalina. Imma sfortunatament aħna l-aktar sentimenti faċli għalina huma l-vendetta u t-tpattija – allura s-salib huwa skandlu għax fuqu Ġesu urina li t-tweġiba għal vendetti mhumiex il-vendetti oħra imma l-imħabba u għalhekk is-Salib idarrasna.

Lura għal parabola tal-qari tal-vanġelu ta’ nhar il-Ħadd li ġej. Fiha għandna l-sfond ta’ dar din tirraprezenta d-dinja. L-Missier/ir-raġel jirraprezenta lil Alla. Nsibu wkoll lil qaddejja – mela kien hemm universalita. Mhux il-figura tal-iben il-Ħali ddarras lil Alla iżda l-figura tal-iben il-kbir li ħafna drabi jirraprezenta lilna. Ta min isemmiha l-Parabola tal-Missier il-Ħali fl-Imħabba din il-parabola. Niftakru li madwarna hemm ta’ denbu twil ma saqajna u dejjem jimlilna moħħna b’idejat żbaljati dwar Alla; għaliex dejjem nippretendu li Alla għandu jagħmel l-affarijiet kif irridu aħna u mhux kif jaħseb li l-aħjar Hu għalina. U b’hekk tonqosna l-umilta.

Fil-Bibbja nsibu ġrajjiet oħra fejn naraw l-infinita tal-Imħabba t’Alla. Per eżempju fit-tieġ ta’ Kana biddel 600 litru ilma f’inbid, bihom kien jisqi raħal sħiħ; fit-tkattir tal-ħobż nġabbru tnax-il-qoffa wara li kiel kulħadd; is-sajda mirakoluza tant qabdu ħut li kienu se jgħerqu. Dawn kollha juruna l-abbundanza tal-Imħabba t’ Alla.

Anke minn fuq is-salib permezz ta’ Kristu, Alla qiegħed jgħidilna biċċirni, sawwatni, oqtolni, offendini imma jien nibqa’ nħobbok xorta.

Fil-parabola ta’ llum nsibu żewġ ulied li jirraprezentaw aspetti differenti mill-ħajja tagħna. Ma min nqablu ruħna mal-iben il-kbir jew iż-żgħir jew qisna pendlu daqqa bħal wieħed u oħra bħal ieħor?! Iż-żgħir talab lil missier jagħtih sehmu mill-ġid tiegħu,(dan jirrifletti kif aħna bħala soċjeta irridu nwarrbu lil Alla, nilludu ruħna li sirna allat minfloku!) l-missier ma jmerrihx, jaqsam ġidu maż-żewġ ulied, stmagħhom l-istess. Mela Alla ried itina l-liberta, Alla ma jrid lil ħadd skjav tiegħu – iridna miegħu b’għażla libera. Kemm il-darba nisimgħu min jgħid li r-reliġjon tgħamlek skjav – għax għandek ħafna regoli – imma l-iskop tar-reliġjon hu li nkunu ferħana “Il-ferħ tagħkom jibda minn din id-dinja.” Ħafna drabi hawn min ifittex il-ferħ f’drogi, fix-xorb iżda dawn huma ferħ ta’ ftit mumenti biss, b’konsegwenzi koroh. Kulħadd irid id-DRITTIJIET imma id-DMIRIJIET ħadd ma jridhom. U dan iġib miegħu nuqqas ta’ rispett. Qabel tela’ s-sema Kristu tagħna kmandament tal-Imħabba. Dan jitlob minna li  naħfru u li jkollna ħniena. Irridu nimxu kontra l-istint tagħna ta’ tpattija, rridu nżommu kontrol fuq ir-rabja. Alla ħares Alla kellu jirraġuna bil-mod tat-tpattija għax kieku kollha rasna maqtuha!

Fil-parabola nsibu li l-Iben il-Ħali wara li missieru tah sehmu mar u berbaq kollox u telaq lejn id-dezert – waqa’ ġuħ kbir f’dak il-pajjiz tant li kellu jmur jirgħa l-ħniezer. Ħafna drabi ssib min jistaqsi ‘ Imma Alla fejn kien f’xi dizgrazzja bħal dik tal-holocaust’ Kien hemm f’nies eroj bħal Edith Stein, Maximillion Kolbe. Dak iż-żmien ir-rgħajja tal-ħnieżer lanqas kienu jitħallew jidħlu fil belt – mela l-iben il-Ħali kien mess il-qiegħ nett. F’dik is-sitwazzjoni irejalizza li l-qaddejja f’dar missieru  kienu ferm aħjar minnu – nidem u qabad it-triq lura lejn dar missieru – beda l-proċess tal-konversjoni. Malli rah ġej il-missier ma qagħadx janalizza b’liema indiema ġie lura iżda niżel jiġri u tah merħba b’tgħanniqa. Hawn tidher il-Ħniena bla limiti tal-Missier. L-maħfra tagħna hekk jew nfittxu l-kompromess? Jien nċedi biċċa u inti oħra! X’ħin l-iben jistqarr dnubietu l-missier lanqas qagħad iwiddbu imma ordna li ssir festa għax Ibnu kien mejjet u issa reġa’ qam. Libbsuh ċ-ċurkett u z-zarbun. Issa jidħol l-iben il-kbir fl-istorja li malli sema’ li l-missier kien qegħed jagħmel festa għal ħuh, issupervja u lanqas ried jidħol. Mudell ta’ kif inġibu ruħna aħna li mmorru l-knisja sfortunatament, nkejlu kollox bix-xiber tagħna, il-ġustizzja nagħtiha b’kompromess mhux gratwita.L-Iben il-kbir għażel li jinqata’ ’l barra mill-festa għaliex l-kriterji tal-Missier ma kienux tiegħu. L-istess jiġri lilna meta nġibu ruħna bħal Farizej naħsbu li aħna bla difetti. Issa niftakru li fil-bidu tal-parabola nsibu li l-missier qasam ġidu bejn it-tnejn indaqs. Mela dan ta’ l-aħħar kien ħa daqs l-ieħor. Dan juri nuqqas ta’ apprezzament ta’ dak li kien ġa ħa l-iben il-kbir.

Nirriflettu fuq il-ħajja tagħna fuq dawn l-erba’ mudelli: Pubblikani u l-midinbin; l-Farizej; l-Iben il-Ħali u l-Iben il-Kbir. Liema aspett jgħodd għalija fil-ħajja tiegħi? J’Alla l-mudell tagħna jkunu l-Pubblikani u l-midinbin, għax hekk ngħarfu li aħna midinba u li għandna bżonn il-maħra, u nistgħaġbu bit-tgħalim li għallimna Ġesu. Imma irridu nkunu wkoll bħal mudell tal-Iben il-Ħali li għaraf dnubietu u beda l-mixja lejn il-konversjoni. Mela ma rridux inkunu riġidi bħal Farizej u lanqas suppervji bħal Iben il-Kbir. Irridu niftħu qalbna kif dejjem itenni Papa Franġisku għal Ħniena u l-Maħfra t’Alla.

Il-laqgħa spiċċat bi kwotazzjoni ta’ Santu Wistin: INTI QATT MA TITLAQNA MULEJ IMMA AĦNA NSIBUHA DIFFIĊLI LI NIĠU LURA.

 ABBUŻ MILL-ĦNIENA TA’ ALLA? IT-3 ĦADD TAR-RANDAN – 28 TA’ FRAR 2016

Il-laqgħa bdiet bil qari tal-Vanġelu skond San Luqa, Kapitlu 13, versi 1 – 9

Dan il-vanġelu jinqasam f’żewġ partijiet.  L-ewwel parti titratta fuq żewġ disgrazzji: it-taħlit ta’ demm Lhudi mad-demm tal-offerti lill-allat, u l-mewt ta’ tmintax-il raġel meta waqgħa t-torri ta’ Silwe.  Kien hemm min beda jistaqsi jekk dawn id-disgrazzji seħħewx minħabba li dawk in-nies, jew l-antenati tagħhom, kienux dinbu.  Ġesu’ qal li ma jfissirx hekk.  Hu jagħmlilna stedina – jekk aħna ma nindmux, ninqerdu agħar minn dawn.

Aħna ħafna drabi norbtu r-relazzjoni tagħna m’Alla fuq relazzjoni daqsxejn infantili – jekk nagħmel it-tajjeb, itini l-premju, u jekk nidneb jikkastigani.  Din kienet l-attitudni fl-Antik Testment, u anke fi żmien Ġesu’. ‘Aħna wkoll, wara elfejn sena, għadna nirraġunaw hekk.  Meta xi ħadd jgħaddi minn disgrazzja issib min jgħid “Laħqu Alla” jew “Iva x’għamilt biex ġrali hekk?”.  Jekk ngħidu li Alla jieħu gost bl-għawġ jew jixtieqilna d-deni nkunu qed niżbaljaw bl-ikrah.  Jekk Alla jitlob minna li ngħinu u nħennu, imbagħad Hu, li ta ħajtu għalina, ser jixtieqilna d-deni?  Mela għalfejn jiġri dan kollu?

L-għawġ, il-mard, id-disgrazzji, etċ, huma konsegwenzi tad-dnub oriġinali.  Meta l-bniedem daq il-ħażen, daħal dan kollu fid-dinja.  Alla ma jridhomx dawn.  Tant hu hekk li għadda l-biċċa l-kbira tal-ħajja tiegħu pubblika jfejjaq u jkeċċi x-xjaten.  Allura la Alla hu omnipotenti, ma jistgħax jagħmel xi ħaġa?  Alla jippermetti dan kollu għax minnhom irid joħroġ xi haġa ta’ ġid, jekk aħna ngħixu dawn iċ-ċirkostanzi kif irid Hu.  Nieħdu l-mard.  Il-marid għandu ċans jitgħallem ma jorbotx qalbu ma’ din id-dinja, japprezza dak li veru hu ta’ valur, japprezza iktar il-ħajja, jafda ruħu f’idejn Alla, u jħossu jiddependi iktar fuq il-ħniena t’Alla.  għall-qraba tiegħu, dawn jitgħallmu jieħdu ħsieb u jduru bil-marid u jikru aktar fl-imħabba lejn min qed ibati.

Waqt il-mard, u kull inkwiet ieħor, għandna nitolbu hekk: l-ewwel nitlob għall-qawwa biex naffronta din id-diffikulta; it-tieni nitlob biex jgħini u jdawwalli moħħi biex nagħraf x’ġid nista’ noħroġ minn dan il-għawġ; it-tielet nitlob bex jekk hu ta’ ġid għalija jeħlisni minn dan kollu.  Din hi l-konverżjoni li qed jitlob minna Ġesu’.  Nikkonvertu jfisser ma nħallux l-għawġ ikissirna, imma nħallu lil Ġesu’ jkisser l-għawġ.  M’humiex il-problemi li jkissruna, imma l-mod kif nirreaġixxu għalihom.  Irridu nagħmlu din il-konverżjoni biex ngħixu dan kollu fid-dawl t’Alla, għax Hu ħareġ rebbieħ fuq il-ħażen.  Aħna rridu nilqgħu lil ġesu’ fil-qalb tagħna biex Hu jirbaħ il-ħażen fil-ħajja tagħna.  L-għawġ ħafna drabi hu ikbar minna, imma Alla hu ikbar minn kull għawġ.

It-tieni parti tal-vanġelu hi r-rakkont tal-parabbola tas-siġra tat-tin.  Ġesu’ qed iqabbel il-poplu ma’ din is-siġra.  Alla jiżra’ l-Kelma Tiegħu fil-qalb tagħna biex minna joħorġu opri ta’ ġustizzja, opri ta’ ħniena, u opri ta’ mħabba.  Dawn imorru flimkien.  M’hemmx waħda mingħajr l-oħra.  Il-ġustizzja hi li nagħti lill-oħrajn dak li hu tagħhom.  L-imħabba hi li nagħti minn dak li hu tiegħi lill-oħrajn, għall-ġid tagħhom.  M’hemmx imħabba jekk m’hemmx ġustizzja.  Il-ħniena hi li nħoss għall-ieħor – mhux nitħassru (pity), imma li nħoss il-ħtiġijiet tiegħu daqs li kieku huma tiegħi u nwieġeb għalihom (mercy).  Il-ħniena twassalna għall-imħabba.  Dawn it-tlieta huma l-frott li jrid ġesu’.  Alla jfittex minn kull wieħed minna dak li jiżra’.  Alla jrid li fiċ-ċokon tagħna nagħmlu l-parti tagħna.  Naċċettaw il-konverżjoni biex meta Alla jfittex il-frott, isib.

Wara din l-ispjega kien hemm ftit ħin għall-mistoqsijiet.

Hawnhekk saret riferenza għall-inklużjoni soċjali, li tfisser li naċċettaw lill-kulħadd fiċ-ċrieki tagħna.  Bħala nsara, aħna fid-dmir li ngħixu l-inklużjoni soċjali.  Ma jfissirx li biex nagħmlu hekk irid ikun hemm inklużjoni ekkleżjali.  Nies li koxjentament ma jridux jgħixu l-ħajja nisranija, ma jistgħux jipparteċipaw fil-ħajja sagramentali, sakemm ma jindmux u jibdlu ħajjithom.  Aħna lkoll midinbin u qegħdin f’mixja ta’ konverżjoni.  Fil-knisja hemm post għal kull midneb b’kundizzjoni li jindem, anke jekk jerġa jaqa’, u li għandu r-rieda li jgħix il-ħajja nisranija.  Kulħadd għandu ċ-ċans li jimxi l-mixja tiegħu.

Saret riferenza wkoll għall-Magħmudija.  Din għandha tingħata jekk hemm il-kundizzjoni meħtieġa, jiġifieri, li t-tfal jitrabbew f’ambjent li jgħinhom jikbru fil-ħajja nisranija.

Il-laqgħa għalqet bil-kwotazzjoni ta’ Mahatma Gandhi:

“The future depends on what you do today”

Ġesu’ jgħidilna “Jekk ma tindmux, tintilfu”

Evanġelju ta’ San Luqa 5: 1-11.

Għan-nies tal-qedem il-baħar kien il-post fejn jgħammru l-ispirti ħżiena u l-qawwiet tal-ħażen. Ix-xbiha ta’ bniedem maħkuk mill-ħażen kienet għalhekk xbiha ta’ bniedem maħkum mill-qawwiet tal-ħażen li joħduha kontra Alla u li jwasslu għat-telfien ta’ dejjem. Meta Ġesù qal lill-appostli li se jagħmilhom sajjieda tal-bnedmin, kien se jafdalhom il-ħidma li jsalvaw lin-nies mill-ħakma tad-dnub u tal-ħażen u jwassluhom għall-ħelsien ta’ wlied Alla. Il-ħidma tas-salvazzjoni li Ġesù kien irċieva mingħand missieru, issa kien qiegħed jagħtiha lil Pietru li min-naħa tiegħu kien qiegħed iwassalha għall-Knisja kollha.

Fl-evanġelju tal-lum Ġesù qiegħed jistedinna biex nieħdu sehem minn din il-Knisja. Sabiex inkunu sajjieda tal-bnedmin, jeħtieġ li l-ewwel Alla juri lilu nnifsu lilna. Hu se jurina t-triq u jagħtina l-qawwa.

Jeħtieġ li Alla jagħtina r-rigal tal-fidi li fih Alla hu l-aktar qaddis u l-aktar għoli u fi Kristu jagħtina sehem mill-għerf u l-qdusija tiegħu. Jeħtiegħ imbagħad nagħrfu li aħna midimbin. Il-gwaj hu li huma ħafna dawk in-nies li ma jammettux li huma midimbin u jagħżlu li aktar iwaħħlu f’ħaddieħor u jippuntaw subgħajhom lejhom. Bħala bnedmin għandna bżonn nagħrfu li filwaqt li weħidna m’aħna kapaċi nagħmlu xejn; ma’ Ġesù aħna nkunu kapaċi nagħmlu kollox.

Nemmnu li Kristu qiegħed fostna u jgħammar fina? Kienu diversi d-dixxipli li bdew jimxu wara Ġesù imma kienu ftit dawk li kienu lesti jibdew jitfgħu ix-xbiek, li jikkommettu ruħhom għal din il-missjoni ta’ Ġesù. Sabiex tkun sajjied tajjeb, trid tkun ippreparat tajjeb u l-istess biex tkun sajjied tal-bnedmin, irridu nkunu ppreparati. F’din is-sajda tal-bnedmin, irid ikun Ġesù li jmiss il-qlub tan-nies u mhux aħna biss li se naħdmu għas-saltna t’Alla. Il-Mulej tana s-setgħa però l-qawwa irridu nġibuha mingħand Alla. Kull wieħed u waħda minna għandna d-doni u t-talenti tagħna u ta’ kullħadd huma differenti, però kull wieħed u waħda minna għandna l-missjoni tagħna u aħna msejħin sabiex naqduha. Irridu nkunu xhieda ta’ Kristu fix-xogħol tagħna, hu x’inhu. Irridu nkunu xhieda ta’ Kristu mill-mod li bih ngħixu, bl-attitudni tiegħek u bi kliemek. In-nies li niltaqgħu magħhom kuljum huma l-missjoni tagħna; żgur li mhux bilfors li mmorru x’imkien fil-missjoni. Bħala nsara irridu nimxu fit-triq li Ġesù pprepara għalina.

 Irridu nibdew mid-dar tagħna stess, mat-tfal pereżempju, li forsi rridu nikkoreġuhom biex ikomplu mexjin fit-triq it-tajba. Irridu nintervjenu meta xi ħadd qiegħed iwassal messaġġ ħażin. Kullħadd għandu din il-missjoni u m’għandniex naqtgħu qalbna li nidhru koroh jew jidħaq bina b’dak li qed nagħmlu. J’Alla meta niltaqgħu ma’ Alla wiċċimbwiċċ ma’ Alla wara ħajjitna fuq din l-art ma jgħidilniex li ma jafniex għaliex ma nkunux wettaqna dak li ħejja għalina hu mal-oħrajn.

Tajjeb li bħala bnedmin ma nħallux l-istejjer negattivi biss jinfluwenzawna. Jeżistu però ħafna stejjer pożitttivi li aħna mdawra bihom. F’din is-sena ddedikata mill-Papa Franġisku għall-ħniena tajjeb li naraw kemm hu mportanti li nuru ħniena ma’ dawk ta’ madwarna. Huma ħafna dawk li jipprattikaw il-ħniena kuljum, fil-familji, fuq ix-xogħol u kullimkien. L-insara jridu jkunu kapaċi jirriflettu fuq dak li qed jagħmlu. Dan jista’ jsir b’mod speċjali bil-kelma t’Alla, mhux bil-quddiesa biss. Tajjeb li nsibu ftit ħin kuljum li fih nużaw il-Kelma t’Alla biex ikollna t-trankwillità ħalli naffaċċjaw il-ħajja tagħna bl-għajnejn ta’ Ġesù. Irridu nidraw nintelqu f’idejn ir-rieda t’Alla.

Ġesù lil Pietru qallu biex jixħet ix-xibka fil-fond, jiġifieri f’post fejn m’hemmx sodizza u m’hemm xejn ċert. Ejjew nilbsu n-nuċċali ta’ Ġesù ħalli naraw dak li qiegħed iseħħ madwarna bl-għajnejn ta’ Ġesù. Il-fond li semma’ Ġesù huwa l-qtiegħ il-qalb u l-problemi ta’ kuljum; Ġesù jridna nitfgħu ix-xibka tiegħu f’dawn l-abbissi, f’dawn il-problemi li niltaqgħu magħhom. It-talb għandu jkun l-għodda tan-nisrani biex ngħinu lil dawk ta’ madwarna. It-talb u l-Kelma t’Alla għandhom ikunu l-għodda li permezz tagħhom inwettqu din il-missjoni ta’ Ġesù. Bħall-appostli rridu ngħidu x’għamel Alla f’Ibnu Ġesù.

Kwotazzjoni: “Christian witness is concrete, words without actions are empty.” (Ix-xhieda nisranija hija konkreta u b’saħħitha, kliem mingħajr azzjoni huma vojta). Papa Franġisku.

Talba: Mulej Ġesù, agħtini d-dawl u d-dehem biex infittex biss dak li jibnini bħala dixxiplu tiegħek u li naħrab dak kollu li jfixkilni, iħawwadni u jaqtagħni minnek. Ammen.

L-ewwel  laqgħa tas-sena 2016 ġie trattat l-Evanġelu ta’ San Luqa (Lq 3, 15-16, 21-22) ‘Il-Magħmudija tal-Mulej’.   Wara li nqara l-Evanġelu ġew diskussi siltiet minnu.

L-ewwel ma ntqal hu li l-Antik Testment jagħlaq bil-profeti u Ġwanni l-Battista kien l-aħħar profeta li ġie jħejji t-triq tal-Mulej.  Skont l-evanġelista Ġwanni kienet jgħammed bl-ilma, rit li kien jintuża biex inaddaf u mhux biex jaħfer id-dnubiet.  Bid-dettal li Ġesù tgħammed l-aħħar, l-evanġelista ried jurina li xogħol Ġwanni l-Battista issa kien lest u li kien ġej xi ħadd aħjar.  L-evanġelista jurina lil Ġesù jitlob għax Ġesù kien iħobb jitlob.  It-talb tagħna huwa meta nitkellmu m’Alla.  Ħajjitna trid tkun ħajja ta’ talb.

Kif Ġesù tgħammed, jidher l-Ispirtu s-Santu f’forma ta’ ħamiema bajda u jinstema’ “Inti Ibni l-għażiż; fik sibt l-għaxqa tiegħi”. Is-simbolu tal-ħamiema tista’ tkun interpretata bħala purità u dgħufija.  Dan ried juri messaġġ li Alla bagħat lil Ġesù fuq missjoni ta’ purità u maħfra u mhux ta’ ġlied u tifrik biex jirbaħ!  Ġesù kellu jbagħti biex jifdi d-dnubiet tagħna. Isaija wkoll ħabbar li l-Messija kellu jbgħati.  Imma l-Lhud stennew Messija li jistagħna u jkun b’saħħtu biex jirbaħ lir-rumani ħalli jieħdu l-kmand f’idejhom!

Aħna li nafu li ġie l-Messija, konna kapaċi nilqgħuh jew ħallejnih għaddej?  Jekk naraw nies ta’ kulur ieħor jew nies li qed ibagħtu, x’nagħmlu ngħinuhom jew nagħlqu għajnejna? Jekk hemm xi ħadd miġġieled magħna nistennew lilu li jiġi għalina jew immorru aħna?  Aħna bħala Kristjani qed nagħtu eżempju lil ħaddieħor jew qed isir bil-kontra?  Aħna msejjħin biex nerfgħu u ngħinu l-problemi ta’ ħaddieħor billi nerfgħu s-salib tagħhom.  Ġesù jgħidilna ħobbu kif tħobbu lilkom infuskom u jispiċċa biex jgħid ‘ħobbu kif ħabbejtkom jien’.  Ġesù spiċċa biex miet fuq is-salib li tfisser li Hu ta kollox! U hekk aħna msejjħin biex ngħatu lil kulħadd.  Dik li tfisser il-magħmudija. Ġesù ma kellux bżonn jitgħammed għax ma kellux dnub imma tgħammed biex juri solidarjeta’ magħna li aħna midinbin u b’hekk qaddes il-magħmudija.  Jurina li l magħmudija għandna bżonnha.

L-laqgħa Prayer Cafe,bdiet bit-talba tal-Moviment u wara sar introduzzjoni fuq it-Tielet Ħadd tal-Avvent. Il-Ħadd li jirraprezenta l-Ferħ.

L-Avvent bħal Randan hu żmien ta’ penitenza. Wieħed hu mistenni li jagħmel sagrifiċċji biex imbagħad inkunu nistgħu nesperjenzaw il-Milied jew il-Qawmien ta’ Kristu mill-mewt (skond iż-żmien) . Fl-avvent żmien parties, drinks u ikliet l-penitenza donna saret issir b’għoti ta’ karita. Bħala nsara mistennija li nagħtu  mingħajr ma nħallu l-id ix-xellugi tkun taf x’inhi tagħmel il-leminija. Jiġifieri nagħtu mingħajr daqq tat-trombi.

Qabel beda l-Avvent sal-Festa ta’ Kristu Re,  il-vanġeli kellhom messaġġ kemmxejn tal-biża’ ..l-ibħra jqumu…jiġi u jsibu rieqed..imma f’dan il-Ħadd il-vanġelu jgħidilna biex ma nibżgħux għax wara dan kollu ġej il-MESSIJA.

Il-liturġija ta’ nhar il-Ħadd tagħtina ħafna kuraġġ. Qisha simbolu tal-ħajja tagħna. Meta nkunu għaddejin minn żminijiet koroh, li kullħadd jaddi minnhom, f’qalbek tibda tgħid tibżax dan għad jaddi u anke min jibda jiprova jagħtik kuraġġ jgħidlek ‘ Kuraġġ issa jaddi qed nitlob għalik.’

Hawn inqara l-vanġelu ta’ nhar il-Ħadd li ġie mehud minn Luqa 3:10-18

Il-qari ta’ l-Ewwel Lezzjoni u S-Salm ta’ nhar il-Ħadd huma qari ta’ Ferħ . Anke l-qassis f’dan il-Ħadd jilbes ilbies roza sinjal ta’ Ferħ.   Fl-ewwel lezzjoni nsibu: “infexx fil-hena u ifraħ b’qalbek kollha…minħabba fik jithenna b’hena kbir..fi mħabbtu jġeddek, jinfexx minħabba fik f’agħjat ta’ ferħ,bħallikieku f’jum ta’ festa.” “Aqbeż bil-ferħ, għanni…għax kbir hu f’nofsok il-Qaddis ta’ Israel.” Nsibu fis-salm. Fit-tieni lezzjoni mbagħad San Pawl jistieden lil insara Filippini biex “Ifirħu dejjem fil-Mulej..” Il-vanġelu mbagħad huwa aktar fuq nota kwieta għalkemm it-tema tibqa’ waħda ta’ ferħ u ta’ stennija ħerqana għal miġja tal-messija. “Il-poplu kien qiegħed jistenna ..”

Lil Ġwanni nsibuh bħala l-prekursur – dak li ġie qabel Ġesù. Il-vanġelu maqsum fi tliet partijiet. In-nies kienu jsegwu xi jgħid Ġwanni b’interess, hu kellu ħafna dixxipli warajh – staqsewh “X’għandna nagħmlu?” Nsibu tliet tipi ta’ nies: il-folla ġenerali: lil dawn Ġwanni qalilhom biex jaqsmu dak li għandhom mal-oħrajn. U dawn xi 2 ilbiesi kien ikollhom mhux gwardarobba mimlija bħal ħafna minna llum! Mbagħad kien hemm ukoll il-pubblikani li kienu jiġbru t-taxxi mill-poplu biex jgħadduhom lil ħakkiema tal-poplu, ir-Rumani. Lil dawn Ġwanni qalilhom biex ma jissikkaw lil ħadd b’taxxi żejda. Kien hemm ukoll suldati jisimgħuh u lil dawn Ġwanni ħeġġiġhom biex jikkuntentaw bil-paga tagħhom u ma jisirqu lil ħadd b’theddid.

Dan kollu jgħodd għalina lkoll llum, għandna lkoll nagħtu minn dak li għandna, u nkunu kuntenti bil-pagi li għandna. Bħala nsara għandna nkunu ta’ eżempju għall-oħrajn billi ħina nagħtuh kollu fuq ix-xogħol u mhux niskartaw jew nitilqu qabel il-ħin. Għandna nħallu lil ħaddieħor jgħaddi ħinu fuq il-post tax-xogħol trankwill u mhux nagħmlu l-ħajja tal-oħrajn infern.  Dawn huma l-affarijiet li jagħtu xhieda li aħna nsara.

F’dan il-Vanġelu naraw ukoll l-umiltà ta’ Ġwanni l-Battista. Għalkemm kellu ħafna nies segwaċi tiegħu ma ħalliex li dan jitla’ għal rasu. Meta kien jiġi mistoqsi jekk hux hu l-mistenni Messija. Hu kien jgħidilhom li lanqas jistħoqqlu jkun is-serv tiegħu. “ ..jien ma jistħoqqlix inħoll il-qfieli tal-qorq tiegħu..” Dak iż-żmien kellhom uzanza li meta jiġi mistieden id-dar il-qaddejja kienu jaħslulu saqajh. Din it-tip ta’ umilta rajnieha ukoll fil-Madonna mat-tħabbira tal-Anġlu li kellha tkun Omm Alla ma ħassithiex superjuri iżda wieġbet ‘Hawn hi l-qaddejja tal-Mulej…’ Huwa importanti li naħdmu b’umiltà.

Ir-rwol tagħna llum mhuwiex differenti minn ta’ Ġwanni l-Battista. Aħna l-insara; sew jekk lajċi, sew jekk reliġjuzi importanti li nkunu l-prekursuri ta’ ĠESÙ. Importanti li nressqu n-nies lejn Ġesù u l-konverżjoni fil-ħajja tagħhom.

Is-sena tal-Ġublew tal-Ħniena bdiet fit-8 ta’ Diċembru 2015, solennità tal-Immakulata Kunċizzjoni. Din se tkun sena tal-Grazzja u tal-Maħfra. Fl-antik, il-Poplu Lhudi kien jiċċelebra s-Sena tal-Ġublew kull 50 sena. Skont il-Levitiku l-iskjavi u l-priġunieri kienu jiġu meħlusa, id-djun maħfura u l-ħniena ta’ Alla tkun murija b’mod speċjali. [Levitiku 25:8-23]

[Lev:25:8] “Mbagħad tgħodd seba’ ġimgħat ta’ snin, seba’ snin għal seba’ darbiet, li jġibu disgħa u erbgħin sena. [Lev:25:9] U ddoqq it-tromba fl-għaxra tas-seba’ xahar, f’jum l-espjazzjoni, u ssemmgħu t-trombi ma’ artkom kollha. [Lev:25:10] Tqaddsu intom il-ħamsin sena u tniedu  l-ħelsien fl-art lil kull min jgħammar fiha. Tkun is-sena tal-ġublew għalikom: kull wieħed jerġa’ għal li kellu u għal ma’ niesu.[Lev:25:11] Tkun għalikom il-ħamsin sena, is-sena tal-ġublew; la tiżirgħu u lanqas taħsdu milli tnibbet l-art, u anqas tiġbru l-għeneb mid-dwieli bla żbir. [Lev:25:12] Għax hu żmien il-ġublew, żmien li għandkom tqaddsu, u tieklu mir-raba’ dak li trodd l-art.

Is-Sena tal-Ġublew  tikkonsisti f’maħfra ġenerali, indulġenza miftuħa għal kulħadd, u l-possibiltà ta’ tiġdid tar-rapport tan-nisrani ma’ Alla u mal-proxxmu.  Għalhekk is-Sena tal-Ġublew trid tkun opportunità ta’ approfondiment tal-fidi u biex il-ħajja nisranija tkun mgħejxa b’aktar xhieda awtentika.

Ir-rit tal-bidu tas-Sena tal-Ġublew ikun jikkonsisti fil-ftuħ tal-Porta Santa li fi snin oħra dan jinżamm dejjem magħluq.  Dan ir-rit jissimbolizza li matul din is-Sena tal-Ġublew, l-insara qed ikunu mogħtija passaġġ ieħor straordinarju fil-mixja spiritwali tagħhom. F’ Malta l-Ħamis 10 ta’ Diċembru nfetaħ Bieb il-Ħabs minn Mons Grech u qal: Jalla din is-sena tkun is-sena ta’ konverżjoni .

Għalina li aħna nsara parteċipanti, rridu nagħmlu din il-mixja ta’ konverżjoni kuljum u importanti li nagħmluha bil-ferħ. Irridu nkunu pozitivi. Li timxi wara l-kmandamenti mhijiex faċli, anke li nsegwu b’mod regolari r-regolamenti tagħna b’konsistenza …naqraw il-Kelma t’Alla kuljum, mmorru l-quddiesa kull nhar ta’ Ħadd u jekk possibli anke mal-ġimgħa, li nersqu b’mod regolari lejn is-sagrament tal-qrar. Xi kultant ngħaddu minn konflitti fina nfusna speċjalment jekk nkunu qegħdin nagħmlu ħilitna biex insegwu r-regolamenti kollha u l-ħajja ttik bil-ħarta – hija ħaġa naturali li nistaqsu imma ‘Għaliex jien?’ Dan ma għandux jaqtagħlna qalbna. Meta l-kuxjenza tagħna hi safja – fina nsibu ċerta paċi.  Ma nistgħux nikkonvertu lil ħaddieħor jekk aħna nfusna m’aħniex konvertiti.

Ejjew inkunu ġenituri li ntellgħu lil uliedna bi spirtu Kristjan. Familja Kristjana hi familja ferħana. Id-dar issir post fejn kull membru jkollu seba’ mitt sena biex jerġa’ jirritorna fiha.

L-għalliema wkoll huma bħal Ġwanni l-Battista. Għalliema Kristjana jridu jkunu konxji mill-azzjonijiet tagħhom f’kull mument quddiem l-istudenti, hu x’inhu s-suġġett li qegħdin jgħallmu. Student jista’ lanqas biss juża l-materjal li tgħallem fis-suġġett li studja iżda l-personalità tal-għalliem/a tiegħu jibqa’ jiftakarha.

Mela hu x’inhu rwol tagħna fil-ħajja, l-aktar mod effettiv kif ngħaddu lil Kristu lil oħrajn hu bl-ezempju ta’ ħajjitna. Bħal Ġwanni l-Battista xgħolna hu li nressqu n-nies lejn Ġesù mbagħad nħallu Lilu jagħmel xgħolu.

Fl-istess ħin, Ġesù għandu bżonn il-koperazzjoni tagħna, Hu jaħdem bil-mezz ta’ kull ġenitur, għalliem u dawk kollha li għandhom sejħa biex jifformaw in-nies. Pietru u Indri kienu dixxipli ta’ Ġwanni l-Battista sakemm iltaqgħu ma Ġesù u marru warajh. Imbagħad kienu huma li ressqu nies oħra biex isiru jafu u jesperjenzaw lil Ġesù. Dan hu l-disinn u t-tifsira tal-evanġelizzazzjoni, li twassal il-vanġelu lill-oħrajn.

Il-laqgħa tkompliet bi kwotazzjoni tal-qaddisa Mother Theresa: “ Meta persuna fqira tmut bil-ġuħ, dan ma jkunx seħħ għax Alla ma jimpurtahx minnu jew minnha. Seħħ għaliex la inti u lanqas jien ma ridna nagħtu lil dik il-persuna dak li kellha bżonn.

Inti u jien, aħna l-knisja le? Aħna rridu naqsmu  dak li għandna ma l-poplu tagħna. It-tbatija tgħezisti llum għaliex in-nies flok jagħtu u jaqsmu dak li għandhom, qegħdin jaħżnu.

Ġesù għamilha ċara ħafna. “Dak kollu li tagħmel mal-iċken minn ħuti, qiegħed tagħmlu miegħi.”

Agħti tazza ilma, tkun qiegħed tagħtiha lili. Aċċetta tifel ċkejken, u tkun qed tirċievi lili.”

Fl-aħħar għalaqna l-laqgħa bit-talba tal-Missierna.

Nistiednek lilek li qrajt dan il-blog tingħaqad magħna nhar il-ġimgħa 18 ta’ Diċembru tieħu kikkra kafe magħna u taqsam magħna l-Kelma tal-Mulej.

NEĦĦU N-NIKET – IT-TIENI ĦADD TAL-AVVENT – 6 TA’ DIĊEMBRU

Il-laqgħa bdiet bit-talba tal-Moviment, u mbagħad inqara l-vanġelu minn San Luqa, Kapitlu 3, versi 1 – 6, li jitkellmu fuq Ġwanni l-Battista: “Leħen ta’ wieħed jgħajjat fid-deżert….”

Wara saret introduzzjoni, u mbagħad infetħet id-diskussjoni bil-mistoqsija: “Taħsbu li l-bidla li ġab Gesu’ qed isseħħ fi żminijietna?”  Għalkemm hemm min jgħid li morna l-baħar, pero’ fil-fatt it-tajjeb għadu jseħħ, imma ma jagħmilx ħoss bħal ħażen. Il-qawwa t’Alla qegħda fuqna; il-fanatiċiżmu fir-reliġjonijiet minn dejjem kien jeżisti, imma l-bidla li ġab Kristu għadha tinħass – mhux dejjem turi ruħha bl-istess mod, imma teżisti u tibqa’ sal-aħħar taż-żminijiet.

Ġesu’ huwa dejjem magħna.  Il-Milied għandu jkun is-sena kollha.  Kieku taf x’bidla jkun hawn!  Għalkemm dan iż-żmien ġie kkommerċjalizzat, għandna nkunu aħna li npoġġu l-Ġesu’ fl-ewwel post fil-Milied.  M’għandniex naqtgħu qalbna, inkunu fejn inkunu.  Jista’ jkun li jidħqu bina, li jwaqquna għaż-żufjett.  Ma rridux nibżgħu nuru t-twemmin tagħna, ma noqogħdux lura milli ngħidu kelma tajba.  Il-Mulej itina l-qawwa.  Aħna, li verament konvinti, għandna bżonn li nintervjenu.  Il-Mulej qed isejjħilna biex naħdmu fl-għalqa Tiegħu.  Mhux biżżejjed li nattendu l-laqghat u nikbru flimkien, imma rridu mmorru hemm barra u nwasslu l-Kelma t’Alla.

Ġesu għandu jkun f’qalbna dejjem, imma forsi żmien il-Milied irattbilna u jiftħilna qalbna biex inġibu iktar għaqda u iktar qbil, biex b’hekk inkunu nsara ta’ veru u iktar twajba ma’ ta’ madwarna.

Kieku nimxu fuq l-eżempju tal-Papa Franġisku, naċċettaw lil kulħadd l-istess.  L-ewwel mistoqsija li għandna nagħmlu hi: “Xi jfisser il-Milied għalija? Dan il-Milied se jkun differenti mill-oħrajn?”  Veru li nagħmlu ħafna preparamenti, imma qalbi hi lesta għal dan il-Milied?  Ħa jkun hemm Ġesu’ fiha, jew ħa noħroġ lil Bambin biex inżejjen u nerġa nżarmah wara li jgħaddu l-festi!  X’inhu l-iktar importanti: it-tiżjin, jew li Ġesu’ jitwieled ġo qalbna?

Il-Milie
d irridu nħossuh tassew jekk aħna nagħmlu xi ħaġa li tbiddel lilna u ta’ madwarna.  Ġesu’ mhux qiegħed hemm biex noħorġuh mill-kaxxa fil-Milied u nerġgħu nerfgħuh fil-kaxxa wara l-Milied.  Kieku ma nsibux fejn inkunu rfajna l-Bambin nieħdu xokk.  Jiġrilna hekk jekk ma nsibuhx f’ħajjitna?  U dan ngħaqqduh ma’ dak li qed jiġri fid-dinja bħalissa.  Ħafna nies, b’solidarjeta’ ma’ dak li ġara fi Franza, żebgħu il-profil tagħhom fuq facebook bil-kuluri ta’ dan il-pajjiż.  Kieku kull darba li nagħmlu dnub niżbgħu il-profil tagħna aħmar, kieku kulħadd jispiċċa b’dan il-kulur, għax xi ftit jew wisq kollha nonqsu.

Il-Milied iġib festi kbar fil-Liturġija ta’ qabel u anke wara l-Milied – liturġija qawwija li tant inkunu “fis-sakra tal-Milied” li lanqas nifhmu is-sinifikat tagħha.  Ġesu’ se jitwieled, imma xi jfisser it-twelid ta’ Ġesu’?  Il-Liturġija tal-Knisja tagħtina tweġiba:

il-Martirju ta’ San Stiefnu (26 ta’ Diċembru), San Ġwann il-Battista (27 ta’ Diċembru), l-Innoċenti (28 ta’ Diċembru).  Kemm minna nikkommemoraw il-qtil tal-innoċenti?

Ma nistgħux niltaqgħu ma’ Kristu u nibqgħu fejn inkunu.  Hu biss jista’ jġib l-aqwa rivoluzzjoni fil-ħajja tagħna, jiġifieri dik li tista’ tinżel f’qalb il-bniedem biex tbiddlu mill-qiegħ.  Għalhekk aħna għandna għażla: il-ħajja fi Kristu, li twassalna għall-ħajja ta’ dejjem, jew il-mewt, li twassalna għat-telfien ta’ dejjem.  Ejjew mela nduru b’indiema lejn Ġesu’, inħalluh jibdilna u jsawwarna bl-Ispirtu qaddis Tiegħu.  Qegħdin fl-Avvent, żmien ta’ tħejjija.  Ejjew mela nagħmlu deċiżżjoni bis-serjeta’ sabiex lil Kristu, u lil Kristu biss, inħalluh ikun is-Sid ta’ ħajjitna, biex jibdilna u jqaddisna sakemm iwassalna għall-perfezzjoni.  Ma nħallux li dan il-Milied ikun bħall-oħrajn.  Irid ikun Milied speċjali – Milied ta’ bidla, ta’ twelid mill-ġdid għal ħajja aħjar fi Kristu Ġesu’.

L-għeluq sar bil-kliem ta’ San Pawl lill-Efesin: “Nitolbu lill-Ispirtu s-Santu sabiex ifejjaqna mid-dnub u jdawwalna u jsaħħaħna biex ngħixu bħala wlied id-dawl” – b’kull ma hu tajjeb, b’kull ma hu ġustizzja, b’kull ma hu veru.

Il-laqgħqa għalqet b’dan il-ħsieb: San Ġwann kien jgħammed.  Il-magħmudija hi att ta’ maħfra. It-teologu Amerikan Karl Paul Reinhold Niebuhr kien qal hekk fuq il-maħfra: “Forgiveness is the final form of love”.